الـــــغــــالــــي
عاشق الفن اليوسفي


س1_ وش رايك فيني ؟؟

ونعم والله .. زعيم من زعماء شبكة الزعيم ،،



س2_ وش رايك في نفسك؟؟

بصراحة .. أنسان بسيط جداً جداً ويحب الهلال كثير جداً جداً <<== زي ولد الجوف



س3_ هل تتفق ان اسامه بن لادن ارهابي ام انه يطبق الدين الاسلامي الحنيف؟؟ وهل تتوقع انه مات ولا لازال حي؟؟

مات وإلا مامات الله أعلم .. أما هل هو يطبق الدين الأسلامي الحنيف وإلا لا؟ فلا أقدر أفتيك لأنه هناك من هو أعلم مني بهذه الأمور ..

وش رايك بكاس العالم هذي ومين برايك افضل لاعب ووش رايك بروستو حارس تركيا لانه معجبني جدا وفي رأيي انه افضل من كان؟؟

والله كأس العالم هالسنة رائع وناجح .. ومليئ بالمفاجاءات التي أحزنتنا بخروج نجوم كبار وأفرحتنا بوجود منتخبات جديدة قوية تنافس المنتخبات الكبيرة .. وقد يكون التحكيم فقط نقطة سوداء في تاريخ هذه البطولة .. أما أفضل لاعب في البطولة .. صدقني صعب الأختيار .. لاكن أقول من وجهة نظري الشخصية هو اللاعب النجم الذي قاد فريقه لهذه الكأس العالمية والذي حطم الأرقام القياسية وهو وبعد ما أتضحت الرؤية لكم ، النجم رونالدو ... وبالنسبة لرستو حارس تركيا فهو حارس راااااائع ومتمكن وسرق أعجاب الملايين وأنا واحد منهم .. ولكن في وجهة نظري الشخصية يظل كان هو أفضل حارس في العالم حالياً ( كما أعلن رسمياً ) ..

&&.. وتحياتي لك يالغالي على المشاركة الرائعه ... تقبل تحياتي ،،،

أخــــتــــي
مــثـل الـقـمــر


1- كيف علمت عن منتدى الزعيم و هل أحد نصحك بالتسجيل ؟

والله أذكر أني قريت خبر أفتتح الشبكة في جريدة (الرياض) وأخذت الموقع ودخلته وأعجبني



2- ماهو سبب تسميتك بهذا الأسم ؟

هو إعجابي الشديد والجنوني لكل ما هو أزرق .. حتى والله أحس أن دمي أزرق وأبيض فمابالك بالقلب ;)



3- مارأيك في أعضاء هذا المنتدى الرائع

الأعضاء كلهم والله أكثر من رائعين وكلهم حبايب وأخوان ويملكون القدرة على خدمة الزعيم بمايستطيعون



4- جميع اعضاء هذا المنتدى مبدعين ولكن هل يوجد عضو تجاوز حدود الابداع ومن يكون؟

إذا أصريتي على الجواب فأن قلم أبو هيا تجاوز مراحل الأبداع (الله لا يحرمنا منه)



5 - لاعب هلالي تحبه غير ثلاثي الازرق ( يوسف/ سامي/ نواف ) .. ؟؟

محمد الدعيع



6 - اين تحب ان تقضي اجازه الصيف هذي السنه؟

إلا الآن لم أقرر !!



7- رساله مهمه لمن ترسلها وماذا تقول فيها؟

أحب أن أرسل رسالة شكر لهذه الشبكة الغالية التي عرفتنا على أشخاص رائعون وأخوان مثاليون يعجز الأنسان عن وصف فرحته بهذه المعرفه الطيبه ...
وأحب هنا أخص أخوي الغالي (الموهوب) اللي كان فعلاً مثال للأخوه الرائعه والصداقه الوفيه .. الله لا يحرمنا منك يابو حميد



8- ماهي اكلتك المفضله ؟؟

ما فيه شيء محدد.. ولكن أحب المشويات والمعجنات وخصوصاً اللبنه



9- كيف تصف كل من : الصداقه - المحبه - السهر - كاس العالم

الصداقه: شيء جميل ورائع خصوصاً إذا وصلت مرحلة الأخوه
المحبه: شعور وجداني جميل يبعث في روح الراحة والطمأنينه
السهر: عادة يوميه لها فوائدها ومضارها
كأس العالم: حُــلــم كل لاعب كرة على وجه الأرض



- كم مرة تدخل المنتدى في اليوم وما هو اول قســـم تحرص على رؤيته وفي اعتقادك ما هو القسم الاكثر تمييزا في المنتدى؟

مرتين ( كمتوسط يومياً) تقريبا .. وأول ما أحرص أقراه هو الصفحة الرئيسية للموقع .. وصدقيني كل الأقسام في هذا الموقع متميزة جداً في ظل وجود الأخوان الإداريين والمشرفين



رسالة توجهها لعضو من اعضاء منتدى الزعيم وتقول له فيها من طول الغيبات جاب الغـنايم .. وافتقدناك ولكتاباتك؟

إي والله وينك يـ(الغانم) فقدناك من جد !!



11- سؤال اخير هذه الالقاب اريد منك تطبيقها على اعضاء المنتدى

زعيم المنتدى الأمير بندر بن ثامر
عميد المنتدى العوام
قمر المنتدى مثل القمر ;)
الجندي المجهول سلمان 99999
مبدع المنتدى اكيد كثيرين لكن اميزهم ( والله صعب التحديد ) بس أكيد أبو هيا منهم
فاكهة المنتدى البارق
عضو مظلوم الموهوب
عضو خلف الكواليس المهندس كوكتيل
عضو نشيط جداً الصوت الهلالي
عضو مهضوم حقه الغانم
عضو حاضر ولكنه غائب اليساندرو
عضو يعمل بصمت هلالي الجوف
وآخر لا يحب الأضواء أبو سليمان
عضو جذاب MALINKO
عضو تقرأ له دائماً !! ( والله كثيرين )
عضو معحب فيه وما هو سبب الاعجاب هلالي الجوف .. والسبب أخلاصه وحماسه الخيالي لهذه الشبكة
عضو لزقة سهل 888

&&.. في الختام أحب أقدم لك أختي جزيل الشكر على هذه الباقة من الأسئلة الجميلة جداً اللي أستمتعت أنا وأنا أجُيب عليها وإذا فيه زيادة من هذه الأسئلة فنحن نرحب .. تقبلي تحياتي وتقديري ،،،

أخــتــــــي
الماسه الزرقاء


لقد ترددت كثيرا في طرح أسئلة عليك... برأيك لماذا؟

والله مادري .. الجواب عندك



لو كانت لك رحلة إلى القمر فمن تأخذه رفيقا لك؟

الغريب ... بس لا تقولون ليش



إذا كنت في رحلة الخيال فمن هو أكثر شخص يسيطر على خيالك؟

أكيد راح يكون شخص عزيز جداً جداً علىّ



ما ردك على دعاة تحرير سفور المرأة ودعاة الموضة والتبرج؟

أتقوا الله في نفسكم وأهلكم وأعمالكم ،،



أيهما أكثرمن وجهة نظرك:

أضرار التلفاز أو منافعه.. ( منافعه )
أضرار النت أو منافعه.. ( منافعه )
أضرار الجوال أو منافعه.. ( منافعه )


أين تجد الحب العفيف؟

في صدق النيه والمشاعر .. والإخلاص والثقة في من تحب ..



ماهي الطريقة المثلى من وجهة نظرك لتكسب حب الناس؟


بالصراحة والصدق معهم وفعل الخير بنيه مخلصة



رأيك فيما يلي

النفاق صفه منبوذة ومكروهه وحذر منها الشرع .. وللأسف فهي منتشره
الأمل أجمل ما في الوجود
الأم أغلى أنسانه ..
الأب أعظم رجل ..
دمج الرئاسة مع وزراة المعارف أنا ضد هذه الفكرة تماماً ..

&&.. يعطيكي العافيه على هذه المشاركة الجميلة تقبلي خالص تحياتي ،،


[c][/c]

أحلى مواطن في البلد
صـــدى الأمـــس


س/ وش أسباب أنقطاعك عن المجلس العام خلال الفتره الماضية ؟؟

( بتقول كأس العالم أقولك المباريات بالنهار ) المباريات بالنهار .. طيب النوم في الليل طيب المباريات ما يبيلها تحليل
<<=== لا تحاول تحشره هههههههه
لا والله يالغالي كنت موجود وأقرا لكن ما فيه وقت للمشاركة ..



س/وش المنتدى اللي تحس انك تبدع فيه أكثر من غيره ؟؟

تقدر تقول: منتدى الرياضة العالمية والعربية



س / رشُحت لتكون مشرف على أحد المنتديات أي منتدى تختار ؟؟

وش ذالأسئلة يا أنس والله أحرجتنا بس عشان ولد الجوف أبقول: منتدى الرياضة العالمية والعربية ;)



س/ وش أول قرار تصدره بعد ما تمسك الإشراف ؟

أبحذف اسألتك هذي اللي مدري وش تبي ..;)



أعتمادك على اضافة الالوان لماذا ؟؟

كذا تعودت .. ويمكن تأثرت من زركشت أبولما لمواضيعه ..;)

&&.. تسلملي والله يا أنس باشا ويعطيك العافيه .. وهدي بالك علينا شوي ;) تران نحب نمزح معك .. وسلملي على أخوك المختفي ;) .. مع ألف سلامة يالغالي ،،،

[shdw]


اخوي القلب الازرق


عندي سؤال بسييييييييييييييييييط


وش رايك بالرجال اللي يسولف بلسانه

ويسمع باذانه وياكل بسنونه

ابغى اجابه غير دبلوماسيه

فتح عيونك عشان تقرا زين


ههههههههههههههههههههههههههه


تسلم يالغالي

[/shdw]

هلا وغلا ومرحبا بالقلب اللي يكوح تتن

هلا بالغالي عبادي ;) ..

عبدالله أنحش حط رجلك توني شايف أبولما عند باب المنتدى معصب يقول أن القلب الأزرق سرق مني سطلين أحمر وسطل بنفسجي وثلاثة سطول مشكل

نبدأ الأستجواب ;)

1/ وش يعني لك الأخ الفاضل عبدالله صالح عبدالله ؟؟؟
2/ لو حكمت العالم 24 ساعه وش القرارات اللي راح تتخذها ؟؟؟
3/ سؤال (( تخاف )) أحد من الأعضاء يسئلك أياه ؟؟ .. أو بصيغه ثانيه سؤال ترفض الإجابه عليه ؟؟؟
4/ لوكان سامي الجابر هو من رفع كأس العالم بديل لكافو ((( خيال طبعاً ))) وش بيكون شعورك لحظتها ؟؟؟
5/ لاعب سعودي ((( غير ))) هلالي يجذبك أدائه وأخلاقه؟؟؟
6/ (( المهنه / طالب في كلية المعلمين بالدمام )) <<-- ليش أخترت هذا التخصص ؟؟ وكمّ كانت نسبتك يوم تخرجت من الثانويه ؟؟؟
7/ سؤال (( ودك )) تجلد اللي سائله ؟؟؟ (((( بصراحه )))) ..
8/ هل أنت ملتزم بقوانين (( المرور )) مثل ربط حزام الامان والوقوف عند لاشارات ؟؟؟
9/ أفضل مدّن المملكه ( غير الشرقيه ) عندّ القلب الازرق ؟؟؟
10/ أخوي القلب الأزرق ... من الذي يأتي بعدي كأفضل كاتب في المنتدى ؟!! ;)

ورنا همتك ياصاحب السؤال العاشر

أخـــــــــوك
نـــانــــو

هلا بالغالي: القلب الازرق....والسموحه على التاخير:sad:

1- مقل كثيرا في الكتابه الاجتماعيه..رغم امتلاكك لقلم رائع واسلوب جميل..لماذا؟؟؟

2- اختر عنوانا لشخصيتك؟؟

3- لماذا هنا في المنتديات بشكل عام...نتخفى خلف الا القاب ولانكتب باسمائنا الحقيقه؟؟


مع تقديري لك واعتزازى بمعرفتك..يابعددددددددي.... ;) ;)

يا / القلب الأزرق ادري ان قلبك ازرق بأزرق .



لكن السؤال :-

تخيل ان قلبك أزرق وهذا معروف لدينا لكن ... الشريان بتاعك بلون ثاني ...؟

بأي لون ترغب يكون غير الأبيض ياحلو



اللى بعده :-

لماذا نحن السعوديين نموت بالمجاملة .
بالتفصيل الممل لو سمحت .

هلا أخوي س| هل انت راضي عن نفسك !!!؟

حــــــبيبي
ســهــل 888


حياك والله أخوي سهل .. وشرفت الموضوع ، وياليت تكمل تشريفك بكم سؤال ;) .. ما تصدك كم أعزك ياسهل ;)
تحياتي لك يـــالـــغـــالـــي ... .


[c][/c]

الـغـالـــــي
فيصل الهلالي


1- فريقك المفضل في ايطاليا

بالنسبة لإيطاليا .. ما تصدق لو أقلك أنه يشدني أكثر من فريق ;) .. فـ( الأنتر ) و ( روما ) و ( اليوفي ) ;) لهم مكانه كبيرة في قلبي ... طبعاً لما يملكة الفريقين من أسماء لامعه ..



2-اصعب موقف تعرضت له خلال تحليلك لمباريات كأس العالم

بالنسبة لوقت التحليل .. مأذكر والله أن فيه موقف ... لكن أذكر مرة في تنزيل الأخبار .. جيت ولقيت أخبار اليوم ما نزلت قلت خلني أنزلها .. وأروح وأسوي زحمة وصور وأخبار .. وأجي وأنزل الموضوع .. وأنا طالع من المنتدى قلت خلني أخذ لفه .. إلا والقاء أخبار اليوم توه منزلها أخوي ميلان آسيا !! بس هو سبقني ;) ( طبعً ليس بيوزراتنا ) والله ونجي نحذف واحد من الموضوعين



3- ايش رايك في الظلم اللي تعرض له الازوري

أي والله ظلم يقهههههههر !! فعلاً أنظلم الطليان كثييييييير فهالبطولة ... ما يستاهلون والله .. .



4- فيه واحد من اعضاء اللجنه الإخباريه لكأس العالم طلب اغنية مغنية المونديال ANASTACIA وكان متنكر بيوزر قناة كأس العالم
تتوقع مين يكون

والله مدري عنك أنت .. بس أنا شاك في واحد بس ماني بقايلكم

&&.. ألف تحيه أزفها لك أخوي على جهودك الرائع والمميزة لهذه الشبكة .. الله يكثر من أمثالك يالغالي .. ،،،


[c][/c]

الـغـالـــي
عاشق الزعامة


كيف تقيم كلا من :

- مونديال كأس العالم 2002 : مونديال ناجح ورائع وأستمتعنا بمتابعة عباقرة كرة القدم في تجمع كروي دولي نادر
- مشاركة المنتخب وما الأسباب في المستوى الذي رسم اكثر من علامة استفهام : مشاركة شرفيه لا أكثر ولا أقل ( بكل آسف )
- اللجنة الاخبارية للمونديال وعملها وهل وصل عمل اللجنة الى ما كنت تطمح اليه : نتمنى ذلك وصعبه أقيم لك شي قدام عيونكم
- الاقلام النسائية في المنتدى : رائع وممتازة .. وأتمنى لها التوفيق



- في ظل الظروف الحالية كيف ترى حظوظ الزعيم في مباراة الذهاب في السوبر الآسيوي وهل يمكن ان يحقق اللقب وسط الظروف الحالية ؟

بالنسبة للضروف: فعلاً هناك في كوريا حماس كروي وتطور ملحوظ منقطع النظير .. بعكس الضروف هنا .. وصدقني صعبه أتوقع .. ولكن أتمناها زرقاء بزرقة الزعيم



- تجد قلم رائع تتابع مواضيعه باستمرار ؟؟ وآخر تتوقع له البروز ؟

والله الكتاب المبدعين هنا كثيـــــــــر وصدقني أنني أتابع لأكثر من قلم .. وأتوقع للكثيرين الـبروز بدون تحديد أسماء لكي لا أنسى أحد ...



- قلم مؤهل للدخول لعالم الصحافة في المجلس العام وفي المنتديات الرياضية بشكل عام ؟

في المجلس العام .. نقول حبيبنا أبو شهد ( محترف توقعات ) رغم أنه كان في الصحافه بس في الأقسام الرياضية ;) أما في المنتديات الرياضية فهم والله كُثر وهناك أكثر من قلم يستاهل هذه المكانه ...

&&.. وتحياتي لك يالغالي على أسلوبك المميز في طرح الأسئلة .. مع ألف سلامة ،،،

حـــــــــــــــبيبي
أبـو أثــيــر


فيه لقاء مباشر مع سامي الجابر ولك ثلاثة اسئله تسال ابو عبدالله فيهم ياترى ماهي هذه الاسئلة الثلاثة

والله تعبني هالسؤال !!... بس نقول:
<1> ليه يابو عبدالله مُـصِّـر على الإعتزال الدولي ( حالياً ) رغم مقدرتك للعطاء ؟
<2> بعدالأعتزال إلى أين يريد أن يتجه سامي الجابر ؟
<3> كيف أستطعت يابوعبدالله أنك تسرق قلوب محبينك ومحبين الفن الجابري ؟



بيت شعر دائما على لسانك?

خـبـــــــــــــــروه أني على وصـله حـييت ... وإنــتـــفـــارقـــنـــا تــرى موتـي دنا
( هذا اللي في بالي الحين ;) )



وش رايك بالرجال اللي يسولف بلسانه ويسمع باذانه وياكل بسنونه

وونننننعــــــــــــم والله
أكــيد هذا مو عندكم في حائل ;) علعموم سلملي عليه إذا شفته


&&.. تحياتي لك والله يابو أثير .. والله لا يحرمنا منك أن شالله ،،،



[c][/c]
أخــتــــي
نـجمة الإبـداع


* التشاؤم والتفاؤل أين يقعان في شخصيتك ؟؟

أنا أنسان لا أعرف التشائم كثيراً .. وأحب التفائل دائماً وأبداً ...



* سؤال لم تجد له إجابة حتى الآن ؟

أيش حبب (بعض) الناس في نادي النصر ؟!!!



* سؤال تخاف أن تطرحه على نفسك ؟ ولماذا ؟

والله تعبت ... ولا لقيت إجابة !!



* اين يجد القلب الأزرق نفسه ؟

في منتديات الـزعـمـــــاء ... ودائماً باله مشغوله بالهلال ...



* منتديات الزعيم كيف تراها وكيف تتمناها ؟

أراها كما هي زعيمةً لكل المنتديات والشبكات .. وأتمنى أن تستمر على هذا التألق .. وأن تهتم بالمواهب المدفونه فيها .. .



* كيف وصل القلب الأزرق لشبكة الزعيم وهل لنا ان نعرف الموضوع الأول لك في الشبكة وفي اي منتدى ؟

وصولي لشبكة الزعيم .. تم ذكره ... أما أول موضوع لي فكان بعنوان: (( هلالي جديد ينظم للقافلة الزرقاء قبل مباراة النصر !! )) ... وأنتهت المباراة بالتعادل ;)

&&.. كل الشكر لك أختي نجمة على هذه المشاركة الجميلة ... تقبلي مني أجمل تحيه وتقدير ،،،

أغـــلـى حــبــيــب
الـبـارق2000


1- لو واحد اتصل عليك وقال لك لقيت رقمك مكتوب على خمسمية ريال مرمية بالأرض.. وش بيكون ردك عليه..؟؟

بقول اللعب غيرها يالدددددداج ...;)



2- لو واحد دايم ترسل له رسايل بالجوال.. وهو معطيك أشكل.. وش موقفك تجاهه

أبجي وأكلم من جواله نص ساعة للبرازيل بس مايسويها الي في بالك ;)



3- واحد قال لك إنه بيروح عزيمة ولزم عليك تروح معه وإشترطت إنه يكون حدك الساعة 11 ولكن راحت عليكم ولا رجعتوا إلا حدود الساعة 2 أو 2.30 .. ولا اعتذر منك ولا شيء.. وش بتسوي له..

خلاص راااااحت ما بقله شيء وبعدين أكيد سمرتكم حلوة ;)



4- ما أكثر ما يعجبك..وما يزعجك في شبكة الزعيم بشكل عام ومنتدى المجلس العام بشكل خاص..؟؟

شبكة الزعيم: يعجبني تألقها وزعامتها على شبكات النت ، وتغطياتها للأحداث الكروية ، وأنها سباقه قبل غيرها في نقل آخر الآخبار .. المجلس العام: يعجبني فيه تألق مشرفيه وحركته المستمرة .. وأكثر ما يزعجني فيه هو تكرار المواضيع ...



5- هل صحيح أن شبكة الزعيم تعرفت من خلالها بأشخاص لو تفحط ما تعرفت عليهم أبدا.. مثلي..

وأنا أشهد ;)



6- ماذا يعني لك كل من ..

المطر: راحة البال . . . ونعمة ندعوا الله دائماً أن يسقينا أياها
البحر: من عجائب خلق الله ...
الهلال: الهلال وما أدراك مالهلال .. جميل ورائع في السماء والأرض ;) ...
القهوة: علوم رجال ;) .. وتراني أحبها كثيــــــر ( متى نجي؟ )
الكامري أم لونين: ههههههههههههه ( لا تعليق )
سيكل ستطعش: ذكريات أيام الصغر ( بس ذكريات الله لا يوريك )

&&.. حياك الله يالغالي .. وإذا في خاطرك شيء تعال قول على طول لا تشاور ;) ... لك تحياتي وأشواقي يالغالي ،،،


[c][/c]
أخــــــــوي
الـــرايـــق


ماهي اخر مره صطحت الكوره على الجيران وهل رجعوها لك ولا شقوها؟؟

قبل ما تسألني هالسؤال بشوي ...;)



وهل فعلا ان مادونا تقربلك ولا تشابه اسامي ؟

لا تشابه أسامي !!...

&&.. أشــكــرك أخــوي الــرايــق عــلــى أهــتــمــامــك ... وتــقـبـل تـحـيـاتـي ،،،

شف يا ابو قلب اخضر اقصد ازرق <====ما يعرف ينكت

سؤال مدري اذا احد سألك عنه او لا بس مشيها و جاوب مره ثانيه علشان ما اصيح


س:هل صدقاً (مسوي عربيه فسحه) ان قلب ازرق والا تمويه؟؟؟؟؟؟؟

هلا وغلا بالقلب الازرق

اعذرني ياغالي على التاخير اولا

بسبب انسداحي وانشغالي بتنشيط منتدى الثنيان

واللي حضرتك ماشرفت فيه للحين <<== يبي يتهاوش معك

=======

اول سؤال لك ...

1-هل حسيت انك في يوم تقدر تنسى الهلال ؟

2-اول يوم دخلت في المدرسة وش تتذكر منه

3- من اللي كل ماسجل الثنيان هدف ..تذكرته ؟

======

وياليت تمرني بمنتدى الثنيان .. فيه دكة اسمها دكة عاشق على يدك اليمين خخخخخخخ

سي يو قلبي الازرق هههه

ياهلا والله بمستر عبدالله

وشلونك ووش اخبارك ..
كأني شايفك تصب عرق من هالأسئلة اللي تجيك من الأعضاء مثل المطر من كل حدب وصوب
على طاري حدب وصوب يالله خذ اول سؤال ..
وش معنى حدب وصوب

على طاري اول سؤال ..
خذ الثاني .. كأني اسمع عندك صجة ولجة وانت ترد على الأسئلة ؟
ياترى هي صجة الموهوب والا صجة اخوانك الصغار يناقزون فوق كتوفك

على طاري اخوانك ..
كم عددهم ؟ وكم ترتيبك بينهم ؟
وتشوف انك اهداهم .. والا المصرقع بينهم ؟
والا انت اشينهم والا ازينهم

على طاري الصرقعه ..
منهو العضو الأكثر صرقعة بشبكة الزعيم ؟ ( اكثر على وزن أفعل <<== مايمديك يالغريب )

على طاري شبكة الزعيم .. لو يجي يوم ويقولون ( بح ) خلاص شبكة زعيم مافيه ( الله لايقوله ) وش شعورك ؟ ووش تبي تسوي بعدها ؟
تصدق دنت البتسوة من حطيت نفسي بهالموقف

على طاري البتسوة ..
متى بتسيت ( صيحت = بكيت ) أخر مرة ؟ ووليش ؟

على طاري مرة ..
ياترى انت تعرف المرة والحلتيتة والا لا

على طاري الحلتيتة ..
منهو العضو اللي تحس ان لقب حلتيتة يركب عليه

على طاري الأحساس ..
منهو الشخص اللي تحس انك تفهمه ويفهمك ؟

على طاري الفاهم ..
منهو العضو اللي مسوي نفسه فاهم وهو ماوراه الا الدجه <<== كأني شايفك تبي تقول البارق

على طاري الدجه ..
ياليت تقول لنا موقف داج حصل معك .

على طاري اممممممممم
ياخي شكل حلقة على طاري صارت بايخة شوي وابي اغير لحلقة لو خيروك ..

لو خيروك بين عضو بالزعيم والا مشرف بالزعيم والا مدير بالزعيم .. وش تختار ؟ ووليه .

لو خيروك تصير البارق والا الغريب وش تصير ؟ ووليه ؟ بخخخخخخ

لو خيروك تصير العضوة المملكه والا العضو الحكم وش تختار ووليه ؟

لو خيروك تصير عضو باللجنة الاسشارية والا اللجنة الاخبارية وش تختار ؟ وليه ؟

لو خيروك بعد التخرج بين مدرس بالجوف والا بواب بالشرقية وش تختار ؟ وليه ؟

لو خيروك بين انك تصير نثراوي والا اتهادي وش تختار ؟ وليه ؟

لو خيروك بالسفر مجاناً الى اي دولة بالعالم لمدة شهر وش تختار ؟ ومن تختار رفيق ؟

لو خيروك حضور عرس عارف والا الغريب وش تختار ؟ وليه ؟

لو خيروك بين جاج ابو الدجاج وباواوا ابو التماسيح وش تختار ؟ وليه ؟
يوه نسينا ابوالذهب اللي بس يمشي .. بكيفه خله يتركى على عصاه مدري وين يبي



والأن الى حلقة تخيل من المسلسل التاريخي ..

تخيل عندك مليون ريال وش تسوي ؟

تخيل انك رئيس الهلال .. وش اول قرار توقع عليه ؟

تخيل شكل كايدهم يعني اوصف شكله

تخيل شكل الاعصار ؟

تخيل شكل كوكتيل ؟

تبي ابيعها واقول تخيل شكل الأمير بندر هههههههههههه

تخيل شكل نجمة الابداع

تخيل شكل شوكة الهلال قصدي ورده الهلال

تخيل شكل المملكة .. ياخي احس انها كبر جدتي

تخيل شكل الفيروسه الزرقاء بس لاتنسى النورتن والا مكافي هههههههههه

تخيل شكل نقوشي نقوشي نقوشي والقادم مذهل أكثر

تخيل شكل عاشق الثنيان هاللي رد قبلي

تخيل شكل الغريب وهل تحسو انهو يقربو لسيبويهي ام للأسودي الدؤلي ؟

ليه تروح بعيد .. تخيل شكلي


طيب خذ حلقة فطاير على الطاير .. قصدي كم سؤال على الطاير ..

هل انت راضي عن نفسك وعملك باللجنة الاخبارية ؟

ليه قلت ان الموهوب مهضوم مدري مظلوم ؟

حدد ثلاث اسماء تحس انها ابدعت باللجنة الاخبارية <<== انواع الاحراج ادري

وحدد ثلاث اسماء تحس انها مقصرة <<== اما هالسؤال انواع النذاله

ليه ماتحب البحر ؟ ماتدري اني انقهرت احد مايحب البحر !!
يشيخ احس ان احسن كلمتين بعد الهلال هن البحر وعكسها من غير راء <<== هذي للأذكياء فقط

حدد عضو تحس انه يصلح مشرف ؟

وحدد مشرف تحس ان كلمة عضو كبيرة عليه <<== نيتي قشرى

وحدد عضوة تحس انها تصلح مشرفه

حدد شخص تحس ان اسئلته خفيفه على المعده <<== شخص مازولا يعني

وحدد شخص تحس انك تمتعت بأسئلته وتتمنى لو يعيد الكره <<== وش رايك اصلح مذيع بعد هالجملة

وحدد شخص تحس انك انقهرت من اسئلته وودك تتعشى عليه الفجر من القهر

وحدد شخص تحس انه هراك ( اتعبك ) بأسئلته احم احم تراي خويك

وحدد شخص تحس انه غايب ولا سألك لهالحين لاتقول ميلان آسيا

منهو ...

حارس المنتدى :

بواب المنتدى :

نقليات المنتدى :

احلى واحد بالمنتدى :

اشين واحد بالمنتدى :

عسل المنتدى :

نويم المنتدى :

اكشخ واحد بالمنتدى :

شاعر المنتدى :

اديب المنتدى :



اعتقد يكفي ..

بايباااااااااااااي

الــغــالـــــي
نــواف السديري


1/ وش يعني لك الأخ الفاضل عبدالله صالح عبدالله ؟؟

أما أنك راعي أسئله ... وش يعنيني !! .. أخ عزيز وغالي ...;)



2/ لو حكمت العالم 24 ساعه وش القرارات اللي راح تتخذها ؟

أحل قضية فلسطين بسحق اليهود الملاعيين !!



3/ سؤال (( تخاف )) أحد من الأعضاء يسئلك أياه ؟

والله فيه سؤال متوقعه .. ولا له جواب عندي .. وأخاف أحد يسئلني أياه ( وأنحرج معه ) .. وهو وش أحرج موقف مر بك !! ( طبعاً جوابي راح يكون سؤاله ;) ) !!



4/ لوكان سامي الجابر هو من رفع كأس العالم بديل لكافو (( خيال طبعاً )) وش بيكون شعورك لحظتها ؟

مدام الدعوة خيال .... ( طبعاً شعوري لا يوصف ) وأبعزم أعضاء المنتدى كلهم ;) ..



5/ لاعب سعودي ((( غير ))) هلالي يجذبك أدائه وأخلاقه؟

الحسن اليامي



6/ (( المهنه / طالب في كلية المعلمين بالدمام )) <<-- ليش أخترت هذا التخصص ؟؟ وكمّ كانت نسبتك يوم تخرجت من الثانويه ؟؟

الأختيار مهوب بيدي !! مع أن نسبة تخرجي من الثانوية العامة 91.3% ولله الحمد



7/ سؤال (( ودك )) تجلد اللي سائله ؟؟ (( بصراحه ))

بصراحة !! مـافـيـه ;) ...



8/ هل أنت ملتزم بقوانين (( المرور )) مثل ربط حزام الامان والوقوف عند لاشارات ؟

الوقوف عند الإشارات .. أكيددد ( أخلاق الولد ) أما ربط الحزام .. لك علي شوي ;) ( مزاجات )



9/ أفضل مدّن المملكه ( غير الشرقيه ) عندّ القلب الازرق ؟

الرياض ... مسقط رأسي وبداية حياتي في الرياض ...



/ أخوي القلب الأزرق ... من الذي يأتي بعدي كأفضل كاتب في المنتدى ؟!!

حتى أنت ... قـلـــــــنـــــــالــكــم حبي تيماوي ;) ..


&&.. وفي الختام تقبل مني أرق وأجمل تحيه أخوي نواف .. ونوّر الموضوع بوجودك يالغالي ،،،