مـسـاكم الله بالخير
في حقيقة الأمر احب أن أشكر جميع الإخوان القائمين على هذا المنتدى و على رأسهم إدارة الموقع و الأخ سلمان و الإعصار و كوكتيل و الأولاني
وكذلك جميع الإخوان المشاركين على المجهودات الرائعة اللي قاعدين يسوونها
أنا ما راح أتطرق لمزايا المنتدى ما راح أوفيه حقه يكفي أنه قاعد ينافس المواقع العالمية الرياضية و تقل إني قريت إنه صار الأول شهادتي فيه مجروحة
راح أثير عدة نقاط وأنتم و ضما يركم و الله يعنكم على غثى الناس اللي مثلي
مع إني متأكد إن صدوركم علينا وسيعه (الله يسلمكم) على طول قررت عنكم.
أولاً أنا متأكد إن المنتدى قام لكي يخدم كيان كبير ألا و هو الهلال لكن حتى الآن ما شفت بعيني التأثير الفعلي ممكن تقولون لا تستعجل أنا معكم يبلنا وقت (رجاء لا أحد يفهم كلامي على إني قاعد أبخس حق القائمين على هذا المنتدى كل ما أتمناه أن تفهمون وجهة نظري و بعدين قرروا على راحتكم )
والله العظيم أنا يهمني مصلحة الهلال مثلكم .
و اكثر من فترة و أنا أتابع كل ما يكتب عن الهلال في الإنترنت حتى و قبل هذا المنتدى أيام صاحب المعادلة الصعبة (1+1=2) و بعض الكتاب استمروا بنفس الاسم و كان هذا كله في منتديات أخرى و أول ما تم افتتاح هذا المنتدى تعشمت خير فيهم و فيكم جميع إن يكون هذا المنتدى لمصلحة الزعيم راح أرجع لكلامي و أقول هذا المنتدى لخدمة الهلال وبـــــــــــــــس يعني مو علشان نرد على جماهير النادي الفلاني أو نقوم بتجريح بعض اللاعبين أو حتى لمدح لاعب محدد و تمجيده حنا عارفين إن نسبه كبير من اللي يخشون هذا المنتدى من المشجعين لنادي الهلال جميعنا يحب الهلال و يغار عليه و يحب جميع اللاعبين كثير من المواضيع كأنها ترغب بالهلال أو تقنع اللي يقرا بتشجيع الهلال أو حب لاعب معين و مو معنى كلامي عدم المدح بس تمنيت أننا نهتم بأشياء كثيرة مهمة من النادر أحد تكلم فيها و هي في مهمة لمصلحة الهلال أولاً و أخيراً
وهي على سبيل المثال
1- النقد البناء يعني كل أسبوع يتم التركيز على لاعب من اللاعبين اللي يمثلون نادي الهلال و نقول تعال يا فلان عندك بعض الأخطاء اللي قاعد تقع فيها و من الممكن أن تأثر على الفريق أنت قاعد تسوي كيت و كيت و كيت على سبيل المثال نمسك فهد المفرج ليش ما تحاول تستخدم القدم اليمنى و أنت يا عبد الله الجمعان ليش ما تحاول تزيد التدريبات بعملية التصويب ...الخ ( بحيث ما يخرج النقد عن أداء اللاعب في الملعب و نبعد عن التجريح)
2- ما شفت أحد تكلم عن رابطة نادي الهلال اللي من و ين و حنا نتمنى يكون عندنا رابطة عليها الكلام من الممكن من هذا المنتدى إنشاء رابطة ما دام المسئولين لين الحين ما شافوا لها حل بحيث يتم نقاش هذا الموضوع و وضع الحلول المناسبة لها.
3- بعدين الحمد لله جماهير الهلال مالية العالم ليش ما يكون في كل منطقه مجموعة تمثل هذه المنطقة و في كل شهر يقوم هذا الشخص بجمع أرى المشجعين و اقتراحاتهم و عرضها لو مو كل شهر كل 3 شهور أهم شي يكون فيه تواصل و تبادل أرى و كل هذا لمصلحة الهلال.
4- من أهم النقاط ما يكفي إن معنا صاحب السمو الملكي الأمير بندر بن ثامر بن سعود حفظه الله اللي ما قصر يا عل عمره يطول إن شاء الله من الممكن بين كل فتره و فتره تقوم إدارة الموقع بجمع أرى جماهير الهلال و عرضها على سموه ليتم رفعها لإدارة النادي و يكون على اتصال دائم مع الجماهير الهلالية هذا غير إني متأكد أن كثير من الأعضاء يطلعون على كثير من المواضيع المطروحة هنا أتمنى لو كل شهر يتم جمع المواضيع اللي في مصلحة الهلال و تبرزونها بشكل ملفت للنظر.
5- هذه النقطة الإخوان ما قصروا فيها تكلموا بس كان ودي يكون لها مكان مخصص و ثابت بحيث يتم توثيق كل شي عن الهلال الأخ سلمان في بداية المنتدى تكلم عن تاريخ الهلال لكن الحين كثير من المتابعين ما يرجعون للمواضيع السابقة بعدين ما شاء الله عليكم و عيني عليكم باردة عندنا كتاب كبار منهم على سبيل المثال و ليس الحصر الأخ سلمان و كوكتيل و الإعصار و الكاسر888 والأسطورة و الأخ شاكر و نديم الهلال والأستاذ الكبير يا قاهر هم يا سامي هذا إن شاء الله لي موضوع كامل لجميع ما يطرح بإذن الله و غيرهم كثير من كتبة تاريخ الهلال .
6- هذا غير انه عندنا مواهب مبدعه جداً ما شاء الله عليهم ليش ما يتم تنمية هذه المواهب مثل الأخ المرزوقي صاحب الريشة الذهبية و الشاعر الكبير شاعر الهلال هذا موضوع لحاله و غيرهم كثير ليش ما يتم تخصيص منتدى خاص بإبداعات الهلاليين (مشروع تجاري معرض للفنون و أمسيات شعريه ) الله يحفظهم و يحفظكم جميع يا رب .
7- يتم تخصيص جائزة شهريه لأفضل موضوع حيث يتم تحديد شروط لهذه الجائزة و من أهم هذه الشروط أن يكون الموضوع المطروح في مصلحة الزعيم.
8- هذه النقطة تكلموا فيها كثر من الأعضاء ألا و هيا فتح الحساب هل من الممكن يتحول الحلم إلا واقع هذا اللي نتمناه .
9- آخر نقطه ألا و هو الأخ طلال هذا الشخص اللي ما راح نوفيه حقه مهما تكلمنا بس لابد تشوفون لنا حل علشان نشكره و جميع الأخوان اللي ينقلون أخبار الهلال و لا أنسى الأخ محمد (السعود يه) .
هذه بعض النقاط حبيت أضعها قدامكم و أتمنى من كل قلب أن تتقبلونها بصدر رحب و فيه أشياء كثير جداً ما تعرضت لها و أنا متأكد أنه فيه ناس غيورين على الهلال و تهمهم مصلحة الهلال بس حبيت أدلي بدلوي و هذا فإن أصبت فمن الله و إن أخطأت فمن نفسي.
والسلام عليكم و رحمة الله و بركاته.

http://alzaeem.com/vb/showthread.php3?threadid=4465
دايما أتكلم عن الرابطة
لأنها أهم الأشياء

الأخ عواكيس:

شكراً أخي الفاضل على اقتراحاتك وهي اقتراحات جميلة جداً وأتمنى تطبيقها من إدارة المنتدى.ولكن بخصوص قولك (( ما شفت بعيني التأثير الفعلي..... على الموقع )) فلا أعرف معنى قولك من أي ناحية قصدك ؟؟؟ وممكن أرد عليك حسب اللي أعرفه :

@@ اذا كان تأثير بخصوص حضور اللاعبين الأجانب فادارة الموقع وقبل افتتاحه الرسمي قامت مشكورة بعمل استفتاء بين الأعضاء في الصفحة الأولى بخصوص اللاعبين الأجانب .... ومعظم المشاركين طالبوا بالكاتو ودايين فاييه ... وادارة النادي لبت النداء وتعاقدت معهم.

@@ واذا كان قصدك التأثير الإعلامي قامت إدارة الموقع بعمل لقاء مطول مع الشيخ عبد الرحمن بن سعيد (( شيخ الرياضيين السعوديين )) وهو أول لقاء لشيخ عبد الرحمن على مستوى الإنترنت ونقلت الحوار جريدة الرياض وعلى جزئين وهذا مكسب كبير للموقع أن تقوم جريدة بنقل حوار مأخوذ من الموقع.

@@ واذا كان قصدك الوصول للعالمية فالموقع سبق وأن أحرز المركز الثالث على مستوى المواقع الرياضية العالمية كما ذكرت وذلك حسب تصنيف موقع عالمي مشهور (( لايحضرني اسمه الآن )) أتمنى من ادارة الموقع ذكره في رد على هذا الموضوع.

@@ واذا كان قصدك تأثير إعلامي فكما تعلم يكتب معنا في الموقع كبار الكتاب الرياضيين منهم الأستاذ صالح السليمان وفارس الروضان وأسامة النعيمة وتركي العواد ... الخ ولاتنسى قناة أوربت أشادت بالموقع أثناء لقاء الاتحاد والهلال والذي أقيم الأسبوع الماضي....

هذا ماأتذكره الآن وعلى قولك (( أنا ما راح أتطرق لمزايا المنتدى ما راح أوفيه حقه يكفي أنه قاعد ينافس المواقع العالمية الرياضية ))..

وأشكرك أخي العزيز على اشادتك بموضوعي اليومي (( أخبار الزعيم )) وكذلك اشادتك بالأخ العزيز محمد mksa

أخوك : طلال

السلام عليكم ورحمة الله وبركاته

الاخ الاستاذ عواكيس :
شكرا لك علي اهتمامك واقتراحاتك هي محل اهتمامنا وباذن الله ستراها قريبا ولكن لتعلم اخي الكريم ان الشبكة الان للتو تجاوزت الشهرين من يوم افتتاحها ولذلك ماعلينا سوى الصبر والحمدلله الان صوتنا مسموع وكلمتنا تصل وهذه اول الخطوات لمانبحث عنه الا وهو التقويم والتقيم لاداء الهلال بالكامل من ادارة وحتي الجماهير .

وماعلينا سوى الصبر اخي الكريم .

اما بخصوص ماذكرته عن الاستاذ طلال فبصراحه لو قلنا فيه كل كلمات المدح والثناء فلن نوفيه حقه لان مايقوم به من عمل جبار يشكر في كل صباح ماهو الا دليل علي عشق هذا الرجل لهلالنا ولنا كذلك بتزويدنا بكل ماهو جديد عن الهلال صبيحة كل يوم .

واحببت ان اضع امامك اخي الكريم ان من ذكرته في اول مقالتك بوصفك له بصاحب المعادلة الصعبه (1+1=2) هو انا سلمان وقد تغير المسمي منذ زمن ليس بالبسيط وقد اعلنت ذلك بموضوع خاص وكتبت باسمي الموجود امامك الان .

كلامك في محله

وانت اثرت بعض النقاط الحلوه مثل تقيم لاعب كل شهر و نحدد اخطاءه لكي يصححها

السلام عليكم و رحمة الله و بركاته
مساكم الله بالرضاء و العافية
أسف بالتأخير بالرد بس الشكوى لله كل يوم أفتح المنتدى من صباح الله خير و أطلع من الدوام ما قريت شي "نصيحة لكل أعزب لا تخش مجال الكمبيوتر "
أخوي ولد المدينة يعطيك ربي ألف عافيه أنا قريت موضوعك و مواضيع كثيرة من هال قبيل بس اللي كنت أقصد فيه و أتمنى أن يتحقق أن تقوم إدارة الموقع بهذا الشي يعني أبيها ترز الموضوع كل من دخل المنتدى قام و أدلى بدلوه و تقوم برفع هذا الشي للمسئولين أنت كتبت و أكثر من شخص كتب بس مع الأيام راحت
و هذا ما أرجوه من أخوي صاحب المعادلة الصعبة .
أخوي طلال تسلم يدينك ما قصرت و فيت و كفيت بيني و بينك أخوي أنا طماع شوي مو شوي إلا والله كثير أذكر من قبل ما تجي النت للسعودية و أنا ودي بشي يجمع جماهير الهلال بالإدارة يكون فيه رابط بس ما قدرت ألقى لي حل و ما صدقت على الله يوم إني شفت بعض المنتديات و كنت ناوي أشارك فيها بس للأسف معظم المواضيع أنت عارفها هذا يسب و الثاني يشتم صحيح كان فيه مواضيع أكثر من رائعة بس بالنسبة مقارنة مع الباقي كانت قليلة جداً و أول ما تم افتتاح منتدى الجماهير الهلالية قلت جت و جابها الله و كنت أتمنى تكون المواضيع تهم الهلال و لا شي غير الهلال (و هذا لا يقلل من المواضيع المطروحة لا والله بس مثل ما قلت لك أنا طماع الله يعينكم) التأثير الفعلي اللي أنا أعنيه ما راح أتكلم فيه لين تأذن لي إدارة المنتدى و تخصص لهذا الشي مكان مخصص بحيث يشوفونه جميع المشتركين و الزوار مع إني يومي بسنه وارتباطاتي كثيرة بس كل شي يهون لعيون الهلال و مو معنى كلامي إني أبخس جهد القائمين عليه لا والله و الله لو أقوم أنا و عشره معي ما سوينا نص اللي سواه الأخوان القائمين على هذا المنتدى بس هذا الطمع و ما يعمل بيني و بينك أبي كلمة الجماهير الهلالية هي اللي تقود الهلال .
أخوي سلمان الله يعطيك العافية و إن شاء الله ما يخيب لك تعب و الله يوفقكم جميع أخوي سلمان أنا كنت متابع لك من أيام المعادلة الصعبة و كنت أبي أقولك تراني من زمان و أنا أتابعك مو جديد صحيح ما كنت أكتب بس جميع مواضيعك و مواضيع معظم الأشخاص اللي هنا أحتفظ بمواضيعهم .
و تراني أنتظر النقلة الفعلية للمنتدى و من حسن إلى أحسن يا رب و الله يعطيكم العافية .
أما بالنسبة للأخ طلال وش رأيكم تفتحون له منتدى يكون هو المشرف عليه و يكون المنتدى خاص بمتابعة ما يكتب في الصحف اليومية بحيث يكون مرجع للبحث يعني بعد كم سنه إن الله أحيانا و أحياكم يكون فيه مرجع لكل ما كتب في الصحف و أنا أقترح يكون الاسم (منتدى طلال للأخبار اليومية ).
تسلم أخوي عاشق البحر أنا أشهد خوش اسم و الله يعطيك العافية

و أحب أن أشكركم مع تمنياتي للجميع بالتوفيق
و السلام عليكم و رحمة الله و بركاته

الأخ عواكيس :
أقولك أتفضل وقول (( التأثير اللي أنت قاصده )) وإدارة الموقع اذا عجبها الموضوع سوف تخصص له مكان خاص وخاص جداً واذا انك واثق من الموضوع انه سوف يأثر اذكره وأتوكل على الله .... واذا انك ماودك تذكره أرسل لي رسالة خاصة بالموضوع تراك اشغلتني معاك ممكن تقول ملقوف ولكن ما أحب أسمع سالفة وما أعرف نهايتها.

بالنسبة لموضوع الأخبار فكما ذكرت هدفي الأساسي من كتابتها هو خدمة أخواننا المغتربين خارج الوطن وكذلك وجود أرشيف كامل لجميع الأخبار عن الهلال اليومية على موقع الزعيم وممكن لأي عضو يبحث عن جمع الأخبار وسيجدها ان شاء الله وكما تعلم معظم الأخبار تنزل على الانترنت ( جريدة الرياض + الجزيرة ) ولكن كما ذكرت لك اني اكتبها لحفظها في منتدى الزعيم وسهولة الرجوع اليها.

وأخيراً أشكرك على إطرائك واقتراحك والأخبار ما يحتاج لها منتدى خاص لأن مواضيعها ستكون قليلة جداً وأخبار اليوم دائماً تكون (( منتهية الصلاحية )) غداً.

وأشكرك يا أخ سلمان على إطرائك ومعزتكم جميعاً في القلب وهذا أقلب واجبه أقدم لكم ..

ولك خالص تحياتي...
أخوك : طلال

الاخ عواكيس هلا فيك
اشكرك على النقاط التي اثرتها في موضوعك فو الله اننا بحاجه لكل ماقلت

وجميع مااثرته من نقاط يحتاج لتنفيذ لااعقد ان فيه من يعارض عليه

مااثرته في النقطه السادسه وهو تكريم المواهب انا اويده بشده فهم

يستحقون التكريم واضف عليهم الاخ العضو ( الشويعر)

اما طلال فالله دره هذا المبدع المجتهد المخلص الرائع بحق ، اتمنا يوجد

حل بالفعل

شكرا

السلام عليكم ورحمة الله وبركاته

الاخ عواكيس :
اقتراحك محل دراسة ادارة الشبكة حول الاخ والاستاذ طلال بفتح منتدي خاص له تحت اسمه مختص بالاخبار ....
باذن الله سنحاول بشتي الوسائل فعل ذلك متي مااتفقنا وراينا جدوى ذلك فانه سيرى النور باذن الله .

والشكر كل الشكر لك ولكل الاخوان المشاركين معنا .

والسلام ختام

هلا أخوي طلال يسعد لي ربي مساك قول آمين ومساء جميع المشاركين يارب
شوف يا عل ربي يطول لك عمرك أنا أثرت بعض النقاط في بداية الموضوع هل تعتقد اللي أثرته ما هي مهمة بحيث تأثر فعليا ؟؟؟ أخوي طلال كل اللي كنت أتمناه و حبيت أطرحه أمامكم هي أن قرارات نادي الهلال قبل ما يتم البت فيها أتمنى يكون لنا رأي حنا يا لجماهير الهلالية والله إني مو طماع توجد أندية كثيرة جداً تعتمد على رأي الجماهير في عملية اتخاذ القرارات وكذلك كل اللي أتمناه إن أي لاعب هلالي يعرف إن هناك جماهير تهمها مصلحة نادي الهلال يعني على كل لاعب أن يحب أيده و جه و قفا إنه في الهلال و لازم يخلص للفانيله اللي قاعد يلبسها إذا أخطى نقول أخطأت و إذا أبدع نكافئه و هل هذا ليس بالتأثير الفعلي و انا قلت عن رابطة الجماهير الهلالية خلال الأسبوع اللي طاف شفت أكثر من موضوع كانت تطالب بطرح مشكلة رابطة الجماهير الهلال بس مرت المواضيع مرور الكرام و هل وجود رابطه حقيقة ليس لها تأثير فعلي ؟؟؟ كل اللي قلته أتمنى من إدارة المنتدى هي اللي تشرف على هذه الأشياء و تقوم بطرحها و البت فيها بشكل فعلي
فيه نقطه أحب أطرحها و أتمنى التفكير فيها بشكل جدي منك أنت و عطني رأيك و من إدارة الموقع و قول لي هل راح يكون لها تأثير فعلي أو لا
لو كانت عملية المشاركة في هذا المنتدى و الكتابة فيه بمبلغ رمزي حيث يخصص هذا المبلغ لدعم الهلال بعدة طرق هذا يبي لها موضوع ثاني بحيث نضرب عدة عصافير بحجر واحد أولاً نضمن معظم اللي راح يكتبون هنا يهمهم مصلحة الهلال و إلا ليش يقوم بدفع هذا المبلغ ( الله يستر لأحد يشب فيني )
ثانياً مو أكثر من شخص يبي يدعم الهلال بس ما يدري و شلون هذه طريقه لدعم
الهلال
ثالثاً يتم تحديد فئات للأعضاء مثلاً 50 عضو عادي يكتب و يطرح رأيه 100 عضو من فئة ب يكون له ميزات اكثر 300 عضو فئة أ و يكون لها ميزات اكثر
هذه المبلغ مجرد مثال و من الممكن يكون فيه فئة ممتازة بحيث يتم اتخاذ رأيهم في بعض القرارات
راح أسأل بعض الأسئلة مو تم قبل فترة عمل استفتاء للجماهير الهلالية في هذا المنتدى و طرح بعض الأسماء التدريبية هل تم فعلياً الاستعانة بهذا الاستفتاء ؟؟
احتراف نواف الحين هل تم أخذ رأي الجماهير الهلالية مع إني متأكد إن نواف يهمه رأي الجماهير بس وينا و وين القرارات ؟؟
وكثير من الأشياء بني نشارك فيها بس متى ؟؟ أتمنى قبل ما أسافر يا طلال .
هلا أخوي الصقر تسلم يا بعد حيي و الله يسمع منك و نشوف كل اللي نتمناه في هذا المنتدى .
تسلم لي أخوي سلمان مع إني ما راح أوفيك حقك و حق الأخوان القائمين على هذا المنتدى و الله يعطيكم العافية و إن شاء الله إن ربي أعطاني عمر و وقت لي موضوع عن ما قمت بطرحه قبل فتره لكي يتم الرجوع إليه إلا إذا ريحتني و طرحتهن أنت أكون لك شاكر.
و أسف على الإطالة مع تمنياتي بالتوفيق للجميع
والسلا م عليكم و رحمة الله و بركاته

بس عندي ملاحظه بسيطه .

ماتكلمت عن تكريم اللاعبين القدامى .

ياليت نكرمهم .

أرجومنكم التكرم بقراة موضوعي عنهم الليله .

ياقل مشاركاتك ياعواكيس ( بس هادفه ) لاتصير بخيل .

هلا أخوي J.A.J أتمنى تكون بصحه و عافيه يا رب
والله فيه أشياء كثير ما تطرقت لها لعدة أسباب متأكد إنها راح تمر مرور الكرام و بعد يوم أو يومين تلقى موضوعك في الصفحه ثمانطعش ما شاء الله المشتركين واجد و عيني عليهم بارده و كل واحد وده يقول اللي في خاطره

كل اللي أتمناه مثل هالمواضيع المهمه يا إدارة المنتدى ترزها في بداية الصفحة قسم الإعلانات يا يشوفون لنا حل و أتمنى من إدارة المنتدى هي اللي تنظم هذا الشي و تقوم بالطرح و التنظيم و أكبر دليل موضوعك مر مرور الكرام بسبب كثر المواضيع

أنا حطيت بعض النقاط و أتمنى رأي القائمين على المنتدى و رأي أخوي طلال و لا يهنون الباقين

و السلام عليكم و رحمة الله و بركاته

أخوي الغالي (عواكيس) ,,,

الحقيقه لديك افكار رائعه (ماشاءالله عليك) وخاصه اني اشد على يدك عليها وهي ( النقطه الرابعه ) اللي ذكرتها والتي تختص بنقل افكارنا وارائنا للاداره الهلاليه ,,,

حيث اني ذكرت في احد المواضيع القديمه واثرت هذه النقطه ولكن وقتها لم يكن الامير الرائع (بندر بن ثامر) متواجدا في المنتدى وداعما له , ولكن الان اصبح هذا المنتدى محط انظار لجميع الهلاليين بمن فيهم اداره الهلال واعضاء شرفه , فاياليت ان تنقل ارائنا او ترشيحاتنا سواء كانت بخصوص (مدرب او لاعب اجنبي ) او قضيه في البيت الهلالي , بأن يكون لنا رأي فيها وبعد ذلك تأخذ ارائنا للاداره الهلالييه وتدرس وتتخذ الاداره ماتراه مناسبا للهلال , فعلى الاقل تصل اصواتنا وتأخذ الاداره فكره عن ميول ورغبات الجماهير الهلالييه تكون يكون التبادل في الافكار والاراء واحدا ,,,

كما ان نقطه (الاستفتاءات) والتي اشرت لها هي نقطه مهمه نتمنى ان ترى النور ولتكن مثلا على المدرب مثلا ,,

حيث يتم التفاوض او اختيار (ثلاثه مدربين) من الاداره الهلالييه بعد ذلك يتم مناقشتها في الاداره الهلاليه مع اعضاء الشرف وفي نفس الوقت يتم نشر استفتاء في المنتدى من قبل اداره الموقع , وبتوجيه من الاداره الهلالييه على من ترغب الجماهير الهلاليه بأختياره من مدرب لفريقها بحيث يكون توافق من الطرفين الجماهير الهلالييه والاداره الهلالييه على المدرب المرشح لتدريب الزعيم ,,,

فنحن في عصر الانترنت , ولا ضرر في استخدام هذه الوسيله في نقل رغباتنا للاداره وهذا هو الاصل والهدف من انشاء منتدى هلالي وهو من خلال ايصال اصواتنا للاداره الهلالييه بالاضافه الى ايصال استفساراتنا , خاصه بما يثار في الاوساط الرياضيه من اخبار القصد منها التشويش على الهلال وجماهيره !!!!


ولا انسى ان انبه ايضا لما تفضلت ياغالي وذكرته انت والاخ الغالي (ولد المدينه) من الرابطه للهلال , وارجو ان تنظر لها الاداره الهلاليه بعين الجديه ,لما لهذه الرابطه دور في تحفيز واثاره الحماس في الجماهير الهلالييه خاصه والتي يغلب عليها طابع البرود ,من اجل اثاره الحماس بالتالي في لاعبي الهلال ,,,,

كما أحب أن أشكر الاخ الغالي على كل هلالي الاخ (طلال) على مايبذله من جهود كبيره في نقله لاخبار هلالنا الحبيب فمهما بلغت كلمات الثناء والشكر فلن توفي هذا الرجل حقه ابدا ,,,

كما أشكر لك حبيبي على اطراءك لي والذى لا استحقه كونه هناك من يوجد أفضل مني وكل الهلاليين مبدعين بمن فيهم انت ياغالي , والله يخليكم للهلال ويخلي الهلال لكم ,,,

والله يعطيك الف عافيه على تلك النقاط التي أثرتها والتي بالفعل تعود على الهلال بكل فائده وارجو ان ترى النور في اقرب وقت , كما اتمنى ان نرى الكثير من الافكار من جميع الاعضاء الهلاليين باءذن الله ,,,

وتقبل خالص تحياتي لك ,,,

كلامك سليم 100%

الاخ عواكيس تسلم يمينك ولله كلامك سليم 100/100

وانشاء الله الجميع جاهزين لاي شي ممكن يخدم الزعيم