22/04/2010, 12:08 AM
|
 | زعيــم مميــز | | تاريخ التسجيل: 04/01/2007 المكان: Gold Coast
مشاركات: 4,497
| |
لو هي على مستوى فريق ونهج مدرب يـنقل لـ اللاعبين كان ما حكمت يابوعابد بهـ الحكم المجحف على الأقل من وجهـة نظري .. المفصل دائماً في كلامنا هو النتـايج الي حاولت انك تبتعد عنها في ردك على سليم وفسرت ان تحقيق بطولة مو مهم الأهم سمـٌة او صبغة لـ الفريق نشوفها هالموسم من بيللغريني .. الكلام الي انت تطلبه الأغلبيـة يتفقون على تغيـٌر مدريد بيللغريني عن أي ريال مدريد قبله .. مو شغل ترفيع او تطبيل لا والله مو اسلوبي في الردود .. لكن من جد صرنا نشوف كورة حلوة وسريعة .. العام كلنـا كنا نشتكي ان فريقنا من أبطئ الفرق في أوروبا .. والأغلبية اتفقت ان سبب هزائمنا الكبيرة من الريدز والبرسا كانت بسبب هالمشكلة أو العطل .. السنة ذي وش نشوف ؟! .. فريق يلعب بسرعة كبيرة .. يهـاجم من كل جهة ويبتكر طرق لـ التسجيل ومع كل هالقدرة الهجومية الي عندنا الا اننا ما سجلنا ربع الفرص الي سنحت لـ مهاجمينا .. هذا شي يحسب لـ الكوتش ولا لا ؟! .. مابي اقولك تبي المدرب ينزل يسجل مكـان هيغوآين ولا رونالدو ولا فارت ولا ولا ولا .. من جد وش تبي المدرب يسـوي اذا كان لاعبينك يضيعون الهجمـات وحدة ورآ الثانية ؟! .. عمل بيللغريني واضح على الفريق جداً هالموسم .. فيه اخفاقات محد يختلف على هالكلام .. لكن مو معناه مع اي اخفـاق شوتوا المدرب وعطونا كابيلـو ولا مورينيو !! .. الكلام مو موجه لك بالخصوص يـ السمي لـ الكل بدون استثناء . خيمنيـز مدرب اشبيليه .. بعد متشنا الخورافي معهم .. طلع وصرح .. وش قال الشيخ ؟! .. هذا افضل ريال مدريد شفته في حيـاتي .. كلام كبير وممكن يعتبره الكثير تطبيل .. ما علينا .. رافا بينتيز واحد من المطالب الكبرى لـ الكثير في تدريب الريال وش قال ؟! .. في شهر مارس الريال بيكون فريق لا يقهر .. ما علي من توقيت التصريح .. لكن بأشوف الأشياء الي شافها رافـآ في مدريد بيللغريني والي خلته يقول هالكلام .. أكيد شاف شي وتغير كبير في طريقة واسلوب ونهج مدريد .. فابيو كابيلـو المطلب الأكبر من الجمهور لـ تدريب الريال في كل مرة يسألونه عن مدريد يمدح طريقة أدارة بيللغريني لـ الفريق ويطلب بس الوقت عشان يطلع ريال مدريد بالشكل الي رسمت له الأدارة .. طيب من هالتصاريح الي اخترتها ولا فيه تصاريح أكثر .. ليه هالأشخـاص يتوقعون ان مدريد مع بيللغريني بخير ؟! .. هل هم ما يفهمون كورة مثلاً .. ولا يحاولون يصرفون عشان مدريد ما يفاوضهم خخخ ؟ .. أكيد لكل واحد منهم نظرة .. ولو ان نظرة الدون كابيلو تكفيني بصراحة  .. ما قال اصبروا على بيللغريني الا وهو شايف شي يمكن اغلبنا ما شافه . برجـع لموال النتـايج و المستوى هالموسم .. الأخفاقات { الكلاسيكو - ليون - ميلان } .. خمس مياريات لـ فريقنا يشوف الأغلبية ان مدربنا كان سبب في الخسارة او يتحمل نسبة كبيرة منها .. ببدأها من متش ميلان لأنه هو الأختبـار الأول .. الذهاب على البرنابيو خسرنا 3-2 .. سيناريو المتش لنا في كل شي .. نسجل هدف في الشوط الأول ونمسك القيم الى نص الشوط الثاني من المتش .. خلال هالفترة ضيعنا كم كبير من الفرص الي كانت بتريحنا كثييير وتنهي المتش وبقايا الأمل لـ ميلن في الرجعة لـ المتش .. وش صار بعدها ؟! .. هدف لـ بيرلو يتحمله أيكـر بدرجة كبيرة .. هنا انا اقول لـ نفسي .. وش ذنب بيللغريني في هالهدف .. او بالأحرى .. وش ذنب بيللغريني ان فريقه يتعادل الآن وهو كان قادر يخلصها من الشوط الأول !! .. لك بعدها تشوف لاعبين فريقك ومستواهم .. كل واحد منهم يسحب رجوله تقل مغصـوب يلعب كورة .. يدلك بس على حقـارة مستوى لاعيبتك راؤول و درينثي ماخذين أعلى سكور في تقيم المواقع لـ اللاعبين خخخخخ .. المشكلة وين تكمن هنا ؟! .. منب احاول اشيل مشكلة من شخص واحطها في شخص .. لكن شي طبيعي اللاعبين ما يكونوا في يومهم .. بس اذا كان اللاعبين مو في يومهم ما يتحمل المدرب كل خسـارة لـ فريقه .. متش ميلن الأياب اتوقع كان متش جيٌد لنا وكنـا اقرب اننا نفوز من التعـادل لولا كم خطأ تحكيمي غير وجهة المبـارة بالأخص ركلة الجزاء على بيبي .. كلاسيكو الذهاب .. انت مقتنع ان المدرب عمل شغل فيه وكان يستحق الخروج على الأقل بتعـادل منه .. شي طيب لما تلعب في الكامب نو وتكون اخطر وانجع على المرمى وفوق هذا تظلم بـ اخطاء بدائية من حكم .. بأستشهد بكلامك على ان بيللغريني ما عنده قدرة التعامل مع المباريات الكبيرة رغم انك بنفسك قلت ان كلاسيكو الذهاب مستثنى من هالكلام .. نروح لـ المتش الي بعده .. ليون .. الذهاب .. الكل اخطأ و أولهم بيللغريني .. الخطأ المؤثر كان من ايكر وهو يتحمل على فكرة الهدف بنسبة كبيرة .. الأيـاب .. ولو ان هالمتش كل ما اذكره تجيني حموضه لكن بألخصها في نقطة .. كم تتوقع كنا نقدر نخلص الشوط الأول ؟ .. بالأخص بعد فرصة هيغواين ؟؟ .. ما انكر ان المدرب سلم المتش الشوط الثاني لـ بويل وهذا غلط كبير يتحمله بيللغريني .. لكن كلامي على ان الخطأ ما يحمٌل لـ شخص واحد فقط !! .. الكلاسيكو الأياب تكلمنا فيه وخلصنا .. الجهة المقابلة .. شف بيللغريني كم مواجهة كبيرة كسبها هالموسم .. راح ابدئها بس بفك عقدة الريازور الي لا كابيلو ولا بوسكي ولاتوشـاك ولاهيدنك ولا ولا ولا قدروا يفكونها .. { مـارسيليا - اتليتكو - فالنسيا - اشبيليه } .. أول ثلاثه منهم اخذهم رآيح جـاي .. وانت عارف صعوبة ملاعب مثل الميستايا و الفيلدروم .. هل هي تعد فرق صغيرة ؟! .. مارسيليا متصدر الدوري الفرنسي فزنا عليه بـ مجموع المبارتين 6-1 .. 3-1 كانت على ارضه .. بالمقابل ليون صاحب المركز الثالث هزمنا واخذ بطاقة التأهل .. هي مسـألة توفيق في النهاية .. اتليتكو الفريق الوحيد الي هزم المتصدر في الليغا .. خذناه رايح جاي .. فالنسيا بنجومه فيا و سيلفا و بابلو و بانيغا و و و اخذناه رايح جاي ومتش الاياب كان حرام يخلص 2-0 .. اشبيليه الي مصخرنا في الدور الأول لعبنا معه مبـارة العمر وفزنا عليه بعد سيل من الهجمات .. ما عندي نسبة صحيحة عن كم الهجمات الي صدها بالوب لكن الى الآن اذكر الهجوم الكـاسح لـ مدريد على سيفيـا رغم اننا وقتها كنا خسرناين 2-0 . لكل شيء في الحيـاة ايجابيات و سلبيات .. ان طغت السلبيات وجب التغير .. امـا ان كنت اشوف الأيجابيـات تطغى على السلبيات ليه أغير ؟! .. ليه أطلب شي كبييير ومو ممكن على الأقل في هالفترة وانا عندي شي جيد جداً ؟! .. ليه السبب الي دمرني خلال 8 مواسم ماضية اكرره واقول لالا المرة هذي بتزين .. سؤالي هو ليـه مع كل خيبة امل لـ المدريدين يكون المتهم الرئيسي و المسـؤول الأول و الأخير عن كل الي صار هو شخص واحد .. المدرب بس .. اللاعبين بريئين وش زينهم .. المدرب هو ملعـون الخير كبش الفداء .. ليه يا مدريديســتا ؟! |
الفرق بيننآ و بين إسبآنيآ سآعة وحدة حآلياً 
الوضع العادي
