في البدايه ابن امه يقولي وش تحس فيه تكتب موضوع بهالحزه..مسكت معاي الا اكتب واتفلسف والصراحه ما حصلت غيركم اتفلسف عليه..
لما تصحيك امك عز الظهر عشان تروح تشتري اغراض للبيت والا تاخذك اختك من اذانك عشان توديها للمشغل والا تمسك لوحدك طريق خريص بالرياض والا طريق مكه بجده والا طريق ابها الخميس..
وقتها اكيد انك بتشغل المسجل تسمع لشريط سواء كان ديني(قران - محاضرات)والا اغاني(طربيه - سريعه - كسرات - شعبيه بقيادة مزعل)..
عاد لما تسمع لمزعل ما لك احد امرين يا انك بتدخل معها جوو وتجيب كرتون المناديل جنبك والا بتحوم كبدك وتستفرغ..وانا بجد اقرب للامر الثاني..
ما علينا نرجع لموضوعنا وصلنا الى انك بتشغل المسجل وإلا بتشغل الراديو وتسمع لـ MBC FM..وبثارة الاهداءات..
اللي فووق اسحبووا عليه اكبر سيفون في الشرق الاوسط او اعتبرووه مقدمه..
بشهر رمضان الانسان يحاول ان يبتعد عن المنكرات ومعاصي قد ما يقدر..فتجده مع دخول الشهر يمسك جميع اشرطة وكاسيت الاغاني ويحطها باقرب كيس وعلى شنطة السياره ويخلي كم شريط تحت المرتبه يقاله نساهم لانه عارف نفسه حده اول اسبوع ويحن اليها..
الكثير منا بشهر رمضان لما يبطل يسمع اغاني يتجه لـ MBC FM وعلى بالهم ان هالاذاعه عندما توقفت في بث الاغاني العاطفيه مثل (سوي كنك ما دريت وبوسني - وحوطني جوا بعيونك)وبدت بتقديم برامج دينيه مثل برنامج الافتاء..وبعض الاناشيد الاسلاميه..بانها اذاعه مناسبه للاستماع في هذا الشهر الفضيل
الا انهم لا يعلمون او قد يعلمون..فيه كم واحد مر علي لا يعلم<--اخلص علينا...ان هناك بعض الاناشيد..تسمى بهذا الاسم اللي هو اناشيد وهي في الاساس مثلها مثل اي اغنيه..
بمعنى ان الكلمات دينيه ولكن يستخدم معها الات موسيقيه..والمشكله اني كنت افكر ان الناس كلها فاهمه موضوع هذي الاناشيد اللي في الاصل لا تختلف كثيراً عن اغاني..!
الا اني احبطت لما كان معي خويي بالسياره وشغل الـMBC FM الا و عمرو دياب يغرد (يا نووورعلى نووور..اجعل في قلبي نوور..اجعل في سمعي نوور...الخ) المهم قمت وقفلته ..ناظر فيني خويي وهو معصب وقال:وشبك قفلته انت وجهك..قلت له : ما تسمع الموسيقى ذي اغنيه..قال:انت ما تسمع؟؟..هذا دعاء..
المهم صارت هوشه بسبب ابن ذياب..الفاغر يقول الكلمات دينيه يعني انشوده ولما تكون الكلمات غزليه يعني اغنيه..
عاد قلت له اذا انت ملزم على كلامك ..نسمع ابونوره اصرف..بعدها بلع العافيه وسكت ..لانه ما يحب يسمع لابونوره..
للاسف بعض الناس ينخدعون بافكار غبيه ويصدقونها بشكل غريب وساذج..فلا يرفع ضغطي اكثر من ان افتح الـ MBC FM واسمع محمد المازم محتفل باذني بصوته اللي كله نشاز..وهذا كله تحت غطاء الانشوده الاسلاميه..
للاسف حتى الاذاعات الحكوميه سيئه بشهر رمضان الفضيل ما عدا اذاعة القران الكريم..احدى الليالي جلست ادور لاذاعه غير الـ MBC FM فحصلت اذاعه المملكه العربيه السعوديه (جده)...الا واسمع هذاك العزف على العود او القانون صراحه ما قدرت افرق لاني مبطي عنها..المهم كان عزف اليم عاد ما ادري هو عزف لبداية اغنيه او بداية برنامج رمضاني..المهم اني خليت الراديو يبحث مره ثانيه وطبيت باذاعة الرياض وبعدها اذاعة القران ورجعنا لاذاعة الـMBC بعدهااكتشفت ان الراديو عندنا حده اربع اذاعات ويخب علينا..
×
وعليكم السلام ورحمة الله
هلا ومرحبا أبو ناصر
كل عام وأنت بخير ~> لرمضان والعيد
حياك الله أنت وفلسفتك ولو اني كأني مافهمت شي
إذا تتكلم عن الراديو فعندي التعليق
لا تسمع إلا إذاعة القرآن السعودية أو الكويتية أو المصرية وغيرها
أما إذاعاتنا الثانية خربت , هذاك أول يوم إني أدمنت عليه من راديو جدتي الله يرحمها
الأن نصف البث أغاني !!
حتى في رمضان وأولهم إذاعة جدة بآخر الليل , أبحث عن شي يسليني بالسحور ما ألقى إلا أغاني
وفي غير رمضان إهداءات أما الإم بي سي اف ام من زمااااان عنها بعد أن من الله على أخي بالتوبة وصار مايشغلها
إلا صدق إلى الأن أحمد الحامد يقدم بها ؟
/
إقتباس
ان هناك بعض الاناشيد..تسمى بهذا الاسم اللي هو اناشيد وهي في الاساس مثلها مثل اي اغنيه..
صدَقت ..
نظن أنها أناشيد وكلماتها رااائعة , لكن الموسيقى وااضحة ..
وما أكثر القنوات التي تبثها ..!
/
\
# في إذااعة ع الإف إم تجنن
بس لازم إتصال بالأنترنت اللي هي عنيزة إف إم
.. أتمنى يكوون في إذاعات خاصة مثل مافي قنوات خاصة
بتشغل الكثيييير من الي يقضون وقت كبير بالسيارة عن الأشرطة والهواجيس
..
الله يعطيك العافية ابو ناصر وعاش من شاف مواضيعك
واعذرني لو كان ردي برا الموضوع مصدعه ومن زمان عن جو الظهر بالنت اعجبني العنوان , ذكرني بالأسم القديم
.......
ارحب تستهبل كاتب موضوع ؟ والله من زمان عن مواضيعك اخر موضوع حق المخدرات هذااااك المهم ماعلينا , الـ mbc fm حلوة إذاا جابوا اهداءات لطلال صح انه مات الله يرحمه ويغفر له لكن يجي لها طعم ,, مثلا اغنية :-
صعب السؤال - سيدي قم - زل الطرب
ومن mbc fm يجيبون اناشيد في آلآت موسيقية !
خييير ياعمي ؟!
المشكلة ما اعرف غير هالتردد اللي هنا ..
المهم الله يهدي الجميع ولاهنت وبيض الله وجهك
تقبل مروري
شوف يا أبا ناصر .. أنا توي قايم من النوم .. وريحة فمي الله لا يوريك .. لو أنفخ في فار بيطيح ميت أستغفر الله ( والذي نفس محمد بيده لخلوف فم الصائم أطيب عند الله من ريح المسك ) المهم أقول أن توي صاحي .. وعاد أنت تدري أن اللي توه صاحي ويقرأ موضوع يختلف في محتواه عن فكر الصاحي فإن ضغطه يرتفع .. وهذا ما حصل لي ..!!
يا فلاح يا حبيبي يا عيوني يا مصران سرّتي وشريان قلبي .. أنت جاهل جهل مركب ..! أي أنك جاهل وتجهل أنك جاهل .. وهذه هي المشكلة يا جاهل .. إذا ما كنت تعرف الأناشيد ولا تعرف الموسيقى فلا تتكلم فيما ليس لك به علم ..
محمد المازم ما استخدم الموسيقى .. وانما هي ايقاعات ومؤثرات .. اذا ما تعرف تفرق بينها فهذي مشكلتك البعض من باب البجاحة لما يسمع أنشودة فيها ايقاعات يقول : عطونا مثل هذي وبنبطل الأغاني ..! وهو كاذب والا كان بطّل الأغاني .. يكفي أن هالأناشيد كلماتها دينية والمؤدين رجال والمؤثرات وان كانت قريبة من الموسيقى إلا أنها ليست مثلها .. أما الأغاني .. فلا الكلمات ذات معنى سامي .. ولا المغني قدوة صالحة أو شخصية محترمة إلا فيما ندر .. ولا هي خالية من الموسيقى .. والرقص .. وغيرها من البلاوي ..!
حتى لو افترضنا أن هالأناشيد تستخدم فيها الموسيقى .. تبقى أفضل من الأغاني مليون مرة ..!
أبو ناصر أدري والله وأعرف فكرة موضوعك .. بس حبيت أتكلم عن هالنقطة لأن فكرة الموضوع أصلاً واضحة ومتفقين فيها
الاختلاف في الرأي لا يفسد للود قضية .. معليش اسمح لي انا اوافق خويك في رأيه .. ما يمنع ان الواحد ينطرب وبنفس الوقت يذكر الله .. بس خلنا من الاغاني الاسلامية والاغاني الهابطة .. الحين اللي فاهم رمضان على انه قبل المغرب انتبه تسوي شئ وبعد المغرب سو اللي تبي .. ناس من الربع الله يهديهم عاجلا غير اجل .. قبل اذان المغرب ما ازين منهم صلاة وذكر وقران .. ولا اذن المغرب وافطروا ما تسمع الا طرب وما تشوف الا غنوة .. واذا قلت لهم شئ قالوا خلاص افطرنا .. بالله وش السواة معهم تعبت وانا انصحهم , شكلي ببلغ عليهم الهيئة وهم يتصرفون ..
يعني بتعلمنا من موضوعك انك انسان عاقل مو سامج وانك شاطر وتعرف تفرق بين الاغنيه والانشوده مع اللحن من جد انك سامج >> تحطييم
ماعليك من اللي فوق مقدمه اكتبها بس للسامجين امثالك اهلا وسهلا بالسامج عاش من قرى لك موضوع من شوي اطل بالمواضيع ادور موضوع خويتي بنوته وافتحه واقول كإني لمحت اسم مشبب بس ماصدقت لانك منذ مبطي مانزلت موضوع
المهم استغفر الله في كثير اغاني يحطوها برمضان على انها اناشيد مثل اللي ذكرتهم والناس وراهم فرحانه يقال انهم مصدقين وموضوعك ذكرني كمان بأنشوده برنامج الشقيري ياخي احس فيها موسيقى بس برضو يقولوا انها انشوده مثل باقي الاناشيد
الله يعطيك العافيه على تنبيهاتك ويجزاك خير مشبب
سلااااااااااااااااااااااااااااااااام >> احس ماعندك وقت وانت تقولها