يا رجال مالك الا بيتك.. في اليوم الوطني والا غيره!
إقتباس
طيب قضيت مشاويرك واذن المغرب ورحت للمسجد تبي تصلي.. والله يكرمكم تبي تدخل دورة المياه.. قسم بالله ماتقدر تكمل دقيقه من الخيسه اللي فيه.. يعني وين المشكله اذا دخل الواحد الدوره وتركها نظيفه مثل ماكانت! عندكم واحد اذا أزمت معه سيده على البيت بس احيانا الله يجيركم الزنقة تمون شديده وتضطر تدخل هالاماكن.. طيب الواحد كتم نفسه وتحمل هالخياس شلون ماتشمئز نفسهمن هالكتابات اللي على الجدران والابواب.. قسم بالله وقاحه لابعد الحدود.. وعجزوا فيهم المسئولين.. ان ضربوا الجدران بويه كتبوا عليها بالاقلام.. وان خلوها سيراميك استخدموا اقلام الفلومستر.. واخر شي احد هالمساجد ضرب جدران دوراته بويه سوداء علشان ماعاد يكتبون ومع كذا مانفع معهم جابوا الطامس وكتبوا فيه.. اعنبوا ابليسهم مدري وش يحسون فيه وهم يكتبون.. وفوق هذا وهذا المصيبه اذا لقيت الباب من دون قفل وهذا الغالب..(اعنبوا الحاله مزنوق ومكان حوسه وضيق وفوق هذا احتمال يدخل عليك احد باي لحظه ).. تلقى حارس المسجد شغلته ماغير تنظيف بهالدورات وتركيب في هالقفول .. ما اقول الا الله يلعن ابو الزنقات اللي تسوي فيك كذا..
هي حمامات المسجد وبس؟
حمامات المدارس والجامعات وكل حمامات عامة بالسعودية.. بالسعودية!
يمكن المساجد يفترض تكون الأنظف لقدسية ما تتبع.. لكن! الله يلطف بحالنا..
هلا ابو الدرداء .. حقيقة .. موضوع يبين مدى التمحور حول الذات <<< القاضي متلطم .. ويزيد من مدى استئجار الامكانيات والقدرات لبناء مجتمع متين .. ويستأجر ايضا <<< بعقد ايجار غير العقد الاول ولإخلاء المسؤولية جرى التنبيه .. يستأجر ايضا الايدي العاملة لبناء مجتمع صالح يقوم على ما يقوم عليه التطور والتقدم الذي طالما وقف مع الشباب الذين تمردوا على انفسهم وحققوا مالم يكن في الحسبان في الاطر التقليدية والاجراءات الاستشارية والاستثمارية في ظل محاولات سابقة بالانضمام تحت لواء الاقتصاد العالمي الذي يزيد من فرص النجاح ..
وانا من هذا المنبر .. اعلن التحدي .. ان اي واحد فاهم شيء من الكلام اللي فوق ..
وهذاكله من بابا سهل كنا نحجز بكلمة ... وهالحين نهذر ساعة عشان نحجز المكان ..
قبل ما امشي .. اعجبتني " نعيق الغربان " .. حسيتك تدق فريق الصقور بالهرج .. عموما انا طالع منها .. وهم يقدرون يردون عليك .. <<< باقي براسه شوية هياط وشويتين مهاوش ..
لي عودة .. انتظرني على احر من الجمر .. بالعربي ابيك تبات ساهر .. ولو قدرت تبات واقف لا توفر ..
في يوم من ايام شهرنا الفضيل (<<ياخي قل قبل عشرة ايام ولايكثر ).. قرر محاكيكم المصون ان يستغل عطلة الويك اند مع اجازة اليوم الوطني بقضاء ثلة من الايام مع أسرته الفاضله بمدينة جده ليرعى في كنفهم ويتمتع بما لذ وطاب من الشراب والطعام (<< مهو بعاقل ابو الدرداء ال سعود ).. مضت الايام تباعا على خير مايرام.. حتى أتى ذلك اليوم الذي أيقضتني فيه الماما-اطال الله بقائها- لتخبرني بأن استقبل الضيف الذي لفانا..
لا أخفيكم انه صدرت من لدني بعض الحلطمة والحشرجة تعبيرا عن عدم الرضا.. فمن هذا الضيف البجيح الذي يزورنا الساعة احدعش ونصف صباحا في نهار رمضان؟!
استقبلت الضيف الذي لا اعرفه.. وقد كان شابا في مقتبل العمر.. ابا ثمانية عشر ربيعا ونيف.. وقد كان مرتدي لباس الاحرام وبيده شنطه صغيره!!
بادرته بالحديث: يبو الظاهر انك مضيع.. الميقات مهوب هنا الله يصلحك..
فتبسم وقال: هذا بيت فلان بن فلان ..
فأقلطته وتقابلت خشتي بخشته حيث لا قهوة ولا قدوعا ولا عصيرا..
طبعا نسيت أعرفكم بالضيف.. ياجماعه طلع هذا يصير ابن ولد عمة اخو جدتي ومن الرضاعه بعد.. الشاهد انه يصير لنا وهو جاي من الديره مدرعم بقراطيسه.. ومادري منهو داله على البيت.. بس بيني وبينكم والله ان هالقراوى نشبات الله يجيركم ساعتين يحاول يقنعني انه يصير ولد عمي وانا احجر له.. ولا تسالون شلون تفاهمنا.. واحد عبيط اللي هو انا.. وواحد نشبه بثر حقنه دعله.. سمونه اللي تبون .. وبعد لا تسالون وراك كنت تتكلم فصيح وقلبت عامي لاني كنت احس اني في مسلسل تاريخي وانا اسولف عن علوم الرياجيل بس اكتشفت اني جالس بجلس الكتروني حيث لا قهوة ولا قدوعا ولاعصيرا..(<< فاهم علوم الرياجيل غلط )..
الشاهد.. رحبت بالرجال وجلست معه ناقر ونقير.. وماشاء الله مسرع ماذب الميانه مع انه الضيف! وفي هذه الاثناء رن جوالي والمتصل بابا -اطال الله عمره- رفعت سماعة الهاتف (اجل سماعة الطبيب).. ووجهني بأن أعتمر واخذ معي ضيفنا الكريم وبعدين اطلعه المطار.. بيني وبينكم بغيت اجحد الرجال بس ماودي اخالف البابا(<<غصب يحسسكم انه دلوع) واكسر كلمته حيث انه مسافر وبعدين تصير تقصير بحق الضيف وننفضح بالديره..
استمرينا بالمناقره انا والضيف الكريم.. وبيني وبينكم (الله ياخذ ام بي سي ومسلسلاتها اعدمونا) الرجال على نياته لابعد الحدود وفوق هذا نشبه وحقنه.. اجل جيت ابمزح معه وقلت ماني بموديك.. ما امداني اكمل كلامي الا والرجال واقف على راسي.. عمر يله نروح ناخذ عمره.. يله قم بنعتمر.. قم افلح.. وقبل لا ارد عليه يقول: ولاتدري قم وقف تاكسي يوديني.. يله ابي اعتمر.. وشوي قام بيقضب الباب بس اشوى تلاحقت عليه..
الشاهد.. افطرت انا والرجال واحرمت وسيده على طريق مكه.. طبعا ما أخفيكم انه ابثرني في السياره مابقى شي ما سأل عنه وانا أزلب حينا واصرف حينا اخر.. المهم وصلنا التفتيش اللي عنده يفرقون المعتمرين عن غير المعتمرين.. سألني خويي كالعاده وش يبون؟
وكعادتي ايضا صرفته بأن المسلمين من هنا وغير المسلمين من هناك..
قال: طيب شلون بيمشونا وحنا ماعندنا جوازات؟!
قلت: لا الحين خلوه مثل دبي بس بالبطاقه..
والله ياني بلشت فيه.. الحمدلله وصلنا للحرم على اذان العشاء.. قلتله: نبي نصلي العشاء ثم ناخذ عمرتنا.. قال: طيب بس انا ناوي اصلي وراء السديس! قلت: صاحي انت انواع الزحمه! قال: لاودي اكسب الاجر وودي اطلع بالتلفزيون..
الله من زين النيه عسى بس ماتسقط على الصالحين في الصراط المستقيم انت ونيتك ..
الشاهد اني اتفقت معه كل واحد ياخذ عمرته بلحاله.. واللي ينتهي قبل يكلم الثاني بالجوال..
ماصدقت على الله افتك من ذا الحقنه.. صليت العشاء وابتديت معركه ثانيه وانا رايح للصحن ابطوف..
يالربع اقسم بالله ماصارت عمره.. مااذكر اني دعيت ابد! كل ماحاولت اخشع واخش جو (<<وش ذا الخطمه ياالمارج).. كل ماحاولت اركز بالدعاء تجيني ضربه من هنا ولا رفسه من هناك.. استغفر الله العظيم ماصارت فيه روحانيه ابد.. الواحد يفكر بس يخلص ذا السبع أشواط بالاضافه انه يتفادى ينلسع بذا الاحرامات.. والله ياوجهي تمخش من هاللي يعدلون احراماتهم ومايرحمون اللي وراهم.. واشين شي لاجوك هالقروبات مع بعضهم وماسكين بيد بعض واللي مايوخر يندعس وهو يضحك..
استغفر الله العظيم ماتحس بالروحانيه ابد.. تخيلوا زحمه ومدافش وترفيس ودعس وتلفيع احرامات وفوق هذا نسيت تحط فازلين..
المهم.. قضيت من الطواف ونصيت المسعى اللي بالدور الثاني والحمدلله كان سعه شوي.. قلت بس ياولد فرصه عوض عن الادعيه اللي فاتتك بالطواف هنا.. ما امداني اقول بسم الله الا اشم ريحة العطر اللي تشق الخشم شق من بنتين لدرجة ان خشمي نمّل من قوة الريحه.. وبعد عدة محاولات غضيت البصر ودزيت شوي وبعدت عنهم..
ما امداني اركز الا وبنتين ثانيات كنت على وشك اعيد عليهم احسبهم نازلين صلاة العيد من ملابسهم.. لاحول ولاقوة الا بالله تحسون انهم رايحين يصورون فيديو كليب مهوب رايحين يعتمرون على ذا اللبس والماكياج.. مره ثانيه دزيت وحاولت اكمل..
والله وتروح الشوطين الاوله مابين غض البصر والاستغفار.. اما الاشواط الباقيه لاعاد تسألون.. لان الواحد ماعاد الا يدحدر بس يبي يخلص الباقي ومايوعى الا والعالم تراكض لاجات اللمبه الخضراء..اللهم لك الحمد قضينا من السبع اشواط بس الحين لازم تكمل الثامن علشان ترجع.. طبعا الحاله سيئه تعب بدني وتعب نفسي وفوق هذا تخيل انك ناسي تحط فازلين.. تحس ان رجل بالصفا ورجل بالمروه..
المهم.. انتهيت من عمرتي وكان الوقت على اخر التراويح.. قلت ياولد شفلك مكان وصل ركعتين واكسب الاجر.. عاد ماشاء الله الحرم ممتلي على اخره وانا ادور على مكان وكل شوي ادحدر على برا ماحسيت نفسي الا والعماير تحاصرني من كل جانب!! الله يضيق عليهم يومهم يضيقون على المسلمين.. التوسعه وكل مالها تضيق! وين المسلمين بيصلون؟
على طاري هالابراج والله يافيها غلاء غير غير طبيعي.. تدرون ان برج زمزم هالجديد قيمة اجار غرفة واحده حق ليله بـ3500 ريال!! والعشر الاواخر فيها باكيج كامل بـ 100,000 ريال!! اجل شلون لو غرفتين او جناح!!
الشاهد.. لحقت على تسليمه والوتر ولله الحمد.. عاد الحين ابتدت رحلة العوده وانا ادور على ذا المطفوق.. وشبكة الجوال عيت تمسك معي مع الزحمه.. وانا ادور عليه رن الجوال ولله الحمد..رفعت سماعة الهاتف (أجل سماعة الطبيب<< تراك اقلقتنا بذا الطبيب) ويطلع خويي.. دلني على مكانه بالتوسعه.. دورته ولقيته متربع باحرامه ويراسل وحده بلوتوث!!
قلتله: اعنبوا ابليسك جالس ادورك وانت ترقم! وباحرامك وداخل الحرم بعد!!
قال: ياخي لا تهاوش.. يلعن ابو البنت اللي تفرق بين حجاج بيت الله..
اعنبوا ابليسه فاهم الدنيا غلط.. تليته وسيده على التاكسي ومنه على السياره.. وحنا راجعين لجده انواع الخمول بالسياره.. قطع هالخمول صوت جوالي وهو يرن بس الرقم غريب.. رفعت سماعة الهاتف (<< ترا ان قلت سماعة الطبيب لعنا الطيب في اصلك) .. وطلعت بنيه!
تلاقطنا شوي وقفلت الخط.. الا وذا الهيس الاربد اللي بجنبي بيموت من الضحك! قلت: عسى ماشر؟ قال: شفت شلون ماعاشت البنت اللي تفرق بين الاشناب! رقمتها برقمك!!
اعنبوا ابليسه مهوب صاحي.. يحسب انه سوى خير.. ناقص قرقه انا بعد!
الشاهد.. اني خذيت هالدعله للبيت.. تروشنا وغيرنا وسيده على المطار.. قبل لأ انزله سالته: عسى ماقصرنا بحقك وان شاء الله عمرتك زينه؟ قال: مامنكم قصور بس والله ياذا العمر مهيب محسوبه.. كلها هواش وملاعن مع العالم ولا بنات ضايعات.. حتى المكان مابه مكان! قلت: اول مره تقول شي مفيد.. ما اقول الا ليتنا من حجنا سالمين .. قال: فمان الله ولاتنسانا من أميرة موناكو وقفل الباب.. والله يامن شراله من حلاله عله .. حدك أميرة ضبا وتخب بعد..
=.=.=.=.=.=.=.=.=.=.=
يالربع اعتذر عن التاخير الخارج عن الاراده .. وايضا اعتذر عن الخلل الفني فاليوم سبقنا هالمثلين بطريقة 2×1 .. بالعربي حق اليوم وبكره .. انتظرونا بالحلقه القادمه في " تيتي تيتي زي مارحتي جيتي"
أعتقد أن الوضع الحالي للبيت الحرام يحتاج إلى إعادة نظر خصوصاً و أن العشر سنوات القادمة رمضان سيكون فيها إجازة .
حالياً معهد أبحاث الحج يدرس فكرة منع غير المحرمين من الطواف خلال أوقات الذروة ، أيضاً خادم الحرمين وجه بعدم سماع أي شكوى ضد قرارات نزع الملكية في أراضي الحرمين كما وجه بعدم تلقي أي مطالبات غير مدعومة بصكوك شرعية صريحة كحجج الاستحكام و غيرها .
خلال عمرتي كنت أسأل نفسي لماذا لا يتم منع غير المحرم من دخول المسعى ؟!
الناس يصلون في المسعى و لا يسمحون للمعتمرين بالقيام بمناسك عمرتهم .
المعهد يدرس منع دخوله للطواف و المسعى أولى .
كل ما تحكي عنه يا عمر رأيناه في أول خميس و جمعة في الشهر !!
في أول جمعة في رمضان تجاوز عدد المصلين المليونين !!
اللهم تقبل .
عمر نحن نتابع حرفاً حرفاً ، و الآن بعد إذنك وقت السحور .
أحسن شي فيك تغيب تغيب بس ترجع بموضوع يعني تبي تسكتنا فيه
والله ياعليك مقدمه إكه على مايقولون
طبعاً ردي بيكون مختصر مب زي العاده لأن الوقت مايسمح لي ادندر زيك
وبيكون جامع الموضوعين اللي نزلت
إقتباس
ايه اقول حبها بالقلب سادي لان هالديره تعبد ربك فيها وانت مرتاح حتى لو بعدت تلقى من يساعدك ويناصحك ويحرص عليك.. حبها بالقلب سادي لان هالديره تروح وتجي فيها وانت امن على نفسك واهلك ومالك..
والله أنك صادق ....
ياخي في بعض الدول أروح لها ماأحس أني غريبه بعكس دول ثانيه
اعد متى بس أرجع لديرتي
تهقى من وشو
إقتباس
يا الربع خلونا نفترض انك رجال تبي تقضي مشاويرك بالعصريه.. من تركب السياره وانت على أعصابك.. قسم بالله كانك في رالي من المصاقط والمحاد والهواش.. لدرجة ان الواحد يختم "درايفر" حق البلايستيشن في وقتها من كثر ماهو متعود على المصاقط!!
أما المساقط والله ياهم ياخذون المركز الأول مع مرتبه الشرف
أنا عندي ثنين من أخوالي مااحب أركب معهم
لأنهم لاجوا يسقطون على الواحد تحسهم يلحّمون فيه من ورى الين يفسح لهم وعقب عاد يلصقون فيه
شوي وتحك المرايه الجانبيه مع بعض
كل ماركبت معهم احس أني شاده على رجليني وراصه عليها قوووه كني بهدي من سرعتهم
الله يهديهم
إقتباس
طيب الواحد كتم نفسه وتحمل هالخياس شلون ماتشمئز نفسهمن هالكتابات اللي على الجدران والابواب.. قسم بالله وقاحه لابعد الحدود..
هههههههههههههههههههههههههههه
أما عندنا دورات المياه يبيلهم وقفه جاده لكل المحطات والمساجد
وقسم أني بعض المرات أفضّل االبر أنظف لي
بقولك سالفه والعهدة على الراوي
يقول ...أذكر في إحدى دورات المياة وانا مبوبز وماخذن راحتي على الاخير واطالع في الباب لفت انتباهي كلمه مكتوبه ..
عزيزي العميل ... انظر الى يمينك مباشرة !!
طبعا بحكم اللقافه .. التفت على اليمين لقيت مكتوب ..
بالله ماتستحي على وجهك وانت مطامر ورى ذا الكلام .. ياخوي خلّص ز$ك وأطلع ...
بالله وش ترجي من وراهم ....
إقتباس
ودخلت المسجد وصليت وجيت طالع ونفسيتك مرتاحه.. مايمديك تطلع الا وشيبان ماتعرفهم يبحلقون فيك.. تمر من جنبهم وتسلم.. يعطونك أشكل ويستمرون في البحلقه فيك.. تمشي وتخليهم لكن يناديك واحد منهم: ياولد .. تقوله سم ياخال.. يقول:انت ولد فلان بن فلان بن فلان .. تقوله لأ.. يقول: الا نفس الخشه! تاخذه على قد عقله وتقوله طيب انا ولده.. ينقز شايب ثاني ويقول: لاتكذب فلان مايجيب عيال!!
هذي نفس الحاله صارت لنا
بس والله ياهم نشبوا نشبه الين عرفوا وش حنا
إقتباس
ياجماعه طلع هذا يصير ابن ولد عمة اخو جدتي ومن الرضاعه بعد.. الشاهد انه يصير لنا وهو جاي من الديره مدرعم بقراطيسه.. ومادري منهو داله على البيت.. بس بيني وبينكم والله ان هالقراوى نشبات الله يجيركم ساعتين يحاول يقنعني انه يصير ولد عمي وانا احجر له
الحمد لله زي هالحركات مب موجودة عندنا
ياربي لك الحمد
جارنا القديم كنت ارحمهم مجمعين عليهم أهل الديرة كلهم الداجين
جايين يبون الرزق يبونه يوظفهم
إقتباس
قلتله: نبي نصلي العشاء ثم ناخذ عمرتنا.. قال: طيب بس انا ناوي اصلي وراء السديس! قلت: صاحي انت انواع الزحمه! قال: لاودي اكسب الاجر وودي اطلع بالتلفزيون
ههههههههههههههههههههههههههههههههههههههه
هههههههههههههههههههههههههههههه
أما اطلع بالتلفزيون ...
تقوله صادق ولا بهارات
إقتباس
يالربع اقسم بالله ماصارت عمره.. مااذكر اني دعيت ابد! كل ماحاولت اخشع واخش جو (<<وش ذا الخطمه ياالمارج).. كل ماحاولت اركز بالدعاء تجيني ضربه من هنا ولا رفسه من هناك.. استغفر الله العظيم ماصارت فيه روحانيه ابد.. الواحد يفكر بس يخلص ذا السبع أشواط بالاضافه انه يتفادى ينلسع بذا الاحرامات
الحين أنت معتمر بوقت الزحمة ....ولا تبيه مطاقق ومرافس
يعني كان صليت التراويح وعقب اعتمرت بيكون أخف شوي
ياخي الزحمة الحين بكل وقت ....
حتى بالعطله مرررة زحمة... أنا مدري ليه فتحوا المجال للحملات من الخارج أي وقت يجون
منول كان مخصص لهم أوقات معينه وكنا مرتاحين من شرهم وزحماتهم
الحين عطله ولا رمضان كله واحد دايم الحرم زحمة
الله يكون بعونهم
إقتباس
دورته ولقيته متربع باحرامه ويراسل وحده بلوتوث!!
قلتله: اعنبوا ابليسك جالس ادورك وانت ترقم! وباحرامك وداخل الحرم بعد!!
قال: ياخي لا تهاوش.. يلعن ابو البنت اللي تفرق بين حجاج بيت الله
استغفر الله العظيم
خرّب عمرته أجل
الله يعطيك العافيه ياأبو الدرداء
ننتظر باقي دندرتك
.. يعني وين المشكله اذا دخل الواحد الدوره وتركها نظيفه مثل ماكانت! عندكم واحد اذا أزمت معه سيده على البيت بس احيانا الله يجيركم الزنقة تمون شديده وتضطر تدخل هالاماكن
.. اعنبوا ابليسهم مدري وش يحسون فيه وهم يكتبون.. وفوق هذا وهذا المصيبه اذا لقيت الباب من دون قفل وهذا الغالب..(اعنبوا الحاله مزنوق ومكان حوسه وضيق وفوق هذا احتمال يدخل عليك احد باي لحظه
.. 
مع ان الاشااره لي 
اجل 
يعني اكيد ان حنا بعد مثلهم همجين ونخالف النظام 
).. ووجهني بأن أعتمر واخذ معي ضيفنا الكريم وبعدين اطلعه المطار.. بيني وبينكم بغيت اجحد الرجال بس ماودي اخالف البابا(<<غصب يحسسكم انه دلوع
الوضع العادي
