**][يوميات رمضانية 1431 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم
. في سلسلة تحمل بين طياتها يوميات الأعضاء الرمضانية من كل عام
هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا

ودعونا نرحب سوية بالضيف" السادس عشر المتميزة Meme

لكي تحكي لنا احداث يومها مع شهر رمضان المبارك

بداية بسم الله الرحمن الرحيم , السلام عليكم ورحمة الله وبركاته , انني سعيدة جدا باني طليت عليكم
وادري ان اليوميات توها تنور , صحيح اشغلتنا الدنيا
ونسينا نقولكم رمضان مباركـ عليكم كل ابوكم وجعله ينعاد عليكم سنوات وسنوات , امين
ادري انها متاخر بس طعمها حلو .. يلا ببدأ اجاوب وخروا ..

ماهو رمضان بالنسبه لك ..؟

بالنسبة لي هو شهر المغفره والرحمه , شهر اشعر فيه بالسعاده وانشراح الصدر ,
شهر قسسسم احس فيه بوناااسه .. الله يديمها علي وعلى الجميع ياارب ..

برنامجك اليومي في رمضان ؟
عاد هنا اسمحولي بطول شوي بالاجابه ..
لي برنامجان .. برنامجي سابقا في رمضان هو النوم بعد صلاة الفجر مباشره او بعدها
بقليل , ثم الاستيقاظ لصلاة الظهر , ثم العوده للنوم مرة اخرى الى قبل اذان المغرب
بساعه اصلي ثم اقرأ وردي وجزئي المحدد , ثم الذهاب الى الفطور ولا افكر نهائيا
في دخول المطبخ الا اذا كان عندنا عزومه ..
الموهيم بعدها التهم الطعام ثم التهم ثم التهم حتى مايبقى شي ع السفره
ون المعده قد امتلئت بالاطعمه والاشربه ثم اذهب الى النوم الى ان يحين وقت صلاة
العشاء اروح للمسجد ان كان عندي طاقه اما اذا ماكان عندي طاقه اصلي في البيت ويخب علي ..
ثم اكل لي اي شي خفيف اما من الثلاجه او اطلب من البقاله من بلال , ثم اقعد ع الاب او يجون خواتي او نزور الاقارب
ثم ارجع واسولف مع اختي ونتسحر اي شي ثم نسولف ثم نصلي وننخمد للنوم ..
برنامجي حاليا .. هو في المستشفى .. لكن ماراح اجاوب عليه الا اخر شي ..

ماهي اكلتك ومشروبك المفضل في رمضان ؟
سمبوسه جبن مقليه مع عصير فيمتو ..

متى اول مره صمت فيها واذا عندك مواقف مع الصيام اذكرها ؟
اول مره صمت فيها كان عمري مدري كم .. بس اهم شي كنت اصغر من ست سنوات ..
موقف لي مع الصيام .. امممممممممممممم
انا لما كنت صغيره كنت اصوم من جد ولا اكل ولا اشرب لكن قبل ياذن بخمس دقايق
لما يكونون الاهل منشغلين بالتحضير للفطور , اروح اشرب مويا .. كذا بس عناد في نفسي < وش كنت استفيد مدري ..

موقف لاينسى حصل لك بـ رمضان..؟

اختي كانت جايه من مكه وكنا مرتبشين ومن الظهر بالمطبخ ووناسه وحركتات ..
الموهيم ولما قرب المغرب توصل اختي واحنا جهزنا السفره والاشياءات < وكان شكلها مره مغري للعين ..
المووهيم وتوصل اختي ونجلس ننتظر يأذن وننتظر وننتظر وما اذن , وكل واحد يناظر ساعته
واخوي يسأل يقول متى يأذن ونقول الساعه كذا بس ما اذن ..
الموهيم مابقى الا نتصل على اي احد ونسأله متى ياذن
ولما اقام الصلاه درينا انه اذن وافطرنا مع الاقامه ..وبس

كيف نظامكم واجوائكم في رمضان ونظامكم بالفطور والعشاء والسحور.؟
نظامنا واجوائنا في رمضان ذكرتها مسبقا في برنامجي ..
اما نظامنا بالفطور والعشاء والسحور ..
فطورنا ينحط كله مره وحده وناكل مره وحده ونقوم وماعاد فيه سفره ثانيه ..
ولا فيه عشا والسحور يكون ساندوتش او اي شي او حتى عصير وبسسسسس ..

هل ترى اختلاف بـ رمضان في السنين الماضيه عن السنوات الاخيره واذا نعم وش الاشياء الي افتقدتها.؟
مدري !!

هل تفضل الصلاه في المسجد القريب من بيتكم او تميل للتنويع ومن القاريء الذي
تحرص على الصلاه خلفه في رمضان؟

اصلي خلف امام مسجدنا ولا يهمني من هو القارئ بقدر مايهمني ان اصلي في المسجد ..
رغم ! ..
ان صلاة المرأه في بيتها افضل من المسجد ولكن احرص على المسجد حتى اصلي صلاة التراويح كامله ولا اتكاسل ..

أجمل رمضان عشته حتى الآن , متى ولماذا ؟

اجمل رمضان عشته هو رمضان هذا لانه فعلا من اجمل الرمضانات الي عشتها
رغم اني صمته في المستشفى , الا انه كان رائعا جدا , كان به من العبره والاشياء
المحزنه والتي تجعل القلب يبكي الما , وتجعلكـ تحمد الله على كل دقيقه او على كل
جزء من الثانيه انكـ تستطيع التنفس بشكل طبيعي وتستطيع التحرك والاكل والرؤيه
والسماع وكل شيء , فان نعم الله علينا لاتعد ولا تحصى , فـ اللهم لكـ الحمد كما ينبغي لجلال وجهكـ وعظيم سلطانكـ ,
ولأني ايضا تعرفت على اغلى صديقتين في المستشفى واحده مرافقه مع والدتها
والاخرى مع زوجها الله يحفظهم يارب ويشفي جميع مرضى المسلمين .. اللهم امين ..

رسالة في هذا الشهر المبارك .. لمن تبعث بها وماذا تقول فيها .؟

الى عسكريين مستشفى الحرس الوطني وأقول فيها اتقوا الله في هذا الشهر الفضيل وصدق من قال حاميها حراميها , فبدل ان نلتجأ لهم عندما نصبح في مشكله اصبحنا نخاف منهم ونلتجا لغيرهم ..

نبي صوره تلتقطها لنا من يومك الرمضاني المجال مفتوح لك..؟
صورة فطورنا بالحديقه اللي جنب جناح ماما

اليوميات الرمضانية

سأبدأ في وصف يومي البسيط المتواضع ..
صحيت الساعه 10:45 على صوت النيرس تقول السلام عليكم صباح الخير وتفتح بالستاير ..
وتقول يلا في يجي دكتور .. اقوم بسرعة البرق ألمً الكرسي والبس عباتي واجلس واوقف زي الخبله ..
ويدخل الفريق الدوب ومعهم الدكتور ( رسل ) اليهودي والعريفي واسعد السوداني
بس لونه ابيض تقل سوري واحمد ابو نظارات و الباقين ماعرفهم , الموهيم انا اكره
الدكتور العريفي واسعد ما ارتاح له ..ماشفت الا العريفي يقول لي اطلعي برا < تخيلوا وجهي ..
وانا مرتزه بوجههم واخر شي اطلعي برا ..

جا الدوب أسعد لف علي وقال من غير مطرود ويروح يسكر الستاره
وهو يقول من غير مطرود يغمز بعينه .. انا تخرعت من الخوف وكنت معصبه ودي امسك الشبشب وعلى راس العريفي ثم على راس السوادني الاشقر ..
الموهيم اني طلعت وحلفت اني كل يوم بصحى بذا الوقت وانحاش من الغرفه ..
وطلعت ورحت للسيب وجلست فيه واغفى شوي ولا طلعت لي ام كايد < هاذي المرافقه الي جنبي لبى قلبها
الموهيم قالت يلا تعالي ارجعي واروح ويطير كل ابو النوووم .. واجلس اقرأ قران ..
الى يأذن وصليت الظهر وغديت امي .. واخذت علاجها وجبت لها حق التيمم
وتيممت ووجهتها للقبلة وصلت الظهر والعصر ( جمع ) , وبعدها غفيت شوي ولا اخوي جاي
وصحيت وتوضيت وصليت العصر , ثم اخذت القران وطلعت للحديقه الي مقابل جناحنا , وقريت قران ..
ثم رجعت للغرفه وجا اخوي الثاني وولد اختي واختي واختي شلهوبيه معهم وجايبين معهم فطور وحركتات ..
واخذت لي شرشف ورحت فرشته في الحديقه وحطينا الفطور وجبت كرسي متحرك واخذت امي فيه ورحنا للحديقه وجلسنا نفطر ووناااااصه مررررررره .. وبعدها اخذت امي للغرفه لانها تتعب من الجلوس
وتيممت وصلت المغرب والعشاء جمع ثم رجعناها للفراش وجات النيرس تشوف السكر وبعدها عطتها انسولين وعطتها علاجاتها وعطتها ابرة المضاد الحيوي ياااكبرها
تقل قوطي بيبسي ..

بعدها طلعت اتمشى مع ولد اختي ومعنا اختي الدوبيه ولما اذن راح يصلي بمسجد المستشفى وانا رحت للغرفه اصلي وبعدها جووا كل خواتي
وكل زوجات اخواني وازعاج وحووسه وخالاتي وخوالي وزوجات خوالي
وكل يوم ذي الحووووسه في الغرفه .. انا طبعا مباشره انحاااش ..
جتني ام الضيقه واستغليت الفرصه دام ولد اختي موجود واطلع معه مع اختي
ونتمشى بالسياره وناكل ايسكريم من باسكن وندوج بالشوارع وندوج وندوج وندوج ..
ثم نذهب الى ماكـ واطلب لي بيج ماكـ تشكن وكانت الساعه وقتها تشير الى الساعه 12 وشويتين ..

ووصلنا المستشفى الساعه وحده وربع تقريبا , وبالاساس الزياره تخلص الساعه 12 تمام
ولما رحت لبوابة 6 اثاريهم مسكرينها , واروح لبوابة خمسه ( البوابه الملكيه )
وعيوا يدخلون السياره فاروح ادخل مشي ولما اوصل للبوابه يقولي ممنوع روحي من الطوارئ
قلت له انا كل يوم اتأخر واجي وادخل وش معنى اليوم ممنوع , قالي هاذي التعليمات
قلت : من متى < وانا معصصصبه , قال من اربع ايام ..
وانا والله العظيم اني داخله من بوابة خمسه وبوقت متأخر ومافيه احد قالي شي ودخلت ..
قلت له طيب انا شخص قالي لو شخصين ماتدخلين ..
ادق ع ولد اختي واقلت له لاتروح واطلع له مشي ولما وصلت السياره , الاقي اخوي يقولي مادخلوكـ قلت ايه قال امشي ادخلكـ < مسوي فززعه ..
ولما رحنا جا اخوي قال : لو سمحت هاذي مرافق ولازم تدخل
قال : والله ممنوع
قال اخوي : طيب دخلها مني مناكـ < بالله هذا اسلوب بيدخلني فيه العسكري ..
الموهيم انه رفض وقال روحوا من بوابة الطوارئ
عاد بوابة الطوارئ بعيده مرره عن الجناح الي فيه امي .. يعني بتتكسر رجولي لين اوصل لامي ..

الموهيم اخوي مشى معي الى بوابة الطوارئ ودخلنا ومرينا من العسكري الاول وقلت له مرافق ولما وصلنا للثاني
كان عنده واحد يتهاوش معه ويقوله ليه تدخل المرافقين بدون بطاقه وانا لا ,, وبالاساس انا ماعندي بطاقة مرافق ..

جا اخوي يقول للعسكري لو سمحت دخلها هاذي مرافق ومامعها بطاقه وكان اسلوب اخوي محترم فدخلني ..
ودخلت مسسسرعه واوصل عند امي وتوني داخله عند امي الا ينطق الباب ولا تدخل النيرس والعسكري وراها ويقول فيه هنا زائره دخلت طلعيها بسرعه ..
واطلع له واقول له اقسم بالله اني مرافق بس مامعي بطاقه ..
وتجي مديرة النيرسات السعوديه مريم لبى قلبها وادخل الغرفه وتدخل هي واوريها وجهي ..
واقولها تخيلي يقول عني زائرة ويبيني اطلع ,, قالت ماعليكـ خلاص .. انا بكلمه وبشرح له ..

ولا داخلين بدور واروى ويضحكون عاد هذولا اغلى ناس تعرفت عليهم بالمستشفى
واجي اقولهم السالفه ويقولون انه قبل شوي عسكري ملاحقهم وانحاشوا منه ..
وبعدها مريت عند مريم واخذت بطاقة مرافق ومدتها سبع ايام

المووهيم ونروح ناخذ فصفص وشاهي ونطلع للبوابه الملكيه فيها حديقه صغنونه ماعليها ..
وناخذ شرشف ونطلع وانا اناظر العسكري وودي اكفخه ..
ونطلع نتمشى نروح ونرجع من قدام البوابه الملكيه الثانيه الي عليها حواجز وتمر سيارات كوووشخه مره ..
وبعد شوي وقسم قسمات يجينا عسكري من ورانا ويقول لو سمحتوا ممنوع تتمشون هنا ..
ماردينا عليه وكملنا مشي وقسم مدري الا عسكري قدامنا قال جانا اتصال في ثلاثه يمشون ومشبووه فيهم ..

قلنا ليه ممنوع وقسم كل الي معنا محفظه وجوال
قال : البلى في الجوال ..
قلت انا : يعني وش بيصير اذا ظلينا هنا يعني بتطخ براسي المسدس
قال معقوله ماتعرفين ليه قلت ..لا.. وانا عارفه اساسا .. قال : هذولا ال سعود ..
قلت : تيب خلاص ونروح ندخل < الصدق جوابي كان غير كذا بس للاحتياطات الامنيه ..
وبعدها جلسنا في غرفتنا وجلسنا ع التلفزيون على مافي شي محدد بس نقلب بهالقنوات ..
وعلى فصفص وبطاطس وشاي وبعد ماخلصنا تقليب بهالقنوات<<من كثرهم مايتعدون عدد اصابع اليد الوحده
كل وحده لعند امها والي عند زوجها تروح له وجابوا سحور المستشفى ..
الله يديم النعمه مره وحده جابوا اكل زين رغم اني كملت الشهر في المستشفى
وجلست العب في الجوال الى ان اذن وصليت وانخمدت ..
وخلص يومي ..
ادري انه مافيه شي يستاهل تقرونه بس وش اسوي ..
وشوكرا لانكم قريتوا يومي ويلا وخرووا ..

وشوكرا مره لهنووو وعسيروو

كل الشكر

لـلمميزة **][ "Meme" "♥][ *

وانتظرونا غداَ

مع مخضرم المجلس العام قرقاص

أرق التحايا وأطيبها من
مشرفي واستشاري

المجلس العام