نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

الـمـشـاغـب · #11 03/02/2009, 08:33 PM

ما شاء الله عليك يا أستاذة ضحى على أفكارك المميزة

هلالي من .. إلخ

ومواصل من .. إلخ

ما شاء الله عليكم .. الله يجزاكم خير على الفزعات وهذا من طيب أصلكم

بالنسبة لي .. ما تحضرني مواقف تجمّلني حالياً لكن طرى علي موقف لعانة واستفدت منه

قبل سنوات في أول سنة جامعية ( الأوريا ) يعني لما كنت بزر في سن القيصر رهيب وسكب الهلال ووليد القحطاني وبقية أطفالنا الغالين في المجلس

كنت ساكن في ( اللاينات ) وكان التلفون مشترك .. رحت أبتصل منه وأدق على رقم بالدمام لكنه ما رد علي ..!
المهم لفت انتباهي رقم حجز رحلة إلى جدة

( كانت فيه اجازة ذيك الفترة بعد كم يوم )
طبعاً كنت طفشان .. دقيت على الحجز أبي أشوف هالحجز وين ومتى

دخلت رقم الحجز وعطاني تفاصيله ..! شيطاني كان طفشان برضه فأشار علي أضغط على الغاء الحجز

فعلاً ما خيبت ظن أبو بلس وألغيت الحجز ورجعت لغرفتي منتشياً بنذالتي

بعدها بفترة صحى ضميري وبدأ يأنبني

تخيلت أخونا في الله متحمس للسفر ورايح للمطار بعد ما جهز شنطته وودع أصحابه ورايح يشوف أهله بعد غربة , ولما يوصل المطار يبي يقص التذكرة يقولون له ما فيه حجز مؤكد .. ويرجع للجامعة خايب منكسر الخاطر

حاولت أني أتناسى هالموقف لكني والله ما قدرت .. وكل ما تذكرته يتقطع قلبي لما أتخيله يدعي على اللي كان السبب ويلعني

<< وشوله القلب؟ مدري

أنا وش استفدت؟؟!! صح حسيت بلذة وشعور حلو لما ألغيت الحجز وكسرت الملل لكن بالأخير ندمت

الله يغفر لي ويريح ضميري ( الحي )

بعد هالموقف خلاص .. تبت من النذالة واللعانة واعتزلتها إلى غير رجعة

الصدق .. هو مو تركتها تركتها .. يعني تركتها إلا شوي

.. أحياناً تجي شطحات نذالة ولعانة بس ما تاصل لدرجة النذالة اللي فوق

وإن شاء الله إذا تذكرت مواقف استفدت منها وغيرت فيني راح أذكرها

شكراً لك أستاذة ضحى