ҳ̸Ҳ̸ҳ مطبـخ المجـلس العآم ҳ̸Ҳ̸ҳ. - نادي الهلال السعودي - شبكة الزعيم

هلاليه سنعه · #1 30/07/2007, 10:29 AM

[ السلام عليكم ورحمة الله وبركاته ]

في ليالي الصيف .. يكثر السهر والسمر .. ويكثر الجوع وتكثر الحوسه بالمطبخ
للبحث عن أكل .. والتفنن في طبخ الاكلات .. وتكثر اختراعات الطبخات ..:

الشباب يطلّعون مهاراتهم الطبخيه في الكشتات او الاستراحات مع ربعهم ..
واهلهم ماقد ذاقوا من طبخ يدينهم .. وفيه شباب عزابيه حايسين مايعرف
الا شكشوكه او بيض عيون واندومي

او اهلهم مسافرين بها العطله ولا عندهم احد يطبخ لهم

وفيه بنات مايتقنون فنون الطهي او ماقد طبو المطبخ

او يحبون يسوون الأكلات البسيطه ..;)

و ملينا هالتوصيل من المطاعم<< ايه هين

وانتم خابرين تكثر التسممات والبكتيريا في الصيف

وحتى تعالو شوفوا وش لون يسوون الأكل يكرروون الزيت كم مره الين يحترق والمسكين
هاللي يطلب

..

ومن هالمنطلق انا وتغريد حبينا نسوي مسابقه في الطهي والطبخ للجميع سواء كانوا شباب او بنات
ومافيه احد معذووور لازم الكل يشارك بطبخه سواء كانت
موالح ..

او حلى ..

او عصائر ..

او صياني .. او مقبلات .. او معجنات .....اللي ودكم منحب متشرطين ..

والمثل يقول ماعلى كريم تشّرط ..

تبون تسوون أكلات سعوديه او خليجيه او عربيه او هنديه او ايطاليه او مكسيكيه او حتى ارجنتينيه مافيه مشكله ;)

..
لو اكــله بسيطــه بس اهم شئ تشاركووون ..

نبي الكل يستفيد من هالوصفات والأطباق وتذوقون أهلكم من طبخكم ..

شــــــــروط المســـــــــابقه

1- كل عضو أو عضوه يشـارك بأكله وحده .

2- ان يقوم العضو او العضوه بكتابة اسم الطبق والمقادير والطريقه مع وضع صوره للمقادير والطريقه ان امكن .

3- شرط اساسي وضع صورة الطبق النهائي مع كتابة العضو او العضوه اسمه على الصوره .

4-عدم النقل من منتديات اخرى او لطش صورة طبخه معموله في احد المنتديات نبي الطبخه يسويها العضو نفسه يعني الشباب لايخلون امهاتهم واخواتهم يساعدونهم وتكون بأمانه ..

5- تبدأ المسابقه من حين وضع الموضوع وتستمر لمدة .. أسبوعيــن .. ثم تقفل المشاركه .

6- سيكون هناك موضوع اخر للتصويت لأفضل طبخه والتقييم سيكون على طريقة التقديم والجوده

7-.الرجاء عدم استخدام اي اساليب او رسائل من اجل التصويت .. التصويت سيكون للأفضل

8 وضع المشاركات سيكون هنا في هذا الموضوع من خلال الردوود.

9- الغرض من المسابقه روح المنافسه واظهار مواهب الأعضاء والعضوات في الطهي والأستفاده من الجميـع.

ازيد شرووط ولا يكفي ..

يالله نبي همتكم يازعماء وزعيمات نبي تورونا ابداعاتكم في المجلس المجلس العام اتمنى من الكل التعاون ووضع الأطباق قبل انتهاء المده بالتوفيق للجميع ..

عاد مشكله اخاف الأهل يتروعون ويقولون وش عندهم يطبخون عسى مافيهم حراره والأهم انكم ماتطلعون كل مواعين المطبخ وتحوسونه على اهلكم العبره بالطعم وليست بكثرة القدوور .

وغسلو مواعينكم عقبكم نبيها تلق ..

لاتنسوون الطبخات توضع في الموضووع ننتظركم ..

فكرة واعداد وسيناريو :
تغريد +هلاليه سنعه ..

تنسيق واخراج :
فطيس بقنه << اتحداكم تعرفونه

لا عاد حنا اللي مخرجينه ..

وبالهنـــــاء والعــــافيــــه ....

هلاليه سنعه · #2 30/07/2007, 11:08 AM

سكب والزعيمه الهلاليه ونور الشمس حياكم الله بانتظار ابداعكم ..

اختي نور الشمس سوي ان بغيتي جريش ولا مرقوق اللي تبين اهم شئ اكله

والاشياء الثانيه ابشري فيها ..

دمتم بخيـر ..’’

عاشقة الزعيم15 · #3 30/07/2007, 11:28 AM

إقتباس


	[ السلام عليكم ورحمة الله وبركاته ]

وعليكم السلام ورحمة الله وبركاته

هلا وغلا فيك قلبوووو
ان شاء الله بكون اول المشاركات في الطبخه ومثل ما انتي عارفه هذي اول مررة أطبخ

وان شاء الله تعجبكم

بما اني من اصول فلسطينيه وبما ان اهل ماما عايشين بالاردن<<<< بتعطيكم موشح ادخلي في الموضوع

:p
راح اقدم لكم اشهر طبق هناك واسمه
المنسف او الرز واللبن <<<على كيفها تحط اسماء:p :p
نبدأ بالمكونات :
طاسه لبن كبيرة
دقيق
قطع من اللحم
وبصل وحبتين هيل
الطريقه:
راح تشتري طاسه لبن كبيرة وبعدين نقسمها الى جزئين في الخلاط ومع كل قسم ملعقتين دقيق كبيرة ونحطهم في القدر ونضل نحرك اذا ما حركتوا يخرب اللبن اهم شيئ انكم تحركوا وبعدين نكون مطلعين اللحم من فترة وناقعينه ونحطه بقدر الضغط ونغطيه بالماء<<< اخس ياللغه العربيه
ونحط معاه البصل وحبتين هيل وتخلوها تغلي لمده ساعه وبعد مايستوي نحط مويه اللحم نص طاسه اللبن تقريبا على اللبن ونخليه يغلي مع اللحم وسلامتكم
طبعا تكونو جهزتوا الرز بفترة غلي اللحم ويكون الطبق جهز للاكل
بالهنا والشفا يارب
وهذي صوره طبختي لا احد يعلق والله اول مرة اطبخ

[/COLOR

ساقي الـعُطـور · #4 30/07/2007, 01:38 PM

وعليكم السلام ورحمة الله وبركاته

ماشاء الله عليكم مطبخ وحركات والله فكرة رائعة

انا ما أعرف أطبخ بس أعرف أقطع طماطم وبصل انا أخدم في ذي

تقدرون تقولون مساعد طباخ

طلب بسيط ياليت أحد يطبخ كنافة ويعزمني ترون نفسي فيها

فكرة رائعة منكم والله يعطيكم العافية وموضوع يستحق التثبيت وبلكن تكون لي عودة

abo_nasser · #5 30/07/2007, 02:01 PM

يماااااااااااااااااااااااااااااه يماه <<<<<<<<<<<<واحد ينادي امه

كيفي

والله فكره روووووووووووووووعه لكن لاقوم بالطبخ احتاج الى

1_تصريح من الوالده لدخول المطبخ واطبخ <<<<<<<<<لاني اذا دخلت المطبخ لازم
اكسر صحن

2_يبيلي مساعد في الطبخ <<<<<<لان المره الوحيده الي سويت فيها شاهي للوالد
كان بيروح فيها

ما يستفاد من النقاط الماضيه<<<<<كلها نقطتين

اني ما اعرف اساوي شيء في المطبخ

بس اعرف اكل

فاتمنى من الاخوات هلاليه سنعه وتغريد ان يعذروني وساكتفي بالتصويت

وصدقوني راح احاول اعمل شيء لموضوعكم الرائع

هـــ الشماسيةـــلالي · #6 30/07/2007, 02:31 PM

بسم الله الرحمن الرحيم

وعليكم السلام ورحمة الله وبركاته
فكرة واعداد وسيناريو :
تغريد +هلاليه سنعه ..
يامال العافية على هالموضوع السنع الذي وبكل جدارة استحق التثبيت ,, وبارك الله فيك على التنسيق الرائع

أما الوجبة التي ابقوله لكم أتركها لليل بإذن الله مع الجوع والفراغ .. لكن الصور أتمنى تعفيني
لأني يادوب أعرف أكتب كيف تبيني أعرف أنزل الصور ؟!!!

طبعاً راح أجيب شي سهل وسريع من الممكن أن يطبخه وأدوته بسيطة ومتوفرة في كل مكان

إسم الطبخة ( كــــــــودو )
الأدوات :
1 / صدور دجاج مبرد 2 / زيت أو سمن 2 / بصل 3 / ملح 4 / بهارات 5 / فلفل بارد 6 /جبنة شيدر كرافت 7 / ساندويتش كبير أو صامولي عادي

الطريقة :

أولاً : تضع قليلاً من الزيت بالمقلات على النار حتى يسخن

ثانياً : تضع البصل المبشور على الزيت الساخن وتقلبه على النار حتى يحمر قليلاً

ثالثاً : تأتي بالدجاج وليكون مقطع كشرائح صغيرة وتضعه على النار وتضيف عليه الملح وليكن الملح بقدر الدجاج فإذا وضعت أربع قطع من صدور الدجاج تكتفي بملعقة ملح .. ثم نضيف عليه قليلاً من البهارات .

رابعاً : قبل أن يجهز ضع شرائح الفلفل البارد ثم إذا جهز وأردت أن تسكر النار أضف عليه قليلاً من جبنة الكرافت المبشورة (طبعاً الجبنة ليست ضرورية ولكن بحسب الرغبة ) ودعها على النار حتى تذوب وتختلط مع الدجاج .

خامساً : أملأ واحدة من الصامولي بالدجاج وأضف عليها قليلاً من المايونيز وقليلاً من الكاتشب ثم كلها تجد أنك بحاجة إلى ثانية وثالثة ورابعة أحياناً ههههههه000

وألف صحة وهناء وعافية وسارة وأخواتها 0000

abu_riman · #7 30/07/2007, 02:35 PM

" شخصياً ما أعرف أطبخ ، و إذا ( جعت ) دورت لي مطعم و غالباً ما يكون وجبات سريعة اختصاراً للوقت . هذا طبعاً إذا ما ( غثنا ) ( الغثا ) بشكشوكته "

هلاليه من زمان · #8 30/07/2007, 03:10 PM

اولا .. وعليكم السلام ورحمة الله وبركاته

هلاليه سنعه & تغريد

موضوع اكثر من رائع وأن شاء الله يلقى الموضوع تفاعل من الأعضاء

سواء شباب او بنات

الكل لازم يبدع ويشارك بالموضوع من دون استثناء

شكرا هلاليه سنعه & تغريد على الموضوع الحلو

الهلالي دائماً · #9 30/07/2007, 05:23 PM

يم يم يم

كلام كبير سنوعه وتغريدوه

عاد انا أقترح ان اللي يطبخ يرسل لي الطبخة وذوقها

بصراحة فكرة جميلة ومسابقة رائعة ...

وبما اني عزابي هالايام شارك ان شاء الله بوجبة المفضلة

ساندويش بجبنة كيري

ومبروك لي الفوز مقدماً..

الشيف / ماجد مقبل

هلاليه و افتخر · #10 02/08/2007, 07:52 AM

ههههههههههههههههههههههههههههههه

متاني اقوم بس عشان اسوي شي ..

بس ابشري يا بعدي باجيبلك حلاي ,, اتحدى احد يسوي مثله او ازين منه بعد

بس يوم الاحد او الاثنين ان شا الله باجيبه لك

,,

لأن كل يوم احد تجتمع اسرتنا الكريمه كلها ,, يعني بس ابوي و امي و اخواني و حريمهم و عيالهم

,,

[ هلاليه سنعه ] و [ تغريد ]

تسلمون عالموضوع اللي مدري وش يبي

,,

<< بـرااا ,, و يـالله بـرب

هلاليه@ميلانيه · #11 02/08/2007, 04:07 PM

احم احم << تجرب الميكروفون

ابشركم جت الهلاليه الميلانيه

وهذي الي قدرت أسويهـ بدون مساعدة أحد وإن شاء اللهـ يكون قد المقام :p

:: كيكة الآوريو ::

المقاديـــر :

كيك بنكهة الكاكاو باوند كيك أو سيرالي كيك

3 ظروف دريم ويب

4 علب قشطه

كاكاو سايل Chocolate Hershy's Syrup

وبسكوت أوريو

صينيه متحركه الجوانب

الطريقـــه :

الطبقه الاولى

نقطع الكيك لشرائح ونصفه بالصينيه

الطبقه الثانيه

نخلط علبتين قشطه مع ظرفين دريم ويب

ونكسر الاوريو لارباع أو أصغر مثل اللي في الصورهـ

نصب الخليط و نساويه فوق القاعده الاولى

وندخله الثلاجه على مانسوي الطبقه الثالثهـ

الطبقه الثالثه:

علبتين قشطه وظرف دريم ويب

نصب الخلطه الثالثه وطبعاً لازم تكون

الطبقه الثانيه متماسكه على الاقل من البرودهـ

نساويه بالشكل هذا وندخله الثلاجهـ

بعد مايتماسك

نطلعه ونحطه في صحن التقديم

ونفك الفريم الخاص بالصينيه التحركه الجوانب

بعد مانحطه نفك حبات الاوريو ونصفها حول الطبق

نأخذ سيرب الكاكاو (الكاكاو السايل)Chocolate Hershy's Syrup

ونرسم الشكل هذا نصب الهيرشي بشكل حلزوني ثم نقطعها بالسكين

أو ممكن عمل تموجات بالشوكه أو الشكل المرغوب فيه

والشكل النهائي :

إن شاء اللهـ تنافس كيكتي بقووهـ مع ان المنافسهـ بتكون قويهـ نوعاً ما

برايفت :

ترا الآسم المكتوب على الصور ((7nnan)) هو اسمي الحقيقي

وقد سبق أن وضعت هذهـ الطبخهـ في منتدى آخر بأسمي لذلكـ جرا التنبيه ;)

تحياتيــ

الهلالي دائماً · #12 08/08/2007, 05:16 PM

هلا وغلا ومرحبا ...

جاكم ماجد وخروا عن طريقه

حيا كم الله في برنامج طبق اليوم ... :p

يقدم لكم الشيف ماجد مقبل اليوم حلا أبو مقبل ..

راجياً من الله ان ينال إعجابكم وتقديركم وترشيحكم ...

صورة مكونات الحلا ...

وهي سنكرس ,توكس , جالكسي , بونتي , كت كات , بفك , شيبس , يولكير,شيتوس

طريقة التحضير : ;) ;)

تجمع المكونات على طاولة واحدة وتقسمها الى قسمين :

الاول الحالي والثاني الموالح ..

تحضر صحنين الأول تجعله للحالي والثاني تجعله للموالح ..

يتم فتح المكونات بهدوء وطمأنينة حتى لا تتعفظ ..

ويرص الحلا في الصينية بطريقة جميلة ومتوازية ;)

ومن الممكن أن يقطع حتت صغيرة بأشكال مختلفة ..

اذا كان الجو حار ضع الحلا في الفيرزر لكي لايسيح

صورة صحن الحلا

ثم تفتح الموالح وتوضع في صحن مقسم كل قسم في جهه مستقلة ..

صورة صحن الموالح

بعد ذلك يكون الطبقان جاهزان للأكل وبالهناء والشفاء إن شاء الله ...

لقطة تجمع الاثنين الحالي والمليح ..

يجب المحافظة على نظافة المكان وتجميع المخلفات ووضعها في المكان المخصص ..

بما أني عزوبي والاهل مسافرين وديت ها الحلا لبيت أخوي الذي صدم وأبنائه الخمسه حفظهم الله بهذا العمل الجبار وقضوا على الحلا عن بكرة ابيه هههههــ

دمتم سالمين ...;)

الهلالي الثقفي · #13 09/08/2007, 01:22 AM

هــلا و الغــلا

الهنوووف

شوفي و أنا أخوس :p >>>>>>>> أنتم تقولوا كذه وش اسوي لكم

عندنا مثل في الحجاز يقول :

أذا شفتها كباااااااار أعرف أنها صغااااااااار :p :p :p

يعني بالمثل العربي الفصيح :

أسمع هنهنةَ و لا أرى حلا

مدام أنك شريتي المقادير فهذا شي طيب

أخاف لا تطلع مثل مقادير حلا أبو مقبل

هههههههههههههههههههههه

و ألا عندي حل

أرسلي لي عالخاص مقاديرك و أشوف تعجبني و ألا لأ :p >>>>>> وش دخلك

عشان اقول لك وش الأكلة اللي بتنفع تسوينها

بس أهم شئ لا يكون فيها مطرقة :p :p

أنا ما راح أفصح عن طبختي الأمورة ألا قبل أنتهاء المسابقة بيوم

عشان محد يمديه يسوي مثلها :p :p

ملاحظة :

أحس الموضوع هذا أشغلني عن بقية المنتدى

>>>>>> همه بطنه و بس :p

الماسه الزرقاء · #14 10/08/2007, 03:44 AM

ياعيني على طبق الموالح يا ماجد

,, ههههههههه ,, شكلي بصوت لك

والله إنك تحففففففففة بس عجبتني ,

هلالية ميلانية ما شاء الله روووووعة طبختك

,, لا بالشكل ولا بالمحتوى

إذا احد نجح بالشبكة ولا تخرج ارسلنا لك تسوينها

,,

ريموو ناوليني عصير الليمون الله لا يهينك

,,

أما الهنوف قعدت ساعة ادور طبختك

, ما عرفت وشي لما شفتها عن قرب

بس ولو يا بنت تنفعين طباخة تلقين مطبخ المجلس العام على يمينك ادخليه بس انتبهي لا تحطين شي ما ينوكل في التجميل ونبلش مع هالشباب إلي ما يعرفون وياكلونها

,

وين طبخة هلالي الثقفي والمشاغب يالله عجلوا علينا نبي نشوفها ,,

$ الاسطوره $ · #15 13/08/2007, 06:38 PM

السلاااااااااااام عليكم

كيف حال الجميـــــــع ان شاء الله بخير

المهم نطبح بالمووضع دغري

انا بصراحه سمعت عن المسابقه وحبيت اشارك بشوف انا وحلاياي انفع شيف والا لا

على العموم

انا اليوم مسوي لكم كبسه ماحصلتش ابد الابدات والااحسن مطعم يسويها <<<<<< ياتسذبه قبل اسبوعين طابخ

المهم هذي صورتين للكبسه اللي سويتها وماكنت ادري بالمسابقه والا كان تفننت وابدعت واظهرت مهاراتي اللغويه والمعنويه اقول كيف الحال

على فكرة هذي ثالث مره اصلح كبسه
واول مره اصلحها مع الخظااااار

على العموم

اترككم مع الصور

ولاااااااااااااااااا تسالوني عن المقادير والله لوهي حلاء
يعني مايبيلها عرف
كلها حبه ونص دجاج <<<<<<< داجين ذاك اليوم ماقدرنا على اللحم

ومدري كم حفنة رز يعني على البركة ههههههههههه
وشوية كوسه وشوية بذنجان
على كم ليمونه
ولاننسى البهارات >>>>>> عجزان يكتبها

المهم هذي الصور

بس لاتنسون تذكرون الله

ترى على فكره

واللي اهم من كذا كله الصوره هذي

يعني دخلت المطبخ نضيف وطلعت والمطبخ احلاء من اول بكثير
حتى الشباب استغربوا يقولون انت وين تطبخ ما فيه اثر للطبخ

على العموم ما اوصيكم

الله الله بالتصوووويت

بلييييييييز هلب مي بالتصووويت

اي نيييييييييييد يوووووووو صوووتكم

* ملاحظه :
انا كتبت على الصورة في خاطري شي وهذا النك لي بس للاسف ضيعت الباسبورد وحتى الايميل اللي مسجل فيه مضيعه واظطريت اخذ النك الثاني حقي برضوه