شوية سوالف كذا مع ثقل دمي المعتاد.. مبارك عليكم العشر - نادي الهلال السعودي - شبكة الزعيم

Fahad Al Sudais · #1 28/08/2010, 06:31 PM

حيـــــــــاكم

مزبن

اللهم اني لك صمت وعلى رزقك افطرت
ذهب الظمأ وابتلت العروق وثبت الأجر ان شاءالله

الله محيي الربع.. اخباركم

مجرد سوالف وقفشات سريع سريع
برعاية القوة الشرائية للبقالة اللي جنب بيتنا

الله معك يابلادي

وانت ماسك طريق الملك فهد شمال.. كنك رايح للقصيم وسدير والزلفي والغاط ..الخ

بعد ماتتعدى نادي الشباب بمسافة بسيطة

بتشوف مخططات اراضي سكنية جديدة وبداية تنشيط الخدمات ( ماء - كهرباء )

رغم ان المنطقة تعتبر من اطراف الرياض ... لكن امر الله رمى بالعقاريين هناك

رغم انني مقتنع قناعة تامة ان اللي بيته بالبديعه اذا راح لحي الصحافة مسموح يصلي جمعاً وقصراً

وعلى الطرف الآخر

اللي يمسك طريق الحجاز.. يشوف المخططات اللي قبل ( القدّية ) وبعدها.. أقرب مالها المزاحمية

واللي في بداية الثمامة قبل الدوار الاول.. اللي يسمونها مخططات خالد البلطان

وش اللي يخلي العالم تروح تدوّر اراضي سكنية بهالمقالع ؟؟

بتقولون الرياض كبيرة وماعاد تشيل العالم ولازم تمتد النهضة العمرانية الى مساحات اكبر.. الخ

على عيني وراسي

لكن سؤالي

الاراضي القاحلة ( وسط الرياض ) متى راعيها ناوي يعتقها لوجه الله ويفرج كربة المسلمين ؟؟

وانت ماسك طريق صلاح الدين من الملز الى اول اشارة بالربوة حقت هرفي ( الشارع يحمل اسمه )

شوف الاراضي يمين ويسار وامسك راسك من شدة القهر

وانت ماسك طريق عمر بن عبدالعزيز جاي من الملز ورايح للسلي.. شوف يمين ويسار

وانت ماسك طريق سعد بن عبدالرحمن جاي من المقبرة وباتجاه النسيم.. شوف يمين ويسار

وانت ماسك طريق خالد بن الوليد بالروضة.. شوف يمين ويسار

صحاري قاحلة في وسط وقلب مدينة الرياض... وصاحبها واحد ( الله يهديه )

ليش تحدّ العالم يطلعون بقلعة وادرين على اطراف الرياض.. وانت عايش جوك ومالك حاجة بكل هالاراضي ؟؟

اللهم ارزقنا القناعة يارب العالمين ولا تجعل الدنيا اكبر همّنا

.
.

مع ( ابويزيد ).. الدنيا لها طعم آخر

عام 2004 كنت رجل اعمال

وكان عندي مكتب خدمات عامة ( استقدام - نقل كفالة - شغالات وسائقين )

وكان عندي معقب ( درويش ) وعلى باب الله اسمه ( ابويزيد )

ابويزيد هذا مشكلته مشكلة

رجّال ضعيّف ومسكين وفقير وحالته صعبة

لكنه بالمقابل ( غلباوي ) وفقّاش درجة اولى.. الفقشه معه ماتعوق ابداً

كان يجي ذاك اليوم وياخذ كمية جوازات علشان يخلصها ( اقامات وخروج نهائي )

وياخذ الدراهم وهذا وجه الضيف.. ما اشوفه الا بعد اسبوع

وينك يابويزيد ؟؟ وخذ من الرخيص : كنت تعبان.. مريض.. مسافر.. ولدي مريض

المهم انا كنت اتغاضى عن حركاته كثير لأني عارف وضعه.. فقير وعنده كومة لحم بالبيت

يعني كنت جايب السالفة احتساب لوجه الله

لدرجة انه في يوم من الايام اخذ مبلغ ( 4 ) الاف ريـال علشان يروح يسدد تأشيرات بالصراف الآلي

رجع لي بالليل يقول ان المكينة ( بلعت ) البطاقة والفلوس

ومرة راح للصراف ومعه مبلغ ( 2750 ) ريـال.. رجع يقول واحد حرامي زرفها منه عند المكينة

المهم.. انا مثل ماقلت لكم تعودت على فقشاته وحركاته ( احتساباً ) لوجه الله وماودي اقطع رزق عياله

لكن هذاك اليوم جاك الموت ياتارك الصلاة.. وراح فيها ابويزيد

طاح بيد واحد ( ثقفي ) من اهل الطايف.. ولا حدّش سمى عليه

الثقفي جاني يبي ينقل كفالة خادمة ( يوم الاحد ).. على اساس انه مسافر للطايف يوم الاربعاء

اعتذرت منه وقلت له مايمدينا.. لأن المعقب حقنا ( لك عليه شوي ) ومهوب تكانة

قال : انا راح ادسم شاربه وأكرمه بالفلوس بس يخلص لي نقل الكفالة بكرى

رجعت انا واعتذرت منه وقلت له المعقب ما يطمّن ولا تاخذ بكلامه

الثقفي ما اقتنع بكلامي وأصر وصمّم انه يقابل المعقب ويتفاهم معه بنفسه

قلت له انا بكيفك وانت حر

.. ارجع لنا بعد المغرب يكون ابويزيد جاء وانت واياه تصلحون

المهم

تقابلوا بعد المغرب ( الثقفي وابويزيد ) وعطاه الجواز حق الخادمة ودسّم شاربه بـ 500 ريـال

على اساس ان ابويزيد يخلص له نقل الكفالة قبل يوم الاربعاء

ابويزيد اخذ الـ 500 وهو طاير من الفرحة.. وسط سيل من التطمينات والكلام الحلو

وقال له بالحرف الواحد : ابشر ولا يهمك.. الى يوم الاثنين بالكثير واقامة الشغالة تكون معك

وافترقوا من قدامي وانا مالي دخل بأي شي.. اللي علي سويته وحذرت الثقفي لكنه ماسمع كلامي

راح الاحد.. والاثنين.. والثلاثاء.. وجاء الاربعاء العصر وانا توّي جاي للمكتب

لقيت الثقفي بسيارته قاعد يحتري عند الباب

معصب وطالعه روحه.. يقول ان ابويزيد من ذاك اليوم مايرد على جواله

انا طبعاً سحبت نفسي وقلت له : قلعتك

.. وانا محذرك من البداية وقايل لك الرجّال مهوب تكانة

الثقفي قعد الى المغرب ينتظر.. يبي يشوف ابويزيد ويقابله علشان يتفاهم معه

ابويزيد ما جاء.. الثقفي مل وسافر للطايف قبل العشاء

من بكرى الخميس ابويزيد يتصل بي على جوالي يسألني عن الثفقي.. هو فيه والا سافر ؟؟

وانا اقول له ان الرجال سافر لكنه قافله معه منك يابويزيد.. ليش مارديت على جواله ؟؟

وطبعاً خذ ياخربطه وبربسه.. ساعة يقول الجواز ضاع وساعة يقول كنت مريض

المهم

راحت الايام وبعت المكتب وتفرغت لوظيفتي

وخلال الاسبوع الماضي كنت بالطايف.. اتسوّق في برج العبيكان

وانا ماشي صدفة شفت الثقفي قدامي هو وعياله

سلّم علي وسالني ليش بعت المكتب.. ويعني من هالسوالف

سلمت عليه وسألته عن سالفته مع ابويزيد.. وش صار عليهم ؟؟

قال لي انه رجع للرياض بعد ست شهور من السالفة وراح للمكتب ولقى ابويزيد يشرب شاهي حليب

يقول :

مسكت كاسة الشاهي وكبّيتها على راسه وقفلت باب المكتب.. واستفردت فيه

ودبغته ذيك العلقة المحترمة اللي ماراح ينساها طول حياته.. عينك ماتشوف الا النور

ومافكيته الا يوم خفت انه يموت بين ايديني.. واخذت محفظته وطلعت منها 300 ريـال

وقلت له الله لايسامحك بالـ 200 الباقية

صورة مع التحية لكل ( ابويزيد )... يمهل ولا يهمل

.
.

حكم شرب الشاهي والقهوة.. والطبخ بالسمن

اعجبني امس الشيخ سلمان العودة وهو يتكلم عن جزئية ( كثرة السؤال والاستفتاء )

وخصوصاً يوم قال ان المستفتي يسألك وفي نفس الوقت يملي عليك الاجابة التي يريدها

واكثر من ذلك ان البعض احياناً يصل الى درجة الوسوسه فتجده يسأل عن كل شيء بمناسبة او بدون

وهنا استحضر الحديث الشريف :

عن أبي هريرة رضي الله عنه عن النبي صلى الله عليه وسلم قال : ( دعوني ما تركتكم إنما أهلك من كان قبلكم كثرة سؤالهم ، واختلافهم على أنبيائهم ، فإذا نهيتكم عن شيء فاجتنبوه ، وإذا أمرتكم بأمر فأتوا منه ما استطعتم ) متفق عليه

قبل فترة واحد ( لحس مخي ) بكثر اسئلته وعليه اسئلة غريبة عجيبة :

يقول الحين انتم تقولون الدخان حرام لأنه مضر بالصحة..

طيب الاكثار من الشاهي والقهوة مضر بالصحة.. نقدر نقول عنها حرام ؟؟

والسمن.. استخدامه بالطبخ سبب لأمراض القلب والكوليسترول.. ليش مانقول حرام ؟؟

مدفن

ıl TŏP lı · #2 28/08/2010, 06:48 PM

الله يبآرك فيك

ان شاء الله نشوف سواليف تفتح النفس

Bay

يآسر ، الهلآلي · #3 28/08/2010, 06:54 PM

ههههههههههههه

آبويزيد توحفــه أووي

وابويوسف شكله مآش مابوه صبر

™MŘ.βάđя · #4 28/08/2010, 07:28 PM

هلا والله بالصخرة

بالنسبة للمساحات الفاضية فحدث ولا حرج في كل مكان بالرياض وللأسف

المفروض يحطون ضريبة سنوية على هالأراضي الغير مستثمرة
لكن كالعادة لا حياة لمن تنادي

أما صاحبك أبو يزيد فياكثرهم والله لكن الله يمهل ولا يهمل
وأصعب شي على الشخص أن يكون عليه حق

الله يعطيك ألف عافية أخوي

مجروح من سهم ياسر · #5 28/08/2010, 07:54 PM

هههههههههههههههههههه

الله يسعدك يارب, وسعت صدورنا , وأبو يزيد يستاهل ماجاه

بس فيه نقطة حبيت أعلق عليها >>

إقتباس


	رغم انني مقتنع قناعة تامة ان اللي بيته بالبديعه اذا راح لحي الصحافة مسموح يصلي جمعاً وقصراً

هههه, حلو اسلوب المبالغة,,, بس لا أحد يفهمك غلط, ويعتبرها فتوى
لأن الي أعرفه وسبق وسمعته من مشايخ (أضن المفتي, لكن لست متأكد), أن الجمع والقصر يكون بعد مايتجاوز الشخص مسافه قدرت بـ 85 كلم خارج البنيان.
..........
ومن خلال بحثي عالسريع عن نفس الموضوع, لقيت هالجواب >>:
مسافة السفر عند اللجنة الدائمة 83 كيلو متر _ أما مسافة السفر عند الشيخ ابن عثيمين رحمة الله ( العرف )

......

والله يعطيك العافيه, ع الموضوع الروعة

Hictar · #6 28/08/2010, 07:55 PM

بالنسبه للأراضي يا أبوصالح
قرأت إقتراحات كثيره بخصوص فرض غرامات على الأراضي بوسط الرياض
لأن عدم بنائها هو السبب الوحيد للتوسع الكبير في مدينه الرياض!!.

فلو فرض غرامه من البلديه سنوياً
بتكون هالغرامه دخل إضافي للبلديه

وخبرك الوزارات والبلديات يدورون أيه مدخل على المواطن علشان ينهبون اللي في جيبه

لكني أعتقد إن عدم تطبيق مثل هالقرار - إن أصحاب الأراضي ( ما يتحارشون )

وإلا مثل هالنهب - ما يفوت على البلديه

حوار عقلاني · #7 28/08/2010, 08:12 PM

يالصخره الكلام مو على مكان الأرض . الكلام الآن على قيمه المتر !
شآيف الآرآضي اللي أنت تقول عنها بالعكس النآس تدورها بس القيمه غاليها !
الملقا المتر قبل مده بـ 2500 ريال !
الصحآفه ما يهون !
يعني حتى اللي دآخل البلد ما رحم العالم وأعتق هالأرآضي ولا الأراضي اللي توقل في قلايع وادرين أسعآرها طيبه !
ولا على ذكر إن سوق العقآر رآح يطيح من رمضآن المآضي وأشوف طواريها بمواقع رآعين العقارات ولا صآر شي

على آخر نقطه خلنا من أبو يزيد وخلنا بالفتيا !
قبل يومين وأنا بتمدد إلا أشوف في قنآه بدآيه أغبى سؤال فتوى شفته في حياتي وعاد خذ لك من هالقناه السخيفه وشريطها السخيف عبر !
الفتوى تقول : يا بنات أنا كنت اتروش فجأه دخل آذآن الفجر هل يعتبر صيآمي صحيح أو لا ؟!!!!!!!!!!!!

مبروك عليكم العشر جميعا

قرقاص · #8 28/08/2010, 09:37 PM

هلا وغلا بالصخرة

وش فيك اليوم شاب على العقاريين

العقار عندنا رايح في خرايطها !! أراضي تراب ولافيها خدمات وبعيدة عن العمران وتلقى المتر ب 900 ريال

مشكلة العقار انه محصور في ايدي فئة من الناس تتحكم فيه ولا يوجد عليهم ضرائب ولا شي !! ويحط السعر اللي يبيه واذا مو عاجب الزبون يروح وبيجي غيره !! والأرض البيضاء ما تصرف شي ولاتحتاج فلوس للتخزين

أما صاحبك ابو يزيد فحقه وماجاه من الثقفي

هالنوعية من البشر امثال ابويزيد المفروض يعرفون انه موعشان انت مسكين وغلبان تلهف حلال الناس ولاتسوي شغلهم اللي وثقوا فيك واتكلوا على الله ثم عليك فيه وبالأخير تجي وتسحب عليهم

وعشر مباركة عليك وعلينا وعلى جميع المسلمين

هـلاليه مخلصه · #9 28/08/2010, 10:06 PM

والله مدري كيف تحملته هذا أبويزيد !
باين أن بالك طوويييييل

الله يعطينا طولة البال أنا مقدر اتحمل هالنوعيه من الناس و لا أقدر أجاملهم
ما أحب أحس أن اللي قدامي قاعد يستغفلني أو يحسبني غبيه

و الله فيه ناس مايبين فيهم إذا سويت فيهم خير و جيهم مغسوله بس اخذ جزاه من الثقفي
عطاه درس محترم

||

الصخره , لاهنتْ ع الموضوع أستمتعت بسواليفك ,

و الله يبارك فيك و يزيدك طولة بال

هلاليــ دوت كوم ـــه · #10 28/08/2010, 10:27 PM

إقتباس

الرسالة الأصلية كتبت بواسطة هـلاليه مخلصه

والله مدري كيف تحملته هذا أبويزيد !

إقتباس

الرسالة الأصلية كتبت بواسطة هـلاليه مخلصه

باين أن بالك طوويييييل

الله يعطينا طولة البال أنا مقدر اتحمل هالنوعيه من الناس و لا أقدر أجاملهم
ما أحب أحس أن اللي قدامي قاعد يستغفلني أو يحسبني غبيه

و الله فيه ناس مايبين فيهم إذا سويت فيهم خير و جيهم مغسوله بس اخذ جزاه من الثقفي
عطاه درس محترم

من جدّ وآضح إن بآلك طويييل .. ماشاء الله تبآرك الله

و أنآ نفس أختي / هلآليّة مخلصة .. ماأحبّ اللي يستغفلني ..
ممكن أمرر مرّة مرتين ثلآث ؛ بعدين لآآآ

و أبو يزيد حقّه وماجآه من الثقفي ..

بسّ سؤآل ..الفلوس له و إلا لك و هو يأخذهم و يقول أنسرقوآ ؟؟؟
.
.
شُكراً الصخرة على ثقآلة الدم .. < أمزح
سوآلف أستمتعنآ بقرائتهآ .. عوآإفي ..
.
.
و علينآ و عليك العشر مبآركة ..

سند الجنوبي · #11 28/08/2010, 11:01 PM

إقتباس


	الاراضي القاحلة ( وسط الرياض ) متى راعيها ناوي يعتقها لوجه الله ويفرج كربة المسلمين ؟؟

هؤلاء الله مير يسلمك مكتوب عنهم ممنوع الأقتراب ممنوع اللمس

والأهم الاسـم الأخير يخووووووف ويجيب كواااااااااابيس

إقتباس


	مسكت كاسة الشاهي وكبّيتها على راسه وقفلت باب المكتب.. واستفردت فيه ودبغته ذيك العلقة المحترمة اللي ماراح ينساها طول حياته.. عينك ماتشوف الا النور ومافكيته الا يوم خفت انه يموت بين ايديني.. واخذت محفظته وطلعت منها 300 ريـال وقلت له الله لايسامحك بالـ 200 الباقية صورة مع التحية لكل ( ابويزيد )... يمهل ولا يهمل

رنووووه رنووووه

يا كثرهم والتعداد السكاني يثبت هذا الأمـر وعلى ما اعتقد الأزمـة العالمية هي السبب

إقتباس


	حكم شرب الشاهي والقهوة.. والطبخ بالسمن

المشكلة فوق هذا فيه مواكبة من بعض من يدعون المشيخة والعلم وصارت الشغلة فتوى دلفيري

HILALYA ]~ · #12 29/08/2010, 01:17 AM

..

لا بادين يحطون حدايق بدال الصحراء ع قولتك ض1 ..
والا اضن والله اعلم انها صايره ثمامه للناس اللي ما تحب تطلع بعيد ض1 ..
كل ما مريت عند براحه .. تلقى عايله جالسين مع قهوه وشاهي ض1 ..

.
.

بخصوص ابو يزيد .. ياكثرهم اللي كذا ..
ودك يجي يوم وتكرشهم كرشه من الارض كلها ذذ ض1 ..

.
.

يعطيك الف عافيه ..

" أَبُو لارا " · #13 29/08/2010, 01:58 AM

بِرِعَايَة الْقُوَّة الشِرَائِيّة لِلْبِقَالَة الْلِي جَنْب بَيْتِنَا

الزُّلْفِي

وَرَاك مَا دَعَسْت عَلَى الْبِنْزِيْن وَأَنْت مَا تَدْرِي وَأَفْطَرْت عِنْدَنَا فِي الزُّلْفِي

الْلَّه مَعَك يَابِلَادِي

الْنَّاس أَنْبَحَت حلَوِزُهَا وَهِي تَتَكَلَّم عَن الْأَرَاضِي الْفَارِغَة فِي وَسَط الْرِيَاض وَلَكِن لَاحَيَاة لِمَن تُنَادِي تَدْرِي لّيّش وأَنَتْ
تَعَرِفْ أَن الْمَالِكِيَن مِن الْطَّبَقَة الْمُخْمَلِيَّة ( طَبَقَة الْأُمَرَاء ) .

حُكْم شَرِب الَّشّاهِي وَالْقَهْوَة.. وَالْطَّبْخ بِالْسَّمْن

تَعْرِف لّيّش تَرَكْت مُتَابَعَة الْفَتْوَى فِي رَمَضَان لِأَنَّهَا مُكَرَّر ووَوَسْخة جَدَّا وَبَايخَة ...
سُؤَال يَقُوْل ؟؟ خَلَاص مَا وِدّي أُكَمِّل أَخَاف أَخْرَب الْمَوْضُوْع .

مَا أَقُوْل الْلَّه يُعَيِّن الْمَشَايِخ عَلَيْهِم ، وَيُعَيِّن الْمُتَابِعِيْن عَلَى الْأَسْئِلَة البَايخَة .

إِلَى الْمُلْتَقَى حَبِيْب الْقَلْب فَهِد ..

leader ksa · #14 29/08/2010, 02:06 AM

ياخي اذا تبي تذكر الاراضي الفاضية
شوف الساحل الشرقي

قصدي الدايري الشرقي فاضي من الصناعيه لين 16 العام سووا مزاد مدري وشو وفالاخير اشوفهم حطوا فيها مستودعات !!

بس باقي اراضي فاضية لاربع احياء عالاقل وينها ليش ماصار مزادات عليها ولا شي؟!!

>>مدري احس انها قريبة من اللي قلتها ولا هي بنفسها بس اني ماعرف اسماء الشوارع اعرف ادل فيها بس مستحيل احفظ الاسم

والاراضي اللي كنت مستغرب منها لاني ماتوقع باقي بتغلى اكثر
الاراضي مابين ام الحمام والرائد بس من عرفت انها تبع احم احم قلت يحق لهم طويلين العمر

حتى تركي الاول ماكملوه الا بعد ماخذوا الاذن الظاهر

ويااخوان انصحكم بظهرة لبن ترا اسعارها زينة المتر حول 1000 ريال بس الله يديم الرخص

>>بيمشي سوقها

بس نصيحة اللي مايحب الجنوبيين لايقرب منه لانها مستوطنة وقريبا راح نطالب بجدار فاصل

والله ياكثرنا هناك كل واحد من جماعتنا له ارض هناك من اولهم لاخرهم

وايه نسيت والله يافيها فوالين على كيف كيفك كل واحد يقول الزود عندي

ونسعد بسوالفكم طال عمرك

تعديل
نسيت اقولك وانت متجه شمال مع طريق القصيم اطلع مع كبري قوات الامن اللي بعد ابو هيثم الاول وخذ معه يمين
مجهزين عالاقل 10 احياء بس للحين استراحات خاصة وماحد ينصح فيها

تحياتو

$عزوز الهلالي$ · #15 29/08/2010, 03:12 AM

انت قفلت الموضوع ولا قلت لنا حراااااام ولا لا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟