كيفكون

برأي المتواضع ماحد راح يقنع الثاني لأن مافي أسس واضحه لأفضلية المقارنه .. وبرضو .. المسألة مسألة ميول ..

شئ طبيعي لما المشجع يجي يقول افضلية دوري .. بيروح مع الشئ الا يميل له .. واكيد راح يميل للفريق الا يشجعه بالشكل الأكبر ..

نلاحظ البعض التزم بمركبات اعلاميه اكثر من اي شئ آخر في نقاشه .. الايطالي = تكتيك .. الاسباني = مهاره .. الانجليزي = اجسام ..

يعني بالله عليكم .. اذا الانديه الا في ايطاليا تلعب بتكتيك .. اندية الوسط والقاع في الليقا والبريمير ويشو يسوو .. يقشرو بصل ؟ ..

ادري بتقولو .. لأ .. بس لما تشوف الكالتشيو راح تعرف وش نقصد .. وراح تشوف القوه .. وراح تشوف الدهاء والمكر ..

حبايبي ..

اول خلنا نعرف احنا نتناقش عن ايش .. التاريخ ؟ والا الحاضر ؟ العقد الماضي مثلا ؟ والا المستقبل ؟ ..

بنتكلم عن ايش بالضبط في تفاصيل اللعب ؟ الخشونه ؟ .. كل البطولات فيها خشونه كبيره .. والدليل مارادونا ماتحمل خشونة الليقا وطلع للايطالي .. هل معناتها خشونة الكالتشيو اقل ؟ ...

لكل زمان رجاله .. الايطالي تربع على عرش الكره فتره طويله .. والليقا كان رائع لفتره كبيره .. والانجليزي متميز باشياء معينه لكن لم يصل لمعدة المشاهد [ العربي ] خلنا نقول ..

لو قارنا بين البطولات الحاليه الثلاث .. او حتى الأربع بضم البوندز ليقا .. بوضعهم الحالي .. وبوضعهم قبل 5 - 8 - 10 سنوات .. راح نشوف تغير كبير جدا ..

الكره الايطاليه عرفت بتاريخها مع اسلوب الدفاع واستخدام التكتيك العميق والدقيق في كل شئ .. لكن مع هذا كانت ممتعه .. ويا ما كانت فيه نتائج كبيره ورهيبه .. سواء مع الفرق الكبيره او المتوسطه او الضعيفه .. وقبل كم سنه كان الميلان ضارب الانتر بنتيجه وقدرها ..

يعني الكره الايطاليه فادت الكره العالميه بشكل عام بأسلوب مبتكر خاص بها وهو القوه الدفاعيه ..

الكره الانجليزيه او البريطانيه عرفت بقوة الأجسام والتمريرات الطويله واللعب السريع والمرتد .. ويقال ان اول من ادخل القوه البدنيه في التدريبات وتغيير مفهوم التدريبات لكرة القدم هم الانجليز .. ( نسيت صراحه من الا كان وراء هالتغيير في اسلوب التدريبات - هي معلومه قريتها مره والسلام - يمكن اكون غلطان فيها بعد مادري ) ..

يعني هنا نفهم ان الكره الانجليزيه لديها طابع خاص استفاد منه العالم في كرة القدم .. وايضا غيرت بعض من مفاهيم الكره ..

الليقا .. هي اقرب كره اوروبيه للكره اللاتينيه ( حتى وان كانو الطليان يعتبرو من اللاتينيين ) .. ولطالما كانت السباقه في الأسلوب الهجومي والاستحواذ على الكره مع مواكبة مايحدث من تطور في الأسلوب بشكل عام ..

يعني هنا نعرف ان الليقا او الطابع اللاتيني افاد الكره بشكل عام بالأسلوب الهجومي والممتع ..

والبوندز ليقا .. دائما وابدا كانت قويه وممتعه وبها انديه كثيره كانت لهم مشاركات قويه في البطولات الاوروبيه ..

والكره الألمانيه افادت الكره بشكل عام بالأسلوب البدني اللياقي الممزوج بالعمق التكتيكي ايضا ..

والكره الهولنديه افادت العالم بأسلوبها الشامل في اللعب .. وبرأي ان الليقا اكثر من استفاد من هذا الاسلوب في البطولات الكبيره .. الهولنديين احترفوا في كل محل ونجحوا في ايطاليا وانجلترا .. لكن الا استفاذ من مدرستهم وعملها منهجيه له وطورها .. هم الاسبان ..

لكن .. مهما واكبوا البطولات الأوروبيه التطورات الا تصير .. مستحيل ماتكون فيه تفاصيل وتقاليد خاصه بكل بطوله ..

طيب ..

على ايش راح نقيس قوة البطوله .. الـ 4 الكبار من كل موسم ؟ اندية الوسط ؟ ام اسلوب اللعب العام ..

الا يتابع الليقا وبشكل واعي .. راح يعرف ان تطورت بشكل كبير من الناحيه التكتيكيه .. وراح يعرف ان الأنديه صارت تعرف تستغل [ ثروة ] المواهب الموجوده لديها ..

اندية الليقا بشكل عام .. وبشكل خاص اندية الوسط .. صارت على المستوى المحلي والأوروبي صعبه .. لأنها صارت تطبق اسلوب الاحتفاظ بالكره بواسطة المواهب الا تملكها ( من صنعها الخاص .. يعني غير منتدبين ومشترييين ) .. وايضا صارت تعرف تدافع بشكل منظم .. خصوصا من ناحية الالتحامات والخشونه اللاتينيه .. ولنا في بطولات الارجنتين والبرازيل والاوروجواي امثله على طريقة اللعب والاندفاع اللاتيني ..

اندية ايطاليا بشكل عام وبشكل خاص اندية الوسط .. انخفض مستواهم في السنوات الأخيره بسبب تراكم المشاكل الكثيره في المجتمع الكروي الايطالي .. لكن هذا مايمنع انهم مازالو اقوياء .. هذا اذا ماكانوا الأقوى من ناحية صعوبة مستواهم ومستوى عقليتهم .. ومازالوا محتفظين ببعض تقاليدهم في مواكبة اي تغيير يحدث في الكره ..

مثلا في السابق الكالتشيو كان من اكثر البطولات استعمالا لـ خطط الـ 3 المدافعين .. الان صارت 4 3 3 و 3 4 3 خطط دارجه في الكالتشيو .. لكن مازالت الثقافه الدفاعيه اساس في تطبيق اي خطه تدخل للدوري ..

انجلترا .. هي اكثر بطوله تطورت في السنوات الاخيره .. الاستثمارات والضخ المادي .. هي من جعلتها قويه بهالشكل .. وايضا الحاله الاعلاميه الا يعيشها الدوري ..

مورينيو يقول الاعلام الانجليزي مافيه مثله .. انا اقول الشعب الانجليزي شعب طفران والصحافه الانجليزيه تساعدهم على العيش في احلام اليقظه ..

يعني مؤخرا ابرز مواهب الكالتشيو مثلا .. مونتيلفينيو .. اكويلاني .. جيوفنكو .. مواهب جميله ( من باب المثال لا الحصر ) .. لكن ماشفنا هاله اعلاميه من نوع خاص ..

الليقا .. في كل سنه يطلع لك درزن مواهب .. سيلفا - انييستا - راموس .. لكن مازال في حدود لشهرتهم .. حتى تشافي ماحد قام يذكره بالخير الا لما وصل عمره 27 ..

البريمير .. من متى واحنا نسمع عن والكوت .. لاعب كان بعده مايعرف يحك راسه .. وهم ترفيع فيه رايح .. فابريقاس .. بعده مالعب مع الفريق الأول .. واحنا نسمع اسمه في كل محل .. سيسك سيسك سيسك .. سلامات .. رونالدو جا الى مانشستر .. والكل رفع فيه انه خليفة بيكام ووووو .. وهو بعده ماكان يعرف وش يسوي حتى في البريمير ..

موقصدي شئ على امثلتي ترى لكن الا ابغا اوصل له .. الاعلام الانجليزي عنده اسلوب مميز في اظهار اللاعبين والدوري والمدربين بشكل جميل .. بعيد عن معوقات المجتمع الكروي عندهم وسلبياته ..

طيب ..

نجي من ناحية المدربين .. وهنا اقول برضو مثل ما اللاعبين يستفيدو من الاعلام .. المدربين برضو .. لأن ياكثر مدربين الكالتشيو الرائعين .. وياكثر دربي الليقا الفاهمين .. لكن لوجودهم مع انديه متواضعه اعلاميا وماديا مثلا .. نشوف مااحد يذكرهم بالخير ..

التكتيك ..

كرة القدم الحين اصعب بمراحل من السابق .. واذا مارادونا قال عن الكالتشيو جنة كرة القدم .. اقول ياليت يرجع شباب ويجي يلعب الحين .. صدقوني مابنقدر نشوف مارادونا بنفس صورته السابقه لأن الحين الخطط اقوى واعمق .. الحاله البدنيه للاعبين اقوى وافضل .. التجهيز النفسي .. كل شئ ..

زي ماقلت في نص هدرتي الكالتشيو استمر على نفس منهجيته في اسلوبه الدفاعي .. لكن اسلوبه الهجومي دائما وابدا مميز ومحسوب .. وان كان انخفض في السنوات الأخيره لضعف المواهب الا قامت تنتجها الملاعب الايطاليه مقارنة بالماضي ..

الليقا .. لنا مثال في تصريح كابيلو الأخير .. وهو يقول ابغا المنتخب الانجليزي يلعب مثل اسبانيا وايطاليا ..

اسبانيا في اليورو ماوصلت لهالمرحله من الكماليه في اللعب الا من اسلوب الانديه الا تلعب في الليقا .. حتى الانديه العاديه .. خيتافي - سرقسطه - ديبورتيفو .. وغيرهم .. كلهم صارت عندهم فلسفة الاحتفاظ بالكره والضغط العالي واللعب القتالي .. هذا الشئ انعكس على المنتخب الاسباني بالايجاب .. وصار اراقونيس يقدر يغير الى اي رسم تكتيكي ولكن بنفس المنهجيه ..

مع احترامي لعشاق البريمير .. انا اشوف فيه اهداف ماتجي الا في دوريكم .. ولامعناتها الكالتشيو والليقا مافيها اهداف تنم عن ضعف انضباط لحظتها او ماشابه .. ولكن كثرة الشئ في البريمير يخلي الواحد يتساءل وين لاعبين المحاور وين الضغط المستمر والانضباط وين وين وين .. اشياء كثيره اشوفها غريبه في البريمير .. ونادرا مااشوفها في الكالتشيو والليقا ..

فيه هداف اغبيه تدخل صح .. لكن احيانا يكون الشئ ممكن يكون من ضعف لياقه مثلا .. ضعف مستوى فردي .. تحصل هالأشياء .. لكن انه يجي هدف وتحس ان اللاعب يتمشى بدون رقابة خط وسط كامل .. اسمحو لي فيها .. ممكن جميله للمشاهد المحايد .. لكنها غير جيده في حقكم ..

انا زي ماقلت مااقيسها على الانديه الكبيره .. اقيسها على الوضع بشكل عام .. لأنه لما ناخذ وضع الأنديه بنظره شامله بنعرف ثقافة الدوري الا نتكلم عنه ..

حتى في التمثيل الخارجي ..

اعطوني آخر سنه ظهر فيها نادي انجليزي في التشامبيونز بشكل غير محسوب وبدع ؟ .. ليدز يونايتد .. وبدايات تشلسي في ختام سنوات التسعين .. بعدها ؟ ..

حتى في كاس الاتحاد الاوروبي .. وين الانديه الانجليزيه ؟

الكالتشيو دائما الفرق المتاهله لكاس الاتحاد والتشامبيونز تكون غير .. الليقا دائما تظهر انديه كل فتره تسوي مشاكل في الساحه مثل ديبورتيفو على ايام النيبت .. واشبيليه مؤخرا .. وفالنسيا .. وفياريال .. وايضا سلتا فيغو .. وبيتيس .. كل هالفرق في الليقا ضعيفه من ناحية الماده .. لكن عندها مواهب لاباس بها .. ووصلت للبطولات الاوروبيه وقدمت مستوى جيد ..

طيب .. الانتقالات بين الانديه ..

هي ظروف تصير للاعبين .. دي ماتيو قدم مستوى جيد جدا مع تشيلسي .. فيالي ايضا .. زولا برضو .. لكن لاعب وانتقل من انجلترا لايطاليا ؟ ماعرفت احد بالتالي مانقدر نحكم هنا ..

الاسبان والطليان .. الطليان وصلوا لاسبانيا لكن ماقدموا مستوى مقنع .. حتى الحراس مااثبتو نفسهم .. يمكن افضلهم فييري مع اتليتيكو .. والاسبان مانجحو في ايطاليا ولنا مثال في ديلا بينا مع لاتزيو ومندييتا وخوسي ماري مع الميلان ..

الاسبان في انجلترا .. نجحوا .. لكن الانجليز في اسبانيا .. مافي الا قليل جدا .. وكلهم من الماضي ايام الثمانينات .. لكن بيكام .. هنري .. كلهم ماقدموا مستوى يليق باسمهم ..

ليش ؟ من غير ليش .. ظروف ماساعدتهم .. اللعب مختلف جدا ووصلو في عمر كبير .. بالتالي مافي اشياء نقدر نحكم بها .. علشان نقول اذا طلع اللاعب من هالدوري راح يفشل في هالدوري .. لأني اشوف النظره حقته ضيقه ..

الا ابغا اوصل له في خلاصة كلامي .. مافي افضليه .. كل دوره له تقاليد وتفاصيل خاصه به .. ومنها يخرج الميول والفوارق بين المشجعين .. لكن بشكل عام الكره الحين تداخلت بشكل كبير بين ثقافاتها المختلفه .. والفريق والمدرب الناجح الا يقدر يستفيد من معظم الثقافات في فريقه وهاالشئ يحتاج الى ماده وطاقات بشريه .. ولهذا السبب نشوف الفرق الأضعف ماديا مهمشه في المقارنه دائما .. لكن لو ننظر بالحياد والواقع بنشوف اشياء ماكنا نشوفها ..

في الختام يمكن الا كنت ابغا اكتبه في البدايه ضاع مني بين السطور ويمكن ماكتبت اي شئ من الا كان في مخي ويمكن ماجاوبت على نقاشكم ابد لكن تحملوني

لي عودة غدا إن شاء الله

يعني لازم خمسين حرف

السلام عليكم

الحين خبر في قناة الكويت الرياضية :

الدوري الالماني هو الاعلى دخل في حقوق رعاية القمصان في الاندية الاوربية !!!!

وه بس ورده

لي عودة ان شاء الله

طلاااااال صدقني لو اعلم ان هالموضوع بيخليك ترد نزلته من زمان وينك بالرابطه

إقتباس اجل باللهي عليك وبيني وبينك : دوري يحترفون فيه مصاريه ( لا ومن زود البجاحه انه يتصدر القائمه التهديفيه ) وكوريين , كيف تقارن !

الله يذكر ايام الكوري بالخير اللي كرشكم من المونديال وسحبتو سيفون على امه وطردوه من البلد كلها

واذا تتكلم عن التسريحات عادي الخوال توقع منهم اي شي بس برضو لو تقلبها براسك بتلقى ان الكالتشيو والليغا برضو فيها من هالعينات كامورانيزي يو يتهور وطلع شكله زي فلبينية كودو والشغالات ... سيسوكو خبري كان مسوي حديقة براسه ليش نروح بعيد كالون يوم كان مع الانتر يوم يسوي سبايكي وهو شعره اصلا لو تورط يوم بمضاربة يقدر يستخدمه سلاح ابيض وغيرهم كثير لكن ما ودي احول الموضوع ذب على لوك الاعب

بالنسبة لاحصائية الدوري والترتيب بالاعوام الماضية اعتقد انت جبتها اهنيك عليها والله يعني ردك متعوب عليه بس باذن الله على رواق بحاول ابحث وارد عليك

إقتباس دليل على لحسة اللي يشجع الايطالي بالتكتيك , دايم نلعب كورة مع بعض الشباب اللي يشجعون روما او اليوفي والانتر وميلان هم اللي يصارخون طول بالمباراة بالالتزام بالخطة , لكن حقين الدوريات الثانية ماعندهم مشكلة الامور سهالة

ناصر حبي انا قلت لك الالماني اتابعه احيانا ومرات اشوف الملخصات ... فعلا فيه لعب ومباريات وتنافس واهداف حلوه ... والا ما كان شفنا البايرن برى التشامبيونز وهو الابرز في المانيا + ان الويفا نفسه معطيهم 3 مقاعد لانه يعلم انه لا يصنف مع الثلاثة الكبار ... الالماني ظلم اعلاميا من اول لذلك صعب احنا هنا نطلعه افضل من الثلاثه مع تحفظي على وضع الدوري الالماني ... لكن قلت لك البوندز ليجا بصراحه دخولها بهالمقارنه ظالم لان ما له شعبيه

حبيب قلبي بالنسبة لكلامك عن وسط انجلترا وعن نظام لعب الانجليز ... مع احترامي لك والله انت ماخذ فكرة غلط بقوة ... طيب انت يوم تتكلم عن سكولز وجيرارد وغيرهم ... نسيت سيدورف !! وغيره كثير ... ما هو ذنب الواحد اذا ربي معطيه قدم قويه ... وبالعكس اذا كان اللعب تقفيل احد افضل الحلول هو التسديد من بعد

الاهداف بالبريمر تشوفها بكل الاشكال والانواع ... شي تتوقعه وش ما تتوقعه ... فيه لاعبين قناصين وفيه تسديد وفاولات وكل شي ... ومع ان ايطاليا معروفه دفاعيا لكن نادر نشوف دفاع الطليان متواجد بالافضليات ولا تمسكون سالفة كنفارو انها تكفي

عموما ... اعتقد تصنيف الويفا بجعله البريمر اولا ما جاء من فراغ + الريال اللي ضل متسيد قائمة اغنى اندية العالم ما استطاع ان يكسر كبريائه الا مانشستر يونايتد حتى تشيلسي اللي ضح الملايين والاموال ما قدر يوصل للصدارة ... ومع كل ملايين كالديرون وابراموفيتش المانيو تصدر ومبيعات القمصان اللي ذكرتها وغيرها ... لو بنقارن جماهيريا بالدوريات الثلاث ... كثير والله اتابع مباريات كبيرة بالكالتشيو يكون كثير اماكن فاضيه بالملعب بالمقابل مباريات عاديه بالبريمر تكون الملاعب فل

حتى لا اطيل انا اعلم مدى التاثير الكبير اللي سببه الكالتشيو بولي ... وعموما انتم تتكلمون عن ان دورينا محجوزه اماكنه ... ما ادري هل الدوري الايطالي يعني اللي متغيره اماكنه !!

انتر ... ميلان ... يوفي وروما من زمن وهم يتسيدون ... ولا تنسى ان بعد ما اخذ الليفر البطوله ما تاهل بعدها للتشامبيونز ودخلوه بواسطه وهو كان بالمركز الخامس بسبب انه حامل اللقب ... ودخول ايفرتون لقائمة الاربعه الكبار ما حطيتوه ببالكم !! وحطيتو ببالكم ظروف الكالتشيو ونسيتو ان ما يعيشه الارسنال الان بسبب ما تحمله من ديون مقابل بناء ملعب جديد يعني كل واحد له ظروفه

ساعود بالكثير لكن ما ودي اطول بالرد اكثر من ذلك

إقتباس في الختام يمكن الا كنت ابغا اكتبه في البدايه ضاع مني بين السطور ويمكن ماكتبت اي شئ من الا كان في مخي ويمكن ماجاوبت على نقاشكم ابد لكن تحملوني

خخخخخخخخخخخخخخ والله يبيلك جائة اطول رد الى الان

حسين بالنسبة لكلامك عن الاعلام وسيسك وغيرهم ... موجوده عند الكل ... شف الميلانيين وش نشبو لامنا في باتو قبل ما يطلع ومن اول مباراة خلوه خليفة مدري وش اسمه ولو تحسبها هل فابريغاس يقارن مع باتو !! طبعا مستحيل

الليغا برضو شوف الشبان اللي مع البرسا ... بويان وسانتوس ... نفس الشي اخذو هالة اعلاميه كبيره ... شي طبيعي اي احد يكون عنده موهبة صغيره يكون ينتظرها ويرفع معنويات الاعب قبل بدايته بعدين ينصحونه لا يغرك الاعلام ... طيب ليش انتو تكبروه بالبداية اذا خايفين عليه من الغرور !!

اللي اعجبني بكلامك برضو انه يتحدد معايير ثابته للمقارنه ... بالنسبة لموضوع عن اي فتره ... انا قلتها قبل ما اعتقد فيه هنا من هو بعمر اللي يسمح له يتكلم ويهايط باعوام سابقه وتاريخ من زمن ... انا عمري الان 22 سنة ... والاغلبيه بهالحدود اقل واكثر شويتين والمستقبل لا احد يعلم ماذا سيحصل ... يمكن فيرغسون يطلع مضبط امور لجنة الحكام بالرشوة ونشوف مانشستر بالدوري السعودي في 2010

افضل فتره اعتقد مناسبة للمقارنه ... هي العشر سنوات الماضيه مثلا او من عام 2000 ... او بحد اقصة من عام 95 الى الان وهالاوقات قلتها كذا ارتجاليه لا احد يجي يدف ويقول اكيد انه مضبط له اشياء حلوة عن البريمر بهالوقت

جاني اقتراح من العضو ريان يقول انه لو طرحت تشكيلات لكل الدوريات ونشوف من الاقوى ... او بمعنى اخر البريمر ممكن ندبر ثلاث تشكيلات كلها متكامله وقويه وبتكون اقوى من الكالتشيو والليغا

بكل الاحوال انا افضل الابتعاد بالمقارنه حول الجهور والاخراج والملاعب لانها غير مجديه وقلت لكم شوفو قطر كيف اهتمت بالملاعب والفلوس وكيف وضع دوريهم الان

وصدقوني والله وااااااااااضحه ... جماهيريا ومدخول الجماهير الانجليزي سيتربع بالصداره بلا منازع واعتقد سيليه الليغا ثم الكالتشيو

صحيح ناصر بالنسبة لسالفة القمصان ... بيكهام جاي للميلان شف وش بيصير والتغيير بالبيع يعني سالفة القمصان ممكن تتغير حسب الظروف

لي عودات باذن الله

اروع ما في الموضوع ان الجميع الى الان ملتزم الاخلاق والروح الرياضيه

تحياتي لكم كل ابوكم ورده

إقتباس لاحظ الفرق التي بالاخضر لا تملك اموال تشلسي ولا نجومه متى اخر مره شفنا فيها غير ( ليفر , مان , ارسنال , تشلسي ) .. في الابطال ؟

البريمر ليغ

موسم 2000 / 2001

مانشستر 80
ارسنال 70
ليفربول 69
ليدز 68
ابيسوتش تاون 66

موسم 2001/2002

ارسنال 87
ليفربول 80
مانشستر 77
نيوكاسيل 71
ليدز 66

2002/2003

مانشستر 83
ارسنال 78
نيوكاسيل 69
تشيلسي 67
الليفر 67

2003/2004

تاهل الاربعه الكبار

2004/2005

البطل تشيلسي وايفرتون الرابع والليفر دخل بواسطه للتشامبيونز بسبب انه حامل اللقب

2005/2006

الاربعه الكبار واخر جولة بشق الانفس تاهل القنرز بدل السبيرز


من يومها والاربعه الكبار يتاهلون ... لذلك اجابة على سؤالك حاب اقولك اخر مرة عام 2005 وما رح الون لك انديه واقولك ما تملك امكانيات ونجوم و و و ... لاني اعتقد انك اول مرة تسمه بنادي اسمه ابيسوش تاون اللي كان بامكانه ياخذ الثالث بدل الليفر ... ولا يهون ليدز الهابط

الشي الثاني لم يسبق من عام الـ 2000 انه فريق ضمن الدوري من الدور الاول زي الانتر يوم يجيب 97 نقطه وروما وراه بـ 75 نقطه الظاهر ذاك الموسم الانتر الدور الثاني حول بعض لاعبين فريقه لبطولة الكيرم للمحترفين من الفضاوه لين ينتهي الموسم

إقتباس وايضا الشيء المضحك اكثر واكثر .. انه لم يتغير ترتيب الاربعه الاوائل في دوري انجلترا منذ 5 أعوام , والليفر طبعا حاجز المركز الرابع

نعم لقد انني ضحكت مع انهم صححو لك معلومتك ... راجع الترتيب اللي انت جبته بتلقى الانتر واليوفي وميلان دايما موجودين وكل مرة يخش معهم نفر بخاري يعني الدعوه حولنا

محمد

محد قال قصات الشعر إلا أنت فأنا حطيتها في ردي من باب الضحك وبس

أنا أقصد بالحلا هو الإخرااج

طيب ليش تبيني أرد عليك وأنت ما رديت على سؤاالي :

من أقوى فرق ، الإيطالية أم الإنجليزية ؟؟

وأنا رديت على سؤالي واستدليت بالتشامبيونز

وأيضا أقوى المدربين ؟؟

بالنسبة لترتيب الأندية فتقدر تااخذه من الرابط هذا .. هنا

لأني متعيجز جدا أجيبه لك

وشف اختلاف الفرق في المراكز الأولى وتقارب النقااط .

واللي فيه حيل يبي ينزلها فالله لا يهينه

تروحوون لأموور جانبية إثارة ما إثاارة وتنسون أشيااء مهمة جدا كـ قوة الفرق والمدربين

الإثارة تختلف من شخص لآخر وكل ما زادت متابعتك لدوري معين ستزيد الإثارة فيه

أنا شخصيا أشعر بإثارة كبيرة في الدوري السعوودي

وإذا هي على المتعة في اللعب فالأول الدوري الأسبااني ، ثانيا تعالوا ، الحين الدوري الإيطالي أمتع من الإنجليزي ؟؟

رفقا بأولي النهى !

وشطحة اللاعبين المصارية والكوريين ، كني ما قريتها يا محمد

وتفريقة الاستراحة بعد يا نااصر ، كني ما قريتها

كل حبي وتقديري واحترامي لكم جميعا ورده

التشامبيونز ما زال يثبت ان متسيد ايطاليا الانتر ضعيف خارجيا ... على ارضه وامام فريق يوناني ... اليونان وانديتها عرفت تطبق تكتيك التقفيل تماما من بعد اليورو 2004 ومدري وش المثل اللي يقول داوهم بالتي كانت هي الداء او زي كذا يعني نوعا ما بدأت افكر جديا بادخال الدوري اليوناني في نقاشنا حول الافضليه

صحيح نسيت من اللي قالي انه استمتع كثيرا بمباراة الشباب والهلال الاياب الظاهر انه جولدست

بصراحه بعد كلامه فعلا قلت سبحان الله المباراة هذي انا حضرتها بالملعب وقلت يقلع ام السماجه حتى اصلا فيه هدف صحيح للشباب ما انحسب كان ممكن الهلال يطير منه اللقب بسببه

حقين الانتر خذو بريك عن النقاش الى يوم الغد حتى تهدأ الامور البريمر والليغا تألق واضح ... والكالتشيو فريق روما اللي ضايع هالموسم هو الوحيد اللي شرفكم اعتقد هالكلام يثبت لكم ان تكتيك واسلوب الكالتشيو ينفع بينكم ولا يمكن مقارنته عالميا ... مع ان كثير فرق صارت تركز على الدفاع والتقفيل عشان تمشي بالبطولات .. لكن اسمحولي هذي حيلة الضعوف منتخب وفرق مثل ايطاليا لازم تهاجم وما تهاب

تصبحون على حب

,,

إقتباس البريمر ليغ موسم 2000 / 2001 مانشستر 80 ارسنال 70 ليفربول 69 ليدز 68 ابيسوتش تاون 66 موسم 2001/2002 ارسنال 87 ليفربول 80 مانشستر 77 نيوكاسيل 71 ليدز 66 2002/2003 مانشستر 83 ارسنال 78 نيوكاسيل 69 تشيلسي 67 الليفر 67 2003/2004 تاهل الاربعه الكبار 2004/2005 البطل تشيلسي وايفرتون الرابع والليفر دخل بواسطه للتشامبيونز بسبب انه حامل اللقب 2005/2006 الاربعه الكبار واخر جولة بشق الانفس تاهل القنرز بدل السبيرز 2005/2006 الاربعه الكبار واخر جولة بشق الانفس تاهل القنرز بدل السبيرز

انت تشوف فارق النقاط الي بينهم
اقل شي حتى الان 5 نقاط بين الاول والثاني

يعني عيب دوري مثل دوريكم يكون مظمون من اخر 3 جولات !!

إقتباس من يومها والاربعه الكبار يتاهلون ... لذلك اجابة على سؤالك حاب اقولك اخر مرة عام 2005 وما رح الون لك انديه واقولك ما تملك امكانيات ونجوم و و و ... لاني اعتقد انك اول مرة تسمه بنادي اسمه ابيسوش تاون اللي كان بامكانه ياخذ الثالث بدل الليفر ... ولا يهون ليدز الهابط

جايني وجايب لي فريق من اقصى الدنيا واخر شي تقول كان بامكانه !

واذا تبيها بالعدد نعد .. الايطالي : " انتر - ميلان - روما - يوفي - اودينيزي - فيورينتينا - لازيو - بارما " 8 فرق ,, ولو بمشي بنفس نظامك كان اقول كييفو وسامبدوريا اخذو المركز الخامس وكادو يتاهلون

بينما عندكم : " المان - ارسنال - تشلسي - نيوكاسل - الليفر - ليدز - ايفيرتون ( مع انه لم يتأهل لدوري الابطال حيث خسر من فياريال في التصفيات على ما اذكر ) 7 فرق

إقتباس الشي الثاني لم يسبق من عام الـ 2000 انه فريق ضمن الدوري من الدور الاول زي الانتر يوم يجيب 97 نقطه وروما وراه بـ 75 نقطه الظاهر ذاك الموسم الانتر الدور الثاني حول بعض لاعبين فريقه لبطولة الكيرم للمحترفين من الفضاوه لين ينتهي الموسم

اول شي ماضمنه من الدور الاول

ثاني شي قلنا هذا موسم استثنائي .. الفريق الاول من حيث بطولات الدوري كان في الدرجه الثانيه .. والميلان كان مخصوم منه نقاط ولازيو والفيولا ..

ولعد تذب

إقتباس راجع الترتيب اللي انت جبته بتلقى الانتر واليوفي وميلان دايما موجودين وكل مرة يخش معهم نفر بخاري يعني الدعوه حولنا

مادري وشلون حولنا

المتفق عليه انتر ويوفي وميلان وروما اوكي ..

2000

1- لازيو 72 نقطة
2- اليوفي 71 نقطة
3 - ميلان 63 نقطة
4 - انتر 59 نقطة

1 مختلف

2001

1- روما 75
2- اليوفي 73
3- لازيو 69
4- بارما 56

3 مختلف

2002

1- اليوفي 71
2- روما 70
3- انتر 69
4- ميلان 55

لا يوجد اختلاف


2003

1- اليوفي 72
2- انتر 65
3- ميلان 61
4- لازيو 60

1 مختلف


2004

1- ميلان 82
2- روما 71
3- اليوفي 69
4- انتر 59

لا يوجد اختلاف

2005 ( قبل الاحداث )

1- اليوفي 86
2- ميلان 79
3- انتر 72
4- اودينيزي 62

1 مختلف


2007

1- انتر 97
2- روما 75
3- لازيو 62
4- ميلان 61

1 مختلف



1- انتر 85
2- روما 82
3- اليوفي 72
4- الفيولا 66

1 مختلف

بس لاحظ ان النفر البخاري هذا الي مختلف دايم مايتغير ... موب نيوكاسل بس

,,

إقتباس الشي الاخر ... هنا بالسعوديه انا اعلم ان الكالتشيو ممكن يكون متابع كثيرا ... لكن انا عشت في بلدان اخرى مثل الاردن ... هناك اخر شي ممكن يتابعونه الايطالي واغلبيتهم برشلونه وريال الشي الاهم انه لازم تحطون في بالكم ان فيه هنا يوزرات بالمنتدى اعمارها ما زالت صغيره ... وصدقوني لو البريمر منقول على الجزيره رح تلقون مؤيدينه ومتابعينه اكثر من ما هم عليه الان ... لان الجيل الجديد بيتاثر باخوانه واللي حوله + بالشي اللي يشوفه !! يعني اشتراك بـ 120 ريال سهل لكن بـ 1200 ريال شوي صعب

لا لا كذا انت بتشتت الموضوع

البريمير كان قبل فتره قريبه يعرض على art .. والاغلبيه من المتابعين كان يملك هالقنوات .. وكنا نشوف دوريكم السامج كل اسبوع

يعني لا تحاول تغير الموضوع الى المقارنه بين الشوتايم والجزيره

جد اتمنى اننا مانخرج عن الموضوع كثير .. يعني مدري وش دخل اليورو وايطاليا !

يعني تبون نتكلم عن منتخبات الدوريات ؟

إقتباس بالنسبة للانتر اللي متسيد ايطاليا من فتره !! وينه اوروبيا عقيم جدا !!

إقتباس من أقوى فرق ، الإيطالية أم الإنجليزية ؟؟ وأنا رديت على سؤالي واستدليت بالتشامبيونز

إقتباس تشامبيونز ما زال يثبت ان متسيد ايطاليا الانتر ضعيف خارجيا

والله ما عرفنا لكم .. !

اذا جينا نناقش في البطولات الخارحيه قلتو وش دخلها حنا نتكلم عن الدوري .. واذا جينا نتكلم عن الدوري طلعتو مره ثانيه للبطولات الاوربيه

ارسو لكم على بر عشان نقدر نناقشكم زين , ولا تغيرون في المواضيع

إقتباس واسلوب الكالتشيو ينفع بينكم ولا يمكن مقارنته عالميا

من بطل كأس العالم 2006 .. ؟

إقتباس بالنسبة لترتيب الأندية فتقدر تااخذه من الرابط هذا .. هنا لأني متعيجز جدا أجيبه لك وشف اختلاف الفرق في المراكز الأولى وتقارب النقااط . واللي فيه حيل يبي ينزلها فالله لا يهينه

ههههههههههههه اي تقارب الله يهديك

اقل شي 5 نقط زي ماذكرت فوق

إقتباس الحين الدوري الإيطالي أمتع من الإنجليزي ؟؟

سؤال صريح .. على ايش تقيس المتعه ؟

إقتباس وشطحة اللاعبين المصارية والكوريين ، كني ما قريتها يا محمد

وانا صادز


,,


والله ان النقاش معكم حوسه .. كل شوي هابين في موضوع

والاثباتات واضحه في الموضوع , اما الباقي مع احترامي .. سوالف

^^^^^

ما جااوبت على أسئلتي يا محمد

اللي مليت وأنا أعيدها بكل رد وفي النهاية تصريف ولا صراف الراجحي

نوووووووووووووووووووووووووووووووووووووووووووووووم