اللي بيبني زواجه على نظره أو ثنتين ! عز الله أفلح !

إقتباس الرسالة الأصلية كتبت بواسطة رائدة الزعيم البعض للأسف ينظر للأمر من منظور التقاليد والعادات كنت أتكلم عن هالموضوع من فترة مع مجموعة متحجرة فكرياً مثلا هالمجموعه يبيحون لأنفسهم الميانه مع السواق والبائع في السوق وحتى الماسن مع من لايعرفونهم لكن يرفضون النظرة الشرعية أو مكالمة الخاطب بإشراف الأهل بحجة أن الرجل بيفكر أن اللي شافها هو أكيد شافها غيرة الرجل اللي يفكر بهالطريقة بالتأكيد مريض وكذلك المرأة المدعية عكس ماهي علية أيضا مريضة الزواج مشروع حياة لابد وأن يعرف الرجل شكل زوجته وتفكيرها وأسلوبها لأن ما يناسب غيري قد لايناسبني نعم المرأة متدينة وتعجب والدتي لكن ليس شرط أنها تعجبني لا أقول أن نهمل مسألة الدين لكن أتكلم عن سمات الشخصية فية شخصية إجتماعية شخصية خجولة شخصية مزوحة شخصية جادة يحملون نفس درجة التدين لكن الرجل يناسبة شخصية واحده فلو كانت متدينة ومزوحة قد لايتقبلها شخص متدين جاد أو حتى غير متدين والأمر ممكن نعكسة أيضا على الزوج قد لايناسب المرأة لكن يناسب ذوق والدها لاذوقها هي وفي النهاية ما يكون فيه توافق لو الأثنان عاقلان سيستمر الزواج لكن ستكون العلاقة رسمية والبقاء فقط للأولاد اللي جابوهم عشان يقربونهم وهم بعدوهم أكثر للأسف مجتمعنا لازال محاط بتقاليد وعادات لا تقرب للدين بصلة إنما هي ما وجدوا علية آبائهم بالحب والإشراق

شكرا رائدة اختصرتي من وقتي ووقت المفكرين العرب الشي الكثير

وياطويل العمر عندنا هنا ناقش اي شي في اي موضوع
حتى في الدين لكن كل شي الا العادات
على اني ماقتنعت بنظام الشوط الثاني
لكن تقدر خلال المرة الوحيدة تكون مفهم اهلها انك تبغى تتكلم معاها
وتروح تجيب لك شربات وترجع وتشوفها وكذا
بالعربي تخلص امورك مرة وحدة

اما بالنسبة لاغلب الزواجات الناجحة هي اللي تكون خلال زمالة ولا صداقة ولا دراسة
هالكلام انشائي اكثر منه حقيقة ولو تشوف هنا نجاح لزواجات مثل ماقال قرقاص مثل الحبحب
ماشافها الا يوم الزواج وبعضهم عايشة معاه اكثر من 30 سنة ماشاف وجهها لين الحين


عموما كل عام وانتوا بخير واللي يبي يشوف واللي مايبي لايشوف
كلهم يتفقون على المسيار

وعليكم السلام ورحمه الله وبركاته

هلا بك اخوي اخر طموحاتي

في البدايه ترا هذا نقاش مو حرب
ليتنا نمشي على هالقاعده
رأئى خطأ يحتمل الصواب ورأى غيرى صواب يحتمل الخطأ
الكل منا له حق يعطي اراءهـ

يمكن الي يبي يشوف شوفه ثانيه جاد ويخاف الله اكثر من الي جامل من الشوفه الشرعيه
يعني لاتتسرعون باالاحكام على الناس
ويمكن مارتاح وحاب يتاكد من هالراحه لانه متمسك بالبنت وعارف اخلاقها ومايبي يظلمها بعدين
مو شرط علشان الشكل

فـ النَّبِيَّ صَلَّى اللَّه عَلَيْهِ وَسَلَّمَ يَقُولُ :
الْأَرْوَاحُ جُنُودٌ مُجَنَّدَةٌ ، فَمَا تَعَارَفَ مِنْهَا ائْتَلَفَ ، وَمَا تَنَاكَرَ مِنْهَا اخْتَلَفَ )

اكيد محد يرضى يدخل بنته كم مره ويمكن البنت نفسها ماترضى
ولكن اذا الشاب كان متردد اهون علي انه يطلب شوفه ثانيه سوا قبلت فيها اولا
ولاياخذني وهو متردد
والاهل اكيد سالوا عن الشاب وجلسوا معاه قبل الشوفه وبيعرفون هل هو جاد
او جاي يتفرج على بنات خلق الله
طبعا محد يطلب الشوفه الثانيه الا اذا الشوفه الاولى كانت سريعه جدا
اما اذا الشوفه الاولى كانت كافيه والشاب جلس يتفلسف هنا نقول لااااا

رائي ان الشوفه تكون وحده ولكن بشكل منظم ويتحقق فيها كل الاشياء الي مفروض تكون
يعني تجلس البنت جلسه كافيه مو تدخل وتطلع بدقيقتين
اذا الرجال حاب يسالها اي سؤال بسيط اثناء الشوفه

يمكن الخجل عند البنت يكون هو المانع اكثر من تشدد الاباء فـ لاتظلمونهم

\

/
الله يرزقك الزوجه الي تسعدك وتسعدها
وكلوك بقشورك ربعنا

السلام عليكم جميعا ، أعتذر عن التأخير في التعليق على الردود ..
فيه ردود شاطحه وتتهم شخصيتي الكريمه بالتفكير الشاذ مع إني قايل من قبل انه للنقاش وكل واحد له الحق في ابداء وجهة نظره من غر تجريح لكن مسموحين

إقتباس الرسالة الأصلية كتبت بواسطة قرقاص هلا وغلا بأخر طموحاتي أجل تبي دور ثاني في الشوفة الشرعية هالموضوع هذا مافيه !! ياناجح ياراسب يارجال زين ربعنا يرضون بمرة وحدة وبالمطاق بعد !! تجي وتطلب ثانية !! تعرف ليش سموا ليلة الزواج ليلة العمر ؟؟ عشان هالشي !! يعني أنت وحظك ونصيبك !! وزي الجحة >>> معليش على التشبيه >>> ياحمراء يابيضاء أنا معك أن هاللي صاير غلط !! والمفروض على الأقل تجلس معها لو شوي !! بس وش يقنع هالأباء الله يهديهم !! وبعدين تراك أحسن من غيرك !! فيه ناس قالوا لهم مافيه شوفة شرعية تبي ولا رح دور لك غيرها !! وفيه اقتراح ثاني اذا تعرف أخو البنت فيه وحده نادها اخوهاعشان تنزل اغراض من السياره طبعا السياره مدخله بحوشهم جت تركض ومعها صحن تفحط كانها تسوق سياره قربت من السيارة عشان تنزل الاغراض شافت واحد بسياره وانحاشت اللي بسياره خاطبهاوجابه اخوها عشان يشوفهامن غيرماتدري لانهاحيويه وسوكذاعشان لايحرجونها

هلا بالمخضرم قرقااص

ياخي الدور الثاني من حقي بعضهم مافهم المطلوب يحسبني ابي دور ثاني عبث لكن كل مافي الأمر قلت انه لو مانجحت النظره الأولى بطلب ثانيه ومن حقي ومن حق البنت بأرضه ..

اما بالنسبه للي يقول مافيه شوفه ، اقول له البنات كثير يابعد حيي

اقتراحك متعوب عليه أعتقد هو الحل الأمثل ، لأنه على الأقل تشوف كل شي وتسمع صوت بالغالب ، فأنا لعله يحصلي هالشي ، ان ماحصلت لي الشوفه أكثر من مره ..

مشكور قرقااص تشرفنا
دائم ردودك تثري الموضوع

والله الصراحة كنت أقول الرجال

عنده وجهة نظر طرحها و هذا من حقه

لكن بعد ما قريت هالسطر
v

إقتباس الرسالة الأصلية كتبت بواسطة آخر طموحآتي ليش في الغالب المجتمعات العربيه غير السعوديه وايضا الغربيه أنجح في العلاقات الزوجية ، لأنه تلقاها صديقه عمل ، او زميله دراسه ، ويعرف تفكيرها وكلامها واسلوبها ويعجب بها والعكس

حسيت أنك تستهبل أو أنك تستهبل


أجل المجتمعات الغربية أنجح في العلاقات الزوجية



س / على أي أساس قلت أن المجتمعات الغربية أنجح في العلاقات الزوجية

إقتباس الرسالة الأصلية كتبت بواسطة Meme وعليكم السلام ورحمة الله وبركاته .. هلا بكـ اخر طموحاتي .. كنت توني مسجله خروج ورجعت اطل ع المنتدى ولا اشوف موضوعكـ السنع .. ولما دخلت ولا لقيت نفسي لازم اسجل دخول .. الموهيم : كل ذي الصجه مسويها عشان تبي تشوف شوفه ثانيه وثالثه ليه بنات الناس لعبه < خخخخخخخخخخخخخخخخخخخخخخ .. طيب من اول مره قزها زين .. وقولها قومي امشي وتحركي وكولي تبن .. ترا عادي الابو ماهوب قايل لكـ شي ولا مهاوشكـ .. فيه قصه لاحد الصابه او التابعين او أحد السلف .. اذكر قالتها لنا الدكتوره في فقه الاسره .. انه جلس يلاحقها في البستان لين رأى مايددعوا لنكحاها .. ولا اذكر القصه كامله لاني المحاضره لها اسبوع .. وامداني نسيتها .. حتى الدكتوره كانت تقول احلى شي انكـ تشوف البنت ع طبيعتها عشان اغلب بنات ذا الجيل يزينون شكلهم . . فادخل عليها مثلا وهي بالمطبخ او صاحيه من النوم ههههههههههههههههههههههههههههههههههههههههههه .. ^^ اتوقع في الحالتين لن ترى مايدعوا لنكحاها < الموهيم الخلاصه ليه مسوي كل ذي الصجه شوفها من اول مره زين وخلصنا .. واذا لهادرجه انت مرتبكـ .. < هي وش ذنبها كل يوم جايه ترتز في وجهكـ .. حتى هي مرتبكه وياليت الي بتشوفها تكب عليكـ العصير عشان تشوف وجهها زين .. شوكرا لكـ ع الموضوع .. ومن جد الفضاوه تسوي هوايل .. معليش رجعت للموضوع بعد مالقيت هذا الشي بالله عليكـ !! .. انا ماقد شفت حجه بيضا .. بعدين اجابتكـ عن سبب التسميه خاطئ .. اختكم .. ميمي

وعليكم السلام والرحمه
هلا ميمي
تقولين أول مره قزها زين ، لكن هل بضمن أني بقز ، يمكن البنت تجي وتروح على طول ولا أمداك تشوف ..
اما أقولها امشي وتحركي داخلن ألقي أوامر أنا ابوها الخايس ليش مايكلمها لكن عسى الله يوفقنا بأبو عقلاني وفاهم

قصة الملاحق في وسط البستان ليتنا ننلاحق كان ماشفتي هالموضوع أنتي وخشتك ، وتأكدي من هالقصه وليت تجيبين نصها ، مافيه مانع

شاكر لك مرورك أختي

إقتباس الرسالة الأصلية كتبت بواسطة السمسار الهلالــي شوفي ترى انا اكره شي عندي التعميم ! ترى الرجال هم اللي جابو ( الحريم ) و الحريم هم اللي ربو الرياجيل فـ بلا فلسفة اللي يشوفك يقول متزوجة ومتطلقة 5 مرات وخابزة الرجال خبز , وبالنسبة للحظ فهو زي ماقال قرقاص مناسب للمراه اكثر من الرجل , لان الرجّال معروف اصلة وفصلة ومن يماشي وهو يتتن ولاّ لأ <-- هذا فالقصيم بس , اما الرياض يقولون هو يشرب ولاّ لأ , والشرقية يقولون هو راعي طلعات البحرين ولاّ لأ , المهم فهو ان سوا شي فاكل العالم تدري عنه عكس البنت ما أحد يدري هي طباخة ولا راعية بيت ولا راعية 24 ساعة تلفزيون ونت ولاّ لاّ , واتمنى وصلت لك المعلومة !! المهم انا احس ما أقدر اشوف نفسي وانا اطلب شوفة شرعية , اخلي الوالدة تشوف البنت واللي يصير يصير وعلى قولتهم (( اما بـ عزها ولاّ عزاها )) وسسسلامتكم !

إقتباس الرسالة الأصلية كتبت بواسطة عسيريه . . وعليكم السلام ورحمة الله وبركاته ياهلا فيك أجل ودك تشوفها أكثر من مره ؟ المشكله مو بالآباء ترا .. الأساس من البنت , اتحداك تلقى بنت ترضى تدخل على رجال مره وثنتين وثلاث وين عسى ما شر ؟ صراحه جلست اتخيل شكل البنت كل يوم كاشخه عشان يجي يشوفها الرجال بالعكس اشوف مره وحده تكفي وزياده .. تشوفها تسألها تكلمها هذا كله من حقك أما انك تشوفها اكثر من مره وتجلس معها لوحدكم .. صعبه شوي مافيه شي يمنعك تشوفها وتكلمها اذا ابوها او اخوها موجودين بالعكس هذا شي عادي جداً على العموم , الله يوفق الجميع ان شاءالله ويكتب لهم اللي فيه الخير يعطيك العافيه آخر طموحآتي وحيّاك الله ^^..

إقتباس الرسالة الأصلية كتبت بواسطة عسيريه . . وعليكم السلام ورحمة الله وبركاته ياهلا فيك أجل ودك تشوفها أكثر من مره ؟ المشكله مو بالآباء ترا .. الأساس من البنت , اتحداك تلقى بنت ترضى تدخل على رجال مره وثنتين وثلاث وين عسى ما شر ؟ صراحه جلست اتخيل شكل البنت كل يوم كاشخه عشان يجي يشوفها الرجال بالعكس اشوف مره وحده تكفي وزياده .. تشوفها تسألها تكلمها هذا كله من حقك أما انك تشوفها اكثر من مره وتجلس معها لوحدكم .. صعبه شوي مافيه شي يمنعك تشوفها وتكلمها اذا ابوها او اخوها موجودين بالعكس هذا شي عادي جداً على العموم , الله يوفق الجميع ان شاءالله ويكتب لهم اللي فيه الخير يعطيك العافيه آخر طموحآتي وحيّاك الله ^^..

هلا عسيرية

كلامي كله ياجماعة الخير فيما إذا لو مانجحت النظرة الأولى ..
والجلسه لوحدنا مجرد وجهة نظر وابوها يصير عند الباب يصرف نفسه بمكالمه والا شي < الله يعينك ياولد

شاكر لك عسيريه تشرفنا

إقتباس الرسالة الأصلية كتبت بواسطة marsal اول شي شوفة وبعدين قالوا شوفة ما تكفي نبي شوفة ثانية و بعدين قالوا شوفة ثانية ما تكفي نبي جلسات شووووف و بعدين قالوا جلسات شوف ما تكفي نبي جلسات نتعرف على طريقة تفكيرها لأجل ينجح الزواج بالمستقبل و بعدين قالوا نبي خلوة لأجل نأخذ راحتنا لاجل تقل نسبة الطلاق و بالاخر الله يستر لا يطلبون جلسات نوووووووم لاجل يتأكدون من طريقة معرفتها بفنوان النوم الحديثة ..!!!!! ياعزيزي الزواج واضح وضوح الشمس و المراهقة واضحة وضوح الشمس ... الزواج ليس مبني على نظرة و ليس مبني على جلسة تتعرفوا على تفكير بعض ... و الدليل زواجات استمرات عشرة سنين او عشرين سنة و بعدين تطلقوا ... يعني لا نفعتهم نظرة و لا نظرتين و لا جلسات و لا حتى خلوة شرعية و لا حتى عيااااااال .... الزواج مبني على الاخلاق و على قواعد الحياة الزوجية ... الاقدام على الزواج يتمثل في عدة خطوات بسيطة ... 1- فتاه من بيت صالح سيمت اهلهم الصلاح .... 2- او قيل لك عن فتاه صالحه ذوا اخلاق عاليه ... 3- النظرة مجرد التعرف على شريك الحياه حتى تقطع هاااااجس التفكير في شكل الطرف الاخر وحتى تعرف حقيقة حياتك و يهداء بالك و يهداء تفكيرك ... 4- احترام قواعد الزواج و المعاشرة بالمعروف ... وبس ... غير ذالك مجرد أفكار مراهقين يتمنى ان لا يفارق وجة االمرأة فقط

هلا بك مرسال ، حياك الله
عزيزي ، أنا مارحت أخطب الا بعد ماسألت عن البنت وعرفت دينها وأخلاقها وسماتها وميزاتها ، لكن بقي أني أشوف البنت لكي يتم الإقتناع والا ماهي فائده حديث ،
(( فلينظر الى مايدعوه الى نكاحها )) وش المقصود ؟ هل المقصود بالنظر هو قطع هاجس التفكير في شكل الطرف الآخراو لأجل يهدأ تفكيري ؟
الأمر الآخر انا ماطلبت النظره الشرعيه مره أخرى الا لحاجه ! ماطلبتها عبثا وأعتقد جواز ذلك ، وأحرى لتحقيق قوله (( فإنه أحرى أن يؤدم بينهما )) .. ولو أني اكتفيت من النظره الأولى ماطلبت اشوفها مره ثانيه ..
تعليقك ، أنه تستمر 10 سنوات او 20 سنه ويمكن يحصل طلاق مع انه حصل ماحصل أثناء الزواج وأنا اوافقك بها النقطه هذي .. طيب لو طلقها في خلال شهر او اقل أو شهرين ؟ وش السبب ؟ في الغالب شكلها ماأعجبه اوأي عيب شكلي واضح ،وما كان يصير ماصار لو انه تفحصها قبل الزواج .. وما اعتقد انه خلال شهر راح يتعرف على أخلاقها وطبيعتها وعشان كذا طلقها ..

طريقة لتفكير سبق قلت انه شي ثانوي والحياه الزوجيه ماتعتمد عليه ..

شاكر لك تعليقك وتواجدك