حمد رجل كبير ذو سلطة واسعة ، أهم ما يميزه أنه تسذوب لدرجة لا تعقل ، وكان لحمد صديق واحد فقط اسمه سعد ، وسعد هذا الله يشفيه مسكين عليه ِقل صُح (عقله غير مكتمل) :sad: لذلك استغله حمد كي يمرر عليه تسذباته الغير معقوله..
فقد سبق وان قال له أن أبي اشترى لي أرضاً على شارعين في عطارد!! وأن أباه يفضل الكشتات في البحر وبدأ يحلف ويقسم بالله أنه سبق وان كان لهم مخيم داخل البحر الأحمر!!، وتحدث عن أمه قائلاً بأنها كل يوم تروح لواشطن تتقهوى مع هلاري كلنتون وينتفون حواجبهم بالداون تاون ولا صارت الساعه احدعش بالليل ترجع للرياض!!..
سعد يستمع بإنصات تام لكل صاروخ يطلقه حمد ويقول له بعد كل سالفه قل والله؟! وبعدها لا يتردد حمد في قول قسم بالله العظيم!!
وفي أحد ليالي الصيف الملاح الحاره كان الصديقان ساهرين في بيت حمد ، وقد جلسوا في بيت الشعر وشغـّـلوا النار و بدؤوا يشربون الزنجبيل ويغطّون الشابورة بالحليب ويستانسون بالأجواء التساذبه ...
وفي لحظة صمت ، سأل سعد صديقه عن أصعب موقف واجهه؟؟..
فقال حمد: المواقف كثيره يا بعد عمري لكن أصعبها كان عندما ذهبت أنا و أهلي للمنطقة الشرقية وطلعنا في رحلة إلى شاطئ نصف القمر، وعندما وصلنا كانت الساعة العشرة صباحاً ففصخت ثوبي وفنيلتي واتجهت إلى البحر كعادتي ، فأنا لا أستطيع أن أشوف البحر ولا أسبح خصوصاً وأنني رومانسي وسبق وان فزت بسباق 400 متر فراشه في أولمبياد تبوك على شاطئ البحر المتوسط ..
ولا عليك بالطويله يا خلفهم ، طبيّت في البحر وابتعدت مسافة ما اذكر كم بالضبط وما ودي أكذب عليك ولكن الأكيد أنها أكثر من أربعين كيلومتر، ويوم تعبت قررت أن أغوص، وغصت حوالي كيلو ولقيت فتحه بالأرض؟!! فقلت في نفسي لعلي أشوف ما بها ، فدخلت في هذه الفتحه وسبحت حوالي الساعتين وبعدين بدأت أرى من بعيد فتحه أخرى يطلع منها نور فاستعجلت نحوها لأنه ضاق نفسي شوي، ويوم وصلتها وطلعت راسي!! توقع وش شفت؟؟
قال سعد: شفت أبو نوره يغني الأماكن ، اخلص علينا بس وش شفت؟؟
قال حمد: شفت عمرو موسى جالس هو وباتستوتا على مركب ، يوم ارتبكت وسألت عمرو موسى: أنا وين هو به؟؟
قال : انتا هنا فمصر، ودا النيل!! بس انتا قيت هنا ازاي؟؟
وقصيت عليه القصه وقلت له وش اسوي؟؟
قال: اتغدا معانا وخد لك كباية شاي وروح اتمشى في شرم الشيخ يومين وبعدين انكس لديرتك..
والله وتغديت معهم وسلمت عليهم ورحت للشرم وجلست يوم وتذكرت أهلي !! تلقاهم ينتظروني الحين ، وارجع بأسرع وقت مع نفس طريقي واسبح واسبح ليــــــــن وصلت أهلي، ويوم وصلتهم لقيتهم قاعدين عادي وكل شي طبيعي!! وقالت لي أمي يا وليدي ما تسوى عليك هالربع ساعه اللي أنت سبحتها!!! يوم شفت ساعتي ولاها عشر وربع!!
قال سعد: قل قسم بالله
قال حمد: قسم
قال سعد: لأ ، قل قسم بالله
قال حمد: قسم بالله
قال سعد: قسم بالله انك لوح ، سنين وانأ ساكت لك يالخسيس ولا عمري قلت انك تكذب وآخرتها كذا!!! لكن الشرهه مهوب عليك علي أنا اللي مخاويك ولو تقول الشمس زرقاء صدقتك .(انتهت القصه)
فكانت تلك السالفة سبباً لشفاء سعد ، فقد عاد عقله إليه وأصبح يميز بين المعقول واللامعقول ، واختار لنفسه صديقاً جديداً قد لايكون هو الأمثل ولكنه بالـتأكيد أفضل من حمد التسذوب..
حقيقةً أن مجتمعنا كله سعد ومن حوله كلهم حمد، ومازال السُعداء ينتظرون من الحُمداء قاصمة ً تعيد إليهم عقولهم..
ولن يستيقظ السعداء إلا حين يجيهم صاروخ لا يطاق من صواريخ حمد وأشكاله..
قد يقول قائل ماذا تريد أنت ووجهك؟؟
وله أقول قسم بالله ما أدري بس إني محبط ٌ قليلاً من كثر ماذقت طعم الغبن الوردي!! قصدي الجبن البلدي..
قمة الغبنه أن أحدهم يكذب عليك وأنت تعرف أنه كذابٌ أشر ورغم هذا تُجبر على قول صااادق الله لا يخلينا منك..
التسذابون الاقوياء يغطوننا بشرشرف ويخمون عقولنا ويقولون كل شي تمام وحنا ياغفل لك الله !! وياغافل انثبر ولا ترفع الشرشف..
ولعلي أقول لصاحبي كما قال الشاعر محمد الدحيمي لصاحبه نما:
من ذاق حر القايله يعشق الليل
ومن شب ضوه ليلة البرد يدفـا
امسيت في جيلٍ ولاهوب ذالجيل
واصبحت والا ديرتي شبه منفـا
واللي حما بيته بطيـرن ابابيـل
ماجيت ادور كل من صد وقفا
... ياكثر الصورايخ الأرض جو عوندنا لدرجة توصل وتسير قنبله نوويه
... والمشكله تلاااااقي هالأشكااال ما يسألهم أحد يدخلون في السالفه بدون مقدمات ...
... بس الي دايم استغرب منه تلاقيهم حابكينها حبك ولو سألتهم سؤال مفاجىء يجاوبونك كأنه سدق بدون ما يخططون له
... أتوقع اللي يسوي كذا يعاني من نقص وانعدام في الثقه أصلا
... إحساسه بالنقص هو السبب الرئيسي إللي يخلي الشخص يحاول يعوض النقص بالغبن على البعض
... بس أنا عوندي نظرهـ صحيحه أكتشف فيها هالفئه ومن كثر ما صادفت من هالأشكال صرت بعض الأحيان أتهم الناس " مش بتاااع السواريخ " إنهم بتاااع صواريخ
... وهذي تكون موشكله بعض الأحيان
... لكن غبن شخص على شخص آخر أهون بكثير من الغبن على مجتمع بأكمله ...
... سواء كان غبن صحيفه أو إدارهـ حكوميه أو غيرها من التي تستغل حاجة المواطن لها ...
... وأقرب مثال الغبن في الأسعار لدرجه لاااا تصدق ...
alhawey
... أنا هنا أسجل إعجابي بالموزوع لأنو فعلاً يناقش أسلوب معين من الكذب الذي نعاني منه كثيرا ...
الحبايب حمد وسعد ..
يا كثرهم .. المشكلة ما يخلصون ولا يتوبون ..
كان عندنا واحد من الشباب بأيام المتوسطة ..
ما بقى واحد من عايلتهم الا ما دعا عليه بالموت ..
وانواع الايمان ..
انه قد لعب على البلاي ستيشن 3 ..
وهي توها نزلت اول امس ..
ما علينا ..
من فترة .. مر علينا البيت واحد ..
المهم قلت له العشا وما العشا .. <<< الصدق ما كنت ابيه يجلس لاني لوجدي بالبيت .. ومواعد الشباب اقابلهم
المقصد انه ما طرا لي ألزم عليه ..
الرجال قام يحلف انه طالع تركيا اليوم الثاني .. عشان عنده عمل هناك ..
وانه يا دوب يجهز اموره ..:p
طلع من عندي ..
وانا قابلت الشباب ..
اليوم الثاني كان عندي رحلة بالليل الى ابها ..
اطلع الطايرة .. واول ما وصلنا ابها ..
الا وألمح الرجال ..
قلت الله يحرجني اذا ما احرجته ..
وأروح اسلم عليه ..
واقول " وش اخبار ابو محمد .. الحمد لله على السلامة .. ويش من تركيا "
قال والله تعب ..
توني واصل هالحين .. <<< توه واصل لأبها من رحلة دولية
ما علينا .. <<< بعد كل سالفة لازم ما علينا ..
احس الموضوع كله كوم والجملة ذي كوم ..
إقتباس
حقيقةً أن مجتمعنا كله سعد ومن حوله كلهم حمد، ومازال السُعداء ينتظرون من الحُمداء قاصمة ً تعيد إليهم عقولهم..
السطر هذا موضوع لحاله ..
وكل ما تكبر الشريحة المقصودة .. تطلع بفوائد اكبر ..;)
وعليكم السلام ورحمة الله وبركاته .. مساء الخير اخي : alhawey والحمد لله على السلامة .. لي عودة باذن الله بعد قراءة الموضوع .. :::::::::::::::::::::::::::: عدنا .. :::::::::::::: الغبن الوردي والجبن البلدي !! :::::::: ماشاء الله موضوع رائع تكلمت فيه عن قضية مهمة جدا باسلوم يتميز بالفائدة والطرفة كالعادة .. ياكثر ها الحمد وفي كل مكان من اناس عاديين او من مسؤولين ودائما المواطن هو المغلوب على امره .. ليس عندي تعليق ولكن اقول : الى متى وهم يكذبون ونحن نعلم ونقول صدقت ؟؟؟ الله يصلح الحال ..
::::::::::::::
الله يعطيك العافية alhawey واعذرني على ردي المتواضع فقط احببت ان اثني على موضوعك هذا وما سبق من مواضيع بما ان هذا اول رد لي على موضوع لك ..
حنا من جرف لدحديره يوم توكل الاول قلنا الجاي هو الي بيحسن وبيعوضنا لكن طلع المربوط اردى من المفتلت ولا صرنا نترحم على الاول بعد الله يرحم الحال انا اتكلم ترى على حسب الي فهمته من كلامك واذا كنت تقسط شي ثاني ياليت توضحه لي شكرا الهاوي
يا هلا هلا بالهااوي ,,,, صدق من طول الغيبات جاب الصواريخ أسلوب جميل في موضوعــكـ ويا كثر ماصارت هاالغبنة يكذب الواحد عيني عينكـ لا والمشكلة الأكبر تمر حالة عليهم انهم من كثر مايكذبون يصدقون كذبهمـ
كذبت كذبة حتى عشتهــأ,,,مالي لا أرى أنها كذبة..!!
عوااااافي يالهاوي ,, فقط مرور متواضع لشخصك الكريم,,
يـ أخي فيه علاقه طرديه بينك وبين الدراسه ..! ماشاء الله اول ماقربت تبتدئي جيت لـ المجلس .
المهم عساك أنبسطت فـ إجازتك ..
نجي لـ موضوعك .
ياعميرتي يـ سعد كل شي يصدقه والمصيبه واللي قاهرني حمد ذا للاسف كثييير يتهاونون بـ الحلف فتشوفهم يحلفون كذب ..! طب ماتدري أن الكذب حرام ، الله يـ الدنيا اتذكر من اول أمي تقولنا " اللي يكذب ربي يحطه بـ النار " ، إيييه زمن أول تحول الارانب للاسف منتشره بكثره خصوصاً هنا بـ العالم الافتراضي ماتدري هو صح الكلام وإلا لأ بـ عكس لما الشخص يكون قبالك تعرف انه كذاب من لهجة كلامه ومن حركات عيونه اما بـ النت ماتعرف تفرق إلا لما يكون الصاروخ تعدى حدود المستحيل .
عندنا بـ الجامعة للاسف الكذب زي السلام عليكم أتذكر موقف قالته لنا إحدى الاستاذات مستغربه من كذبنا الزايد تقول : جتها بنت تعتذر عن عدم دخول m بسبب وفاة والدتها وتطالب بـ إجرى إختبار بديل راعت استاذتنا ظرفها وافقت ع انها تصلح لها اختبار بديل مع العلم أن هـ الاستاذه طيبه جداً وماعندها إلا اختبار واحد ونااادراً تصلح اختبار بديل ، المهم قدر الله ودرست هـ البنت مادة ثانيه السميستر 2 وغابت نفس الشي عن m واسالتها الاستاذه ليش ماحضرتي والله يااستاذه امي توفت ..! " نفس العذر ! " الاستاذه حافظه شكل هـ البنت قالت موب امك متوفيه الترم اللي فات !
البنت سكتت قالت ماراح اعيد لك الاختبار إلا لما تجيبي لي عذر مقنع ، عاد ماندري استاذتنا عادت لها والا لا بس هي تستغرب من حال البنات كيف صارت تتجرأ وتخلي امها ميته ..! او يمكن مابي اظلمها توفت بس موب كل ماغبت عن الاختبار قلت امي توفت ..!
لو انا فـ مكان هـ الاستاذه بطالب ان البنت تجيب شهادة وفاة ----->> عاد انتِ نذله :p .
اتذكر مره صار لي موقف جد جد انهارت اعصابي فيه لاشعورياً طحت ع الارض وقمت ابكي من شدة القهر اصعب شي لما تكون صادق بس اللي حولك يكذبونك لأنك صغير واللي ضدك كبير وفاهم وعاقل وأنت فـ نظرهم عقلك صغير ومهما تكلمت مايقتنعون بكلامك .. لأن الواحد بيصدق كلام ولده ع كلامه حفيدته !
واللي يقهرك أن هـ اللي ضدك جاب لك المصحف ويحلف بـ القرأن انه ماصلح هـ الشي وانا يـ عمري رحت فيها والمصيبه واللي قاهرني كنت حافظه الادلة بـ قرص مرن " هذا دليل ع ان الموقف قديم مره وانا موب هينه من زمان راعية حفظ ادلة " ولا لقيت القرص الا بعدين وصعب جداً توريه اهلك وتفتح صفحات تقفلت ..!
بس جد ع الرغم ان الموقف كان صعب ع إلا اني ندمت جددداً الآن ع اني دعيت فـ ذيك اللحظات لان اشوف اللي كان ضدي حاله تردى .. وحسيت أني السبب لاني دعيت عليه بـ دعوه ----> عجوز ماغير تدعي ..!
بس استفدت من هـ الموقف شي يـ الهاوي مو مهم انهم يصدقوني ويقتنعوني بـ كلامي والأهم اني ماادعي وانا فـ لحظة غضب لأن دعوة المظلوم ليس بينها وبين الله حاجب .. سوري طلعت برا موضوعك .
إقتباس
التسذابون الاقوياء يغطوننا بشرشرف ويخمون عقولنا ويقولون كل شي تمام وحنا ياغفل لك الله !! وياغافل انثبر ولا ترفع الشرشف..
الشاطر هو اللي يوقف فـ وجهم وينصحهم ويعلمهم بأنهم زودوها مثل ماصلح سعد بـ حمد يوم عرف شخصيته .
أخيراً ... alhawey حمدلله ع سلامتك ..
برايفت لـ جرح يشكي
ثاااانكس إنك علمتني بـ اسمه
الهاوي إستعد لـ التهديدات بـ فضحك بـ اسمك وخلي اللي مايشتري يتفرج :p ! ----->> موب صاحيه ع بالها انه بنت
شكراً لك أخي الكريم الهاوي شكراً يليق بمقامك وبخيالك الواسع في هذا الموضوع وفي غيره 00 في هذا الموضوع مزجت الفكاهة بطرح وعلاج المشكلة وأبدعت بذلك وهو أسلوب لا يجيده غير الكبار وأنت منهم طبعاً , وأنا هنا لاأقيمك ولم أصل لذلك المستوى ولكنه تسجيلٌ لإعجابي بشخصك الكريم أتمنى لك الإستمرا على ذلك وأن لاتتأخر علينا بإبداعاتك كهذا أما القضية فلا أملك ماأضيفه على من سبقني بارك الله فيهم جميعاً
...
..
، اخلص علينا بس وش شفت؟؟
جالس هو وباتستوتا على مركب ، يوم ارتبكت وسألت عمرو موسى: أنا وين هو به؟؟
، سنين وانأ ساكت لك يالخسيس ولا عمري قلت انك تكذب وآخرتها كذا!!! لكن الشرهه مهوب عليك علي أنا اللي مخاويك ولو تقول الشمس زرقاء صدقتك .(انتهت القصه)
اللي يقولون لك امتلت المقاعد وهم موزينها لربعهم,,
.
للاسف كثييير يتهاونون بـ الحلف فتشوفهم يحلفون كذب
اصعب شي لما تكون صادق بس اللي حولك يكذبونك لأنك صغير واللي ضدك كبير وفاهم وعاقل وأنت فـ نظرهم عقلك صغير ومهما تكلمت مايقتنعون بكلامك .. لأن الواحد بيصدق كلام ولده ع كلامه حفيدته ! 
" هذا دليل ع ان الموقف قديم مره 
..!
الوضع العادي
