ياكثر مواقفي إللي تدل على عشقي للزعيم

آخر موقف كان يوم مباراة الهلال و الأهلي الأماراتي في دوري أبطال آسيا
طبعن قررنا انا وصديقاتي في صباح المباراه نلبس تي شيرت الزعيم في الكليه
المهم تجينا وحده من المفتشات وتقول وش هذا قلت وش فيه حددي بالضبط=مسويه بريئه
قالت الزي مخالف قلت مالك دخل
وجلسنا نطلع وننزل وهي ورانا حنا متعمدين جالسين نلعب قلنا إنتي وش تبغين الحين عرفنا الزي مخالف وبعدين؟ قالت للعميده والعميده مصريه ورحنا لها وقعدنا نسولف ونضحك معاها وإللي تقول انا آشجع الأهلي المصري وإللي تقول الزمالك ووحده تقول آمووت في جدو وبالأخير قالت على محاضراتكم الله يوفقكو ويوفق الهلال قالت آبقو بشروني إدا فاز النهارده
وعرفنا بالصدفه المفتشه نصراويه وطينا عشيتها بالمعاير
وكل يوم نكتب كلام ونكت عن النصر ع باب غرفتها لأنه من النوع إللي يمسح
يعطيك العافيه خليتنا نتذكر مواقفنا الحلوه مع الزعيم

انا الحمد لله ماقد صارلي موقف هذي السنه مع اني حظرت حول 11 او 12 مباراة هذا الموسم للهلال ولا صار لي اي موقف الحمد لله

الموقف الي خطيير صارلي السنه الي راحت مباراة الهلال وام صلال الي هي اخر مباراة بالموسم المباراة اذكرها كانت يوم الثلاثاء وتأجلت عشان الغباار وخلوها يوم الأربعاء المهم انا متحمس وجيت ووصلت الملعب يوم الثلاثاء ويجي واحد ويقولي المباراة تأجلت بكره انا طبعا كان معانات انا وابوي ويالله وافق اني اجي لأن وقتها كان يوم الأربعاء علي اختبار ويبيني ارجع مبكر والمهم وارجع بيت جدي لأن بيته في شرق الرياض والملعب في شرق الرياض وانام عندهم وجوالي مقفل واشحنه والا تجيني مليون الف رساله من ابوي قال مافيه روحه بكره الملعب وبجي باخذك ومدري وش وادق عليه واقوله ليش تاخذني انا اجي بنفسي بالسياره ويقول لا لازم انا اخذك والسياره بسحبها منك ولا عاد فيه حظور للمباريات وغبت الأربعاء واخذت صفر في الرياضيات وجاني تصفيق من ابوي لين حبيت الأرض وعقبها حرمت اني انام في بيت جدي اذا كان بكره دراسه وكل هذا عجز اني ارجع بيتنا عشانه بعيد عن الملعب بس الحمد لله ان ابوي مع محاولات عديده وافق انه ما يسحب السياره وخلاني اروح مباراة الهلال وام صلال وبمعانات وياليتني ما حظرتها لأن الهلال خسر

لاكن والله كل شيء يهون لأجل الزعيم واهم شيء نجحت في الماده وعلى الحفه بس اهم شيء اني تعديتها

وهذا الموسم الحمد لله افضل موسم لي والهلال وجعله دووم يااارب

ومباراة ام صلال اخيس مباراة حظرتها في حياتي وجعلها ما تتكرر يارب

هلا وغلا

انا والله يصارتلي مواقف السنه هذي بذات منساها طول عمري

انا بدوره عسكريه المهم مطلع طول الاسبوع كلها عندهم ومهرب جوال ومشترك بخدمه الهلال وتجيني اخباره اول بأول

المهم اليوم الي يلعب فيه الهلال تلقاني جالس زي المجنون لحالي وقاعد افكر كيف اتفرج عليها

المهم في موجود صاله رياضيه كبيره وفيها شاشه بلازمه يعني الجو فله هع ودايم تلقاها فل فمابالك اذا كانت مباراه

المهم قلت لازم اغامر وروح هذا الكلام بعد صلاه العشا وقتها مباراه الهلال والاهلي النهائي

وروح عند الصاله والقاء الضابط موجود قلت لو اخش راح يكفشني وبعد مده من التفكير العميق هع

قلت خلني اتفرج من عند الشباك الشباك فاتح شوي يعني نوعا ما واضح شي

المهم واتفرج على المباراه ويجي هدف الاهلي وساكت المهم الوضع مشا زي الحلاوه

لاكن يوم جا هدف التعادل صرخت صرخه لا اراديا طلعت مني من الفرحه

مدريت الى الظابط خامني من ورى وهيا تعال شوف من الجزوات الي جاتني يولد بغيت افصل بس الحمد لله

والموقف الثاني كان مباراه الهلال والاتحاد النهائي يوم الجمعه التحضير كان الساعه 5 العصر وانا اتفرجت على المبااره

ومجيتهم الى الساعه 1 بالليل وعاد يوم جيت كانت مقفله معي الزعيم مهزوم وباخذ جزوات

المهم اكلت ذاك الاسبوع جزوات قسم بالله اني اكلت تبن من جد وحجزوني 4 أسابيع ماطلعت ولاشفت اهلي

لاكن كلها فداء لعيون الزعيم

(/{[<\كل شي يهون لعيون الزعيم/>]}\)