إقتباس الرسالة الأصلية كتبت بواسطة هلالي الظهران مالك الا خشمك لو هو أعوج يُحكى بأنه تم تدشين هالمثل في أحد هالايام الوطنيه اللي تمر بالمملكه ذخرها الله للاسلام والمسلمين.. ياالربع احيانا يجيني احساس مدري وشو.. احس ان ودي أهاجر لبلد ثاني.. ومايردني الا حبي لاهلي وجراك باعشن << الله من زود الولاء للوطن

إقتباس بتقولون وش جاه ذا مايحب ديرته؟! لا يااخوان لاتفهموني غلط.. والله ذا الديره على الراس من فوق.. وحبها بالقلب سادي.. مهوب علشان اني شربت من مائها ودعست على ترابها واستنشقت هوائها واستمتعت بزقزقة عصافيرها .. لا والله الكذب خيبه هذي المويه عندنا نصها حالي ونصها مالح.. وترابها ماشفنا منه الا الشهبان اللهبان.. وشمشمة هوائها ماجانا منه الا الغبار والكتمه.. وماهنا زود زقزقة عصافير مافيه الا غربان تناعق.. ايه اقول حبها بالقلب سادي لان هالديره تعبد ربك فيها وانت مرتاح حتى لو بعدت تلقى من يساعدك ويناصحك ويحرص عليك.. حبها بالقلب سادي لان هالديره تروح وتجي فيها وانت امن على نفسك واهلك ومالك.. حبها بالقلب سادي لانها تعطي وتعطي وتعطي بس تحتاج من يعطيها.. هالديره تعطيك فرص ماتحلم فيها لو كنت بمكان ثاني.. بهالديره بامكانك تصير دكتور وبامكانك تصير سيكيورتي!! كلن وهمته ورغبته.. واللي يبي يعرف قيمتها يروح يسال أي اجنبي فيها من اكبر راس لاصغر راس.. يشهد الله ان هالديره على الراس من فوق واساسا مدري وشلون متحمله خيستنا! وحنا كل ماطق عود بحصاة حطيناه فيها.. أجل هذاك اليوم طالعين البر وواحد من العيال يبي يغسل يده ومالقى صابون قال المفروض يوفرون حمامات بالبر .. وكل كلمه والثانيه المفروض يوفرون ويسوون ويعملون.. طيب وبعدين؟ وأنا وانت وحنا ياهالشعب وش سوينا غير اننا نملى الدنيا صراخ؟ وايش شفنا غير الحكي والدندره على قل سنع؟! مشكلتنا نبي كل شي يوصل حدنا بدون مانقدم مقابل.. ياليت انها توقف على كذا الا انك بعد ماتسلم من الشر!

معليش اختلف معك .. لنا حق ع الوطن مثل ماله حق علينا ...

إلا لزوم يوفروووووون .. وش حاجتهم ..

إقتباس يا الربع خلونا نفترض انك رجال تبي تقضي مشاويرك بالعصريه.. من تركب السياره وانت على أعصابك.. قسم بالله كانك في رالي من المصاقط والمحاد والهواش.. لدرجة ان الواحد يختم "درايفر" حق البلايستيشن في وقتها من كثر ماهو متعود على المصاقط!! طيب قضيت مشاويرك واذن المغرب ورحت للمسجد تبي تصلي.. والله يكرمكم تبي تدخل دورة المياه.. قسم بالله ماتقدر تكمل دقيقه من الخيسه اللي فيه.. يعني وين المشكله اذا دخل الواحد الدوره وتركها نظيفه مثل ماكانت! عندكم واحد اذا أزمت معه سيده على البيت بس احيانا الله يجيركم الزنقة تمون شديده وتضطر تدخل هالاماكن.. طيب الواحد كتم نفسه وتحمل هالخياس شلون ماتشمئز نفسهمن هالكتابات اللي على الجدران والابواب.. قسم بالله وقاحه لابعد الحدود.. وعجزوا فيهم المسئولين.. ان ضربوا الجدران بويه كتبوا عليها بالاقلام.. وان خلوها سيراميك استخدموا اقلام الفلومستر.. واخر شي احد هالمساجد ضرب جدران دوراته بويه سوداء علشان ماعاد يكتبون ومع كذا مانفع معهم جابوا الطامس وكتبوا فيه.. اعنبوا ابليسهم مدري وش يحسون فيه وهم يكتبون.. وفوق هذا وهذا المصيبه اذا لقيت الباب من دون قفل وهذا الغالب..(اعنبوا الحاله مزنوق ومكان حوسه وضيق وفوق هذا احتمال يدخل عليك احد باي لحظه ).. تلقى حارس المسجد شغلته ماغير تنظيف بهالدورات وتركيب في هالقفول .. ما اقول الا الله يلعن ابو الزنقات اللي تسوي فيك كذا.. طيب قضيت من الدوره ودخلت المسجد وصليت وجيت طالع ونفسيتك مرتاحه.. مايمديك تطلع الا وشيبان ماتعرفهم يبحلقون فيك.. تمر من جنبهم وتسلم.. يعطونك أشكل ويستمرون في البحلقه فيك.. تمشي وتخليهم لكن يناديك واحد منهم: ياولد .. تقوله سم ياخال.. يقول:انت ولد فلان بن فلان بن فلان .. تقوله لأ.. يقول: الا نفس الخشه! تاخذه على قد عقله وتقوله طيب انا ولده.. ينقز شايب ثاني ويقول: لاتكذب فلان مايجيب عيال!! اعنبوا ابليسك طيب علم خويك والا مستانسين وانتم تطقطقون على راسي .. طيب شياب ونتحملهم.. يدقون عليك اخوياك وتواعدهم في الملعب بتحضرون المباراه.. من تدخل المدرجات يضيق صدرك وتستغرب ان هالعينات باقي عايشه! شباب جايين يشكشكوا وخذ رقص ومسخره.. وشباب مايبقون لعن وسب الا وقالوه.. قسم بالله بعد كل مباراه تخرج بقاموس جديد!! طيب اعتبر نفسك تجاهلتهم وركزت في المباراه ماتدري الا وقارورة مويه مجاوبه مع قفاك .. تقفل معك وتطلع من الملعب.. تدق عليك أمك تقول ابي السوق.. تروح السوق انت وامك.. تغفل عنها شوي وتلقى بزر ماكمل 16 سنه قاعد يغازل امك!! تقوله: عيب يابابا اللي تسويه.. يقولك: العب غيرها انا حاجز البنت قبلك!! تسطره وتمسح فيه البلاط وتطلع من السوق.. وانت رايح البيت تمر البقاله تلقى البزران مهبلين بذا البنغالي .. اللي يسرقه واللي يهاوشه.. وان طردهم ومالقوا شي يسوونه تهاوشوا مع بعضهم!! تقفل معك ايضا وتطلع من البقاله.. وانت رايح للبيت تلقى واحد متلطم ومعه بخاخ ويكتب على احد هالجدران.. تبي تلحقه مهوب علشان تسطره لا .. بس لاجل تساله هاللي كتبه وش معناته؟! اجل عمركم شفتوا احد يكتب: " لا لتكميم الافواه.. نعم للديموقراطيه.. لا للحريه"!! اعنبوا ابليسه سامع كلمتين وجاي يكتبهم وليته يكتبها صح.. توصل البيت والاخلاق صفر من هالهمج.. ماتصدق على الله تغير وتريح شوي.. ومايمديك تحط رابع لقمه بحلقك الا وتسمع صوت تفحيط وقربعه بالشارع.. تنزل تشوف السالفه تلقى سيارتك مصقوع واللي صاقعها منحاش.. تقفل معك وتقول هين والله لافضحهم واشرشحهم بالمنتدى.. لاحظوا ياجماعه هالبلاوي كلها بمشوار كم ساعه.. اجل لو تكلمت عن معاناة 24 سنه كان احتجت خدمات ابو ريمان بكتابتها.. وبعد هذا كله ماتبوني أهاجر.. لكن يااخوان والله اللي في سماه ان الواحد مايتحمل يفارق هالديره الا وهو مشتاق لاهلها وبثارتهم وللناس وسواقتهم وللهمج وطفاقتهم.. ومثل ما قال راعي الموضوع: مالك الا خشمك لو هو أعوج..

..

مشكلة المجتمع السعودي في الجنس الخشن .. دائما نقص وين ما تروحووون

إقتباس وقولوا آمين معي.. الله لايعيد هاليوم الوطني ابد ابد الا وربعنا افضل الناس واحرصهم(طراه بن هذال ).. وان شاء الله نصير مضرب المثل بين العربان .. الى متى واليابانيين والامريكان احسن منا .. اللهم فرقهم شذر مذر واجعل مالهم الى سقر (اركد لاتحمس لاتجيب العيد)

آآآآآآآآآمين ..

إقتباس يا الربع انتظرونا غدا او بعد غد او بعد بعد غد وان ماجيت اعرفوا اني سحبت على ابو مندوبكم.. انتظرونا بالحلقه القادمه في "التاريخ يقص شعره كاريه" ..

إقتباس والله الود ودي اسدحها مرتن وااحده بس اللياقه ماش والوقت لكم عليه.. السموحه منكم والوعد بالحلقه القادمه بعنوان " تيتي تيتي زي مارحتي جيتي" أخوكم/ ابو سباستيان سابقا- ابو الدرداء حاليا <<لزوم رمضان بالتوفيق

هع هع هع ..

لله درك يا أبا الدرداء لا عدمناك ..

أختك ؛ ليز سابقا _ بيف باستري حاليا >>> لزوم رمضان

هلالي الظهران ؟؟؟؟؟؟؟؟؟

تدق عليك أمك تقول ابي السوق.. تروح السوق انت وامك.. تغفل عنها شوي وتلقى بزر ماكمل 16 سنه قاعد يغازل امك!! تقوله: عيب يابابا اللي تسويه.. يقولك: العب غيرها انا حاجز البنت قبلك!!


هذي الصراحة مهبولة.............. أشكرك أخوي على هذا الموضوع وننتظر الاجزاء البواقي

إقتباس يا الربع انتظرونا غدا او بعد غد او بعد بعد غد وان ماجيت اعرفوا اني سحبت على ابو مندوبكم

بنترقبك وننتظرك دائما ,, بس لاتسحب على مندوبنا وأبوه بكيفك !!

ياهلابك ياهلالي الظهران ,, وكل عام وأنت بخير ,,

ألا أقول : البرادعي يقرب لك ,, طراه الخفاش الأسود !!

تحياتي لك ,,

هلا وغلا

والله فقدت مواضيعك الروعة


<< === اذا طفش ف هالليل يفتح مواضيعك يقراها مرة ثانية وثالثة
والمشكلة يضحك ولا يافيصل


طولت علينا



الصراحة مب غريبة التاريخ يقص شعره كاريه معك
بيني وبينك كلامك صح ورط خويك .. يعني انت وش خسران

واذا ما وافقوا عليه هنا
عندك البحرين قريبة ولا تخاف يوصلنا مثل ماوصلت باقي الكتب


,<<<< متخيل كتابك يبيعونه ف جرير بـ85ريال والغلاف خوينا كان هنا مصممه




عمر لي عودة اذا قدرت انا فرحت يوم شفت يوزرك قلت خلنا نحجز بس خوينا مصحصح هالايام ومعصب علي




^
^
^
ترا هالرد للمقطع الاول بس
توني اقرا الجزء الاول

ياخي الله يعطيك الف الف عافية ضحكتني ضحك

إقتباس لا يااخوان لاتفهموني غلط.. والله ذا الديره على الراس من فوق.. وحبها بالقلب سادي.. مهوب علشان اني شربت من مائها ودعست على ترابها واستنشقت هوائها واستمتعت بزقزقة عصافيرها .. لا والله الكذب خيبه هذي المويه عندنا نصها حالي ونصها مالح.. وترابها ماشفنا منه الا الشهبان اللهبان.. وشمشمة هوائها ماجانا منه الا الغبار والكتمه.. وماهنا زود زقزقة عصافير مافيه الا غربان تناعق..

احد جاب طاري فريق الصقور العظيم

بس حلوة الموية شكلك ماتشرب من موية المنهل << out
ولا التراب احلى تراب ف الدنيا ياخي خذ مثال بسيط
شف صورة لنفسك وانت طفل ما احلاه وشف نفسك الحين
قسم بالله عوامل التعرية تلعب لعب مب صاحي

إقتباس ايه اقول حبها بالقلب سادي لان هالديره تعبد ربك فيها وانت مرتاح حتى لو بعدت تلقى من يساعدك ويناصحك ويحرص عليك.. حبها بالقلب سادي لان هالديره تروح وتجي فيها وانت امن على نفسك واهلك ومالك.. حبها بالقلب سادي لانها تعطي وتعطي وتعطي بس تحتاج من يعطيها.. هالديره تعطيك فرص ماتحلم فيها لو كنت بمكان ثاني.. بهالديره بامكانك تصير دكتور وبامكانك تصير سيكيورتي!! كلن وهمته ورغبته.. واللي يبي يعرف قيمتها يروح يسال أي اجنبي فيها من اكبر راس لاصغر راس..

ايه والله ... هذا احلى شي .. قسم بالله الامن والامان احسن شي ومارح يحس فيه الا للي يروح دولة اجنبية قل مثلا امريكا <<< شطح من اولها
هناك الواحد يطلع من بيته مايعرف بيرجع ولا بتجيه رصاصة طائشة بالخطا
من واحد خلنا نقول افرو امريكان فاتح شباك السيارة ومطلع راسه فالينها مسوين عصابات وحركات

نحمد الله ع هالنعمة

إقتباس يشهد الله ان هالديره على الراس من فوق واساسا مدري وشلون متحمله خيستنا! وحنا كل ماطق عود بحصاة حطيناه فيها.. أجل هذاك اليوم طالعين البر وواحد من العيال يبي يغسل يده ومالقى صابون قال المفروض يوفرون حمامات بالبر ..

<<<< ====== ميت ضحك

إقتباس وكل كلمه والثانيه المفروض يوفرون ويسوون ويعملون.. طيب وبعدين؟ وأنا وانت وحنا ياهالشعب وش سوينا غير اننا نملى الدنيا صراخ؟ وايش شفنا غير الحكي والدندره على قل سنع؟!

للي سويناه نوم×نوم

إقتباس طيب الواحد كتم نفسه وتحمل هالخياس شلون ماتشمئز نفسهمن هالكتابات اللي على الجدران والابواب.. قسم بالله وقاحه لابعد الحدود.. وعجزوا فيهم المسئولين.. ان ضربوا الجدران بويه كتبوا عليها بالاقلام.. وان خلوها سيراميك استخدموا اقلام الفلومستر.. واخر شي احد هالمساجد ضرب جدران دوراته بويه سوداء علشان ماعاد يكتبون ومع كذا مانفع معهم جابوا الطامس وكتبوا فيه..

ههههههههههههههــــــــههههههههههههههههه

لا والمشكلة بعضهم يكتب رقم جواله يقاله يرقم
ولا "ذكريات ابو هاجوس" وين عايشين ..!!

إقتباس اعنبوا ابليسك طيب علم خويك والا مستانسين وانتم تطقطقون على راسي ..

نتشطر ع الضعوف للي مثلك

إقتباس تقفل معك ايضا وتطلع من البقاله.. وانت رايح للبيت تلقى واحد متلطم ومعه بخاخ ويكتب على احد هالجدران.. تبي تلحقه مهوب علشان تسطره لا .. بس لاجل تساله هاللي كتبه وش معناته؟! اجل عمركم شفتوا احد يكتب: " لا لتكميم الافواه.. نعم للديموقراطيه.. لا للحريه"!! اعنبوا ابليسه سامع كلمتين وجاي يكتبهم وليته يكتبها صح..

ياخي في كتابة على جداربيت اظنه قديم كل يوم اضحك
كاتب "ارنب نط على امي" وش يحس به ..!!

إقتباس تقفل معك وتقول هين والله لافضحهم واشرشحهم بالمنتدى..

تبي فزعة ..؟ <<<=========== out

إقتباس لكن يااخوان والله اللي في سماه ان الواحد مايتحمل يفارق هالديره الا وهو مشتاق لاهلها وبثارتهم وللناس وسواقتهم وللهمج وطفاقتهم.. ومثل ما قال راعي الموضوع: مالك الا خشمك لو هو أعوج..

ننتظر الحلقة الثانية وتيتي مثل مارحتي جيتي الا جيتي اخرب



واحب اباركلك شهر رمضان الكريم وكل عام وانت بخير

وش اسوي باركتلك ف موضوعك السابق بس خويناا للي مصحصح حذفه

الا مادام انك تعرفنا بهراطق هالزمن في مثل محيرني
"اقلب القدرة لفمها .. تطلع البت لامها"

ههههههههههه قـسم بالله كلهاا بساعتيــن,!!

هلا والله هلالي الظهران ..

عاش من شافك ..!!

بس خل عنك قسم بالله يالمقدمة خيالية

إقتباس يا الربع خلونا نفترض انك رجال تبي تقضي مشاويرك بالعصريه.. من تركب السياره وانت على أعصابك.. قسم بالله كانك في رالي من المصاقط والمحاد والهواش.. لدرجة ان الواحد يختم "درايفر" حق البلايستيشن في وقتها من كثر ماهو متعود على المصاقط!!

اما المساقط بهالديرة قسم بالله يا درايفر ماطلع الا عقب ما شافوا ربعنا وشلون يسوقون ..!!
ابسط شي انه يسقط من يمين ويحدك ليش ما فتحت له الخط !! مع انه فيه واحد على يمينك !!
طيب وشلون افتح لك الخط وهذا على يميني ؟؟!! ويسقط عليك ويبدأ يستهبل يربط فرامل باستهبال وحركات بايخه !!
هذا غير السرعة اللي ما ادري وش تبي << بس هالنقطة صعب نتكلم فيها << طراه واحد توقف بالحجز بسبتها وهو توه جاي من الشرقية احد قال هلالي الظهران ؟؟!!

إقتباس طيب قضيت مشاويرك واذن المغرب ورحت للمسجد تبي تصلي.. والله يكرمكم تبي تدخل دورة المياه.. قسم بالله ماتقدر تكمل دقيقه من الخيسه اللي فيه.. يعني وين المشكله اذا دخل الواحد الدوره وتركها نظيفه مثل ماكانت! عندكم واحد اذا أزمت معه سيده على البيت بس احيانا الله يجيركم الزنقة تمون شديده وتضطر تدخل هالاماكن.. طيب الواحد كتم نفسه وتحمل هالخياس شلون ماتشمئز نفسهمن هالكتابات اللي على الجدران والابواب.. قسم بالله وقاحه لابعد الحدود.. وعجزوا فيهم المسئولين.. ان ضربوا الجدران بويه كتبوا عليها بالاقلام.. وان خلوها سيراميك استخدموا اقلام الفلومستر.. واخر شي احد هالمساجد ضرب جدران دوراته بويه سوداء علشان ماعاد يكتبون ومع كذا مانفع معهم جابوا الطامس وكتبوا فيه.. اعنبوا ابليسهم مدري وش يحسون فيه وهم يكتبون.. وفوق هذا وهذا المصيبه اذا لقيت الباب من دون قفل وهذا الغالب..(اعنبوا الحاله مزنوق ومكان حوسه وضيق وفوق هذا احتمال يدخل عليك احد باي لحظه ).. تلقى حارس المسجد شغلته ماغير تنظيف بهالدورات وتركيب في هالقفول .. ما اقول الا الله يلعن ابو الزنقات اللي تسوي فيك كذا..

اما دورة المياة وانتم بكرامه يا سوالفها سوالف !!
قسم بالله ناس ما تستحي .. مابقى شي ماصلحوه عشان البزارين يعقلون ومع كذا مافيه اي فائدة !!
بس تصدق فيها ميزة هالكتابات اذا كان وضعك صعب وما مشى مثل ما تبي تسلي عمرك وانت تقرأ وش مكتوب لين ما ربك يفرجها

إقتباس طيب شياب ونتحملهم.. يدقون عليك اخوياك وتواعدهم في الملعب بتحضرون المباراه.. من تدخل المدرجات يضيق صدرك وتستغرب ان هالعينات باقي عايشه! شباب جايين يشكشكوا وخذ رقص ومسخره.. وشباب مايبقون لعن وسب الا وقالوه.. قسم بالله بعد كل مباراه تخرج بقاموس جديد!! طيب اعتبر نفسك تجاهلتهم وركزت في المباراه ماتدري الا وقارورة مويه مجاوبه مع قفاك ..

حقين الشكشكه قسم بالله يرفعون الضغط ويجيبون لك الهم ..
اما اللي ي سب ويلعن ياخي وش تسوي قسم بالله يا انا ما اتحمل وما اقدر امسك نفسي !!
اكبر عيب فيني اذا جت المباراة اعصابي تروح دمار وما اقدر اتحكم باللي اقوله !!
وهالشي خلاني اعتزل الحضور للملاعب .. الصحة رأس المال والقولون لعب في الواحد ..!!
صرت اكتفي بالسب وانا بالبيت ..!!
اما اللي يرجمون بالقوارير قسم بالله يرفعون الضغط !!
طيب وش ذنب اللي جالس لحاله ويبي يتابع المباراة ؟؟ مشكلتنا ان فيه ناس ماتعرف تحترم غيرها !!

إقتباس تقفل معك وتطلع من الملعب.. تدق عليك أمك تقول ابي السوق.. تروح السوق انت وامك.. تغفل عنها شوي وتلقى بزر ماكمل 16 سنه قاعد يغازل امك!! تقوله: عيب يابابا اللي تسويه.. يقولك: العب غيرها انا حاجز البنت قبلك!!

اما الغزل والتحرش في اعراض خلق الله من تالي صاير على قفى من يشيل !!
الناس صارت ماتحترم احد ولا تخاف من ربها قبل كل شي ..
صار الواحد عادي ومايفكر في احد اذا جاء يتحرش في البنت !!
قسم بالله صار اسهل شي ان الواحد يغازل .. وهالشي للاسف تشوفه من بزارين ..
طيب وين اهلهم ووين التربية !!؟ مايدري انه يتحرش اليوم ببنات خلق الله باتسر فيه من يتحرش ببناته ؟؟!!
بس ضعف الوازع الديني وقل الخوف من الله والمفاتن من البنات والتربية الخطأ من الاهل كلها تخلي هالشي اللي نشوفه عادي ومهوب مستغرب ابد ..!!

إقتباس توصل البيت والاخلاق صفر من هالهمج.. ماتصدق على الله تغير وتريح شوي.. ومايمديك تحط رابع لقمه بحلقك الا وتسمع صوت تفحيط وقربعه بالشارع.. تنزل تشوف السالفه تلقى سيارتك مصقوع واللي صاقعها منحاش.. تقفل معك وتقول هين والله لافضحهم واشرشحهم بالمنتدى..

المشكلة اذا شفتهم تقلاهم عيال الجيران وفي الحارة ..
واذا جيت كلمت ابوهم والا اخوانهم سحبوا عليك والا يدافعون عنهم ويخلونك انت الغلطان !!
بس ان سيارتك تنقشع ابرك من انها تنسرق ويفحطون فيها واخر شي تلقاها فوق ر صيف ومافيها شي سليم !!

إقتباس لاحظوا ياجماعه هالبلاوي كلها بمشوار كم ساعه.. اجل لو تكلمت عن معاناة 24 سنه كان احتجت خدمات ابو ريمان بكتابتها.. وبعد هذا كله ماتبوني أهاجر..

الا هاجر يابعدي وانا بكون معك ..!!
قال ايش قال يوم وطني << زين ضمنت لك خوي بالحجز

إقتباس أخوكم/ ابو سباستيان سابقا- ابو الدرداء حاليا <<لزوم رمضان

مع اني ما اتوقع انك غيرت ابو سباستيان ادري انه شي صعب .. ولا تقول رمضان ما رمضان
نظامك والسيستم حقك واحد طول السنة



منور المنتدى يا ابو الدرداء ..

لا تحرمنا هالطلة يابعدي ..

أفهم من كذا إن سباستيان أخ للدرداء ؟!

عموماً الله يخلي الجميع لك و نور المنتدى بحروفك .

يا راقل ايه ده ياراااقل
قسم ان موضوعك زحلطني زحلطه

ذكرتي بهرطقه والله ياهو موضوع

<-- مثل فياض اذا طفش راح يقرا مواضيعك
مدري كيف ارد اسوي مثل الشعب اقتباس واعلق ولا ادندر
شكل الدعوا دندره
بما انك طريت السوالف عز الله نشبت فيني
الحين بالله هذي مقدمه الحين
موضوع كامل يقولي مقدمه
اليوم متغير اسلوبك شوي
العاده تحط مدخل
بعدين مدخل
بعدين مدخل
في الاخير يخلص الموضوع وحنا ما دخلنا قاعدين عند الباب
بعدين ماذا نستفيد
ولا تراك كنت تقول الي عنده دايل اب يفصل السلك
<-- خبره هلالي الظهران
الظاهر انك ما تعرفني بس اسال الشباب ويعلمونك <-- عضو مغبر وماله الا كم مشاركه بس الماسنجر مدهر مع العيال

حياكم الله جميع .. والله يعطيكم العافيه ..

راجع لردودكم جميع باذن الله ومعها الحلقه القادمه بحول الله..


العميد: حياك الله ياراجل.. وين ايامك وعاش من شافك .. عسى ماشر مو بالعاده كانك بعزا ..<<جحد الرجال مو كانه مباركله برمضان..

راشد: هاه .. ما أسمع زين .. بعدين زين انك طريت البرادعي هذا مداهن الروس الكبيره كلها بس حنا مانحبه .. والخفاش مايحتاج مثل مايقولون اذا صرت في الحاير لاتخشى من الجلد (طراه اذا كنت في الماء لاتخشى من البلل)..

ابو ريمان: ابو ريمان هم اخوان من الرضاعه وان شاء الله انهم اخوان في الاسلام .. انت اصبر وان شاء بيجون مرزوق ومدحت ولافي ومايكل..

لي عوده ان شاء الله ..

شاكر تواجدكم جميع .. لاعدمتكم..