نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

هلالي الظهران · #2 28/09/2007, 02:12 AM

مالك الا خشمك لو هو أعوج

يُحكى بأنه تم تدشين هالمثل في أحد هالايام الوطنيه اللي تمر بالمملكه ذخرها الله للاسلام والمسلمين..

ياالربع احيانا يجيني احساس مدري وشو.. احس ان ودي أهاجر لبلد ثاني.. ومايردني الا حبي لاهلي وجراك باعشن

<< الله من زود الولاء للوطن

بتقولون وش جاه ذا مايحب ديرته؟!

لا يااخوان لاتفهموني غلط.. والله ذا الديره على الراس من فوق.. وحبها بالقلب سادي.. مهوب علشان اني شربت من مائها ودعست على ترابها واستنشقت هوائها واستمتعت بزقزقة عصافيرها .. لا والله الكذب خيبه هذي المويه عندنا نصها حالي ونصها مالح

.. وترابها ماشفنا منه الا الشهبان اللهبان.. وشمشمة هوائها ماجانا منه الا الغبار والكتمه

.. وماهنا زود زقزقة عصافير مافيه الا غربان تناعق

..

ايه اقول حبها بالقلب سادي لان هالديره تعبد ربك فيها وانت مرتاح حتى لو بعدت تلقى من يساعدك ويناصحك ويحرص عليك.. حبها بالقلب سادي لان هالديره تروح وتجي فيها وانت امن على نفسك واهلك ومالك.. حبها بالقلب سادي لانها تعطي وتعطي وتعطي بس تحتاج من يعطيها.. هالديره تعطيك فرص ماتحلم فيها لو كنت بمكان ثاني.. بهالديره بامكانك تصير دكتور وبامكانك تصير سيكيورتي!! كلن وهمته ورغبته

.. واللي يبي يعرف قيمتها يروح يسال أي اجنبي فيها من اكبر راس لاصغر راس

..

يشهد الله ان هالديره على الراس من فوق واساسا مدري وشلون متحمله خيستنا! وحنا كل ماطق عود بحصاة حطيناه فيها.. أجل هذاك اليوم طالعين البر وواحد من العيال يبي يغسل يده ومالقى صابون قال المفروض يوفرون حمامات بالبر

..

وكل كلمه والثانيه المفروض يوفرون ويسوون ويعملون.. طيب وبعدين؟
وأنا وانت وحنا ياهالشعب وش سوينا غير اننا نملى الدنيا صراخ؟
وايش شفنا غير الحكي والدندره على قل سنع؟!

مشكلتنا نبي كل شي يوصل حدنا بدون مانقدم مقابل.. ياليت انها توقف على كذا الا انك بعد ماتسلم من الشر!

يا الربع خلونا نفترض انك رجال تبي تقضي مشاويرك بالعصريه.. من تركب السياره وانت على أعصابك.. قسم بالله كانك في رالي من المصاقط والمحاد والهواش.. لدرجة ان الواحد يختم "درايفر" حق البلايستيشن في وقتها من كثر ماهو متعود على المصاقط!!

طيب قضيت مشاويرك واذن المغرب ورحت للمسجد تبي تصلي.. والله يكرمكم تبي تدخل دورة المياه.. قسم بالله ماتقدر تكمل دقيقه من الخيسه اللي فيه

.. يعني وين المشكله اذا دخل الواحد الدوره وتركها نظيفه مثل ماكانت! عندكم واحد اذا أزمت معه سيده على البيت بس احيانا الله يجيركم الزنقة تمون شديده وتضطر تدخل هالاماكن

.. طيب الواحد كتم نفسه وتحمل هالخياس شلون ماتشمئز نفسهمن هالكتابات اللي على الجدران والابواب.. قسم بالله وقاحه لابعد الحدود.. وعجزوا فيهم المسئولين.. ان ضربوا الجدران بويه كتبوا عليها بالاقلام.. وان خلوها سيراميك استخدموا اقلام الفلومستر.. واخر شي احد هالمساجد ضرب جدران دوراته بويه سوداء علشان ماعاد يكتبون ومع كذا مانفع معهم جابوا الطامس وكتبوا فيه

.. اعنبوا ابليسهم مدري وش يحسون فيه وهم يكتبون.. وفوق هذا وهذا المصيبه اذا لقيت الباب من دون قفل وهذا الغالب..(اعنبوا الحاله مزنوق ومكان حوسه وضيق وفوق هذا احتمال يدخل عليك احد باي لحظه

).. تلقى حارس المسجد شغلته ماغير تنظيف بهالدورات وتركيب في هالقفول .. ما اقول الا الله يلعن ابو الزنقات اللي تسوي فيك كذا

..

طيب قضيت من الدوره ودخلت المسجد وصليت وجيت طالع ونفسيتك مرتاحه.. مايمديك تطلع الا وشيبان ماتعرفهم يبحلقون فيك.. تمر من جنبهم وتسلم.. يعطونك أشكل ويستمرون في البحلقه فيك.. تمشي وتخليهم لكن يناديك واحد منهم: ياولد .. تقوله سم ياخال.. يقول:انت ولد فلان بن فلان بن فلان .. تقوله لأ.. يقول: الا نفس الخشه!

تاخذه على قد عقله وتقوله طيب انا ولده.. ينقز شايب ثاني ويقول: لاتكذب فلان مايجيب عيال!!

اعنبوا ابليسك طيب علم خويك والا مستانسين وانتم تطقطقون على راسي

..

طيب شياب ونتحملهم.. يدقون عليك اخوياك وتواعدهم في الملعب بتحضرون المباراه.. من تدخل المدرجات يضيق صدرك وتستغرب ان هالعينات باقي عايشه!
شباب جايين يشكشكوا وخذ رقص ومسخره.. وشباب مايبقون لعن وسب الا وقالوه.. قسم بالله بعد كل مباراه تخرج بقاموس جديد!!

طيب اعتبر نفسك تجاهلتهم وركزت في المباراه ماتدري الا وقارورة مويه مجاوبه مع قفاك

..

تقفل معك وتطلع من الملعب.. تدق عليك أمك تقول ابي السوق.. تروح السوق انت وامك.. تغفل عنها شوي وتلقى بزر ماكمل 16 سنه قاعد يغازل امك!! تقوله: عيب يابابا اللي تسويه.. يقولك: العب غيرها انا حاجز البنت قبلك!!

تسطره وتمسح فيه البلاط وتطلع من السوق.. وانت رايح البيت تمر البقاله تلقى البزران مهبلين بذا البنغالي .. اللي يسرقه واللي يهاوشه.. وان طردهم ومالقوا شي يسوونه تهاوشوا مع بعضهم!!

تقفل معك ايضا وتطلع من البقاله.. وانت رايح للبيت تلقى واحد متلطم ومعه بخاخ ويكتب على احد هالجدران.. تبي تلحقه مهوب علشان تسطره لا .. بس لاجل تساله هاللي كتبه وش معناته؟! اجل عمركم شفتوا احد يكتب: " لا لتكميم الافواه.. نعم للديموقراطيه.. لا للحريه"!!

اعنبوا ابليسه سامع كلمتين وجاي يكتبهم وليته يكتبها صح

..

توصل البيت والاخلاق صفر من هالهمج.. ماتصدق على الله تغير وتريح شوي.. ومايمديك تحط رابع لقمه بحلقك الا وتسمع صوت تفحيط وقربعه بالشارع.. تنزل تشوف السالفه تلقى سيارتك مصقوع واللي صاقعها منحاش.. تقفل معك وتقول هين والله لافضحهم واشرشحهم بالمنتدى

..

لاحظوا ياجماعه هالبلاوي كلها بمشوار كم ساعه.. اجل لو تكلمت عن معاناة 24 سنه كان احتجت خدمات ابو ريمان بكتابتها

.. وبعد هذا كله ماتبوني أهاجر

..

لكن يااخوان والله اللي في سماه ان الواحد مايتحمل يفارق هالديره الا وهو مشتاق لاهلها وبثارتهم وللناس وسواقتهم وللهمج وطفاقتهم.. ومثل ما قال راعي الموضوع: مالك الا خشمك لو هو أعوج

..

وقولوا آمين معي.. الله لايعيد هاليوم الوطني ابد ابد الا وربعنا افضل الناس واحرصهم(طراه بن هذال

).. وان شاء الله نصير مضرب المثل بين العربان .. الى متى واليابانيين والامريكان احسن منا .. اللهم فرقهم شذر مذر واجعل مالهم الى سقر (اركد لاتحمس لاتجيب العيد

)

=.=.=.=.=.=.=.=.=.=.=

يا الربع انتظرونا غدا او بعد غد او بعد بعد غد وان ماجيت اعرفوا اني سحبت على ابو مندوبكم

.. انتظرونا بالحلقه القادمه في "التاريخ يقص شعره كاريه" ..

والله الود ودي اسدحها مرتن وااحده بس اللياقه ماش والوقت لكم عليه

.. السموحه منكم والوعد بالحلقه القادمه بعنوان " تيتي تيتي زي مارحتي جيتي"

أخوكم/ ابو سباستيان سابقا- ابو الدرداء حاليا <<لزوم رمضان

بالتوفيق..