أسأل الله العظيم رب العرش العظيم أن يشفي والداتك

انت كم عمرك
....<<<<<<<<< ملقوفه

السلام عليكم،،

أشكر الجميع على دعواتهم الصادقه، وأسأل الله العلي القدير أن يتقبل مني ومنكم..


____________________________


ماجد مقبل

هلا وغلا باخو قلبي

إقتباس والله من جد الزمن هذا الدراهم تتطاير فيه تتطاير الرؤوس في معركة طاحنة

لا حول ولا قوة الا بالله عليك وصف بعد

إقتباس وفي ها الاوقات اقول ما لك الا الزعيم وأعضاءه تطقطق على روسهم ووتطلع الموضيع والافكار مع الطفرة

على كذا ياليتك دايم تصير مطفر>>> مهوب نذل

عشان تتفرغ للمنتدى وتمارس ابداعك وتتحفنا بكتاباتك المفيده ، أقولها بعيداً عن المجاملات;)

إقتباس القى في الحساب مائة ريال ونيف عاد سحبت الميه على طووول قبل لايهون الصراف

أما سالفتك شي تصدق ودي ينبشر على كفر أغدي يطلع لي مليون


بس تعال الحين صايم وعندك دونك وآخرتها مفطر بمية ريال حراام

استغفر ربك ورجعها للبنك مع الفوائد حقتها أتوقع ان الميه لازم ترجعها لهم 10 آلاف

إقتباس الا ودي اسألك وين احصل شراب النوني ههههههههههههههههههه

ابومقبل !! وش أنت ناوي ؟؟

أبعلمك وين يباع مقابل انك تقولي لي وش النيه + تعطيني الـ10 آلاف حقت البريطاني

فكر ودق علي ايميل

أو تدري ، أبعزمك على النوني ما دامك مطفر


تسلم يابعدي وتشكرااات بالحيل لتواصلك

____________________________


تيماوي


هلا ومسهلا،،

وين راح "حبي" ، يوم شفت اسمك بشكله الجديد تذكرت موس الشنب

إقتباس @ الا وأنت صادق الالف ريال ما صارت تسوي شئ ...!!!!!!!!!!

اي والله صدقت الالف ما غدت شي، لكن الله يعوضنا خير..


تسلم ياغالي على المشاركه


____________________________


O V E R


هلا ومسهلا،،

إقتباس هالوقـت صـار كل شي غـالي لان ما عنـدنا مراقب كل من بغى يرفع رفـع .. وحلنـي احـد يقول له ليش !!

بالضبط ياغالي ، غياب الرقابه وتجاهل غالبية كبار المسؤولين للمسخره اللي قاعده تصير هو اللي ذبحنا

ومن يدري يمكن كبار المسؤولين هم التجار وبالتالي هم المستفيدين ;) منشان هيك غض البصر واجب عندهم

إقتباس لكن ما نقـول الا .. الله لا يوفق من يستغل الناس وحاجتهم ويرفع الاسعار

والله لا يوفق كل مسؤول له صلاحيه وقادر على ضبط الامور و تقنين ما يحدث وبنفس الوقت جالس يتفرج وينعم هو وأبنائه بأحلى عيشه

تسلم ياغالي على المشاركه

____________________________


راااجع ان الله شاء وأراد

alhawey

ياحبي لك

اولا وقبل كل شي الله يشفي والدتك ويقومها بالسلامه


بعدين انت وجبهتك الي كانها قوطي فوول

وش جاب اصاله لخالد عبد الرحمن ياعليييك مزاااااااج

هع هع

بعدين وانت صاطز(صادق)

والله ياان مواد الغذائيه مرتفعه بقوووه وحتى الخضروات والفواكه

ماانقول الا الله يرحمنا برحمته بس

ويعز ابو متعب ويطول بعمره

وتقبل تحياتي ياقلبووو

الله يشفي والدتك ويرفع عنها يارب

اما الهلي 88 شي ثاني

ما أخفيك أخوي اني مالي كم شهر متوظف وراتبي ولله الحمد بين الخمسه والسته الآف
وهو الى السته اقرب<<<<< مسوي ما يبي يعلم

المهم قبل لا اتوظف كنت اظن اني ابي اجي وآخر الشهر اوزع شرهات :p

ياخوي انا ماني عند اهلي بديرة ماء الآن (عند اللي يحبون الهلي ولاااه)
يالله يوصلني الراتب آخر الشهر

عموما الله يعين ,فيه رد لاحد الاعضاء عن التضخم فعلا المسأله خطيره في كل السلع ـــ مثال:

عام الفين واثنين اشترى الوالد جيب لاند كروزر عادي 122 الف,, العام شرا الفين وسته 148الف
يعني 26 عشرين الف اربع سنوات

بكرا نصير زي مصر بيجو والحق اهلك

هــــــلا ،،

من ناحية ان الاسعـــار ناار فهي نااار.. ومو المواد الغذائيه وبس في كل شيء ،،
ولاتنسى شركة الاتصالات ( الفواتيــــر ) لاعبة فينا لعب ..


الحين صاار الواحد يدخل السووق والالف ماتكفيه الله يعين بس ،،
وبما اننا مقبلين على الاجازه الصيفيه ،، وتكثر فيها الزواجااات ،، فبشـــّر أصحااب محلات الملابس النسائية ،، عااد مايحتاج لهم توصيه السعر بيكون دبل مضااعف على اشياء ماتسوى ( خلاقيــــن )،،
والحريم ضعيفااات يشروون وبس سواء يستاهل هالشيء ولا مايستااهل يقوول القائل ( اللي يبي عشرة تجي له ثلاثين يجيب سلعة ناقصاات العقووولي )
<<< ماكنها منهم
تلقى الوحده اذا صار عندها مناسبة تدهـــّر من سووق لسوووق وفي الاخير مايدرى عنها وشي لابسه ..ياسفاب تعبها ..
بس كلن يبي الزين

إقتباس مصروف شهري لا يزيد عن 300 ريال ولا يقل عن 300 ريال ، يعني أبعطيك 300

.. أجل اخواني اذا شاافوا ابوي يعطي اخواتي الصغـــار فلووس
يقوولون الله يالدنيا يا يبه تذكر يوم نقوول لك يبه نبي خمسة وتقولنا وشوووو تبوون خنفسه ..

بس الحين طقت خااقاان انواع الدلع يجيهم الشيء باردة مبردة ..

الحمد لله على النعمة الله لايحرمنا منهااا

الترجمــــة / لاني اتوقع ان فيه بعض العبارات غير مفهومة
لدى البعض..

تدهــــّر / تؤدي اعمالها بنشــــاط .

طقة خاقان / اقصد فيها جيل ها الوقت.

خنفسة / حشــــرة سوداء ..

باااايووو ..

اول شي اسأل الله العظيم رب العرش الكريم أن يشفي لك الوالده ويمتعها بالصحة والعافية ..



اي والله اني اوفقك الراي ياخوي .. الحين الواحد مايصدق تنزل المكأفاه الا وهي طااااااااااااارت ..


بس وش نسوي ؟ ماباليد حيله وانا اخوووووووووك

100ريال تعبي فل وتجيب ببسي مكس خلاص وتشحن سوا أنتهنينا بس وينها خلني ألقاها ههههههههههههه


وأنت صادق بكره الرز 600 ريال الكيلو

هلا بكم من جديد ،،


أشكر الجميع على دعواتهم الصادقه، وأسأل الله العلي القدير أن يتقبل مني ومنكم..


_________________________________

Mr.Goal

هلا وغلا ،،

إقتباس مواد البناء ارتفعت اسعارها 200%

أما مواد البناء هذي بلحاله سالفه، منوّل كنا نشوف متوسطي الدخل اللي يبنون بيوت اذ خلص العظم قضت فلوسه ووقف سنين ، الحين يشتري المسكين اسمنت وحديد وبعدها يوقف سنه يجمع حاله

إقتباس قالي عاد هو الاسمنت لو يجي بـ100 خله ان شاء الله ماحنا محتاجين له بس اهم شئ السكر

سلم لي عليه انا اشهد انه صادق

كم عدد المواطنين اللي يفكرون يبنون بيوت وعماير!!

صارت الخطه سدد ايجار وكل واشرب والوعد راتب الشهر الجاي!!

إقتباس وعلى طاري الهايلوكس بكم كانت وكيف كانت والان بكم قيمتها وهي مثل القرطاس

تصدق بالله اننا طاقينه بـ 30 ألف!! ، وبعد ما استخدمناه حوالي عشر سنوات بعناه بـ 29 ألف!!


تسلم ياغالي على المشاركه

_________________________________


الافضل

هلا وغلا بجارنا،،

إقتباس بالنسبه للهايلوكس يعطيك خيره ويكفيك شره .. ولا في مخرج 14 عند بيتنا <<<<<<<<< راح يدور هايلوكس 88

تراه كفرات خط ومركب توانك ورى وفيه استكر على القزازه مكتوب 15 اذا لقيته علمن

إقتباس هايلوكس واصاله وخالد عبدالرحمن اللي أخبره بشير شنان فهد بن سعيد أو عزازي

كنت ليبرالي متفتح ذاك الوقت

إقتباس نصيحة أذا صرت بشتري واجد رح لمراكز كبيره وخل عنك البقالات

صدقت والله ، لكن الكسل شين البقاله بجنب البيت

بس مادام الدعوى فيه 2 ميه ومدري كم !! عز الله اني منب متقضي الا من العثيم أو السدحان والشله حقتهم

إقتباس الا نشوفك اليوم في شارع ثلاثين الربوه اليوم الثلاثاء

ايييييه يالدنيا ، الى هالحين ثلاثين الربوة يدهر؟؟

خلاص أبمرك عقب الاخير بس دبر لي شريط لابن سعيد


تسلم ياغالي على المشاركه

_________________________________



بنت فهد

هلا ومسهلا ،،

إقتباس اماعن الالف لا ماراح يغيرونها ابوي يشتغل بالمؤسسه يقول كانو بيحطون كذا بس غيرو رايهم

زين أشوى

أقول قولي لابوتس كان يقدر يطبع لنا أمهات خمس ويرسلهن على الدي اتش ال ترى يسوي خير


العفو وتشكراات على المشاركه

_________________________________


المشاغب

هلا وغلا ومرحباً 3 الآلف ،،

حيا الله جارنا

إقتباس أنا اشهد أنك ولد نعمة أجل 300 ريال شهرياً ذيك الفترة؟ ما شاء الله اللهم لا حسد.. الله يعطيكم من خيره

ايه الصراحه اني ولد نعمه ولا أفطر الا طحينيه وزبادي

آآآبو الطموح ياشيخ!! ولد نعمه معه هايلكس كفرات خط>>> ولد عنيزه ذا مهوب ولد نعمه

إقتباس لا ويييين مثل الـ 10؟ تبالغ ممكن مثل الـ 20 ريال صح..

معليش أنت ولد فقر ، وانا قستها على انفسنا حنا ياعيال النعمه >>> الله يقطع ابليسك يالمشاغب!! خششتن جو اني كاااش


الله يخليك يابعدي وتسلم على المشاركه

_________________________________


الجاحظ

هلا وغلا ،،

عوافي ياغالي على اضافتك الرائعه

ويعلم الله اني كنت ابدرج كلمة التضخم ضمن الموضوع ، لكن عدم قناعتي ( وربما عدم استيعابي) بان مايحدث في بلدنا يندرج تحت مفهوم هالكلمه هو اللي خلاني أتجاهلها

والحقيقه اني تأكدت من تصوري بعد ما قريت بعضاً من أسباب التضخم التي أوردتها

إقتباس هنا في السعودية، هل نستطيع أن نقول أن ارتفاع أسعار البترول في السنين الاخيرة أدرى الى زيادة السيولة؟

مجالي هندسي وخبرتي بسيطه جدا في المجال الاقتصادي ولكن أفهم أن اجمالي دخل الفرد عندنا لم يتغير بشكل كبير خلال العشر سنوات ماضيه رغم ازياد اسعار النفط بشكل ملحوظ ( وهو المؤشر الفعلي لقوة اقتصادنا)..

عن أي سيوله يتحدثون!! لدى الدوله أم لدى كبار التجار والمستثمرين أم لدى المواطن

لا أنكر وجود سيولة لدى المواطن ولكن أستغرب مصطلح " زيادة السيوله " اللي أزعجونا فيه هاليومين!!

المقياس دائماً هو الفرد

ببساطه هل ازدياد مصروفات المواطن راجع لزيادة السيوله لديه؟! لا أعتقد ذلك


اذا أردت أن تتعرف أكثر على مفهوم التضخم فما عليك سوى الالتفات لما يحدث في دولة الامارات الشقيقه وبالتحديد امارة دبي

وهنا أتحدث عن التضخم بشكل عام

أما دالة التضخم بسوق معينه مثل سوق الاسهم في اعتقادي انها ليست مقياس لزيادة سيولة الفرد بدليل أن نسبة كبيره من المواطنين دخلت السوق عن طريق القروض والتسهيلات من البنوك!!


عموماً لا أحبذ الخوض في تفاصيل أكثر، فالكثير منا يعلم مسببات ما يحدث


شكرا لك ياغالي على اضافتك ومشاركتك

_________________________________


راااجع باذن الرحمن

هلا بكم نوبتن ثانيه ،،


أشكر الجميع على دعواتهم الصادقه، وأسأل الله العلي القدير أن يتقبل مني ومنكم..

__________________________


عز الهلال


هلا والله وغلا بفتى المرسلات

إقتباس يكفي انـه يوم لعب الكورة بالنسبه لــي

أقول ميخالف ألعب معكم تراي فنان زي ألفان

إقتباس كـل شوي يزودون وحنـا الضحـيـه , وغيـر كذا محد يردهم ولا شي .. !!

وهو اللي رافع ضغطي انه ما حولك أحد يردهم ويحاسبهم و يحط حد لمقدار الزياده

إقتباس لاتذكـرنـي .. باقي حول 10 أيـام على ثلاثميتي

قل آمين ،، الله يرزقك 30 ألف كل شهر وتصير مدير فرع بنك الراجحي بالمرسلات


تسلم يابعدي وتشكراات لمشاركتك


__________________________

رهيب الحزين


هلا ومسهلا ،،

إقتباس عاد وراك أنت كنت في ثلاثة متوسط وانتقلت لواحد ثانوي

ما أدري !! ابوي قالي سو تسذا

ليش خطأ

والله انك منسم على هالسؤال

تشكراات لمشاركتك

__________________________


دلع-20

هلا ومسهلا ،،

إقتباس (وترا كويس الزيت المقري فيه تمسح به جسمها طبعا أكيد عندك خبر بس كتذكير)

ما أظنه يغيب عن الوالده ، لكن ابقول لها لعل الله ينفع فيه

الله يحفظك ووالديك من كل شر على حرصك وتذكيرك

إقتباس وإذا نبي نتكلم عن الغلاء أنا عن نفسي ماأدري وش الاشياء الي ارتفعت الا بالجامعه اشوف جالكسي الي بريال صار بريالين ونص ومايرجعون نص خذي منديل طيب ماأبي منديل أبي النص..!

الكافتيريا اللي بالجامعه تستغل ان ما لها بديل عشان كذا ترفع الاسعار على كيفها ، والشرهه على اللي عطاهم تصريح ولا راقب شغلهم

بعدين لو السالفه سالفة جلاكسي كان ما عندنا مشكله

لكن البلا ان كلّـش ارتفع سعره وبالذات المواد الغذائية الادويه ومواد البناء..

والمشكله في المواد الغذائيه انهم يرفعون الاسعار بطريقه مدروسه بحيث لا يشعر المواطن بارتفاع قيمة السلعه ، مثل انهم كلا 3 شهور يزيدون ريال على كل صنف!!


تشكراات على مشاركتك ولك تحياتي


__________________________


آآي وِل كوم باك أقين، إن الله شاء وأراد

ملاحقة دجاج


عفون وتشكرااتي لك

_____________________________


الكلاسيكي

هلا وغلا باخو قبلي ،،

إقتباس وقبل ما ابدأ بالرد بسألك ؟ كيف الارق وياك بعد الجلسه المطوله معي ؟؟؟ ان شاء الله جابت نتيجه ؟؟

لا أبشرك الامور زينه الحمد لله وكله بفضل الله ثم جلستك ، بس لاهنت لا عمرك تقول لي استرخي ومد بوزك

عادل والله لو تشوف شنبي اتوقع تزعل

إقتباس الحين انا اسبوعيا لا يقل مصروفي عن 200 ريال الى 300 ..

انتبه لنفسك، 300 اسبوعياً كثيره الا اذا كان جزء منها تصرفه على أهلك

إقتباس المشلكه ان مالنا غناة عنهم .. تقريباً يومياً موطوطين عليهم ..

تصدق انك نبهتني فعلاً كل يوم لازم نمر السوبر ماركت!! ، ياخي حنا شعب مستهلك بدرجه فضيعه ولقينا ناس يستغلوننا

إقتباس اننا نفتتح سوبر ماركت ونخلي الاسعار دبل الدبل .. وش رايك .. لاتخاف مافيه رقيب علينا ؟؟

تقوله صادق ، ياشيخ والله لا أخلي الببسي بأربعطعش بس أنت اجزم

وعلى فكرة ترى أبصير انا المدير أنت مستشار هنا ومشغول>>> آآبو الطموح



تسلم يابعدي وشكرا لمشاركتك

_____________________________


فرصه ضايعه

هلا ومسهلا ومرحبتين بالقشرا

تراي قسم بالله ما كد نقلت موضوع

إقتباس جدتي يوم سموها تقول مالقيتوا غير ذا الأسم غدي جعلها تغدي

وجدتس صادقه أخبر غيداء وغاده أما غدي صراحه ما أدري وش يبي هالاسم!!

إقتباس وش عندك اليوم مغير تطلعين عن الموضوع

لا لا ياشيخه يعني بس اليوم بتله تطلعين ولا أدري وين تروحين راحت روح العدو

إقتباس والغداء أن كان مطفر راح لبيتزا هت غداء حتى الإشباع بـ 19 ريال

الحين المطفر يروح يتغدى ببيتزا هت!! أجل الكاش يروح يتغدى بباريس ويجي

إقتباس إذا تبي تتجر افتح مطعم ... وشف الناس تدهر عليك ... كن ماعندهم بيوت ياكلون فيها

اي والله صدقتي بلا ما عاد هنا حريم قرمات يطبخن وينفخن ما غير يجلسن على النت ويطلعن عن الموضوع>>> مهوب يعانيتس أبد

إقتباس هي نفسها حقت طلعت الشبوك

ايه ما شاء الله عليك ما نسيتي

إقتباس حنا مانتصل لا نلصق فيهم يودونا معهم ... عشان نلف على السوبر ماركت كله ... ونشوف أشياء نخاف نكون ناسين ماكتبناها لهم

معصي تنزل للسوبرماركت

منوّل على نياتي أخليهم ينزلون بس يوم شفت نظامهم ياخذون من كل شي كرتون قلت اقضبوا الارض

إقتباس تصدق عاد أننا ماقد دخلنا سوبر ماركت ودفعنا أقل من الميه

ايه أصدق وهذا الحاصل عشان كذا نقول الميه صارت زي العشره!!

إقتباس دخلت بودي شوب بشتري قلوس كان بـ 39 والحين سعرة 49

هذا عاد اللي ما حسبت حسابه القلوس صار بـ 49 !! منوّل آخذه بـ 10 أريل ، بس الظاهر اني أبهون و ابدا ما أشتري قلوسات

فرصه وشو القلوس ذا ؟؟ ما اتفقنا على كذا

إقتباس قالوا عشان المكرمة الملكية حقت الرواتب الـ 15 %

اعن ابو دارهم ذلونا بهالمكرمه قسم بالله اننا تضررنا منها أكثر مما استفدنا



الله يعافيك وتشكراات على مشاركتك


عندي سؤال الى متى وحنا يا سفابتس؟

_____________________________



][ عيون الزعيم ][


هلا ومسهلا ،،

إقتباس انت كم عمرك ....<<<<<<<<< ملقوفه

يوم أمي حاملتن بي وولد جيراننا حمود عمره سنتين

وش تبين بعمري

بس ولا يهمك عمري 17 سنه واذا حبيتي تزيدين عليها عشر سنوات ترى ما عندك مشكله

تشكراات لمشاركتك

_____________________________



راااجع ان شاء الرحمن،،