السلام عليكم ورحمة الله ،،


وش السالفة وش قاعد يسوي الفريق من وراي


شفت نتيجة الشوط الأول من المباراة قلت حرام فاتتني مباراة ما تتفوت
يوم شفت النتيجة بعد ما خلصت المباراة توقعت إن كوره ملخبطين وإلا شيء
لكن ما طلع لخبطه طلع صدق وقلت الحمد لله ما شفتها

< منقطع هاليومين عن العالم مو بس مباريات أرسنال


بصراحة بعد ما شفت الملخص فيه شيء غلط بالموضوع !!!
أول شيء طرد ديابي هذا قرار عكسي يعني المفروض يطرد لاعب نيوكاسل
أما ديابي بصراحه من وجهة نظري ما يمكن ألومه أبدا على اللي سواه ..!!
ياخي قسم بالله بالإعادة أشوف ساقه انكسرت وش ذا الانبراش
ولو ما سوا كذا انتظروا بكرا كل من هب ودب ينبرش وهو عارف لا حكم يبي يعاقبه
ولا لاعب يبي يطقه

أما الحكم هذا قصة ثانية ملعون الصلايب ما يستحي على وجهه وقراراته
ذا الدب الداشر المخرف أجل بالله هذا بلنتي يا ثور !!! وإلا الانبراش الظاهر القانون
عندك اللي ينبرش ويكسر ساق نعطي اللي انكسرت ساقه كرت أحمر !! قاتلك الله يا فسل

غير كذا بحكم إني ما شفت المباراة بسألكم .. يعني مدرب كبير مثل فينجر ومتقدم من الشوط الأول
أربعة صفر معقولة عشان لاعب انطرد يتعادل وبغى ينهزم بعد !!!!
انترميلان انطرد منه لاعب أمام برشلونه على أرضه ومن الشوط الأول ومع ذلك فاز ..!!
يعني الطرد مو عذر صح الحكم ما قصر سوى اللي عليه وأكثر لكن أنا أشوف لو كان فينجر
غير الخطه بعد الأهداف الأربعة إلى خطه دفاعية محكمة ويلعب ع المرتدات ولا يخرج والكوت
لأنه هو أقوى سلاح للمرتدات ...!!! مدري بصراحة بس شيء غريب ع فينجر ؟!!

المهم عاد هاردلك ومعوضين بالـ13 مباراة القادمة ويا لبى الذيابه بعد قسم إنهم حلوين


على طاري الإصابات اللي غير موجودة بفريقنا طبعا وخصوصا إصابة الكاحل وفيرمالين اللي ما رجع للحين
إذا يسمح لي البوس أطرح حكايتي ولا يهونون الاخوان ، لعلكم تاخذون منها العبره والعظه ،
حضرة جنابي وبما إني لاعب محترف في استاد حارتنا الدولي ، طبعا موقع العقد على بياض بحكم إني مخلص
للنادي وبحكم إني أعشق تراب هالاستاد اللي ما فيه مدرجات طبعا لأنه مهما حطينا مدرجات ما راح تكفي الجماهير العريضة ،
< المهم بلا مصالة وجيت ذاك اليوم وأستلم لك الجناح الأيمن وما فيه إلا قوة عرضيات وكور أنت وضميرك ،
المهم وأغلط ذاك الغلط !! وهو إني رحت أستعرض مهاراتي وأسوي ذاك الدبل الخورافي
تماما مثل الدبل اللي سواه محمد نامي النخلي بمباراة نجران لعله شافوني الجماهير ومعهم واحد معه عين
ما صلت على النبي ويعطين ذاك الوحده وما دريت بالهجمة اللي بعدها وأنا أركض إلا وتلتوي رجلي وأنا اللي أدعس عليها
وهي منصفطة وأنا اللي أتلوى مكاني ، طبعا فشيلة بالجمهور وفشيلة بالرجال لا يقولون يتدلع ومن باب الإخلاص
والحب الكبير والوفاء لهذا النادي قررت أكمل المباراة ، لكن هاك النحوت ما فكن من شره وأدعس عليها ثانيه
ولا حول ولا قوة الا بالله ولنفس الأسباب السابقة قمت وكملت وأدعس الثالثة والثالثة ثابته وأنا اللي تنتفخ
رجلي وأنتم بكرامه وتغدي تقول جركل ماء أبو ثلاثة لتر ومن قوة الدعس اللي جاها طلع خط أحمر من الدم أسفل الكعب
بعدها قلت يا ولد ما بدّهاش وأقرب شيء إسعاف التخصصي وأدخل وإلى ذاك المصري قلت إزيك يا دكتور
ناظرني بطرف عين وقال فين الألم وشافها وقال رح اعمل أشعه وعملت ورجعت له قال عادي جدا جدا
مجرد التواء وخرجت الأربطة عن مكانها وكلها اسبوع اسبوعين مع الدواء اللي حكتبه لك وتفز زي الحصان ،
قلت بيض الله وجهك يا دكتور هذا العشم وأنا آخذ الوصفه فرحان قلت بس أكيد هالعلاج غير طبيعي
مئة بالمئة بيكون نوع جديد وشيء خطير ،
المهم وأروح الصيدلية قالي سم هذا بنادول تاكله عند اللزوم وهذا ( فكس ) تدهن فيه رجلك !!!!!
أنا انصدمت من جد !!! ( فكس ) وين حنا فيه والله ما أكذب عليكم تخيلوا التخصصي ويصرف فكس !!
أنا قلت يا إما إني هلوست من أثر الإصابة وبروح للمستشفى ورحت لعطاره أو إن النحوت هذاك يوم ينحتني
كان متوحم بـ فكس وقتها ما فيه إلا هالحلين ...!!
رجعت للبيت وأدخل على أمي وشافتني رابط رجلي يا ولد بسم الله عليك وش بك قلت يمه تعالي وش تقولين
بهالعلاج وأعطيها الفكس قالت يا ولدي من اللي ضاحك عليك هذا مهب الفكس الأصلي !!!!
الأصلي شفه عندي بالصيدلية بالغرفة !!!!
بعد بعد !!!! فكس ومهب الأصلي إنا لله وإنا إليه راجعون ، حسبي الله عليك يا هالصعيدي ..!!!

طبعا السالفة لها الآن أكثر من شهر ، لكن للأسف الشديد إلى الآن الإصابة لا زالت ما راحت
ما يستفاد من القصة .. يبدو إن الفكس هو العلاج الرسمي المستخدم في عيادة آرسنال
وعرفنا السر أخيرا .. والله المستعان ،،


لي عودة قريبة بإذن الله