بسم الله الرحمن الرحيم

السلام عليكم ورحمة الله و بركاته

كل عام و أنتم بخير بمناسبة قدوم شهر رمضان المبارك

أسئل الله أن يعيده علينا وعلى الأمه الأسلاميه بالصحه والعافيه يارب

(( معاناتي مع والدي مازالت مستمره ))

مادري من وين أبدا ومادري شلون أعبر عن حزني الشديد

طبعا أنا متخرج من الثانويه العامه ونسبتي مثل وجهي ماتشد الظهر

قدمت على الجامعات والكليات محد قبلني الأ كلية التقنيه ومالقيت الا قسم واحد الي هو تقنية كيميائيه

عاد الشكوى لله مافي الا قسم واحد وأنا يالله نجحت في الكيمياء الثانويه وبصراحه دخلت علشان أبوي مايزعجني

المهم درست سنه وماتوفقت فيها وجلست عاطل 4 شهور بدون وظيفه يجيني الخناق من الوالد و أتحمل

وكل ما أروح عند أصدقائي يرفض أروح مباريات للهلال يرفض كل شي ممنوع

طبعا أكثر حضوري لمباريات الزعيم على حساب أصدقائي و انحرج منهم كل شوي وهم دافعين

واذا عطاني فلوس عطاني 10 أو 30 ريال << حسيت أني بنقالي

طبعا الفلوس الي يعطنيها يذلني فيها ومت من القهر وصرت ما أخذ ولا ريال واحد منه

ومن قرادة حظي اليوم خذت سيارته ورحت لمشوار مع اخوي ورجعت طبعا قبل لا أروح أستأذنت منه

وهو وافق قال خلاص رح بس لاتطول قلت له أبشر

ويوم رجعت للبيت الا اشوفه قدامي نزلت من السياره وعطيته المفتاح ودخلت البيت

مادريت الا اسمع صوت ابوي خناق قلت بس الله يستر لايكون أحد مات ولا شي

المهم دخل عندي قالي أنت سربوت و بهيمه ليه تصدم على سيارتي

قلت له يابن الحلال و الله العظيم ماصدمت لو أني صادم كان قلت لك

سبحان الله ماركز على سيارته الا يوم أنا أخذتها ؟؟

ويخانق ويخانق ويذلني على المعهد الي هو مدخلني فيه

ودي يخانقني لحالي مو قدام الناس في الشارع << تحطمت شخصيته

بصراحه كرهت الدراسه كرهت كل شي بسبته

بس أنا متحمل علشان أمي والله ودي أسحب على المعهد

و أدخل العسكريه وأصرف على نفسي وعلى أهلي << يكره العسكريه

بس الوالده رفضت وقالت لو تترك المعهد ماراح أسلام عليك

عاد قلت لازم أشوف لي وظيفه مؤقته لين أتخرج من المعهد

وقررت أني بتوظف مسائي حارس مستودعات أو حارس أمن << ونعم الطموح

بغني نفسي وبغني أهلي معي

أأأأأخ بس متى تمر السنه ونص علشان أرتاح و أفتك من العيشه الي أنا عايش فيها

وش رايكم أسحب على المعهد و أسجل في العسكريه ولا لا ؟؟؟

تحياتي لكم أخوكم سعوووود

رايي انك تتصل على استشاري في مثل هالامور وتقوله كل شي ,, مشكله بينك وبين الوالد او احد من اهل بيتك لاتجاهر فيه عند الناس
والله يحفظه ويخليه لك ويطول بعمره

إقتباس الرسالة الأصلية كتبت بواسطة مجنون الزعيم(9) رايي انك تتصل على استشاري في مثل هالامور وتقوله كل شي ,, مشكله بينك وبين الوالد او احد من اهل بيتك لاتجاهر فيه عند الناس والله يحفظه ويخليه لك ويطول بعمره

بأذن الله راح أتصل عليهم

وصدقني أخوي ماكان ودي انزل الموضوع لي سنتين وأنا على هالوضع .!

اللهم أمين وشاكرلك ع المرور

إقتباس الرسالة الأصلية كتبت بواسطة مجنون الزعيم(9) رايي انك تتصل على استشاري في مثل هالامور وتقوله كل شي ,, مشكله بينك وبين الوالد او احد من اهل بيتك لاتجاهر فيه عند الناس والله يحفظه ويخليه لك ويطول بعمره

وانا من رأيكـ اخوي مجنون الزعيم (9)

اخوي
Cosmin Olaroiu الله يصلــح احوااالكـ وييسرها لك من عنده

إقتباس الرسالة الأصلية كتبت بواسطة F.C.H ** الله يعينك وانا اخوك والله يهدي ابوك الاسلوب هذا الي يتعامل فيه ماهو بالاسلوب الصحيح لو انه يجيك بالكلمه الطيبه والاسلوب اللين افضل بكثير .. العصبيه والسب ماهي التربيه الصحيحه ابد .. لو منت انسان عاقل والحمد لله كان انحرفت او سلكت طريق غلط وماشيت اصدقاء السوء وزدت الطين بالله . نصيحتي لك كمل بالمعهد ولا تعصي الوالده الله يخليها لك ولا ابوك حتى عشان ربك يرضى عليك ورضى الله من رضى والديك. والطيبين وفاعلين الخير واجد هنا وبكل مكان وبإذن الله في احد يقدر يساعدك .

اللهم أمين ومشكور ع نصيحتك أخوي

والله يجزاك خير على كلامك الحلو

سعدت بمرورك

إقتباس الرسالة الأصلية كتبت بواسطة عطـــارد : محزن جداً أخي سعود ما ذكرته .. لـ علك تكون أكثر تفاؤلاً في أن اباك يريد لك خيراً .. لـ عله خانه الأسلوب ولـ علك تُحسن به الضن .. ربما هناك أخطاء تقوم بها ولا تدرك انت تلك الأخطاء .. ربما ارى ولعلك تعذرني في ذلك أنك لا تعلم ماذا تريد ؟ ماذا تهوى وتبدع فيه ؟ تواصل معي على الخاص , ربما نجد لك فرصة عمل وفيها تطوير .. على أن لا يكون هذا طموحك النهائي وعلى أن يكون لديك أهداف و أن تعلم ماذا تريد ! : لـ علك تركز على نفسك .. مهاراتك .. ماذا تحب أن تكون ؟ .. ماذا تريد أن تكون مستقبلاً .. ودعك من أبيك فـ هو يريد لك كل خير .. وصدقني أنا أب , والأب حتى لو خانه الأسلوب فـ نواياه دائماً في كل خير لك .. : بارك الله فيك وانا قلبك .. ورزقك نية صادقة و همماً عالية .. :

ماتقصر يالغالي على كلامك الحلو الي يدل على طيبة قلبك

الله يجزاك الجنه يارب

الف شكر لمرورك

أنا أشوف ما وصلك الوضع هذا والألفاظ هذه في الشكوى إلا كثرة الضغط اللي تولد الإنفجار على رأي شيخ الفيزياء إسحاق بن نيوتن..

الوضع السبب فيه تلاقي مو والدك فقط ولكن البلد كلها ترا فيها مشاكل نفسية كثير ولو تشوف من حولك راح تلاقي كثير وقارن نفسك بآخرين يتعامل الأب معهم بالضرب والحرق والتدعيس وقتها راح ترضى بوضعك الحالي وصدقني يوجد أناس تعاملهم مع أبناءهم سيء للغاية وأنت مشكلة والدك بسيطة وهي أنك تحاول تبني جسور من التفاهم معه وما تحاول تخلي في العملية كرامة بينك وبينه؛ على الأقل والدك يحاول إنك تتعلم وتصير رجال؛ يوجد غيره يدمر حياة أبنه ويخليه فاشل بالقوة.. أتمنى لو أنك سمعت حلقة أمس في إذاعة القرآن الكريم عن المشاكل الأسرية راح تجد أن مشكلتك شيء تافه بالنسبة للمصايب والبلاوي التي تم عرضها في البرنامج وما خُفي كان أعظم.

الله يفرجها عليك آخوي

ويخلي لك آمك وابوك ..

ونصيحتي لك كمل المعهد ..

وربي بيفتحها عليك ان ششالله ..

مجنون الزعيم معه حق
مثل هالأمور مو كل طق كلمتين بالكيبورد صار مخول بالإجابه
مسآئل حسآسه جداااااا
المهم اللي بقولك ياه
أبوك أبوك يظل أبوك ويخاف عليك ولا تقدر تنسى التعب عشانه يصارخ
تجيني زمان نفس هالوضع عصبيه من الوالد
أجيه أدخل عليه وبوسه على الراس وشف كيف يتغير الوضع
الوالدين لو صار منهم ما صار المفروض يبقون أغلى ما عندك
الله يوفقك وييسر أمرك ونسمع منك علومـ(ن) طيبه عنك وعن أبوك

أسسسحب كـلآمي

والي كآتبه الله لك بيصير
وبالتوفيق لك اللهم أممييييييييييييييييييين

قَالَ رَسُولُ اللهِ صَلَّى اللَّهُ عَلَيْهِ وَسَلَّمَ : (مَنْ أَصْبَحَ مِنْكُمْ آمِنًا فِي سِرْبِهِ ، مُعَافًى فِي جَسَدِهِ ، عِنْدَهُ قُوتُ يَوْمِهِ ، فَكَأَنَّمَا حِيزَتْ لَهُ الدُّنْيَا)

تأمّل هذا الحديث للحظات..
لو نظرتَ إلى نفسك قليلاً..

وجدتَ مكاناً تتلقى فيه العلم.. و غيرك يتمنى ذلك..
لديكَ أصدقاء.. و هناكَ من لايرغب به أحد..
لديكَ أم.. و هناكَ من عاف الحياةَ دونَ أمه..
لديكَ أب.. و هناك من يتمنى ظلّ أب..
تسكنون في منزل.. و هناكَ من يقطن الرصيف..
وجدتَ دواماً مسائياً.. و هناك من ليس باستطاعته أن يعمل..

لماذا لا تُحسن الظنّ في والدك.. فلربّما أراد أن يُخرجَ رجلاً يعتمدُ على نفسه..

سأحكي لكَ قصة..
جلستُ مع رجلٌ في الخمسين من عمره قبل أيام..
حكى لي قصته مع والده و كيف جعل منه وإخوته رجالاً بنوا أنفسهم بأنفسهم..
يقول.. في بداية حياتي استدنت من والدي 500 ريال (سلف) على أن أعيدها له بعد مدة..
فاشترى بها سيارة (هايلكس)..
و أصبح ينقلُ العمّال بعد المدرسة ظهراً من مكان عملهم إلى مكان إقامتهم.. ليتناولوا الغداء ثم يعيدهم مرة أخرى..
يقول: فاجتمع لدي مبلغٌ كبير بعد مدة بسيطة.. فاستطعت تسديد المبلغ لأبي و توفير الباقي..
والآن هو رجلُ أعمالٍ ناجح.. و يدعو لأبيه الليل و النهار..
و لوالده حكمة في هذا عظيمة..
فالصقور من عادتها إذا أتاها طائرٌ صغير.. تقوم برميه من اعلى الجبل..
فإمّا أن يعتمد على نفسه و يطير.. و إلا يسقطُ فيموت..

تذكر أنه سبحانه منحك القوة لتعمل.. اعمل في أي شيء..
و لاتتكبر على العمل.. انظر لأثرياء العالم..
كيف وصلوا إلى الثراء..!؟ عملوا في أحقر الأعمال في أعين الناس..
لكنّهم لم يعيروا أحداً اهتمامهم.. فالذي ينظر للأمام و يستشرف المستقبل..
لايهمّه مايقول الناس عنه..

وفقك الله.. و اعذرني على الإطالة