فكرة: سندريلا الهلال
اعداد وتصميم : الهنوووف + عسيريه

لنا من كل عام شهر فضيل ..

أعاده الله علينا وعليكم وجميع المسلمين بالخير واليمن والبركات

وكل عام وانتم بخير

**][يوميات رمضانية 1431 هـ ♥][ **

لقد عدنا اليكم .. تحملنا الاشواق للقياكم .. ونسعد ان نعيش معكم

. في سلسلة تحمل بين طياتها يوميات الأعضاء الرمضانية من كل عام
هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا
ودعونا نرحب سوية بالضيف" السابع عشر
مخضرم المجلس العام قرقاص
لكي يحكي لنا احداث يومه مع شهر رمضان المبارك

مرحبا بالجميع وكل عام وأنتم بخير بمناسبة رمضان وبمناسبة قرب عيد الفطر المبارك!!‏

وأشكر الأخوات والأخوة في المنتدى الاستشاري على منحي هذه المساحة للالتقاء بكم في هذا ‏الشهر الفضيل

ما هو رمضان‎ ‎بالنسبة لك ؟

رمضان شهر الخير وهو فرصة للتزود بالأعمال الصالحة والبعد عن السيئات بقدر الإمكان !! كما ‏انه فرصة للتعود على هذه الأمور ليستمر عليها الشخص بعد انقضاء أيام الشهر الفضيل.‏

برنامجك اليومي في رمضان ؟

برنامجي اليومي يبدأ بالاستيقاظ الساعة 9.15 والتوجه إلى المستشفى الذي أعمل به من الساعة 10 إلى الساعة ‏‏4 عصرا بعدها أعود للمنزل وإذا المدام طالبه أغراض للبيت أجيبها على طريقي ومن ثم أنام إلى ماقبل المغرب ب ‏‏30 دقيقه حيث أصحو واتوضاء لصلاة المغرب وإذا فيه وقت قبل الأذان اقرأ ماتيسر من القران ومن ثم أتناول ‏الإفطار واللي في الغالب ما يكون ثقيل ! وبعدها أتوجه لصلاة المغرب وبعد الصلاة أعود لاستكمال ماتبقى من ‏الإفطار شوط ثاني اضافي ومن ثم مشاهدة بعض برامج التلفزيون خصوصا طاش و بعدها أتصفح الانترنت إلى أذان العشاء وبعدها ‏أتوجه لأداء صلاة العشاء والتراويح وبعد الصلاة إما أن أعود للانترنت أو أشاهد مباراة للهلال إذا وجد مافيه أمل أشوف مباراة للنصر فريق فاشل اللهم أني صائم ماعلينا اذا مافيه مباراة اخرج ‏مع زوجتي وبناتي لشراء بعض مستلزمات العيد قبل الزحمة !! شارط عليها تخلص قبل العشر الأواخر وقبل الزحمات وغالبا مااعود في حدود الساعة 2 صباحا حيث أتناول ‏طعام السحور وأتصفح الانترنت إلى صلاة الفجر بعدها أصلي وأنام.‏

ماهي أكلتك ومشروبك المفضل في رمضان ؟‏

أنا من عشاق السمبوسة في رمضان وغير رمضان !! لكن ليس من الضروري اأن تكون متواجدة بشكل يومي ‏على سفرة الإفطار!! كذلك الفيمتو !! رغم يقيني انه مجرد ألوان صناعية !! بس وش نسوي !! مالحب إلا للحبيب ‏الأول ! كذلك أقدر الشوارب بأنواعها >>> جمع شوربة !‏

متى أول مره صمت فيها.واذا عندك مواقف مع الصيام اذكرها ؟

صمت أول مرة وانأ في خامس ابتدائي وكان في فصل الصيف !! وكنت أعود من المدرسة مشيا !! صمت أول يوم ‏وكنت في غاية التعب !! لكن اليوم الثاني منعتني والدتي رحمة الله عليها من الصيام خوفا على وقالت خله السنة ‏اللي بعدها !! وفعلا في العام التالي صمته كاملا ولله الحمد

موقف لاينسى حصل لك بـ رمضان..؟

في عام 1417 هـ كنت طالع من جامعة الملك سعود ووقفت بالإشارة الظهر في تقاطع طريق الملك عبدالله مع ‏التخصصي!! وفجأة سمعت صوت ارتطام قوي ولم أستوعب الأمر إلا لما أخبرني صاحبي اللي راكب معي إن فيه ‏واحد صدمنا من الخلف وضربنا بالسيارة اللي قدامنا !! وأتذكر وقتها كان علي شماغ وعقال ونظارات ماحصلتهم ‏إلا بالمرتبة اللي ورا !!!‏

وننزل من السيارة ونلقى اللي صدمنا شخص دبلوماسي !! كنت احسبه في حالة غير طبيعية وأقول له أيش فيك قال خلاص اللي صار صار !! واعتذر بطريقة لبقة !! وكان ‏مرهق جدا !! فقبلت اعتذاره وقال روح صلح سيارتك وجب لي الفواتير وفعلا الرجال كان صادق لما صلحت ‏السيارة إعطاني قيمة إصلاحها كاملة !!‏

موقف أخر صار لي اليوم الفجر !!! تعودت أني أنام قبل الفجر بساعة ! واقوم قبل الأذان بخمس دقايق عشان اشرب مويه وتعودت أشوف الساعة قبل لا اشرب ودائما تكون 4:05 !! المهم انها راحت علي نومة واشوف الساعة كأنها 4:05 مع النوم ماركزت على العقارب !! وشربت موية وقمت أصلي !! لماطالعت ساعة الجوال لقيتها 5:05 والحين يبي لي شيخ يفتيني علي قضاء ولالا

كيف نظامكم وأجوائكم في رمضان ونظامكم بالفطور والعشاء‏‎ ‎والسحور.؟

الفطور لازم تكون كل العائلة موجودة >>> تكفى يالحاج متولي !! كلهم 3 ‏زوجتي وبناتي الثنتين !!

والإفطار فيه أشياء أساسية مثل التمر والقهوة والشوربة والفيمتو والباقي اعتبرها مكملات حتى السمبوسة رغم ‏إني أحبها لكن مهيب حلا كل يوم‏
وبعد الصلاة يكون الطبق الرئيسي اما كفتة بالفرن ولا باستا أو اي شي تسويه ام جنى راح أكله

العشاء تعودت من سنين على اسقاطه من قاموسي وبدل عنه يكون سحور مبكر مابين الساعة 12-2 وبالغالب السحور يكون من برا اذا كنا خارج البيت ومارجعنا الا متأخرين

هل ترى اختلاف بـ رمضان في السنين الماضية عن السنوات الاخيره‏‎ ‎وإذا نعم وش الأشياء إلي افتقدتها.؟

رمضان يختلف من سنة لأخرى ولا أعلم سبب الاختلاف !! أول كان أحلى بكثير !!‏
هل السبب إننا لم نعد صغارا فلم نعد نحس بالمتعة ذاتها أم إن رمضان نفسه هو الذي اختلف !!‏ بسبب التقدم والتطور !! أول ماكان فيه الا قناتين في التلفزيون وماكان فيه انترنت ولا بلاي ستيشن ولاجوال ولا بي بي أول ماكنا نشوف السمبوسة والفيمتو الا برمضان والحين على مدار السنه وفي كل تموينات وكل مطعم تحصلهم !!
أول الناس تحرص على التجمع لمعرفة أخبار بعضهم البعض أما الأن فبضغطة زر تكلم الشخص وتعرف أخباره من دون أن تزوره أو يزورك !!

افتقدت في رمضان العائلة الكبيرة !! أيام ماكنت في المتوسط والثانوي ولما كنا في بيت الوالد رحمه الله كنا نجتمع ‏لتناول الإفطار وكان إخوتي وأخواتي كلهم متواجدون ! إما الآن وبعد أن كبرنا وكل واحد أستقل في بيت خاص واللي راح الرياض والي بالشرقيه واللي بقي بالمجمعة !! حتى ‏أصبحنا نجتمع مرة أو اثنتين بالشهر !! ‏

هل تفضل الصلاة في المسجد القريب من بيتكم أو تميل للتنويع ومن‏‎ ‎القارئ الذي تحرص على الصلاة خلفه في ‏رمضان؟

في السابق كنت أذهب وأتابع الكثير من القراء ! إما الآن وبعد انتقلت لمنزلي الجديد فاصلي في المسجد القريب ‏خصوصا إن إمامه قارئ متمكن!‏

كنت أيام الجامعة أصلي مع الكلباني والهبدان
أما في السنوات الأخيرة فأحرص على الذهاب لمسجد الشيخ ياسر الدوسري

أجمل رمضان عشته حتى الآن, متى ولماذا‏

أجمل رمضان كان عام 1414 وعام 1415 حيث قضينا العشر الأواخر كلها في مكة المكرمة وبجوار الحرم المكي ‏الشريف !! كنا نطلع من العصر نتمشى في أسواق مكة اللي حول الحرم وقبل الفطور نطلع الشقة نأخذ القهوة ‏والتمر ونروح لسطح الحرم نفطر هناك أنا وإخواني وعيال اخوي ! ‏
ورغم بساطة الإفطار إلا أنه ممتع في هذا الجو ‏الروحاني ! وبعد المغرب نطلع لأبراج مكة ونكمل فطورنا أما همبرجر ولا مشويات ولانطق مشوار للبيك وبعدين ‏نرجع نصلي التراويح وبعدها نكمل دوران بالأسواق لين صلاة القيام وبعد الصلاة نأخذ لنا سحور حبتين دجاج ‏شواية ورز بخاري ونرجع نتسحر مع أخواتنا في الشقه ‏

رسالة في هذا الشهر المبارك .. لمن تبعث بها وماذا تقول فيها .؟‎ ‎

ابعثها لكل مسلم ومسلمة وأقول فيها استعيذوا من الشيطان الرجيم وصلوا أرحماكم واعلموا أن الدنيا فانية ويوما ‏ما سترحلون عنها !! وتذكروا قول الرسول صلى الله عليه وسلم: لا يحل لمسلم أن يهجر أخاه فوق ثلاث !!‏

ورسالة أخرى ابعثها للأخوة المنقطعين عنا في المجلس العام من الرعيل الأول المغبرين ادعوهم فيها للعودة والتواصل !! لأنهم لازالوا مسجلين معنا واشوف يوزرات تدخل وتطلع في المواضيع بدون مشاركات



اليوميات: الرمضانية

بما أن اليوم المخصص لي حسب ماأخبروني به الأخوات المشرفات على اليوميات
هو يوم الجمعة 17 رمضان ‏وبما إني راح أكون مسافر يوم الخميس فقد قررت تجهيز اليوميات قبلها بيومين بحيث تكون يوم الأثنين ‏
وقد تمت كتابة اليوميات باللهجة السديراوية البحته فااذا وجدتوا كلمات غريبة عادي مشوها وروحوا للي بعدها ‏وراح يوضح لكم المعنى ‏

صحيت الساعة 08:30 صباحا وخذت شاور سريع>>> اللي مايعرف وش معنى شاور مهوب لازم يعرف ابد !! ‏وبعدها قمت أفكر وش البس أي بنطلون ؟ وش القميص اللي يمشي معه والكرفته المناسبة<<< هذي مشكلة اللي ‏يشتغل في مكان فيه حريم >>> لو تلبس نفس البدلة حقت أمس حشوك >> ماعنده إلا هالبدله وش هالقروي وش ‏هالقعيطي !! المهم اخترت اللبس المناسب وطلعت للصالة وألقى المدام مانامت مواصلة !! لأن عندها اختبار في ‏الترم الصيفي!! و أروح أقوم البنوتات عشان أوديهم بيت جدهم واخذ المدام للجامعة ! وطلعنا من البيت الساعة ‏‏09:10 صباحا ووصلتهم ورحت للدوام وقلت لهم خلوا السواق يرجعكم !! وماوصلت المستشفى اللي أنا شغال ‏فيه الا الساعة 9:55 !! ولما وصلت للمواقف طلعت البطاقة بس مافتحت لي البوابة !! وأحاول مرة واثنين ‏وثلاث !! ولما يئست خذت لي دورة قلت خليني أشوف المشكلة في بطاقتي ولا في الجهاز ولما رجعت لقيت ناس ‏كثير واقفين عندهم نفس المشكلة وقام واحد جزاه الله خير بفتح البوابة بيديه بكل قوة وخلانا ندخل !! وش نسوي! ‏عندي اجتماع كان بعد 5 دقايق واقرب موقف يبعد 10 دقايق وفي الشمس !! يعني الواحد يوصل الاجتماع منتهي ‏وسابح عرق!!‏

المهم وصلت المكتب وأخذت الأوراق المطلوبة وجري على الاجتماع الطويل والممل !! بعد ساعة ونصف خلصنا ‏رجعت مكتبي وافتح منتدى الزعيم واشوف اليوميات واقرأ الجرايد لين أذن الظهر وصليت ! بعد الصلاة كان عندي ‏بعض الأشغال العاجلة والأيميلات رديت عليهم وطيحت همهم !!

بعدها كان عندي مجموعة من المتدربات الجدد ‏أعطيتهم محاضرة قصيره ساعة كاملة بس ! وطلبت منهم يكتبون اللي قلته كله على الكمبيوتر ويرسلونه لي وللمدير ‏بالأيميل
بس للأمانة رحمتهم وقلت ماهو لزوم تخلصونه اليوم عارف إن مافيه وقت معكم لبكرا !‏

‏ بعدها صليت العصر وشيكت على الأيميل وطلعت ! وأنا في الطريق مريت المطعم و البقالة وخذت منهم أغراض ‏للفطور ! لأني وعدت زوجتي أني أبصلح الفطور اليوم لأنها ماراح تطلع من الجامعة إلا بعد الظهر وهي مواصله ‏وأنا قايلها ماتتعب نفسها !! تطلع تنام وأنا بزين كل شي ‏‏ ‏

خذت أغراض الفطور ورحت للبيت وحطيتهم في المطبخ وكانت الساعة 5:15 وكان باقي اكثر من ساعة على ‏الفطور! ولقيت البنوتات صاحيات وقمت شغلت لهم اللاب توب وحطيت لهم العاب >> عشان أضمن مايزعجوني
‏

‏
وقمت طلعت القهوة من الثلاجة وسخنتها وحضرت الفيمتو وما لقيت الجيك وقمت حطيته بهالقاروره اللي تشوفون ‏‏! << عشان ماأحد يلتس عليه الأمر ويقول وش هذا !! وقليت السمبوسة >> كلها 4 حبات !! وسخنت الشوربة ‏الباقية من أمس ! والبان كيك اللي مجهزته المدام من قبل وحاطتهه بالثلاجة وأضفت له ‏syrup‏ حقه ! والستيك ‏على الصاج والدجاج بكريمة الجبن >> مدري وش اسمه لقيته بالثلاجة وحطيتها بالفرن لين تحمرت والكبة ‏والفطاير اللي أنا جايب من المطعم وقشطة المراعي واصفهم على السفرة كما تشاهدون تحت !!‏

بان كيك << مصابيب أمريكية















تراه فيمتو تعوذوا من الشيطان



أحلى ستيك







وقبل الأذان بخمس دقايق صحيتها عشان تعرف أن وراء كل امرأة رجل عظيم !!‏

بعد الفطور رحت صليت المغرب وبعد الصلاة كملت باقي الفطور وبعدها قمت أقلب في هالقنوات !! المشكلة محتار ‏مابين طاش وسكتم بالأخير حولت على سكتم بكتم لأن فايز المالكي هالسنه أفضل من طاش بكثييير ! بعدها سلمت ‏الريموت للمدام عشانها تتابع مسلسل زوارة الخميس! وشغلت اللاب توب ومابين موقع الزعيم وسبق والوئام ‏والأيميل الى أن جاء وقت صلاة العشاء والتراويح رحت للمسجد القريب من البيت صليت وبعدين رجعت للبيت ‏شربت لي الشاهي وكملت على النت !! وبعدها وديت زوجتي للسوق وطلعت أقابل أصحابي في كوفي شوب ‏خصوصا ان واحد من الشباب توه واصل من أمريكا ولا راح يطول في الرياض !!‏

وصفوا لي المكان ورحت لهم وتفاجأت من الكوفي شوب اللي جاي على الطراز القديم من ناحية الديكورات ‏والجدران الطينية القديمة ويقدم قهوة عربي وتمر بس كان ناقصة حاجتين !! أنهم يسوون جلسة أرضية بدلا من ‏الكراسي والكنب والشي الثاني يمنعون التدخين !!‏

كان ودي أصور المكان بس خفت يضحكون علي الموجودين ويقولون وش هالقروي اللي يصور كل شي !! شكله ‏ماقد دخل كوفيهات من قبل حده بيوفيه بالبطحاء !‏

المهم جلست الى الساعة 2 بالليل وبعدها رحت أرجع المدام من السوق ومرينا على هرفي وخذنا منه سحور خفيف ‏شوي همبرجر على كفته !! بعدها جلست لين الفجر على النت وصليت وسميت بالرحمن ونمت !!


وتوته توته خلصت الحدوتة ‏‏

كل الشكر

لـلمميز **][ " قرقاص " "♥][ **

وانتظرونا غداَ

مع المتميزة ع شقها هلالي .

أرق التحايا وأطيبها من

مشرفي واستشاري

المجلس العام