اتـرك عنـك.. والله يـالنـذالــه احيـانـا لهـا طـعـم - نادي الهلال السعودي - شبكة الزعيم

Fahad Al Sudais · #1 29/03/2009, 08:47 PM

حيـــــاكم

هلا وغلا

بدون مقدمات..

تعرفون ذيك النوعية من البشر

اللي يتصيّدون خلق الله بعد الصلاة عند بيبان المساجد

هذاك اليوم وقف لي واحد

وعطاني هذيك الـ(كليشه) اللي حفظناها عن ظهر قلب

قال :

قدّر الله علينا ومات ابوي بالسرطان

وامي عندها القلب والضغط والسكر

وجدّتي جايتها ثلاث جلطات

وحنا عددنا 27 نفر في بيت شعبي دور واحد

والماء والكهرب مقطوع من ثلاث شهور

قلت له :

طيب والمطلوووووووووب ؟؟؟

قال :

ابي 20 ريال اجيب غداء لهم.. صار لهم اسبوعين ماذاقوا شي

قلت له :

خلاص ابشر... انا باعطيك الف ريال

قال :

الف ريال

.. الله يجزاك خييييييييييير

قلت :

بس عندي شرط... لازم اعزمك على الغداء بالمطعم

قال :

لا مافيه داعي.. عطني الفلوس وخلني اروح

قلت :

والله ماتشوف ريال حتى تتغدى

اخذته لمطعم عندنا بالروابي مشهور حق مندي ومثلوثة

عندهم نفر اللحم قيمته 45 ريال

واطلب له نفرين لحم مع كنافه ولبن.. الحساب كامل 98 ريال

وقلت له :

استرح وخذ راحتك بالغداء دامي اروح اسحب لك الالف وارجع لك

<<

واطلع واخلّيه ولا ردّني الا باب بيتنا ههههههههههههههه

عقب المغرب مرّيت على المطعم وسألتهم عنه

وقالوا انه سوّى لهم قلق وقام يهايط لكنه بالاخير دفع الحساب

واللي يقهر انه حسب كلامهم دفع 500 ورجّعوا له الباقي

موقف ثاني

كنت ماسك خط القصيم وبنشر علي الكفر قبل المجمعة بمسافة بسيطة

ويوم فتحت الشنطة لقيت الاستبنه مبنشره بعد

مشيت على الكفر مسافة وهو مبنشر حتى وصلت عند المحطه

واسلّم على راعي البنشر واقول له يصلّح لي الاستبنه

قال : انا ماعندي تصليح.. بس اركّب جديد

قلت : الشكوى لله.. ركّب لي جديد

ويركّب لي كفر جديد كوري.. معروف قيمته الاصلية 170 ريال

ويوم خلّص قال : حسابي 500 ريال

قلت له :

الظاهر انك منتب صاحي انت

قال :

هذا حسابي تبي تدفع والا افك الكفر وتوكّل على الله

( يدري ابن الـ........ اني مستحيل امشي بدون الكفر حقّه )

قلت له :

ترى شغلك هذا حرام ومايجوز... تستغل حاجة اخوك المسلم

قال :

بلا حرام بلا فلسفة.. عاجبك والا افك الكفر

قلت له :

لا لاتفكّه خلاص.. بس اركب معي نروح لاقرب صراف اسحب لك

قال :

ليش ؟؟ مامعك فلوس ؟؟

قلت :

مامعي الا 300 ريال.. اذا تبيهن خذهن او اركب معي اسحب لك

قال :

خلاص نروح تسحب لي... المجمعة قريبة.. بس هات الفلوس اللي معك

وياخذ الفلوس ويركب معي.. ونمشي حتى وصلنا مخرج المجمعة

وعند اول مكينة وقفت اسحب

قلت له :

باقي لك 200.. انزل للبقالة هات لنا 2 مويه نشرب دامي اسحب لك الباقي

ويوم نزل وشفته دخل للبقاله وانا ادعس واتركه ههههههههههه

قلعته يستاهل

ودمتم بألف خير

<< منتب عاقل يالرسمي