الهنـدي ومـديره المدرسه انا والشباب والبنات فالسوق - نادي الهلال السعودي - شبكة الزعيم

T U R K I _ 15 · #1 27/04/2009, 03:33 PM

سلام سلام سلام تحيه الاسلام الوه الوه الوه شراب برتقان ...
لاحي لاحي .. طاح سلاحي .. بين المجرا والمفتاحي .. <<<<<<< جيل الاتاري كودهم يتذكرونها خخخ

حدا رجا .. بدا رجا...ياحبه اللؤلؤ ..
كم على عيدن مضى .. سبعه ايامن تمام
حاديه وباديه .. واحلى الزهر معاديه ..<<<<<<<< جيل المصاقيل مصاقيل مهب عصاقيل يا مال العمى في عين العدو . لعبه بنوتيه ..لانها تنعد على الاصابع مهب على المسامير

اخباركم سيداتي وسادتي ..مخدتي ووسادتي .. ان شاءالله مستانسين فالعطله ..؟ قهر ما جاء غبار هالاسبوع <<<< مؤظف ووده يعطل بس ما فاليد حيله ..

دام انكم فاضين وما وراكم الا السهر

.. بذكر لكم مواقف صادفتني في الايام الماضيه..

الموقف الاول : توني طالع من الدوام الساعه 22 ليلا <<<<<< اجل 22 صباحا

راكب الموتر ووقاعد افكر اروح للبيت ولا الاستراحه واخذت واحد دقيقه <<<<<< هندي
واخذت دقيقه من الوقت للتفيكر وين اروح له .. وكان وقتها مباراه الهلال والنصر اللي فاز فيها النصر واحد واحد

المهم وبعد ما سويت قرعه بيني وبين نفسي رحت للمقهى <<<<<< ما راح للبيت ولا الاستراحه ههههههههههه
دقيت على واحد قلت الوعد المقهى وما قصر جاء لانه مهب راعي مباريات عشان كذا فاضي ما عنده احد .. وانا متجه للمقهى .. وقفت عند الاشاره طبعا ووقفت لانها حمراء<<<<< بالله ..!

واذا بيميني واحد معه مرسدس قديم وفيها ثلاث شباب منزلين الدرايش اشكالهم واضحه من ...

اللي جنب السواق لابس غوايش وحاط ربطه بشعره ومطلع كتوفه لابس فنيله مشجره ساده هههههههه
( لابس علاق ) واللي ورى حاط بكله ورديه وشباصه بشنبه لا تصدقون ما عنده شنب خخخخخ
المهم فتحت الدريشه بسمع وش يسمعون الا واسمع سلمولي على اللي سم حالي فراقه بصوت هيفاء وهبي جلسه بالدرعيه <<<<<<< بشير شنان

الا على طاري بشير شنان مريت من مدرسه بنات ابتدائيه احد جدرانها مكتوب بشير شنان ملك العود الرنان المفروض يكتبون عائشه المرطى هههههههههه
المهم التفت علي ويناظرني بطرف عينه ونزلت الدريشه وفيه حزره غير طبيعيه مدري من وين جايه <<<<< مسوي ما يدري من وين جايه الحزره هههههههه ( من الشاطر يفهمنا وش معنى حزره .. )

القروده شفتها تتعلق بكتوفه تصدقون شفت الفهد وهو يلاحق الغزال خخخخخخخخ
ياخي الناس للحين فيهم قذاره.. ياخي الموس بريال احلق ابطك

..واذا تخاف يحكك ابطك ياخي مر لك عماره الصبح وبتلقى باكستاني يليص خذ لك من خلطه السمنت وحطها بابطك وحلق واذا جاك مشق خذ لك فلاش وكلوركس واخلطهن واعصر عليهم ليمون قبل ما تنام واشرب حلتيته ومره زينه للبطن

.. واللي قاهرني لابس سلسلال

يازين الحلاوه بشعره ..الحلاوه حقت سيقان الحريم مهب الحلاوه حقت البزارين هههههههه .. اشوف المخلل رخيص هالايام هههههههههههه
واحد ياكل شاروما والثاني ياكل حب قرع يا جعل راسك القرع يا الاثول <<<<<<< مهب حاقد عليهم ابد ..
ولا وماسك الفنتاته بيمناه جعله الكسر <<<<< فنــتاتــه مهب فتــاته ..! ههههههه
المهم واشغل على ابن اخي ياسر الدوسري <<<<< يالبى قليبه والله يخليه ويحفظه ..
واشغل لاخر شي (طولت عليه)
وقدمت الى الايه (وجاءت سكرت الموت بالحق ذلك ماكنت منه تحيد ) .. والشيخ اسلوبه خيالي في قراءته لهذي الايه ... ما شاء الله عليه ..الكافر لو يسمع هالايه اقل شي بيوقف دقيقه يسمع ..
طولت عالصوت عنادن فيهم هذا شي والشي الثاني قلت بشوفهم بيقصرون عالصوت الاغاني عندهم ولا لا .. بس ما حولك احد خخخخخ
ترى كلامي كثير بس وقتها كل الاحداث مرت في نص دقيقه او اقل ..
ولعت الاشاره خضراء واشوفهم يطالعوني كانهم يقولون وش هالمريض والله المرض بقلوبهم
والله يا هو لزقه ذا .. صعب الفكه منه ذا .. بسطر جبهته كفن ذا .. واجلده بالعجرا ذا ..
.<<<< هذا للسواق خخخخ
خشمه تسنه رفرف جمس .. ما عمره بالزكمه حس .. ودي اعطي خشمه بوقس .. وشعره تسنه حزمه خس <<<< هذا للرومنسي ابو بكله ورديه هههههههههه
وجهه قوطي صلصه ذا .. الشباصه كبر جوالي ذا .. وراسه كبر المركى ذا .. ريحه مروح خايس ذا .. <<<<<<< ابو سلسال خخخخخ
بعد ما عرفتكم عالشباب اللي بيرجعون القدس .. تركتهم وخليتهم ورحت الحق عالمباراه

الموقف الثاني دامنا فالبطيخ والجح هذا واحد من الشباب مسوي حادث جعله ما يشوف مكروه وقبل الحادث كان شخص عاقل بالغ فاهم بعد الحادث صار شخص مرجوج بالغ سطل يا حبي له دايم العب عليه ههههههه اذا جيت اعشيه اوديه لفوال الطايف فول قلابه وتميس وشاهي حليب واذا جاء دوره مطاعم التحليه تشتكي المهم هذا الشخص قاعد يقراء موضوعي بس ما يقدر يرد هههههه لانه ما يدري وشهو الانترنت .. المهم هذا الشخص يده ما فيها حاسه اللمس

بسبب الحادث المهم مالكم بالطويله دخلنا مقهى شيشه طبعا الحمد لله كلنا ما نشيش بس رحنا نشوف مباراه دوري ابطال اوروبا .. ولازم تطلب شيشه ولا ما تجلس .. المهم طلبنا شيشه ومسوي خوينا فاهم قال صديق جمررررر وجاء الهندي وجمره .. ساله خويي الجمر حار .؟.. الهندي لاهي بالرأس .. يحسبه يمزح قال الهندي لا بارد قال خويي كيف جمر بارد

.. قال الهندي انت ما يشوف هذا نار

قال خويي الا انا اشوف نار بس جمر بارد

. . قال الهندي وهو يضحك شيل جمر شوف حار ولا بارد

.. جاء خويي وشال الجمره بيده

.. الهندي ما صدق انتا مجنون انتا ما فيه انسان انتا شيطان كبير
المهم الهندي شال شيشته وجمره ولا شفناه عقبها ههههههههه .
طبعا شالها بضع ثواني ولا كان خبقت يده

بس والله احساس فاليد ما فيه

عاد هالموقف ولا قضيه فلسطين

.. هذا في سوق سيتي ماكس او سوق نسيت اسمه بس الزبده فيه كلمه بوينت خخخخخ ( اللي عالدايري الجنوبي ) المهم عند الكاشير فوق فيه علامه ان هالصف للرجال والصف الثاني للحريم .. فيه لوحه فوق الكاشير تبين هذا الشي .. المهم جيت انا وعلى نياتي خخخخخ .. واشوف اللوحه تدل على ان هذا الصف للرجال ..واشوف الحريم صافاتن فيه

.. واشوف الرجال صافين في سرى الحريم ..

يعني الدعوه محيوسه ..

<<<<<<< مثل عيونه
انا قلت بصف عنادن فيهم بكاشير الرجال وهذا حق من حقوق الرجل .. كل يوم طالعين حقوق المرأه وحقوق المرأه

.. ازعجتونا ..الا على طاري المرأه .. <<<<< يا كثرك ..

سمعت قصه مدري هي حقيقه ولا كذبيه ان احد العلمانيه او احد الكفار سال مسلم .. قال ليش المرأه عندكم ما تسوق .. قال احترام لها وتقدير لها وخوفا عليها .. قال بس مهب لهذي الدرجه

.. سأله المسلم .. بوش رئيس امريكا يوم كان رئيس من كان السائق له ..قال سائقه الخاص .. قال لماذا سائق خاص لرئيس امريكا . قال احتراما له وخوفا عليه .

. .. ياليت يصحح المعلومه اذا كان فيها غلط .. المهم نرجع لسالفه ..المهم انا وقفت في كاشير الرجال اللي صافين فيه الحريم. جاء رجل الامن .قال لو سمحت هذا للحريم .. قلت انت تشوف .

. قال ايه قلت تشوف العلامه هذيك واشرت عليها .. ناظرها وقعدت يضحك قلت وشفيك .. قال يا رجال مشها قلت شف انا منيب طالع من السرا هم الغلطانيين مهب انا .. وجاء واحد مطوع ملتحي قرب لمي

قال ما تستحي

قلت ليش

وش انا مسوي قال تصف مع الحريم قلت لا تقعد تبربر علينا شف اللوحه هم اللي جاييين عندنا

.. قال والرجال جايين عند كاشير الحريم

.. قلت اذا طبوا فالنار نطب معهم

.. سكت شوي قال الله يهديك قلت الله يهدي الجميع

.. تركني وجت بنت ومسويه نفسها واثقه تجي وتسقط علي ومعها بنت ثانيه قالت وش يبون ذولا واقفين بسرا الحريم ههههههه قلت لها يا بنات هذا سرا الرجاجيل شوفو اللوحه يا جعل عيونكم الغمص شافوها سكتو ولا تكلموا ابد هههههههههههه عاد الحريم واغراضهم هذا يوم عادي اجل لو انه يوم عيد

.. وتجي عجوز مصريه معها عربيه وبزر مدري هو صدقي ولا كذبي بس شكله صدقي لان بخشته فيها شوكولاطه هههه ..وتجي وراي وتقعد تنحنح كل شوي الفت اذا تنحنحت .. تقريبا خمس مرات ..على نفس الحركه

.. قلت فيتس بلغم

تراك ازعجتينا تبين مويه قالت انتا ما بتفهم ازاي بوتصوف مع البنات

.. قلت يا بنت خخخخخ بقهرها لانها عجوز

قلت تشوفين هازيك اللوحه قالت ايه قلت وشي قالت هذا صف الرقال قلت اوص ولا تقعدين تنحنحين وتكحكين ,,تسنها مؤظفه جاي من اجازه مرضيه

,, المهم خلصت شغلي وانا بصف البنات والله يا السرا يطول بس والله فله هههههههههههههههههه

عاد هذا خاص للبنات يالله عاد يالشباب اقلبوا وجيهكم وروحو اكتوبو ردوكم هههههههههه
كنت نايم ورن جوالي ورقم ثابت قلت بنفسي لا يكون الدوام

.. والمشكله ان رقم الدوام مخزن عندي

.. تعرفون الواحد جايه اتصال وهو نايم ما يدري وش السالفه ..ما رديت ودق ثانيه وثالثه ولا رديت

.. ويدق رقم جوال قلت شكلها سالفه خطيره واقوم وارد على الجوال.. الوه .. صوت ناعم سلام عليكم

.. انا وعليكم السلام .. هي ..معك مدرسه .... الابتدائيه للبنات انت فلان الفلاني بنتك فلانه

.. قلت لا والله انا اخواها..عسى ما شر.. قالت ابد البنت ما فيها شي .. قلت وشوله داقين .. قالت هي فيها شي بس.. قلت اخلصي انا على اعصابي <<<<<< من زين الاعصاب والله من البرود بس ابيها تخلص ..

قالت في وحده من البنات خفست عين اختك بالقلم ما تدري.. قلت ماتت

.. قالت لا ..قلت سلام عليكم ههههههههههه امزح
قلت العين سليمه قالت حمراء ومنتفخه قلت اوف <<<<<< وده يسولف ما صدق يكلم صوت ناعم وهو توه قايم من النوم ههههههه قالت لازم تجي .. قلت يالله جاي .. اخذت اختي قلت منهي اللي داقه علي قالت المديره اثري خاقن مع صوت العجوز والحمد لله العين سليمه ..

اعتذر عالاطاله والبثاره

يالله عاد بردو قلبي بالردود ..

نشوفكم على خير ..
ذبحنا النامس فالمحلق ههههههه

القيصر رهيب · #2 27/04/2009, 03:55 PM

يشهد الله إني ما قهمت من موضوعكـ إلا سالفة صف الرجال
وسالفة أختكـ سالفة صف الرجال أنا أشهد إنك ذيب تخيل أنا
أسويها

ذاك اليوم كنت عند صراف في السوق و كل ما
جيت اصرف سقطت على حرمه وأنا مخفه ما أقول شي
أخاف إذا قلت لهن شي طلع لي واحد علماني يقول حقوق المرأهـ
في النهاية رحت لأمي قلت شوفي الصراف اصرفي منه كله
حريم يساقطون

الحاجة الأخرى / الحمدلله على سلامة الاختكم

وصدق من قال : الأذن تعشق قبل العين أحيانا

مستر. توركي لا عاد تكتب مواضيع حوسة مثل شوارع الدمام
ركز ركز الله يهديكـ وأنت تكتب

فَيْلَـسُــ زَمَانَهُ ـــوفْ · #3 27/04/2009, 04:28 PM

اححح يا عيوني والله يا عليك اسلوب زفت زفت زفت >>>> يبي يتسطر

يا شيخ رح للصخره خله يعطيك دوره في الأسلوب

عاد موضوع هذا شي بس السافة الأولى مافهمتهى

والحمد لله على سلامت اختك

F-C-Barca · #4 27/04/2009, 05:10 PM

ههههههههههههههههههههه والله اني ماقريتها كلها

ارسنال والهلال · #5 27/04/2009, 05:32 PM

والله يا انك تحب البربره كلامك واجد ما يخلص

بس اهنيك على سالفة الكاشير والله انك بطل تعجبني

لي عوده بعد ما اكمل عيوني صارت زرق

غــ.، الحب.، ــلا · #6 27/04/2009, 05:34 PM

إقتباس

الرسالة الأصلية كتبت بواسطة T U R K I _ 15


	قالت في وحده من البنات خفست عين اختك بالقلم ما تدري.. قلت ماتت.. قالت لا ..قلت سلام عليكم

ههههههههههههههه

فطسسسسست ضحك علىآ هالموقف!!

إقتباس

الرسالة الأصلية كتبت بواسطة القيصر رهيب


	يشهد الله إني ما قهمت من موضوعكـ إلا سالفة صف الرجال وسالفة أختكـ سالفة صف الرجال

يـشهد الله إنـ/ـي فهمت كلش

ترررركي ,إستمر على هالمنوآل

وخل كل ابو دآيم موآضيعك كذآ

باسكن روبنز · #7 27/04/2009, 05:39 PM

وعليكم السلام

بالنسبة للشباب الي شفتهم بالمرسيدس الله يهديهم ،وان شاء الله هالفئة تنقرض

صديقك حمد لله على سلامته والله يشفيه

وحمد لله على سلامة اختك . وي وي وي انت مع اي صوت حرمة تخق

هذه وهي كبيرة ومديرة وشخصيةرسمية، كيف اذا سمعت صوت بنوتة مايعة

بتروح فيها

تركي والي يعافيك مرة ثانيه بتكتب موضوعك حط لك عناوين جانبية وعناوين رئيسية

الف شكر على المواقف الحوسة يا بطل

الشوكاني · #8 27/04/2009, 05:40 PM

الموضوع طويييييييييييييييييييييل وان شاء الله كم شهر واخلصه

Fahad Al Sudais · #9 27/04/2009, 05:59 PM

الله يعين يابوناصر

<< مايقلد احد

الحين يوم انك تتلقف على الشباب راعين المرسدس .. ياخي اترك الدرعى ترعى

من حقهم يعيشون حياتهم في بحبوحة من العيش

وخويك اللي مسك الجمر ويسأل هو حار ولا بارد.. كان خليته يذوقه ويعلمنا

والسرى اللي بسنتر بوينت... تعجبني وخلك دايم كذا.. الحكومة معك

واخيرا

الينت اللي جرحت عين اختك.. لو اني منك كان طلبت القصاص.. بشرط اني انا اللي افقع عينها

مانيب قايل لك ( انقلع ) لأن تربيتي ( منزليه )

Blue Sun · #10 27/04/2009, 06:24 PM

هلا وغلا تركي ..

الا عـ طاري الشباب اللي بيحررون القدس ..

قبل يومين كنت باحد التسجيلات المو اسلامية ..

طبعا كانوا رافعين الصوت على اغنية رابح صقر ..
ويدخلون اثنين << بغيت اقول شابين بس واحد مو متاكد من جنسه ..

وخذ رقص وشكشكة داخل المحل ..

واحد منهم مكدش وشاد خصلتين من شعره وحاط عليهم اربع شباصات كل شباصه لون ..
ومعبي وجهه ميك اب لليل .. والله ان الزين بوادي وهو بوادي ..

يوم شفته قلت الحمد لله على نعمة العقل ولا وش يحد البقرة تحط ميك اب ..

والثاني البودي قارد بتاعه .. مع اني اتوقع العكس ..

يوم شفتهم تاكدت ان القدس رح ترجع وبقوة ..

والحمد لله على سلامة اختك ..
يعطيك الف عافية تركي على الموضوع ,,

الضحى · #11 28/04/2009, 01:38 AM

موضوعك رشيق وفيه حكم تحت ستار الطرفة

لك كل الشكر على هذه الفقرات المتنوعة ...الحمدلله على سلامة أختك ...

ويحفظك ربي والحمدلله على نعمة العقل ..الله يديم الرجاجيل ...ويمحو الرجرجية ...

فقط ملاحظة :الذي أثر على موضوعك هو عدم التنسيق فقط ...