رغم النتيجة الكبيرة بالذهاب لكن هالمباراة ما راح تكون سهلة لأننا نواجه فريق يبغى يسترد شوية من كرامته
تعامل الإعلام كان غريييييييب بالفترة اللي راحت ، الكل صار يتكلم عن 4 كلاسيكو و يحللون أوضاع الريال و برشلونة و نسوا تماما ان الريال بيلعب خارج أرضه و ضد فريق مسخر الإنتر و طلع ميلان .. اللي يشوف مشوار توتنهام يحس هالفريق مريض نفسيا .. بمعنى انه ممكن جدا يخسر 4 بالذهاب و بالإياب يفوز على نفس الفريق بسهولة ! خسر من إنتر 4 و بالإياب فاز 3 ، ما خسر من اي فريق كبير في إنجلترا على أرضه بالدوري لكنه في البطولات الثانيه خسر 4 ضد أرسنال و 4 ضد فولهام ! فريق لا يمكن الإستهانه فيه رغم الفارق الفني الواضح بين ريال مدريد و توتنهام لكنه يعوضه بالرغبة و دعم الجمهور
بالتالي مسألة التفكير بالمهددين بالإيقاف و بالمباريات ضد برشلونة بتكون خطوة بالإتجاه الخطأ لأننا إلى الآن ما قطعنا الا نصف الطريق و النصف الثاني ممكن جدا لا سمح الله نطلع منه بدون أي فائدة من كل اللي سويناه بالذهاب ، لازم الفريق يلعب بكل قوة و رغبة و ينسى ان فيه لاعبين مهددين بالغياب مهما كانت أسمائهم و أهميتهم لأن الوصول لنصف النهائي - بإذن الله - بيكون خطوة تاريخية لمعظم لاعبين الفريق و لا عمرهم حققوها أما ما بعد الوصول لنصف النهائي شيء مستقبلي محد يقدر يتحكم فيه و الا يختار و يبدل فيه شيء لأننا إلى الآن ما وصلناه ، عندنا الآن مهمة و هي التأكيد على الوصول لنصف النهائي فقط و أما اللي بيغيب بالنصف نهائي والا بيلعب هذا مثل اللي يبغى يشرب من سراب !
لو شفنا المهددين بالغياب نلقى 2 في أخطر مكان بالنسبة لتوتنهام و هي المنطقة اليمنى لريال مدريد ، بيل لاعب سريع جدا و في ظل غياب بيبي اللي هو أسرع مدافع عندنا لازم يدخل مورينهو براموس و دي ماريا لأننا ما نحتاج نهاجم بهالمباراة من اليمين مثل كل مرة ، نحتاج نقفل هالجهة قدام لاعب من أسرع لاعبين العالم و أربيلوا صعب جدا جدا يوقف بيل الا بخبثه المعروف و أخاف لا سمح الله ياخذ له كرت مبكر و وقتها ينجبر مورينهو يدخل راموس المهدد بالغياب و كذا تبدأ تتغير الحسابات المتسرعة ، راموس من 3 مباريات تقريبا و هو مهدد بالإيقاف و رغم انه واجه لاعبين خطيرين مثل سيسوكو و دلغادو من ليون و بيل من توتنهام إلا انه قدر ما شاء الله يغطي جهته بنجاح ، و برضه تواجد دي ماريا دفاعيا مهم لأنه سريع و لياقته ممتازة ما شاء الله و راح يخفف الحمل كثير على راموس ، بيل يعتمد على السرعة و هي نقطة تفوقه على دفاعنا ، وجود لاعبين سريعين قدامه + تنظيم دفاعي يمنع وجود أو الإستفادة من الكرات الطولية الساقطة بيخفيه تماما
الجديد هو وجود لينون اللي ارتحنا منه بالذهاب و هنا يجي الحمل على مارسيلو اللي بيكون في اختبار قوي على قدرته الدفاعية و هو قادر بإذن الله على إيقاف لينون ، الإنجليشي سريع و مهاري لكن فيه نوع من التكافؤ مع أفضلية أشوفها لمارسيلو مهاريا ، الكدش تطور دفاعيا كثييير هالموسم ما شاء الله عليه و سوى له أسلوب خاص بالدفاع الأنيق و استخلاص الكرات اللي يجمع بين الأناقة و التوحش أحيانا .. عنده مشكلة بالثقة الزايدة أحيانا و هذي ما أعتقد بتكون عنده الليلة لأنه يعرف ان المباراة ما تحتمل أخطاء أو فهاوه
بغياب كراوش اللي بيلعب بافليتشنكو أو ديفو ، بافليتشنكو يتفوق بدنيا على دفاعنا لكن كارفالهو يقدر يعوض هالشيء بخبرته الكبيرة و معرفته للروسي في إنجلترا ، بافليتشنكو هداف و قناص فرص و لازم ما ياخذ أي مساحة لأن رجله سم ، ديفو سريع نوعا ما و متحرك ، أتمنى يلعب راموس سواء بالقلب أو بالظهير لأننا نحتاج لاعب بسرعته و بخبرته و قوته البدنية
وسط توتنهام أبرز اسم فيه مودريتش ، تمريراته خطيرة و هو المايسترو .. متى ما أخفينا خطورته بيتأثر توتنهام ، بالذهاب ما شفته أبدا بفضل الله ثم قوة وسطنا كأسماء و تنظيم ، إيقافه دور [ألونسو - خضيره] و بإذن الله قادرين على إيقافه
توتنهام معاد عنده شيء يخسره ، منطقيا بيدخل يهاجم لعل و عسى يسجل هدف مبكر و هالشيء ان صار - لا سمح الله - بيكون اختبار قوي لتجهيز الفريق نفسيا و راح يدخلنا بحالة مالها داعي ، أتمنى الفريق يستغل اندفاع توتنهام بشكل صحيح ، عندنا لاعبين سريعين جدا [دي ماريا - كريستيانو - أوزيل] و مهاجم يعرف توتنهام زييين .. أفترض ان مورينهو أعد اللاعبين للعب على الهجمات المرتدة و فتح اللعب لاستغلال المساحات اللي ممكن يتركها توتنهام باندفاعه .. عشان كذا ودي دي ماريا و كريستيانو يكونون موجودين طالما مورينهو مستبعد بيدرو ليون اللي كان وجوده بيفك لنا أزمة عشان ما نخاطر بدي ماريا ، كاكا برضه وجوده ممكن يحل الموضوع نوعا ما اذا فضل مورينهو يريح دي ماريا .. كاكا يبدع في المساحات و أفضل طريقة يظهر فيها هي اللعب على المرتدات - هذا طبعا لما يكون بجاهزيته البدنية - .. فممكن ندخل بكاكا على اليسار و كريس على اليمين و بينهم أوزيل .. ثلاثي سريع و مهاري و بوجود لاعب تمريراته دقيقة مثل ألونسو ممكن نقتل توتنهام بهجمة وحدة في حالة ان الفريق كان بتركيزه .. التشتيت أي كلام ما يصلح قدام فرق منتشية و متحمسة لأنه يعطيها دفعة معنوية بإحساسهم ان المنافس خايف و مرتبك .. عندنا لاعبين يفترض انهم يتقنون الهجمات المرتدة مثل ما شفنا بآخر مباراة قدام بيلباو
الأطراف دورهم مهم بالفريق هالموسم ، واحد من أهم مفاتيح لعبنا هالموسم هو مارسيلو اللي مساهمته الهجومية تحسسني انه صانع لعب ما شاء الله عليه ، بهالمباراة بيكون عنده مهمة صعبة دفاعيا و هجوميا ، تقليل مساهمته الهجومية راح يضعف الفريق و أتمنى مورينهو يخفف الضغط اللي ممكن يصير على الفريق انه يعتمد على مارسيلو هجوميا و يجبر ريدناب يستغني عن لينون أو يكلفه بواجبات دفاعية لأن تقدم مارسيلو يمثل دائما قوة ضاربة للريال و بيأثر على المنافس بجهته اليمنى لأنه يحتاج يقفل جهته بأكثر من لاعب في ظل مهارة مارسيلو و تفاهمه مع كريستيانو
أديبايور دوره مهم الليلة لأنه أكثر لاعب يعرف توتنهام و ملعبه ، الكرات الطولية اليوم من نقاط قوتنا بوجوده و أتمنى نستغلها صح مثل المباراة اللي راحت
غياب لاس مؤثر جدا لأنه المحور الدفاعي الوحيد إذا بغينا نحافظ على النتيجة و نقفل ، مدري وشلون بيتعامل مورينهو مع غيابه خاصة و قاقو مصاب برضه ، ممكن يعطي أدوار دفاعية للاعبين الهجوميين مثل ما سوى مع إيتو و بانديف في الإنتر ، يعني نشوف دي ماريا يرجع كثير للخلف و يلعب كمحور ثالث بالجهة اليمنى ! أو كريستيانو مثلا بالجهة اليسرى
[الشوالي - رؤوف خليف] اجتماع النحس مع التحيز الله يكفينا شرهم
ريال مدريد يقدر يتأهل بإذن الله لكن لازم الفريق يدخل و هو متأكد ان كل شيء ممكن يصير في كرة القدم ، لازم يحترمون توتنهام بما يستحق بدون إعطائه أكبر من حجمه ، كتبت قبل ان الديبور سووها ضد ميلان في 2004 بعد ما كانوا خسرانين 4-1 بالذهاب و ماهو مستحيل يسوونها الدجاج في حالة استهتارنا ، قتالية و روح و رغبة طول الـ 90 دقيقة و بعدها بإذن الله ينفتح لنا باب البطولة الكبير ، الليلة فرصة تاريخية لكثير من لاعبيننا عشان يكتبون لأنفسهم تاريخ جديد مع الريال و بإذن الله يكونون على قدر المسئولية ، مهمة ما هي صعبة لكن برضه ماهي سهلة لذيك الدرجة رغم فارق الأهداف ، الله يوفقنا و بإذن الله نبارك لبعض بعد المباراة بالفوز و التأهل