مواصل من عام 1413 هـ

هلا وغلا

إقتباس بالنسبه لي ما أحب أرد على الجوال إلا لأشخاص معينين

أن تكون شخص يتمتع بعلاقات اجتماعية واسعة فهذا شيء جميل و مفيد، وفي الوقت الحالي أعتقد أن الجوال أصبح وسيلة لضمان التواصل مع الآخرين، لذا فإن المنطق يقول بأنه من الأفضل أن تستقبل معظم المكالمات الواردة..

إقتباس أما عن الآليه فخله ( صــــــــــــــامت ) 24 ساعه ، ولا ترد إلا على الأشخاص اللي تعرف إنهم ما يطولون بالمكالمه ( ألو - السلام عليكم - المطلوب من الإتصال ويقفل ) هذا أرد عليه

يمكن يكون الوضع الصامت حل للي وصلوا مرحلة الرعشة ، لكن يظل القلق موجود وبالعكس يمكن يزيد لأنك راح تضطر تلتفت لجهازكل 5 دقايق!..

أما سالفة الناس اللي يطولون بالمكالمة فهذولا فعلاً قضية والتعامل معهم أصعب مما كنت أتصور بكثير، تخيل أنك تقول لأحدهم " أنا مشغول الحين ، بس خلنا نشوفك وناخذ العلوم" ثم يقول لك " إي والله خلنا نجتمع، تصدق إني ..." ويبدأ بسالفة جديدة ! ، وقد تكون الآلية المناسبة معهم مثل ما قلت( لا ترد عليهم)، وإذا تذمروا فما فيه أحسن من الصراحة معهم ..


شكراً يا غالي وما شاء الله عليك صاير شعله بالمنتدى

___________________________

abo_nasser


يا هلا وغلا فيك يا أبو ناصر

إقتباس قسم اقلق جهاز في العالم ...جلست حوالي اسبوعين من دون جوال ..قسم اسبوعين ولا اروع ..

أنا متأكد أنه كان أسبوعاً رائعاً بمعنى الكلمة، وإن شاء الله أجزم وأسوي مثلك لو يوم، يومٌ بلا قلق

إقتباس تخيل مشيت من الكليه الى بيتنا كعّابي

يعني سويت رياضة، وهذي إحدى محاسن عدم استخدام الجوال..

إقتباس بالنسبه للحل ...ما فيه الا الوقت اللي بتريح فيه تحطه على الصامت وترتاح منه اما باقي الوقت

الـ 7 ساعات حقت النوم يكون الجوال فيها على الصامت، لكن ما ذا عن قلق 17 ساعة؟؟

نبحث عن أسلوب معالجة يضمن شيئاً من راحة الذهن دون الإخلال بالمسؤوليات ولا يتسبب في تذمر الآخرين؟

هل هو أمر يصعب الوصول إليه؟؟


الله يسلمك ويسعدك ويحفظ لك أميمتك شكل الموقف اللي صار معها تحفه وإلا كان ما تقول لأ

___________________________


عاشقة الزعيم 15


يا هلا وسهلا فيك

إقتباس ما اشوفه حل يعني لو يشوفه ينور ويطفي بتجيه نفس الحاله

والله أنا كنت أقول مثلك بالضبط، لكن يبدو أن الصوت له تأثير وبدليل أن صاحبي يحط جواله على الصامت كثير ، بمعنى أنه ارتاح لهذا الأسلوب..

إقتباس اما الحل فيكمن بالشخص نفسه لا الجوال بنظري ..!!

إن كنتِ تقصدين أننا ما نعرف نستخدم الجوال، فاتفق معك في ذلك.
وإن كنتِ تقصدين بأن بعضنا يبالغ في ردة فعله تجاه اتصال وارد، فاتفق معك أيضاً وهو أمر تسبب به سوء الاستخدام..

النقطة الأولى أعتقد أنها تشمل الغالبية العظمى منا ، أما النقطة الثانية فأتصور أن الشخص الحساس والأشخاص اللي يغرقون في بحر المسؤوليات هم أكثر من يعاني منها..

العفو أختي وشكراً على مشاركتك


___________________________

راااجع إن الله شاء وأراد

هلالي الشماسية


يا هلا والله وغلا

أما اعتلى ركب العلياء ثم متعود! ، أثر مهوب بس الطلاب اللي ينحاسون آخر الترم حتى المدرسين يوشّون

إقتباس مادام معك الجوال فأنت مقيد ورهن الاعتقال , وتحت رحمة غيرك ,,

أي والله تحت رحمة غيرك، هالتعبير يحاكي الواقع بالحيل..

إقتباس أما إن كنت في سفر طلباً للراحة والاستجمام فأنا لا أتردد بإغلاق الجوال ورمي شريحته وإبدالها بأخرى لا يعرف رقمها سوى الوالده حفظها الله

والله ياخي إذا سافرت لمدة طويلة (سياحة) فأنا استخدم نفس طريقتك لكن استحي أقول لأمي لا تعطين الرقم أحد، والوالده الله يحفظها تعطي الرقم للوالد ، والوالد لو يسأله جارنا : وين عبدالرحمن ما نشوفه بالمسجد؟ كان يقول دوك رقمه وقل له يتصل علي أبيه!

مشكلة الجوال تظهر بالسفرات القصيرة ( أسبوع وأقل) هذي تكلف غثاء نفسي وغثاء مادي..

إقتباس أذكر في مامضى أخرجت لوالدتي جهاز جوالٍ جديد فركبت الشريحة وبدأت تتصل على الأخوات تخبرهم بأنها استبدلت الجهاز وعليهم حفظ الجهاز الجديد ؟!

الله يطول بعمرها على طاعته وعسى الله يزيدنا به جهل ما دام هذا وضعنا..


العفو وأنا أخوك وترى مرورك " أحبه" سواءً بك نوم أو مصحصح >> ما عنده لف ودوران


__________________________


القاضي


يا هلا والله وسهلا ،حيا الله أبوعبدالله

إقتباس ليس هذا فقط و إنما انتقلنا إلى حقبة جديدة تتمثل في إعطائنا جوال آخر للقسم و في بعض الأحيان يضاف إليه جوال ثالث للطواريء .يعني هذا أن النتيجة ثلاث جوالات و لا يرن اثنين منها إلا و هو يحمل خبراً سيئاً في العادة.

الله يكون بعونكم، الارتباط بهذا الأسلوب يخلي اليوم شاق وممل ، لكن مثلك ما شاء الله مدرسة في فن التعامل مع الآخرين والتعاطي مع الأحداث وإلا لما كان في حوزتك جهازين للاستخدام الجدي..

إقتباس ربما أن من حظي ، أو من سوء حظي لا أدري ، أن أم عبدالله لا تحب الجوال و لا الثابت و لا ترد عليهما إلا نادراً ، جميل جداً أليس كذلك !؟ انتظر قليلاً لتعلم أنها عندما تريدني فهي تستخدم جميع وسائل الإتصال المتاحة.

اسمح لي أتدخل وأقول أنه مادام كذلك فهو من سوء حظك، على الأقل تقدر تتجنب القصف إذا جاك من زاوية وحده، هذا إن كنت في حاجةٍ ماسة لتجنبه!



شكراً جداً تواصل بنكهة خاصة


__________________________


دانكن دونت

يا هلا والله وغلا

إقتباس الجوال مثل السكين ,, إذا استعملته بحذر تسلم وإذا استعملته بغير حذر لن تسلم

لو هو مثل السكين كان تلقى خدود أخوي مشطبه

إقتباس تبغى الصراحة لايوجد حل !! اقلك ليش :- الواحد يطلع الشارع وعنده اصدقاء فأكيد كل صديق ومعه جوال فلا يدريك من الذي معه افلام خليعة ومن الذي معه اغاني فلا يوجد لجعله وسيلة اتصال

يا غالي ما فهمت عليك زين..

عموماً شكلك تقصد إن الجوال مهوب بس للمكالمات ، لأن فيه مقاطع فيديو وصوت وألعاب يعني صار مثل الكمبيوتر المحمول، هذا اللي فهمته وهذا شي مفروغ منه..

لكن اللي كنت أقصده يوم قلت " كيف نجعل منه وسيلة اتصال صوتي" أعني أنه ما يكون سبب في اتصالنا الذهني المستمر والمقلق مع كل الظروف اللي تمر في يومنا..


العفو يا غالي وشكراً لمشاركتك


__________________________



htlr 20


هلا وسهلا..

إقتباس وبعدين يمدحون شي اسمه صامت واذا مره مره خلاص قفلت معك طفه ......

أطفيه!! ، والله ياخي ما أبالغ إذا قلت لك إنه لو مره انطفأ جوالي وبغير إرادتي لسبب أو لآخر فإني أحس بتوتر شديد حتى وإن كانت الظروف حولي هااادئه..



العفو ياغالي وشكراً لمرورك


__________________________


ابو خليلوفتش


هلا و غلا

إقتباس كأني أرأك ترمي سهامك

لا إطلاقاً ، والعلم الأكيد عند أخوي

إقتباس حط الأسماء الي تبي في مجموعه واحد والجوال ما بيرن إلا إذا دق أحد من هالمجموعه وريح حالك

صحيح أنا ما أفهم كثير بتقنيات أجهزة الجوال، لكن أعرف إني أقدر أخصص بعض الأرقام في مجموعات، لكن وبعدين وش سوينا؟؟ يبي يتصلون علي أوادم ويتجمعون بقسم " لم يرد عليها 3" ! ويرجعون لسالفة التذمر وأرجع لسالفة الحرج منهم!

إقتباس أحسن ما في الموضوع لما أحد يدق عليك العصر ويلقاه مشغول وتجي تدق عليه إنت ويقولك كيف دريت إني أتصلت وتقول له من خدمة موجود إكسترا تحس بوناسه غير طبيعية

تتطنز يالياباني!

ترى كلٌ ميسر لما خُلق له ، ووبعض الناس ما عنده شغله إلا هالجوال

إقتباس بس الي ما توقعته إن تفكيرك رجعي شوي وتستحي من إسم أمك

ما عندي أغلى من أمي، ولا عمري ناديتها باسمها و لا أذكر إني سمعت أحد يناديها باسمها ، و إذا صرت أنا ما أحتاجه أجل غيري وش يبي فيه؟! أو بس لقافه، عرفت ليش الأولين يفكرون صح..

إقتباس قبل ما أخلص بونس صدوركم بسالفة تتعلق بالموضوع .

الله يسامحك بس، جايب لنا سالفة ما يفهمها إلا أنت والمشاغب وتبينا نستانس؟

عطنا التفاصيل وإلا ما هنا وناسة. كُبَّ العشاء ياهذا ولا عليك من أحد


شكراً على مشاركتك والله يبارك بعمرك والفال لك إن شاء الله >> لا تقول آمين تراه فالٍ يضرك ما ينفعك يابو عشر جوانح تسذوبه!


__________________________



راااجع بإذن الرحمن

" أهلآ " .. بـ ( الهآوي ) .......... !!

::

أحـد .. " الأصدقـآء " .. لـديه ............ !!
نفس المشكـلة ....... !!
لـ درجـة أنه .. عندمـآ يتلقى .. ( إتصآل ) ........ !!
بعد منتصف .. ( الليل ) ....... !!
[ يرسل .. رسآلـة ] .. مضمونهـآ .. ( أنـآ نآئـم .. أجرو عدم الإزعآج ) ...... !!
ويستقبلهـآ .. منهم .. على اتصآل .. ( دآئـم ) .. معه ..... !!
حتى لآ .. ( يرتعش ) .. في الليل .. من .. " صوت النغمـة " ........ !!
وفي المقآبـل .. أنآس .. لو ظـل الهآتـف ....... !!
[ يصطرخ .. بـ الرنين .. ] .. مآ أجآبـك .......... !!
وعند سؤآلـه .. يقول .. ( لـم اسمع الإتصآل ) ........... !!

::

هي موجودة لدى .. ( فئآت ) .. من النآس ......... !!
نسئل .. الله .. لهم الشفآء ..... !!

::

يعطيك العآفية

المشاغب


يا هلا والله وغلا ..

ياحبي لك ، هذا وأنت ما شفتن وشعري طويل وجاي على جنب، كنت وقتها كأني أنت

إقتباس الحمد لله أن هذا وضعك لأني أشوف أنك مثل أخوي الكبير ومقصر معك ولا حتى باركت لك بزواج أخوك ..

ما يجي منك قصور يا سلطان، والحق لك ، لكن قبل زواج أخوي بأيام كنت لاهي ومسافر لديره فيها مشاكل والحمد لله رجعت قبل لا يقفلون مطارهم وأمداني على الزواج، على العموم بزواجي أبخليك تجلس بجنبي ، وش تبي بعد

إقتباس أنا طبعي مزاجي .. لذلك غالباً ما أرد إذا جوي مش ولا بد .. وأحياناً إذا كنت معصب أرد عشان أخربها

الأفضل إن الواحد ما يرد إذا صار بمزاج سيء أو معصب على قولتك لأن الناس ما ترحم، بكرا يطلع لك واحد ويقول فلان نفسه خايسه لا يهلّي ولا يرحب ومن هالهرج، ويمكن تخسر علاقاتك الاجتماعية والسبب إنك تكلمت مع الناس بطريقة فرضها عليك مزاجك السيء..


شكراً يا غالي والله يتقبل منك، بس ترى السالفة لخالتي مهيب لأمي


____________________________



متآبعه بصمت

هلا وسهلا..

إقتباس جوالي على الصامت طوووووول الوقت وإذا صار المزاج رايق حطيته عـ الهزاز

شكلك تحبين الصمت وااجد ( اسمك وجهازك)

صراحة أستغرب من الناس اللي دايم جوالاتهم على الصامت!، ما أدري وش الحكمة؟ ، إلا إن كان عندهم مشاكل نفسيه مع صوت الرنين مثل أصحابنا، وهنا ممكن نسأل عن أسباب هالمشاكل؟ ومنين جتهم؟؟



الله يعافيك شكراً لمرورك ، و تعوذي من قريح وإن شاء الله يضبط مزاجك .


____________________________



عسيريه


يا هلا وسهلا فيك..

إقتباس عني أنا تجيني اتصالات بشكل مزعج وكلها من صديقاتي يبغون يسولفون وبصراحه أنا ما احب أطول بالتلفون أذني تعورني فعشان كذا أريح نفسي وأحط الجوال أوف لاين

عاد كثر الكلام بالتلفون هذي يتميز بها كثير من النساء أو الحريم ولا والله ألوم أذانهم إذا انهبلت من الألم!

لكن ما دام الواحد يعرف أن نوعية الاتصالات اللي تجيه كلها من فئة " كيف الحال" فما عنده مشكله لو يطفيه شهر، ويا حظه براحة الدماغ، ما شاء الله..

إقتباس لو أنا أكتفينا بالجوآل كـ وسيلة إتصال [ عند الحاجه ] فقط لا غير لـ كان أريح بكثيــر بالنسبه لنا كـ مستخدمين

إي نعم ، ولو كنا اعتدنا على استخدامه عند الضرورة فقط لما بات يشكل لنا مصدر قلق وتوتر..

إقتباس عذار خدمة التنسيق مدري وش فيها لذالك اعذرنا على اللون الأسود

لو كان كل من يكتب بالأسود لازم يعتذر كان لقيتي صفحات المجلس من 1 إلى 4 كلها مواضيع اعتذار


الله يعافيك ويسلمك وشكراً لمشاركتك


____________________________


مطيع الهميمي

هلا وغلا..

إقتباس يعني تجيك أحيان ظروف تجبرك انك تعطي العميل رقمك وبعدين استلم الاتصالات منه ومن كل اللي يعرفهم

إقتباس لما تجيني اتصال والنفسية زفت والا مشغول واحاول قد ما اقدر اني اجامل المتصل حتى لو كانت سوالفه طويلة انحرج اعتذر منه

الله يكون بعونك، والمفترض أن الشخص اللي تستلزم طبيعة عمله أنه يكون معه جوال للتواصل مع العملاء أنه يأخذ بدل قلق ..

أجل أجامل واضغط على نفسي وأتعب نفسيتي بدون مقابل !


الله يسلمك يا غالي وأسعد جداً حين أعلم بأن ما أحاول طرحه يلقى القبول عند أمثالك ..


شكراً لمشاركتك



____________________________



خروج المغلوب


الله يعافيك وشكراً لمرورك



____________________________




راااجع إن شاء الله