مـسـاكم الله بالخير
في حقيقة الأمر احب أن أشكر جميع الإخوان القائمين على هذا المنتدى و على رأسهم إدارة الموقع و الأخ سلمان و الإعصار و كوكتيل و الأولاني
وكذلك جميع الإخوان المشاركين على المجهودات الرائعة اللي قاعدين يسوونها
أنا ما راح أتطرق لمزايا المنتدى ما راح أوفيه حقه يكفي أنه قاعد ينافس المواقع العالمية الرياضية و تقل إني قريت إنه صار الأول شهادتي فيه مجروحة
راح أثير عدة نقاط وأنتم و ضما يركم و الله يعنكم على غثى الناس اللي مثلي
مع إني متأكد إن صدوركم علينا وسيعه (الله يسلمكم) على طول قررت عنكم.
أولاً أنا متأكد إن المنتدى قام لكي يخدم كيان كبير ألا و هو الهلال لكن حتى الآن ما شفت بعيني التأثير الفعلي ممكن تقولون لا تستعجل أنا معكم يبلنا وقت (رجاء لا أحد يفهم كلامي على إني قاعد أبخس حق القائمين على هذا المنتدى كل ما أتمناه أن تفهمون وجهة نظري و بعدين قرروا على راحتكم )
والله العظيم أنا يهمني مصلحة الهلال مثلكم .
و اكثر من فترة و أنا أتابع كل ما يكتب عن الهلال في الإنترنت حتى و قبل هذا المنتدى أيام صاحب المعادلة الصعبة (1+1=2) و بعض الكتاب استمروا بنفس الاسم و كان هذا كله في منتديات أخرى و أول ما تم افتتاح هذا المنتدى تعشمت خير فيهم و فيكم جميع إن يكون هذا المنتدى لمصلحة الزعيم راح أرجع لكلامي و أقول هذا المنتدى لخدمة الهلال وبـــــــــــــــس يعني مو علشان نرد على جماهير النادي الفلاني أو نقوم بتجريح بعض اللاعبين أو حتى لمدح لاعب محدد و تمجيده حنا عارفين إن نسبه كبير من اللي يخشون هذا المنتدى من المشجعين لنادي الهلال جميعنا يحب الهلال و يغار عليه و يحب جميع اللاعبين كثير من المواضيع كأنها ترغب بالهلال أو تقنع اللي يقرا بتشجيع الهلال أو حب لاعب معين و مو معنى كلامي عدم المدح بس تمنيت أننا نهتم بأشياء كثيرة مهمة من النادر أحد تكلم فيها و هي في مهمة لمصلحة الهلال أولاً و أخيراً
وهي على سبيل المثال
1- النقد البناء يعني كل أسبوع يتم التركيز على لاعب من اللاعبين اللي يمثلون نادي الهلال و نقول تعال يا فلان عندك بعض الأخطاء اللي قاعد تقع فيها و من الممكن أن تأثر على الفريق أنت قاعد تسوي كيت و كيت و كيت على سبيل المثال نمسك فهد المفرج ليش ما تحاول تستخدم القدم اليمنى و أنت يا عبد الله الجمعان ليش ما تحاول تزيد التدريبات بعملية التصويب ...الخ ( بحيث ما يخرج النقد عن أداء اللاعب في الملعب و نبعد عن التجريح)
2- ما شفت أحد تكلم عن رابطة نادي الهلال اللي من و ين و حنا نتمنى يكون عندنا رابطة عليها الكلام من الممكن من هذا المنتدى إنشاء رابطة ما دام المسئولين لين الحين ما شافوا لها حل بحيث يتم نقاش هذا الموضوع و وضع الحلول المناسبة لها.
3- بعدين الحمد لله جماهير الهلال مالية العالم ليش ما يكون في كل منطقه مجموعة تمثل هذه المنطقة و في كل شهر يقوم هذا الشخص بجمع أرى المشجعين و اقتراحاتهم و عرضها لو مو كل شهر كل 3 شهور أهم شي يكون فيه تواصل و تبادل أرى و كل هذا لمصلحة الهلال.
4- من أهم النقاط ما يكفي إن معنا صاحب السمو الملكي الأمير بندر بن ثامر بن سعود حفظه الله اللي ما قصر يا عل عمره يطول إن شاء الله من الممكن بين كل فتره و فتره تقوم إدارة الموقع بجمع أرى جماهير الهلال و عرضها على سموه ليتم رفعها لإدارة النادي و يكون على اتصال دائم مع الجماهير الهلالية هذا غير إني متأكد أن كثير من الأعضاء يطلعون على كثير من المواضيع المطروحة هنا أتمنى لو كل شهر يتم جمع المواضيع اللي في مصلحة الهلال و تبرزونها بشكل ملفت للنظر.
5- هذه النقطة الإخوان ما قصروا فيها تكلموا بس كان ودي يكون لها مكان مخصص و ثابت بحيث يتم توثيق كل شي عن الهلال الأخ سلمان في بداية المنتدى تكلم عن تاريخ الهلال لكن الحين كثير من المتابعين ما يرجعون للمواضيع السابقة بعدين ما شاء الله عليكم و عيني عليكم باردة عندنا كتاب كبار منهم على سبيل المثال و ليس الحصر الأخ سلمان و كوكتيل و الإعصار و الكاسر888 والأسطورة و الأخ شاكر و نديم الهلال والأستاذ الكبير يا قاهر هم يا سامي هذا إن شاء الله لي موضوع كامل لجميع ما يطرح بإذن الله و غيرهم كثير من كتبة تاريخ الهلال .
6- هذا غير انه عندنا مواهب مبدعه جداً ما شاء الله عليهم ليش ما يتم تنمية هذه المواهب مثل الأخ المرزوقي صاحب الريشة الذهبية و الشاعر الكبير شاعر الهلال هذا موضوع لحاله و غيرهم كثير ليش ما يتم تخصيص منتدى خاص بإبداعات الهلاليين (مشروع تجاري معرض للفنون و أمسيات شعريه ) الله يحفظهم و يحفظكم جميع يا رب .
7- يتم تخصيص جائزة شهريه لأفضل موضوع حيث يتم تحديد شروط لهذه الجائزة و من أهم هذه الشروط أن يكون الموضوع المطروح في مصلحة الزعيم.
8- هذه النقطة تكلموا فيها كثر من الأعضاء ألا و هيا فتح الحساب هل من الممكن يتحول الحلم إلا واقع هذا اللي نتمناه .
9- آخر نقطه ألا و هو الأخ طلال هذا الشخص اللي ما راح نوفيه حقه مهما تكلمنا بس لابد تشوفون لنا حل علشان نشكره و جميع الأخوان اللي ينقلون أخبار الهلال و لا أنسى الأخ محمد (السعود يه) .
هذه بعض النقاط حبيت أضعها قدامكم و أتمنى من كل قلب أن تتقبلونها بصدر رحب و فيه أشياء كثير جداً ما تعرضت لها و أنا متأكد أنه فيه ناس غيورين على الهلال و تهمهم مصلحة الهلال بس حبيت أدلي بدلوي و هذا فإن أصبت فمن الله و إن أخطأت فمن نفسي.
والسلام عليكم و رحمة الله و بركاته.