اهلاً وسهلاً فيك أحمد نورت المجلس ..

ضيف رائع .. وله ثقله .. ومن اروع المشرفين اللي تعاملت معهم والتقيت بهم ع الطبيعه

اكرر ترحيبي فيك .. واستهل اسئلتي لك ..

1/ ماهو مدى رضى أحمد عن نفسه !!

2/ يمر الانسان ببعض الضروف التي قد تقف امامه كعقبه في طريقه ! في مثل هذه المواقف كيف يكون احمد اقوى من الظروف ؟ بمعنى ماهي الدوافع التي تجعلك تتحدى المصاعب !!

3/ بلا شك ان مرحلة الدراسه الجامعيه من افضل المراحل ! تذكر لنا موقف مضحك وآخر صعب !

4/ شخصيه معروفه تتقبلها نفسك وتجد انك تستمع له وتتطبق مايقول ! سواء شيخ او دكتور او حتى لاعب .. !

5/ الزواج استقرار .. ألم تفكر بعد بالدخول لقفص الزوجيه !

6/ منتدى العالميه منتدى الاختلاف .. به عشاق كل الفرق .. كيف تستطيعون السيطره على المهاترات بين الاعضاء في ظل ارتفاع عدد الزوار والرواد !!؟

7/ مرحله طويله قضيتها بالاشراف , باختصار ماذا تعلمت !؟

8/ صفه سلبيه تتمنى ان يبتعد عنها الكلاسيكي ؟ وان ماحبيت تذكرها علناً الخاص موجود


في الختام .. اعتذر عن الاسهاب بالاسئله .. واكرر ترحيبي بك ..
وحياك الله .. دمت بخير

.

إقتباس الرسالة الأصلية كتبت بواسطة الهنوووف - هلا والله بسفير الرياضة العالمية دائما الاشخاص الي التقي بهم ببداية دخولي لاي مكان يظلون بذاكرتي و هلالي موت من الاشخاص الي حصلت بينا مواقف وذكريات ببداية دخولي للشبكة فمانسيته (بداياتي تفشل استر ماواجهت :$) وللحين اذا ماحصلت مشرف بالمجلس اروح ازعجه ومايقصر والله يحرجك بطيبته ماشاء الله من الاشخاص الي يجبرونك على احترامهم يتميزبـ هدوء واخلاق وطيبه قلب نحسده عليها حتى بالاختلافات تجده عقلاني جدا و اتشرف اني اعتبره اخ لي عاد انا لو تخلوني اتكلم عن الضيف ماخلصت ماشاء الله دائما الضيوف لهم مكانه بقلبي ومهما تكلمت ماراح اوفيهم حقهم

هلا بـ فراشة المجلس
الله يخليك ويبارك فيك .. شهادة اعتز فيها واتمنى اكون استحق هالكلام الطيّب .. وبالنسبة للعمل كلنا يا هنوف في خدمة الشبكة واعضائها و زوارها .. وما سويت الا الواجب علي .. بالنسبة للبدايات باللهي من اللي بدا كويس هنا .. اسكتي بس لا ينكب العشا .. شكراً لك مرة ثانية .. والكلام الطيب اللي قلتيه بحقي تراه بعض مما عندك .. نروح للأسئلة :

إقتباس * لكل منا هوايه او موهبه يتميز بها ولملامحها وضوح بشخصيتنا ماذا عن هلالي موت؟

المواهب والهوايات كثيرة بس مدفونة او لم تجد الاهتمام
بصراحة مافي شي معين محدد شخصيتي .. احب اجرب و أحاول طبعا بحدود اكيد .. ولازم الواحد يعيش الحياة ويجرب اشياء جديدة ممكن يستفيد منها وهو ما يدري عنها اصلاً .. بشكل عام اغلب مواهبي رياضيّة .. فيه موهبة ثانية اكتشفتها متأخر بعد ما توظفت وهي الصياغة .. يعني اللي يبي خطاب والا شي يعلمني بس .. عندي موهبة ادبية بس للاسف مقصر لاني احب اعطيها وقت كافي علشان ابرزها بشكل جيد واستفيد منها استفادة مثلى بس انتظر وقت مناسب وان شاء الله يكون قريب .. نفس الشي بالنسبة للتصوير بادي اطقطق فيها و شويات ونصير راعين كاميرات
الهوايات كثيرة ابرزها القراءة والاطلاع - الرياضة - السفر

إقتباس * قصيده او بيت شعر تشعر باان كاتبه يحكي عنك ..؟

ابيات كثيرة قريتها وحسيتها تعنيني .. باحط كم بيت :

انا أكثر انسان تعلم من كثر ما أخطأ وصاب .. أنا آخـر لسان يتكلم في زمان الثرثرة
للشاعر حامد زيـد

لا تشتكي للناس جرحاً أنتَ صاحبهُ .. لا يؤلم الجرح إلا من به ألـمُ
* ما اعرف القائل اللي عنده خبر يفيدنا

فلتأتني الدنيا على ما تشتهي .. أنا لستُ ممن يستبيهِ المنظرُ
للـ الدكتور عبدالرحمن العشماوي

لاني بـ ندمان على كــل ما فات .. أخـذت من حلو الزمان و رديّـة
هذي حياتي عشتها كيف ما جات .. أخـذ من أيامي و أردّ العطيّة
للامير خالد الفيصل

إقتباس * من خلال عبورنا في هذه الحياة لابد من محطات او مواقف (تعليميه - عاطفية -اجتماعيه ) توقفنا وتغير الكثير بداخلنا نحو الافضل وقد تكون نحو الاسوأ ..؟

وين السؤال
المواقف كثيرة والحمدلله ما فيه شي غيرني للأسوأ .. كلها تجارب ان شاء الله انها فادتني وعلمتني اشياء كثيرة منها الصبر وعدم الملل والواحد لازم يكون طويل بال وما يستعجل النتائج وان اي تعثر هو مجرد مطبات بسيطة بالعمل و التصميم و الارادة نقدر نتجاوزها .. دايم العثرات اعتبرها دافع للتغيير نحو الافضل .. هذا المبدأ اللي معوّد نفسي عليه وان شاء الله ما راح يتغيّر لانه مريحني كثير

إقتباس *بما ان الجانب الرياضي بحياتنا يشكل هوايه او ميول ونكون صريحين اكثر جانب مانستفيد منه بكثر مانعطيه من وقفتنا وبما انك احد المشرفين على قسم رياضي ماتحس ان هالشي اخذ منك الكثير رغم قله الفائده التي تكتسبها من القسم طبعا غير الصداقات يعني ماتمنيت انك كنت مشرف بقسم غير رياضي حتى تستفيد منه .؟

ممكن اتفق معك ان الموضوع مجرد تسلية بس هالشي ولله الحمد ماهو كل حياتي .. اوكي يومي لابد يحتوي مباراة والا ثنتين بس هالشي ما يعني اني مهمل الاشياء الثانية .. زي ما قلت انا انسان مطلع بطبعي علشان كذا تشوفوني دايم عندكم بالمجلس .. على فكرة احس لو كنت مشرف بالمجلس مثلاً الفايدة اللي اكسبها مو مثل لما اكون مشرف على قسم آخر او عضو عادي بحكم ان المشاغل تبي تكثر وتمنعني اكون مطلع زي الاعضاء الاخرين .. والشي الابرز بعد شخصياً يهمني اشوف الاعضاء اللي يزورون القسم المسئول عنه مبسوطين و راضين عن الخدمة المقدمة لهم و الجو المريح اللي يلقونه يعني على قولتهم ركبت المركب لازم اوّصله للآخر .. مرتاح بالعالمية وهناك احس اني اقدر اعطي اكثر من الاشراف على مكان ثاني وهذي زبدة الجواب

إقتباس * أشخاص لهم وقع في حياتك ولن تمحاهم ذاكرتك حتى لو ابتعدوا سوا بحياتك العامه او مسيرتك الدراسيه مع ذكر السبب ؟

الوالدين الله يحفظهم ويطوّل باعمارهم .. جميع مدرسيني في المرحلة الثانوية كان لهم اثر كبير صراحة في تكوين شخصيتي .. صديقي احمد (مغرور)
وفيه اشخاص كثير مروا بحياتي وكان لهم اثر كبير ومواقف كثيرة في حياتي العامة ومستحيل انساهم

إقتباس *لو منحت جواز سفر واقامة دائمه لك ولعائلتك الحاليه او المستقبله - ان شاء الله- في احد الدول ماذا ستختار ولماذا .؟

مافي بلد معين والله يا هنوف .. بس اقامة دائمة ؟!
ما راح نلقى أحسن من هالبلد بكل مافيه
ما يمنع اقول اني حبيت هدوء تونس كثير مع ان البلد عايش على طابع اوروبي بحت .

إقتباس سؤال خفيف فوق البيعه ماهي كنيتك واحب الاسماء لك المذكره والمؤنثة ...؟

مافيه كنية معينة .. ابو نايف .. ابو حميد .. حمادة .. بس اكثر اسم ناداني فيه احد وعجبني حتحوت و كلن على مزاجه .. احب الاسماء بالنسبة للمذكرة مافيه شي معيّن بجد .. نواف يمكن .. المؤنثة يعجبني اسم لمار كثير .

إقتباس اتمنى مااكون طولت عليك والي مايعجبك احذفه سعيدين بـ هالاستضافه والشكر لك على ان منحتنا هذه الموافقه

انا اسعد هنوف .. شكراً لك على هالاسئلة خذت مني وقت شوي بس مو مشكلة نردها لك ..

.

إقتباس الرسالة الأصلية كتبت بواسطة ام متعب التميمي استضافه جميله لمشرف مميز رغم انه من العالميه الا نشوفه عندنا بكثره ياهو يحتك ياهو ناوي ياخذ مكان بو مقبل^^

هلا ام متعب حياك الله
ايه جاي احتك بالاعضاء الكويسين اللي هنا يا قافطتني .. خوش استقبال ماشاء الله عليك ذربه الله لا يسلطك على مسلم .. و تلومين الشباب يوم يسافرون و يتزوجون من برى

إقتباس س: نكته كل ماسمعتها ضحت ؟

النكت لا تكررت سمجت .. مافيه بصراحة

إقتباس س:من من اعضاء المجلس يجذبك بمواضيعه ويجبرك تدخل وترد عليه؟

كثير ومابي اذكر والله وانسى احد .. ميزة المجلس بتنوع المواضيع اللي فيه .. يعني ماشاء الله جامع كل شي .. حاولت اذكر احد معين طلع ببالي اعضاء كثار .. يعني انا من النوع اللي يقرا كثير واذا حسيت عندي إضافة أرد .. بس .

إقتباس س: من اكبر عضو بالشبكه وكم عمره؟<<<تحسبك الاحوال المدنيه^^

مدري بس اتوقع واحد من مشرفينكم بلكن ماجد بلكن عادل بلكن سهل بلكن المنقطع القاضي الله يرجعه بالسلامة .. بلكن لا تنكبينا

إقتباس س:عند قرأتك لتوقيع هلالي من ارض اليمن وش شعورك ماودك نتقاط ونقص تذكره لامه ونسويله سربرايز؟؟

محد قالك انك احباط ؟
يستاهل طارق .. بس زي ما قلت في ردي عليه ان شاء الله يخلص المهمة اللي راح علشانها ويرجع محقق هدفه اللي راح وتغرّب علشانه ويشوفها ويشبع منها بعد .. عموما انتي كريمة وهو يستاهل ما يحتاج قطه ارسليله حق التذكرة كامل

إقتباس س:هلالي موت<<سبب هالتسميه ومن اقترح عليك هالاسم؟

محد .. انا حاولت اسجل بيوزر هلالي الجوف بس كان موجود فجا ببالي هالاسم وسجلت فيه .
شكراً ام متعب حياك

****

إقتباس الرسالة الأصلية كتبت بواسطة سيناتور هلالي ماشاء الله استضافة موفقه

هلا اخوي عبدالعزيز .. من الاقلام المميزة في الفترة الاخيرة اتمنالك التوفيق

إقتباس - ماهي مشكلة ريال مدريد بالضبط..؟!! << والله تراني واصل حدي كل الي أشجعهم برى طلعوا من دوري الأب\طال ريال مدريد وتشيلسي..!!

راجع جوابي على ماجد مقبل .. وترى الوضع ايزي الكورة يبيلها طولة بال

إقتباس - تتوقع كأس العالم هالسنة بيكون قوي وإلا عادي..؟ ومن تتوقع يحقق اللقب..؟!!

لا ما اتوقع يكون قوي .. البطولة بين اسبانيا - الارجنتين - انجلترا - البرازيل .. اتوقع اسبانيا تكسبه .

إقتباس - وقتك وين تقضيه في غير الدوام والشبكة..؟!!

في النادي غالباً واحياناً في الاستراحة

إقتباس - وش رايك في المجلس العام بصراحة ..؟!! لاتجامل وتقول هذولا استضافوني << وش عنده مسويلي فيها..؟

والله ما اجامل وتراني اعتبر نفسي واحداً منكم وفيكم .. المجلس رائع وغني باعضائه ومشرفينه والمواد المقدمه فيه والجو الاخوي الرائع اللي يميز اعضائه الله يديم المحبة ان شاء الله .. مستحيل تدخل وتطلع بدون ما تستفيد وهذا المهم

إقتباس - كاتبك المفضل سواء في الصحف أو المؤلفين ..من هو..؟

يعجبني كثير الكاتب في صحيفة الشرق الاوسط انيس منصور

إقتباس - أخيرا : بطني يوجعني وأنا أخوك وش الدواء المناسب..؟!!<< تحس إني من زمان ماتهاوشت ههههه

مرّة وحلتيته
شكراً عبدالعزيز .. سعيد بتواجدك

ضيف مميز ومبدع وغني عن التعريف ليس لدي سؤال لكني أحببت أن اسجل تواجدي كمتابع للموضوع الذي يحمل اسم مشرف غالي علينا

.

إقتباس الرسالة الأصلية كتبت بواسطة عقـل الهلال ماشاء الله حي الله العالميين << ______ ياخي اللي فوق ماخلوا لنا اسئلة كل شيء اسألوه ! اهبواا

هلا باهل حايل
الله يحيك ويبقيك .. يا رجال كيّف المزاج بفنجال قهوة يا بعد حيي وتجي الاسئلة

إقتباس فنجال القهوة وش أحسن وقت تشربه ؟؟

الصباح علشان تصحصح .. عموما انا ممنوع من القهوة و الشاي .. بس لابد من فنجالين ثلاثه الصباح علشان الواحد يركز بالعمل

إقتباس اذا صحيت الصبح وش أول شيء تسويه ؟؟

اخذلي دش & افطر & البس & اداوم

إقتباس بعد الطريق السريع حائل - الجوف ماتلاحظ ان اهل حايل دقوكم دق ؟

والله ياخوك حنا اللي داقينكم خل عنك بس .. مغير سرداحي مرداحي .. وين رايح لفلان لحايل .. وين رايح يا علنتان للقصيم عن طريق حايل .. والله يجزي اللي سوو هالخط كل خير وربي فك ازمة .. الرياض الحين صارت قريبة واغلب العالم تفضل المشي خط منها الواحد يتمشى ومنها يسيّر على الطعوس هناك وياخذله فنجال بالهواء الطلق

إقتباس وش سالفتكم يالصيدلانيين تنقطون علينا الحبوب تنقيط وتعدونهن عد !؟ كأنكم تعطوننا من حسابكم

هذي تعليمات من فوق وانا اخوك ما بيدنا شي .. عموما لا تخاف انا واحد كريم بهالامور هههههههههههههه ياربي لا تعاقبنا .. لا الجد فيه كثير ناس ياخذون فوق حاجتهم وانا اخوك ويمكن فيه غيره يحتاج .. عموما يا علك ما تعتزاهن قل آمين انت وكل من يقرا

إقتباس اذا راسك مصدع وطفشت وانت تاكل حبوب وش تسوي ؟؟

بالنسبة لي اخر شي اسويه اكل حبوب والله .. لان الصداع اللي يجيني غالباً هبوط ظغط وهنا اكل موالح .. او قل نوم فأنام .. أو جوع فأكل .. ان ما نفع لابد من حبتين بنادول اكسترا

إقتباس منتدى المجلس العام وش ناقصه ؟؟ غير طلتي

رديت على هالسؤال .. وما ينقصه الا رجعة اعضاء كان لهم بصمة في المجلس ومستحيل تنساهم .. ولو ان الباقين فيهم الخير والبركة مافيه اي شك بهالشي .. بس كل ما كثروا المتميزين واللي لهم ثقل كل ما كان الجو افضل

إقتباس تبيني اسأل زيادة والا اعظ شحمه واسكت ؟

تخسى الشحمة .. ابد انا تحت امركم يا حقين المجلس فصفصوني
حياك الله يا بعدي .. سعيد باسئلتك

إقتباس الرسالة الأصلية كتبت بواسطة هلالي وسيد زماني هـلآ هـلآ بـهـلآلـي مـوت منـور ,

هلا ابو زماني .. تسلم النور نورك يا بعدي

إقتباس - رأيـك بـ " مـدريـد " .. هـل إنـت مـع إقـآلـة بـيـلـي ولآ مـآخـذ فـرصـتـه .

بيليغريني يحتاج وقت .. الرجال جا للفريق في وقت الكل يطالب ببطولات و إعادة هيبة الملكي .. وبالصفقات اللي سواها بيريز الظغط صار دبل .. مشكلة الريال احس الجو العام مزعج ما يشجع على العمل .. صحافة قوية تهز اي رئيس وتأثر على قرارات النادي .. شخصياً مع بقائه بس بشرط يتوفر له جو هادئ علشان يعمل كويس .. فياريال فريق متواضع تركوه يعمل والنتائج كانت واضحة .. منافسة على الدوري .. تأهل لدوري الابطال .. وصول للدور النصف نهائي وخروج مشرف وبركلة جزاء ضائعة .. نتائج تدل ان المدرب متمكن

إقتباس رأيـك بـ " ميـسـي " , وهـل تـتـوقـع بـدون تـشـآفـي وإنـيـسـتـآ رآح يـبـرز زي كـذآ ؟

ياخي هالولد ظاهرة .. بس يبقى لـ تشافي دور كبير في تألقه .. لكن اللي اتوقعه ممكن لو غابوا عنه مباراة مباراتين ما يبان هالتأثير .. لكن لو ينفقد زافي شهرين ثلاثه يمكن ينخفض مستواه .. بس صدقني هالعينات صدقني تبي تستمر تشخمط .. ولد زي هذا لازم الكل يستمتع فيه الكل بدون استثناء وباختلاف الميول لان نوعية هاللاعبين ما تتكرر الا مرة كل 50 سنة

إقتباس بـرأيـك كـيـف يـمـكـنـنـآ الحـد مـن المـوآضـيـع التـآفـهـه مـع إحـتـرآمـي لـبـعـض كـتـآبـهـآ بـ " مـنـتـدى الجـمـهـور " ؟

بكل امانة الاخوان المشرفين و الاستشاريين هناك ماهم مقصرين ويعملون بكل جهد للحد من هالظاهرة اللي صعب تسيطر عليها لكثرة العدد .. و دام فيه عمل مع الوقت بإذن الله راح تختفي الظواهر السلبيّة .. كلمة اقولها بعد ما شفت حجم الجهود المبذولة لارضاء المشجع الهلالي .. ارقدوا و آمنوا ترى المشرفين المتواجدين من النخبة .. ومتابعة مباشرة من إدارة الموقع والاستاذ طالب الموج

إقتباس قـسـم العـآلـميـه قـسـم رآئـع , ويـسـتـقـطب أعـضـآء كثيير غـيـر هـلآليـن .. مـآهـو سـر التـمـيـز ؟

الحمدلله ان الاصداء طيّبة وهذا اللي يهمنا في المقام الأول .. اتوقع ما فيه نجاح بدون عمل وتضحيات .. والحمدلله فيه ثلان لجان يقومون بمهام خرافية لتوفير جو مناسب للاعضاء و الزوار .. وبكل تأكيد تفهم الاعضاء وتعاونهم معنا هو احد اسرار النجاح .. صحيح تجي بعض الاوقات مشاكل لكن نحلها في وقتها .. وهي فرصة اشكر من خلالها زملائي المشرفين و اخواني الاستشاريين و اعضاء ورشة العمل الاعلامية العالميّة وكذلك لجنة الفيديو و الصوتيات بقيادة مهند .. العمل مع شباب شرواهم فخر بصراحة .. يريحون كثير .. واهم شي رضاكم وتعاونكم اولاً واخيرا

إقتباس الرسالة الأصلية كتبت بواسطة كغّيــــم يالله حيه نورت والله يعينك على اسئلة الأعضاء انا ماعندي الا سؤال واحد (ليه عطيتوني انذار برابطة الريال اتوقع عشان الفريق كان الريال لو فريق ثاني كان مشيتوها <<ماتقصد برشلونه ترى ماعاد ادخل الرابطه لأني زعلانه بالتوفيق للبرشا

الله يحييك اختي كغيم
مع انه مو مكانه مثل هالاسئلة وكان ودي تكتبين ملاحظة او تراسلين احد المشرفين وان شاء الله يفيدونك لكن بجاوبك إبراءاً للذمة .. انتي كاتبه رد استفزازي برابطة الريال وانتي تشجعين برشلونة كما يظهر لي فطبيعي تاخذين انذار .. من اهم القوانين عندنا الاستفزاز ممنوع .. واتمنى تراجعينها وتشرفينا بأي وقت

.

إقتباس الرسالة الأصلية كتبت بواسطة ḾŎĤǍṀẠḊ السلام عليكم ورحمه الله وبركاته حيا الله حقون العالميه << هالكلمه جايه من الطايف وبالتحديد من ولد عمي والله استضافه منتازه جدا لاني بصراحه احب اقول لكل المشرفين والاستشارين في العالميه الله يعطيكم الف عااافيه بصراحه شغل جبااااار من ناحيه التغطيات بصراحه

وعليكم السلام و رحمه الله وبركاته
هلا اخوي .. شكسبير اعتقد .. الله يحييك ويبقيك ويسلمك ويبارك فيك
ابد ما سوينا الا واجبنا تجاهكم وان شاء الله اللي مُقدم يكون معجبكم اهم شي

إقتباس وشـــ اول شي تسويه اذا قمت من النوووم .؟!!

راجع اجابة السؤال الاول على الاخ عقل

إقتباس وش الي عاجبكـ بشبكه الزعيم .؟!!

كل شي .. الجو والاعضاء و مستوى الطرح المقدم

إقتباس حسب معلوماتي المتواضعه انـكــ مانشستراوي وش شعوركــ هالموسم وتشلسي فايز عليكم رايح جاي اضيف لها هل تشلسي حسم الدوري خصوصا بعد تعادلكم اليوم .؟!!

اي وحدة ؟ المباراة اللي حشرناكم فيها بملعبكم .. والا هدف التسلل والبلنتيات الغير محتسبة واللي بسببها نزلوا الحكم درجة اولى
تشلسي بعد فوزه على بولتون راح يقرب بنسبة 70% (اكتب هالرد وهم فايزين على بولتون 1-0) .. عموماً السير ما يبي يفضح الدوري عند العربان صعبة اربع مرات ورى بعض بطل دوري شينة بحق البريمر .. بس سلملي على لمسة يد جون تيري .. عموما ان اخذتوه فـ مبروك تستاهلون .. مانشستر يحتاج هزة علشان يصحح وضعه الموسم الجاي

إقتباس بصراحه وشــ ينقص تشلسي عن تحقيق دوري الابطال وليشــ هل بالفعل الحظ والتحكيم هو السبب فقط .؟!!

الابطال يبيلها خبرة .. هالسنة خانته الظروف .. اصابات اشلي وايسيان بالذات + قابلوا فريق متحفز وفي جاهزية عالية ويبي يعدي هالدور وغير كذا مدرب كبير مثل مورينهو .. وبرضو العوامل التحكيمية وحالت بينهم

إقتباس المجلســ العام حاليا هل انتـــ متابع له .؟!! واذا كنت متابع له وش يفرق عن قبل .؟!!

متابع جيّد .. اللي فرق عدد الاعضاء صار اكثر

إقتباس من الافضل ميسي او كرستيانوا كلاعب خل عنكـ الافرقه الي هم فيها .؟!!

تستهبل .. ميسي وانا مغمض !

إقتباس اذا ضاق صدركـ وش تسويـــ .؟!!

اقرا كتاب .. او اطلع للشباب .. وعادةً اطلع اتمشى بالسيارة لحالي لما يطيح اللي براسي .. اسوي اي شي يمنعني من التفكير .. على قولتهم باغت الحزن ولا تخليه يباغتك .. واهم شي أكثر من الذكر و الاستغفار يزيل الهم ويريح القلب بعد مشيئة الله

إقتباس وشسمهـ هذا الي طلع معي << ماقصرت دخلت ابي اشكر بسـ عاد طلعت هالاسئله تحملنا

الله يخليك ويسلمك .. شكراً لمرورك اخوي محمد
ابد تحت امرك

.

إقتباس الرسالة الأصلية كتبت بواسطة رائدة الزعيم كل الشكر للقائمين على إستضافة شخصية رائعة كالأخ أحمد إنسان راقي ومحاور ممتاز ومشرف متفهم للحق الأستاذ أحمد يجعلك تحترم قلمة ورقي فكرة سعيدين بالإستفادة من حروفة

اهلاً رائدة الحرف
الله يخليك .. إشادة أتمنى اني استحقها .. و أولاً و أخيراً هذا واجبنا تجاه الاعضاء
انا اسعد بكل تأكيد

إقتباس بالتأكيد أخذ منك الإشراف الكثير وأعطاك الكثير ودنا نعرف بعض ما أعطاك وبعض ما أخذ منك؟؟

سبق وجاوبت على هالسؤال بس ناي هنا والا بالفورم .. الاشراف اخذ مني وقت وجهد .. اعطاني اشياء كثيرة يمكن اهمها طولة البال والقدرة على التصرف مع بعض الامور في المواقف الحرجة .. يعني تقدرين تقولين خبرة

إقتباس بما أنك زميل الوالد بالمهنه مارأيك بتعامل الناس مع الصيادلة أقصد أن الأكثرية يصرف الأدوية بدون وصفة طبيه ويتعامل مع الصيدلي مثل مايتعامل مع بائع السوبر ماركت؟

شوفي اكون معك صريح يجي ذب كثير على الصيادلة .. زي المتخلف ابو غامد .. لكن شخصياً لا ألتفت لمثل هالخرافات لأني داخلياً مقتنع ان عملي انساني بحت وأكبر من هالامور وأصلاً المفروض هالشي ما يغيّر شي من قناعاتي دام اني دخلته عن قناعة تامة .. وبالنهاية انا اعمل لخدمة المجتمع من خلال هالمجال الواسع و نظرة الناس ما تهمني كثير .. وتراني من النوع المنطش حيل ومريّح راسي فعلاً
اما الصرف بدون وصفة (اذا كان هذا مقصدك) فـ حسب اللي تعلمته خلال فترة الامتياز فيه بعض الادوية البسيطة تقدر تصرف بدون وصفة ولكن بعدد محدد .

إقتباس الباندول من أخطر الأدوية والجرعة الزائدة منها تؤدي للوفاة لم تباع بدون وصفة طبية ؟؟

يمكن لان الناس تعودت على البنادول .. وبجانب اخر الناس صارت ثقافتها عالية بالادوية وهالشي جيّد .. عموماً عادةً الصيدلي ما يصرف الا بوصفه طبيّة وأكثر علاج كنا نصرفه البنادول او الباراسيتامول والمسكنات عموماً + حبوب السكّر والظغط .. واللي يصرف بدون وصفة المفروض يحدد الجرعة ويبّلغ المريض بملاحظات الاستخدام

إقتباس بما أنك صيدلي وتتعامل مع الأدوية الكيميائية ما رأيك بالتداوي بالطب البديل؟؟

افضله كثير .. وشخصياً أطبقه .. ولا ألجأ للأدوية و العقاقير الا لما استنفذ طرق العلاج بالطب البديل الممكنه واللي اشوفها ممكن تفيد .. زي ما جاوبت على احد الاسئلة .. اهم شي يكون مضمون لان فيه طب شعبي مثل يشفيك من مرض ويصيبك بأمراض بعد مشيئة الله طبعاً .

إقتباس ريال مدريد وش يحتاج عشان يرجع مثل أول ما بقى شي ما توفر لهم الا الحظ

ماهي مسألة حظ ابد .. الريال يحتاج استقرار و اجواء محيطة مناسبة للشخص علشان يعمل .. الجو المحيط بالنادي مأثر على الفريق و نتائجه .. الصحافة بمدريد وباسبانيا عموماً معطينها وجه اكثر من اللازم وفيه جرايد تحسينها مالكة النادي من قو المونه .. وقبل كل شي واهم شي يختارون الصفقات بعناية .. ماهو كل لاعب نجح بفريق معيّن ممكن ينجح في الريال .. بنزيما و كاكا مثلاً .. و اهم شي ينتبهون للدفاع .. اجل البيول و غاراي .. ما اشوفهم لاعبين بحجم الريال !

إقتباس جاوب بصراحة هل لازلت تشجع المنتخب

الشكوى لله لازم نشجعهم .. يبقى منتخبنا ومحسوب علينا و وطنيتنا تحتم علينا تشجيعه .. تشجيعي للمنتخب ما تغيّر ابد ولا راح يتغير ان شاء الله

إقتباس آخر كتاب قرأته ؟؟

نهاية العالم للشيخ الدكتور محمد العريفي
كتاب قيّم بصراحة وفيه الكثير من العبر و الفوائد و التوضيحات .. الله يجزاه خير

إقتباس أخيراً رائدة الزعيم إيجابيات وسلبيات؟؟

والله وانا اخوك هالسؤال ما أحبه مدري ليه .. بس الايجابيات اللي اشوفها كثيرة منها رقي قلمك واسلوبك الحواري الممتاز و الفوائد الجمّة التي يجدها أي قارئ لمواضيعك و ردودك من العضوات اللي يجمعون رقي الفكر و روح الدعابة وهالشي اشوفه صعب يجتمع .. السلبيات يمكن قلّة دخولك و تواجدك في المجلس في الفترة الأخيرة ولا أعلم الاسباب وأتمنى ان يكون المانع خيراً .

شكراً لك رائدة .. سعيد بتواجدك
وأشكرك على كلامك اللي يدل على معدنك الطيّب

.

إقتباس الرسالة الأصلية كتبت بواسطة alqnas%20 هلا وغلا فيك س/مارايك بشبكة الزعيم بكل صراحه؟

هلا بك اخوي القناص
بالنسبة للسؤال الاول .. حنا اللي المفروض نسألكم وش رايكم بشبكة الزعيم .. نحن على قولتهم راعين محل وهمنا نخدم الاعضاء و الزوّار وندوّر راحتهم .. لأن أصلاً رايي راح يكون مبني على عاطفة

إقتباس س/ماريك فيني بصراحه؟

والنعم فيك وانا اخوك

إقتباس س/كيف اصير مشرف بالشبكة؟

بالعمل والجد والاجتهاد .. ابداً بمجهودك وشغلك وقبل كل شي اخلاقك توصل للاشراف
حياك الله اخوي القناص

إقتباس الرسالة الأصلية كتبت بواسطة $nero$ هلا هلالي موووت سؤال واهد فقت بما انّك شي مهم بالحياة وش احسن فلم ( اجنبي طبعاً) تابعتة ؟ وش رايك بجون تيري ولامبارد ؟ تحب التنس ؟ واذا تحبها وش اسويلك يعني من تفضّل فيدرر آم نادال ؟

هلا نيرو
افضل فلم شفته يمكن شوتر shooter بطولة مارك والبيرغ
جون تيري ولامبارد كويسين بس لو يلعبون مع المنتخب كويس يطلعون اكوس .. ما عليهم خلاف .. وهم من افضل لاعبين العالم في مراكزهم بدون تعصب .. بس تيري لو يترك الدشرة عنه وحركات تشبيك حريم اخوياه يصير بطل ههههههههههههههههه
التنس ؟! لعبة ممتعة ومتابعتي لها حسب الفضوة واحرص على بطولات الغراند سلام والماسترز .. كلهم زي بعض عندي .. بس يمكن اتعاطف اكثر مع نادال مدري ليه عاد احسه ينرحم .. بس خل عنك الملك لا يُعلى عليه .. لاعب ثقيل وله هيبة !

حياك الله نورت نيرو

-


يوه حنا بالعالميه او المجلس احس اني ضعت من ميسي وريال مدريد


هلا بك اخوي هلالي موت (اجل حتحوت وش تقرب لك حتحت )

اشكرك على اجابتك التفصيليه واحسن اني تعبتك

حبيت اوضح سؤالي الي حسيتك مافهمته زين يمكن صياغتي سيئه
الي اقصد غالبا يكون فيه محطه بحياتنا وقفنا عندها او نقطه تحول بحياتنا
يعني مواقف سوا حزينه او سعيده ساهمت بتغيرنا مثلا قادتنا لعمل امور ماكنا نعملها قبل او تركنا امور كنا نعملها قبل
او بشكل عام غيرت شي فينا حركت شي بداخلنا اثرت فينا

اتمنى تكون الفكره وصلت لك

تسجيل دخول لـ عيون هلالي موت

بعد الترحيب .. نطرح عليك هالسؤالين الخفيفين

من صنع نجومية البرسا .. بيب أو نجوم البرسا .. يعني لو كان بيب يدرب فريق آخر ممكن يكرر نفس الانجازات

هل تعتقد ان رونالدينهو له مكان في كأس العالم

الف شكر للقائمين على الاستضافة

.

صباح الخير على الجميع

إقتباس الرسالة الأصلية كتبت بواسطة marsal يا الله حيه ..

هلا مرسال .. هلا بـ نصير الشعب و المظلومين
سجلني معجب .. مع اني اختلف معك في بعض الامور .. بس ما يمنع اني اقول انك من الاعضاء المحببين لي خصوصاً في الجانب السياسي .. او على قولة واحد الله يستر عليه .. مجال خط النار

إقتباس س1/ الا تعتقد أحيانا أننا أغبياء مجانين نضيع اعمارنا وشبابنا في الكرة ؟؟

والله يا غالي شف باقولك شي .. الانسان يجيه اوقات فراغ في حياته .. يشغله بالكورة متابعة او ممارسة ما تفرق احسن من انه يشغله بشي ثاني يمكن يكون فيه ضرر عليه .. يتابع كورة احسن من انه يتابع افلام او اغاني مثلاً يعني .. يجلس بالبيت يشوف مباراة احسن من انه يطلع يهجول وحبتين وتربتييييييييت

إقتباس س2/ ممل المشرفين او لنقول الاعتذار عن المنصب ...ما الاسباب برايك ؟؟

حسب الشخص نفسه .. ممكن تكون ظروف او عدم قدرة على العمل اما بسبب ارتباطاته او بسبب عدم قدرته على القيام بأدواره الاشرافية على أكمل وجه .. وممكن يكون الجو ما يساعده .. يعني ما ارتاح .. وكل واحد و تفكيره و ظروفه و راحته ..

إقتباس س3/ما رايك بالطلاق الصامت ؟؟ وما هو الحل المناسب له ؟؟؟

اذا كان قصدك بالمتزوجين وماهم متزوجين حسب اللي فهمت .. فرايي ما راح يختلف عن راي اي واحد اتوقع .. الرجل بهالحاله ما راح يكون سعيد .. والمرآة بتعاني مع هالزوج والمحصلة مشاكل مالها اول ولا لها آخر .. الحل المناسب المصارحة وان لم تنفع كل واحد يشوف طريقه افضل للطرفين .. كـ رجل حرام تظلم البنت وتظلم نفسك معها بعد ! .. فيا إما إمساك بمعروف .. أو تسريح بإحسان افضل للطرفين

إقتباس س4/ ايش رايك بالمعلمين ..؟؟

أكثر ناس مدلعين .. و أكثر ناس يشتكون
شرفت مرسال .. سعيد بتواجدك

إقتباس الرسالة الأصلية كتبت بواسطة BaRiO احبك اعشقك حتى الثمآله انا مجنون فيك سؤآلي : في منتديات تشآرك فيها غير الزعيم .. وهل عندك صفحآت في النت لوق والفيس بوك ؟! بس ياخلفهم ,

يالبيه بس .. فديت قليبك يبو حميد
وانا احبك بعد واحب خالك بعد
مشارك بمنتدى ثاني بس بشكل متقطع .. اما النت لوق و الفيسبوك انا ما اعرف الاشياء اللي تتكلم عنها هذي .. لا والله لا عندي صفحات فيها ولا هم يحزنون .. ياخوك ما هضمتها كلش مدري ليه .. تجيني غلقه ياخي .. فيه واحد عندي بالدوام بس متكي بالفيسبوك لقبه راعي الفسفسة .. ما أحبهن والله .
سلملي على تركي و سيّر دايم

إقتباس الرسالة الأصلية كتبت بواسطة Blue Sun هلا والله هلالي موووت .. ما شاء الله عليك اشوف كل اصحاب السوابق يشيدون فيك وبتعاملك واخلاقك .. مشكلتي انا مو راعي مشاكل .. ولا كان شبكت اعضاء مجلس الادارة ..

هلا بك ابو صن
الله يسلمك ويبارك فيك انت وكل مدح وان شاء الله اني استحق هالكلام .. و عز الله انك صدقت .. انت من خيرة الاعضاء ويكفي دماثة خلقك اللي الكل يشهد فيها .. الله يبعدنا وياك عن المشاكل على طول ان شاء الله

إقتباس س1/ الصيدلي هل يعتبر دكتوور ويطلق عليه هاللقب والا لا .. ؟!

سؤال ذكي بصراحة اهنيك عليه .. اللي اعرفه فيه دكتور صيدلي وهاللقب يطلق على الصيدلي الحامل لشهادة الدكتوارة في الصيدلة (الله يرزقنا ) .. يعني كمسمى ايه .. وفيه صيدلي استشاري .. هذي حسب معلوماتي المتواضعة .

إقتباس س2 / بحكم تخصصك .. فيه علاج فعال للارق وما يسبب الادمان .. ؟! << يعاني من جد ..

شكلك حبيّب .. شف وانا اخوك الارق مشكله بس تقدر تتجاوزها .. الادوية خلها اخر شي .. أكثر من الذكر .. جرب تقرا قبل تنام .. لا تشرب منبهات قبل النوم .. بالنسبة للعلاج اليانسون كانك تعرفه اشربه قبل تنام بنص ساعة يساعد على الاسترخاء و النوم الهادئ .. والا كوب لبن مع ملعقة عسل على كيف كيفك واذا ما تحب اللبن جبلك علبه حليب السعودية وحطها على النار دقيقتين مع ملعقة عسل اخلطها وبالهنا و العافية .. او عصير جزر مع تفاح .. بالنسبة للعقاقير مافيه شي ما يسبب إدمان بالذات في الادوية النفسية .. الاستخدام الطويل يخليك تدمن عليها .. واصلاً غالب الادوية اللي من هالنوع يسمونها مضادات هيستامين وهذي منومة اقرب من انها تكون علاجات للأرق .. اعمل اللي قلت لك وقلي وش يصير معك

حياك الله اخوي بلو .. شكراً لمرورك

.

إقتباس الرسالة الأصلية كتبت بواسطة حتى ظلالي هلالي م كـ ا ن ي = $ راااجعين لكـ يا احمد راجعين :P ان شاء الله ق1 .. بآآآآآآآآآكـ كبر مدري كثر مارفع ضغطي عبدالله الهلالي ليتنا فالتين النصراويهـ عليهـ مو حسافهـ فيهـ الا عايلتهـ وقسم ومبروكـ التاهل دامنا في طاري الهلال خلنا بآخذ رايكـ / مقدار تفائلكـ بكأس اسيا هالموسم ..؟! كونها عصتنا كثير أنا عن نفسي احس متفائلهـ كثيييييييير بس يبي لنا شوية راحهـ

هلا بالبرتقالية .. حياك الله حتحت هانم
تسلمين من طيبك .. بالنسبة للهلال متفائل ان شاء الله بس انا فيه شي مستغرب منه .. اللي هو مستوى الفريق في بطولة اسيا وفي استاد الملك فهد بالتحديد .. الفريق احس فيه حموضة بمباريات هالبطولة بس ليه مدري ؟! .. لكن عموما ان شاء الله الفريق يمديه على البطولة عندنا كل الإمكانات ويبقى التوفيق من عند رب العالمين .. الله يكتبها لنا .. وحشتنا بطولتنا

إقتباس نروح للعالميهـ سؤال متأخر شوي لكن توهـ طرى على بالي يوم شفتكـ برأيكـ الشخصي .. هل تأثر المانيو بانتقال كيرس ..؟ والا كيرس هو الي تأثر بانتقالهـ للريال ..؟

سؤال صعب .. كيرس على قولتك لاعب كبير هذي ما فيها نقاش .. وكان نجم الفريق الأول .. مسأله انتقاله كانت متوقعة واصلا هو يبي الريال .. وشخصياً ما ودي يبقى لاعب في الفريق وهو يبي فريق ثاني .. تأثر الفريق بالبداية فقط .. لكن في المجمل ما كان له ذاك التأثير الكبير .. انا اشوف الفريق تأثر بإنتقال تيفيز أكثر منه بصراحة ! .. هو ما تأثر .. بس فقد السير اليكس وهذا شي انا متأكد منه

إقتباس - برأيي الشخصي ومن ناحية انسانيهـ .. ماذا لو كانت الادويهـ تصرف " مجاناً " ..؟ مراعاة لظروف الفقراء الطبيهـ .. اقصد هنا على مستوى العالم كلهـ .. يعني مو تقول لي مستشفيات حكوميهـ ومدري ايش .. لا يعني حتى الصدليات .. يعني مافيهـ شيء اسمهـ ( اشتري علاج )

المشكلة اصلاً بتفكير الناس بالمراكز الصحية و المستشفيات الحكومية فيه صيدليات فيها اغلب الادوية اللي موجودة بالسوق ومجاناً بس باسماء تجارية مختلفة .. مثال الباراسيتامول العالم تشتريه من البقالات بعد بسعر معين باسم بنادول .. بينما هو متوفر ببلاش بالمراكز الصحية باسم أدول .. بالصيدلة الاسماء العلمية هي الثابته والاسماء التجارية هي اللي تتغير .. فالصيدليات الخاصة مستغلة هالنقطة و الشعب كثير منه مجاوب .. اللي ابوصله ان احتياجات المواطن من الادوية متوفرة مجاناً بس الناس تدوره برى !

إقتباس - بحكم خبرتكـ وتخصصكـ ماقد مر عليكـ علاج يساعد على تقليل الفهاوهـ أو ينشط الذاكرهـ شويتين ..!

الا فيه .. كثري فاكهة وخضار وتروح ان شاء الله

إقتباس سؤال شاطح الحين ليهـ العيال كلهم مدح فيكـ وكلام لهـ اول مالهـ تالي وطبعاً انت تستاهل والله واكثر لكن السؤال الي يطرح نفسهـ / ماتلاحظ ان في الشبكهـ أو بمعنى أدق " بالمجلس " يتحفظون كثيييير على رأي البنت لما تمدح ولد ..! وخذ يا شيل وحط وذبات وكلام يروح ويجي

يوووه بدينا بالغيرة
الله يسلمك بعض ما عندك .. بالنسبة للنقطة هي صدق شاطحة بس ما عليه بجاوب .. انتي بمنتدى يجمع شرائح مختلفة من الاعضاء .. وفي مكان يعتبر عام .. والتفكير يختلف من شخص لثاني .. وبرضو حتى النوايا ماهي زي بعض .. والناس عموماً مالها الا الظاهر .. فهالشي طبيعي .. اهم شي الواحد يكون واثق من نفسه ودامه يشوف ان اللي يسويه صح ما عليه من الكلام و القيل و القال الحين ليه العالم شايله هم كلام الناس ما ادري .. اللي يبي يمشي ورى كلام الناس وماذا قالوا يبي يتعب .. بالنهاية انت يالعضو مسجل بيوزر علشان تاخذ راحتك وتبدي رايك باللي تبي بحدود معينة و وفق الشروط الموجودة في اي قسم و الباقي ما عليك منه .. بس السؤال المهم الحين .. منهم اللي يتحفظون على وزن منهم اللي يحلمون

إقتباس طولتها ادري أحمد ربي يسعدكـ ويحفظكـ شهادتي فيكـ مجروحهـ يا ولد الجوف

تسلمين حتحت .. موفقة ان شاء الله
والله يعطيك على قد نيتك ويحققلك اللي ببالك
من ذوقك .. آنستي و شرفتي وابد انا سعيد بأسئلتك

إقتباس الرسالة الأصلية كتبت بواسطة ~SaKaB الله ! أحمد كلّه هنا , ولا ندري عنه ؟! كيفك يا عسسل ؟! منوّر المجلس :$

هلا عاصم يالله حيّه
انا بخير يا جعلك بخير .. الحمدلله كلش على ما تحب
بس فكنا من الفرق بين الزعم والادعاء والخرابيط هذي تكفى
لو اقدر اكتب لقب كتبت تحت يوزرك المحجراتي ههههههههههههههه

إقتباس ياخي ودّي أسألك , بس أخاف تقول إنّي أحجّر لك وترجع تردّها لي لكن دوك كم سؤال ع الطائر ! ما الفرق بين الفهم , والاستيعاب ؟ أمزح أمزح

اشوى كنت باعصب

إقتباس بـ رأيك وش سبب احتقان بعض الأعضاء ضدّ بعض المشرفين , رغم إنّ المشرف عضو يطبّق القانون فقط !

اما موقف سابق ... او عدم إلمام كامل بعمل المشرف وهذي الاقرب .. او ربما كذا عباطة .. فيه بعض اعضاء الله يصلحهم يحسبون المشرف لما يحرر رد مثلاً هذا مستقعد وما يبيني (انت يالعضو) .. طيّب انا وش بيني وبينك علشان تفكّر هالتفكير .. كل المسألة اني أطبق القوانين اللي قدامي ! .. مستحيل المشرف يحرر أو يحذف أو ينذر بدون سبب معين مستحييييييل

إقتباس ولو جدّ جديد , سـ أعود بـ التوفيق

المحل محلك عصمصم
ابد بأي وقت انا حاضر للطيبين اللي مثلك