إقتباس الرسالة الأصلية كتبت بواسطة الـوفـا ديـــنــ سأختصر لك ردي بشرطين إذا كان قادر إذا كان يستطيع العدل و لا يظلم ( لا تنسى أن الله قال *وَلَنْ تَسْتَطِيعُوا أَنْ تَعْدِلُوا [النساء:129] * ) نعم لا مشكلة في تعدد الزوجات و هذا شرع الله تحياتي لكن ليش تحط رقبتك تحت المقصله اكيد ام صخر بالمنتدى !!!

من وين جبتي ام صخر ؟؟

والله العظيم ما اعرف وحده بهالاسم

ثاني شي كلنا قصمان ومالها داعي ننبرش على بعض يالوفا دين

والله يعافي هالموضوع اللي سحبك من منتدى الجمهور للمجلس في سابقة تاريخية

اقول يالصخرة شكلك ماكتبت الموضوع الا وانت ناوي على الثانية

إقتباس الرسالة الأصلية كتبت بواسطة رائدة الزعيم أنت أهملت جزء فإن خفتم الا تعدلوا فواحدة تبي تفهمني أن الرجل الشرقي ما يميل كل الميل ويذرها كالمعلقة قليييل جدا بعدين فكر في الأبناء كيف بتربيهم وتهتم فيهم وتعطيهم القدر الكافي من الحنان والحب وأنت ما انت قادر تضبط أمورك في زوجاتك الأبناء والأب ما هو موجود في البيت في وقتنا هذا ممكن ينحرفون الأم مشغولة في مشاكلها الشخصية والأبناء يعانون وكبروا ويحتاجون ابوهم اللي ما يقدر يقسم نفسة على ما قال صاحبنا أقسم جسمي في نفوس كثيرة وأحسوا قراح الماء والماء بارد المجتمع أنفتح أكثر عن عصر النبوة ومتطلبات الحياة زادت إذا كانت الحرمة مريضة مثلا وأستأذنها وتزوج عادي لكن يعدل بينهم أو كانت ما تجيب عيال ممكن يستأذنها وبرضوا بشرط العدل لكن ما يجينا واحد عندة درزن بزارين ويتزوج وحدة ما تجيب عيال ثم يتزوج ثالثة بحجة أن الثانية ماتجيب عيال الحين الناس واحد واثنين وما يقدرون على مصاريفهم تبي تجيب درزن بزارين وين بتربيهم معه أنت كذا سبب في الأزمة الإقتصادية وسبب في البطالة وسبب في تفكك المجتمع ما نصير مثل الديانات الأخرى نحرم الحلال لكن يكون وفق ضوابط وحاجة الفرد وما نقيس حالة ونعممها على كل الحالات لازم نفكر في أكثر من بعد أخوي فهد عندي لك سؤالين الأول هل أنت ترى أن الزواج من ثانية في غالبية ظروف مجتمعنا صح ومحقق فية العدل والأبناء فية أسوياء وماخذين حقهم الكامل من الحب والحنان كما في الأسر اللي ما يمرون بمثل هالظرف؟؟ االسؤال الثاني بعيد عن الموضوع شوي لو الزوج ما يجيب عيال وطلبت زوجتة الطلاق عشان تجيب عيال وش بتكون نظرة الآخرين لها ليش هي تضحي عشانة بينما هو قليل الوفاء ما يضحي عشانها أنا أشوف تعدد الزوجات في غالبية الحالات ظلم وما يحقق الحكمة من تشريعة لا أنقض الحكم أو أحرمة فالأصل فية الإباحة لكنه ليس إلزامي لأن ظروف كل مجتمع يختلف والظروف الشخصية تختلف إذا الشخص مقتدر ماديا وجسديا وراح يحقق العدل لعيالة وزوجاتة مافية مشكلة لكن سؤال قد لا يكون تبادر لذهنك لين كبرت وشيبت واحتجت لعناية من بتجلس عندة عند اي زوجة وكلهم يكرهونك وحتى الأبناء شايلين عليك لأنك أهملتهم تبي أسرة مفككة تحتويك آخر أيامك أو أسرة متماسكة ربيتها على الحب وعطيتها كل إهتمامك لك الخيار في الأمر وتبقى هي قناعة شخصية لأن الحكم مباح وليس واجب هناك فرق أنت مسكت الأمر من جانب وما حللت جميع الجوانب لن تكون هناك زوجة مظلومة لو ما صار فية تعدد أنا أعرف وحدة راعت ظروف زوجها واستحملتها كل هالسنين وكانت مكافئتها لوفائها وصبرها زوجة أخرى لما تحسنت الظروف وياكثر تكرار هالحالة عموما كل شخص مجازى بإعمالة يوم القيامة إن كان يستطيعالمعدد الوقوف دون ان يكون شقة مائل هنيئا له بالحب والإشراق

فليسـمح لي آخوي الصخره على المدآخله

آختـي " رآئده الزعيــم " آلرسول صلى الله عليه وسلم كآن آقرب نسآئه الى قلبه
عآئشه ولكـن كآن يعـدل بينهـآ , فكآن يعطي كل وآحده منهآ ليلتهـآ وحقوهآ الآخرى
يعنـي آلرجل ستكون من نسآئه وآحد قريبه آلى قلبه , وذلك لمآ تفعله تجآه زوجهآ .

آمآ تربيه الابنـآء فليس له دخل في تعدد الزوجآت , الاب المحنك والزوج الذكي
الذي يستطيع تحمل مسؤليه الزوآج سيربي آبنآئه تربيه حسنه .

آمآ آن تعدد الزوجآت ظلم فكآنك تقوليـن شرع الله ظآلـم ؟.!!


آمآ عندمـآ آكبر وبكلآمك آنهم سيكرهون آلآب ومن سيهتم فيه ؟
بنيتي هذه النظريه على مآذآ ؟ هذآ يسمى عقوق الوآلديـن وليس له دخل في تعدد الزوجآت ولمآذآ يكرهونه زوجآته بالعكس كلمآ كبر الاب تقربـن زوجآته منه .!!

وبكلآمك آن اغلب الي متزوجيـن اكثر من وآحد آسرهم متفككه

وآن كل من كآنت عنده ضره تتنآزل عن حقوقهآ .؟
هذآ لآ ينطبق على كل الرجآل .

عن نفسـي سآتزوج وآحد ليس لآني لن آعدل آو خآئف
ولكـن غلآء المعيشه والمهور يجعل الرجل يفكر في وآحده
والعوآنس تلمى البيـوت


,

آختي" رآئد الزعيم" آنآ من متآبعين لـ كتآبآتك فآحببت آنآ آعلق
على هذه النقآط , لكـي مني تحيه عطره

ومن قال لك اننا حرمناه


لكن الظروف الحياتيه تغيرت


عدل الانسان

الماده

كلام الناس

غيرة المرأه

الراحه النفسيه

كثرة المشاغل



هالحين عسى الواحد يبد بيته وعياله



هذي وجهة نظري


أتمنى توافقني عليها

إقتباس الرسالة الأصلية كتبت بواسطة الـصـخـرة نبرة صوتي !!!!؟؟؟ ليش انت قاعد تقرا كلامي والا تسمعه لا يالغالي كلامي هذا موضوع مطروح للنقاش ويتقبل جميع الاراء وليس إلزامي التطبيق مدري احس من كلامك انك مستثقل دمي بصرف النظر عن نوعية الموضوع

بيني وبينكـ إيه

أنا اكرهكـ لحد الثماله

وش دعوهـ يا أخوي استثقل دمك ؟

لكن طال عمركـ منبي اعرف احط ابتسامات زي الناس ولانيب رومنسي أقول كلام حلو

هلآ فيك أخوي الصخرة..

موضوعك موضوع حسآس بآلنسبة للجنس الآخر..وشكلهم بيحقدون عليك..

أنآ أوفقك الرأي إن الوآحد إذآ هو قآدر مآدياً والأهم إنه قآدر يوفق بينهم مآفيه مآنع إنه يعدد إذآ هو يبي كذآ..

لكن عندنآ هنآ إعتقآدآت مدري وش تبي..يعني تحصل الحرمة على دين وعآرفه في الدين كل شئ..لكن خل زوجهآ يجيب طآي زوآج من وحده ثانية..كآن تضف عفشهآ وعيآلهآ وعلى بيت أبوهآ..وأبوهآ وأهلهآ يقلبون على الرجآل وكأنه مسوي جريمة..

مع إن أبوهآ تحصله صآك له ثلاث..

كثير تحصل مشآكل بدون سبب..بس لأن الرجآل تزوج وحدة ثآنية وتحصله يحب ويقدر حرمته الأولى ولآ تغير عليهآ..لكن هي تجيبهآ لنفسهآ..

صح الحرمة تغآر وهذي غريزة فيهآ..لكن الغيرة بحدود..ومثل مآ إن الحرمة تغآر الرجآل بعد الشرع محلل له أربع..

كذآ مثآل نشوفهآ عن التعدد بشكل زين..

ومنهآ جآرنآ عمره مآيتعدآ الـ33 ومتزوج حرمتين والفرق بينهم يمكن شهور وكلهم أعمآرهم في الـ24 - 25..وعآيشين في بيت وآحد ودور بعد..وعآيشين أحلى عيشة وكأنهم خوآت..
مع إنهم صغآر والغيرة تكون أكثر عندهم..

هذآ اللي عندي بخصوص هآلموضوع..

وشكلك يآلصخرة نآوي على إنك تعدد..

تحيآتي لك أخوي..

والله شوف<< جاك بيتفلسف وخخخخخخخرو بس


انا اشوف ان التعدد مهوب زين ولا اؤيد التعدد الا اذا الزوجة مقصره في حق من حقوق زوجها فاذا كان الوضع كذلك وحااول اصلاحها الزوج لكن بدون فايده فانه في هذي الحاله يردعها بالثانيه بس تصدقحتى كذا ميب جايه طيب اذا الزوج مقصر في حق من حقوق المره وش تسوي له تتعدد؟

اقوللك انا ضد التعدد

إقتباس الرسالة الأصلية كتبت بواسطة ولد عنزة فليسـمح لي آخوي الصخره على المدآخله آختـي " رآئده الزعيــم " آلرسول صلى الله عليه وسلم كآن آقرب نسآئه الى قلبه عآئشه ولكـن كآن يعـدل بينهـآ , فكآن يعطي كل وآحده منهآ ليلتهـآ وحقوهآ الآخرى يعنـي آلرجل ستكون من نسآئه وآحد قريبه آلى قلبه , وذلك لمآ تفعله تجآه زوجهآ . آمآ تربيه الابنـآء فليس له دخل في تعدد الزوجآت , الاب المحنك والزوج الذكي الذي يستطيع تحمل مسؤليه الزوآج سيربي آبنآئه تربيه حسنه . آمآ آن تعدد الزوجآت ظلم فكآنك تقوليـن شرع الله ظآلـم ؟.!! آمآ عندمـآ آكبر وبكلآمك آنهم سيكرهون آلآب ومن سيهتم فيه ؟ بنيتي هذه النظريه على مآذآ ؟ هذآ يسمى عقوق الوآلديـن وليس له دخل في تعدد الزوجآت ولمآذآ يكرهونه زوجآته بالعكس كلمآ كبر الاب تقربـن زوجآته منه .!! وبكلآمك آن اغلب الي متزوجيـن اكثر من وآحد آسرهم متفككه وآن كل من كآنت عنده ضره تتنآزل عن حقوقهآ .؟ هذآ لآ ينطبق على كل الرجآل . عن نفسـي سآتزوج وآحد ليس لآني لن آعدل آو خآئف ولكـن غلآء المعيشه والمهور يجعل الرجل يفكر في وآحده والعوآنس تلمى البيـوت , آختي" رآئد الزعيم" آنآ من متآبعين لـ كتآبآتك فآحببت آنآ آعلق على هذه النقآط , لكـي مني تحيه عطره

أخوي ولد عنزة أنا كررت أن الحكم الشرعي عادل ومباح

لكن أنا أتكلم عن المطبقين

اللي أعرفهم معددين ما أشوف منهم عدل وحتى زوجاتهم وعيالهم مهملين

بالرغم أن هم يحاولون يمشون الوضع أقصد الزوجات لكن بعظهم مشاعرها خلاص تبي تبقى لعيالها

لكن هو خلاص ما عاد يهمها لأنه ماراح يقدر يعدل تماما خصوصا اللي ما هو مقتدر ماديا

مثال عندك الحاج متولي كيف كان يعدل

شوف هي ثقافة مجتمع

مثلا فية منطقة معينة التعداد عندهم عادي ويتقبلونة
لكن فئة أخرى وأقصد اللي من أقاربنا ما ينفع إطلاقا لارجالنا بيعدلون ولا حريمنا بيحتسبون

أنا لست ضد الحكم الشرعي والرسول كان قلبة لعائشة لكنة كان عادل مع الجميع

ولا تنسى أن الرسول صلى الله علية وسلم ما تزوج على خديجة
لأن خديجة كما في رؤيتي الشخصية شخصية فريدة من نوعها
النساء من نوعية خديجة يعطون الرجل كفاية من جميع النواحي
مثلا كانت خديجة تتسلق الى غار حراء للرسول وهي كبيرة في السن لأنها تحبة وهو قدر لها هالحب
كانت من أول المصدقين وهذا إشارة الى أنها شخصية حكيمة خديجة تختلف عن شخصية عائشة
عائشة منفتحة للحياة وعشان كذا سيرة حياتهم أكثر وصول لنا من سيرة خديجة
وهذا يرجع لشخصية خديجة الفريدة والمميزة واللي ما تتكلم كثير عن علاقتها للآخرين
ليس عيب في شخصية خديجة أو عائشة لكن ميزة لكل شخصية

بالنسبة لي أنا أشوف أن الحكمة من عدم الزواج على خديجة عشان يبين أن التعدد ليس إلزامي

والتعدد بعد وفاة خديجة مرحلة أخرى وهي إن كنت تمتلك القدرة على العدل فيجوز في حالات أخرى

أنا أكرر أني أتكلم عن وجهة نظري وليس وجهة نظر الشرع لكن كرؤية شخصية لي

فأنا أقول التعدد ينفع في حالات وما ينفع في حالات أخرى

لكن أنا ضد التعدد من دون سبب تبي تعدد قل أبي أعدد لاتقول زوجتي فيها ويخطيها
ولا تقول لأن السالفة سنة الرسول عدد قل أنا أبي أعدد لأن الأمر مباح

التعدد له إيجابيات ولة سلبيات
الإيجابيات لو طبق بشكل صحيح وأكرر على العدل اللي ما صار من الكثير
والسلبيات لما نراه من الأهمال والإهتمام بالملذات فقط بغض النظر عن العدل بين الزوجات والأبناء

مثلا أعرف واحد وملتزم على قولتنا وما طبق أي نوع من العدل المشكلة ليست في الدين
المشكلة في المطبق اللي ظلم وحدة ومال للثانية

في مجتمعنا بعض المعددين على حالات

واحد مشكلة بينة وبين زوجتة الأولى تزوج الثانية عشان يقهر الأولى
رجعت علاقتة بالأولى حلوة أهمل الثانية أو يطلقها <<هنا ظلم للثانية

واحد تزوج الثانية أصغر وأحلى أهمل الأولى وعيالها وصار يطلع عيوبها
في كل مكان عشان يبرر لنفسة الإهمال والميل اللي صاير

حالة أخرى زوجتة صبرت سنين معه ومع الفقر الى أن تحسنت حالتهم المادية
وكانت راضية أنها تكون أقل من الأكثرية عشان ما تضغط على زوجها وكانت مكافئة صبرها زوجة جديدة
بحجة أن الزوجة القديمة ما تكشخ مثل الحريم أو ....مليون عيب يبرر فعلته

أنا ما أقول لاتعدد اللي يبي يعدد بيعدد لكن لاتطلع عيوب الأولى عشان تبرر فعلتك
وأهتم بعيالك وأعطيهم من الحب ما يشفع لك

بتقول لي إهمالهم لأبوهم عقوق بأقولك نعم عقوق لكن هو ماقدم لهم اي حقوق من قبل
وما رباهم زين وهو لاهي في ملذاته

اللي زرعته في حياتك راح تحصدة في الأخير العيال مثل النخلة إذا لقحتها في موسمها
وصبرت عليها وسقيتها في مواعيدها وأعتنيت فيها راح تعطيك أجود أنواع التمر
لكن مهما كان نوع النخلة مميز إذا أهملتها وما لقحتها في موسم اللقاح وما سقيتها زين
ماراح تنتج لك التمر اللي تتخيلة موسم الحصاد

ممكن يخلونك عيالك عندهم لكن يوكلون الخدم لخدمتك وما يجلسون معك ويوفرون لك المأكل والمشرب وينتظرون تموت
لكن لو العلاقة بينكم علاقة حب راح يحتفون فيك ويلتمون حولك ويجلسون معك ويسمعونك ويستشيرونك

هي العلاقة اللي تزرعة راح تحصدة في النهاية

وجهة نظري لاتعيب الحكم الشرعي ولكن لو طبق بالحكمة منه والطريقة الصحيحة ما عندي مشكله

وجهة نظري شخصية بحتة ولا تمثل رأي الدين تمثلني أنا فقط


بالحب والإشراق

إقتباس الرسالة الأصلية كتبت بواسطة fff ياحبيبي خل الاولى تجي وذاك الوقت احاول افكر بالثانية .. كلنا ما ننكر ان التعدد رح يحل مشاكل كثير عندنا .. ورح يرخص المهور ورح تقل نسبة العنوسة .. ,, لكن انا ضد التعدد في اشياء كثير منها الظلم والمشاكل اللى رح تصير .. وكثرة العيال لان اذا كثروا العيال رح تكون تربيتهم صعبة جدا .. فارجع اقول خلنا على وحدة افضل .. والله يجيبها باسرع وقت .. يعطيك العافية اخوي فهد على الطرح ,,

هلا بك يالسمي

قبل اعلّق على كلامك اسمح لي اقول جزئية متممة للموضوع..

ياجماعة الخير... يالوجوه السمحه

تخيلوا لو فيه زوجه ماهي قادرة تقوم بواجبها الكامل مع زوجها في ( حياتهم الخاصة )... اعتقد واضح قصدي

وهالزوج ينام كل ليله وهو محبط وغير مقتنع

وهالزوجه ماعندها استعداد ابدا انها ( تحسّن ) من ادائها في هالمسألة بالذات

وش يسوي الزوج في هالحالة ؟؟

صعب جدا انّه يلجأ لأحد ويخليه يتدخل بهالموضوع الحساس

وصعب ايضا انّه يعيش وهو يحس انّه محروم من متعة مشروعة له بسبب بلادة زوجته

غير كذا... هالمسأله فطرية بحته ومالها حل الا واحد من اثنين :

إنّه يعيش طول عمره مع هالزوجة وهو في ( هم وغم ) وحرمان

او انّه يدوّر عن الشيء اللي افتقده مع زوجة ثانية.... ( دون التفريط بزوجته الاولى )
ولايغيب عن بالكم ان هالمسألة حساسة جدا ومتواجدة بشكل كبير جدا

إقتباس الرسالة الأصلية كتبت بواسطة الـصـخـرة هلا بك يالسمي قبل اعلّق على كلامك اسمح لي اقول جزئية متممة للموضوع.. ياجماعة الخير... يالوجوه السمحه تخيلوا لو فيه زوجه ماهي قادرة تقوم بواجبها الكامل مع زوجها في ( حياتهم الخاصة )... اعتقد واضح قصدي وهالزوج ينام كل ليله وهو محبط وغير مقتنع وهالزوجه ماعندها استعداد ابدا انها ( تحسّن ) من ادائها في هالمسألة بالذات وش يسوي الزوج في هالحالة ؟؟ صعب جدا انّه يلجأ لأحد ويخليه يتدخل بهالموضوع الحساس وصعب ايضا انّه يعيش وهو يحس انّه محروم من متعة مشروعة له بسبب بلادة زوجته غير كذا... هالمسأله فطرية بحته ومالها حل الا واحد من اثنين : إنّه يعيش طول عمره مع هالزوجة وهو في ( هم وغم ) وحرمان او انّه يدوّر عن الشيء اللي افتقده مع زوجة ثانية.... ( دون التفريط بزوجته الاولى ) ولايغيب عن بالكم ان هالمسألة حساسة جدا ومتواجدة بشكل كبير جدا

هذي الحالة من ضمن الحالات اللي أبيح فيها التعدد

وما أحد يقدر يلومة

وحتى المرأة لو صار لها نفس الشي من حقها تطلب الطلاق ويخلعها الشيخ لهذا الأمر

أنا كلامي فقط على اللي يعددون ويدورون أعذار واهية ويعيب زوجته ويظلمها ويظلم عيالة

اللي يدور التعدد لراحة بالة وإهمال عيالة

أنا أعرف واحد من أقاربنا في الشرقة ينام في سيارته
لأن الثنتين يتكاتفون علية ويطردونة
وانا دايم اقول المفروض يجيب الثالثة عشان يأدبهم
وحتى لو جاب الثالثة هو ما يعرف يتعامل معهم المشاكل هي المشاكل والعيوب هي العيوب

التغيير يبداء من النفس ولو ما قدر ما أحد يقدر يجبرة يعيش مع وحدة ماتبي تطور نفسها
ولا أحد يجبرها تعيش مع واحد ما يبي يطور نفسة الأمر على الأثنين

إذا عدد الرجل لسبب شرعي أو بدون سبب مباح لكن شريطة العدل وعدم الإجحاف

بالحب والإشراق

وعليكم السلام ورحمه الله وبركاته

اهلا بك اخوي الصخـرهـ

اولا حنا ماحرمنا شي احله الله
بس الي صاير للاسف مايرضي الله ولارسولهـ
بالله مين الرجال الي يعدل بين زوجاته خلنا واقعين يعني
{ من كان له امرأتان فمال إلى إحداهما جاء يوم القيامة وشقه مائل )

يعني تبينا نرضى وهالزوجه افنت شبابها ( افنت اجل )
بخدمه هالرجال وتربيه عيالها وبالاخير لاطلع الشيب بالراس راح يدور غيرها
صدق شين وقواهـ عين بعد حنا مو ضد الشرع بس ليتكم تطبقون الشرع بكل شي

تصبرين عليه سنين وتراعين ظروفه وبالاخير لاخلصت ديونه
يجازي تضحيتي بزوجه ثانيه
يكفي هالعيال الي بيتزوجون وبيخلوني ناقصه ابوهم بعد
هذا جزاء الزوجهـ المسكينه وهذا تقديرهـ لها كل هالسنين
لانك ولد ماراح تحس بمرارهـ وحرارهـ وكل شي شين
الي يصير بالزوجه لاتزوج زوجها

مثال ماله داعي
تربي هالشجرهـ ومتعب عمركـ بهالشموس تسقيها كل يوم
وبالاخير تعطي ثمارها للجيران مو شي يقهرررر

بعد الزوجهـ لو بتفكر مثل تفكير هالمحروس
لاجبت له عيال وتعبت ومليت منه بطلب الطلاق واخليه يرعى عياله
وبروح اخذ لي واحد شايب يدلعني


جدتي تزوج عليها جدي والحين اتوقع صار له متزوج 22 سنه تقريبا
وللحين مارضت عليه شكلها تحبه من قلب
وماتنلام جرحها وهي في عز شبابها

\

/
يعطيك العافيه خيوو
ويازين الرجال الموحد

إقتباس الرسالة الأصلية كتبت بواسطة شبوط الحمدلله على السلامة ياخطييييير كلك حركااااات اجل ماسك خط كم ماشي 200كم في الساعة اجل عطووووك قسيمة سرعه

الله يسلمك

اوووما 200 كم

صدقني من 140 الى 160.... مشيت 12 ووصلت 7,30 .... ثم ترويشة ثم الدوام

وثلاث فناجيل قهوة تركية + كوب نسكافيه والعيون مبققة تقل عيون مشفوح .. مثل عيون هذا -->