16/10/2007, 05:52 AM
|
 | زعيــم مميــز | | تاريخ التسجيل: 09/07/2005 المكان: ظرف مكان منصوب وعلامة نصبه الفتحة الظاهرة على آخره
مشاركات: 7,956
| |
بما أن شهر رمضان أنتهى بنرجع للقبك السابق أبو سباستيان يا الله حيه هلالي الظهران بعدين وش هالتوقيع الي أنت حاطة سابقا  , أجل جريت بعض الناس المهم نرجع نفصفص على موضوعك على رواقة و كله من سبة صاروخ الحشيش اقصد الشاورما , تصدق أني أخذته على لحم بطني و لا ادري إلا أنا في عالم ثاني في عالم أخر في لا خلاص منيب قايل , الله يستر علينا و عليك و باقي المسلمين المهم القصة الأولى  | إقتباس |  | | | | | | | | | |
مالك الا خشمك لو هو أعوج | |  | |  | |
اييييييه يا أنت صادق هالدولة على كثر ما عانينا فيها إلا أنه حبها في القلب سادي حبها في القلب معشش حبها أخذ مكان في البطين الأيمن من قلبي و سكر عليه هالدولة يا أخي كثر ما نقول نحبها ما نوفيها , على كثر الغبار و على كثر الحر و على كثر الشوارع المحفرة و على كثر أعطال الدي سي إل و على كثر الروتين الممل و على كثر الواسطات و على كثر إستغلال شركة الإتصالات و على كثر انفجارات المجاري و على كثر التفحيط و على كثر الكتابة بالشوارع و على كثر تكسير صناديق البريد و على كثر إرتفاع اسعار المواد الغذائية و على كثر التصريحات و التبريرات المضحكة من بعض المسؤولين ,, نحب هالدولة خلاص الحب أبدي الحب ما له مثيل الحب يسري في دمي خلاص ما لنا غناه عنها يا أخي هالدولة شعبها طيب تخيل العصفور الي كان يقومني كل صباح بزقزقته الشجية نتفوه عيال الحارة بالنبيطة , و ما بقى غير صوتهم الي يجيب المرض الي تقول كنه نعاق غربان لما تسمعهم يغنون حمام جاني مسير و لا سلم عليا <<< الظاهر الحمام يوم شاف شكلهم وهو غاسلن يده منهم حتى الحمام صار يفهم يا أخي هالدولة قسم بالله لو تروح أي مكان بالعالم مهوب تلقى مثلها مشكلة الحدات و التسقيطات و الدلوخ الي يسوقون بهالشوارع عد و إغلط و أوووووووووووووه لو بتقعد تفكر قسم بالله تتعب مرة من المرات و أنا بالصبح الشارع فاضي ما فيه ألا أنا ماشي و يجي راعي الأكسنت و يساقط بين السيارات وش يبي الله اعلم بس لو أنه ماشي سيده كان أبرك له بدال ما ينحرف و قسم بالله تشوف سيارته تقول هالسيارة بتفكك قبل لا يوصل مشواره و كله كوم و مرة واقف عن أشارة قسم بالله بالصبح ما فيه غير صف واحد بالخط الأمامي و يجيك هالمفهي و بدال ما يوقف ورى و يصف مع العالم و الناس و ما فيه غير سيارة وحدة قدامه بس لكن أصرا أنه يجي من اليمين و يضايق الناس علشان يصير قدام بالله الي زي كذا و دك تنزل و تدبغه بالعقال من الدلاخة الزايدة و لا الثاني بزر الظاهر أول مرة يسوق سيارة بحياته و ماخذ الطريق العام و مشكلتي الوحيدة أني وراه أشوف أذا الي قدامه بس لمس فرامل و ولع نور البريك على طول يضرب فرامل على الأخير و أنا بغيت أقبع فيه أكثر من ثلاث مرات على دلاخته و على طول أدعس و أسبقة علشان ما يزعجني و قلت لخويي خلنا نلعب على البزر الي ورانا و ألمس الفرامل شويش ( ما يقرب لشويش الثنيان بس تشابه أسماء ) بس علشان تطلع لمبة الفرامل ولا الفرامل مهيب ماسكة و تشوفه يكع الفرامل على الأخير سويتها أكثر من مرة و أنا أضحك على دلاخته و واحد من الشباب بشارع بعز الزحمة ما فيه مجال و أنا ماسك اليسار و وراي واحد يكبس علي فقع عيوني يبيني أوخر ما أدري هو شايفني حمام أطير أو أروح وين نعنبو بليسك يمين ما اقدر أروح قدام ما أقدر أدعس و لعانة فيه صرت أهدي أكثر علشان يتأدب
و أزيدك من الشعر بيت رايح مع واحد دلخ بمعنى الكلمة كانت هي المرة الأولى و الأخيرة الي أركب معه من دلاخته الزايدة بنروح الإستراحة مستأجرينها بعد صلاة الفجر و طالعين الشارع فاضي و الرجال مقلع حتى الحين مهوب مشكلة لكن الدلاخة الزايدة تتجلى في أن الرجال ماخذ الخط الأصفر , قلت طيب ليه ما تاخذ الأيسر بدال ما أنت حاشر نفسك على الفاضي , قال لي وش تبيني أسوي خلاص تعودت
و لا تستغرب إذا جيبت الرياض و لقيت الشارع كله فاضي و الزحمه على الأصفر
أما الشيبان هذولا مشكلتهم مشكله تشوف يتناقضون في الدقيقة عشرين مرة و ما عنده غير حش في حش بخلق الله و أسطوانتهم المشروخه حنى لما كنا قدكم و حنى لما كنا بأعماركم و كنا و كنا قسم بالله تحس أنهم سوبرمان مهوب بشر , و إن جيت للجد ما عندهم غير الخراط أما الحمامات حدث و لا حرج مرة شايف واحد كاتب يا ما بالسجن من مظالم الحين الواحد بيدخل الحمام وش دخل السياسة بالموضوع يا أخي ناس يدخلون الحمام مزنوقين و قدر الله عليهم أنهم ما يقدرون يوصلون لبيتهم ليش تدخلونا بالسياسة ترانا مهوب قدها , يكفي الريحة الي تخلي الميت يقوم و ينحاش
أما ما يخص كتابات الشوارع روح لشوارع أو الحدائق قسم بالله تحف فنيه يا أخي ناس مضيعين فلوسهم و يا كثر ما تشوف (( عاش فريق الزراديه يسقط فريق مفتاح 14 , مناحي ملك العود , شارع المحبين و و و و و إلخ )) و حتى ربعنا من شده حبهم للمغازلة ما عنده مانع يودي حياته بداهيه و الي جنبه و الي بالشارع و يطلع من قزازة سيارته و يسوق برجله كله علشان يعطي الرقم لوحدة تطلع بالنهائي عجوز بالسبعين بس لأنها راكبه مع سواق و لابسه عباية بعدين تدري وش المشكلة مهوب الي يفحطون و الي الحمد لله الدولة الحين صارت حازمه معهم و لو كان القرار بيدي كان الجلد عشرين مرة لكل من يفحط يا أخي الواحد قسم بالله ما صار يرتاح أبد على طول اوووووووووووع ايييييييييييييييع بعدين قبعه و إنحش , يعني ما يقدر حياته و لا حيات الي معه  يعني إلا هالدرجة مرخص نفسه !! , لا بس تدري وش النكته أنه مسوي أنها حركة مرجله ما درى أنها حركة مبزره , و كله كوم و المهبل الي يطاردون معه قسم بالله ودك تدعي بسلامه عقولهم بس خاصة لما تسمع (( حبتين , هوا , يا سلام , حركات , أحلى يا وااااااااااااااد و و و و و إلخ )) من كلامهم الي تحس نقص بالعقل و لو رحت تشوف شهادتهم شهادة رابع إبتدائي , هذا أن ما كان شهادة تطعيم و تخب عليهم بعد و تصدق من ثلاث أشهر صار لنا موقف من واحد الظاهر مقضم , كنت نايم بالملحق إلا و أسمع طرااااااااااااااااااااااااااااااااااااااااااااخ و اقوم متروع وش السالفة  , قلت لا يكونون إرهابين طابين في بيتنا , و أطلع و إلا ألقى واحد معه هايلكس قابع باب بيتنا و خالعينه و ألقى أثنين من الي في السيارة متسدحين في الحوش و واحد متطبح داخل السيارة و كلهم غرقانين بالدم , سلامات وش الي صار يعني الظاهر انهم شاربين شيء !!
أتصلت بالدوريات وجت الأسعاف كل الثلاث بحالات خطرة بس أحسن شيء أن الدوريات كانوا يداومون قدام بيتنا إلين نصلح الباب , قسم بالله حسيت أني شخصية مهمه , و الأحسن من كذا أنك تضمن ما فيه أحد يفحط بحارتنا و خصوصا قدام بيتنا الي تعور (( مسكين ))
طبعا غير الي قابع بالدور الثاني يعني قسم بالله أي شيء لا تستغربه بالسعودية واحد يقبع الدور الثاني , طبعا شفتها بمقطع بلوتوث و أنا مهوب مستوعب السالفة لأنها خالفت كل قوانين نيوتن للجاذبية و حتى إنشتاين لو شاف الحادث بينتحر لأن عبقريته الفذة مهيب مستوعبه الأمر , بس قلت كل شيء جايز عندنا
باقي القصة الثاني و الثالثة نفصفصها مرة ثانية و برد ثاني بعد ما يرجع لنا أبو ركبه لأن الصاروخ الي معي خلص و قال بجيب لي كمية منها يا اليوم أو بكرة عاد إذا جابها و روقت و بعدها معسل تفاحتين و عصير برتقال خلاط من مطعم السباكة الذهبية للخدمات الكهربائية , يكون المزاج مروق للمخمخة من جديد
مع تحيات أخوك أبو إليساندرو (( في رمضان أبو القعقاع ))
اخر تعديل كان بواسطة » juve1897 في يوم » 17/10/2007 عند الساعة » 02:45 AM |
..
..
الوضع العادي
