" نزار قباني "

السلام عليكم ورحمة الله وبركاته

كل عام والجميع بخير .

أصحاب تلك الأعين تنظرني .. ترقبني ..

تنتظر مقدمة لهذا الموضوع . فيؤسفني أن أقول :

أني لو أنتظرت لكتابة مقدمة ، سأكره الموضوع وأتركه على الفور .

فليس هنا مقدمه ، ولا هم يحزنون .


فأهلاً بكم .



هو موضوع " تسخين " و كما يقولون " خفافي " و " ع السريع "

أحببت فيه أن أعرض بعض الصور التي التقطتها أثناء رحلتي إلى ( سوريا ) مع بعض التعليقات الخفيفة .


فـ ع ـلى السريع .. هيا بنا /



كانـت رحلهـ سريعه وجميله وليست بهذا ( الغلاء ) المتوقع .

فأقمنا في البداية بـ دمشق .. ثم بعد ذلك أتجهنا مع ( جروب سياحي ) إلى مناطق شرق وشمال سوريا حيث الطبيعه الخلابه والمناطق التي إن لم تسعبل حين تراها فأنت بالتأكيد لديك مشكلة ما في " الغدد اللعابية " .. وبعد ذلك عدنا إلى دمشق .



بئساً أيتها " الفصحى " .. تربطيني دوماً ..


//

أول أسبوع قعدناه بـ دمشق ماكان فيه " طلعات " مميزه .. غير المطاعم و " جبل قسيون " اللي يطل على مدينة دمشق كلها لكن كانت الزياره له ليلاً فما قدرت أصور .

وبعد مرور أسبوع تقريباً جاني أبوي ومعاه ورقه وقالي ترا حجزت مع جروب سياحي بيودونا الشمال والشرق بالباص .. وعطاني الورقه اللي فيها البرنامج علشان أقراها ..

ليت الورقه موجوده معي للحين علشان أوريكم ياها وتضحكون ..

أنا قرأت الورقة على أساس أبي أعرف وين بنروح بشكل دقيق .. إلا وألقى أمامي " موضوع تعبير " بدون مبالغة .

يا أخي ما أحد طلب منك تقعد تمدح بالمناطق اللي بنروحها .. نبيك توصف بوضوح وين بنروح ..

أجل كاتبين بأحد الأسطر " ثم سيفاجئكم البحر بزرقته الساحره وإطلالته الرائعه " .... سلامات يابو الشباب ؟!


وطول وحنا راكبين الباص وماسكين الخط وأنا أقول : " ماوده يفاجئنا البحر بزرقته الساحره ؟"


وبصراحه أنا لما قرأت الورقه وشفت المدح .. قلت أكيد يبالغون ومارح نشوف شي زين .. لكن والله ظلمتهم وشفت مناظر ما أنساها طول عمري ..


والأن نبدأ مع أول صورة .. وهي مسك البداية /





هذا جبل متواجد على الشاطئ بمنطقة أسمها ( رأس البسيط ) .. ولاحظوا ارتفاع الجبل الخيالي لدرجة تداخله مع الغيوم بـالسماء .





هذه منطقه أسمها ( البحيرات السبع ) .. وهي عباره عن سبع بحيرات متصله ببعضها ومن حولها تلال وجبال خضراء .. المنظر هناك كان روعه .






وهذه البحيرات لما نزلنا عندها تحت وأخذنا أحد القوارب اللي تحرك بنا في البحيرات .


والصور التالية . صورتها والباص يسير بإتجاه الشمال لمدينة ( صلنفه ) اللي فيها الفندق .. وطبعا كان سير رائع وما حسينا بطوله لأنه على يمين الطريق وعلى يساره كانت هناك جبااااااااااااااال خضراء تماماً .. ليس لكيلو أو لكيلوين .. بل لعشرات الكيلو مترات والجبال تحيط بنا والخضره بكل مكان في منظر رهيب خلاني أقول : " والله انك صادق يا كاتب موضوع التعبير "











الصور مب واضحه مره لأني التقطتها والباص متحرك ..






هذه صورة الطريق اللي عند الفندق . الأشجار من كل مكان .






وهنا صورة أخرى أيضا ويظهر فيها الباص اللي نركب فيه .



ثاني يوم ذهبنا لمدينة ( كسب ) .. وهذه مدينة بين الجبال وتقع على الحدود السورية التركية حتى أننا شفنا المعبر التركي .





هذه صورة واحنا نصعد الجبل بالباص .. لأن مدينة كسب بأعلى الجبال والوصول لها لازم يكون من طريق هالجبال .. والجميل في الأمر أن الطبيعه يمين ويسار من حولك بشكل كثيف .





أنا ابعرف شي واحد بس : هاللي ساكنين بهالجبال والطبيعه حولهم بهالمنظر .. وش يحسون فيه ؟!

طول الطريق لكسب والمناظر زي كذا من جنبنا .




والأن وصلنا مدينة كسب .. لاحظوا الجبال جايه من فوق العمارات في منظر جميل .. وأصلا الجبال تحيطها من كل جهه .






على فكره .. مدينة كسب مشهورة بالصابون الطبيعي .. الغابات حولها ياكثرها ماشاء الله .



ثاني يوم أنطلقنا إلى جزيرة ( ارواد ) ودخلنا تمشينا فيها ومرينا على قلعة صلاح الدين .

بصراحه القلعه ( أبو كلب ) .. مخيسه مره وندمت أني دخلتها .. الشيء الوحيد اللي عجبني هو هالصوره .





هذه قائمة بأسماء الشهداء اللي كانوا مسجونين بهذه القلعه .. جيت أحاول ادخل السجن لقيته مظلم وما أشوف شي .. وكان حر وقرف جداً .






هذه وحده مدري وش تبي ؟! نشبت بحلقي وحلق أمي إلا وتبي تقرى لنا الكف .. يابنت الحلال روحي خلاص .. إلا وتبي تقرا بخمسين ليره بس .. وأمي ياحليلها على نياتها تقول لها : أصلا حرام مايجوز . خخخخخخخ

كان ودي أعطيها 50 ليره واشوف وش بتقول عن كفي .. حب أستطلاع فقط .. لكن أمي رفضت .

//

إلا هنا وأنتهينا من رحلة الشمال .. وبالطبع مرينا على اللاذقيه وطرطوس المطلات على البحر الأبيض المتوسط .

كانت رحله جميلة ، وسعرها خفيف مره .. ( 4000 ألاف ليره سوري ) على الشخص الواحد .. يعني تقريبا 350 ريال سعودي .. وشاملة إقامة الفندق وفطور وعشاء ..


//


الأن رح أعرض صور مكان واحد فقط رحته بدمشق عقب مارجعت .. وبصراحه هالمكان أعتبره أجمل فسحه قضيتها بدمشق ..


واسمه ( القريه الشاميه )

وهو المكان اللي تتواجد فيه ( الحاره ) اللي يصورون فيها باب الحاره ( الحاره نفسها مثل ما تشوفوها بالمسلسل كانت موجوده بالظبط ) .. بالإضافة إلى مطاعم وجلسات ومتاحف حلوه .


فنبدأ بالمتحف أول شي بعدها أوريكم صور ( الحاره )




هذا متحف عباره عن غرف جنب بعض .. وكل غرفه تحكي عن شيء معين كان موجود في بداية القرن العشرين بسوريا .. هالصوره عن ( الفخار ) وحق الأواني .





هذا محل الخبار ولاحظوا المرأه قاعده تشتري خبز .. تماثيل دقيقه وواقعيه جداً .





هذا مسجد ولاحظوا الاطفال الصغار يحفظون القرآن .





وهذه ( الدايه ) قاعده تولد واحده من الحريم .






هذا الكوفي شوب حقهم .






متحف لنزار قباني مكتوب فيه أشعاره .. وهذه جزء منها .


وبعد كذا رحنا على منطقة ( باب الحاره )

طبعا هالمنطقه يتم فيها تمثيل أغلب مشاهد المسلسل السوري ( باب الحاره ) والوقت اللي رحنا فيه كانوا منتهيين من المسلسل طبعا وبالتالي كان عباره عن مكان سياحي للسياح يتمشون في الحاره ويلتقطون الصور في مناطق مختلفه كـ ( مجلس ابو شهاب ) و ( دكان أبو عصام ) و ( قهوة ابو حاتم ) و ( مخبز أبو بشير ) وغيرها الكثير .






هذه إحدى زواية الحاره .. وكان يقف بعض الأشخاص اللي يرتدون الزي السوري وكان فيه عساكر يرتدون الزي الفرنسي القديم وكان الكل يتصور معهم .







هذا واحد من اللي كانوا يرتدون الزي السوري ويتجولون بالمكان ومسوويين جو . ولاحظوا شكل الحاره وراه بالظبط نفس اللي تشوفوه بالمسلسل .





هذه الماء الطهور الموجود بنص الحاره .. تذكرون يوم ( معتز ) يجلد ( أبو غالب ) عندها ويكب البليله حقته بحوض الماء ؟





وهذه صورة لزاوية لساحة الحاره ( الساحة اللي فيها دكان أبو عصام وقهوة أبو حاتم ودكان ابو مرزوق )

وتشوفون الرجال اللي قاعد على اليسار في المحل .. هذا بالأصل ( دكان ابو مرزوق حق الخضار ) لكن مخلينه حق اكسسوارات عقب المسلسل .




هذه الساحة الكبيره في الحاره .. ويظهر في الوجه علطول دكان أبو عصام ( العطاره والحلاقه )






وهذه صورة لقهوة أبو حاتم ..


بالنسبه لبيوت أهل الحاره .. أنا ماشفت إلا بيت ( ابو عصام ) و ( أبو بدر الخيخه ) و ( أم زكي ) .. هم الواضحين .. طبعا شفتهم من برا لانهم مقفلين الأبواب .. اما بقية البيوت مدري وينها لان الحاره تقريبا كبيره .. وطبعا فيها كميه كبيره من المشاهد صوروها بمشاهد ثانيه ..

صحيح .. شفت بيت ( الإيدعشري ) وكان هو البيت الوحيد المفتوح .. ودخلت جوا وشفت ( قبره ) موجود بس ماقدرت أصوره لانه كان ظلمه شوي .


خلصنا تقريبا من الحاره ..





صورة لمتحف سيارات قديمه جداً .. والله يا كان حديد السيارات زمان .. حديد بمعنى الكلمه .. مب مثل سيارات الحين ( كلها ورق )



انتهينا من القريه الشاميه .. الآن صور خفيفه لأخر محطه قبل لا أرجع الرياض .. حلفت أني اروحها ورحتها فعلا بيوم سفري أول أيام رمضان. وهو الجامع الأموي مرورا بسوق الحميديه .


من أجل الوصول إلى الجامع الأموي لازم تمر بسوق الحميديه كاملاً .



شفتوا سوق البطحاء اللي بالرياض ؟!

عاد هذا سوق البطحاء حق سوريا .

عباره عن ممر طوووووووووووويل مره .. وكله محلات يمين ويسار .. وكذلك على جوانبه فيه ممرات مليانه محلات . سوق جميل بصراحه .

وبنهاية هذا الممر .. تلقى قدامك الجامع الاموي .





وهذا الجامع الأموي من الخارج .. ولاحظوا تواجد سياح أجانب كثير موجودين لزيارة هذا الجامع الذي بني بالعصر الأموي .

وطبعا الصبايا الخواجات لازم يلبسونهم رداءات تغطي الجسم كامل والشعر .. لأنهم مايصير يدخلون الجامع وهم لابسين من غير هدوم .


والان صور لساحة الجامع الأموي ..













هذا مقام ( زين العابدين )






وهذا المسجد من الداخل .



//



إلى هنا أحبتي وقد أنتهينا من التقرير السريع << سريع ها ؟!

وأعذروني الكلام مكركب والموضوع والله كتبته على عجالة لأني ما حبيت أأجله أكثر من كذا وخاصة كنت ( متقروش ) اليوم بمسابقة الكاش ( منك لله ياعزام ) < أجل قائل البيت الشعري : أية طوفيا !

حبيبي يالسمسار

قبل الختام .. مدري من وين أمدح لكم بسوريا ؟!

بصراحه بلـد نظيفه .. أكلها نظيف .. كبابها نظيف .. الحمص حقهم تاكل أصابيعك وراه ..

قسم بالله لو تذوق الحمص حقهم بتعرف أنه كان ملعوب علينا من مطاعم ( يامال الشام ) اللي بالرياض .

النقطه الثانيه .. تعامل الناس جداً محترم معك.. تعامل راقي ويخليك تحب البلد أكثر ..

مابي أتعمق لكن فيه بلدان عربيه لو دروا أنك خليجي أو جاي من الخليج عز الله رحت فيها .

وش بعد ؟! أيه مهب غاليه كثير لكن فلوسهم مافيها بركه ليه مدري ؟!

أعلى وحده عندهم ( 1000 ليره ) يعني حوالي 80 ريال ..

بس هنا تحس الـ 80 ريال مبلغ محترم .. لكن هناك الألف ليره تصرفها بسرعه ..

عالعموم كانت رحله كويسه بس ماش ما فاجأنا البحر بزرقته الساحره .. ماله داعي بصراحه

ويمكن البعض مستغرب .. بيقول وشلون رحت سوريا بدون ماتروح ( الزبداني ) و ( بلودان ) .. ؟ ..

بقولهم عقب اللي شفته بصلنفه وكسب ماعاد لي حاجه بهالاثنين ..

ناهيك عن أن الزبداني صارت بالصيف ( مستعمره سعوديه ) .. و ( بلودان ) .. مستعمره كويتيه

واعذروني يالغالين مره أخرى الموضوع كان على عجاله وبدون أي ترتيب ويمكن الشي الوحيد المرتب هو ( قصايد نزار قباني )


يعطيكم العافيه وشكراً لمتابعتكم واعذرونا عالقصور وان شاء الله هالموضوع تسخين لمواضيع قادمه بإذن الله ..


دمتم بأجمل حال


أبو يوسف .

..][.. مخـرج ..][..

مآذنُ الشّـامِ تبكـي إذ تعانقـني
و للمـآذنِ.. كالأشجارِ.. أرواحُ
للياسمـينِ حقـوقٌ في منازلنـا..
وقطّةُ البيتِ تغفو حيثُ ترتـاحُ
طاحونةُ البنِّ جزءٌ من طفولتنـا
فكيفَ أنسى؟ وعطرُ الهيلِ فوّاحُ
هذا مكانُ "أبي المعتزِّ".. منتظرٌ
ووجهُ "فائزةٍ" حلوٌ و لمـاحُ


نزار قباني