شوية سوالف كذا مع ثقل دمي المعتاد.. مبارك عليكم العشر
حيـــــــــاكم
مزبن
اللهم اني لك صمت وعلى رزقك افطرت
ذهب الظمأ وابتلت العروق وثبت الأجر ان شاءالله
الله محيي الربع.. اخباركم 
مجرد سوالف وقفشات سريع سريع برعاية القوة الشرائية للبقالة اللي جنب بيتنا 
الله معك يابلادي
وانت ماسك طريق الملك فهد شمال.. كنك رايح للقصيم وسدير والزلفي والغاط ..الخ
بعد ماتتعدى نادي الشباب بمسافة بسيطة
بتشوف مخططات اراضي سكنية جديدة وبداية تنشيط الخدمات ( ماء - كهرباء )
رغم ان المنطقة تعتبر من اطراف الرياض ... لكن امر الله رمى بالعقاريين هناك 
رغم انني مقتنع قناعة تامة ان اللي بيته بالبديعه اذا راح لحي الصحافة مسموح يصلي جمعاً وقصراً
وعلى الطرف الآخر
اللي يمسك طريق الحجاز.. يشوف المخططات اللي قبل ( القدّية ) وبعدها.. أقرب مالها المزاحمية
واللي في بداية الثمامة قبل الدوار الاول.. اللي يسمونها مخططات خالد البلطان وش اللي يخلي العالم تروح تدوّر اراضي سكنية بهالمقالع ؟؟ 
بتقولون الرياض كبيرة وماعاد تشيل العالم ولازم تمتد النهضة العمرانية الى مساحات اكبر.. الخ
على عيني وراسي
لكن سؤالي
الاراضي القاحلة ( وسط الرياض ) متى راعيها ناوي يعتقها لوجه الله ويفرج كربة المسلمين ؟؟ وانت ماسك طريق صلاح الدين من الملز الى اول اشارة بالربوة حقت هرفي ( الشارع يحمل اسمه )
شوف الاراضي يمين ويسار وامسك راسك من شدة القهر وانت ماسك طريق عمر بن عبدالعزيز جاي من الملز ورايح للسلي.. شوف يمين ويسار
وانت ماسك طريق سعد بن عبدالرحمن جاي من المقبرة وباتجاه النسيم.. شوف يمين ويسار
وانت ماسك طريق خالد بن الوليد بالروضة.. شوف يمين ويسار
صحاري قاحلة في وسط وقلب مدينة الرياض... وصاحبها واحد ( الله يهديه ) ليش تحدّ العالم يطلعون بقلعة وادرين على اطراف الرياض.. وانت عايش جوك ومالك حاجة بكل هالاراضي ؟؟
اللهم ارزقنا القناعة يارب العالمين ولا تجعل الدنيا اكبر همّنا
.
.
مع ( ابويزيد ).. الدنيا لها طعم آخر
عام 2004 كنت رجل اعمال وكان عندي مكتب خدمات عامة ( استقدام - نقل كفالة - شغالات وسائقين ) وكان عندي معقب ( درويش ) وعلى باب الله اسمه ( ابويزيد )
ابويزيد هذا مشكلته مشكلة رجّال ضعيّف ومسكين وفقير وحالته صعبة
لكنه بالمقابل ( غلباوي ) وفقّاش درجة اولى.. الفقشه معه ماتعوق ابداً كان يجي ذاك اليوم وياخذ كمية جوازات علشان يخلصها ( اقامات وخروج نهائي )
وياخذ الدراهم وهذا وجه الضيف.. ما اشوفه الا بعد اسبوع وينك يابويزيد ؟؟ وخذ من الرخيص : كنت تعبان.. مريض.. مسافر.. ولدي مريض
المهم انا كنت اتغاضى عن حركاته كثير لأني عارف وضعه.. فقير وعنده كومة لحم بالبيت
يعني كنت جايب السالفة احتساب لوجه الله
لدرجة انه في يوم من الايام اخذ مبلغ ( 4 ) الاف ريـال علشان يروح يسدد تأشيرات بالصراف الآلي
رجع لي بالليل يقول ان المكينة ( بلعت ) البطاقة والفلوس ومرة راح للصراف ومعه مبلغ ( 2750 ) ريـال.. رجع يقول واحد حرامي زرفها منه عند المكينة 
المهم.. انا مثل ماقلت لكم تعودت على فقشاته وحركاته ( احتساباً ) لوجه الله وماودي اقطع رزق عياله
لكن هذاك اليوم جاك الموت ياتارك الصلاة.. وراح فيها ابويزيد طاح بيد واحد ( ثقفي ) من اهل الطايف.. ولا حدّش سمى عليه
الثقفي جاني يبي ينقل كفالة خادمة ( يوم الاحد ).. على اساس انه مسافر للطايف يوم الاربعاء
اعتذرت منه وقلت له مايمدينا.. لأن المعقب حقنا ( لك عليه شوي ) ومهوب تكانة
قال : انا راح ادسم شاربه وأكرمه بالفلوس بس يخلص لي نقل الكفالة بكرى
رجعت انا واعتذرت منه وقلت له المعقب ما يطمّن ولا تاخذ بكلامه
الثقفي ما اقتنع بكلامي وأصر وصمّم انه يقابل المعقب ويتفاهم معه بنفسه
قلت له انا بكيفك وانت حر .. ارجع لنا بعد المغرب يكون ابويزيد جاء وانت واياه تصلحون المهم
تقابلوا بعد المغرب ( الثقفي وابويزيد ) وعطاه الجواز حق الخادمة ودسّم شاربه بـ 500 ريـال
على اساس ان ابويزيد يخلص له نقل الكفالة قبل يوم الاربعاء
ابويزيد اخذ الـ 500 وهو طاير من الفرحة.. وسط سيل من التطمينات والكلام الحلو وقال له بالحرف الواحد : ابشر ولا يهمك.. الى يوم الاثنين بالكثير واقامة الشغالة تكون معك 
وافترقوا من قدامي وانا مالي دخل بأي شي.. اللي علي سويته وحذرت الثقفي لكنه ماسمع كلامي
راح الاحد.. والاثنين.. والثلاثاء.. وجاء الاربعاء العصر وانا توّي جاي للمكتب
لقيت الثقفي بسيارته قاعد يحتري عند الباب معصب وطالعه روحه.. يقول ان ابويزيد من ذاك اليوم مايرد على جواله
انا طبعاً سحبت نفسي وقلت له : قلعتك .. وانا محذرك من البداية وقايل لك الرجّال مهوب تكانة الثقفي قعد الى المغرب ينتظر.. يبي يشوف ابويزيد ويقابله علشان يتفاهم معه
ابويزيد ما جاء.. الثقفي مل وسافر للطايف قبل العشاء
من بكرى الخميس ابويزيد يتصل بي على جوالي يسألني عن الثفقي.. هو فيه والا سافر ؟؟ وانا اقول له ان الرجال سافر لكنه قافله معه منك يابويزيد.. ليش مارديت على جواله ؟؟
وطبعاً خذ ياخربطه وبربسه.. ساعة يقول الجواز ضاع وساعة يقول كنت مريض
المهم
راحت الايام وبعت المكتب وتفرغت لوظيفتي
وخلال الاسبوع الماضي كنت بالطايف.. اتسوّق في برج العبيكان وانا ماشي صدفة شفت الثقفي قدامي هو وعياله
سلّم علي وسالني ليش بعت المكتب.. ويعني من هالسوالف
سلمت عليه وسألته عن سالفته مع ابويزيد.. وش صار عليهم ؟؟
قال لي انه رجع للرياض بعد ست شهور من السالفة وراح للمكتب ولقى ابويزيد يشرب شاهي حليب يقول :
مسكت كاسة الشاهي وكبّيتها على راسه وقفلت باب المكتب.. واستفردت فيه ودبغته ذيك العلقة المحترمة اللي ماراح ينساها طول حياته.. عينك ماتشوف الا النور
ومافكيته الا يوم خفت انه يموت بين ايديني.. واخذت محفظته وطلعت منها 300 ريـال
وقلت له الله لايسامحك بالـ 200 الباقية
صورة مع التحية لكل ( ابويزيد )... يمهل ولا يهمل .
.
حكم شرب الشاهي والقهوة.. والطبخ بالسمن
اعجبني امس الشيخ سلمان العودة وهو يتكلم عن جزئية ( كثرة السؤال والاستفتاء )
وخصوصاً يوم قال ان المستفتي يسألك وفي نفس الوقت يملي عليك الاجابة التي يريدها
واكثر من ذلك ان البعض احياناً يصل الى درجة الوسوسه فتجده يسأل عن كل شيء بمناسبة او بدون
وهنا استحضر الحديث الشريف :
عن أبي هريرة رضي الله عنه عن النبي صلى الله عليه وسلم قال : ( دعوني ما تركتكم إنما أهلك من كان قبلكم كثرة سؤالهم ، واختلافهم على أنبيائهم ، فإذا نهيتكم عن شيء فاجتنبوه ، وإذا أمرتكم بأمر فأتوا منه ما استطعتم ) متفق عليه
قبل فترة واحد ( لحس مخي ) بكثر اسئلته وعليه اسئلة غريبة عجيبة :
يقول الحين انتم تقولون الدخان حرام لأنه مضر بالصحة..
طيب الاكثار من الشاهي والقهوة مضر بالصحة.. نقدر نقول عنها حرام ؟؟
والسمن.. استخدامه بالطبخ سبب لأمراض القلب والكوليسترول.. ليش مانقول حرام ؟؟
مدفن
الوضع الشجري
