مبارك عليكم الشهر

موقفين على الطاير ودّي اعطيكم تفاصيلهن

الموقف الاول لي انا شخصياً... والموقف الثاني لأخ عزيز

الموقف الاول

قبل كم سنة... اكثر من عشر سنين

تعرفت على واحد من عيال المليونيرات... ابوه غني مره... من اغنى اغنياء المملكة

ابن عائلة مشهورة بكثر الفلوس ( ماشاءالله )

المهم

كانت علاقتنا عادية جداً...

بس يزود فيها الميانة بحكم اننا ننتمي الى عائلتين بينهم نسب ورحم ومن نفس المنطقة تقريباً

وكانت علاقته بأبوه ( مو ذاك الزود ).. رغم انه بكر امّه... وعنده اخوان كبار من ابوه

لكنه من زود الدلال صار يحس انه لازم يسيطر على كل شي حواليه

ابوه في الشركة مقسّم المناصب على اخوانه حسب العمر

والولد بحكم انه صغير في السن ماعطاه ابوه منصب ( قيادي ) حتى يكبر شوي ويصير مؤهل

والولد قافلة معه ومايبغى يصير موظف عادي عند ابوه

حاط راسه براس اخوانه الكبار... ويبي يصير مدير مثلهم بالشركة

المهم

الولد هذاك اليوم دخل للبيت و( شياطينه ) تسبقه

وراح وسوّى فيها فيلم مصري... واخذ شنطته وضف اغراضه وطلع من البيت..

وقال لأمه : قولي لأبوي اني ماني بحاجة فلوسه... نفسي عزيزة وما ارضى بالاهانة

ورمى عليها بطاقة الصراف ( اللي فيها مئات الالوف )

وطلع وامه ( تشاخر ) من الصياح

ومادريت الا وهو يدق علي ويقول ابيك ضروري

قال لي : انا طلعت من بيت اهلي ومتهاوش مع ابوي وابيك تفزع لي هاليومين

طبعاً انا مو موافقه على هالشي اللي سوّاه... لكن طالما الرجال استفزع بي لازم اكون قدّها

شوفوا وش سويت :

رحت استاجرت له شقة عزاب

يومياً اجيه وقت الغداء والعشاء ومعي الاكل وكله من المطاعم

وكم يوم ويوم ياخذ سيارتي ويروح فيها مشاوير بالساعات وانا منطق احتريه

طبعاً هو طلع من بيت اهله على رجوله ( يقاله مايبي من ابوه شي حتى السيارة )

ووصلت الامور الى درجة اني قمت اعطيه مصروف يومي

المهم

ثلاث شهور على هالحال

حتى جاء ذاك اليوم ورحت للشقة ومالقيته

دقيت عليه اشوف وينه... رد علي وقال لي انه رجع لبيتهم وتصالح مع ابوه

وان ابوه حطه نائب مدير لأخوه الكبير

وعطاه سيارة لاند كروزر جديد بقراطيسه

وسيارته القديمه ( هوندا ) رماها بالحوش حق بيتهم ( للذبّان )

انا طبعاً كنت فرحان بشكل كبير.... الحمدلله ان الازمة انتهت بين الولد وابوه

رحت انا وسلّمت الشقه وسددت مصاريف الايجار وكل شي

المهم

الولد من هذاك اليوم ( ساحب علي ) ولاحاول ابد يتصل او يسلّم

بعد ست شهور تقريبا

صار لي حادث سيارة وراحت سيارتي تشليح

اتصلت عليه وعاتبته شوي على القطاعة

وقلت له اني صار لي حادث وان السيارة ( انعجنت ) وراحت وطي

وطلبت منه طلب

قلت له : عطني سيارتك الهوندا اللي مرميّه بالحوش هاليومين... حتى اقدر ادبّر لي سيارة

قال لي : ابشر والله عيوني لك.. اتصل بي بعد ساعة علشان اقابلك

تدرون عاد وش توقعت ؟؟

توقعت انه يهديني اياها هدية... بحكم معروفي عليه وقت الشدة

مليونير ولا هي اكبر همّه

وغير كذا...ثلاث شهور ( ساكن .. آكل .. شارب .. نايم ) على حسابي

هذا غير سيارتي اللي كانت تحت رجله طول اليوم

توقعاتكم وش سوّى ؟؟

اقسم بالله العظيم

من هذاك اليوم اللي كلمته فيه... الى اليوم ( هذا وجه الضيف )

عطاني الخامس وركبة مهيب صاحية... ولايرد على اتصالاتي

قلعتي... انا اللي استاهل


الموقف الثاني

واحد من الاعزاء ( شهم )

راح انتداب للشرقية لمدة سنة بحكم ظروف العمل

وتعرف له على واحد من زملاءه هناك منتدب مثله

وكان معه شهم الى ابعد درجة

استضافه معه في السكن

وتنقلاته للدوام رايح جاي على سيارة ( الشهم )

وكل اسبوع ياخذه معه للرياض يشوف اهله على سيارته

وحتى الى درجة ان ( الشهم ) احياناً ماكان يبي يروح... لكن علشانه يمسك الخط

وفي تلك الفترة انضم لهم واحد ثاني في الشرقية

و( الشهم ) ماقصر معه ايضاً

وصار ياخذهم للرياض كل اسبوع على سيارته ( محفولين مكفولين )

وينزل كل واحد منهم عند باب بيته

واذا بغى يرجع للشرقية... يمر عليهم وياخذهم من ابواب بيوتهم

المهم

خلص الانتداب والشباب رجعوا للرياض

وصاحبنا ( الشهم ) صار يتواصل مع اخوياه الاثنين

لكنه للاسف صار يلاحظ منهم جمود وبرود وعدم اكتراث

حتى انه في كل مره يراجع نفسه ويحاسبها... لايكون غلط على احد فيهم

لكن وصلت الامور انه قبل زواجه بيوم اتصل عليهم يؤكد عليهم الحضور

وكلهم كانوا يؤكدون له انهم اول الحاضرين

وللاسف طنّشوه وماحضروا الزواج... واكتسف انهم ذيك الليله متكّين في استراحة

وساحبين عليه هو وزواجه... وهذي نهاية المعروف