#1  
قديم 19/03/2007, 12:19 PM
زعيــم مميــز
تاريخ التسجيل: 18/03/2005
المكان: سّــــــــــــــــــــواح
مشاركات: 2,772
هـــرطـــقـــه ! ّ

مساء النور والسرور والبلور المكسور والموعد المهجور وادام الله عليكم كل سرور وحبور وسعيكم مشكور وذنبكم مغفور وهلالكم منصور وعدوكم مدحورٌ مدحورٌ مدحور..


أخبار الحلوين والطعمين؟ ايش عاملين؟

حياكم الله جميع.. اعنبوا ابليسكم والله اني مشتاقلكم حيل يا البايخين!

طالت الغيبه واتمنى تعذروني وسؤالكم الكبير عني والله أحرجني ..مكانكم والله بالقلب ولايغركم كلام العذال بس ظروف الوقت عنكم ابعدتني ..


لكل من سأل واستفسر وارسل ..لكم جميعا شكرا من القلب .. ودوكوا هالبيتين اللي فاضت بهم القريحة:p ..

يامن غـدا شوفكم كما حبـة الكـوع ×× لمسه قريب وبوسته مستحيله
أرفقوا على خويٍ لكم غدا مصروع ×× ضاع وقته مابين ديره وديره



تمهيد


قالت العرب قديماً.. خذ الحكمه من أفواه المجانين..!!

الهرطقه في اللغه: البدع اوالخزعبلات ..

وفي الاصطلاح: "لاتوجد كلمات بحث مماثله"

والهرطقه في مفهوم هلالي الظهران قدس الله سره هي مجرد سواليف وبربسه ربما تحتوي بعض الفائده وان كنت مقتنع بأن ضررها اكبر من نفعها .. ولتكريس معنى الهرطقه ناظروا الشده بالعنوان وين راحت ..اللي قفل الصفحه من الحين مسموح ..

بالمناسبه الموضوع عباره عن فقرات منفصله عن بعض(للي مايحبون الطويل ) ..وهي اقوال او امثال دائما مانرددها..



Ladies First


ليديز فيرست او السيدات أولاً .. ليه؟ وبالبنط العريض لماذا؟ << سؤال يفرض نفسه صح

كل ابو دايم يقولون السيدات اولا.. وفي روايه اخرى "سيداتي آنساتي أمهاتي حماواتي خادماتي....." واذا طاح اللي براسهم قالوا "سادتي" !!

طيب ليه السيدات اولا؟! وليه حتى بالاتيكيت تقدم الحرمه قدامك؟!


الحين بيجيني واحد يقول المرأه نصف المجتمع وهي أمك واختك وبنتك وزوجتك وخويتك.. وبتجيني وحده تقول الجنه تحت أقدام الأمهات.. وبتخش وحده عرض وتقول "البنات البنات ألطف الكائنات" .. وبتجي عاشره رافعه خشيمها وتقول احمدوا ربكم اصلا خليناكم بعدنا!!

لكل هذول وغيرهم ابقولهم العنوا ابليس واستريحوا وطرطقوا اذانكم واستمعوا مني أثابني الله واياكم..


حدثت هذه القصه في القرون الوسطى (القرن التاسع عشر)<<يسمع بالوسطى

أحب شاب من طبقة ارستقوراطيه غنيه فتاة من الطبقة الفقيره الكادحه.. وأحبا بعضهما حبا عظيماً سالت على أثره الاحبار وكتبت المعلقات وارتوى منه القاصي والدان..

بدأت قصة الحب تتداول بين الناس حتى وصل الخبر الى مسامع عائلة الشاب.. فغضبوا منه أشد الغضب وأمروه ان يبتعد عنها وقرروا تزويجه بفتاه تليق به وبأسرته..

عصى الشاب أوامر أسرته واستمر مع حبيبته بالرغم من محاولات أسرته بابعاده عنها وتمسك بمحبوته وأراد الزواج بها ولكن سلطة أسرته منعته من ذلك..وبالجهه المقابلة ازدادت الفتاه تعلقا بمحبوبها بعدما أظهر حبه وتحدى به الجميع..

استمر هذا الحال وأسرة الشاب على موقفهم المتعنت والشاب مازال متمسك بحبيبته حتى أتى ذلك اليوم..


نعم نعم اتى ذلك اليوم اللي جاه أبوه وقاله خطبنا لك بنت "الدوق جورج" وعرسك عليها عقب اسبوع واذا ما اعرست عليها لاني أبوك ولاني أعرفك وبيتي يتعذرك..(للأمانه هذا المقطع ماخوذ من مسلسل جواهر )..

فكتب الشاب معلقته الشهيره"هلي لاتحرموني منه.. هلي لاتبعدوني عنه.. هلي تكفون خلوني ......." استعطافا لأبيه ولكن ابوه الارستقراطي المتشدد رفض توسل ابنه واستمر على موقفه ..

عاش الشاب اياما مريرة وهو يحترق بين نارين.. نار حبيبته ونار اهله وسمعة اسرته والثروه اللي بتجيه عقب مايطس أبوه..

استمر الشاب على حالته السيئه حتى تبقى على زواجه من بنت الدوق جورج ليلة واحده..ضاقت الدنيا والتجأ الى محبوبته يسألها ماذا يفعل.. فأشارت عليه بأن ينتحروا كليهما لكي يحافظوا على حبهم الطاهر ويدونون للأجيال القادمه كيف يكون الحب والتضحية ..


أتت ساعة الصفر وذهب الشاب والفتاة الى صخره في أعلى الجبل لكي يقفزوا منها ويفارقوا الحياه..
فعلا وصلوا للصخره بس اختلفوا منهو اللي بيطب اول.. كل واحد يقول انا بنقز اول(والله من الطفاقه )..
الى ان اقنع الشاب حبيبته انه مايتحمل يشوفها تموت قدامه فقرر انه ينقز قبلها.. وفعلا نقز وطب ساكت ..
البنيه يوم شافت حبيبها طب وراح فيها وان الدعوه فيها موت ماهو بلعب عيال سحبت على والدى والديه ورجعت للقرية وتزوجت شاب من نفس طبقتها!!

وانتشرت القصه بين أهل القريه حتى أصبح تقديم النساء امرا ضروريا فخلدت Ladies First;)


والحين عرفتوا ليه ولماذا السيدات اولا.. بالمناسبه لُب القصه حقيقة وواقع وصوره من غير تحية لأهل الحب والتضحيه والوفاء والخيانة.. لا ويبون يسوقون سيارات بعد ..( أتخيل بعض الوجيه الحين مثل البزر اللي كان جوعان ومنفعل ويصيح لكنه خمل عقب الرضعه )..


يعني من جد اذا قالتلك وحده "احبك موت" لاتصدقها الين تنفذ وعدها واذا ماتت صدقها وعطها اللي تبي وعلى ضمانتي ..



أعزب دهر ولا أرمل شهر!!


يُحكى بأن امرأة ذهبت الى القاضي لتشكي زوجها وتطلب من القاضي تطليقها منه..لم يجد القاضي من زوجها أمراً يدعو الى التفريق بينهما..

استمر الحال عشرون عاما والمرأه تطلب الطلاق تارة من زوجها وتارة من القاضي وزوجها صابرٌ محتسب حتى أراد الله بأن يتوفى زوج هذه المرأه..

بعد عدة أيام ذهب القاضي الى المقبره لتشييع احد الجنائز.. وكانت المفاجأه بأنه رأى هذه المرأه واقفة على قبر زوجها وهي تصيح وتلطم!!

فبادرها القاضي قائلا..أفقدتي عقلك يا امرأه.. هذا من تطلبين الطلاق منه طوال العشرين عاما؟!!

قالت المرأه.. بلى ياشيخ ولكني سمعت حديثا بان البكاء واللطم على الميت يزيد من عذابه في القبر!!

فقال القاضي..أعزب دهر ولا أرمل شهر(صح ولا لأ يابو عبدالله )



عصفور باليد ولا عشرة على الشجره



كان يامكان في قديم الزمان وسالف العصر والأوان.. يروى ان هناك عائله بسيطه مكونه من الأب والأم وطفلهم(رشيد) يسكنون احد قرى منطقة الرياض..
كبر الطفل وبلغ أشده (عاد اللي مافهم بكيفه ) .. وكعادة أهل القرية قرر الاب تزويج ابنه رشيد..

جاء ابو رشيد يفاتح ولده في موضوع الزواج ويقوله..رشيد أنت لازم تعرس..وش رأيك ببنت عمك هيله؟!

رشيد: قصدك هيله باولو ديسلفا ماغيرها.. تدري انها لاعبة معنا امس جناح يسار.. ولمعلوماتك انا عندي استعداد انام معك مع البقره بسرير واحد ولا أنام معها ..

قفلت مع ابو رشيد وقال لام رشيد..تفاهمي معه ولا أجي الا وانتم لاقين له حرمه!

رشيد: حشا يبه تدور يوزر أنت ..

خرج ابو رشيد وترك رشيد مع أمه..استفرد رشيد بأميمته يبي يخليها تقنع ابوه انه مايزوجه الحين..

رشيد: يمه البارح حلمت حلم ماهو بزين..

أم رشيد: ياقلب أمه انت..وش عندهم اللي يحلمون.. وغمضت عين وفتحت اثمها(يقالها تغمز الحين)..ايه ياوليدي وش حالم فيه؟!

رشيد: يمه أمس شفت حنيكش بالحلم!

أم رشيد: بسم الله على وليدي!

رشيد: ايه يمه البارح رأيت حنيكش يمشي في الصحراء!!

أم رشيد: رشيد وش معنى صحراء؟!

رشيد: يعني الحين انتي فاهمه حنيكش يومك تسألين عن الصحراء ..

قام رشيد يبربر.. الظاهر هذول حالتهم ميئوس منه وبيتعبوني.. اتزوج اسهلي .. يمه انا موافق زوجوني!

تفاجئت أم رشيد بموافقة رشيد وبدت تذرف دموع الفرح وتقول.. تدري ياولدي ان أبوي ولد متأثر بجراحه :p (عادي لاتشرهون اذا نزلت الدموع تشابكت عندها الاسلاك ).. وأنه ...

قاطعها رشيد: يمه والله يرحم أبوك هالمعوق مو بوقته هالحكي..

أم رشيد: طيب وانا أمك وش المواصفات اللي تبيها؟

هنا ابتسم رشيد وقال.. اييييييييه .. ابيها بيضا وشعرها طويل وناعم وابيها مربربه وعيونها ناعسه وعسليه وترمش.. ابيها تعرف تهمز وتشجع الهلال.. واهم شي تعرف تطبخ حنيني وقرصان.. وابيها تقولي "ابن عمي" .. يمه باختصار ابيها مثل نوال الكويتية ..

أم رشيد: والله ياوليدي لو ألقى وحده بهالمواصفات كان تزوجتها أنا.. عاد بالديره ماعندنا هالمواصفات بس كانك صامل نبي نروح للرياض..

خرج رشيد وأميمته للرياض وعند أول قصر وقف رشيد ونزلت أميمته واشتغلت أم رشيد شغلة هالمغاتير..


استمر هالحال وأم رشيد من قصر لقصر..الى ان دخلت واحد من هالزواجات وكالعاده قزقزت هالبنيات اللي يترقصن على البست.. عفوا اقصد الكوشه..وطاحت عينها على وحده تشق وجه القمر شق وفيها كل المواصفات وزيادة حبتين بعد..

التفتت أم رشيد على الحرمه اللي جنبها وقالتلها..هذيك بنت مين (وأشر هلالي الظهران بيده)؟!

الحرمه: هذي بنيتي ماشاء الله عليها مرة بيت.. تصدقين هي اللي تطبخ كل يوم وهي اللي ربت اخوانها بعد!!(وجه نايم)

أم رشيد:ماشاء الله ماشاء الله.. هي مخطوبه؟

الحرمه: لا لا ماهي مخطوبة.. بس كانكم ناوين تخطبونها الحقوا عليها لأن ولد عمها يبيها..


ومن اليوم اللي عقبه راح رشيد مع أبوه يخطبونها.. واتفقوا على كل شي وشرط ابو العروس انه مايشوفها الا ليلة الدخله..

مشت الامور على مايرام الين جات ليلة الدخله ورشيد بيتشقق يبي يشوف القمر اللي تحتريه على وصف أميمته..
جات اللحظه الموعوده ودخل رشيد مع أمه على العروس..

.
.
.
بعد صراخ وهواش وحالات اغماء..

أم رشيد: حسبي الله عليهم .. انلعب علينا وانا امك مو بهذي اللي شفتها بالعرس..

رشيد وخانقته العبره: يمه هذي اللي تشق القمر شق! هذي لو شافها سعد خضر انحاش..والله ياهيلة ديسلفا تسوى مثلها عشر مرات..

أم رشيد: ياوليدي شيفه باليد ولا عشرة على الشجره ..

ومع مرور الوقت صار عصفور باليد ولا عشرة على الشجره..



اذا كان صاحبك عسل لا تلحسه كله


يقولون والعهده على الراوي أن فيه شلة شباب متقاطين باستراحه ووضعهم اخر حلاوه..

كان واحد من الشباب حبوب ودمه خفيف وينادونه "عسل" لكن هالادمي عنده صلعه غير طبيعيه.. وفيه واحد ثاني من الشباب غث راعي الصلعه وكل ماشافه قاله "ياخي شفلك حل خل بقره تلحس الصلعه كود ان الشعر يطلع"

وفي مره من المرات وبعد مباراة طائرة والشباب منهد حيلهم وفي لحظة خمول..قام البثر يقول لخوينا راعي الصلعه "رح لبقره وخلها تلحسها"..

التفت عليه راعي الصلعه وحط صلعته عند وجه البثر وقال "الحس" ..

فما ان كان حتى اطلق احد الشباب المقوله الشهيره ..اذا كان صاحبك عسل لا تلحسه كله..



قبة الشيخ علي جعلها هدامه


في يوم من أيام الاجازه الصيفيه.. عود ابو صالح الى بيته مبكر قبل صلاة الظهر..وريح شوي الين اذن الظهر..قام وتوضأ وصحى ولده صالح علشان يصلي..

راح أبو صالح للمسجد وماشاف ولده هناك.. رجع ابو صالح للبيت ولقى صالح على حطة يده.. صحاه وتله مع فانيلته وساله.. ورى ماصليت؟!

قام صالح ويحلف سبع ايمان انه مصلي ورجع بسرعه ونام(الذمه وسيعه)

ابو صالح: وين مصلي فيه؟

صالح:بالمسجد(ذمته وسيعه وبجيح بعد )

ابو صالح: طيب وش قرأ الامام؟

صالح:انا ادري وش قرأ هذي صلاة ظهر

ابو صالح: ايه صح.. طيب من اللي مصلي جنبك؟

صالح: جنبي باكستاني ومن الناحيه الثانيه الجدار..

ويتل ابو صالح ولده ويسويله حركة سوبليكس ويقوله.. اجل يا الكذوب مصلي بالمسجد وجنب الجدار وكل اللي صلوا صف واحد وما اكتمل بعد.. ويكمل ابو صالح حركته ويمسك صالح مع قفاه ويلزخ وجهه بالجدار..


راح صالح لأمه وقالها.. يمه ضرسي هذا من لزخة ابوي يرقل ويبي يطيح:p ..

ام صالح: رح جب الابره اللي فيها خيط شفني غازتها بجدار المقلط..

ومسكت أم صالح الخيط اللي في الابره وحطته في ضرس صالح وسحبته الين انقلع وقالت لصالح..خذ ضرسك وناظر في الشمس وارمه صوبها وقل" خذ ضرس حمار وعطني ضرس غزال" ..


راح صالح وتعلق بالدريشه ورمى ضرسه وجلس ينتظر ضرس الغزال.. وبهالاثناء انتبه صالح ان فيه عمال يشتغلون على المسجد(مسجد الشيخ علي) ويركبون له قبه.. استانس صالح يقاله يبي يحجر ابوه اذا ساله مره ثانيه وجلس يناظرهم..

استمر هالوضع وكل مانادوا صالح مارد عليهم.. حطوا أهل صالح الغداء ونادوا صالح وهو يقولهم"بناظر قبة الشيخ علي" .. نادوه مره ثانيه وصفطهم..

وبعد فترة جاع صالح ونزل من الدريشه يدور الاكل ومالقى شي.. سال صالح امه عن غداه.. قالتله خذه من عند قبة الشيخ علي اللي عندنا قضى..


قال صالح.. قبة الشيخ علي جعلها هدامه ..



عنزه ولو طارت


يقولون ان فيه واحد مهايطي وعنيد وراسه يابس.. طلع خوينا هالعنيد مع واحد ثاني يقنصون وشافوا من بعيد شيئين لونهم أسود..

قال خوي العنيد..أكيد هذول غرابين!

قال خوينا.. لا هذي شكلها عنزه

قال خويه.. طيب وحده عنزه والثاني ايش؟!

قال خوينا..هذا الظاهر زلدها حتى شوف شكله ينفع للمندي لأنه مابعد أعرس<< مدري وش يقصد


المهم أصر كل واحد على رأيه ويوم وصلوا لقوهم غرابين شافوهم وطاروا..

قال خويه.. شفت ماقلتلك غرابين..

قال خوينا.. لا عنزه ولو طارت .. <<اعنبوا ابليسه هو وهياطه.. يعني فرق والله بين الغراب والصقر لو انه قايل صقر معليش ..



من فاته اللحم عليه بالمرق


بعض فتياتنا-هداهن الله- أغواهن الشيطان ولحس بعقولهن وتفسخن من الحياء وبدأن بتفسيخ ملابسهن ..


يعني ليه كذا؟ من جد والله ليه؟ وش ذنب الشباب يتعذب بهالمناظر المؤذيه ؟

يعني ما نقول خلكم مثل جدتي وجدتك.. والله ماطلبنا أنكم تلبسون دراعات وتحتها دراعات داخليه وشراريب داخليه وشلحه وتحت الشلحه سروال سنه او تكميله ..


لا والله ماقلنا كذا .. البسوا وخذوا راحتكم وامشوا على الموضه بعد لكن اختاروا اللبس المناسب للمكان والزمان.. لكن اللي يصير الحين عيب والله عيب.. والعذر الجاهز انها الموضه!!(اجل تنوره قصيره وتحتها برمودا وش خليتوا للهنود )


اعنبوا الموضه اللي تسمعون فيها.. المشكله انكم قمتم تقلدون اخواتنا الفاضلات بمصر ولبنان والمصيبه انكم تقلدونهم وهم مسكينات ماعندهم ملابس..شوفوا كيف ملابسهم ضيقه عليهم من حقات العام وناظروا شلون سرهم طالع وأكمامهم مشمره من كثر الغسيل ..


يعني وش ذنب الشباب وين ماراحوا يشوفون هالعبايات اللي من ضيقهن مايدخلن الا بفازلين وتشوفها كأنهم نازلين ببراشوت حتى ملابس صارت أوسع والادهى والأمر تشوف هاللحوم والشحوم طبقات طبقات لو وزعناها على احد هالقبايل اللي تاكل لحوم البشر صار عندهم اكتفاء ذاتي بعدين تجيك الوحده طاقه اللثمه والعيون لو تشوفها تحلف ان كحلها بقدر على التسريحه وتغرف منه بزبديه وخذ ذيك الشفايف المزمومه زم واللي ماتوقف حركه فوق وتحت كن الشفايف ماخلقت للكلام والله من القهر مدري وش اقول وش أخلي .. بس الغبنه اذا جاتك تتمخطر بهالممرات ولا كافخه الطبلون والعبايه تقول شراع مركب وان احد قالها كلمه التفتت باستغراب وقالت ياربيييييييييييه عمى عمى وش جاه ذا!!


يعني من جد فرق والله.. زمان الواحد يوخر الملابس علشان يشوف الجسم وهالايام صاير العكس..<<مابي اكمل اكثر حتى لا اجيب العيد


لهذا أخي الشاب اذا فاتك اللحم لايفوتك المرق وانتي أختاه يارعاك الله هل ترضين بأن تكوني "مرقه" أم ترتقين بنفسك الى "لحمه"



مخرج


يوجد للبيع امثال عربيه اصيله لم تستخدم من قبل لا تصلح الا لأصحاب السمو فقط .. خفيفه على اللسان وساحرة في البيان .. لها معنى عميق جدا ومغزى فريد جدا..

سعر الحبه بـ 5000 ريال ..للاستفسار/ مراجعة أقرب شارع تحليه

ملاحظه: في حال الاتفاق الرجاء عدم اطلاع اي شخص عليها.. وفي حالة ما اعجبتك مو ضروري تشتريها ومابين البايع والشاري يفتح الله
اضافة رد مع اقتباس
  #2  
قديم 19/03/2007, 12:21 PM
زعيــم مميــز
تاريخ التسجيل: 21/02/2005
المكان: الصين مؤقتاً
مشاركات: 1,663

عودا انتظرناه طويلا

ياهوه حاجزه مكاني من الحين

بروح انام وارجع ان شاء الله



ـــــــــــــــــــــــــــــــــــــــــــــــــــــــــــــــــــــــــــــــــــــــــ


عدنــــــــــــــــــــــــــــــــــــــــا


وش السالفه

راجع لنا بلوك جديد ماشاء الله ...

حركات وأشعار وفصحى:p لو ماجا منها غير هرطقه كفت


بس وراك شاب علينا ... البنات البنات ألطف الكائنات:p


ياخي حست راسي مدري هن صدز وأنت أعدت صياغتهن بأسلوبك;) ولا كلهن من ذا الدميجه اللي الله لا يحرمنا من فلسفتها

اريد توضيح عاجل بهذا الأمر;) ....
<<< خلني اتفلسف بهن على جدي الله يحفظه دامه عندنا



نرجع لهرطقاتك >>>> احس لو نزيد حرف فيها نجيب العيد


إقتباس
يامن غـدا شوفكم كما حبـة الكـوع ×× لمسه قريب وبوسته مستحيله
أرفقوا على خويٍ لكم غدا مصروع ×× ضاع وقته مابين ديره وديره

فالك المليون ومافيك حيله



إقتباس
ولتكريس معنى الهرطقه ناظروا الشده بالعنوان وين راحت ..

والله أني ملاحظه هالشي قبل لااوصل هنا ...
وقلت وش جاه
ويوم قريت الموضوع عرفت أنه لزوم الإتيكيت:p <<< وش دخله مدري



إقتباس
كل ابو دايم يقولون السيدات اولا.. وفي روايه اخرى "سيداتي آنساتي أمهاتي حماواتي خادماتي....." واذا طاح اللي براسهم قالوا "سادتي" !!

ياشين الغيرانين
منقهر يعني :p


إقتباس
الحين بيجيني واحد يقول المرأه نصف المجتمع وهي أمك واختك وبنتك وزوجتك وخويتك.. وبتجيني وحده تقول الجنه تحت أقدام الأمهات.. وبتخش وحده عرض وتقول "البنات البنات ألطف الكائنات" .. وبتجي عاشره رافعه خشيمها وتقول احمدوا ربكم اصلا خليناكم بعدنا!!

ياحليلك مولم العصابه قبل الفلقه


إقتباس
الى ان اقنع الشاب حبيبته انه مايتحمل يشوفها تموت قدامه فقرر انه ينقز قبلها.. وفعلا نقز وطب ساكت ..

ياعيني على التضحيات مب سهل أثره >>> يمكنه البارق طيب:p >>> يامصلي


إقتباس
البنيه يوم شافت حبيبها طب وراح فيها وان الدعوه فيها موت ماهو بلعب عيال سحبت على والدى والديه ورجعت للقرية وتزوجت شاب من نفس طبقتها!!

مزديتن فيه ...
بلاها سامعه الشاعر اللي يقول
الموت هين والبلى وش ورى المــــوت
عند الحساب يهون سهـــم المنـــــايـــــــا
باكر نمــــوت وتصبح قبورنا بيـــــوت
عقـب القــــصـــور ضيقـــات الـــزوايـــــا
في جوف الارض وكل من حولك سكـوت
تعاقـــبــــاً بالقبــــر عــــوج الحنايــــــا
يـــارب يــــامنجـــي نبيك من الحـــوت
سترك وعفــوك يــوم كشـف الخفايـــــــا


مب زي هالمخفه يموت نفسه عشان حب;) :p .... الله لا يبلانا


إقتباس
يعني من جد اذا قالتلك وحده "احبك موت" لاتصدقها الين تنفذ وعدها واذا ماتت صدقها وعطها اللي تبي وعلى ضمانتي ..

هههههههههههههههههههههههههههههه
لهالدرجه طحنا من عينكم


إقتباس
قالت المرأه.. بلى ياشيخ ولكني سمعت حديثا بان البكاء واللطم على الميت يزيد من عذابه في القبر!!

ابو النذاله اللي كذا
مابقت شي من النذاله للعالم كل نذاله العالم احتكرتها زي بعض الناس << تلمح يعنني:p


الشي اللي استنكرته هنا بهالقصه كلها أن كلامك كله فصحى
شف مثلا:p
إقتباس
يُحكى:p ...تارة من زوجها وتارة من القاضي ...فبادرها القاضي قائلا..أفقدتي عقلك يا امرأه ....بلى ياشيخ ولكني سمعت حديثا

اروح ملح على هالكلمات ... واغدي كشنه <<<< مصطلحات العرابجه


إقتباس
رشيد: قصدك هيله باولو ديسلفا ماغيرها.. تدري انها لاعبة معنا امس جناح يسار.. ولمعلوماتك انا عندي استعداد انام معك مع البقره بسرير واحد ولا أنام معها ..

هههههههههههههههههههههههههههههه
ههههههههههههههههههههههههههههههههههههه


إقتباس
وغمضت عين وفتحت اثمها(يقالها تغمز الحين)..

ههههههههههههههههههههههههه
هههههههههههههههههههههههههههههههه
تخيلت شكلها ... ياحليلها


إقتباس
رشيد: يعني الحين انتي فاهمه حنيكش يومك تسألين عن الصحراء ..

ههههههههههههههههههههههههههه
وش هالخيال ...هالحاله ماتنتج إلا لما تتضارب الفيوزات حقت دميجتك وتعيش حاله من الانصدامات والترسبات الكيموفيزيائيه وعقب ماتتحلل هالرواسب وتتبخر بفعل التقطير الجزيئي وتنشب بأعلى يافوخك تنتج مثل هالكلمات <<لحسه مخ صح


إقتباس
هنا ابتسم رشيد وقال.. اييييييييه .. ابيها بيضا وشعرها طويل وناعم وابيها مربربه وعيونها ناعسه وعسليه وترمش.. ابيها تعرف تهمز وتشجع الهلال.. واهم شي تعرف تطبخ حنيني وقرصان.. وابيها تقولي "ابن عمي" .. يمه باختصار ابيها مثل نوال الكويتية

ههههههههههههههههههههههههههه
طموح أي شاب سعودي كذا يكون


إقتباس
أم رشيد: حسبي الله عليهم .. انلعب علينا وانا امك مو بهذي اللي شفتها بالعرس..

قد صارت لناس خاطبين بنت وزوجوه أختها ...
ويوم شافتها أمه بالعرس قالت مااتفقنا على ذي كانوا يبون الصغيرة;)
بس الولد عادي عنده يوم شافها وكملوا عرسهم وخلفوا صبيان وبنات


إقتباس
أم رشيد: ياوليدي شيفه باليد ولا عشرة على الشجره ..

اتعضوا عاد ...
مغير تشرطون وكل سنه تنقصون شرط ;) الين توصلون لشرط واحد وهو نريدها إمرأة


اطلق قصه ضحكت الين شبعت ... الله يوسع صديرك بالعافيه



إقتباس
التفت عليه راعي الصلعه وحط صلعته عند وجه البثر وقال "الحس" ..

مزدين فيه


إقتباس
قبة الشيخ علي جعلها هدامه

مافهمتها مرة بس جازت لي حركه خذ ضرس حمار وعطني ضرس غزال


إقتباس
عنزه ولو طارت

ياكثر المهايطين الحين ....


إقتباس
لكن اللي يصير الحين عيب والله عيب.. والعذر الجاهز انها الموضه!!(اجل تنوره قصيره وتحتها برمودا وش خليتوا للهنود )

آخر الزمان البنات تقصر من لبسها والشباب يسحبلون بثيابهم يكنسون الشوارع
نسأل الله السلامه


إقتباس
اعنبوا الموضه اللي تسمعون فيها.. المشكله انكم قمتم تقلدون اخواتنا الفاضلات بمصر ولبنان والمصيبه انكم تقلدونهم وهم مسكينات ماعندهم ملابس..شوفوا كيف ملابسهم ضيقه عليهم من حقات العام وناظروا شلون سرهم طالع وأكمامهم مشمره من كثر الغسيل ..


مافيه شي ازيده


إقتباس
بعدين تجيك الوحده طاقه اللثمه والعيون لو تشوفها تحلف ان كحلها بقدر على التسريحه وتغرف منه بزبديه

المشكله أني أشوفهن بالمسجد لا فتحن اللثمات;) ولاهن حاطات المكياج بس للعيون والباقي صايرن اشهبن الهب



إقتباس
سعر الحبه بـ 5000 ريال ..للاستفسار/ مراجعة أقرب شارع تحليه

مافيه اقساط طيب




يعطيك العافيه على الموضوع الدسم اللي ماندري وين صدقه من كذبه
ننتظر التوضيح ترى
خلنا نهايط شوي

واعذرني على المصاله مدري وش فيها نازله علي ....


يقولون نام الأسد ونام ونام بس جاه يوم وكشر عن أنيابه <<< جعله دوم يكشر عن هالانياب خلانا نفك خششنا الين بان ضرس العقل



برايفت :
عذرا على الإطاله;)<<< بعد ويش ... يوم شفت التعديل رحمت روحي




سلااااااااااااااااااااااااااااااااااااام ,,

اخر تعديل كان بواسطة » فرصه ضايعه في يوم » 19/03/2007 عند الساعة » 10:55 PM السبب: نزيد كم كلمه
اضافة رد مع اقتباس
  #3  
قديم 19/03/2007, 01:16 PM
زعيــم مميــز
تاريخ التسجيل: 09/08/2006
المكان: الريــاض
مشاركات: 2,215
,,,
,,
,







هلالي الظهران





يسعد لي هـ المسـاء يارب
تصدق اني احبكـ حبة حب احب من حب الاحباب <<<------ تعقد
وسجل عندكـ المثل هذا من طول الغيبات جاب الامثال .. :p
بصراحه اول ماقريت الموضوع وشفت ( Ladies First ) قلت بس هلالي الظهران شكله مسنتر في معرض الكتاب وجايب موضوع يشق الجبهه بس كل ماتذكرت العنوان اتعوذ من ابليس واقول يا اليوم يابكرا يبي يطردون اللي يتبطحون بالكورنيش ويعدون النجوم



إقتباس
والهرطقه في مفهوم هلالي الظهران قدس الله سره هي مجرد سواليف وبربسه ربما تحتوي بعض الفائده وان كنت مقتنع بأن ضررها اكبر من نفعها





بصراحه امثال لا يعلى عليها .. واحلى شيء انكـ رازن تنبيه في اعلى الموضوع




إقتباس
أم رشيد: رشيد وش معنى صحراء؟!

رشيد: يعني الحين انتي فاهمه حنيكش يومك تسألين عن الصحراء ..






ههههههههههههه
هذي ذكرتني بـ اللي مفهي ويقول لـ خويه /
دوله اوربيه من ثلاث حروف تبدا بـ حرف الطاء
قال خويه / ماادري ( كـ العاده )
قال المفهي : قطر
قال خويه : بس قطر ماتبدا بـ حرف الطاء
رد المفهي : اجل برايكـ قطر دوله اوربيه
وهو قريب من مبدأ الهرقطه والشده على شنق





بس خل عنكـ النفع والله ازين من الضرر .. بس تدري عجبتني حركة تشغيل الماطور قبل تنزيل الموضوع
ماودي اقول ليت كل من يغيب يجيب موضوع مثل هذا .. لاننا والله ودنا في كل الامرين .. وبصراحه موضوع نساني افرش لكـ الورد وارحب فيكـ .. وتو مانور المجلس يالغالي .. وكـ العاده متألق في اطلالتكـ وحضوركـَ الرائع .. والله لا يحرمنا تواجدكـَ وروعة الابتسامه اللي ترسمها في كل موضوع ..








****




كن بخير ;)
...SoMe OnE...

اضافة رد مع اقتباس
  #4  
قديم 19/03/2007, 02:02 PM
موقوف إيقاف نهائي
تاريخ التسجيل: 19/11/2006
المكان: الظهرانــ ,,
مشاركات: 3,358
مشكووور
اضافة رد مع اقتباس
  #5  
قديم 19/03/2007, 03:24 PM
الصورة الرمزية الخاصة بـ الـمـشـاغـب
مايسترو المجلس العام
تاريخ التسجيل: 18/02/2005
المكان: كاشت مع ويلهامسون بين المروج :$
مشاركات: 7,060
محجوز للضرورة القصوى
اضافة رد مع اقتباس
  #6  
قديم 19/03/2007, 04:30 PM
زعيــم مميــز
تاريخ التسجيل: 17/03/2002
المكان: الرياض
مشاركات: 2,196
كنت ناويه اقول برب
بس هونت
من جد اش صاير ! صايرين عجازين

هلا هلالي الظهران

حمد الله عالسلامه

يامن غـدا شوفكم كما حبـة الكـوع ×× لمسه قريب وبوسته مستحيله
أرفقوا على خويٍ لكم غدا مصروع ×× ضاع وقته مابين ديره وديره

صح لسانك >>>ابدا ماضحكت:p


مشاء الله جايب امثال اول مره اسمع فيها
قصصها صحيحه اكيييد؟
عشان اتفلسف فيها على الي مايعرفونها زيي
لو صارت من تاليفك ياويلك:p


إقتباس
سعر الحبه بـ 5000 ريال

باخذ اثنين بكم تحسبلي اياهم:p
هههههههههههههههههههههههههه


لاتقطعنا من مواضيعك الحلوه
اضافة رد مع اقتباس
  #7  
قديم 19/03/2007, 05:42 PM
زعيــم مميــز
تاريخ التسجيل: 06/09/2005
مشاركات: 1,600
صــراحــة مــع انــكـ مـا تـعـرفـنــي زيــن لـكـن أنــا من الي يـتـابـعـون مـواضيـعــك .. !

يــاســلامـ :

يـــ

مبــدعـ ـ ,,

______________________________________

قــريــت المـوضـوع من أولـه لآخــرهـ .. [ ابــداع [ بـمـعـنـى الكـلـمــة .. !

•• :: : : : :: : : : : : : : :: : : : : : : : : :: :: : : : : ••

عــوداً حــمــيــداً ..
اضافة رد مع اقتباس
  #8  
قديم 19/03/2007, 05:48 PM
مشرف سابق بمنتدى المجلس العام
تاريخ التسجيل: 06/01/2001
المكان: w w w . a l z a e e m . n e t
مشاركات: 6,596
هلا والله بهلالي الظهران ..الرجل الهيمان .. وبالأمثال شيطان ..

اعذرني بس ودي أصفف لك هرج وهذا اللي طلع معي ..

والله من جد فقدناك ..أثرك فقيده ..

وش هالأمثال ما شاء الله عليك ..تصدق إنك غطيت على الشرهان ..

أثر سالفة النساء أولاً كذا ..وأنا اللي أحسبها أتكيت ..

يا ويلي يالمسكين المصدق ..كني أشوف راسه أكبر قطعة فيه كبر التمرة ..ويضرب الحب شو بيذل ..

وإلا المهايطي راعي العنز ..

موضوع لا يجيده إلا هلالي الظهران ..بصراحة دخلت جو مع الموضوع ماهوب طبيعي ما أقول إلا الله يعطيك العافية ..وجعلنا ما ننحرم من شوفة هاليوزر ..

طيب واللي ما معه إلا خمسين ريال ويبي له كمن مثل .. مافيه من أبو ريالين ..


تقبل تحياتي ،،،
اضافة رد مع اقتباس
  #9  
قديم 19/03/2007, 07:15 PM
قلم مثقف بالمجلس العام
تاريخ التسجيل: 21/01/2004
المكان: الظهران
مشاركات: 1,453
هلالي الظهران

أين اختفيت؟
خشيت انها قضية زنزانة أخرى!
لكن حمدا لله على سلامتك

بالمناسبة... انه اسبوع المرور الخليجي!

موضوع ظريف خفيف لطيف

لكن أقول بعد أن قرأت آخر فقرة،
صحيح ان بعض البنات -هداهن الله- "مزودينها" شوي

لكن حتى انت يا عزيزي غض بصرك،
ولا تمر على الراشد والظهران مول كثير وان كان للطعام..
فربما مطاعم الثقبة يكون لك منها كفاية!:p

سعدنا برؤيتك،
ودمتم بخير!
اضافة رد مع اقتباس
  #10  
قديم 19/03/2007, 07:23 PM
زعيــم مميــز
تاريخ التسجيل: 11/10/2004
المكان: الريــ ( حيث الزحمة ) ـــاض
مشاركات: 7,051
يعطيك العافيه على الموضوع اللي يوسع الصدر


خصوصا في فترة الاختبارات



بس بصراحه انت خنفشاري من الدرجه الأولى



ما ادري وين الصدق وين الكذب بهرطقتك


أجدت الخلط بين الصدق والكذب
:p
اضافة رد مع اقتباس
  #11  
قديم 19/03/2007, 07:37 PM
الصورة الرمزية الخاصة بـ الهنوووف
عضو استشاري للمجلس العام
وعضو تحرير مجلة الزعيم
تاريخ التسجيل: 18/01/2005
المكان: زاوية ارى الناس ولايروني
مشاركات: 11,544
:p
قبل ابدى انوه اعزائي الكرام ان كلامي باللون الرمادي وكلامه هو (الي كتب الموضوع ) بالكحلي:p ماودي اسوي اقتباسات >>>>>>>>كانها حالفه ماتقول اسمه:p




من انت يووه نسيتك ياقدمكــ غبار كح كح
عرفتكـ
سواح:p
يهلا ومرحباا

اهلاً هــلا ترحيـبـتـن كـلـها نـــور ... تلّـــمع كــما بــدراً تبــاها بنوره
ترحيـبـتـن يـدري بـها كل مشهور ......... ترحيبتن تاخذ على الكون دوره
ترحيـبـتن ما نالــها شخص مغرور .......... لا مـرّته تـاخـذ منه فــي غروره
ترحييبتن اللي غاب له عدة شهور ....... وامه على ضيم الليالي صبـوره
ويــا مــرحـــبا تـــرحـيـبـتـن كلّها نور ..... تلمع كما قلاده على صدر نـــــوره


اتحداك اذا احد في مسيرتك الانترنتيه والعمليه والدراسية والحياتية وكل شي
اهداك مثل هالابيات:p

مساء النور والسرور والبلور المكسور والموعد المهجور وادام الله عليكم كل سرور وحبور وسعيكم مشكور وذنبكم مغفور وهلالكم منصور وعدوكم مدحورٌ مدحورٌ مدحور..
وش سالفه الور معاك ماسك خط
مساء الخيرات خيوو
وش هالموضوع الطويل ياشين التقليد بس بس حلو اتسلى بما ان مافي الا انا بالبيت
قبل ابدا داخلت على الله ثم عليك تعرف الي راده اولي عليك ابيك تسحب عليها وترد عليها قبل الاخير واذا قالت ليه قول لسببين
1__دايم الاولي يرسله الاستاذ يجيب شي ويبدا يشرح ويجحده وينساه يعني وكفشتها تو انها ماتصف الاولي بالمدرسه تقول الاخير كسلانه مطلعه الحره هنا مهيب مثلي ماغير ارتز بالمدرسه اولي
2__ انها توسوس لي تقول بيجيك الحرامي على بالها اني بزر >>>مسوية ماتخاف ماكنها تسوي جوله بالمفاتيح على ارجاء المنزل تقفل

ندخل بصلب المووضوع ادري شطحت واجد

الهرطقه في اللغه: البدع اوالخزعبلات ..
مسوي ماجد مقبل يعني تعطينا مصطلحات >>>بتتصفق

استمر الشاب على حالته السيئه حتى تبقى على زواجه من بنت الدوق جورج ليلة واحده..ضاقت الدنيا والتجأ الى محبوبته يسألها ماذا يفعل.. فأشارت عليه بأن ينتحروا كليهما لكي يحافظوا على حبهم الطاهر ويدونون للأجيال القادمه كيف يكون الحب والتضحية ..
ياهيك الحب يابلاه وه بس
مو مثل هالايام قال احبك صار يحبك
الحب تضحيه >>>صدقت



يعني من جد اذا قالتلك وحده "احبك موت" لاتصدقها الين تنفذ وعدها واذا ماتت صدقها وعطها اللي تبي وعلى ضمانتي ..
اجل بقدم الرجال قبلي
وانا اقول ورى ابوي ذاك اليوم مخليني امشي قبله:p


هالفقرة اعجبتني واحس اني استفدت
واهم شي اني امشي انا وهوو سوا >>>تسمع بالتنازلات من اجل الحب:p


ننتقل للثانية
قالت المرأه.. بلى ياشيخ ولكني سمعت حديثا بان البكاء واللطم على الميت يزيد من عذابه في القبر!!
اوف وش ذي نذلة

هنا ابتسم رشيد وقال.. اييييييييه .. ابيها بيضا وشعرها طويل وناعم وابيها مربربه وعيونها ناعسه وعسليه وترمش.. ابيها تعرف تهمز وتشجع الهلال.. واهم شي تعرف تطبخ حنيني وقرصان.. وابيها تقولي "ابن عمي" .. يمه باختصار ابيها مثل نوال الكويتية ..
الله يرجك قل امين
والله ياوليدي لو ألقى وحده بهالمواصفات كان تزوجتها أنا..
وش ذي انهبلت وانا اشهد



عصفور باليد ولا عشرة على الشجره
صدق والا تستهبل ترى بديت اصدق

إقتباس

التفت عليه راعي الصلعه وحط صلعته عند وجه البثر وقال "الحس" ..

يعجبني


قال صالح.. قبة الشيخ علي جعلها هدامه ..
هذا مثل صدقي اول مرة ه اسمع فية

يعني ليه كذا؟ من جد والله ليه؟ وش ذنب الشباب يتعذب بهالمناظر المؤذيه
ومن قال لهم يشوفونهم;) غض البصر يابني

!!(اجل تنوره قصيره وتحتها برمودا وش خليتوا للهنود )
وسع صدرك ياخووي
تصدق كل شي مع الموضه يمشي اجل من يصدق ان البنات والشباب يتعاملون مع قماش وجلد مربعات (كاروهات ) اقصد بربري :p ماشاف الزين بس لانه ماركه هبو فية ولست ازكي نفسي منهم


سعر الحبه بـ 5000 ريال ..للاستفسار/ مراجعة أقرب شارع تحليه
اوووف غالي مرررررره
ماعندك ارخص
لو ناقص كلمتين ماعليش
واي تحلية بالضبط حقت الي عندهم اجازة اوحقت ذوليك:p


هلالي الظهران
موضووع زريف

عودا حميدا
افتقدنا لسحر حروفكـ وهاهو يرى النورمن جديد >>>> لاتصدق
احس مايصلح ارد عليك بكلام منمق
الزبده عاد
ان المووضوووع اعجبني والله ولست في محل مجامله وضحكني شووي
واهم شي رجعتكـ

ولاتطول الغيبه وبالتوووفيق ياسواح

ود يليق بكـ


الهنوووف

كانت


هنا

ورحلت




اضافة رد مع اقتباس
  #12  
قديم 19/03/2007, 08:01 PM
زعيــم مميــز
تاريخ التسجيل: 08/09/2005
المكان: آلريـ k.s.a ـآض~..
مشاركات: 5,634
إقتباس
"البنات البنات ألطف الكائنات"


هههههههههههههههههههههههههههه ياقدمك




مشكور على الهرطقه اللي مالها دخل
اضافة رد مع اقتباس
  #13  
قديم 19/03/2007, 11:35 PM
زعيــم مميــز
تاريخ التسجيل: 23/04/2004
المكان: بين النجوم
مشاركات: 4,461
وش قصتك مع المواضيع الطويله؟؟؟

عندي ميااااااااااااااااااااااجر
يس يو ليتر
((حبيت اعلم اني شفت الموضوع من بعيد^_^))
تشــــــــــــــــــــاو
اضافة رد مع اقتباس
  #14  
قديم 20/03/2007, 01:31 AM
زعيــم مميــز
تاريخ التسجيل: 11/07/2005
المكان: حيثُ يعيشُ الأملْ
مشاركات: 3,080
هـــلا والله وغلا
هلا بنورهم وسرورهم :p وانا اشوف المنتدى منور
نور غير طبيعي اثاري هلالي الظهران هنا :p


اهلاً هــلا ترحيـبـتـن كـلـها نـــور ... تلّـــمع كــما بــدراً تبــاها بنوره
ترحيـبـتـن يـدري بـها كل مشهور ......... ترحيبتن تاخذ على الكون دوره
ترحيـبـتن ما نالــها شخص مغرور .......... لا مـرّته تـاخـذ منه فــي غروره
ترحييبتن اللي غاب له عدة شهور ....... وامه على ضيم الليالي صبـوره
ويــا مــرحـــبا تـــرحـيـبـتـن كلّها نور ..... تلمع كما قلاده على صدر نـــــوره


هنو سوري اخذتها منك

إقتباس
مساء النور والسرور والبلور المكسور والموعد المهجور وادام الله عليكم كل سرور وحبور وسعيكم مشكور وذنبكم مغفور وهلالكم منصور وعدوكم مدحورٌ مدحورٌ مدحور..


سجع نـاقص
بس من ناحيه هلالكم منصوور تكفى لاتذكرني خاطري شاين من امس ااه بس 2-صفر مره وحده
يارب تتعوض بالإياااب دبل للهلال


إقتباس
يامن غـدا شوفكم كما حبـة الكـوع ×× لمسه قريب وبوسته مستحيله
أرفقوا على خويٍ لكم غدا مصروع ×× ضاع وقته مابين ديره وديره


ياعيني;)
صح لســــانك

إقتباس
استمر الشاب على حالته السيئه حتى تبقى على زواجه من بنت الدوق جورج ليلة واحده..ضاقت الدنيا والتجأ الى محبوبته يسألها ماذا يفعل.. فأشارت عليه بأن ينتحروا كليهما لكي يحافظوا على حبهم الطاهر ويدونون للأجيال القادمه كيف يكون الحب والتضحية ..



ياقلبي يالحب مقطع قلوبنا
هذا الحب الصادق مو حب هالأيام يقولها احبك وهو خرطي بوجهه يلعب عليها
طبعا مو الكل


إقتباس
البنيه يوم شافت حبيبها طب وراح فيها وان الدعوه فيها موت ماهو بلعب عيال سحبت على والدى والديه ورجعت للقرية وتزوجت شاب من نفس طبقتها!!


بكاااااااااشه طبعا مو الكل كذا لاتفكرون البنات كلهم سوى

إقتباس
يعني من جد اذا قالتلك وحده "احبك موت" لاتصدقها الين تنفذ وعدها واذا ماتت صدقها وعطها اللي تبي وعلى ضمانتي



وشو تخربهم علينا
انا اذا قلت لأحد احبك مووت فاعلم اني ميته فييه وماقلت هالكلمه الا يوم عرفت بصدق مشاعري
بس لوقالي موتي علشاني والله مااموووت علشانه على كيفه هو


إقتباس
هنا ابتسم رشيد وقال.. اييييييييه .. ابيها بيضا وشعرها طويل وناعم وابيها مربربه وعيونها ناعسه وعسليه وترمش.. ابيها تعرف تهمز وتشجع الهلال.. واهم شي تعرف تطبخ حنيني وقرصان.. وابيها تقولي "ابن عمي" .. يمه باختصار ابيها مثل نوال الكويتية ..


هذا طالب نانسي عجرم بس شعرها طويل تراها تعرف تطبع حتى كبسه
بس وراه قديم يبي تشبه نوال:p ماقال اليسا


إقتباس
يعني ليه كذا؟ من جد والله ليه؟ وش ذنب الشباب يتعذب بهالمناظر المؤذيه


محد غصبهم وقالهم شوفو وش حادهم

إقتباس
!!(اجل تنوره قصيره وتحتها برمودا وش خليتوا للهنود )


وع عاد انا ماحب اللي مرقع حلات البنت تتصير ناعمه ومرتبه

إقتباس
يوجد للبيع امثال عربيه اصيله لم تستخدم من قبل لا تصلح الا لأصحاب السمو فقط .. خفيفه على اللسان وساحرة في البيان .. لها معنى عميق جدا ومغزى فريد جدا..


كانها مثل الامثال اللي طرحتها تو نبيها ليش لا ;) والله رووعه ..

هلالي الظهران..
القلم الرائــع .. فقدناك والله .. لاتقطعنا مره ثانيه
ترى مانتحمل يغيب عن المنتدى قلم مميز كقلمك الرووعه
تسلم يميــــنك ..والله يسعدك


رورو
اضافة رد مع اقتباس
  #15  
قديم 20/03/2007, 02:35 AM
مشرف سابق في منتدى المجلس العام
تاريخ التسجيل: 17/12/2000
مشاركات: 8,956
ولكم باك ابو ضرس

بالله كثر لنا من هالمتخرمات وعساها دوم مهيب يوم
موضوع شيق وامثال روعه غطت على امثال البارق اللي باز علينا
كل سنه مثل لا عدمناك وانتبه لا تسرع هالاسبوع بالذات
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 09:58 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube