بأدخل بالموضوع مباشرة كما هي سمة الخُطَب في العصر الجاهلي ( واحد مختبر اليوم عرب ) .. 
<< تذكروا ان محدثكم عنده اختبارات نهائية ، فتعودوا على الشطحات من اللحين
___________________
___________________
( بصراحة مادري كيف أصف شعوري ..!! )
إذا كان عندي اختبار السبت الأول ، مادة أحياء مكونه من 240 صفحة دون تلخيص إلا التعاريف ( ما قصر الأستاذ عطانا عشر تعاريف وقال احفظوها واتركوا باقي التعاريف ) ..
واستعد لها أسبوع قبل ومذاكرة وكل ما خلصت فصل رجعت على كل الفصول اللي خلصتها أراجعها وكرف لعل وعسى اجيب درجة تفتح النفس .. 
خلاص ؟ واجي صباح السبت للمدرسة واسأل اخوياي بشروا كيف المذاكرة ؟!
ويرد علي الأول " والله ما ذاكرت إلا التعاريف اللي عطانا الإستاذ " 
والثاني " والله مريت على المنهج قبل ما اجي "
وادفر واحد بيننا " سحبت على اخر فصلين " 
ويضحكون علي لأني مذاكر الكتاب كامل ويقولون والله إنك فاضي ...!!!! 
( هنا ما اقدر أصف شعوري ..!! )
مادري ذولا بايعينها ولا وش سالفتهم ، ولا ونسبهم كلهم فوق التسعين ..!!!
المهم وندخل قاعة الإختبار وتجيك الأسئلة :-
1- الإنسان يتكاثر بالتلقيح الخلطي ، صح ولا خطأ ..!!
2- النسيج الطلائي الحرشفي ، هو احد انواع الأنسجة الطلائية ، صح ولا خطأ ..!!
3- العصارة المعدية تفرزها ( المعدة - النخاع الشوكي - الدماغ ) ، اختر الإجابة ...!!!
وخذلك من الأسئلة السخيفة ..!! وطبعاً لا ننسى سؤال [عرف] جايبه من التعاريف اللي معطينا إياها علشان تصير يعني ترى الأستاذ شديد ..!!
( هنا بصراحة ما اقدر اشرح شعوري ..!! )
أجل ليش أذاكر وحالتي صعبة وكل شوي مراجع الكتاب تقل موسوس ..؟!
اللحين عرفت وشلون وصلت مواصيل تراخي أخوياي اللي فوق لهالحد ..!!
هذا وحالنا احسن من غيرنا ..!! العالم على ملخصات ثلاث واربع اوراق وزعلانين يبون الأسئلة ..!! ( علشان ما نظلم احد ، هناك أساتذة متوحشون عديمي رحمة يعطون ملخصات بعشرين وثلاثين ورقة )
<< أنا بفهم بس ، ليش مخترعين الكتاب اذا كنا بنرميه من أول السنة بالبيت وندخل بدفاتر وملخصات ..!! 
( لو يلاحظ العاقل في علاقة طردية بين مدى سحب الأساتذة على الكتاب ومدى تكاسل الطلاب )
بعد الكلام اللي فوق هذا كله انتهى بي الموضوع إني أستقين بكل ما أوتيت من قوة إن مالنا حل إلا أسئلة الوزارة ..!! 
ويوم سألت أحد الطلاب عن رأيه بهالفكرة ما كان منه إلا أن قال وما ظني بمخه يجيب بهالسرعة ولكن اجاب عقله ألا واعي " ويييييين يبو ؟ تبينا نذاكر من بداية السنة لعيونهم ؟! " ( وهو هذا المطلوب )
لو كانت أسئلة وزارة ، بيهتم الطلاب لدراستهم اكثر ويجدون بالمذاكرة ..
لو كانت أسئلة وزارة ، نظام محذفات مدري ملخصات ينتهي ، ويرجعون الأستاذة للكتاب ..
لو كانت أسئلة وزارة ، بيتابعون الطلاب دروسهم أول بأول ..
لو كانت أسئلة ، بتظهر العينات اللي فعلاً مؤهلة لقيادة المجتمع بشكل بازر .. ( نتيجة تحتاج انتظار )
وهلم جراً بنتايج ونتايج إجابية لا حصر لها ، ياخي بيطلع لك جيل فاهم ..
<< موب جيل تسأله وش موضوع الفصل الفلاني والوحدة الفلانية ، يقولك مادري ..!!
بيطلع لك مدرسين فاهمين ، موب هاللي نشوف اللحين ضرب الكسور يخطي فيه
أستاذنا " المستجد " فيروح يحذف الدروس المتعلقة بهالشيء ..!!
والمدرس هذا يدرس ثلاث فصول × عدد طلاب كل فصل = 80 طالب ضعيف بالرياضيات والسبب مدرس واحد ..!!
بنشوف المدرسين يجتهدون بالشرح ، والواجبات وحتى اختبارات اعمال السنة ، علشان ما يجيبون الطلاب العيد بالنهائي مع أسئلة الوزارة وياكلها هو مسائلات وليش وما ليش ممكن تصل لخصم الراتب زي ما سمعت ..!!
بهالحالة أصلاً المدرس الضعيف ( اللي مشى بالواسطة - بالدف - الخ وياكثر الخ !! ) ما يمشي من البداية ويدرس ولا ويستلم راتبه زيه زي أفضل أستاذ بالسعودية ..!!
تشوف الطلاب مشتكينه ومطيرين ابو ابوه ..!!
وينتهي الموضوع بالمدرس إن قطاع التعليم يرفضه كله ، وهذا يعطي وظيفة لمعلمين أفضل منه بألف مرة لكن ما حصلوا وظيفة ..!!
<< والله يا إني منيب هين ، أجل جبت حل جزئي لمشكلة العطالة على الدرب
يعني مشااااااااااااااكل كثييييييييييييرة تنحل بمجرد " أسئلة وزارة " ..!!
عاد اللي يخلي الواحد يستغرب من جد ..
أسئلة القدرات والتحصيلي موحدة ومن والوزارة ..!!
طيب زي ما قالوا المدرس اللي درس الطالب لازم يحط أسئلة النهائي ، ليش بالتحصيلي ما يجمعون الأساتذة اللي درسوا الطالب يشتركون بنموذج أسئلة التحصيلي حقه ..؟!
<< هنا تساؤل سخرية .. 
ولا بعد جيبوا جد الطالب يكتب له أسئلة القدرات مهوب هو اللي معطيه الجينات ؟!
<< برى ؟ 
أصلاً من التفاهة تخلي شيء له شروط ثابتة مثل " القبول بالجامعات " يستند على معيار غير ثابت ومتفاوت مثل تفاوت صعوبة الأسئلة بين المدارس ..!! وهذا مدفوف من أهلية ( والله رفس موب بس دف ) وله ملخصات والثاني جآي من حكومية ..!!
<< لو مافيه قدرات وتحصيلي تحسب مع نسبة الدراسة كان انتحرت
نقاط اختم بها :- 1- عارف إن موضوع أسئلة الوزارة موب طقها واسحب عليها ( سوادني ) ، وان الموضوع له عوائق كثيرة ، لكن إذا وضعنا النتائج صوب الأعين يهون كلش .
2- طبعاً يتبع أسئلة الوزارة نظام مطول بتفاصيل كثيرة تضمن حق الطالب ما ينكب بإستاذ من جنبها وياكلها بالنهائي وما إلى ذلك ، ويكون هناك نظام متكامل شامل عديد النواحي ، لكن أنا ناقشت بشكل مبدئي .
3- عمركم قريتوا موضوع مخلط فصحة وعامي وشطحات مصري وحكم سوادنية ؟ بعد إطلاعكم على هالموضوع ستكون الإجابة نعم .
... فما رأيك اخي القارئ بالموضوع ، ومسألة أسئلة الوزارة ، و وش توقعاتك للنتايج المترتبة عليها .. 
___________________
___________________
بالنهاية اعذرونا على الأخطاء الإملائية واللغوية إن وجدت وركاكة أسلوب الموضوع وحوسه عناصره ، هي سواليف فرغتها تفريغ بالكيبورد بعد ما رجعت الإختبار بدون مراجعة أو تدقيق أو ترتيب ، وحتى ما كان عندي نية اكتب الموضوع لكن قلت يولد عبر عن ما بداخلك وبقلعه ان شاء الله يحذفونه المشركين قصدي المشرفين ( يمكنك عزيزي القارئ توقع اختبار الغد لكاتب الموضوع ) لكن إن شاء الله إنكم تسلكون لنا وتتركون عنكم الإستقعاد ..
مع اللقاء .. 
مالنا حل إلا أسئلة الوزارة :( 
مستحيل تحذف شي بس حددت لنا خرائط 3 بس اسلتها سهله 
الوضع العادي
