دعاية ( أترضاها لأختك؟ ) << لا يا شيخ أقنعتن :D - صفحة رقم 4 - نادي الهلال السعودي - شبكة الزعيم

الـمـشـاغـب · #1 09/06/2009, 06:29 AM

بسم الله الرحمن الرحيم

السلام عليكم ورحمة الله وبركاته

صبحكم الله بالرضا والعافية

بهالصباح فيني حرش غير طبيعي وودي أتهاوش إلكترونياً

لذلك ما لقيت إلا أكتب هالموضوع اللي فاقع كبدي من الوريد إلى الوريد

الموضوع فكرته جاتني قبل ما أدخل النت وقلت خلني أكتبه جلدي جلدي قبل ما يصير
مصيره مثل الموضوع اللي من زمان في بالي وللحين متعيجز أكتبه

اللي عنده أعراض حمل أو حومة كبد أنصحه لا يدخل

لأني اليوم ناوي أصير ليبرالي

يالله لا يكثر خلوني أنزل تحت أشوف موضوعي

<< مسكين هالفيس طاح سوقه

( أترضاها لأختك؟ )

قبل كم يوم وبينما أنا أشقلب القنوات منبطحاً من شدة الفراغ العاطفي

شفت دعاية
على قناة الـ mbc مسويتها مجموعة السريّع عنوانها " أترضاه لأختك؟ "

الإعلان للي ما شافه كالتالي :
حرمة مع السواق عند الإشارة كاشفة وجهها وتقرا كتاب .. ومنزلة الدريشة ..!
وقف جنبها اثنين من صعاليكنا السعوديين

ويقولون لها عطنا وجه يا حلو

هي من زود الشرف اللي مقطعها قالت لا حول ولا قوة إلا بالله ورفعت الدريشة ..!
وكان مكتوب في الدريشة " أترضاه لأختك؟ " .. قروها الشباب واستحوا على وجيههم

الإعلان حلو وشي جميل أننا نشوف مثل هالاعلانات التوعوية في قنواتنا الفاسدة

لكن اللي أنا جاي أتكلم عنه .. مدري وشو, تصدقون نسيت؟

أتكلم عن هالنصايح والتوجيهات اللي ما راح تأثر في الشخص إلا لما تكون مقنعة له ..!
مو تجيني فرحان لي بكلمتين وتترزز بها في الرايحة والجاية ولا تدري هل أنا اقتنعت والا لا

في الإعلان أعلاه .. ممكن يجي صعلوك من هالصعاليك ويقول " أنا أختي ما كشفت وجهها ولا نزّلت الدريشة عشان تقول لي أترضاها لأختك " !!

متى نقول للشخص أترضاها لأختك؟ لما تكون البنت محتشمة وتمشي في حال سبيلها وجاء أحد يتعرض لها ..
هنا نقول له أترضاها لأختك أن يتحرش أحد بها وهي محترمة ومحتشمة !!

أما وحدة كاشفة وجهها ومنزلة الدريشة رغم علمها أن فتح الدريشة يضرّ بمكيف السيارة

هنا نقول اسمحوا لنا .. ما عرفتوا تقنعوننا

لا يجيني أحد ويقول أن مذهبها يسمح بكشف الوجه .. لأني بأقول والله لو مذهبها يسمح لها بكشف كل أبو شي موب الوجه بس

المفروض تتغطى وتعرف أنها تعيش بين ناس متعطشة ما شافت خير

بعدين اسمحوا لي .. يعني لو أحد يشوف وحدة منسدحة أو منبطحة -اختر ما شئت من الحركات المغرية

- قدامه وش تظنون بيفكر فيها؟
بيفكر أنها على نياتها وقاعدة تاخذ حمام شمس؟

أكيد بيظن فيها ظن سيء لأنها وضعت نفسها في محل شبهة

وهنا ما نقدر نقول له أترضاها لأختك ..!

نرجع لمحور ارتكاز حديثنا

أقول إن بعض الناس فيهم خير .. ولكن ما يعرفون ينصحون ..!
مثل اللي يبي ينصح المغازل ويجي يقول له " من يزني يزنى به ولو بجداره "

ويكمل الشرح ويقول: مثل ما أنت تغازل بنات الناس بيجي يوم ويغازلون خواتك أو بناتك ..!!

كلنا نعرف أن المغازلة والمعاكسة حرام .. طيب انصح بالتي هي أحسن ..!
عندك القرآن والسنة ذكره بالأدلة وذكره بحرمة هالشي وذكره بالوعيد

مو أحسن مما تقول هالكلمة اللي ما لها دليل من القرآن ولا السنة ؟
هو عشان تابعي قالها أو قصة جرت ما ندري عن صحتها مثل قصة " دقة بدقة ولو زدت لزاد السقا " تروح تنشر مثل هالكلام؟

منطقياً الكلام هذا ما يقبله العقل ..! الله عز وجل يقول " ولا تزر وازرة وزر أخرى "
فكيف تجي أنت وتستشهد بقول تابعي غير معصوم من الخطأ ؟

على كلامك ذا بنصير نشكك في كل أسر العالم .. أي واحد يغازل بنشك في أخلاق أهله

وهذا الشي مو من الإسلام في شي

لذلك رجاء يا أحبتنا ويا مطاوعتنا ويا من سار في درب الناصحين .. اختاروا جملكم
اللي تدخل القلب وتقنع العقل ..!
ولا تصيرون مثل ميسرة بن عبدربه وهو أحد وضّاعي الأحاديث المكذوبة عن الرسول صلى الله عليه وسلم اللي كانت حجته
يوم سئل عن السبب : " رأيت الناس انصرفوا عن القرآن ، فوضعتها أرغّب الناس فيها "
حسن نيته واهتمامه بالدعوة ما نفعته لأنها كانت خاطئة وما كانت على نهج النبي صلى الله عليه وسلم ..!

يالله عاد أنا طفشت

ممكن توخرون شوي ولا عاد أشوف أحد يردد كلام ما يدري وش أصله ووش فصله أو وش هو من لحية

اليوم فيني حرش غير طبيعي وللحين أحس ودي أكتب موضوع ثاني

يالله منب فاضي لكم .. فارقوا