عـاجـل وحـصـري : قرارات مهمة وإعفاءات بالجملة.. ( لاتتحمّسون تراي خرّاط ) - صفحة رقم 5 - نادي الهلال السعودي - شبكة الزعيم

Fahad Al Sudais · #1 27/03/2009, 03:16 PM

حيــــــــاكم

هلا ومرحبا

الله محيّي جماعة الربع

اقوووول

من اليوم الى الجمعة الجايّه مانبي مواضيع ساخنة

روّقوا المانقا وخلّوكم ريلاكس

والا لاتستغربون باكر تصدر قرارات مثل :

إلقاء القبض على مغّـاط بتهمة الهياط وغسل شراع الاصفرين

واعفاء هلالي ثنياني وشاكر وابوراشد والقحماني عن الاشراف بتهمة التخاذل

وكف يد الظـاهـرة بتهمة ( البـربـرة )

وشطب مرور الكرام بتهمة التعاون مع ( كاسترو ) ضد النظام

ونفي الـصـخـرة الى بنغلاديش بتهمة عدم التحلّي بالاخلاق السعودية

معشر الزعماء

مادام اللاعبين في تمارينهم مع حبيب الشعب الحسيني

والامور كلها ماشيه تمام والفرق نقطتين

والمباراتين الباقيه كلها هنا بالرياض

وياسر موجود ومع زملاءه يتمرن ومبسوط وماعنده خلاف

ويمكن اللي صار له ( خيره ) علشان يفتك من غثاء المنتخب

ماعمره راح لهالمنتخب الا ويرجع مصاب او معطوب

يعني الاوضاع كلها تمام التمام وزيّ الحلاوة

خلّونا نرتاح شوي من مواضيع المحقق كونان

ومواضيع الملفّات السريّة والخلطات السحرية

من جد والله ماصارت

احداث متلاحقة ومتسارعة وكل ابو خمس دقايق شي جديد

وكل شوي واحد جايب لنا خبر حصري من مصادره الخاصة

اقول لايكثر انت وايّـاهـ

خوذوا لكم اجازة واستغلّوا الوقت بشرب الحليب والقراءة

واللي عنده شغيلات ماخلّصهن يروح يخلّصهن

انفقعت روسنا وانتفخت بمشاكل الكوره

مدري حنّا نلقاها من الجو اللي كل يوم غبار او من الاخلاق السعودية

عندي اقتراح

وش رايكم هالاسبوع طالما مافيه مباريات

تركزون مواضيعكم شوي لتكريم النجوم اللي ابدعت في المباريات الاخيرة

كل المواضيع كانت مركزة على كوزمين وياسر

ونسينا نعطي كل ذي حقه من المدح..

نجوم كانوا علامات فارقه :

اسامة هوساوي

خالد عزيز

ميريل رادوي

ويليهامسون

حتى الدعيع ابدع في المباراة الاخيرة وكان كابتن ولا اروع

والفريدي وسـول اصبروا عليهم شوي.. لا احد ينتقدهم الحين

خلوهم يستانسون هالاسبوع والوعد الاسبوع الجاي

ولاتنسون تدعون لوالدنا مساعد بن عبدالعزيز

وابننا سعد بن نواف بن سعد بالشفاء العاجل