السلام عليكم ورحمة الله وبركاته .. }

يسعد صباحكم/مساءكم .. بكل ورد وزهور ورده

أنا من أشد المعجبين و لـحد الجنون .. بالشاعر الأمير الراحل// طلال العبدالعزيز الرشيد ..
كلماته تدخل القلب .. وتعبر عن الأحاسيس المكتومه ..
وحبيت أعبر عن إعجابي بوضع الموضوع هذا .. وهو عباره عن موسوعه صغيره لـ حروف الملتاع الكبيره ..

( موضوع متجدد .. ومن لديه قصيده للملتاع يشاركنا هنا )



مرثية رائعه جدا في طلال العبدالعزيز الرشيد الله يرحمه ..
وهي للشاعر العطيب // طلال العبدالله الرشيد

يعني ماكفـوك مليـون الشهيـد
تاخذين أغلا الحبايب يالجزايـر

مالقيتي غيـر أطيـب الرشيـد
لو مااخاف الله لاقول الحكم جاير

الله اللـي كاتـب وحنـا عبيـد
ذا قضا رب المساجد والمنايـر

الزمن لو طـال مثلـه مايجيـد
فقد ابو نواف هـي ام الخسايـر

مدرستنا في المراجل والقصيـد
طيب الموقف اليا دارت دوايـر

لابكـاء ينفـع ولاشكـوى تفيـد
مابيدنا شـي لـو الـدم فايـر

مابيدنا غير نصفـق ايـد بيـد
ومن تكلم عنه تخنقنـا العبايـر

مابقى فينا علـى الشـدة شديـد
اللهب بين الضلوع وفي الضماير

كيف نفرح عقبـه بعـام جديـد
لاهلا ولا مسهلا بواحـد ينايـر

يالله انك تحسبه عنـدك شهيـد
من توفي غدر في بر الجزايـر




تـنهيدتـيـــن ونـــار

كـلـّمـنـي عـنّـك

أبعرف كل شيٍ عنّك منّك

قلـّي وش أول جروحك

قلـّي وش آخر أمل ترجيه روحك

إحكي عن طبعك

وعن ربعك

عن اللي يهـزّ دمعك

قلـّي وش معنى الحياة

قلـّي بأنفاسك متى قد قلت آه

إحكّ لي عن الحب

إحكّ لي .. إحكّ لي

إحكّ لي عن الشوق

طـر بـي فوق .. فوق

خـذنـي منّك

وإحكّ لي .. عنّك

الـصـدق

إن الأمل من قبل أعرفك .. كذب

والتضحيه أوهـام

وإني أنا من قبل أعرفك

كنت أعرف أنـام

كان السهـر مـو هـالسهـر

لعب وأغانـي .. وإخـتصار

صار السهـر تفكير

صار إنتظـار

صار إحتظـار

صار السهـر .. تنهيـدتيـن ونـار

يا منتهـى أمـري

بالهمس قلـّي مرّه يا عمـري

وطـر بـي فوق .. فوق

خـذنـي منّك

وإحـكّ لـي .. عـنّـك



أشر بعينك..

أشر بعينك مو ضروري تكلم .... ولا بعد حتى تحرك يدينك

وكلن على تنفيذ امرك تولم .... يامن يغار الورد من وجنتينك

اللي يعرف الذوق منك تعلم .... واللي أشتهر بالزين به ربع زينك

وحتى القمر من يوم شافك تظلم .... يضيع نوره لا تبين جبينك

أنا ترى جيتك لحسنك مسلـّم .... وعقلي وقلبي كلهم عاشقينك

سلم تراني جيت يمك أسلم .... يميل قلبي لا جت يميني تصافح يمينك

وأبد أبد ماهو ضروري تكلم .... وإذا لزم حاجه بس أشر بعينك



أموت في حبه..

أكيد أحبه أكيد أموت في حبه .... أكيد أنا بفقده لا غاب عن عيني

غلاه مدري كذا يجيك من ربه .... من يوم شفته وحبه ساكن فيني

موج الغلا صار يلعبي ويلعبه .... أغليه أنا وزاد قدره يوم يغليني

الشوق لاغاب كنه نار مشتبه .... ولا في شئ سوى شوفته يرضيني

هذا لحاله ما أحد فيه يتشبه .... مافيه غيره يحركني ويغليني

الزين يذبح وحتى الخال له حبه .... لا شفتها فيه ضعت قلت أنا ويني

غصب علي غصب أمدح فيه وأكتب به .... أما خذاني لشعري من يوديني

والله أحبه وأموت في حبه .... ومن يوم شفته وغيره طاح من عيني



من يشبهك؟؟

صدق أربعين من الشبه يخلق الله .... الا أنت واحد دون تسع وثلاثين..

من يشبهك يامالك الحسن كله .... من يشبهك ياسيد كل المزايين..

يابو رموش فوق خدك مظله .... عقبك غدو كل المزايين مساكيين..

دقة بغيرك وأنت ماخذ جله .... عليك ماشاءالله لا تصيبك عين..

قلبي حلالك أملكه وأستحله .... حلالك لحالك ولا فيه ثانيين..

أقسى القلوب لين شافك تتله .... ينسى القساوة ياهوى القلب ويلين..

والهرج عنك أن طال والله ماأمله .... ماأمل لو سولفت أنا عنك سنين..

واحد وطير خافقي من محله .... وشلون أجل لو في تسع وثلاثين..



علمتني ..

علمتني وشلون احب00 علمني كيف انسى؟؟
يابحر ضايع فيك الشط والمرسى
علمتني وشلون احن
علمني كيف اقسى؟؟
سير علي بس امسح دموعي وروح
سير جب لي معك قلب وروح
سير علي اذا تذكرت الجروح
ياطاغي النظرة خطا
تجزى بها البخل العطا
وانا الي اهديتك امن عين وجفن
ياجرح من وين ابتدي
( وانت معي) من مولدي
وعيت يدي على فراقك تهتدي
بس انت علمني الجفاء
دامني عجزت اعلمك كيف الوفا؟
علمتني كيف السهر00ونسيتني الممسى
علمتني وشلون احب0000
علمني كيف انسى .... !!



محتاج لك ..

أنـتي بكف وبـاقي الـخلــق في كـف .... مـتـعـلـيه في وسـطـ قـلبـي ولـك شان

فـي غـيـر وصـلـك مالـقــلـبي تـرى شـف .... مـحـتاج لك يـانـور عــيـني وشـفــقــان

لاجـابـوا أسـمـك صـرت انا تـقـل مـخـتـف .... مـالـي عـلـى نـفــسـي إلى اطــروك سـلطـان

مـن غـيـر حـبـك غــضــت عــيــوني الـطــرف .... ياللـي جــمـالك صـار للـزيـن عــنــوان

اريــد انـا قــربـك يـاغــذا الـحــرف .... وان مـاحـصـل مــوتي ودنـيـاي سـيان



عرفت الموت ..

بيني وبينك عرفت الموت .... تحب والحظ متجني

تبي الصدق حبها منحوت .... واصبحت منها وهي مني

افرشلها القلب بالياقوت .... واقول يادلي إتمنـــــي

صدري قصور ومدن وبيوت .... وهي المليك اللي يحكمني

ياويل ويلي عليها صوت .... تحكي تقل كنها تغني

وسكوتها غير كل سكوت .... كل شي فيها يكلمني

قد شفت شمس زرعوها توت .... بشفاتها التوت متثني

ياحلوها والقلم مبهوت .... وش يكتب بوصفها عني

هي دنيتي والهوى والقوت .... وان غبت عن وجهها كني

متغرب وغربتي تابوت .... ميت وانا حي مستني

قولو لها لو يفوت الفوت ....هو ينفع الصوت متعني

وقولو لها والله إلا موت ....لو خاب في حبها ظني



ذكرى الفراق ..

اليوم ذكرى الفراق ومرت أول سنه .... اليوم لي عام متغرب وحيد وحزين

اليوم انا ضيف جرحي جيت بطمنه .... اني جمعت الدموع وجبت امانة امين

مايجرح الصادق الا غدر من يامنه .... لا جت من احباب قلبك لا تلوم السنين

مليت من هالاماني دام هي مو ممكنه .... لاهي تحقق وانا ياسي بوجهي يبين

الوين انا وانت مثل الشمس والازمنه .... مع كل صبح يجددني لشمسك حنين

لا قلت احبك .. احبك كنها دندنه .... او كنها وردةٍ مابين اصابع جنين

يااجمل الناس لك بين الملا هيمنه .... كثير غيرك ولكن مين مثلك ووين

ياعاذلي خذ عيوني يمكن تثمنه .... تشوف عيبه وانا اشوفه ملاك حسين

امس افترقنا وانا احسب مرت اول سنه .... ياطولها ليلة الفرقا سنة للهزيم



السكوت أرحم ..

أحيان أحس الأمل قدام ..
وأحيان أحس إني أتوهم ..

وأحيان أحس الملام هيام ..
وأحيان أقول السكوت أرحم ..

أتعب سهر ما تعبت تنام ..
الى متى وأنت ما تهتم ..

ما قلت لك تشبه الأيام ..
تجرح وتنسى ولا تسأم ..

تعبت أسافر من الأحلام ..
ولا اكتشفت إني كنت أحلم ..

إلين صحتني الأوهام ..
على جروحي وأنا مُغرم ..

الحب أحلى قدر لو دام ..
الحب أغلى أمل يُرسم ..

بحب لين أعذر اللوام ..
بحب لين الندم يندم ..



أول إنسان ..

العاشق .. آخر طفل أو أول إنسان .... قلبه . مثل نفخ النسايم على الما ..

العاشق .. أجمل طير له كل الألوان .... سمّوه طير الروح .. تفداه الاسما ..

وجرح الظنون عيون .. عنوانها كان .... تسرح بعيد .. ولجلها الجرح يدما ..

لول عذّبت قوافلي كل الأوطان .... وشلون أبا صلها .. وأنا دربي أعما ..

كان الامل بالوصل .. له ضوح دخان .... أنا غدى صدري .. رمادٍ وظلما ..

وكان الفراش يعذّب النور تحنان .... أنا شربت الدمع .. وبملحه أظما ..

أغلى الشعور .. معانق يدين خلان .... فيه الكفوف قلوب .. والروح تسما ..

وأصعب شعور .. موادع إنسان لإنسان .... منه العيون .. تشبّه الدمع بالما ..




مكانك مكانك ..

أموت من فرقاك .. و أموت بلقاك .... وأموت من جورك .. و أموت بحنانك

كلٍ قضاه يموت مرّه .. و يفداك .... و أنا أموت ألفين مرّه .. عشانك

أذكرك.. لا مني نسيت إني نسيتك ....أنساك .. لامني ذكرت نسيانك

رضيت أنا بالهم لرضاك مرضاك .... و ارخصت لك قلبٍ جرحته .. وصانك

أجيك في صدري عتاب .. و أبجفاك .... و أرجع ألوم الوقت و أقول خانك

أحب فيك .. احساسي إني بلاماك .... في عز خوفي منك أحس بأمانك

عجزت أفرق بين وصلك و فرقاك .... ياللي عطيت الناس بيدك عنانك

مر تجيني لين أقول إنـي إيـاك .... و مر تروح بعـيـد و انسى أوانك

أقبل و تقفي .. و اعتذر عن خطاياك .... و أقول ما عييت .. عيا زمانك

و إن خانتك دنياك .. أو خنت دنياك .... إرجع و تلقابي .. مكانك.. مكانك



آخر حب ..

كنت احسب اني عرفت الحب قبل اعرفك .... وعشقت قبل اعشقك واشتقت قبل التقيك

وكنت احسب اني لقيت احباب قبل اوصلك .... واثري توهمت في غيرك وانا كنت ابيك

تعال نعطش وتشربني وانا اشربك .... تعال قبل الوعداجلس معي نحتريك

تعال شفني وانا استناك .. كم اشبهك .... يطري علي ألف راي وراي واحتار فيك

اجي مكان الوعد والا اسبقه انطرك .... والا اخذ الموعد اللي يحتريك واجيك

يااخر الحب ذقت الحب في اولك .... ويااول الشوق اقصى الشوق ماينتهيك

علمتني كيف اعرفك لين صرت اجهلك .... ضيعتني في متاهاتك وكنت ارتجيك

حبيب الاحلام يابعدك ويامقربك .... حرام يكفي تبعثرني وانا احتويك

ان شفتك بحلم صدقته وانا اتوهمك .... وان شفتك بعلم كذبته الين انتشيك

اخاف اغمض عيوني وإن رمشت افقدك .... واخاف افتح وتصبح حلم ولا التقيك




الله يرحمك ياطلال ..

مات ..
وبقى إسمه وطاريه (حي)
وقصائده وحروفه (حيه)
مات الجسد وبقى كل شي (حي)

الله يرحمك ياطلال ..



الموضوع من تجميعي ومتعوب عليه ..
أتمنى يعجبكم ..

أخوكم .. كبرياء هلالي

يتبــــــع >>>