لما كنت طفل بالابتدائية , كان الاستاذ التعبير في المدرسه يعطينا حصص تعبير , وكنت أنا احب المادة , واحسها ممتعة لدرجه كبيرة , وكنت اجيب فيها درجات ممتازة بمجهودي لأن الاستاذ كان مهتم فيها وحريص , ولا يعطي الدرجة الا للي يستاهل ..

واذكر مرة من المرات طلب مننا الاستاذ تعبير , وكان التعبير اختياري , بشرط ان التعبير مايكون حقيقة واقعة , وان يعتمد كله على الخيال , واشياء ماحصلت ولا راح تحصل ..

انا سميت بالله , وبديت اعبر , والتعبير اخذ ثلاثة ايام , وكان عن اني حصلت مركبة فضاء وعليها أشخاص جايين من الفضاء , اختلست الانظار وركبت فيها , وتعرفت على نمط عيشهم , وطريقة تعاملهم مع بعض ..

...............................



ما يستفاد :
* المادة هذي مو مظلومة ولا شيء , هي تعتمد على الشخص , اذا عنده موهبه تعبير , واكيد اذا الشخص له ميول تجاهها , بيهتم فيها , مثلها مثل أي مادة ثانية ( المواد العلميه , المواد الادبيه , الرياضة , والتربية الفنية ) ..
* حتى لو كانت مهملة , مو شرط ان الشخص مايستفيد منها !! اذكر في الابتدائي كان استاذ الفنية مايهتم ابد في المادة , ولا يفرق عنده الطالب اللي احضر الالوان والكراسة من غيره .. مع ذلك فيه طلاب هوايتهم الرسم , وكانوا يرسمون بالفصل وبالبيت , وماخذينها متعه , حتى بعضهم صاروا يرسمون سيارات ويبيعون الرسمة بريال وبريالين ..

النادر .. شكراً يا باشا ..

عدنــــــــــــــا

حياكم الله في النقاش يا جماعة الخير


نبدا اول باول

هامور البورصة

ما قلت لنا اي شي او تجربتك مع المادة او اجاباتك للاسئلة اللي طرحتها

على العمووم مشكور على المرور اللطيف

_________________________________________

ماجد مقبل

إقتباس ياخي ذكرتني بموضوع دايم ناخذه في التعبير .. وهو كيف قضيت الاجازة الصيفية ... ياشيخ الى الجامعة وحنا نكتب عن ها الموضوع ونفس الاسلوب ونفس الاجازة ونفس ال...

هو فيه موضوع غير هذي المواضيع التافه اللي لا تزيد و لا تنقص من مهاراة الطالب

إقتباس تصدق الدول العربية يهتمون اكثر منا في ها المادة فلذلك تشوف لغة بعضهم قوية وجزلة

انا ما تكلمت او فتحت هذا الموضوع الا لما شفت العجب هينا و كثر المواضيع اللي نكتبها

إقتباس على فكرة الجو اليوم في الرياض >>> جملة اعتراضية

والله الجو يوم جيت الرياض كان انواع البرد

بس الحين البرد عندنا مو زي اللي هينا

مشكور اخوي ماجد على المداخله
___________________________________________________________

هلاليه سنعه

إقتباس التعبير وما ادراك ماالتعبير .. كان الله يصلحه عله .. تدخل الاستاذه الفصل ويالله اذا كان لها خلق تختار موضووع من هالمواضيع وين سافرتو بالعطله .. رحله عائليه .. وتعطي مواضيع حقة المواسم اللي هي صوم رمضان .. والعيد .. وواسبوع النظافه والنخله والشجره وغيرها وغيرها واذا ماكان لها خلق تحط موضوع اختياري وكل وحده تحط اللي تبي ..

يعني المدرسه ما كانت تعطي الماده ذاك الاهتمام الكامل للطالباتها

ما فيه شي جديد

إقتباس بس من جد كنت اكره هالماده واخاف منها لأن اسلوب الاستاذه كان شين تخلي البنت تقرا عند البنات وانواع التطنز والفشايل وخاصه بالمتووسط .. مثل ماقلت مافيه استفاده منها غير حشووو وصف كلام ..

والله مشكله اذا كانت المدرسه كذا

المدرس او المدرسه هينا ليدرسوا فنون الماده و تصحيح اخطاء طلابهم مو يقعد لي عند الطاوله و انواع التهزيئ و التطنز على طلابه

إقتباس وابشرك فيه بنات يوم كنا بالثانوي يدخلون علمي هربا من مادة التعبير .. صارت هالماده شبح .. وبنات الادبي لما يخيروونهم بالاختبار في الماده بين موضوع ادبي درس بالادب او موضووع ثاني خارج الماده علطوووول سيدا الغالبيه يختارون الموضووع الادبي .. ماعلموونا مهارات واشياء تحببنا بها الماده وتخلي الطلاب والطالبات يبدعووون .. الله يصلحهم مدرسين ومدرسات العربي يبيلهم اعادة نظر وصياغه لمنهج التعبير ..

اول شي البنات اللي ينحاشون من الادبي خوف من مادة التعبير

لو تعلموا التعبير بطريقة محببة و تفيد الطالبات كان ما شفتي البنات ينحاشون للعلمي عشان التعبير

و نفس الحكايه للاختبار لو طلب منهم هذا الكلام في الدراسه العاديه و جربوا التعبير كان ما اختاروا التعبير الادبي

يعني المشكله كله هينا تتجه للمعلمه لانها ما درستهم الماده و حببتها لهم بطريقه مفيده

إقتباس وماشاء الله زين انك استفدت بدراستك ..

الحمد لله بعد توفيق من الله ثم جهدي اللي قاعد ابذله و الا ما وصل اللي وصلت له الحين

مشكوره اختي هلاليه سنعه على مداخلتك


____________________________________________________

فرانشيسكا

إقتباس صادق .. شوف أنا أموت بمادةالتعبير .. لما كنت بإبتدائي كانت عندنا مدرسة الله يذكرها بالخير .. مدرسة من جد .. ماتقبل أي موضوع تافه .. ماله قيمة على أن كنا صغار ,, بمتوسط معلمتنا فاشلة بمعنى الكلمة تحس أن اللي تكتب موضوع سخيف أو عبقري كلهم واحد .. ونفس المواضيع كل سنة ..(اليوم الدراسي ) ثانوي .. أسوأ جايبين لنا معلمة من إبتدائي قالت ( إكتبوا عن اليوم الدراسي ) قلت لها : لو سمحتي أنا ماأعرف أعبر عن هذا الموضوع لأنه مايصلح .. وش أقول : اشتريت حقيبتي ولبست مريولي ..ورأيت صديقاتي ؟؟؟؟ عصبت : قالت : مافي إلا هذا .. قلت لها .. لا ماني كاتبة عنه .. وبالموت وافقت أكتب موضوع ثاني .. لما قرأت موضوعي مافهمت الموضوع .. وماعجبها لأنه مايرتقي لعقلها وعجبها موضوع بنت : لبست مريولي وسلمت على صديقاتي .. (بالله وش هالعقل ) هذا وأنا أدبي .. بس وش نسوي عاد ..

يعني تدريس الماده يختلف من مدرسه الى مدرسه

يعني لو استمرت المدرسه اللي درستك في الابتدائي كان الوضع عال العال

بس انتقلتي الى المتوسط تدهورتي في الماده

و زاد الطين بله يوم رحتي للثانوي

و المواضيع هي اللي تقتل الطالبة على كلامك

لان مدرستك اللي في الثانوي طلبت منك موضوع تافه ما ينفع للتعبير لانك تتعبرينه سخيف

إقتباس بس اللي يحبه يقدر يثقف نفسه .. احنا أخذنا بالمدرسة المقال والبحث والخطب وكل شي بس تعتمد إستفادتي على المعلمة نفسها لما تكون فاهمة أو أي كلام .. وتعتد على الشخص إذا يحب التعبير ولا لأ .. وموهبته أيضا ..

انا اضم صوتي بجانب صوتك

لان هذي الماده مو كل شي على المدرس او المدرسه

حتى الطالب او الطالبة

يمكن هو ما يهتم بهذي الماده لدرجة انه يعتبرها ماده سخيفه و لكن هي في الواقع من اهم المواد


شكرا اختي فرانشيسكا على مشاركتك و طرح رايك في الموضوع


__________________________________________________________

اخوي tofo نريد رايك في الموضوع

بعدين الموضوع مو تصويت

___________________________________________________________

the bast

إقتباس يارجال اصلا المادة تافهة جدااا,, ولكن من ناحيتي فقط تعلمت منها الكثير جداا..

طيب ليش تافهة

ممكن نعرف السبب؟؟

_________________________________________________________

البارق

إقتباس شف يالغالي .. من واقع الميدان في التعليم أقول لك إن هذه المادة ( مظلومة ) مع مادة الخط ..!! ليش مظلومة .. لأنها عبارة عن حصة واحدة في الاسبوع ..وغالباً ما تكون لتكلمة النصاب الحصصي للمعلم ..!!!!

هينا تكون مشكلة لانها تكمل نصاب المدرس و المدرس ما يعطيها كامل اهتمام كبقية المواد اللي عنده

إقتباس وخصوصا في الابتدائي تلقى معلم فنية أو بدنية يكملةن له بالمادة هذي أو أي تخصص ثاني - من غير نقص بالتخصص - وبهذا ( تأصل ) عن الطالب وولي الأمر إنها مادة تافهة ولا يبي لها شيء ..!!! يعني تخيل ولي أمر جاي يشتكي معلم التعبير لأن أقل درجة حصل عليها الطالب في هالمادة ..طبعا الطالب ما يعرف يعبر أو يكتب فكرة ولما حصل على الدرجة المناسبة له جن جنون ولي الأمر ..ومع الأسف المدير بعد ..!!! ترى أذكر لك هالمثال عشان تدري وش مستوى المادة عند الإدارة أو ولي الأمر .. كمادة أو نقول إيمان بالفكرة ..!!!

مشكلة اذا كان المدرس يفهم طلابه ان هذي الماده تافهة و ما لها محل في الدراسه

إقتباس الآن ومن سنتين أو ثلاث ما أدري بالضبط .. تحولت المادة لمهارات محددة وعلى كل مهارة درجة يعني ماهوب شرط الفكرة أو المادة المكتوبة بدرجة ماهي كسب للمهارة المطلوبة .. ونقول عسى إنها بداية خير لهالمادة المظلومة ..

هذا شي يبشر بالخير اذا الماده تهتم ايصال المهارات الى الطلاب

إقتباس مع إن المشكلة الأساسية لها ما حُلت وهي معلم متخصص لها وكذلك الخط .. بالطريقة هذي له المجال إنه يبدع ويحقق اللي يبي .. وممكن تحاسبه أيضاً على الخطأ ..!!!

ليش المعلم المتخصص مشكله

اذا كان معلم القواعد و القراءة و الاملاء هو نفسه معلم التعبير فاين المشكله

المشكله اذا كانت المعلم يفتقر لمهارات تدريس مادة التعبير

إقتباس تصور معلم يدرس قواعد أو نحو وأدب وممكن بلاغة أو أي من مواد العربي وأيضاً معه مادة تعبير حصة واحدة في الأسبوع .. بالتأكيد إنها بتكون أقل جدية منه ومن الطلاب لأنهم بالطريقة هذي حطوها محطة إستراحة . ونفس الكلام ينطبق على الخط ..!!.

هذا هو الواقع

إقتباس الله يصلح الحال ونشوف الأمور زانت والسنة القادمة أو اللي بعدها بداية لمناهج جديدة وأسلوب مغاير ستطبق بشكل تدريجي ..نسأل الله أن يوفقهم ويكتب اللي فيه الخير ..

الله يكتب اللي فيه الخير

تسلم يا مراقبنا البارق على المداخله

_________________________________________________________

SSالهلالي

إقتباس ماقصر أخوي البارق

انا عرف انه ما قصر بس نبغى رايك في الموضوع

الكل هينا مطالب برايه

__________________________________________________________

الماسه الزرقاء

إقتباس واظن حالياً تعدل الحال نوعاً ما واصبحت مادة التعبير تشتمل على المهارات ولا تختص فقط بكتابة موضوع مقالي ولكن تشمل الخُطب والمسرحيات والتحقيقات وغيرها ,,

اذا كان هذا صحيح من هينا راح تكون البداية

إقتباس لكن تبي الجد .. اشوف خواتي ولا وحده تكتب التعبير لنفسها يالوالده أوالوالد يكتب لهم ,, وهنا الخلل .. فمن الواجب على أولياء الأمورأن يكونوا اكثر حرصاً على بناتهم وأولادهم لإكتساب المهارات اكثر من حرصهم على الدرجات ,, وإذا مايقدرون يعبرون أو يكتبون حتى جملة واحدة مترابطة ,, فلازم أقوي من حصيلتهم اللغوية عن طريق القراءة ,, فتشجيع الأولاد والبنات على القراءة منذ الصغر ,, كفيل بتحسين مهارات الكتابه لديهم سواء من مهارات لغوية أو إملائية أو مهارات الأسلوب والقدرة على االربط بين الجمل , وكيفية ترجمة الأفكار من الرأس إلى الورقة بأسلوب جميل , بالإضافة إلى أنها تعمل على إتساع المدارك وزيادة المعارف واتساع الثقافة ,

هذا المطلوب من اولياء الامور

تشجيع ابناءهم على التحصيل العلمي و تحفيزهم على الدراسه

بس اذا هم بنفسهم اللي يكتبون التعبير

ليش اجل الولد او البنت تحضر مادة التعبير ليش ما تخلي اهلها يحضرون احسن لها

إقتباس من ناحيتي لم اكن اشتكي كثيراً من مادة التعبير , وكنت دائماً ما أُحصل على درجات جيدة فيها ,حتى في الإبتدائي لم أكن أجد أي صعوبة في السرد ولله الحمد , والسبب يعود إلى القصص , فعندما كنتُ طفلة ,كانت والدتي دائماً ما تشتري لي القصص بأنواعها سواء قصص الأنبياء او القصص الخيالية المشوقة والتي كانت تزيد صفحاتها عن 40صفحة , ومع ذلك كنتُ ما إن أبدأ في قراءة القصة حتى اندمج مع عالمها ولا ينفك الكتاب مني إلا وانا قد أنهيته ,

اهتمام والدتك الله يحفظها لك هو اللي ساعدتك في المادة من خلال القراءه

لان القراءة تشكل 50% من مادة التعيبر او كتابة التعبير

لانها تمدك بالكلمات الوافره

إقتباس حتى لو كبُر الشخص وأراد من تحسين مستواه الثقافي واللغوي والإملائي والمعرفي .. فكل ما عليه هو الإكثار من القراءة , وليكن القرآن الكريم أول معالج لنا من هذا الضعف,

كلام سليم و 100%


مشكوره اختي الماسه الزرقاء على رايك و تجربتك

___________________________________________


الهنووف

إقتباس مادة التعبير ومادراك مالتعبير للاسف طريقة التعليم لهالمادة المحببة لدى الكثير طريقة عقيمة المواضيع المطروحه لاتطور الكاتب مواضيع سطحية لايوجد بها خيال ولاتبني المواهب للاسف النظافة ..الماء ...المدرسة

دائما المشكلة تكون في طريقة التدريس

فاذا كان المدرس لا يشرح و يجاهد في سبيل فهم الطالب كل ما كانت الماده ليس لها هدف لدى الطالب

إقتباس تطور التعبير في سنواته الاخيرة ولكن قتل الابداع من خلال ارغام الطالبة على كتابة تعبير مستعيره بالمجموعات

مشكلة قتل المواهب سواء في التعبير او غيرها

دائما ما نشاهد طلاب موهبين في مجالات و لكن يأتي المدرس و يقتل هذي الموهبه

إقتباس للاسف في التعبير بمدارسناا تعبر لنفسك بتحط تعبير حلو لتطوير نفسك اما الدرجات على حسب المزاج بتاخذهاا

مزاج المدرسه زين عطيها بس لبان و شاهي و انتهينا

إقتباس الحمد لم تشكل لي مادة التعبير هاجس كانت محببة لدي صحيح ان المواضيع المطروحة لاتهي للكتابة ولاتحرك القلم ولكن كان لدي قدرة على الانتقاء الجيد والربط ولله الحمد

حلو ان يكون لك موهبة في الانتقاء



مشكوره اختي الهنووف على المرور الكريم

_______________________________________________________

افتخر بالزعيم

إقتباس عندنا بمادة التعبير بدال مايحاولون ينمون قدرة الشخص على التخيل واقناع الاخرين برايه.. يحاولون يقتلون هالشىء ويحبطونه فوق ماهو محبط...

نرجع في الكلام و نقول ان المدرس يحول يفهم الطلاب ان هالماده مالها وجه في الدنيا

إقتباس لذلك تجد عندنا ناس مايعرف يقول كلمتين على بعض مهوب عيب او نقص فيه لكن بسبب الاسلوب العقيم بمدارسنا وحتى جامعاتنا

هينا مشكله المدرسة و المدرس اللي لم يتقن مهارة التدريس

إقتباس مثل ماقالوا الاخوان موضوعات مكررة ومستهلكة حفظناها من اولى ابتدائي الين اخر سنة بالدراسة المدرس يناظر حصة التعبير وكانها حصة فراغ يجلس ويمدد رجلينه ويقول يالله اكتبوا عن واحد من هالمواضيع المستهلكة

دايما يلفون و يدرون حول هالمواضيع التافهه اللي لا تفيد الطالب

مشكور اخوي افتخر بالزعيم على رايك

_______________________________________________________

هلاليه من الرياض

إقتباس بالنسبة لي مادة التعبير فادتني جدا لأن المعلمات اللي يدرسونا إياها متمكنات في اللغة ويجددون لنا في المواضيع ويصححون أخطائنا وبذلك أستفدت منها حتى تخرجت....

طيب كيف كانوا يفيدونك ؟؟ ما هي طريقة تدريس المادة اللي مريتي فيها ؟؟

_______________________________________________________________________


سندريلا الهلال

إقتباس التعبيــر .. يمكن هو المادة الوحيدة اللي المفروض تكون تطبيق ..عندنا التعبير زي الواجب المنزلي.. عبّر في البيت ومن بكرة اصحح لك .. ويجي الطالب للبيت يعطي اخوه ولا اخته تعـبر له .. وانتهت السالفه .. !!

هذي الحاله اللي امر فيها الحين

تطبيق الموضوع و المهارة قدام المدرس

لانه راح يعلمني اخطائي و مشكلتي حتى اصححها و اتجاوز المشكله

اما الواجب المنزل

ما يدري المعلم من اللي كتبه فدايما يكون الطالب معي الدفتر لاهل و يالله عبروا

إقتباس التعبير .. موهبة نتفق على هالشيء هذا .. لكن مايمنع ان التعليم يحاول يبرز من عنده موهبه ويحاول ينشئ من اللي مايملك هالموهبة .. انسان يستطيع التعبير ..عن اي شيء يشعر فيه ..

انا قصدي انه فيه مهارات للتعبير لازم تدرس

يعني كيف تبدا و كيف تكتب جملة ورى جملة

مو تعبير لي على كيفك و تجي تقولي هذا تعبير

إقتباس ماودنا نكون من اللي كثير يخونهم التعبير ..!!!

هذا في الكلام مو في الكتابة و التعبير



مشكوره يا سندريلا على المرور

___________________________________________________________

بكيفي9999

إقتباس ماتذكر اني عبرت لنفسي اجي للبيت وبسلامت الاهل مايقصرون وكنت اتضايق احيانا اما المدرس يقول عبروا بالفصلولما يقول عندي واحد بالفصل الله يذكره بالخير يعرف يعبر وكان دايم يعبرلي

طيب بعدين لما رحت للمتوسط و الثانوي

وش صار عليك؟

خويك موجود؟

اهلك مكملين الخدمه معك ؟

_____________________________________________________________

iq1399

إقتباس لما كنت طفل بالابتدائية , كان الاستاذ التعبير في المدرسه يعطينا حصص تعبير , وكنت أنا احب المادة , واحسها ممتعة لدرجه كبيرة , وكنت اجيب فيها درجات ممتازة بمجهودي لأن الاستاذ كان مهتم فيها وحريص , ولا يعطي الدرجة الا للي يستاهل .. واذكر مرة من المرات طلب مننا الاستاذ تعبير , وكان التعبير اختياري , بشرط ان التعبير مايكون حقيقة واقعة , وان يعتمد كله على الخيال , واشياء ماحصلت ولا راح تحصل .. انا سميت بالله , وبديت اعبر , والتعبير اخذ ثلاثة ايام , وكان عن اني حصلت مركبة فضاء وعليها أشخاص جايين من الفضاء , اختلست الانظار وركبت فيها , وتعرفت على نمط عيشهم , وطريقة تعاملهم مع بعض ..

شي ممتاز اذا كان اسلوب المدرس يعتمد على الخيال

إقتباس ما يستفاد : * المادة هذي مو مظلومة ولا شيء , هي تعتمد على الشخص , اذا عنده موهبه تعبير , واكيد اذا الشخص له ميول تجاهها , بيهتم فيها , مثلها مثل أي مادة ثانية ( المواد العلميه , المواد الادبيه , الرياضة , والتربية الفنية ) ..

اذا الشخص عنده ميول للتعبير و الكتابة ليش ما نطورها و ننميها حتى يصل الى النهاية؟؟

إقتباس * حتى لو كانت مهملة , مو شرط ان الشخص مايستفيد منها !! اذكر في الابتدائي كان استاذ الفنية مايهتم ابد في المادة , ولا يفرق عنده الطالب اللي احضر الالوان والكراسة من غيره .. مع ذلك فيه طلاب هوايتهم الرسم , وكانوا يرسمون بالفصل وبالبيت , وماخذينها متعه , حتى بعضهم صاروا يرسمون سيارات ويبيعون الرسمة بريال وبريالين ..

اذا الطلاب عنده هواية ليش نقتلها بالمواضيع التافهه؟؟

ليش المدرس ما يهتم بطلابه؟؟

مشكور اخوي iq1399 على مرورك الخفيف

______________________________________________________________________

الكلاسيكي

إقتباس مــادة التعبير ماده احس انها من المواد اللي فائدتها ماراح تعرفها الا بعد التخرج والنضج .. واللي ما يعرف كيف يعبر وهو بالدراسه صعبه انه يفلح اذا كبر ز.

حتى اللي يتعلمها كامل التعليم يحس بفائدتها زي حالتي الحاليه

إقتباس واعتقد مو اعتقد الا متأكد ان الاستفاده من الماده تختلف حسب المعلم .. اذا كان المعلم يجتهد ويكتب ويعلم الطلاب كيف تعبر وماهي الطرق راح يستفيدون .. اما اذا كان يدخل ويالله عبروا عن الموضوع الفلاني .. فعلى التعبير السلام ..

الكل اكيد راح يتفق معاك و انا اولهم

إقتباس انا شخصياً استفدت من المعلم لانه كان يعطينا انواع التعبير وكيف نتحدث دون تردد واذكر انه اوصانا نسوي رسائل وتقارير عن اشياء تحصل بالمدينه .. وهذا جميل ..

اذا انت محظوظ بمدرسك

إقتباس وفي الختام اتمنى ان كل معلم يوصل الرساله لطلابه بصدق و امانه ..

هذا ما اتمناه


مشكور اخوي الكلاسيكي على المرورك و رايك




____________________________________________________________________







ماقصرتوا يا شباب و يا بنات على ردوكم


و اتمنى في باقي الردود انها تكون اراء و تجارب و حلول

مو يمر و قول انا اتفق مع فلان و علان


ابي راي او تجربه



و





سلامـ

اكاد احلف لك ...أننا لو تعلمنا التعبير خير تعليم ما رأيت عاطل واحد ...والي يبي يعرف شلون يقولي

إقتباس من ان وصلت الى هنا في امريكا

كيف سرعة الاتصال عندكم
سؤال مادري وش يبي بس عطنا الجواب
نبي نسوي مقارنة بينا وبينكم

التعبير بالانجليزي ممتع ليش لا
لانها لغ جديده او ماتشوفها بكثره
ومجردانك ماتكتب صفحه او ثنتين تحس
انك مسوي انجاز
الصراحه مادة التعبير ماده حلوه مره
لكن بالانجليزي احلى بالتاكيد
وفي الاخير تبقى وجهة نظر

والله ما ادري وش اقولكم .. بس ترا التعبيير مهم في [ نجاح ورسوب الطالب ] ......


وشكرا ..

طيب كيف كانوا يفيدونك ؟؟ ما هي طريقة تدريس المادة اللي مريتي فيها ؟؟


طريقة تدريسهم لي كانت المعلمة تطرح الفكرة وتتكلم عنها بعدين تناقش الطالبات فيها والحصه اللي بعدها البنات يكتبون مسودة تعبيرهم ويقدمونها للأستاذه تشوفها وتصحح اخطائهم الإملائيه والنحوية وتنبههم على الأفكار الغير مترابطة والحصة اللي بعدها يقدم التعبير جااهز.....