@@ الجزء الثالث @@

حنين و هي تركب : " شكلي تأخرت ! الله يعيني على أمي و خالتي "

عبدالرحمن : " ما شاء الله حنين ، قمر باسم الله عليك "

حنين : " أدري ! مو جديد "

عبدالرحمن : " يا دلوعة ترى الغرور شين "

حنين : " مو غرور يا أخي الحبيب ! و لكن هذا يسمونه ثقة في النفس "

عبدالرحمن : " طيب يا ولكن !!! ليه هالزين كله ؟ ارتبطت و خلاص !! "

حنين : " لا عادي ، إذا خطبني واحد أحسن من سعود تونا فيها ! يمديني "

عبدالرحمن و هو ماسك الجوال : " وين رقمك يا زوج أختي الحبيبة ؟ "

حنين : " يا حبك للشر يا أخي الحبيب ! "

عبدالرحمن : " خلاص سامحتك ، انزلي الحين و شوي شوي على الناس ! "

حنين : " المهم ترى خالتي و نجلاء يبونك تصور معهم !
أنا ما أدري ليه نجلاء مصرة إنك تصور معها ؟! بتاكل الجو على زوجها !! "

عبدالرحمن : " الله أكبر ! حنين تمدحني !! "

حنين : " إذا جينا الجد لازم نقول الحقيقة ! على فكرة يمكن ما أخليك تصور معي ليلة زواجي !! "

عبدالرحمن : " يصير خير ، أنت خليه يجي و نخلص "

حنين : " ليه تبي تخلص ؟! مليت مني ولا مليت مني ؟! "

عبدالرحمن : " لا هذا و لا هذا ! القصة و ما فيها إني مليت منك ! "

حنين : " بارقص اليوم لين أدوخ ، يمكن تكون آخر مرة أرقص فيها قبل زواجي "

عبدالرحمن : " الله يوسع صدرك بالعافية "

حنين و من دون قصد تحسسني إن ساعة الفراق قربت !!

كالعادة حنين بين وقت و وقت تتصل تعلمني من شافت و عن آخر المستجدات !! طبعاً أنا ما أفهم شيء و لا أحفظ شيء و مع ذلك يا ويلي لو ما جاوبت اتصالها و ركزت معها !

و في كل مكالمة تقول لقيت زوجتك و لو على حنين تزوجت ألف مرة !!

أهم ميزة في اتصالاتها إنها تطمني على أمي في كل اتصال ، أمي اللي هي شغلي الشاغل خصوصاً من بعد وفاة الوالد الله يرحمه .

اتصال من حنين : " هلا عبدالرحمن "

عبدالرحمن : " هلاوين "

حنين : " أمي و خالتي ينتظرونك بسرعة تعال "

عبدالرحمن : " صار ، خمس دقايق بس و أكون عندكم "

دخلت غرفة العروس و سلمت على أمي و خالتي و نجلاء و طبعاً حنين ماسكة يدي و كأني أعمى

عبدالرحمن : " ألف مبروك و الله يوفقكم "

نجلاء : " آمين و يالله شد حيلك "

عبدالرحمن : " الله يكتب ما فيه الخير "

حنين : " بس كذا نجلاء شد حيلك !! اخطبي له تحركي مو شد حيلك و أنت تتفرجين !! "

نجلاء : " أقول اسكتي بس !! أشوى إنك متعقدة منه أكثر مني !! أخوك هذا أنا ودي بس أعرف من بياخذ عشان أرتاح "

حنين : " تبين ترتاحين شوفيني و شوفي اللي بياخذها ! هو يبي وحدة نسخة مني "

نجلاء : " ما أقول إلا الله يعينك عبدالرحمن على غيرة أختك "

حنين : " مسكينة أنت نجلاء ! "

نجلاء : " عبدالرحمن ترى حنين تقول لو ما أعجبتني زوجته أو حسيت إنها ما تستاهله باطفشها لحد ما تطلع من البيت "

حنين : " طيب طيب نجلاء ! دواك عندي "

نقاش سريع حاد تابعته أمي و خالتي و حتى أنا تابعته و صار يشغل تفكيري ! معقولة الكلام اللي تقوله نجلاء عن حنين صحيح ؟!
رجعت للبيت و رميت نفسي على الفراش و غمضت عيوني لكن كانت فكرة النوم مرفوضة بسبب كلام نجلاء عن حنين .

كيف راح تكون علاقة حنين بزوجتي ؟!