الـمـشـاغـب ينضم للجيش السعودي ويحصل على رتبة مناضل شهيد أول ..! - صفحة رقم 4 - نادي الهلال السعودي - شبكة الزعيم

فيش مفصول · #46 08/12/2009, 02:06 AM

موضوعك

بكل صراااحه نقرأ عليك السلام

يالله ياشبااب ادعوا له ولا بعد هذا الرد قسم انت رايحن فيها

إقتباس


	الزبدة كان يقول لولده إذا نادوك تحارب لاتروح والله الديرة ماهيب مكتوبه بإسمي

إقتباس


	خل اللي الديرة مكتوبة بأساميهم يرسلون عيالهم يحاربون

عاد اذا اختفيت مساامحينك الشبااب وندعي لك بتفريج

الـمـشـاغـب · #47 08/12/2009, 03:38 AM

نـــــــ15ــــــمر
هلا وغلا ميتو المغامر

أما عاد مواضيع مبهمة؟ وش عاد أوضح من المكتوب؟

نقطة العصبية القبلية كتبتها واضحة لأنها تستاهل يكتب فيها مواضيع مو مجرد أسطر ..!
على العموم شاكر لك تواجدك يا روح المجلس العام

ذآيب
هلا ومرحبا بالغالي الذايب

القصة ما لها أي هدف .. مجرد فضاوة وكتبت اللي كتبته ومن خاف سلم

شكراً لك هالتواصل الحلو يا ذايب يا مايع يا صعلوك

<< فاهم سدح الميانة غلط

الـصـخـرة
هلا وغلا أبوصالح

أشكرك على الاطراء .. بس صدقني الموضوع ما قصدت فيه شي لا تنكبني

ملاحظ أني مزودها هاليومين وبديت أخورها .. بس عاد مو مثل متابعة اللي تسب الحكومة

<<

شاكر لك مرورك العذب يا غالي

GoldenEngineer
هلا مرحبا قولدن إنجنير

أنا قايل لكم أني كاتب الموضوع سريع سريع

لكن بما أنكم مسوين فيها الفتيان الذين يحجّرون .. فـ راح أقول لكم أن أخوي كان ذكي ورحنا به جامعة الطب في أمريكا

وهذا اسم الجامعة University of Arkansas for Medical Sciences
يالله عاد ولا نفس

يعطيك العافية على المرور

ابو اسامه الحكمي
هلا أبو أسامة .. دوم هالضحكة

ما تكلمت عن الجيش .. تكلمت عن نفسي بس .. لذا لزم التنويه

شكراً لمرورك يا أفندم

مَاهِينُورْ
هلا وغلا ماهينور هانم

الله يسلمك .. بس وش قصدك بالحمد لله على السلامة؟ شكيت بنفسي

الله يرد لكم غاليكم ويفرحكم برجعته بالسلامة ورجعة كل الجنود من هناك منتصرين بإذن الله

شكراً لك .. مجرّد مرورك يكفي حتى لو ما كان عندك إضافة

رنـــــد
أهلين وسهلين رنــد أخت وجدان

بداية ردّك راح تكبّر راسي وأشوف نفسي صدق ترى

لكن شكراً لك على العموم

بالنسبة للنقاط اللي تطرقت لها في الموضوع ما أظن الحكومة غافلة عنها .. بالعكس ذي تعرف كل شي حتى نوع السروال الداخلي اللي يلبسه الجنود

بالنسبة لردك في أولاً .. أقول أن كلامك فيه من الصحة الكثير .. هم صحيح يعرفون استخدام السلاح بحكم الدورات والتدريب اللي خذوه .. لكن بالنسبة للمواجهة فأظن خبرتهم فيها ما تتجاوز مشاهدتها في الأفلام .. هذا غير تخطيط الضباط الأحرار اللي ودانا في ستين داهية !
يخططون وهم ما عندهم خلفية بالمناطق الجبلية وكيفية القتال فيها ..!
عموماً بعد ما تلقفنا في أمور الدولة الداخلية أقول لك شكراً على ردك الجميل .. لا هنتي

ريكيلمي
هلا وغلا ريكيلي هلا إياد يا بعد روحي ويوزري وبطانيتي

أدق على جوالك كذا مرة وألقاه مقفل .. عسى المانع خير؟
المهم هلا بك وولكم باك ولا تقاطع مرة ثانية

وشكراً على تشريفي بردّك والاطراء

Mr.Marwan
هلا وغلا حبيب ألبي مستر مروان .. يا بعد كل القصمان

من بعد ما سمعنا صوتك هذاك اليوم وأنا أسهر الليل كله

صوتك عذااااب .. جننّي غربلني هبّل لي

الله يجزاه خير أبومقبل اللي سمعني صوتك .. يا لبى الصوت وراعيه

أتمنى أبومقبل يعيدها لأن هذي عاداته يجمع بين راسين بالحلال

معلش سحبت على ردك .. لأني تذكرت صوتك ونسيت العالم وكل هالناس

RO7_ALHILAL
هلا بروح الهلال وروحي أنا كمان

أنت فاهم يا بعدي كل شي .. أنت لو ما تفهم الموضوع راح أحس أن الغلط في الموضوع مو فيك

وراي ماسك غزل هاليومين مع أشناب المجلس؟

بديت أشك في وضعي بصراحة

المهم مشكور يا بعدي على المرور الجميل .. لا عدمتك يا شنب

Mr.pHp
هلا وغلا مستر فب

ووجهك أبيض يالغلا ..
شكراً لك على الرد ولا هنت يا ذيبان

شـــذى
أهلين وسهلين شذى خانوم

أي حكمة وأي خرابيط ترى بديت أصدق جد

وش رايك يا شذى بما أنك واصلة تخلينهم يحطون تحت اسمي حكيم المجلس؟ والله بأطلع كشخة

نجي للجد ..
صحيح ان الحال ما يسرّ .. لكن الحمد لله الأمور في الغالب أفضل .. يعني الإيجابيات في هالبلد أكثر من السلبيّات ( فيما عدا الفساد الإداري ونهب الثروات ) ..!
لكن نقول الله يصلح الحال ويلطف بنا

شاكر لك مرورك شذى ( عليها السلام )

سكب
هلا وغلا مستر سكب أخضر

لا ما فيه رتبة عقيد أول

الله يعطيك العافية على مرورك الأخضر يا الواصل

<< بشّر ؟ عساك طاق أمها سواليف مع بندر بن ثامر بالجوال؟

بطلة

هلا ومرحبا بطلة سريلانكا

صدقتي .. كثير من البزران يهايطون باسم القبيلة ووش سووا وهو من هو ولده و و و ..
ولو جينا نشوف وش سوّى هو والا أبوه .. نلقاهم صفر على الشمال في المجتمع ..!
خلاص عهد القبايل والحروب والتفاخر ولّى ..
زمان كان القبيلي عيب يشتغل بعض الشغلات .. والحين نلقاه في كل شي شغال ولا هو بعيب لأن الزمن تغيّر وحنا لازم نغيّر تفكيرنا ونترك الكلام اللي يفرّق ولا يجمع ..!

بالنسبة للكشف الطبي .. والله روحي اسأليهم ليه يكشفون

أذكر يوم قبلوني بالجامعة وجيت أسوي الكشف الطبي قال لي الدكتور ارفع ثوبك

قلت له يا دكتور مو معنى أني محتاج للكشف تروح تستغل حاجتي وضعفي

قال وهو معصب .. احترم نفسك أنا دكتور محترم ومتزوج وعشان أثبت لك أني ما أقصد شي خذ ورقتك وعليها توقيعي بدون كشف

خلصنا الصفحة الأولى

دوق فليد · #48 08/12/2009, 04:28 AM

أخس عليك يا سلطان ليه التشنيع هذا في السلمون..!!
مو عشانك ما تنتمي للسلمون فتحتقرهم وتنزل من قدر غزواتهم وتاريخهم المُشرف..!!

جميل أن يحب المرء أرضه ووطنه والنبي صلى الله عليه وسلم كان يذكر حنينه واشتياقه لمكة ولكن كان ينبذ العصبية القبلية ويندد بها وآخى بين سلمان الفارسي وصهيب الرومي وبلال الحبشي وأبو بكر القرشي رضي الله عنهم أجمعين وصنعوا هؤلاء حضارة إسلامية وفخر للإنسانية.

مقابله لم تنشئ قبائلنا "الذين كانوا قطاع الطرق" في العصر الحاضر إلا المآسي لأمتهم والمصيبة كمية القصائد والمدح التي تقرأها وتسمعها وكأننا أضفنا وقدمنا للحضارة الإنسانية ما يبرر هذا الفخر..!!
كيف لو كان من قبائل أولئك الشعراء توماس أديسون أو غاليليو أو لابلاس أو أبو شغب..

بالمناسبة:
توماس أديسون: مخترع المصباح الكهربائي.
غاليليو: صاحب نظرية دوران الكرة الأرضية حول الشمس في القرن السادس عشر.
لابلاس: رياضي فرنسي شهير.
أبو شغب: المجاهد الكبير حامي حمى الديار السعودية وفخر قبيلة سلمون وما جاورها..

لأجــل الوعــد!! · #49 08/12/2009, 06:43 PM

إقتباس


	منذ نعومة أظفاري وأنا شخص هادئ مسالم كسول وصاحب مبدأ .. ما عمري دخلت في مشكلة مع أحد حتى لو أخذ حقي

هـــــــو أنــــــت متأكد أنك تتكلم عن نفســـــــك ولا احد ثاني ولاأنـــا غلطانة ولا كيــف حالـــــك وش أخبـــارك

والـلـه يامشاغبوووه قلبت الموضوع براسي يمين يسار مني مناك بس برضو مافهمت

جـــد بالنسبة للعصبية القبلية العالم وصلوا للقمر وحنا من قبلية الفلاني وقبيلة العلاني

للمتعصبين وإذا يعني صرت من القبيلة الفلانية المشهورة ببطولاتها يعني اللحين دخلت الجنة

إقتباس


	خلصنا الصفحة الأولى

عقبال الصفحة الرابعة

سلمــــــت يمنــــــاك ورجلاك وكتفاك..

وســــــــــــــلم لي على الست منــــــــــال

عريب عبدالله · #50 08/12/2009, 07:31 PM

كنت بأدور بالصفحات رد لعقد أو قريباتها للتأكد من مصداقية القصة بس ما لي وقت أقرى الردود

للحق سواء كانت القصة من بنات أفكارك أو مقتبسة الفكرة فلمساتك فيها واضحة ومميزة

وللحق أستمتعت كثير بالطرح والرموز الموجودة خصوصا خدمة الوطن اللي ياما أكلنا من ترابة

كانت رمزية مميزة في هالمقطع لكل عاطل عن العمل لايملك واسطه

سلطان للحق يجي منك يالشين

وكثر من هالقصص المتميزة والأسلوب الجميل

يعطيك كل العافية كاتبنا المبدع<<شرايك بالترفيع

بالحب والإشراق

عقد الياسمين · #51 09/12/2009, 12:22 AM

هلا والله بـ مستر سلطان ،

ماشاءالله عليك يا شهيد الأمة و الوطن العربي والسعودي

سبحان الله نجيت عشان تُكمل جهادك

بصراحة قصة رائعة سلمت (أناملك )

مع أن الكلمة ما تصلح لك أنت بالذات

فيها أفكار كثير خصوصاً "السلموني" و فكرة المشاركة في الحرب عند البعض

لا تحرمنا

أمـيـر · #52 09/12/2009, 11:27 AM

مآشآء الله عليك عندك أسلوب رآئع في الكتآبه..

...
قصة فكآهيه..ومفيده في نفس الوقت ..

يعطيك العآفيه أبو شغب ..

دوكـ..>

هلالية والعز عنواني · #53 09/12/2009, 07:56 PM

عســــــــاكـ ع القوهـ سلطان

قصــه ساخره فيهـا الكثيــر من حالنــا اليوم بأسلوب مميزورائع لآيجيده غيركـ ~.
ومـا شاء الله كل يوم تثبت لي أنكـ الاسطوره الساخره (الاوحد) متعوب عليها<<يعني الوحيد

لآن ماقريت لك موضوع ولآرد الا وافطس ضحكـ

بانتظار جديدكـ يـ أبو شغب

مرآة الهلال · #54 10/12/2009, 04:05 AM

استمتعت بهذه القصة كثيرا..

فعلا لك مستقبل كبير..

أتمنى أن تحافظ على موهبتك الجميلة..

وان تنميها..

دمت بود اخوووي سلطان..

وسجلني ضمن المعجبين بقلمك..

الـمـشـاغـب · #55 12/12/2009, 04:21 AM

السلام عليكم ورحمة الله وبركاته
قبل أن أبدأ الرد على ردود الصفحة الثانية اسمحوا لي أرد على اللي شرفوني
برسايلهم في خدمة راسلني .. لأن مساحة التوقيع غير كافية والرد بالدفعات متعب ..
هذي باقي الردود ورسائل الاستهبال ما بأرد عليها لأن لا قيمة لها ..

صبآح آلورد : أنا بخير الحمد لله .. وجواب سؤالك هو : ( لا ) بالعكس هالشخص متميز وما أشوف أن سؤالك في محله وما لاحظت هالشي ولا سمعت عنه .. وشكراً لك على الرسالة

عاش مخهم : وأنا والله أتشرف بحبك وهـ بس دوختني

طيب ياخي شاركنا وخلني أشوف يمكن صادقين بيننا شبه وأنت ما تدري

لكن ترى أختلف معك في عنوان الرسالة لأنك تحكم وأنت بعيد .. والا الصدق والله محد درى عني

ليت كل الناس خلن مع خليله : نتيجة المباراة كنت متوقعها 5 - 0 لكن ما الله أراد أقولها لك قبل نهاية المباراة .. على العموم ألف مبروك يالمصري الفوز .. والأشقراني ما تنلام فيه .. أنا مثلك لو الود ودي أصير له بكلة ناشبة في شعره الأشقر

سلامى <<<< : لا والله ياخوي ما فيه أحد يقرب لي بالزعيم لا عضو ولا عضوة ..

شكرآ : هلا بك .. وشلون تقول الله يجزاك خير ع الخدمة .. ثم بعدين تقول ما أعجبتك؟ تناقض صح؟

على العموم برّد قلبك بس خفّ عليهم .. ترى الخدمة للانتقاد البنّاء مو تصفية الحسابات

المهم شكراً لك وجزاك الله خير

السلام عليكم . : وعليكم السلام هلا بك . بالعكس الموضوع مو تقليد . هي خدمة موجودة من زمان وأنا مسجل فيها من 2006 تقريباً قبل ما أجي للمجلس العام .. وحنا حطيناها حتى نعرف نظرة الآخرين لنا سواء كانت ايجابية أو سلبية !
سلطان الخير من قدك اليوم كلن يردد اسمك : ههههه هلا يالغالي

شفت كيف الصدفة؟ توي قبل شوي مخلص ردود الصفحة الثانية وخدمة راسلني .. وقبل ما أرسل جيت أنت أرسلت

يالله ردينا وش تبي زود؟ يا لبى قلبك

موضوع +18 : يالغالي كنت أدري أنه بيتسرّب . وكنت أصلاً ناوي أحط بالعام لكن حتى لا أبلش بمثالية البعض خليته خاص للي يطلبه . أنا عارف بعض اللي سرّبوه ولمين وصل خصوصاً من يدعي المثالية

ما راح أتكلم بالأسماء لأن الوضع مو مهم عندي . لكن بما أنك تطرقت له أحب أقول أن مثل ما الموضوع تسرب لهم وقروه وهم يعرفون وشو يتكلم عنه فإن أخبارهم أصلاً تتسرب هالمثاليين . ولو دريت أن الموضوع وصل للإدارة هم أول من راح يتضرر ..! ( لا تأمنن سرّك امرأة )

------------------------------------------

هلالي معالي
هلا بالهلالي الغالي العالي

أشكرك على هيك مرور ظريف خفيف حلو مثلك

وان شاء الله تكون استانست بهذاك اليوم بأطلق مقهى في الرياض

marsal
هلا وغلا مرسال

يعطيك العافية قلت اللي ما قلته بصراحة ..
الغريب أني أشوف ناس تقول أننا نبالغ وأن الجيش ما فيه مشاكل ..
والله أن ودنا أن ما فيه مشاكل .. وما نتكلم إلا من الحرقة اللي في قلوبنا

ما تكلمت إلا من أشياء أعرفها من أشخاص في العسكرية وأتمنى إن هالأخبار رغم تواترها غير صحيحة ..!
شاكر لك مرورك الرائع كالعادة

وترى الصخرة معجب بك

عقـل الهلال
يا هلا وغلا بـ عقل الهلال

ما يهمنا بماضي اللي بالجيش .. لأن مثلهم مثلنا فيهم الصالح والطالح .. الحين من حقهم علينا ندعي لهم بالنصر ..
شكراً لك .. وفال الله ولا فالك يالشين

الشيهـانه
هلا وغلا بأم دلة

تجملتي يوم غيرتي يوزرك لأني كل ما شفته تجيني خرمة للقهوة والقدوع

بالنسبة لجيرانكم .. الله يوفقهم وينصرهم ويسامحهم على الرعب اللي كانوا يسوونه لكم .. إن شاء الله انهم الحين مرعبين الحوثيين

بالنسبة للشرط .. لا هو حقيقة مو بهارات ولا تكشينة

يالله مشكووورة يالشيهانه على الرد الجميل .. ثانكيوات

ماجد مقبل
هلا وغلا حبيب ألبي وروحي

إلا أنا اللي أروح ليّ معسل فراولة داخل براطمك

بالنسبة لشطر المتنبي للأسف ماليش في الشعر عشان هيك ما عرفت وش الرابط

الشخصية في القصة كانت ساذجة .. ولا لها دخل بالعفة والعقل ..!
على العموم أنا بخير .. أنت كيف الحال؟

شكراً كثيراً يا شريان قلبي الأورطي

الكلاسيكي
هلا وغلا الكلاسيكي

أول مرة ما أشوفك متأخر كالعادة عن الركب

غريبة أول مرة أعجبك .. لأنك أول واحد يقول لي كذا .. أخبرهم دايم أعجبهم

<< ويستغرب ليه ينقال له شايف نفسه

تصدق أنك أول مرة تعجبني بعد؟ لأنك أول مرة ما تتأخر .. وأول مرة تفهم الأشياء غير الواضحة

الصدق .. أنت كثير تعجبني .. صح مو دايم .. بس كثير واحمد ربك

وإن شاء الله كلنا نبات ظالمين غير مظلومين

شكراً لمرورك وبالنسبة لمنال الحمد لله ما وصل اسمها لوزارة الداخلية والا كان نمت في الحوش مو بالصالة

مطيع

يا هلا ومرحبا بـ وتين قلبي

وش أجمل من أنك تحارب لأجل منال؟ على الأقل بتستفيد منها شي وتحس بمتعة الحياة إن كسبت قلبها

المهم ترى منال اسم من خيالي لا يعني لي شيء .. فلا تصدّق أنت واياه وتبلشوني

بالنسبة لكلامك والمجال اللي تتكلم عنه .. أشكرك لكن منب فاضي لك أنت واياه

الصدق أني أكتب لنفسي لما أحس أني أحتاج أكتب موضوع أو رد أروح أكتبه وأحس براحة نفسية

والا لو هي عليكم والله منتوا بأكبر همي خخخخخخ

عموماً .. مرورك وردك الجميل شرح صدري .. لا خلا ولا عدم

abo_nasser
هلا ومرحبا ألف بأبوناصر

ايه القصة؟ كل الحلوين رادين وراء بعض؟ لا ما أقدر على كذا أنا .. خقيت على طول

مرورك ولو هو قصير .. بس يفرح القلب شوفة يوزرك بأي موضوع .. وشلون عاد بموضوعي؟

لا عدمتك يا أحلى فوفو

INN✿CENCE
هلا ومرحبا عسيريه مصرقعه

وش هاليوزر؟ اسم كاميرا أتوقع .. أو ممكن ماركة غسالة الظاهر

يا والله عندك واسطة ما شاء الله .. مرتين غيرتي يوزرك ولا عندك بأطلق شنب

الله يعطيك العافية على المرور .. وبالنسبة لجواب سؤالك هو ( لا ) لأن ما عمري شفت بنت اسمها منال

صقر فيصل
هلا وغلا صقر فيصل

عاش من شافك يالمسافر

اللهم آمين .. ويعطيك كل عافية يا بعدهم على المرور

...][ هلالي الخبر ][...
هلا ومرحبا هلالي الخبر

وأنا شهادتي فيك مجروحة بعد موضوع لبنان والعيد اللي جبته بالأعضاء والحكومة

بالنسبة للنشاط بعد العرس .. فالسبب أني للحين معرس بنسبة 3 / 7

يعني مغترب والله المستعان

متشكر أوي على هيك مرورك وشهادة مجروحة

dal3_uae
هلا ومرحبا بـ دلوعة الإمارات

ليه تغسلين يدك؟ بنتك عملتها وتوسخت يدك ... أنا وش دخلني؟

عاد تدرين؟ عندنا عيب أحد يقول لأحد كذبت .. بس دامك قلتي جذبت وهي تختلف عن كذبت راح أتغاضى عن هالكلمة

القصة مالها جزء ثاني

أما بالنسبة لرجل الأعمال وكلامه عن بدايته من الصفر .. فمع احترامي أشوف كل رجل أعمال دايم يقول أنه بدا من الصفر

رجل أعمال بدأ تجارته من عشر سنين من الصفر ووصلت ثروته للميارات ؟ شي غير طبيعي

لو قلنا ربي وفقه في المحل الصغير كم بيدخّل منه في السنة؟ وكم بيدخّل خلال عشر سنين؟

بعض الأشياء ما ودنا ندخل فيها .. الله يرزقهم لكن لا يستغفلوننا ويضحكون على هالشوارب

على العموم .. شرّفني كلامك .. وألف شكر على ردك المميز

وتراي بمناسبة نهاية العام الهجري مسامحك ولو أنك ما أخطيتي .. وأقول لكل من أخطأ بحقي :
( انقلعوا الله يسامحكم ولا يبارك بهالوجيه )

I B R A H E M
هلا وغلا أبو خليل حبيبي

أنت اللي مرورك بطل يا بعدهم ..
وأشكرك على الإشادة اللي أتشرف بها

وأعلقها على قفى أبوناصر عشان أشوفها كل دايم

لا هنت على المرور يالغالي

شوق الكويت
هلا ومرحبا شوق الكويت

والله مدري هو أسلوب جديد والا لا .. لكن اللي أعرفه أني أخاف من الكتابة بأسلوب جديد خوفاً من الفشل ..!
شكراً لك على الدعوة .. والله يتقبلهم شهداء وينصر أبطالنا في الجنوب .. اللهم آمين

انتهينا من الصفحة الثانية ولله الحمد

الهنوووف · #56 12/12/2009, 11:03 PM

وعليكم السلام ورحمه الله وبركاته

اهلين سلطانو

اميل للمواضيع المحبوكة باسلوب ساخر

ومااشاء الله عليك

تبدع بهالنوعيه

الشهداء كل مالهم يكثرون وماظن تغيير شي

الا كثروا الارامل واليتامي
الله يعين بس

الله يرحم الشهداء وينصر البقيه منهم

\

/
وعوافي يابش مهندس

إقتباس


	الزبدة كان يقول لولده إذا نادوك تحارب لاتروح والله الديرة ماهيب مكتوبه بإسمي
	خل اللي الديرة مكتوبة بأساميهم يرسلون عيالهم يحاربون

اعجبني هالمنطق

-->

الهنووف

كانت

هنا
ورحلت

اليزابيث هيرلي · #57 13/12/2009, 03:00 PM

سلخير سالنور

أولاً الحمدلله ع سلامة بابا سلطان وما يشوف شر أن شاء الله

<<< صز لا قالوا ماكل سلطان سلطان

<<< تتنجلد

وأحب أقول لبابانا وين الإجازة ولا زيادة الرواتب ترانا نتحرى

باك لأبو شغب.. والله يا سلطان ما حلفتن أمس كاتبتن لك ردً هذا طوله <<< مادتن لك يده

ومير يطير بوه بليس

راح وذهب مع الريح

لذا حلفت وقلت اشهد شهادة لو يجي جدي من قبره يقول أرجعي ياليز ياحفيدتي اكتبي ردتس على سلطان عشان احيا لا اعييّ

<<<< خاصة أن ظروفي الصحية تغيرت وتردت بين ليلة وضحاها

لكن هذا ما يمنع أني أقولك لازلت معجبتن جداً بكلمة (خضم ) اوووخس صايرن تعرف باللغة والفوصحى

وخلاصة الرد , يقولون أكل العيش ولا مقابل الجيش ..
وفي رواية أخرى ماعوّد شعيب أبو مروة يسيل <<< وينتس يا بقبقي

أتمنى لك حياة معطرة بأجمل احاسيس ليز <<<

<<< نمزح صح

الـمـشـاغـب · #58 15/12/2009, 03:16 AM

الردود على رسائل راسلني

وقبل ما أبدأ .. فيه رسالة كان فيها سؤال وللأسف أني مسحتها بالغلط ونسيت الاسم والسؤال

لذلك اللي ما لقى ردي عليه ليته يعذرني وحقه علي

ضب معه قلب : والله يا غلاهم ما عرفتك والا كان رديت عليك بالتوقيع .. لكن أتوقع الأسلوب أسلوب قطعة قلبي عبيط

كان كتبت اسمك لأن الموقع آمن ولحد يشوفه غيري .. وترى ما أذكر سالفة الجحش من أنا قايلها له

لكن على حد علمي أني قايل لك أنك تعلم أبوك أن يزكّي عنك بـ 2.5% من أعضاء جسمك .. ( زكاة بهيمة الأنعام )

سلطان الخير من قدك : العفو يا غالي .. وبالعكس والله لازم أرد لأنكم شرفتوني برسايلكم وشرحت صدري كثير لا عدمتكم

وبالنسبة للسؤال .. انا في الشرقية مغترب وما أجي الرياض الا الويكند ( أحياناً بعد ) ..

*5 : ما لاحظت إلا منك ماشاء الله عليك أجل بهالمناسبة كنت أسجل خروج بهالوقت؟

نجي الحين لكلام هالشخص .. وأقول لك لا تلتف لمثل هالكلام أو يضيق صدرك لأن الغيرة تسوي أكثر من كذا .. المواقف كثيرة تصير ولازم الشخص يكون واثق من نفسه وأنا والله أشوف من كلامك أن الحق معك ..!
ليت كل الناس خلن مع خليله : شي طيب اكتشفته من شخصيتك الجدية وهو أنك طيب .. بالنسبة للمضايقات والله أني رغم عصبيتي إلا أني إنسان بارد .. يعني ممكن تكون لي ردة فعل قوية وقت المضايقة .. لكن إذا ما دريت بالمضايقة إلا بعدين فآخذ الأمور ببساطة .. وعلى العموم منب من اللي يحبون الانتقام إلا على أشياء تضيق صدري ! بالنسبة لثانياً .. نعم يوصلني كلام أني كذا وكذا مثل ما قلت أو غيره من هالكلام بس والله انه شي عادي عندي لأني ما أهتم لكلامهم لأن هذي هي طبيعتهم كلام في كلام .. والحمد لله ما انتقمت من أحد منهم ولا شوّهت سمعته ..
هذا بالنسبة لي أنا .. اما بالنسبة لك فترك المكان ما هو حلّ .. وإن كان فيه أي إساءة وكلام يصدر من أحد تقدر توصل الموضوع للإدارة .. وإن كنت مقهور فـ خذ حقك بأن تطلع عليه كلام مثل ما هو يطلع عليك والناس بتصدقك

المهم إن كنت تحس أنك تبي تتكلم بصراحة .. اكتب كل اللي بقلبك ومو لازم الأسماء وبكذا ممكن أفيدك وبرضه ممكن لا

والله يسعدك ويشرح صدرك

سؤال صريح .. : وعليكم السلام أنا بخير .. الجواب هو أني أحترمهم وعلى عيني وراسي لكن للأسف ما أثق فيهم سواء الجديد منهم أو القديم .. ليش؟ لأن أغلبهم وبكل صراحة ما عندهم أمانة وبس ما أقدر أزيد .. وأما بالنسبة للقراءة فأنا أقرأ للكثير سواء الردود أو المواضيع طبعاً الأسماء المميزة منهم حتى لو كانت جديدة .. وشكراً لك

صباح : هههههه رسالتك ما وصلت لأنك كتبت كذا ( <<< ) هالعلامات تروح بتعبك كله لما تجي ترسل .. بالنسبة لرسالتك فأشكرك والله على رفع المعنويات خصوصاً أني وقتها كنت متضايق

.. لكن الموضوع أنا متأكد منه وما تكلمت عبث ! وترى ما تضايقت إلا لما شفت الرسالة اللي خلتني أتكلم في الموضوع والتسرب اللي حصل فيه وإلا العلم عندي من قبل وما اهتميت .. لكن يكفي أني عرفت من هو قد الثقة ومن اللي ما يستاهل

.. أكرر شكري لك ولا عدمتك أنت وأمثالك

--------------------------------------

بريماكس
هلا وغلا بريماكس ضراس المحتلة

ولكم باك يالغالي .. ومسموح لا ترجع .. لأني مجرب الحجز مشكلة يسبب العجز

إن رجعت فمرحبا بك .. وإن انقلعت فـ محد درى عنك

لا هنت يا أبوياسر

إحساس خالد
هلا ومرحبا بأبوعسل

كلامك على عيني وكتفي .. كذا تخليني أخق معك ومع بنتك عسل مدري ولدك

أشكرك على ذوقك وأخلاقك الحلوة .. لا خلا ولا عدم

زعيم بطل أسيا
هلا وغلا زعيم بطل آسيا

موب لازم تفهم شي .. أهم شي تقرأ ومع الوقت راح تفهم

‏Mr.RęLǻҗ
هلا ومرحبا مليون مستر ريلاكسووهـ

كويس أنك قلت عنه حلو .. بس موب لازم تخربها وتقول مقتطفات سامجة يا السامج

المهم أنك شرفتني بحضورك الحلو .. ثانكيوات آد الدوونيا

كان هنا
هلا وغلا كنكون القشطة

لا تسوي فيها تعرف أخوي أكثر مني يالماصل ..

المهم لا تحجر مرة ثانية لأن أخوي في جامعة الطب بأمريكا .. أما كليات الطب فهذي مخلينها لكم يا طعوس السعودية الله يحوم كبودكم مدري وشلون أنا صابر على العيشة بينكم

شمـ v.i.p ـوخ
مرحبتين ومسهلتين شموخ في آي بي

ما يستفاد معاد صرت أكتبها .. لأن يوم جربتها كانت الردود تقتبس ما يستفاد وتسحب على أم القصة

وقتها ندمت وقلت لو أني كاتب ما يستفاد في موضوع بدون قصة كان أبرك .. بس يالله الدنيا تجارب وانتوا فيران تجارب أجرب عليكم

<< أدري والله أني ما أستحي بس احتسبوا الأجر لأني أحبكم

شكراً لك على مرورك الجميل ..

الزعيم إبراهيم
مرحبا وهلا وغلا بالزعيم أبوخليل

ووجهك أبيض يالغلا .. أتشرف باعجابك بالموضوع

الله يعطيك العافية وتعال دايم سيّر علينا

ام متعب التميمي
هلا ومرحبا بأم متعب

وش فيها شهيد ويكتب موضوع؟ ما تؤمنين بكرامات الشهداء والصالحين؟

بالنسبة لمقصد الشاعر ..
فهو يقول أنه أول مرة .. طرق الباب على حبيبته .. قالت من أنت؟ قال : مجموعة إنسان

أقصد قال لها : هذا أنا ... قالت : أجل طس وانت ما تعرف الحب لأنك فرّقت بيننا ..
فهم المقصود وجاها بعد سنة يدق الباب .. قالت من أنت؟
قال : افتحي, اللي بالباب أنتي ... قالت : ايوه كذا عرفت الحب ( لأنك أنا وأنا أنت ) ..!
يعني : يوم سألته من أنت؟ قال : أنتي ! ( يعني أنا روحك ) ..
وهـ تعبت من الشرح وانلحست وأنا أشرح .. لا أبو اللي يجيب لكم قصايد مرة ثانية

المهم أتمنى أنك تحللين هالتعب وتفهمين

وشكراً لمرورك

الفارس الهلالي 999
هلا ومرحبا الفارس الهلال

دوم هالضحكة .. وشكراً على المرور

Black N White
هلا والله وغلا بالخوال

أنت إنسان ذكي ما شاء الله .. وأسلوبك في الرد مميز وأعجبني

أشكرك على إعجابك .. وسجل اعجابي بك بعد في ورقة وعلقها ببرواز في الغرفة

أحسن ما فيك أنك ترفّع بي بقوووة .. وهذا أكثر ما يعجبني في الحياة

أجل أكتب قصص روائية؟

مهيب بعيدة ترى

لو أكتب رواية واحدة وأنشرها ما لك علي يمين لأسفط بنجيب محفوظ في باطي اليمين وأطلع شكسبير من قبره وأحطه بالباط الشمال وأخليهم يعرفون حجمهم الطبيعي ويشمون عرق جبيني وأنا أكتب الرواية

<< اللي انقرف يقفل الصفحة لأني ممكن أزيد الجرعة في الردود تحت

عموماً ألف شكر يا غالي على إضافتك الجميلة .. وفعلاً المثابرة أهم من الذكاء .. وبإذن الله تفتك من حركات المراهقة وتبطل تفحيط بالجامعة وتتخرج

<

البرنـــــــس كاكا

هلا وغلا برهان ماجد مقبل

منب معلق على ردك .. بأعلق بس على اللي ضحكني بقوة في ردك

إقتباس


	الزبدة كان يقول لولده إذا نادوك تحارب لاتروح والله الديرة ماهيب مكتوبه بإسمي خل اللي الديرة مكتوبة بأساميهم يرسلون عيالهم يحاربون

ههههههههههههههههه وربي أنه صادق

الله يسعدك على هالرد

شكراً كثير يا حلو .. لا عدمتك

هلاليه محترفه
هلوتين ومرحبتين بالمحترفه

مدري ليه ودي أبارك لك بفوز الهلال بالخمسة

أول مرة أحس ببنت تشجع الهلال أكثر مني

طبعاً تجي بعدك زعيمه قديمه

لكن إن شاء الله تتزوجن وتعتزلن ويكون مصيركن المطبخ وبئس المصير

ألف شكر على المرور

كلي على بعظي هلالي
هلا ومرحبا وغلا بكلي على بعضي

أنت الأجمل من الجمال كله يا ورع

<< فاشل بالرومانسية

الله يعطيك ألف عافية على مرورك يالورع يا الطعس يا أبوحنيس يا سافل

<< ما يعرف يمزح

بركان أزرق
يا هلا ويا مرحبا يالله حي بركان أزرق

ودني لك .. ثم جيبني لك .. صاحبي يا حبني لك

إذا كنت من جدك تبي القصة تدرّس للجنود .. فيا والله أنك منافق كذاب خخخخ

أما إن كنت تمزح ( متخامل ) فهذا كويس ويخليني أترجى منك الخير

المهم منب قاطع واشتقت لك .. لكن المسن ما عاد أدخله وإن دخلته يكون دخولي ظهور دون اتصال ومشكلتك أنت بعد تحط ظهور دون اتصال .. وعشان كذا ما اشوفك يا حشرة

شكراً لك ولا تغيب عن عيني .. يا حبيبي

>satam<
هلا وغلا ومرحبا بسطام

يالغالي ما فهمت وش اللي خربته بالجو؟ إذا قصدك أني ما استرسلت وقطعت الخاتمة .. فأظن الموضوع كذا أفضل من أني أطيل فيه لأني حبيت توصل الفكرة بدون ما يملّ القارئ المعفن ..
على العموم .. تسلم والله على هالمرور ولا عدمناك

انتهينا من صفحة 3 .. وبقي صفحة 4