التــاريخ يقــص شعـــره كــــاريه - صفحة رقم 3 - نادي الهلال السعودي - شبكة الزعيم

صدى الامس · #31 01/10/2007, 04:16 AM

ههههههههههههههههههههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههههههههههههههههههههههههههه

اجل اميرة موناكو ههههههههههههههههههههههههههههههههههههههههههههههههههههههههههه

ليتنا من حجنا سالمين والله

الله يخس ابليسك تساني مت من الضحك وش العمرة هذي كلها مشاكل × مشاكل

وآخرتها ترقيم بعد

ماقلت لك انك ابو سباستيان في كل حزة وكل حين

او على قولة واحد من الشباب كل بتله على طول

دلع-20 · #32 01/10/2007, 05:52 AM

طيب أنت الحين تكلمت عن كل شيء بقلبي وأقول صح لسانك وصح كل شيء فيك

وتكلمنا عن كل شيء يقهرنا

بس السؤال الأهم انو وبعدين الى متى واحنا نتكلم ونستانس اننا طلعنا اللي بقلبنا وهو بالاساس ماتغير المجتمع

كل يوم القى مصيبه بالمجتمع أكبر من اللي قبلها

يعطيك العافيه

badori999 · #33 01/10/2007, 06:03 AM

لله درّك يا ابا الدرداء....

موضوع جميل الصراحه فكلمة شكرا تعتبر قليله بحقك يا اخي العزيز

ننتظر المزيد منك .فلا تبخل علينا...

تقبل مروري البسيط....

الخيال2006 · #34 01/10/2007, 06:24 AM

إقتباس

الرسالة الأصلية كتبت بواسطة هلالي الظهران


	أخوكم/ ابو سباستيان سابقا- ابو الدرداء حاليا <<لزوم رمضان بالتوفيق..[/COLOR]

وصف رائع ..
والله يعين ..

الكلاسيكي · #35 02/10/2007, 01:14 AM

هلا فيك اخوي هلالي الظهران .. سباستيان ..
نورت المجلس بحروفك الهرطقيه .. وبقفشاتك اللولبيه ..

انا قريت الجزئين مع بعض .. والصراحه ما اقول الا " احبك ياوطني بكل عيوبك "
والصراحه كل السلبيات اللي صارت في كم هالساعه واقعيه وللأسف ..
لا الدورات .. ولا غزل الاطفال .. ولا الهمج في الملاعب .. ولا بزاريينا الغثيثين .. !

ولكن مانقول الا الله يزين الحال .. ويعدل الاحوال ..
وعاشت بلادي والحاضرين !

لي عوده ع الجزء الثاني .. !

عدنا ..

اما هرطقتك الثانيه .. ما اقول الا كان الله في عونك .. والصراحه زحمة الحرم
وهمجية وجهل بعض الناس تسبب لنا مشاكل .. ولكن على اجر باذن الله ..

تقبل فائق احترامي يابو سباستيان ..
والف شكر ع الموضوع اللي لامس واقع نعيشه ..
دمت بخير .. لاعدمناك ..

هلالي الظهران · #36 06/10/2007, 12:07 AM

تيتي تيتي زي مارحتي جيتي

ذات ليل وبينما الناس قيام وانا راقد.. حتى اذا انجلى الليل استيقظت ورقد الناس..فبقيت بوضع الاسيقاظ والقيام والناس بعضهم نيام وبعضهم رقاد.. وبينما ان على هذا الحال من الوسوسة سمعت صوتاً يشدو بأجمل الالحان " لقد أطربت الدار بمن زارها فرحا فاهلا واهلا بأهل الجود والكرزي "

كان هذا الصوت المغرد لجاري وهو ينبعث من الدهليز المشترك بين شقتي وشقة جار الهنا في عمارة العزوبيه.. بالمناسبه جاري هذا يسكن مع اخاه الذي هو جاري ايضاً

..

جاري هذا صاحب الصوت المغرد- الله يشافيه - عنده اضطرابات عقليه

.. يعني جسمه جسم رجل وعقله عقل طفل.. وهو فترات يغيب وفترات يأتي لأخاه ليقطن شقته ويشاركه فيها..

خُطف عقلي وهمت منكباً سارحاً مع جاري وهو يردد رائعته: " لقد اطربت الدار بمن..... " .. يا ألله كم أحسدك ياعادل.. وكم أغار منك.. آآه ياعادل ما أحظظك.. أكبر همك لعبتك.. وأصغر همك ايضا لعبتك.. وقمة سعادتك كمان لعبتك.. وحزنك يمتزج ويتمخض حين لاتجد من يشاركك لعبتك..

( ^
^
لابوك لابو لعبتك

<< محاوله أدبيه فاشله لاستثارة المعاطف وتهييج الشواعر

)

بالرغم من ان عادل يحمل تفكير طفولي الاّ انه سنايدي ويفعل ماتطلبه منه.. فهو يعمل مايعمله الاخرون من حوله.. على سبيل المثال.. في ثاني او ثالث ليلة من رمضان كنت رايح لصلاة التراويح وصادفت عادل وسالني وين رايح؟ قلتله بنروح نصلي التراويح وأخذته معي..

والله وصلينا العشاء والتراويح والوتر وعادل يصلي جنبي.. وماشاء الله المسجد شبه ممتلئ.. وكان الامام الله يجزيه بالخير قد تحمس وأطال بالدعاء واكثر من الالحاح باجابة الدعاء واسهب وردد كثيرا بعد كل دعاء جملة " ربنا نحن عبيدك فانظر لنا فنحن من المنتظرين" ..

الشاهد.. بعد نهاية الصلاه مباشره اشار عادل باصبعه على الجمع الغفير وقال: الحين هذول كلهم من المنتظرين؟! فارتسمت على محياي ابتسامه وأطرقت برأسي للأعلى والأسفل ايمائةً عن الايجاب.. ثم سكتُّ قليلا وتفرست ملامح وجهه لعلني ارى ردة فعل فلم أجد.. فقلت محاولا استمالته للحديث: فهل انت من المنتظرين؟
أنّكب عادلٌ من سؤالي وأسرع قائلاً: والله مدري وش اقول لكن ابنتظر معكم ماعندي مشكله بس انتم وش تنتظرون؟!

فأطلقت تنهيدة عميقه حتى كادت سعابيلي أن تتطاير وأردفت قائلاً: حنا ننتظر الجنه ياعادل وندعي الله مايدخلنا النار.. وسرعان مااكتست الحماسة وجه أخينا عادل وقال بكلمات تخر لها الجبال الرواسي: أجل سجل عندك واحد ينتظر الجنه

..

الله يسعدك ياعادل.. أحسبك ولياً والله حسيبك ومولاك.. على طاري التراويح يااخوان ليه نشوف المساجد بأول رمضان مليانه وكل مامر يوم نقص العدد؟! استغفر الله بس وكأن الصلاة مثل الشطرنج كل يوم ينقص لاعب وفي النهاية مايفوز الا الملك اللي هو الامام وكم واحد معاه!

مهوب بس في الصلاة الا بعد في القراءه وبقية العبادات.. تشوف الناس متحمسه أول كم يوم وعقبها يخقون!! حتى هالضعيف عادل يجي للصلاه بس اذا شاف المبزره برا يلعبون بالطراطيع والشروخ راح يلعب معهم!

من جد يالربع كل واحد يربي عياله واخوانه زين ولااقضبوهم لايؤذون خلق الله.. والله انه شي يرفع الضغط ماتدري تركز بالصلاه ولاتقط مع هالمبزره في هواشهم ومطاردهم! ياخي اذا ماعرفت تسنع ولدك وتخليه يصلي لاتجيبه المسجد يزعج خلق الله في صلاتهم.. واذا قفلت مع الامام وعطى اهاليهم كلمتين في العظم.. وماصدقت على الله يهدى المسجد وبديت تخش جو في الصلاة ماتدري الا وصاروخ مفرقع يخليك تفز من مكانك.. اعنبوا ابو ابليس اقضبوا عيالكم ولا والله ثم والله لأشرشحكم في المنتدى

..

وبما أني جالس أشرشح فيه شي ثاني باط كبدي

.. الحين ليه ماتحلى دوريات الكوره الا برمضان؟! ماقلت لحد يلعب.. العبوا بس بعقل واذا قسمتوا دقوا علي أجي واكملكم مهيب مشكله

لكن فيه ناس يروح رمضان كله وهو مطامر من ملعب لملعب ومن دوره للثانيه وكأن رمضان ماخلق الا لعب الكوره!

فيه واحد يحكيني عن شباب انه من زود الطناخة اللي فيهم يلعبون مباراه كامله بعد الفجر.. وعقب المباراه كل واحد يصكها نومه الى المغرب.. هذا ان كان صحى!

طيب اتركوا معي هالمطافيق على جنب.. على الاقل اسمها رياضه وفي حالهم ومامنهم مضره..البلا والله في هاللي مضيعين وقتهم بالمسلسلات.. تخيلوا ياجماعه واحد يقولي رمضان هالسنه طفش مافيه مسلسلات حلوه الا اثنين! ياألله لهالدرجه صرنا نتملل من رمضان ونقطع الوقت فيه بالمسلسلات!!!

طيب تبون تعرضون مسلسلات مافيه مشكله اعرضوا بس ياخي لاتقطعون علينا كل شوي بمقطع (<<واحد يتابع الاعلانات

) ..لا وأبشركم فيه فنانين الحين بدأوا الاستعداد لرمضان القادم وتجهيز أعمالهم (<<قويه صح

)..

لا يالربع.. جد والله انتبهوا لانفسكم ولعيالكم.. تصدقون صاروا بعض الصغار مايروحون صلاة التراويح علشان مايفوتهم شي من باب الحاره!حتى عادل هالضعيف جاني هاك اليوم يقول: ارجاتش بالله ومحمد رسول الله ياعين أبوي!

وكل الناس عند عادل صاروا عين ابوه.. قلتله وش بعد ياعين أبوي؟
قال: جميله في قلوبنا

مسكت اخوه على جنب وقلتله ياخي حرام عليك مايصير تارك الادمي كذا اخبره كان يصلي التراويح والحين خاق مع جميله..
قال: ياخي والله تعبت اراكض وراه وهالمبزره مخربين عقله.. بعدين اسكت بس ماتدري وش مسوي هاك الليله.. يسترسل اخوه: استغلني هاك اليوم وخلاني ارقد واخذ بكت السجاير ودخنه كله.. يوم جيت اصحيه قام وحاط يده على راسه ويقول: آآه مصدع .. قلتله وش فيك؟
قال: لا ولاشي بس شفتهم يزينون كذا بالفيلم حق أمس

.. يقول اخوه: والله احترت مدري أفهمه انه يصير كذا اذا قرقع مهوب اذا دخن والا اهزئه

..

على طاري الدخان.. والله انا انسان مايرفع ضغطي الا اللي مايمديه يمضغ التمره الا وهو شاب الزقاره يقاله خرمان ومايقدر يستحمل! ويا كم وكم تلاقطت مع ناس اذا افطرنا بمطعم على هالشغله.. اعنبوا ابليسك مسوي حشاش اطلع دخن برا ولاتقعد تعجعج علينا

.. انا انسان مااداني الدخان وخصوصا في حالتين اذا جيت آكل او أجرك

.. يااخوان والله يخربون ابو مندوب جوي

..

وعلى طاري فطور رمضان بالمطاعم.. والله ياني استانس اذا افطرت بمطعم على شارع رئيسي وخصوصا شارع الظهران.. لانك تشوف سباق راليات يبطي شوماخر وباخشب وربعهم يسوون نصه

..

طيب يابني ادم وش يضرك اذا اذن وانت بالطريق تفطر على تمره وبتوصل البيت ان شاء الله وعلى مهلك وبتدب في النعمه حتى تقول للحمار ياخاله

.. هذا كله كوم والهواش اللي يصير عند المطاعم كوم ثاني.. تقول كأنهم سنين ماكلوا ! الحين بس عرفت ليه يوم يجيبون صور عن اخواننا في الصومال والنيجر مايحن قلبي؟!
والله من الملاقط اللي تشوفه قبل المغرب ماتشوف اخواننا يتهاوشون عليه وهم تمر عليهم ايام بدون ماياكلوا!! صدقوني لو تبونا نحرر القدس جوعوا ربعنا وعلموهم ان الفطور هناك بس لازم يذبحون اليهود وابشروا

..

والبلا انهم ينرفزونك معهم.. اجل هذاك اليوم بعد هوشه عظيمه ماصدقت على الله اطلع من المطعم وانا اركض بالشارع وخويي وراي بالسياره يضرب بوري ومولع الفلشر ويصورني فيديو وانا فرحاااان اركض والسمبوسه بيد والبيتزا بيد

..

يالربع والله رمضان شهر الخير ومايصير هالحكي.. الحسنات اللي نجمعها في رمضان مايجي اخر الشهر الا وحنا مطيرينها.. طيب على الاقل حاولوا تقتصدون في استخدام الحسنات وتقسطونها على طول السنه (<< لاعاد تنصح وانت تحسب تكاليف الزواج

)

على طاري رمضان شهر الخير.. الحين شلون نصدق راعين المحلات النسائيه لاقالوا رمضان شهر الخير مع انهم 24 ساعه بمحلاتهم! ماتدري اي خير هم يقصدون العباده والصلاه وكثر الاجر ولا الصدقات والقيام والتهجد

.. اعنبوا ابليسهم اكيد بيكون شهر الخير والمبيعات عندهم اضعاف.. عاد حريمنا مايقصرون راعيات واجب! يدخلون السوق يوميا.. وفوق هذا تشتري الشي اللي تبيه والشي اللي ماتبيه.. وفوق هذا وهذا يلفون كل الاسواق حتى اللي مقفل يروحون يشيكون كانهم فتحوه

.. وفوق هذا كله يطلعون انهم يطلعون مثل الحمل الوديع ومايكاسرون ابد عن قولة رمضان كريم

..

اعنبوا ابليسكم ياهالحريم .. اولا ضيعتوا وقتكم برمضان في الفراره بهالاسواق.. يعني وش يضركم لو انكم شارين اغراضكم من شعبان؟!
طيب نقول نزلت بضاعه جديده حق العيد برمضان.. اوكي اطلعي يوم يومين لكن مهوب كل يوم.. والقهر انهم لافروا السوق كله وضيعوا كم ساعه مايرجعون الا بكيس صغير

.. وياليت انهم يبونه لا بس عن قولة ان المقاس كبيراو اللون ماعجبني حتى تضمن طلعة بكره

.. والبلا في النهاية تسمع الجمله السنويه " والله بضاعتهم هالسنه شينه" .. طيب اعنبوا ابو ابو ابو ابليسكم شينه ليش تشترونها؟!

المهم فكونا من ذا الحريم لاني عصبت

.. وعودا على ذي بدء قبل ثلاثة ايام رحت للتراويح ومعي عادل.. صلينا العشاء والتراويح.. وبعد الصلاه تلفت عادل على الموجودين وسألني بنبره استفهاميه: وين المنتظرين راحوا؟ ليه صاروا قليل؟ مايبون ربي يدخلهم الجنه؟

والله مدري وش اقولك ياعادل.. واكتفيت بنظره حزينه.. ولما شعر عادل الطيب بحزني اراد ان يداعبني قائلا: اجل بقولك نكته.. قلتله: قول ياعين أبوي انت

.. قال وهو يغالب ضحكاته: نكته! طلعنا من المسجد ووصلنا البيت وعادل يعيد النكته وانا احاول استوعب.. ثمن فقعتها ضحك.. اعنبوا شيطانك ياعادل أجل تجر فيني وتقول أبقول نكته وانا جالس احتريها ثمن طلعت كلمة "نكته" بس ههههههه .. طيب ياعين أبوي انا بقولك مثل وهو .. تيتي تيتي زي مارحتي جيتي.. أظهر عادل اللامبالاه وعطاني مقفاه وبدأ بترديد رائعته " لقد اطربت الدار بمن ...." .. والله مو منك ياعادل من ربعنا اللي يدخل عليهم رمضان ويطلع وهم ماتغيروا وتيتي تيتي زي مارحتي جيتي

..

برايفت للجميع: يااخوان هالكلام اللي سبق ذكره اذكر نفسي فيه واذكركم بعد .. ورمضان بقى عليه اسبوع هالله الله فيه.. ولا تنسون حديث الرسول اللهم صلي وسلم عليه :" رغم انفه ثم رغم انفه ثم رغم انفه من ادرك رمضان ولم يغفر له" او كما قال عليه افضل الصلوات والتسليم.

=.=.=.=.=.=.=.=.=.=.=.=.=.=.=.=.=

يالربع اعتذر عن التاخير.. الله وكيلكم لي ثلاث ايام طريح الفراش بعد ان داهمتني الانفلونزا قاتلها الله.. انتظرونا بالحلقه القادمه في " ناظر بقره واحلب عنز"

أخوكم/ ابو الدرداء

هلالي الظهران · #37 06/10/2007, 12:26 AM

يالربع احفظوا هذا الرقم عن ظهر قلب 37 .. ولاتنسونه لاني برد عليكم منه بس خلال ساعات باذن الله لان الانفلونزا حاست ابو مريري وحرارتي على أعتاب الاربعين

..

أكتب لكم واللاب توب فوق صدري وانا طريح فراشي وأعتذر إن خنبقت أعلاه لأني ما أدري وش كتبت !

راجع باذن الله قبل نهاية مدة التحرير بس لاتنسوني من دعواتكم

..

=.=.=.=.=.=.=.=.=.=.=.=

باااااااااااااك

هانا اوفي بوعدي وعدت قبل انقضاء الموعد

اليزابيث هيرلي

حياك الله أمي

..

تعالي وشو كوكتيله انا اخر علمي بالفراوله

..

إقتباس


	مشكلة المجتمع السعودي في الجنس الخشن .. دائما نقص وين ما تروحووون

اقول اهاااا بس..
اخس يازياده انتو.. شوفي مع اني مادخلت مدارسكم ولا احواشكم الخلفيه بس يكفي اكبر دليل هالركب السود اللي ماجات من المطامر فوق الاسوار.. وش بقيتوا للعيال

..

حياك الله يامزمزيل بيف بيرجر << مابزيناك وانتي ليز نبي نبزاك الحين وانتي باستري

..

أسود الجزيره

ماغريب الا الشيطان!! بعدين الله يصلح قلبك شارع البراميل مناك روح استفهم على كيفك..

أول العنقود

حياك الله ابن آخي..

ابشر ان جيت بهاجر علمتك بس اخاف انك تاخذ الاجر ومعها لقمة العيش بعد

..

هاك الجزء الثاني والثالث وانتظر الرابع ان شاء الله..

حياك الله

الهنوووف

هنوووفه مو بلازم ارد عليك لانك بالتوقيف..

^
^
بينطق

حيا الله هنوووفه.. فك الله اسرك ورزقك البطانه الصالحه وانا لندعو لكم الليل والنهار بان تفك زنقتكم.. وابشرك هنوو ابتوسطلك ان شاء الله وبالكثير كلها كم ساعه ويجيك افراج باذن الله لاني كلمتلك الواصل

..<< يعني يعني ماادري ان ايقافك ينتهي السبت

..

إقتباس


	وراك تقول وعليكم السلام وش نقول حنا احد سلم عليك ؟؟ وعليكم السلام ورحمه الله وبركاته ::::::::>> ماقال السلام بس بكيفي الحين انت تقصد السلام عليكم او وعليكم السلام >> ياشين الي يضيع عودا حميداا تعبنا نقول عودا حميدا وتنحاش عودا مو حميدا يمكن تجلس

ههههههههههههههههههههه ياحليلك.. مسكت غلط وانا جدك..

اما انحاش لا والله.. بس قاتل الله الظروف! والله اني اسرق الوقت مني علشان ادخل.. بس الحين فترة نقاهه الى العيد ان شاء الله..

إقتباس


	لا تبي تكمل الناقص شوفهم باليوووم الوطني تحمد ربك على العافيه الحين وراك تحش في بلدناا هااااااه ماعجبتك سافر هاجرر تخفف علينا

اما هاليوم الوطني والله مدريت عنه.. كنت بجده وتاكي بالبيت عندنا ناس.. ايييييييه ابرحل وابتعد عنكم وادور من يواسيني

..

إقتباس


	مشاهدات يوميه صدقت فيهااا ياخووي والله فيه ناس مدري كيف عايشين تحس العقول فيها شي يفشلون الكتابه على الجدران للاسف حتى المساجد ماسلمت منهم ياليته شي صاحي ذكريات فلان وفلانه وترقيم واحبك يانورة

اما في دورات النساء احبك يانوره.. اجل الحاله مستعصيه والله وانحرق كرتنا

..

إقتباس


	تذكرت موقف صار بالطريق سواق هندي كان بيلف طبيعي يوقف سيارته ويلف الا وراه واحدن عجل سعودي ويصدم فيه وينزل السعووودي ويفتح باب سياره الهندي ويمسكه من تي شيرته وينزله مثل الخروف ويصارخ عليه وبعدين يرميه على الباب حشى ماعنده قلب ذااا همجي استغفر الله والله هالهندي ان شوفته تضيق الصدر

للاسف هذا حاصل كثير.. والبعض يعاملون العماله وكانهم عبيد واسوء.. اذكر مره كنت في مقهى وشاب سعودي طالب جمر على شيشته.. والظاهر الهندي تاخر عليه وطاح منه الجمر على الارض بعد ويقوم هالشاب السافل ويصقع ابو هنود كف سمعه اللي بالشارع.. قمنا مسكنا الهندي.. وهالورع اخوياه كانوا معه وتكفلوا بتهزيئه.. بس ماربح من هالسالفه الا ابو هنود لانه طلع بــ500 ريال بخشيش.. احس الهندي يقولي ليت الطق كل يوم

..

إقتباس


	السلبيات عندنا للاسف كثيرة لو بنتكلم ماراح نخلص وكلنا امل ان تكثر الايجابيات لان السلبيات ماظنيت ابو طبيع مايجوز عن طبعه

لالا.. لو ان كل واحد بدا بنفسه وباللي حوله ان شاء الله بيتغير الوضع ولو حبه حبه..

إقتباس


	ماشاء الله هذا الولد الثاني مابعد جتكـ بنت كان صرت ابوو سمبوسه لزوم رمضان

هههههههههههههههههههههههههههه
لا لوجاتني بنت برمضان سميتها جميله

إقتباس


	ابو الدرداء الشهر عليك مبارك بعد الزحمه وكل عام وانت بخير تهنئيه العيد مشاهدات يوميه تطرقت لها نتمنى زوالها ولكن متى مدري ادام الله نعمه الامن والامان على هذا البلد المعطا ء>>>> شطحت وكانك بتهاجرر تروح وترجع بالسلامه :::>> كانه جالس على راسهاا لاتقاطع ترى للمجلس عليك حق

الله يبارك فيك.. وانتي بخير وصحه وسلامه..

ماينفع اهاجر وارجع.. اذا بهاجر ماعاد فيه رجعه.. الظاهر بطس لديرتي سياتل

..

والمجلس له حق اكيد..

هنوووفه حياك الله .. واذا بغيتوا شي بالتوقيف علميني ..ولاهنتي ان لقيتي خويي الخال هناك سلمي عليه

..

الله يوفقن

حياك الله اخوي والعفو..

راشد

حياك الله ياراشد كبير.. قسما بالله العظيم ان شوفة هاليوزر تشرح الخاطر..

بعدين ماعاش من يسحب عليكم.. وكل سنه وانت بصحه وسلامه..

كن بالجوار صديقي..

f*y*d

حيا الله شايبنا فياض.. حياك الله ياعين ابوي

..

اجل اقامتك حيث الحب والوفاء مهوب عاقل ابو عقاب

..

ابو عقاب وانا اخوك سالفة انك ترجع لخنبقتي فوالله انه شي يسعدني وينشيني طربا ويوسع من الشعب الهوائيه< اخ يالانفلونزا

إقتباس


	الصراحة مب غريبة التاريخ يقص شعره كاريه معك بيني وبينك كلامك صح ورط خويك .. يعني انت وش خسران واذا ما وافقوا عليه هنا عندك البحرين قريبة ولا تخاف يوصلنا مثل ماوصلت باقي الكتب ,<<<< متخيل كتابك يبيعونه ف جرير بـ85ريال والغلاف خوينا كان هنا مصممه

ايه بس العب بعيد .. انت حدك قصة الاسد وتخب عليك يا الشايب

.. هذا ان ماكان لك قرعة مفرح

..

اما وش خسران؟! خسران واجد يابعدي واحتري الجزء الاخير وان شاء الله تفهم قصدي..

بعدين الله يجبر بخاطرك.. 85 ريال مره وحده .. يارجال نعمه ان وزعوه مجانا عند الاشارات

..

إقتباس


	عمر لي عودة اذا قدرت انا فرحت يوم شفت يوزرك قلت خلنا نحجز بس خوينا مصحصح هالايام ومعصب علي ^ ^ ^ ترا هالرد للمقطع الاول بس توني اقرا الجزء الاول

ياخي انت وش اقول عنك بس.. ياشيخ هات براطمك هاللي شققها الدخان امطخها

.. ياخي عطنا من سعة قلبك شوي لاعدمتك

..
بعدين انت علق على الجزء الاول ولا العاشر.. علق على اللي تبي حتى لو جحدت الموضوع وجلست تعلق علي مافيه مانع

..

إقتباس


	بس حلوة الموية شكلك ماتشرب من موية المنهل << out ولا التراب احلى تراب ف الدنيا ياخي خذ مثال بسيط شف صورة لنفسك وانت طفل ما احلاه وشف نفسك الحين قسم بالله عوامل التعرية تلعب لعب مب صاحي

وانت صادق .. مهيب جلود صايره الا حرافش سمكه

..

إقتباس


	ايه والله ... هذا احلى شي .. قسم بالله الامن والامان احسن شي ومارح يحس فيه الا للي يروح دولة اجنبية قل مثلا امريكا <<< شطح من اولها هناك الواحد يطلع من بيته مايعرف بيرجع ولا بتجيه رصاصة طائشة بالخطا من واحد خلنا نقول افرو امريكان فاتح شباك السيارة ومطلع راسه فالينها مسوين عصابات وحركات نحمد الله ع هالنعمة

من جد .. حتى هنا لو ركبت طياره ودخلت سلاح وقلت انا بخطف الطياره ضحكوا عليك وقالوا وش هالمهبول

.. اللهم امدها نعمه واحفظها من الزوال..

إقتباس


	ياخي في كتابة على جداربيت اظنه قديم كل يوم اضحك كاتب "ارنب نط على امي" وش يحس به ..!!

هذا الظاهر بزر وطاردته امه من البيت.. يارجال حتى الحين الكتابات تغيرت.. اول كل الطموح دتسن والحين صاروا يكتبون بالجدران عن نانسي!

إقتباس


	ننتظر الحلقة الثانية وتيتي مثل مارحتي جيتي الا جيتي اخرب واحب اباركلك شهر رمضان الكريم وكل عام وانت بخير وش اسوي باركتلك ف موضوعك السابق بس خويناا للي مصحصح حذفه الا مادام انك تعرفنا بهراطق هالزمن في مثل محيرني "اقلب القدرة لفمها .. تطلع البت لامها"

الله يبارك فيك.. وكل سنه وانت بصحه وسلامه..

شفته والله .. بس انا اللي طلبت تنحذف الردود .. بس خل عنك والله ياشكل سهل معطيك العين الحمراء.. تصدق وتامن بالله عمري ماخذت انذار .. نفسي اخذ واحد علشان احس بهالشعور

..

اما مثلك هذا ان شاء الله نبي نبحث عنه ونعلمك فيه

..

حياك الله فياض.. وهذاني رديت عشان ماتعايرني مرتن اخرى..

هلالي في مانع

عسى ماشر حتى انت وقوفك!! عسى بس مايجي بكره واجلس ارد على نفسي

..

M e T o O o

حيا الله الاطخم.. حياك الله اخوي نايف

إقتباس


	آآآهـ يالرياض .. مهما قلنا فيها تبقى بـ ,, صحيح انك في كل مشواار لازم تلعن وتسب وتفطر من ذا الهمج بس تبقى بـ .. صحيح ان جوهاا تطبخ فيه الضبااان بس تبقى بـ .. صحيح انك اذا تبغى تقضي مشوار خمسه كيلو يبيلك كم سااعه بس تبقى بـ

اييييه.. وماحب الديار سكن قلبي ولكن حب من سمن الديار

..

إقتباس


	احلى شئ في موضوعك هو عنواان الكتاب الا على فكره متى بينزل في الاسوااق ونشووفك توقع عليه لا تبطي علينا بالاجزااء الثاانيه ,, ناااايف

اذا السالفه سالفة توفيع.. هين ابوقع لو على جبهتي.. اما الكتاب اذا اكتمل ان شاء الله ..<< رد على خلق الله اول بعدين هايط

حياك الله نايف..

صدى الامس

حياك الله ياعميد انت.. حياك الله ياشغفة قلبي ومهجة فؤادي ونن عيني

..

بعدين ياخي هذا كله تحميه؟! وين الموضوع ياخي .. ومن الحين هاه الرد الاخير محجوز لي بس كانك تجحدني زي اخر مره لابو ابليسك لابو موضوعك

إقتباس


	اما المساقط بهالديرة قسم بالله يا درايفر ماطلع الا عقب ما شافوا ربعنا وشلون يسوقون ..!! ابسط شي انه يسقط من يمين ويحدك ليش ما فتحت له الخط !! مع انه فيه واحد على يمينك !! طيب وشلون افتح لك الخط وهذا على يميني ؟؟!! ويسقط عليك ويبدأ يستهبل يربط فرامل باستهبال وحركات بايخه !! هذا غير السرعة اللي ما ادري وش تبي << بس هالنقطة صعب نتكلم فيها << طراه واحد توقف بالحجز بسبتها وهو توه جاي من الشرقية احد قال هلالي الظهران ؟؟!!

ههههههههههههههههههههههههههههههههههه
كأنك تحس فيني.. قسم بالله هوايتي اني احجر لاي واحد يبي يتجاوز من اليمين.. وكمن واحد بغيت اقشعه في اللي قدامه من زود النذاله وعلى قولة القايل ان ماجيت بالصف الاول ماهمنتي الاخير..

والله وانا اخوك لاسرعه ولاهبال ولاغيره خلاص تبنا .. ياخي قسم بالله اني ساعات اجلس افكر وين كان عقلي.. اجل هاك اليوم متحدي واحد اني اسجل الرقم القياسي بخط الرياض- الشرقيه وخذيته بساعتين الا ربع!! ماشي 240 قسم بالله شوي ورجولي تطلع مع الماكينه!!

إقتباس


	اما دورة المياة وانتم بكرامه يا سوالفها سوالف !! قسم بالله ناس ما تستحي .. مابقى شي ماصلحوه عشان البزارين يعقلون ومع كذا مافيه اي فائدة !! بس تصدق فيها ميزة هالكتابات اذا كان وضعك صعب وما مشى مثل ما تبي تسلي عمرك وانت تقرأ وش مكتوب لين ما ربك يفرجها

ياخي الله لايحد مسلم.. عني اجلس مزنوق ولاادخل هالاماكن الا في الشديد القووووووووي

إقتباس


	حقين الشكشكه قسم بالله يرفعون الضغط ويجيبون لك الهم .. اما اللي ي سب ويلعن ياخي وش تسوي قسم بالله يا انا ما اتحمل وما اقدر امسك نفسي !! اكبر عيب فيني اذا جت المباراة اعصابي تروح دمار وما اقدر اتحكم باللي اقوله !! وهالشي خلاني اعتزل الحضور للملاعب .. الصحة رأس المال والقولون لعب في الواحد ..!! صرت اكتفي بالسب وانا بالبيت ..!! اما اللي يرجمون بالقوارير قسم بالله يرفعون الضغط !! طيب وش ذنب اللي جالس لحاله ويبي يتابع المباراة ؟؟ مشكلتنا ان فيه ناس ماتعرف تحترم غيرها !!

ياخي وش تسوي لهالحنيسات.. مطعسه ومفلوتين!!

اما السب مهوب مشكله لاتنرفزت على كوره وعطيت سبه على الطاير.. المشكله اللي يتفنن بالسب .. هذا طال عمرك خلصت وقت التعصيبه وهو توه باقي يسب.

. ورفعة الضغط ان اللي بالمدرج كلهم يصيرون مدربين!!

إقتباس


	اما الغزل والتحرش في اعراض خلق الله من تالي صاير على قفى من يشيل !! الناس صارت ماتحترم احد ولا تخاف من ربها قبل كل شي .. صار الواحد عادي ومايفكر في احد اذا جاء يتحرش في البنت !! قسم بالله صار اسهل شي ان الواحد يغازل .. وهالشي للاسف تشوفه من بزارين ..

تشوف ياعميد.. اول الواحد عشان يرقم يجلس شهر.. والحين بطلعه وحده يرقم ثلاث اربع عادي

..

إقتباس


	المشكلة اذا شفتهم تقلاهم عيال الجيران وفي الحارة .. واذا جيت كلمت ابوهم والا اخوانهم سحبوا عليك والا يدافعون عنهم ويخلونك انت الغلطان !! بس ان سيارتك تنقشع ابرك من انها تنسرق ويفحطون فيها واخر شي تلقاها فوق ر صيف ومافيها شي سليم !!

وانت صادق.. ولد عمي كانت معه ماكسيما بعز وقتها .. والله انسرقت منه فوق الخمس مرات لدرجة انه ماعاد يصكر الازارير علشان لايكسرون له القزاز.. والسويتش ماعاد يحتاج مفتاح.. قسما تركب وتفر السويتش بيدك وتشتغل

..

إقتباس


	الا هاجر يابعدي وانا بكون معك ..!! قال ايش قال يوم وطني << زين ضمنت لك خوي بالحجز

بس على وين؟ كانك تبي شوري على اسبانيا الله لايعوق بشر .. فديتها هالديره وووووه بس

..

صدى لايغرك انهم يقولون عني داشر .. تراني وين ماحطيتيني اعجبك

..

حياك الله ياعمييييييد .. وكن بالجوار صديقي ..

لاعدمتك..

وووووووووه تعبت..

اباخذ بريك والوعد عقب السحور ان شاء الله..

مطيع · #38 06/10/2007, 12:57 AM

اي قل انك مصخن

ما تشوف شر ان شاء الله

والا ذا موضوع

لعنبوا بليسك ما بقى حارة ولا داعوس الا ومريت عليه وانا أقرا

فرفرت بي حارات المملكة كلها

شكله رقم 37 ذا عدد المخارج الي مريت فيها وانا أقرا

طبعا الكلام عن تيتي تيتي

ملخص كامل شامل اوصي بطباعته وتدريسه على طلابنا فهم الجيل القادم علهم يتحرروا من دخول هالحارات أقصد من هالعادات

هلالي الظهران

الله يعطيك الصحة والعافية

على فكرة عائد ارباح طباعة الملخص نص بنص

f*y*d · #39 06/10/2007, 03:19 AM

إقتباس

الرسالة الأصلية كتبت بواسطة هلالي الظهران


	يالربع احفظوا هذا الرقم عن ظهر قلب 37 .. ولاتنسونه لاني برد عليكم منه بس خلال ساعات باذن الله لان الانفلونزا حاست ابو مريري وحرارتي على أعتاب الاربعين .. أكتب لكم واللاب توب فوق صدري وانا طريح فراشي وأعتذر إن خنبقت أعلاه لأني ما أدري وش كتبت ! راجع باذن الله قبل نهاية مدة التحرير بس لاتنسوني من دعواتكم..

أفداك ياعين أبوي

<<< يخلنا ننصب عليه قبل الاذان

والله انك لحسة يوم شفت رقم 37 شطحت بعيييييييييد حسبتك تقصد السمايل s 37 s

* الا ماودك ترد علينا ..؟!!

قال اللابتوب فوق صدري !!!!!!! طيب كيف تكتب !!!!

*

خخخخخخخخخــ

رحمتك لأن نفس هالانفلونزا مرت علي قبل حوالي اسبوع
وتعبت

حتى اني فطرت ف اول يوم لها

المشكلة شربت كاس فيمتو باااااارد ونمت وماقمت الا مع الاذان يعني ما استفدنا شي !! بس كنتحاس انه بيغمى علي

ع عالعموم لي عودة مفصلة اذا قدرت على تيتي تيتي

وبانتظار حلب العنزة قبل العيد

شكرا

والله يشفيك

هلاليه كووول22 · #40 06/10/2007, 03:54 AM

مالك الا خشمك لو هو أعوج
ليتنا من حجنا سالمين + يامن شراله من حلاله عله!!
تيتي تيتي زي مارحتي جيتي

يعطيك العافيه كل جزء أحلى من الثاني كلها في الصميم

إقتباس


	والبلا في النهاية تسمع الجمله السنويه " والله بضاعتهم هالسنه شينه"

أي والله السنه هذي شينه مررررررررره

إقتباس


	طيب اعنبوا ابو ابو ابو ابليسكم شينه ليش تشترونها؟!

لانو مافي غيرها

ننتظرالحلقه القادمه في " ناظر بقره واحلب عنز"
أما الانفلونزا عدت على الكل وسلامتك ماتشوف شر

تخفيف ذنوب

القيصر رهيب · #41 06/10/2007, 03:55 AM

ما تشوف شر أبو الدراداء

طهور إن شاء الله

بس أول مرة أدري إنك الكبد لها أباط

<< ازحم معك

وجزاك الله ألف خير على تذكيرنا صحيح حنا مقصرين

أخيرا سلمني على عادل جاركم أخو جاركم

بعدين ترى الشاص احسن من الربع اللي مكثر منه في هالجزء

badori999 · #42 06/10/2007, 06:25 AM

يعطيك العافيه هلالي الظهران على الموضوع...
وبرضو يعطيك العافيه وتقوم بالسلامه ان شاء الله...

طهور اخوي هلالي وتكفير ذنوب ان شاء الله...

موضوع رائع باسلوب ساخر مميز فلا تحرمنا من ابداعك وننتظر جديدك على احر من الجمر....

دمت مبدعا...

تقبل مروري البسيط....

Je t'aime Hilal · #43 06/10/2007, 08:06 AM

أخي هلالي الظهران عوداً حميداً وطهور إن شاء الله

موضوع رائع بجميع أجزائه

جميع السلبيات التي ناقشتها هي نفسها التي نفكر فيها ونتمنى زوالها إن شاء الله

لاعدمنا قلمك المعطاء بأسلوبه الظريف

تقبل إحترامي

عزوز **حايل · #44 06/10/2007, 03:15 PM

ههههههه مشكوور اخوي وانشاء الله بانتظار الجزء الثاني ....

القاضي · #45 06/10/2007, 05:17 PM

أجر و عافية يا ابا سباستيان و ما تشوف شر.