الشباب السعوديين والعمل في القطاع الخاص.. الى متى الجدل البيزنطي والنظرة القاصرة ؟؟ - صفحة رقم 4 - نادي الهلال السعودي - شبكة الزعيم

abo_nasser · #1 18/03/2009, 06:15 AM

هلا وغلا الصخره..

الان الحال تغير..الموظف بالقطاع الخاص يداوم مثله مثل الاجنبي وممكن افضل
لان فوق راسه مشرف يدور عليه الزله عشان يشوته وبرضو في اخر السنه فيه تقييم..

بالنسبه لي...في بدايتي الوظيفيه افضل القطاع الخاص..صح انه تعب وكرف بس برضو فيه دراهم..

بعد ما اخذ خبره واكتفي مالياً استقيل واروح للحكومي..لبى قلبه..

دوام من 8 الى 2 ولا احلى..

ويتخلل الدوام قراءة الجرايد والسواليف..

افضل من دوام 7 الى 4 بالقطاع الخاص..وما عندك الا بريك الفطور ربع ساعه وبريك الغدا ساعه غيره ما فيه..

سلااااااااااااااااااااااااااااااااااااام

الهنوووف · #2 19/03/2009, 02:11 AM

وعليكم السلام ورحمه الله وبركاته

هلا بك اخوي الصخرهـ

القطاع الخاص والحكومي رحله من الصراعات

بتكلم بجانب الراتب والكرف
اتوقع الخاص يكرف طول وقت الدوام عكس الحكومي الي اغلب دوامه شاهي وقهوه وجريدهـ وفطور

القطاع الخاص غالبيتهم دوامهم الى 4 العصر

والراتب
بالنسبة للقطاع الخاص صعب تحكم عليه بشكل عمومي
لان فيه شركات تتقاعد وراتبك ماوصل ل10 الاف
وفيه شركات اول راتب تستلمه يوصل 9 الاف
طبعا راجع لمؤهلاتك

اشوف المبلغ الي يعطونك نهايه خدمتك مو مثل التقاعد
احس التقاعد اضمن

رائي
الي تخصصه ومؤهله عالي مره يتوجه للقطاع الخاص لانه بيكون مطلوب ومو بسهولة يتنازلون عنه

وفيه شي مهم االاجازهـ ياعمري القطاع الخاص

مايعطلون مع الناس وحتى بالعطل الرسمية ماياخذون نصيبهم كامل

احس الرجال حلو له القطاع الخاص

والبنت الحكومي

والاخلاص والتفاني بالعمل راجع للشخص نفسه مو لجنسيته سوا سعودي او اجنبي ماتفرق
اذا الشخص يحب عمله بيشتغل

يعطيك العافية اخوي الصخرهـ

الهنوووف

كانت

هنا

ورحلت

Fahad Al Sudais · #3 19/03/2009, 04:43 PM

إقتباس

الرسالة الأصلية كتبت بواسطة abo_nasser


	هلا وغلا الصخره.. الان الحال تغير..الموظف بالقطاع الخاص يداوم مثله مثل الاجنبي وممكن افضل لان فوق راسه مشرف يدور عليه الزله عشان يشوته وبرضو في اخر السنه فيه تقييم.. بالنسبه لي...في بدايتي الوظيفيه افضل القطاع الخاص..صح انه تعب وكرف بس برضو فيه دراهم.. بعد ما اخذ خبره واكتفي مالياً استقيل واروح للحكومي..لبى قلبه.. دوام من 8 الى 2 ولا احلى.. ويتخلل الدوام قراءة الجرايد والسواليف.. افضل من دوام 7 الى 4 بالقطاع الخاص..وما عندك الا بريك الفطور ربع ساعه وبريك الغدا ساعه غيره ما فيه..

هلا بك اخوي فالح

والله يالغالي الله يحقق لك اللي تتمناه

ظروف الحياة تتغير مع مرور الايام.. وانت اكيد لديك القدرة على تحديد الانسب لحياتك

بس باعلّق على جزئية بريك الفطور والغداء..

صدقني اللي يشتغل بالقطاع الخاص ويتعود على الشغل والانتاجية.. ماراح يكون الاكل هو اكبر همّه.. يكفي الشاهي والقهوة خلال العمل.. والاكل لاحقين عليه بعشاء دسم بعد الدوام

abo_nasser · #4 19/03/2009, 06:09 PM

إقتباس

الرسالة الأصلية كتبت بواسطة الـصـخـرة


	هلا بك اخوي فالح والله يالغالي الله يحقق لك اللي تتمناه ظروف الحياة تتغير مع مرور الايام.. وانت اكيد لديك القدرة على تحديد الانسب لحياتك بس باعلّق على جزئية بريك الفطور والغداء.. صدقني اللي يشتغل بالقطاع الخاص ويتعود على الشغل والانتاجية.. ماراح يكون الاكل هو اكبر همّه.. يكفي الشاهي والقهوة خلال العمل.. والاكل لاحقين عليه بعشاء دسم بعد الدوام

يؤ...من متى صار اسمي فالح..؟؟

اسمي فلاح..بليز لا تشوهه..

بالنسبه لنقطة البريكات
من قالك انه مسموح بالشاهي والقهوه خلال العمل..؟؟

ومو شرط يكون البريك للاكل..اسمه بريك ..تبي تاكل تبي تسولف تبي تنام
تبي تطلع المهم اسمه بريك..

سلاااااااااااااااااااااااااااااااام

abdogAg · #5 18/03/2009, 11:38 AM

أشكرك أخي الصخرة على المعلومات المفيدة والفوارق بين الوظيفة الحكومية وبين الوظيفة الخاصة ..

بالنسبة لموضوعك لي تعليق على كم نقطة بالرغم من أني لسه أدرس في الجامعة .. ولكن أنا أيضاً من أبناء المجتمع وأعرف اللي يدور حولي ...

*واذا ودّكم تعرفون ليش السعودي يتصرف بهالشكل..

اقول لكم : عدم اقتناعه بالعمل في شركة... يبي وظيفة حكومية

والله إني أدورها وهي طموحي بعد التخرج

* ثانيا : اغلب الشركات تتبع نظام ( البونس ) وهو المكافأة الدورية بواقع راتب نص شهر او شهر كامل كل ست شهور او سنة.. الوظيفة الحكومية تعطيك علاوة سنوية 200 او 300 ريال

حبيبي إذا جينا نحسبها .. الموظف الحكومي أفضل ... لأن راتبه في تزايد مستمر ... وأيضاً ممكن إنهيار الشركة لاقدر الله في أي وقت ولذلك يتوجب عليه البدء من جديد في شركة جديدة أو القطاع الحكومي أما أسوأ مايقابلك في الحكومية هو النقل إلى جهة لاترغبها مع ثبات الراتب بإزدياد ... ولاننسى ساعات العمل التي تصب في الموظف الحكومي ^_* .

*ثالثا : بعض الشركات تسلّمك سيارة.. الوظيفة الحكومية تعطيك ( الضعوي )

وش الضعوي ؟؟ أشك إنها سيارة .. ^_^ أخوي الكبير أعذرني فـ زي ماقلتلك لسه أنا في الجامعة ...

*سابعا : الحكومي يحسم له تقاعد.. وانت يحسم لك تامينات.. مافيه فرق ودي تشرح لي بالتفصيل

...

*لازم نعترف ان جو العمل الحقيقي هو القطاع الخاص

وأيضا الجهد والكرف الحقيقي ... فلا راحة في غير الحكومي

.

أتمنى أكون ماثقلت عليك وشاكر لك طرحك المميز ..

بي إس للصخرة : أشتقنا لنوعية المواضيع القديمة ^_^ ...

Fahad Al Sudais · #6 22/03/2009, 06:07 PM

إقتباس

الرسالة الأصلية كتبت بواسطة abdogAg


	ثالثا : بعض الشركات تسلّمك سيارة.. الوظيفة الحكومية تعطيك ( الضعوي ) وش الضعوي ؟؟ أشك إنها سيارة .. ^_^ أخوي الكبير أعذرني فـ زي ماقلتلك لسه أنا في الجامعة ... سابعا : الحكومي يحسم له تقاعد.. وانت يحسم لك تامينات.. مافيه فرق ودي تشرح لي بالتفصيل ...

الضعوي ياطويل العمر هو --> الخرطي

وبالنسبة للتأمينات والتقاعد..

موظف الحكومة تحسم له من راتبه ( تقاعد ).. اذا وصل سن التقاعد يجيه راتب وهو جالس في بيته

وحتى موظف القطاع الخاص.. تحسم له تقاعد اسمها ( تأمينات ).. نفس التقاعد الحكومي تماما

اذا وصل سن التقاعد يمشي له راتب من المؤسسة العامة للتأمينات الاجتماعية

Fahad Al Sudais · #7 18/03/2009, 07:32 PM

مشكورين على التفاعل جميعا.. ولي عودة لفصفصة الردود غدا صباحا بإذن الله ( قبل اروح الدوام )

معاندالبحر · #8 18/03/2009, 07:40 PM

الصخرة

كلامك كله عين العقل بس للاسف نبحث عن الوظيفة الحكومية على بالنا انها هي الامان

لكن العكس صحيح بشرط اثبات النفس واثبات القدره على العمل في الشركات لان الشركات
ما يبون واحد يبحث عن كرسي دوار الشركات يبون واحد يفيدهم ويفيد نفسه في نفس الوقت

Fahad Al Sudais · #9 22/03/2009, 06:08 PM

إقتباس

الرسالة الأصلية كتبت بواسطة معاندالبحر


	الصخرة كلامك كله عين العقل بس للاسف نبحث عن الوظيفة الحكومية على بالنا انها هي الامان لكن العكس صحيح بشرط اثبات النفس واثبات القدره على العمل في الشركات لان الشركات ما يبون واحد يبحث عن كرسي دوار الشركات يبون واحد يفيدهم ويفيد نفسه في نفس الوقت

كلامك سليم

الشركات تبحث عن الموظف الذي ينتج فقط

الف شكر لمرورك

جرح يشكي · #10 19/03/2009, 08:35 AM

السلام عليكم ورحمة الله

صباح الخير اخوي الصخرهـ

وربي موضوع في الصميم ..

نقاط ع السريع :

# مشكلة الخريجين الجدد والعاطلين عن العمل هي ترسب افكار ومعتقدات شيباننا .. اللي ادخل العسكريه والا وظيفة حكوميه .

# انا موظف في القطاع الخاص .. قبل شهر نزل نظام في الشركة يسمح بـ اقراض موظفيها قروض كبيرهـ بدون فائدهـ .. الراتب الاساسي في ( 60 او 70 او 80 حسب المرتبه ) يعني لو كان على الاقل راتبك 4 الالف .. بيجيك قرض 240 الف ريال .. وغير كذا عندي تأمين طبي شامل لي ولزوجتي ( الله يرزقنا

) والوالد والوالدة .

# حسب ما اسمع من اقاربي اللي بعضهم في القطاع الخاص وبعضهم في القطاع الحكومي .. القطاع الخاص يتميز في اكثر من شي .. مثلاً بيئة العمل فيه افضل من الحكومي وتعقيداته.. ثانياً .. في الخاص تكتسب مهارات وخبرات اكثر من الحكومي .. خصوصاُ ان بعض الشركات الان صارت توقع من الموظف بعقد 3 او 4 سنوات بشرط انه يدخل دورة تدريبيه مدتها سنه " تزيد وتنقص " .

عندنا في الدوام كل شهر ينزل جدول دورات تدريبيه .. كل موظف يختار الدورة اللي يبيها " بعضها اجباري واكثرها اختياري " داخل او خارج المملكه .

# حسب ما فهمته في اول دورة اخذتها .. كانت عن نظام التأمينات .. وتقول لك ان الموظف اذا كمل 40 سنه وتقاعد .. يستلم راتبه كامل بعد التقاعد .." الاربيعن سنه لازم يكون مسجل في نظام التأمينات " والنظام هذا توهـ بادي .. يعني المستقبل مضمون ان شاء الله ..

# لكل قاعده شواذ .. لا تحكم على القطاع الخاص من علاقتك بشركة واحده او ثنتين .. فيها الفالح وفيها الطالح .

انا طولت

بس وش اسوي .. الموضوع مهم .. وفي خاطري كلام ودي اقوله .. والحمد لله قلته .. الشباب اللي باقي ما توظفوا انصحكم في القطاع الخااااااص .

المحبره · #11 19/03/2009, 09:11 AM

هلا الصخرة

كلامك مية مية ..
أنا بأقول رأيي بغض النظر عن وضعي الحالي لأنه قصة طويلة

نوع من الناس يحب يجدد نفسة و يطور موهبته و ينسجم بالإخلاص بالعمل .. و الأهم يحب العلاقات و السفرات , هذا أكيد يفضل القطاع الخاص !

لكن النوع اللي يحب يريح عمره و يطلع و يدخل و يفطر باليوم ثلاث مرات و الساعة 2 إلا عشر بالبيت هذولا يفضلون القطاع الحكومي !

طبعاً هذا الكلام بشكل عام لكن بالتأكيد مو الكل !

أنا لو اتخير بوظيفة خاص أو عام أكيد باختار الخاص .. خصوصاً إن مجال تطوير الذات بالدورات و الرحلات أكثر من العام ..

الله يرزق كل العواطلية وظايف ,, و يفتح لك باب رزقك

برايفت , وش نوع دهن العود ؟

شكراً لك

ياقاهرهم يالهلال · #12 19/03/2009, 02:36 PM

إقتباس


	ثالثا : بعض الشركات تسلّمك سيارة.. الوظيفة الحكومية تعطيك ( الضعوي

)

غلطان معاي سياره من وظيفه حكوميه

عموما لازلت متمسك بالوظيفة الحكوميه عن الوظيفه في القطاع الخاص

الســفيرة · #13 19/03/2009, 02:49 PM

فعلا القطاع الخاص ميزاته أكثر

من النماذج الي حولي في ناس حريصين عالحكومي عشان الراحة ،، خويتي اخوها بوحدة من الشركات الحكومية تقول ساعات يجي يتغدا ومايرجع للدوام

وساعات يطلع قبل ساعه من نهاية الدوام

تقول امي تخاف تقوله لايدرون عنك يفصلونك يقولها محد داري

عموما الرزق والشهادة والشغل ماراح ينزل من السما لازم نسعى وراه ولكل مجتهد نصيب

الصخرة يعطيك العافية على مجهودك وحرصكـ والله يرزقك ماتتمناه

الاماكن مشتاقه لك · #14 20/03/2009, 12:13 AM

مشكور الله يعطيك العافيه ومزيد من الابداع

سعود الفيفي · #15 20/03/2009, 08:47 PM

الحين انا باقي عندي كم مستوى واتخرج يعني اروح لمستوصف خاص احسن من مستشفى حكومي

طبعا بحكم تخصصي في المختبرات الطبية

والله حالة تدرس وتتعب وفي الاخير ما تقدر تقرر وين بتروح

وهذا بسبب ان مافي خطط علمية مدروسة من البداية

شكرا لك فهد