في ذمة الله ...! - نادي الهلال السعودي - شبكة الزعيم

الـمـشـاغـب · #1 24/04/2009, 03:21 PM

نعم , ماجد مقبل في ذمة الله بعد أن صلى اليوم صلاة الفجر في جماعة ..
فقد قال صلى الله عليه وسلم : " من صلى الفجر في جماعة فهو في ذمة الله حتى يمسي " ..!
<<

أتوقع محد منكم صدّق العنوان .. لأن ابن مقبل ببساطة قطو بسبعة أرواح ( وعسى عمره طويل )

أجل أحط ماجد بذمة الله بالعنوان وجنبه هالفيس (

) وتبون تصدقون؟

استفتحت هالموضوع بهالمقدمة اللي ما تبشر بالخير عشان أتكلم عن موضوع يرفع ضغطي ويمغص بطني

رجاء لحد يجي يستذكي ويقول أني راح أتكلم عن موضوع الإشاعات

الموضوع يختلف عن هالشي .. وجتني الفكرة بعد موقف حصل قبل يومين ..!
كنت ناوي أكتب موضوع وأنتظر إجازة الرقابة خصوصاً أنه مخصص لفئة +28

لكن فضلت أني أكتب هالموضوع وأجل هذاك الموضوع .. لأن مالها داعي أتوقف قبل ما أقول اللي بنفسي
عن هالموضوع ..!

كنّي قاعد أسمع أحد يقول اخلص علينا وقل لنا وش بتتكلم عنه

لذلك أحب أقول له انثبر يا مال البواسير والدود والبلهاريسيا

لا تحطمَن

الموضوع اللي أبتكلم عنه مدري وش أقول عنه .. بس أكيد عن شي يرفع الضغط

تقدر تقول انه عن التفاول بالشر ..!

واحد من العيال تزاعل مع وحدة من اللي يعرفهم ..!
في آخر كلامه معها قال لها : أنا خلاص متضايق ورايح الرياض بكرة وان صار لي شي فهو بسببك
والله لا يسامحك

باليوم الثاني خلى واحد يرسل لها انه صار عليه حادث وانه بالمستشفى

يلعن حريشه ما عنده وقت

مع كامل احترامي له إلا أن الغباء يكرم ان يكون داخل جمجمته الفاضية

لا والمشكلة انه زعلان انها ما دقت عليه تتطمن

والله لو هي بقرة ما صدقت هالحركة الغبية ..!

شخص ثاني
كل كلامه .. " فلانة سددت فاتورتي " , " فلانة حوّلت لي المبلغ الفلاني " , " فلانة أهدتني هدية بالقيمة الفلانية " ..!
والعيال اللي يسمعون له بعضهم تقوطر سعابيلهم ويقولون يا حظه , والبعض الآخر يضحك على هالشخص
لأن هذا مو موضع تفاخر

أعرف بعض الأشخاص من هالنوع .. يستغلون البنات بالطريقة اللي أتكلم عنها في موضوعي ..
إما يقول لها أنه صار عليه حادث وما يدري وشلون يصلح سيارته , أو يقول انه مريض ولا عنده تكاليف العلاج ,
وبعضهم يبيّن أنه متضايق وكئيب عشان تسأله عن السبب ويوضح لها انه مطفر ومحتاج فلوس بس ما يدري من وين يدبرها ..!
البنت طيبة وتصدّق هالأكاذيب .. ممكن تكون حالتها المادية جيدة وتساعده بدون ضرر عليها ..!
وممكن تكون هي نفسها أكثر حاجة للفلوس من هالشخص لكنها تحاول تدبر المبلغ المطلوب ولو بالسلف ..!!
وبعد كل هذا يجي هالاستغلالي ويتفاخر بأن فلانة تحبه وتحوّل له فلوس ..!!

شخص ثالث تعرّف على بنت عن طريق الجوال ..!
هالشخص من نفس طينة اللي فوق .. يعني استغلالي ويتفاول على نفسه كثير

المهم .. مرة قال لي أن ما عمره ندم على أي علاقة كثر ما ندم على علاقة مع هالبنت .!
سألته عن السبب وقال لي : ان عادته ان البنات يتصلون عليه , ( طبعاً أكيد قايل لهم ان حالته المادية صعبة )

المهم .. يقول ان هالبنت تموت فيه بس ما تدق عليه إلا يوم الأربعاء بس ..!
وعلى هالحالة أربعة شهور ..
إلين مرة سألها عن سر اتصالها بيوم الأربعاء طول هالمدة ؟!!
هنا صدمه جوابها .. وأقسم بالله دمعت عيني يوم علمني بجوابها

قالت له : أن فسحتها للمدرسة ريالين .. وتحرم نفسها من الفطور عشان تجمع العشرة ريال بنهاية الأسبوع وتشتري بها
بطاقة شحن بعشرة وتكلمه

بالله عليكم .. هل مثله يستاهل انها تحرم نفسها الفطور لأربعة أشهر عشان بس تسمع صوته؟

فيه مواقف كثيرة تقهرني لما أسمعها وكان ودي انكم تنقهرون مثلي .. بس ما ودي أطوّل

ودي بس تكون البنت أحرص على نفسها من نفسها وما تكون طيبة زيادة عن اللزوم ويستغلها شخص ما يستاهل ..!
وودي بعد ان يفكر أي خروف قبل ان يستغل البنت ويتذكر ان هالفلوس اللي ياخذها بدون أي وجه حق وبالخداع
والتفاول على النفس هي فلوس حرام ..
وأن يمكن ربي يبتليه ويحقق اللي تفاول على نفسه فيه ..!!

الموضوع كتب بشكل سريع لتسجيل الحضور .. حبيت أن يكون خفيف علي وعليكم

بيننا ان شاء الله بالموضوع القادم بعد ما تجيزه الرقابة

يالله الحين طسوا ... يا لبى قلوبكم

القيصر رهيب · #2 24/04/2009, 03:26 PM

شف يا أخي

الواحد لازم يكون صريح في حياته العلمية و العملية

يا أخي ليه أنت تقعد تتبلا عالعالم وأعرف واحد يعرف وحدة

يا أخي قل إنه أنت و خلاص

يعني شايفنا دلوخ ولا دلوخ يومك تعرف كل ذولا العالم اللي مسوين مع خوياتهم تسذا

ولا تستحي ..؟

ما استحيت من رب العالمين تستحي من أعضاء

إلى متى تتصنع المثالية .. ؟
أبسألك بالله ما تعبت وأنت تقعد تمثل علينا إنك مثالي ..؟
خلاص خلك على طبيعتك خروف منتهي خربان
صدقني أريح لك من الاصطناعية في الحكي

ما أقول إلا الله يهديك لطريق الحق بس
<< أعلمك وشلون تطيح تزبيد بمواضيع خلق الله يا الشين

وليد القحطاني · #3 24/04/2009, 03:27 PM

بروح وبرجع !!
مشكور سلطان

,
كنت بمشي بس شفت الموضوع قصير وبابخ فقلت خلني ارد سريع قبل الأقامة

أخوي قال وليد ماجد مات الحق , انا جيييت مسرع وقسم دمعتي على خدي

والله أن البنات مفيهم خير ياسلطان , وانت اول واحد تعرف هالشئ

ماوراهم إلا المشاكل والفضايح وقلة الحياء !
ياخي تزوج وفك نفسك من الاشياء اللي مالها داعي
سلطان حبيبي شكراً

وياليتك كنت في جيان أمس بس

هلالي كايدكم · #4 24/04/2009, 03:27 PM

المشاغب ..

في الوقت الذي اصبحت العاطفة هي من يحرك الشخص ..

لو فكر قبل أن يرفع سماعة الهاتف بأنه

( من دق باب الناس دقوا بابه ..!! )

سيختلف الوضع كثيرا ً ..

شكرا ً لك أخي ..

...][ هلالي الخبر ][... · #5 24/04/2009, 03:27 PM

يخرب بيتك

والله ان قلبي طاح في بطني

بس تصدق شغلك تمام

خل كم واحد ينخرش مثلي

.......

حتى الرجال مفروض تتكلم في بعضهم يدين عشان يعطي البنت

الدنياء احـــوال

شوق الكويت · #6 24/04/2009, 03:27 PM

حراااااااااااااااااااااااااام عليك والله قلبي طاح من مكانه

ليش جذي عاد

حتى ماكملت الموضوع

بااك

خوش موضوع ظلمتك والله يالغالي

الله يهدي البنات والشباب ان شاءلله ويفكهم من هالسالفه

مشكوور اخوي والله يطول بعمر ماجد ان شاءلله

زعيم عرعر T · #7 24/04/2009, 03:31 PM

إقتباس


	شخص ثالث تعرّف على بنت عن طريق الجوال ..! هالشخص من نفس طينة اللي فوق .. يعني استغلالي ويتفاول على نفسه كثير المهم .. مرة قال لي أن ما عمره ندم على أي علاقة كثر ما ندم على علاقة مع هالبنت .! سألته عن السبب وقال لي : ان عادته ان البنات يتصلون عليه , ( طبعاً أكيد قايل لهم ان حالته المادية صعبة ) المهم .. يقول ان هالبنت تموت فيه بس ما تدق عليه إلا يوم الأربعاء بس ..! وعلى هالحالة أربعة شهور .. إلين مرة سألها عن سر اتصالها بيوم الأربعاء طول هالمدة ؟!! هنا صدمه جوابها .. وأقسم بالله دمعت عيني يوم علمني بجوابها قالت له : أن فسحتها للمدرسة ريالين .. وتحرم نفسها من الفطور عشان تجمع العشرة ريال بنهاية الأسبوع وتشتري بها بطاقة شحن بعشرة وتكلمه بالله عليكم .. هل مثله يستاهل انها تحرم نفسها الفطور لأربعة أشهر عشان بس تسمع صوته؟

ياخي والله شي يقهر

------------

مشكور ع الموضوع

(

)

ريكيلمي · #8 24/04/2009, 03:36 PM

ياخي انت وجهك مغسول بمرقة كوارع

اول ما شفت كاتب الموضوع دريت ان ما فيه شي لسبب بسيط انك انسان فاقد المصداقية عند الجميع

أما بالنسبة لموضوعك ما اقول الا الله يرحم الحال و بس ...

دمت بود يا وجه ابن فهرة

شبوط · #9 24/04/2009, 03:39 PM

إقتباس


	ابن مقبل ببساطة قطو بسبعة أرواح

عسى عمره طويل وش فيك صارت شطحاتك كثيرة

لا هاالكلام مردود عليك مرفوض ثم مرفوض ثم مرفوض

بركان أزرق · #10 24/04/2009, 03:39 PM

زاك الله خير سلطان موضوع رووعة

بس ودي اعرف وش عرفك بالحديث ض1

هلالي من ارض اليمن · #11 24/04/2009, 03:39 PM

انا اتمنى ان البنات يبتعدون عن خيالهن الواسع مع قصائد الغرام وقصص الحب الخالدة والحب الجميل الذي جمع بين مسعد ومسعدة .. فذلك اكرم لهن وأشرف ،،،

من جانب آخر هنالك قصص تقوم بدور البطولة فتيات والضحايا شباب في عمر الزهور القى بهم حظهم العاثر بين مخالب نساء لا يخفن الله ويجدن شرب الدماء مع انفاس ارجيلة تحمل مواد حارقة وضحكة شيطانية مجلجله في فضاءات شبحية والقين بهؤلاء الفتية ( الحالمين ) في غياهب الجب ،،،

كلا النوعين فتح فمه شاغرا لكي يقبل الطعم على سذاجة ،،،

يحفظك ربي يا سلطان

والله يعطيك العافيه

عريب عبدالله · #12 24/04/2009, 03:44 PM

راجع شروط المجلس

المواضيع المنقوله متنزل هنا واللي فيها إساءة لأحد الأعضاء

ولا يوضع أسم عضو في العنوان لكن سماح هالمرة بماأن الأسم لمشرف وليس لعضو

موضوع بايخ كالعاده وما أدري وش مقعدني هنا

بس حسيت وأنا أقراء الموضوع التوعوي أن لك يد في إحدى الحركات المذكورة

عموما يجي منك وأبلغ التوعيه لما تكون من شخص من هالنوعيه شياطينه طارت

ومثل ما أقول دائما عمل الخير ما يقتصر على أشخاص بعينهم

فجزاك الله كل خير سلطان على هالموضوع

والله يجعله بموازين حسناتك

وهذا فال خير ببداية سلوك سلطان مسلك الأخيار

الله يهديك ويفتح على قلبك

أتفقت معك في فكرة الموضوع وهذا فال خير

لأن لعبة الشطرنج مستمرة

بالحب والإشراق

الســفيرة · #13 24/04/2009, 03:52 PM

حرام عليك سلطان تسوق للموضوع بهالطريقة

مامسكت نفسي لما قريت عنوان الموضوع

بس اهدا ان شاء الله برجع اقراه

ماجد الله يعطيك الصحة والعافية

.........................

عودة بعد قراءة الموضوع

إقتباس


	فيه مواقف كثيرة تقهرني لما أسمعها وكان ودي انكم تنقهرون مثلي .. بس ما ودي أطوّل ودي بس تكون البنت أحرص على نفسها من نفسها وما تكون طيبة زيادة عن اللزوم ويستغلها شخص ما يستاهل ..! وودي بعد ان يفكر أي خروف قبل ان يستغل البنت ويتذكر ان هالفلوس اللي ياخذها بدون أي وجه حق وبالخداع والتفاول على النفس هي فلوس حرام .. وأن يمكن ربي يبتليه ويحقق اللي تفاول على نفسه فيه ..!!