بسم الله الرحمن الرحيم

السلام عليكم ورحمة الله وبركاته

كل عام وانتم بخير


هالموضوع مدري وش يبي كتبته كذا فضاوة نمت سبعة الصبح وصحوني عشرة وحسيت نفسي بسه مدري قطه أجل نايم أربع ساعات

طار النوم بس اي واحد بحس من رده انه شبعان نوم لايلوم إلا نفسه

بنت أخوي والإشارة

في الحياة المواقف الطريقة كثير ومنها ماهو مضحك وماهو محرج . البارح وأنا واقف عند الإشارة كانت في سيارات قدامي ومنها ثنتين واقفة غلط متجاوزة الإشارة شوي ولايشوفون الإشارة يعني عشان ينطلقون لازم بوري السيارة اللي خلفها

كانت معي بنت أخوي وحاطها معي قدام ووقت مالعالم تنتظر الإشارة قلت بشيلها واخليها تلعب شوي بالطارة حقت السيارة ولادريت إلا وهي تدق البوري
والسيارتين اللي قدامي ماشفتها إلا وهي قاطعة الإشارة هههه يحسبوها فتحت

تلفت عن يسار وانا متفشل من السيارات اللي جنبي وكويس إن السيارتين ماسوت حادث ولا مسكتهم الدوريات

لكن السؤال كيف لو دقت البوري على أمن الطرق

لاحد يقول أمن الطرق يوقف صح لاوالله في واحد مرة محصله واقف غلط ولو دقيت بوري وتمنذلت فيه بيدهر

الملكة وبعدين قصر الفرح

الحين فيه عادة منتشرة عندنا ومدري عندكم منتشرة ولا .. لا
يملكون للواحد والقصر حقه بعد سنه يقولك البنت تدرس خلها تكمل دراستها وبعدين نسوي الفرح

طيب خلوها خطبة يمكن أفكر أخلع ولاموبايلي تعرض أحسن من شركتكم

المشكلة مو بهذي إن مادامني مملك فالحرمة حلالي وعلى الأقل من حقي أجلس معها لوحدنا نسولف .. لا ماتجلس إلا وهي محاطة بحراسات أمنية وحولها حبال شائكة وأمها تطالع فيك بنظارتها تقل بتاكل بنتها

واذا تبون تطلعون تتمشون تطلع معاك ويركبون معك بالسيارة كل بزارين البيت حتى من كثرهم اذا جيت بتعشق في نمرة بسيارتك تمسك راس بزر من البزراين وتقدمه بالغلط

نصيحة ثم نصيحة لاتملكون إلا قبل القصر بليلة أو بنفس اليوم عشان ماتشوف حرمتك قدامك وتنقهر عشان تكلمها لازم تستأذن أمها

على فكرة ماتكلم عن نفسي واذا تبون أحلف مستعد


رمضان يجمعنا ببرامج مفيدة

ما إن يحل رمضان علينا إلا وتلاقي أبو شهاب مسنتر في قناة ........ وحليمة بآخر الليل أمبيـــــــه كلكم بتفوزو واحنا من خبالتنا نتصل نبي نكلمها

رمضان ليس لمتابعة شاشات التلفزة والمسلسلات ولكن مع ذلك فهناك برامج دينية تقدمها بعض القنوات المحترمة فمن هنا أدعو الجميع للمشاركة بهذا الموضوع بوضع إسم أي برنامج ديني وثقافي مع الوقت واسم القناة يستحق المتابعة بحيث إن وجدنا وقتاً للمتابعة نتابع ونستفيد بشيء يفيدنا بالدنيا ويصلحنا للآخرة بعيد عن تعكير مسلسلات رمضان لصيامنا وقيامنا


كل عام وانتم بخير