... نـ .. ـقـ .. ـا .. ط ... مـ .. ـتـ .. بـ .. ـعـ .. ـثـ .. ر ..ه - نادي الهلال السعودي - شبكة الزعيم

عريب عبدالله · #1 16/10/2008, 05:50 AM

تلك الأنوار التي تطل من أعماق المحيط مبشرة بقدوم الأمل

وكأني بها وهي تتوارى خلف هالة من الضباب فلا أدرك إن كانت حقيقة أم سراب

حينها يترأى لي تلك العنين التي أعرفهما جيدا ذلك الوجة الذي أعشقة

هل يمكن أن يكون هو

هل عاد من جديد

هل هو موجود حقا

على رصيف الميناء جثة ممدة وبالقرب منها قلب ممزق

تلك الجثة كانت أنا وذلك القلب كان لي لم أستطع جمع شتاته

لازالت صورته تطفوا أمامي أصوات السفن القادمة إختفى

كل شيء كان صامتا

لا شيء سوى تلك العينين

حاولت أن أنطق بأسمة

بل صرخت باسمة وكأن الحياة عادت من جديد
سنشششششششششششششي

ران ران أستيقضي

يبدو أنك كنت تحلمين

كونان أنا آسفة أفزعتك

لا عليك ياران
والله ما الوم ران ما شافت في الحلم الا عيون سنشي

أكبر ما في وجهه عيونه

أتوقع الرسام عنده عقدة من العيون الآسيوية الصغيرة

وتوصى زين في عيون سينشي

بس والله سينشي مملوح <<أخاف أمدحة ويتقفل الموضوع عاد أشوف ثلاثة ارباع المواضيع مقفولة

مما جعلني أتردد في الكتابة أخاف يجي الكلاسيكي ولا ماجد ويقفلة

يقولون من أول "دور الجار قبل الدار"ومع أرتفاع الأسعار صار الواحد أهم شي يلقى مكان يضفة مع عيالة

وخل أمثالهم لهم بس بصراحة اللي قال هالمثل حكييييييييييييم

"من كان يؤمن بالله واليوم الآخر فلا يؤذي جارة" بس وين اللي يطبق

علينا جيران مدري وش يبون يا عمري جارنا هذا دايم ما خذ حسناتي من كثر ما أحش فيه

ما عمري شفت واحد القف منه الا جارنا الثاني وولده عاد ذاك محطم الرقم القياسي

المهم جارنا يحب يجلس بالملحق حتى النوم ينام بالملحق ومن يسمع صوت سيارة وقفت عند بيتنا

طبعا هو الباب مقابل الباب على طول يطلع يشوف من اللي جانا

الله يجزاه بالخير حارس بيتنا ما يحتاج نجيب حراس لأن الباب الثاني ما يقصرون

الأخ الثاني مع ولده عاد جارنا الثاني لين جت عند بابنا سيارة غريبة

راح عند راعي السيارة يسألة من أنت وليش واقف هنا

نرجع للحبيب الأول اللي مقابل باب بيتنا اربع وعشرين ساعة لأنه متقاعد

طبعا مراقبته للباب ما هي المشكله المشكله الكبرى سالفة الزبالة وأنتو بالكرامة

مستحيييييييييل يحطها في البرميل لأنه يحافظ على نظافته ما قلتوا لي وين يحطة

الحبيب يحطة على الحوض حق باب بيتنا وطبعا القطاوة ما تقصر في الباقي

يمكن تقولون الرجال ما هو نظيف أقولكم لاء الرجال مرة نظيف لدرجة أنه كل يوم

يكنس باب بيتهم ويغسل الجزء القريب من بابهم من الشارع ويجمع اللي شاله من الأرض

ويجي يكبه عند باب بيتنا

من زود النظافة

طبعا المسألة ما وقفت عند هنا المسألة تتعدى واللي يقهرني أنه ما يعرف شي

أسمة غض البصر لين طلعنا من البيت شوي ويدخل في السيارة من اللقافة

أتذكر مرة كان عندي إمتحان ومتأخرة ولما سمع باب بيتنا مفتوح طلع يشوف من طالع كالعادة

المهم لما طلعنا بالسيارة مع الباب خربت عند بيتهم وما اشتغلت

ويجي الحبيب يدخل راسة مع شباك أبوي من غير ما يحترم أني في السيارة ويسأله سلامات

عاد أنا ارتفع ضغطي بس سكت وش اقول يعني المهم أبوي نزل معه وفتح الكبوت يشوف وش السالفة

أنا نزلت ورجعت للبيت أقوم أخوي لأنه كان غايب على قولته يذاكر مع أني ما كنت مقتنعه

المهم أني صحيت أخوي يطلع السيارة الثانيه عشان يعطي ابوي اشتراك لأنه كنا متأخرين

طلع اخوي السيارة واشتغلت سيارة ابوي اخوي كالعادة راح ياخذ لفة

انا حسبته راح يجيب مصلح وأنا اللي يطق فيني عرق من القهر

أكلمة وجوالة في البيت وأبوي واقف مع الرجال صعب أحاكية والا أتصل عليه

وخلاص وصلت معي وأصبر ويطووووول الوقت الا أخينا في الله راجع ويفتح الباب عشان يدخل

قلت له لحظة لا تدخل السيارة نروح فيها ولين رجعنا يصلح ابوي السيارة الثانيه

هنا قال أخوي السيارة زانت من زمان ليه ما رحتوا

هنا أنا شوي وأنفقع من القهر

وأكلم ابوي قال قدامة يالله تعالي اركبي

الحبيب ما فهمها

ووقف لين طلعت وركبت وحنا ولا عنده اي ذرة إحساس

أقول لأبوي وش هالقلة الأدب قال أبوي وش اسوي رجال كبير وصعب اقوله شي

قلت هو ما أحترم نفسه لو أنت تناظر عيالة مارضى

قال ابوي يابنت الحلال الله يهدية جارنا والنبي وصى على سابع جار

لما قلت لأبوي طيب وش عنده ذا جالس يقولك

قال ابد ما عنده سالفة مجرد لقافة السيارة مديل كم وليه تشتري هالنوع

ووين بتروحون وأمس عندكم ناس اول مرة اشوفهم منهم ...الخ من اللقافة

وفي المقابل جارنا اللي مع الباب الثاني نفس طينة جارنا هذا

قال ابوي على كذا بأتطاق مع كل الحارة الواحد يصبر ويحتسب

ابوي أحيانا يرفع ضغطي والمشكلة أن أخوي لين جا بيقول شي قال له ابوي عيب هذا رجال كبير أحترمة

في المقابل جارنا اللي كل ابو دايم أنا في بيتهم وهم في بيتنا

يوقف سيارته عند بيتنا عشان الظل ككل سيارات الحارة

صاير بيتنا معارض

المهم كنا نطلع وهو توه واصل بيتنا رايح لسيارته يعني حنا مكشوفين له

الا أنه ما رفع راسة وصد مع الجهه الثانيه مع أنه أنا أعتبره مثل أبوي

بس المحترم محترم

حتى أني أحيانا يوم كنا صغار كان يودينا معه مشاوير وهم يروحون معنا مشاوير

عاد أنا كنت استحي أما أختي اللي اكبر مني عادي ما تستحي من احد

طبعا كنا صغار في الإبتدائي وأنا ما بعد درست يمكن بس مالت علي أنا ويا وجهي مسويه فيها خجولة

فاتتني نص طفولتي وما عشت مغامرات مثل خواتي <<خل الإحترام ينفعني

أصلا وين طفولتي اللي عشتها كلها كنت مؤدبه وأسمع الكلام

وحتى لمن كبرنا لا زلت أعتبرة ابونا وهم يعتبرونا أهلهم لما جت بنتهم تولد أتصلت على أخوي يوديها المستشفى

أما هاللي ما نمون عليهم وجيههم مغسولة بمرق لاحيا ولا حشيمة

والتفت على حريمهم بالغلط وشف وش يجيك من هالأشكال المتخلفة

المبدعين في كل زمن داااااااااااائما يتحطمون من أقاربهم

والمشكله أن ودك يكون الدعم منهم بس هذي الدنيا

ولد عمي مسكين كان عنده إختراع يبي يشارك فيه يوم السبت

وضع اللمسات الأخيرة على إختراعه وراح ينوم مبسوط في إنجازة

ويجي أخوة الصغير ويشبك أختراعة في الكهرباء 220 وما درى الا البيت طافي عليه النور

وما كان من والدته العزيزة الا أن أخذت أختراعة اللي مستانس فيه وأكملت ما بداء به أخوة

ثم رمت به في أقرب حاوية بعد أن نزل عليه واااااااااابل من التهزيء المحترم

هذي مش سالفتنا سالفتنا أن الحبيب مسوي فيها رومنسي ويبي يكتب خاطرة

عاد ومن يطلب يساعده في الموضوع حضرة أنا

ما خذ مقلب فيني

عاد أنا أنبسطت فيه أحد أفقش عليه ويصدقني

واسوي فيها فاهمة

وأنا ما عندي ما عند جدتي الله يرحمها

واتفلسف عليه من هنا وهناك

واقلب مخة بالبربرة الزايدة وأتوقع أنه ما فهم شي لأني أنا بعد ما فهمت شي

وأعطية نماذج لخواطر وقلت له مجموعة من الفضايح الخاصة شلون أكتب وكيف أفكر

آخر شي يطلع طال عمرة يكتب أحسن من كتابتي

>> بس حركات بزران

قهرني خلاني أتفلسف وهو فاهم << صدق البزران ما ينعطون وجه

أتفقنا يوريني وش يصير معه أول بأول وأنا اللي أنسى السالفة<<أم الجحدة

المهم وصار له كم يوم يدورني وما لقاني حتى شك أني مسافرة

والا مت والا صار لي شي

بس كل من سأل عني قال موجودة

لما بعد مدة ظهرت فجأة وأنتهت فترة السبات اللي أمر فيها بعد كم يوم

ولقاني بالصدفة قال لي صدتك

وين كنتي مختفيه

ما تدرين وش صار سألت وش صار المسكين كان ما يدري من وين يلقاها

قال تدرين وش صار على الخاطرة قلت أيه صدق وش صار>>بدري

قال لما كتبتها وخلصت جا أخوي الصغير طبعا هذا غير الأول الأول كبر

المهم جا آخر العنقود الشيطاني يا حبي له بس

ومسح الخاطرة

بصراحة ما عمري شفت واحد حظة مثل وجهه كثر ولد عمي هذا

قلت طيب أكتب بدالها قال وين جت الدراسة وما عندي وقت

عاد قال ممكن يكتب لين لقا وقت

مسكيييييييييييييييييييييييييييين

لحظة بطولة مريت فيها لأول مرة أحس أني سويت إنجاز كبير

السالفة تبداء لما راحوا أهلنا زواج وأتفقنا نجتمع ببيت عمي

أحنا بالعادة نطلب العشا من برا لكن من زود اللقافة قررنا نطبخ بالبيت

عمي خدامتهم توها منحاشة يعني أحنا السنعات اللي بننظف البيت

ما في البيت الا بس أنا وأختي وهم ثنتين وبنت جيرانهم

بس والله طاحوا من عيني كانت بنت عمي من زود الحماس شارية بقدونس

عشان نسوي تبولة ولأنها اللي شاريته قررت أن هي اللي بتقطعه وتغسله

ولما كانت توها بتغسلة الا وتطلع عليها ذيك الحشرة الكبيييييييييييرة

ما سمعنا الا آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ >>صرخه مدوية

مما أدت الى أن الكل فر بجلدة من المطبخ

أنا دخلت الغرفة وصكيت علي الباب مزيد من الأحتياطات الأمنيه

وشغلت قناة لقيت فيها مباراة وأطول عليها عشان ما أسمع وش يصير برى

وهم بدأوا الحرب ما بقى مبيد حشري ما أستخدموه حتى الكلوريكس ما ادري وش دورة

بس كبوة على الحشرة ولا زالت تنازع الحياة ماماتت راسها صاحي

كل اللي فيه جبناء >>ما عدا أنا طبعاً

بعد ما جو عندي وكانت وجوههم معبرة جدا وهم يبكون ويتمسخرون فيني

أني تاركتهم يحاربون وأنا أشوف التلفزيون

وهنا ما ادري وش صار في قواي العقليه

وقفت متجاهله كل شي ومشيت بخطوات واثقه نحوا المطبخ

لحقوني كلهم يخافون أتهور والا اسوي شي لا تحمد عقباه>>الثقه معدومة

وأدخل المطبخ والتفت عليهم لو سمحتوا كلكم برا ما ابي اشوف أحد هنا>>يا شديده

وآخذ المكنسة والمجرفة<<وأغمض عيوني وقلبي يدق بقوة شوي ويطلع

وآخذ نفس عميق وأتشهد وأردد في مخي تراها حشرة وأنتي إنسان>>أحلفي

وأكنسها بسرعه وأصلا هم ما قصروا فيها ما عاد فيها روح

وبعد ما خلصتهم من هالكارثة صرت بطلة قوميه عندهم

أنواع التصفيق والتصفير والعناق الحار وأنواع المدائح بعد ما كانت سخرية

أنقلب الرأي العام لصالحي 180 درجة

وهنا بس تكدرت تلك النشوة بالإنتصار لما خطر ببالي خاطر مزعج

تذكرت الموظف المسكين يكرف ويجتهد وآخر شي الترقيه والزيادة والتكريم للمدير

ومن زود القهر أن هالضعيف اللي ساهم في نجاح المسؤل يصفق له ويسوي له تكريم

مع أن الشي الوحيد اللي سواه المدير أنه حصد المجد لوحدة

تذكرت مقولة عبدالرحمن بن مساعد

الإقتصاد ناس تزرع من فجر ربي الين الشمس تغرب
وناس تصحى في العشا تتولى تقسيم الحصاد

طبعا ككل إنسان أخذ هاله ما يستحقها وبدون تواضع أخذت في إصدار الأوامر
وإستغلال الموقف خير إستغلال لأنه كلها شوي وينسون هالبطوله الهشه
وأستفدت شوي من السلطة في فرض الرأي وخربت علينا السلطة وسوينا سلطة خيار بدال التبولة

الحياة مثل اللون الأبيض مكونة من مزيج من الأحاسيس الملونه

كل لون له تأثير على جسم الإنسان مثلا لما يكون الإنسان معصب و عنده مشاكل

يبعد عن اللون الأحمر

ويلبس اللون البنفسجي الغامق لأن اللون البنفسجي يرفع

مستوى الروحانية عند الإنسان ويكون الشخص أكثر هدوء وإنسجام

المطاعم تستخدم اللون البرتقالي عشان هذا اللون يفتح الشهية

غرف النوم يفضل لها اللون الوردي عشانه يساعد على الإسترخاء

اللي يعاني من الأرق يحط نور الأبجورة أزرق وبكذا يساعدة على النوم

لأن اللون الأزرق يهدي الأعصاب وينمي الإبداع ولون ملهم يعبر عن الثقه والولاء

أما اللون الأخضر هو لون الحب المطلق وماله أي تأثير سلبي على الجسم

بالعكس يحسن من مستوى الطاقة وينظم الدورة الدموية لأنه متعلق بالقلب

وهو يرمز للسلام والخضرة والطبيعه

لكي تكون حياتنا بيضاء لابد من بقية الأحاسيس الملونه

هذا الرابط لأختبار الشخصية جدا ممتع جربوه وقولو وش يطلع معكم

http://www.spacetoon.com/spacetoon/home/test_your_self

بعض مني وضعته هنا...

لا وطن لا إنتماء
وامد طرفي للسماء
الله كريم
ياهم ياجرحي الأليم
الله كريم
الله كريم
وين ذاك اللي تمرد في حياتي
لين صار اسمة وطن
أكتشفت أنه مجرد ثورة استعمار في قلبي الرهيف
الحصون اللي فتحها أنتصارة
هزمت باقي حياتي
ورمى في نصفها الثاني على أقرب رصيف
بعد هذيك الموائد
ما ترك لي غير قطرة ماء آسن
معه كسرة رغيف
الألم في داخلي لو هو استحال الى جيوش
حرر الأقصى من يدين اليهود
وفك لعنة اورشليم
الجيوش اللي تقاتل في سما الإحباط
ملت هالجمود
والصقيع اللي تجمد
في علاقتنا تحول للحجيم
آآآه من برد الثلوج بهالصحاري
يا نجاحي
لاتموت فعز قمة إنتصاري
كل هالثوار ماتوا
ما بقى غير إحتضاري
وش بقى والروح راحت
والسماء اللي أكتست روحي خضار
اغرست خنجر رعدها في حياتي
ولحرم قلبي استباحت
لين صارت معركة قلبي وروحي
بين ذاك اللي يسمونه جسد ناحل
وبين عمري اللي يسمونه البواسل
وبين سم الهم في باقي حياتي
وش بقى مني سوى ذكرى
نستها ذكرياتك...
يازمن جاحد............
وعاشت كلها في ذكرياتي
يارياح اللي يسمونه شتى في عقر دار الصيف
كيف ؟؟ قولي كيف؟؟
كل فتوحاتك تتم بدون حد السيف
وينتشر باقي رمادي في الأفق
بلا وطن أو إنتماء
يبقى مشتت في السماء
وفي السديم
الله كريم
الله كريم

بالحب والإشراق