لهجتي , وكلام ديرتي هي : لُـغـتـي - نادي الهلال السعودي - شبكة الزعيم

المعاتب · #1 16/02/2011, 12:07 AM

لهجتي , وكلام ديرتي هي : لُـغـتـي

مدخل { وإنطفى كهرب بيتنا
ورقينا السطح وولعنآ السراج

وجبنا الكنابل بعد ما لفحَنا البراد

وصرنا نحتسي عن سوالف زمان ..

مسآء الخير جميعاً ,

بمآ إن مزآجي في فورمه عآليه من الروقآن .,

قلت بنزل موضوع بسيط
من زمآن عنكم وتستآهلون يـ رآعين المجلس

فكرة الموضوع : تعرفون أنا من سكآن الخرج وبالتحديد الدلم

فـعندنآ بالديرة " مُعجم مختلف من الكلمات "

عن المنآطق الأخرى في الدولة السعودية الثالثة ,

فجمعت 42 كلمة تخص ديرتي وأعرفكم على معآنيهآ يمكن بعض الكلمات عند بعض الديآر
ويمكن تكون نفس الكلمة بس المعنى مختلف , عموماً خلونآ نبدأ بالكلمآت بسم الله :

1 - تـيّـــتـــه تعني : إمسكهُ بقوه ,
مثال : محمد تّيت خالد لا يروح

2 - إزبره تعني : إملئهُ
مثال , صديقك بيصب لك ببسي ويسألك تبي نص ولا أملآه لك تقول انت : لا إزبره

3 - تعتموآ تعني : إسهروآ
مثال عيال خالتك تعشوآ عندكم وبيرحون تجي تقول لهم : إجلسوآ تعتموآ عندنا ,

4 - كتر تعني : زاوية أو جهه
مثال : يبه وين أودي الآغراض يقول لك : حطهآ في ذآك الكتر

5 - حيالة تعني : مزرعه أو ساحه أو مثل مآ يقولون بـ الآنجليزي : playground
وليست حيّالة بشد اليآء لا تنطق عآدية

مثال : جالسين تلعبون فـ وسط البيت يجي ابوك ويقول : لا تلعبون هنآ آظهروآ في الحيالة

6 - صيّف , صيّفوآ تعني : تأخروا
مثال : وشفي ربعك صيّفوا عليك .

7 - ريّض تعني : بيطول
مثال نفس لي قبل شوي يسألونك وشفي ربعك صيّفوآ عليك
تجآوب وتقول : الظآهر إنهم ريّضين

8 - بَحَل تعني : تورط
نُطقهآ قرَيب لـِ بحل الوآجب ,

لكن عندنآ لهآ معنى ثآني .,
مثال وآحد مشغول وجاه ضيوف وتورط معهم ويتصلون عليه ربعه ويرد عليهم
ويقول : يآخي جاني ضيوف و بَحَلت بهم ,

9 - كوزه تعني : حاجه مجمعه في مكان واحد
مثال : يسألك وآحد في الدوآم عطني قلم !
ترد : عندك كوزه في مكتبك

10 - لهط تعني : سرق , أخذ بخِفيه أو عيني عنك

مثال : شفت الأتصالآت لهطوآ رصيدي لهط

11 - هج تعني : أفتح
مثال : هج الباب ! يآخي البآب مهجوج

12 - يعثور تعني : حاجه زي الغبره والدخآن ,
مثال : النآرتعثور أو ركب سيارته وأسرع في الردميه وعثور على النآس

13 - حزّره تعني : ريحه خآيس

مثال : مآ تشمون ريحة حزّره

14 - ملغدم تعني : زعلآن ومطلع برآطمه من الزعل

مثال : الحين وش فيك ملغدم علينآ مآ جآزلك وضعنآ طق براسك الجدار

15 - تعنقط تعني : أمسك بهِ
مثال : محمد تعنقط في رقبة أبوه

16 - يردح تعني : تنكس يرقص
مثال : مآ يحتآج مثال معروف التنكس والرقص

17 - يرطرط تعني : مدري بس يمكن في المثال توضح

مثال : محمد لا تقعد ترطرط بالمآء ,
وتجي بمعنى آخر وهي : يتكلم بسرعه ,

18 - يرطن تعني : يتكلم بطلآقه ,
مثال : مآ يحتآج مثال معروف

19 - ييزي تعني : يكفي ,
مثال : رشود ييزي مقابل النت رح أرقد

20 - يلفحك تعني : يدخل فيك أو يصفعك
مثال : كان لبست جآكيت لا يلفحك البرآد

21 - طنقس تعني : شقلب أو تدربى

مثال :/ مدري وشلون أشرحهآ بس أعتقد معروفه

22 - حفلت تعني : شاركت ,
مثال : هآه يـ أم محمد حفلتوآ في عرس بنت أم خالد
لآ والله مآ حفلنا

23 - تسلآبينك تعني : أصدقآئك اللي مآ فيهم خير

طبعاً حسب مُعجم أمي

مثال : رشود خذ خوآتك للسوق ,
أنـآ : يمه أنا مشغول مع ربعي ,
أمي : بس جيد(ن) لـ تسلآبينك لو قالو مشينآ منآ ولا منآ طرت معهم

24 - منصّل تعني : مائل
ًطبعاً بشد الصآء ,
مثال : تشرب مويه وآنت منسدح ,
ويجي أبوك ويقول : وررآك تشرب وأنت منصّل

25 - إمِرح تعني : نوم
طبعاً بكسر الميم
مثال عيال خالتك تعشوآ عندكم وتعتموآ وبيرحون تجي تقول لهم : إمرحوآ عند اليوم

26 - الحوي تعني : المنزل أو وسط البيت
مآ يحتآج مثال معروفة الكلمة ,

27 - يحرول تعني : يقصب أو يكسر
مثال : جعلك تحرول إذآ رحت لـ المراقص

28 - مدّهر تعني : مدري وش معنآهآ بالظبط لكن المثال يمكن يوضح
مثال : عندكم عزيمه في بيتكم وأنت تروح وتجي وتصب القهوة والشاهي
هذي الحالة تسمى مدّهر

29 - مقنزع تعني : قصير
مثال : ترى ثوبك مقنزع مره

30 - إيه لا لا تعني : مستحيل أو إيه هين ,
مثال يجيك واحد يقول النصر بيأخذ الدوري !

تقول له : إيه لا لا ,

31 - مزدد تعني : حاجه تتغير في الوجه مع البكآء أو الضحك
مثال : شوفوآ أحمد مزدد من العبرة

32 - تحومي تعني : تدور , تتمشى
مثال : أبوك يصارخ عليك : قايلك لا تحومي تالي الليل مآ تفهم أنت

33 - دفش تعني : حآجه في الآخلآق
مثال : ياخي كلام محمد دفش ,
بمعنى يجرح

34 - زناج تعني : مرض في العظام
مثال : أجعلك الزناج َاللي يدخل فيك !

35 - عايره تعني : زاوية
مثال : لا تجلس في العايره عند اللي يدخنون

36 - قرنة تعني : زاوية أيضاّ
مثال : جالسين عند قرنة المسجد نسولف

37 - عتش تعني : خشن , عدوآني
مثال : لا تلعبون معهم ترآهم عتشين

38 - دبج تعني : ضرب
مثال : إدبجه مع ظهره ,

39 - مسفهل تعني : مستآنس ,
مثال : وش عنده رشود مسفهل اليوم ,
> مستلم المكأفأة

40 - أفّل تعني : لم يتركه
طبعاً يشد الفآء ,
مثال : أمي مآ أفّلت بالمكيف القديم

41 - التابعية تعني : دفتر العائلة ,
مآ يحتآج مثال ,

42 - بلاكآش تعني : الخشب اللي على السرير
ويكون تحت الفرآش عآدة ,

وبكذا نكون خلصنآ وهذآ اللي قدرت عليه وتذكرته ,
يمكن فيه كلمآت نآسيهآ واللي عنده يضيفهآ ,
وياليت الآخوآن في الديآر والمنآطق الثآنية يثقفوننآ
في الكلمآت والمصطلحات اللي عندهم بودنآ نستفيد
الموضوع متآح للجميع ,

مخرج { وصرخت أمي علينآ

وقالت : يا مال الضارب

قرب الفجر وإنتوآ مآ رقدتوآ ؟

أخوكم رشود

حروف الغلا · #2 16/02/2011, 12:12 AM

كلمات غريبة و بعضها حلو

امرح وااايد عجبتني

خـيـالـيـه · #3 16/02/2011, 12:19 AM

يا هلا بك آخوي

عليكم كلمات الصراحه >> ههههههههههههههههههه
رهيبة والله

طرت ببالي هالكلمة..

((يبربس>> يعني يلعب بالماء ))

اذا جالي ببالي شئ ثاني بجي اسدحه هنا

موضوع جميل .. تقبل مروري

PRINCE.MU · #4 16/02/2011, 12:19 AM

موضـوع اللهجـآت مفـروغ منـه عندنـآ في السعـوديه
المقيـم يضيـع عندنـآ
بعـض كلمـآتكم تمشـي عندنـآ فـي | الأحسـآء |
لكـن جيـل هـ الفتـره مـآ صـآر يحكـي زي كـذآ ألآ نـآدرآ

عـوآفـي

محبة الرحمن · #5 16/02/2011, 12:21 AM

يآهلآ وغلآ اخي معآتب ..

ههههههههههههه كلمات رآئعة ..
استمتعت في قراتهآ ..
ماعرفت او يعني الي نقوله احنا ..
يردح ..يدبج .. يلفحك .. وبس ..

يعطيك العآفية .. شكرا لك ..
الله يسعدك بهالموضوع الممتع ..

دمت في حفظ الرحمن

HILALYA ]~ · #6 16/02/2011, 12:23 AM

.

يالله حيه ض1, جا بوقته والله كويس ض1 ..
اعرف وحده منكم وقسم فجاه كذا كلمه تشطح ذذذ..
افهي لا جت تسولف ض1ض1ض1ض1ض1 ..
تم حفظه بالمفضله ض1ض1 ..

إقتباس


	مخرج { وصرخت أمي علينآ وقالت : يا مال الضارب قرب الفجر وإنتوآ مآ رقدتوآ ؟

بس بس خلاص لو تحط هذا موضوع جميل مره ض1ض1 ..
هذا امي بعض االاحيان ض1 , اذا صارت سهرانه ولا نامت ض1ض1 ..

موضوع جميل جدا جدا ض1, شكرا جزيلا و1..

( عبدالعزيز اليامي ) · #7 16/02/2011, 12:24 AM

شوفوا يالربع هالكلمات والله ما يعرف معانيها الا جنوبي اصيل او يامي من نجران

وما راح اقول كل ما في جعبتي لكن على اقل شي باكتب اعضاء في الجسم

بسم الله

قبّوع ::: مؤخرة الرأس

صابر::::جانب الوجه

ملاجع :::خدود

مشافر :::شفايف

خنفر :::خشم

صدغ :::اسفل الفك

كرسوع :::مرفق اليد

جحنه :::كرشة

زُغن:::ابط

هذي بس عن اعضاء الجسم وتستخدم بشكل كبير في نجران

اذا عاد شهيتك منفتحه اكثر هبيت لكم اكثر

مشكور اخوي وصراحه مدخل ومخرج خنفشاريه

Hilaly Madridi · #8 16/02/2011, 12:25 AM

جيت آحفل بموضوعك ..!!

وممكن آصيف بالتعديل..!!

حاتم · #9 16/02/2011, 12:31 AM

الله يعطيك العاافية

حفلت معناا

ونورت قرنة من قرناات الشبكـة

تعمتو معنا يعني اسهر معنا ههههههههههه

داق لطمة · #10 16/02/2011, 12:32 AM

ههههههههههههههههه

ياحليلنا اجل ،،، والله يافيه كلمات تفقع من الضحك ،،، تحياتي لك

HooO 20OooH · #11 16/02/2011, 12:35 AM

هلا .. اخوي المعاتب
..
الصراحه

,, ماعرفت إلا الكلمات التاليه :
6 - صيّف , صيّفوآ تعني : تأخروا
مثال : وشفي ربعك صيّفوا عليك .
.........
7 - ريّض تعني : بيطول
مثال نفس لي قبل شوي يسألونك وشفي ربعك صيّفوآ عليك
تجآوب وتقول : الظآهر إنهم ريّضين

............
8 - بَحَل تعني : تورط
نُطقهآ قرَيب لـِ بحل الوآجب ,

لكن عندنآ لهآ معنى ثآني .,
مثال وآحد مشغول وجاه ضيوف وتورط معهم ويتصلون عليه ربعه ويرد عليهم
ويقول : يآخي جاني ضيوف و بَحَلت بهم ,
..............
10 - لهط تعني : سرق , أخذ بخِفيه أو عيني عنك

مثال : شفت الأتصالآت لهطوآ رصيدي لهط
.................
11هج تعني : أفتح
مثال : هج الباب ! يآخي البآب مهجوج

................
18 - يرطن تعني : يتكلم بطلآقه ,
مثال : مآ يحتآج مثال معروف
........................
20 - يلفحك تعني : يدخل فيك أو يصفعك
.................
25 - إمِرح تعني : نوم
طبعاً بكسر الميم
مثال عيال خالتك تعشوآ عندكم وتعتموآ وبيرحون تجي تقول لهم : إمرحوآ عند اليوم

..............
28 - مدّهر تعني : مدري وش معنآهآ بالظبط لكن المثال يمكن يوضح
مثال : عندكم عزيمه في بيتكم وأنت تروح وتجي وتصب القهوة والشاهي
هذي الحالة تسمى مدّهر

..............
32 - تحومي تعني : تدور , تتمشى
مثال : أبوك يصارخ عليك : قايلك لا تحومي تالي الليل مآ تفهم أنت
................
33 - دفش تعني : حآجه في الآخلآق
مثال : ياخي كلام محمد دفش ,
بمعنى يجرح
..................
....................
امم أنا عندي كلمات بس مشكلتي ماعرف اشرح

مثل :
أذكر جدتي الله يحفظها يارب

..
تقولي روحي جيبي اللي ف البزه .. ااممم مثلا صحن فيه مكان رفيع زي كذا (شرح

)
مشكور اخوي ع موضوعك ربي يعافيك أختك .. بالتوفيق

**نــواره** · #12 16/02/2011, 12:37 AM

ججيييييييييييت ض1

الله حييهم ض1

محدثتك من اليمآمه الشقيقه

المهم تم تجميع المصطلحآت المشتركه

إقتباس


	6 - صيّف , 7 - ريّض 8 - بَحَل 9 - كوزه 10 - لهط 11 - هج 15 - تعنقط 16 - يردح 17 - يرطرط 18 - يرطن 19 - ييزي 20 - يلفحك 21 - طنقس 24 - منّصل 25- امرح 28 - مدّهر 29 - مقنزع 32 - تحومي 33 - دفش 35 - عايرهـ 36 - قرنه 37 - عتش 37 - عتش 38 - دبج 39 - مسفهل

حفلت

تصدق هآلكلمه مآ فهمتهآ إلآ لمآ قريت المثال

اصلاً حنا نقول كذآ ض1
و اتوقع مانستخدمها الا بهالمثال ض1

-

أخم : يعني أضم أو أجمع

مثال ض1
ي إني مشتاقتن لس تعالي اخممس

مثال 2 / فاتكم لقيت عسكريم بآبو و خميت واااجد منه

-

أخمع : يعني اتكرفس ض1
يعني اطيح على خشتي ض1

مثال / انا فرحانه بالكعب

امي تقولي انتبهي بس لآ تخمعين

-

ولّم : يعني جهز

مثال / ولموآ القهوهـ

-

هذآ اللي ف جعبتي الحين

،
إن جد جديد رجعت

-

بس يَ رشيد

مآ تحس إن حنآ مقدسين شيء اسمه ششدهـ

لآحظ كل نطقنآ نشدد

>~~ حتى إني انعديت و قلبت اسمي نورهـ الى نوّآرهـ

-

ثانكس يَ رشيد

+

وينك يالزعيم · #13 16/02/2011, 12:40 AM

.

مـآشـآء الله تبـآرك الله شرح الكلمـآت مره وآضح
وإستوقفتني هذي

إقتباس


	24 - منصّل تعني : مائل ًطبعاً بشد الصآء , مثال : تشرب مويه وآنت منسدح , ويجي أبوك ويقول : وررآك تشرب وأنت منصّل

كل الششكر لك على الموضوع

الهنوووف · #14 16/02/2011, 01:59 AM

هلا بك اخوي وياهلا بـ اهل الخرج

اغلب العبارات نقولها بديرتنا
ونفس الشي وحده البنات تقول نقولها وكلنا من ديار مختلفه ومو من الخرج

اهل نجد كلامهم متقارب جدا

مدري وش اضيف بس فيه
عومه
يعني محمد طلب من ابوه خمسين ريال ورفض ابوه يعطيه
وزعل محمد
ابومحمد ضاق صدره لما شاف ولده زعلان وقال له خذ هالخمسين
محمد رفضها

تقريبا الزعل الي يصاحبه كبرياء

إقتباس

مدخل { وإنطفى كهرب بيتنا
ورقينا السطح وولعنآ السراج
وجبنا الكنابل بعد ما لفحَنا البراد
وصرنا نحتسي عن سوالف زمان ..

ترا معناها اللحاف الي نتغطى فيه

\

/
يعطيك العافيه استمعت بالقراءه وخصوصا الامثال

وشرحك وافي

ونبي الكل يعرفنا على لهجاتهم

الهنوووف
كانت
هنا
ورحلت

هلاليـ للابد ـه · #15 16/02/2011, 01:44 AM

21 - طنقس تعني : شقلب أو تدربى
والله ضحكة على الكلمه مرة غريبه

عبدالعزيز اليامي الكلمات الي جايب مو بس بالجنوب ونجران كمان عندنا بالقصيم المعنى نفسه