|| رابطة ♥ ريال مدريد ♥ || - صفحة رقم 1124 - نادي الهلال السعودي - شبكة الزعيم

رامـ 4 ـوس · #16846 10/04/2010, 04:07 PM

يآ عيآآآل ..

خلونا من التشكيله و من يلعب و من مآ يلعب .
المبآرآة مآ بقى الا لها الا سآعآت و التشكيله موجوده و معتمده و منتهيه ..

امممم

فيه نقطه مهمه كنت آبي آتكلم عنها من بعد مباراة البرشآ و الآرسنآل
بس لـ الاسف مآ حصلت وقت فآضي ..
و اللي هي شلون نفوز ..

الكل تكلم عن آيقآف ميسي = آيقآف البرشآ
و هذي نقطه مآآ عليها خلاف عشان كذآ مآبي آتكلم عنها

فيه نقطه ثآنيه لاحظتها بالبرشا مع الارسنال
انه البرشآ يبدأ بثقه و يتفآجأ بـ هدف سريييع من الارسنال عن طريق الجهه اليسرى الي فيها مآكسويل

يعني انا اقول .. >> واخس يآ بيلجريني

لو بدأ بيلجريني بـ ضغط مكثف بـ بدآية المبآرآة مع آستغلالية اللامركزيه اللي آشوفها صآيره ميزه بالفريق
رآح نلقم البرشآ بـ هدف و نلعب بأعصآبهم

ولا وشرآيكم . ؟

Madridi · #16847 10/04/2010, 04:07 PM

ESPN

لاس هو الأقرب للعب في مباراة الليلة وستكون مهمته عزل تشافي هرنانديز .
Exclusive

وما عاد ندري .. مرة لاس بيلعب .. مرة جوتي برا .. مرة كاكا بيلعب .. مرة اوت .. مرة فيه شك ..

صحفنا تلعب بنا .

رامـ 4 ـوس · #16848 10/04/2010, 04:11 PM

^
^

لا لا لا لا

تكفى الا هي .

و الله الا يلعبون فيه كيرم تشآفي و انيستا ..

لاآس مآ ينفع ابد الا اذا كان معوه آبو قآسم يعزز له

معروف ان لاس حمآسي و حرتس
يعني لو يموه تشآفي بجسمه تلقى لاس رآيح بـ خبر كآن
مآ آتمن يكون الخبر صحيح

KUN AGUERO · #16849 10/04/2010, 04:14 PM

إقتباس


	لاس هو الأقرب للعب في مباراة الليلة وستكون مهمته عزل تشافي هرنانديز .

يارب انه يبدأ لاس والله انه يعطي ثقة أكثر من جاجو<<كنت أتمنى مشاركة مامادو ,,لكن لاس ممتاز في المان تو مان يمسك اللاعب ولا يخليه <<وهذا الطلوب,,

باقي 6 ساعات و 45 دقيقة

أعصاااااااااااب هههههه

Keiko · #16850 10/04/2010, 04:49 PM

إقتباس

الرسالة الأصلية كتبت بواسطة Madridi


	ESPN لاس هو الأقرب للعب في مباراة الليلة وستكون مهمته عزل تشافي هرنانديز . Exclusive وما عاد ندري .. مرة لاس بيلعب .. مرة جوتي برا .. مرة كاكا بيلعب .. مرة اوت .. مرة فيه شك .. صحفنا تلعب بنا .

أخوي شكلك ماتعرف التشويش قبل المبارة حركه ذكيه منهم

,, عشان يشوشون على الفريق المنافس ,,

أهنيهم صراحه

Barhoum · #16851 10/04/2010, 04:57 PM

هذي مباراه تستحق تطلق عليها أطلق مباراه في العالم بعد نهائي كأس العالم
مباراه جريمه وانتقام وحقد وكره أزلي بين مدريد و برشلونه

مباراة اليوم هي مباراة الفريق اللي يقدر يلعب على الجزئيات الصغيره
ويستغل كل ثغره وصغيره وأي نقطة ضعف في خصمه
كل شيء بيد مانويل بيليغريني وبيب غوارديولا

مدرب برشلونه ذكي جداً ويبعد لاعبينه عن ضغط الكلاسيكو وأكد في تصريح
أن برشلونه ليس مرشح للفوز على الريال !! وهو كذاب كبير

كلها تمويهات وابعاد ضغط عن فريقه

مانويل بيليغريني ذكي بعد وأكد أن فريقه واثق من الفوز في مباراة الكلاسيكو
وأن الفريق راح يلعب ضد برشلونه وليس ميسي فقط وقال بعد أن برشلونه
فريق ممتاز ويقدر يحقق الفوز

اليوم نقدر نكسب بأذن الواحد أحد ، شرط أن الفريق يقدم اللي عليه
ويلعب بروح ويترك كل الضغوط عليها ويخلي مشروع فلورنتينو بيريز وأمكانية
فشله بخسارته اليوم ويخلي الـ 250 مليون يورو على جنب

برشلونه افضل من الريال في الفتره الحاليه عناصرياً وانسجاماً
في كل خط من خطوطه تلقى لاعب مميز ومن أفضل اللاعبين في العالم
لكن يبقى اليوم خط الهجوم الأضعف من بين خطوطه بسبب غياب أبرا
لكن ليونيل ميسي عن عشره من أبرا !! لعب ذكي جداً قصر طوله
وبنيته الجسمانيه ومرونته تساعده كثير في الاختراقات
فريقنا لو لعب وضغط على حامل الكره وخصوصاً ميسي
راح يقدر يشل 50 % من قوة برشلونه

الريال تحسن كثير في الأسابيع اللي راحت وصرنا نضرب
الأندية بـ الاربعات و الخمسات لكن مشكلتنا في قلوب الدفاع
فيه بطء من ألبيول و غاراي وهذا ممكن يسبب لنا مشكلة كبيرة
قدام لاعب مثل ليونيل ميسي واللي متوقع راح يكون قلب هجوم فريقه بدال أبرا!!
لكن وجود المحاور وضغطهم وتغطيتهم بـ الشكل السليم راح يساعدنا كثير في الفوز
أيضاَ وجود كريستيانو رونالدو راح يحد كثير من خطورة الفيس
كذلك تسديدات كريستيانو من خارج الـ 18 ممكن تسبب ازعاج كبير لـ فالديس
ألونسو راح نعتمد عليه اليوم في التمريرات خلف المدافعين مثل مباراة أتلتيكو مدريد
ماكسويل راح يلعب اليوم وهو ضعيف من ناحية الدفاع ياليت هيغوين يستغل هذي الجهه
هو وسيرجيو راموس بـ الضغط المستمر .

أنت ايه أنت !!
كل أملي فيك اليوم بـ ضرب عمقهم
عطني كل اللي عندك اليوم في الكلاسيكو وبعدها روح وقلبي يدعي لك
لاتخليني أندم على اليوم اللي حبيتك فيه

Ricky 8 · #16852 10/04/2010, 05:28 PM

El Clasico

قبل كل شي السلام عليكم .~

الكلاسيكو .. المثير .. أن يتواجد أعضم لاعبين
في العالم .. وجها ً لوجه .. في فريقين من أعرق الأندية
الأوروبيه والعالمية .. بل وجميعهما متساوون بالنقاط ..
والمباراة مفصليه ومصيريه لكلا الطرفين ..
أكاد أجزم .. بأنها أهم عندي وعند أغلب الإخوه ..
من نهائي كأس العالم ..!!

دعونا نتكلم عن معشوقنا .. النادي الملكي

الكثير يعرف أن الريال على الرغم من موجة الإصابات
التي تعرض لها الريال خلال هذا الموسم ..
إلا أنه صارع وقاتل .. من أجل الصداره ..!!
الصداره وحدها هي ما نبحث عنه ..لذلك ..
يتوجب أن يدرك جميع اللاعبين .. بأن هذه المباراة ..
هي مباراة 6 نقاط وليست بـ 3 نقاط ..!!
3 نقاط لك .. و3 نقاط .. تفقدها خصمك ومنافسك الوحيد
في اللا ليقا ..

إلى الآن .. التشكيلة غامضة بالنسبة للمرينغي ..
وعلى النقيض تماما ً بالنسبة للكتلان ..
تشكيلة البرسا .. معروفه نسبيا ً لدى الجميع ..
وهي التشكيلة التي دائما ً ما يلعب بها بيب ..
وهذا هو مصدر قوة البرسا .. متى ما توفر الإنسجام التام
في الفريق .. فثق تمام الثقه .. بأن الفريق قد إمتلك قوة
قد تساعده بشكل كبير في الإنتصار ..
مصدر قوة أي فريق في العالم .. وأهم خطوطه .. هو المنتصف ..
وأهم لاعب في البرسا .. هو تشافي ..
الذي يعتبر الدينمو الحقيقي للبرسا .. الرئه التي ما ان
تمكن الريال من إيقافها .. فحتما ً سوف ينهي 50 % من قوة البرسا ..
ميسي لا يختلف عليه اثنان .. بأنه لاعب خارق .. ولاعب ممتاز جدا ً
لكن في مباراة الذهاب أمام الأرسنال .. رأينا الكاميروني سونق

كيف إستطاع أن ينهي خطورة ميسي .. بواسطة الضغط عليه حينما
يمتلك الكورة .. لذلك أتمنى من راموس .. أن ينتبه لهذه النقطه ..

شخصيا ً .. متفأل بإذن الله بالفوز .. على الرغم من قوة المنافس ..

لكن أحب أن أذكركم بـ مباراة الموسم الماضي [ الذهاب ] ..
على الرغم من ضعفنا وقوة برشلونه حينها .. وأيضا ً إستلام
المدرب خواندي راموس التدريب قبل المباراة بـ خمس أيام فقط ..!!
إلا أننا تمكنا من إنهاء 75 دقيقه .. بشباك نظيفه .. وقد نتمكن
بإذن الله في هذا الموسم وفي هذه المباراة .. بالإنتصار
والإنفراد بالصداره بإذن الله ..

بكل الأحوال .. معك يا ريال

دوودي 12 · #16853 10/04/2010, 05:39 PM

شباب لاهنتوا ابي روابط للمباراه لان مو متوفر عندي تلفزيون وياليت واضح والله يجزاكم خير

Madridi · #16854 10/04/2010, 05:43 PM

’
’
’

راضي عنك .. وخايف منك .. اعتقد انك لن تتحمل خسارة جديدة ، لن تتحمل الم جديد ، الم داخلي رغم انك انت بالذات
عارف ان اللي سويته حتى الان ما هو الا بداية لأشياء اهم اولها الاستقرار وبناء فريق على اساس قوي ومتين جدا ،
واعادة كبرياء اهين العام الماضي وعلى ملعبنا ، فشلنا في تحقيق مبتغاك في الابطال ، فشل يتحمله حتى الجمهور اللي سبب
ضغط هائل وانا اولهم ، لكن تدري ليه خايف منك .. لاني خايف من هزيمة اليوم واللي كمان ممكن يتبعها تتويج كاتالوني
في ارضنا .. لكن املي بالله كبير ثم بالفريق اللي يلعب كورة سهلة ما فيها تعقيد .. استلم ومرر ( للامام ) لانه هناك مرمى
الخصم ، لعب عودنا عليه مدريد تاريخيا ، والنتيجة ارقام كبيرة جدا في الليغا .. وقد تصبح تاريخية ، وحظ معدوم في
الابطال والا لكنا في نصف النهائي الان .

اليوم لن الومك اطلاقا فيما قد تفعله في حال خسرنا ، نعم سأكون اول من يؤيدك لو استعدت شيئا من فلورنتينو الضياع في
فترة مابين 2004 - 2006 ، اليوم يجب ان نفوز .. يجب ان نفوز حتى ولو 1/ 0 ، فوز و3 نقاط تعطي الثقة .. ولكن
ايها الشامخ .. ارجوك لا تكن كمن يطالب بإذلال البرسا .. ارضى كما نرضى بفوز يقود الى اللقب ، وانا اثق بأنك كذلك

.

مهما كان الدوري باقي فيه امل حتى لو تعادلنا او خسرنا ، ما فيه مثل انك تفوز به على خصمك ثم تواصل مشوارك واللي
هو اهم والا وش فايدة نفوز بالكلاسيكو ونخسر اللقب ، الدوري مهم الان لإرضاء شيء بسيط من طموحنا وطموح
فلورنتينو ، وكأن التاريخ يرجع بنا الى 2001 اول موسم لفلورنتينو واللي حققنا فيه الدوري فقط ، وبقي ديل بوسكي ليحقق
الأبطال بعد كذا ، نفوز اليوم يعني ثقة ، يعني اعادة امل في تكوين الفريق وانه قادر على عمل اشياء كبيرة الموسم المقبل ،
نفوز اليوم يعني دفعة معنوية كبيرة لنا وللملعب اللي الى الان فيه Full Mark ، معناها مواصلة مشوار بيلغريني نفسه في
تحطيم اكبر رقم في الليغا واكبر انتصارات متتالية في تاريخ النادي ، ويا حرارة انقطاع السلسلة امام الغريم .

The Last Chanse

اعتقد انه لسان حال الكثيرين وان كنت لست منهم ، ولكن بحق ستهتز ثقتي بك كثيرا ، الفريق يصل الى المباراة وهو في
ارقام قوية جدا في الدوري ، نعم برشلونة اقوى الان ، وهي حقيقة متى ما تعاملنا معها بشكل صحيح مع حقيقة اننا ريال
مدريد الذي لابد ان يكون بطلا ، فوقتها ووقتها فقط سنحقق ما نريد ، غيرت مفاهيم كثيرة في الاعبين وخصوصا الجنود
القدامى ولكن ما فائدة هذا ان خرجت اليوم مهزوما ، كل العوامل معك ولا اعذار تكفي .

انا اريد ان تستمر ، الكثير يريد ان تستمر ، ولكن الأكثر يرون انه اختبارك الأخير ، ومعاك نصف الدرجة الكلية ، ولا يوجد
تقديرات اخرى اما 50 او 0 .. فقط ! .. اليوم اهم يوم في حياتك التدريبية وللأسف رغم ثقتي بك . .الا انني متخوف وهي
المرة الأولى التي اتخوف فيها على الفريق حتى في مباراة ليون ما كنت القى هالخوف فيني ، وخرجنا بحظ واجهاد وخطأ
منك .

نفسي افهم وش يدور في راسك ، تدريب صباح يوم المباراة وهو الشيء اللي ما قد سويته في اي مباراة ثانية ، وغموض
حتى في التشكيل و لو ان اكثر الاخبار متفقة حول تشكيلة المباراة ، لكن مدري ليه احس عندك شيء بتفاجئنا فيه مثل ما
سويت في ذهاب ليون . الاهم عندي من كل هذا .. لازم نفوز ، اتمنى ان هالأمر ما يشكل ضغط عليك ، وانك ما تتهور زي
خواندي وتسوي اني انا اللي بهزم برشلونة وبنتيجة ، تعامل باللي تشوفه ، تكتيك الذهاب اشوفه مناسب وان كنت اشوف انه
في تكتيك افضل منه وهو التكتيك اللي بكتب عنه في هالرد ولكن في الاسفل ! .

تكفى .. بيضها .. ابيك الموسم الجاي

بدري يا راؤول بدري

مباراة للذكرى والتاريخ ، ليلة العيد ، ليلة كابيللو ، وليلة ابو محمد يوسف سيف واللي اعتبرها من اليالي الخالدة في تعليقه ،
ما علينا مباراة كم اتمنى ان بيلغريني شافها بدل المرة الف ، كابيللو يومها قدم درس للتاريخ ، سجل هدف بدري في وسط
نشوة مدريد والجمهور ، بعدها ترك البرسا يلعب براحته في مناطق الملعب كلها الى رأس منطقتنا ، وهنا يبدأ التنظيف ، يبدأ
الضغط مننا ، نمنعهم حتى في التفكير ، ونشتغلهم بالمرتدة .. الى وسط الشوط الثاني ، بعدها نطلع شوي ندور هدف ، او
نستغل المرتدة صح و نسجل هدف .

تذكرون هالهدف .. لما روبينيو اخذ الكرة وانطلق وهووووبا اوفر للرود اللي ما خاف من الحارس وحطها .

هذا اللي نحتاجه اليوم ، قلوب حجر حديد ، اي شي قوي المهم اننا مهما حصل ما ننهز . والاهم بالنسبة لي ما نتلقى هدف
منهم قبل ما نسجل

لان وقتها ما راح ينفع شي لما تفك الملعب لبرشلونة ، والخطأ اللي سواه بيب في ذهاب الارسنال ما
اعتقد ممكن ينعاد .

تكتيكيا ما عاد لي مجال اتكلم ، الشباب ما تركوا شيء ، المهم لازم بيلي يقتنع مثل ما فعل ذهابا انه صعب تجاري البرسا في
الهجوم ، صعب تكشف ملعبك لهم والا فمعناه انتحار مبكر على اسلوب خواندي راموس ، اسلوب الكامب نو هالموسم كان
مثالي لو استغلينا المرتدات ، ولكن هالمرة كاكا مو فيه ، وهو اللي كان معزز هالاسلوب حتى وان كان رونالدو رجع بشكل
اقوى وافضل ، ولكن فارت للأمانة ما يقدر يسوي شغل كاكا ، كاكا يلعب على السبرنت واللعب العمودي ، لكن فارت يعتمد
على التمرير والدخول من العمق في الهجمة نظام القادمون من الخلف وراجعوا كل اهدافه هالموسم ، فارت لا بدنيا ولا فنيا
ممكن يسوي شغل كاكا ومع ذلك توظيف فارت مثالي جدا حتى الآن والولد يأدي اللي عليه .

اؤيد بطلنا ثائر واللي اتحمد له على السلامة ، فارت الشوط الأول وجوتي الثاني او خلينا نقول بعد الدقيقة 60 ، لان فارت
ما عمره كمل مباراة برتم واحد ، وفوقها قوتي اثبت بشكل قاطع انه افضل لاعب بديل في مدريد ، دايم يدل ويسوي الهوايل
، مدري هل الدكة تعطيه شحنات اضافية والا وش سالفته بالضبط ، بس المهم انه مفيد جدا جدا لما يكون بديل .

ميسي وخطورة ميسي ، اشوف نمشي على نظام مورينيو قفل الطرق ، كلام محمد الماسي

مهم ميسي صار اكثر
مباشرة على المرمى ، يبحث عن الهدف اكثر خصوصا لما يغيب ابراهيموفيتش ، هالشيء ممكن يكون ايجابي او سلبي ،
ايجابي بأنك ما تعطيه مجال يواجه المرمى ، مو تمرر له عشان يشوت مثل سلفستر

، وايجابي كمان لأنه راح يضطر
انه يلعب على الاطراف ، وفيها اربيلوا القوي دفاعيا وراموس الجيد . المهم اننا ما نلعب معه مان تو مان لانه صعب جدا
، اقرب واحد يقوم بالضغط ، والضغط ما يكون بإثنين في نفس الوقت اذا لخمهم يلقى المساحات اللي يبيها ، الضغط يكون
بنظام الحارة

الاول يضغط والثاني يمشط الوضع وراه ، هو الاسلوب الامثل ، مع تقييد تشافي طبعا ، وهالشيء سويناه
في الذهاب ، لكن ما الله كتب لنا نفوز . والفرق واضح هالمرة لازم نفوز .

ما عندي خطة معينة وأسألوا المهايطي عبدالرحمن

عطيته يجي 10 تشكيلات كلها فيها بلاوي ومشاكل ، مرة بدون
صانع لعب حقيقي ، مرة بمحور واحد ومرة بـ 3 واحدها بـ 4

التفكير جدا جدا مشتت .

كلام كبير جدا على هالثنائي ، الأول بالنسبة لي مو مطالب بأنه يثبت شي ، عاجبني وارقامه تشهد ، وغير الارقام ، يتطور
بشكل سريع جدا ، لكن لازم يلجم الصحافة ، ويدخل قلب مجموعة كبيرة من المدريديستا ، لازم يستغل اي فرصة للتسجيل ،
ما فيه اي مجال للتناحة ، الفرصة ممكن ما تتكرر ثاني ، واذا سجلنا قبلهم وقتها ممكن تتكرر

، رونالدو لازم يعوضني
انا شخصيا عن انفراد الذهاب اللي خلاه كاكا يسولف مع فالديز واستعجل فيها رونالدو ولعبها في رجل فيكتور ، رونالدو
اليوم لازم يكون في توب التوب ، اعتقد هو شخصيا عارف ان هالمباراة ممكن ترجعه للواجهة من جديد بعد ما خطفها
ميسي وبجدارة هالموسم ، خصوصا لما يشوف عناوين التهويل من الماركا والاس حول ميسي قبل المباراة ، وصدقت
الماركا لما قالت : مباراة الوحوش . ولابد اليوم يكون رونالدو سيد الوحوش في الملعب .

سبق وقلت متردد في الخطة ، وبالتالي متردد في الاسماء اللي بتلعب جنب الونسو ولو اني مقتنع بضرورة مارسيللو ، ولكن
نقطة الجدل عندي هنا ، جاجو في اخر المباريات يقدم اداء كبير ، فيه تطور بدني كبير عنده واللي يشوف جسمه ويقارنه
ببداية الموسم مع الموسم الماضي يحس بفرق ، جاجو عنده ميزة الثرو البطل واللي اشار له عبدالله ، وكمان لعبه يريح
الونسو وشفنا الونسو كيف يتقدم وهو مرتاح مع جاجو ، لكن كل ما اتذكر كيف انه ضاع العام الماضي ، اتردد وبعدها
يجيني خيال 2008 من جديد وكيف كان محور وحيد ، هواجس كثيرة ، ولكن مع ذلك اتمنى منه انه اذا لعب ، يقدم مباراة
كبيرة زيه زي بقية الاعبين ولكن هو بزيادة ، لاني ابيه يجلس سنة كمان سنة مفصلية اما يكون فيها ريدوندو القادم بحق ،
والا بعدها يكون ماله امل عندي حتى لو تألق مع نادي ثاني مثل كامبياسو ، لاس كمان ومع خبر ESPN بديت ارسم
خطط في راسي مع تواجده ، ولكن مستواه المنخفض ينفرني منه ، وخصوصا انه فقد اهم ميزة عنده ، وهي افتكاك الكرة ،
صار يضغط بس ما يفتك كرة ، لاس تغير كثير عن بداية الموسم ، صح انه رغم ابداعه الموسم الماضي كنت اشوفه لاعب
جراي واننا نشوفه متألق لأن ما عندنا احد يسوي اللي يسويه والا هو عادي ، لكن عطاءه هالموسم وخصوصا في اول 5
-8 جولات كان رائع ، حتى في ذهاب الكلاسيكو كان رائع ، نبهني عبدالرحمن ( ابو دحة )

لنقطة مهمة وبعد التفكير
شفتها منطقية جدا .. وهي ان لاس تغير مستواه بعد ما طلعه بيلغريني في مباراة الكوركون اياب وهو في عز مستوياته
وقتها وطلعت الصافرات والمناديل البيضاء ، ومن يومها ما عاد شفنا لاس . اذا المسألة كذا فلازم نعالجها نفسيا ، واذا ما
نفع فخلاص ما له مكان في الفريق ، هذي ازمة ثقة ، وهي اللي ما ينفع فيها لا تمرين ولا توظيف ، مع ذلك فكرة ان لاعب
يضايق تشافي على الدوام معطيتني جو مع لاس ، ولكن هل هو جاهز فعلا خصوصا انه راجع من اصابة !. وهل جاجو
لو لعب بيأدي اللي نبيه ! دوخة كبيرة وربي ! .

ابي اللي في هالصورة ، لأن اللي اشوفه من بعد مباراة اشبيلية ، شبح حارسنا العام الماضي ، اليوم اهم مبارة في الموسم
، الظروف خلتها كذا ، وضع كاسياس هالموسم يحتاج دراسة لوحده ، لأنه الوحيد في العالم اللي تنطبق عليه مقولة اذا
حظر الحارس حظر الفريق كله مو بس نصه ، كاسياس قالوا انفصل عن خطيبته ، بعدين قالوا ارتبط بوحدة ، لكن الاكيد
عندي انه من يوم ما استلم شارة القيادة وهو حاله مو عاجبني ، ولاعاجب احد ، كنت اتمنى من الصحافة مع شحنها
لرونالدو بذكر ميسي ، تشحن ايكر اكثر واكثر بذكر فالديز وانه متألق وبيروح جنوب افريقيا ، ايكر اذا في يومه يبطون ،
لأنه يخلي التسجيل اشبه بالمستحيل ، ليتك انتبهتي يا صحافتنا .

جيت بأكتب .. لقيت عبود كتب كل اللي أبيه .. فما له داعي ازيد على كلام احسن من اللي بقوله .

قلت كلام كثيييييير ، يمكن اكثره خارج حدود الكلاسيكو اصلا ، لكن هي فرصة نخفف من الضغط اللي نعيشه ، راسي بفتح
فيه مسامات يمكن يهدأ شوي .

اعذرونا على الاطالة ، وتحملوا ثقالة دمنا .

اعذروني بعض الاسماء المذكورة قد لا تكون في الرابطة او الشبكة معنا لأن الرد نزل في اكثر من مكان

Enough

‘
‘
‘

23شنايدر23 · #16855 10/04/2010, 05:51 PM

باذن الله اليوم الفوز للمرينغي

والله انا متفائل بالبرنابيو

خاصة بالدوري

بالتوفيق للريال

القطو الازرق · #16856 10/04/2010, 05:58 PM

السلام عليكم

اهني الكل على هالرابطة اللي كل سنة تقوى اكثر واكثر ... شي مب غريب عليكم والله يالمدريدية

كنت متشائم طول هالاسبوع اننا بننرقع بالكلاسيكو .. وجت مباراة الارسنال وحطمتني اكثر واكثر

استمعت وانا اقرا اخر كم صفحة من الرابطة، بعض الردود شاطحة وبعضها عقلانية

الى ما قريت رد الاسطورة ابو يوسف

إقتباس


	أخيرا روبين كازان هازم البارسا في الكامب نو ومعاهم ميسي وابرا اتليتكو هازم البارسا ومعاهم ميسي وابرا البارسا فريق ممكن ينهزم، وممكن تدخل فيه اهداف وحنا الريال صاحب اقوى هجوم في اوروبا

كلام من ذهب والله ياشايبنا

ماعندي كلام كثير اقوله
< لك وجه اصلا ؟

بس حبيت اطل واسلم عالاعضاء .. اخصّ ابو يوسف وسليم وعبودي ويزيد

ويحيى

، وخالد اس ايه مدري اذا موجود للحين ولالا

وماماتي وباباتي ولحسني وحسنين وكلّ الشعب

هيّ ليلتك يابطل

سلام مؤقت .. عقبال ما نرجع نبارك لكم الليلة

واعذرونا عالقطعة .. مالي عذر والله ادري اني مقصر وبزيادة بحق الرابطة

موفقّين .. برب

" بسبة ردي هذا بتكرر تاريخية كلاسيكو العام

الله يستر

"

23شنايدر23 · #16857 10/04/2010, 05:58 PM

اليوم ريال مدريد وبرشلونه بكرة السله

احس ماحد بيروح للملعب كلهم للبرنابيو

دوودي 12 · #16858 10/04/2010, 06:02 PM

ياليت رابط يااخوان تكفون عشان عندي دوام وماعندي تلفزيون

هتلر الرياض · #16859 10/04/2010, 06:11 PM

السلام عليكم

لاوالله تبون الفوز بعد

شلون يفوز ريال مدريد و القطو الأزرق ويحيى ( مدريد ) رادين

نرجع للجد

المباراة اليوم نفسياً اكثر من انها على أرض الواقع

الصراحة شاهدت التشكيلة المتوقعة لبرشلونة

الأسماء متفاوته بين الفريقين

فيه نقاط قوة ونقاط ضعف لدى الفريقين كلهم

البلا كله في ميسي واكزافي وانييستا لو لعب

بيدرو قد يكون نجم الليلة من برشلونة كون التفكير كله على ميسي

بالنسبة لفريقنا الموقر

كاسياس و رونالدو وهيجواين متى ماكانوا بيومهم سينجح الفريق بالفوز ان شاء الله

كل الاعضاء تقريباً ذكروا أن المباراة بين عقول بيلجيريني وجوارديولا

كلام منطقي جداً

الأهم الثقة والتسرع لابد يكون موجود

أتمنى مايتعلق شي بالمباراة علشان مايتشتت ذهن اللاعبين

قد يفوز الفريق بهالمباراة لكن قد يخسر مباراة أسهل منها

المباراة نظرياً نهاية الليغا لكن على الواقع الليغا لم تنتهي بعد

كل الأمنيات لفريقنا بالتوفيق

KUN AGUERO · #16860 10/04/2010, 06:19 PM

إقتباس


	ياليت رابط يااخوان تكفون عشان عندي دوام وماعندي تلفزيون

أخوي أكيد العيال بينزلون رابط للمبارة<<بس مهب الحين (قبل المباراة بنص ساعة تقريباً)

GALACTICOS

مايقصر في كل مباراة يسدح الروابط وبكل اللغات