- مبنى جميل ، تصميمه حلو ، ديكوراته أحلى ، بانيته شركة اسمها " رشا ".
تعرف وش بيصير ؟! بيصير ( مرقص ) !! تعرف لحساب مين ؟! لحساب " رشدان " .

- بس اللي أعرفه إنه للتاجر " ردمان " !

-لا يهمك ، هذا مجرد غطاء .

- لحظة ! كيف يبني رشدان " مرقص " .؟! مو هو اللي باني أكبر مسجد في المدينة ؟!

- مسكين أنت !! المسجد بانيته نفس الشركة ، شركة " رشا " و اللي يملكها أخو زوجته اللي كان قبل زواج أخته راتبه ألفين !!.

- يعني نفس الشخص و نفس الشركة و نفس العمال!

- نعم بس هذا مرقص و هذا مسجد مع كامل احتقاري للأول و إلا الثاني غني عن تقديري .

- الحمدلله يا رجال إنك علمتني !
ما نبي نصلي في مسجد مبني على حساب مرقص و رقاصة !

.... سبحانه إنه عليم بذات الصدور .

@@@@@@@@@@

- نبي فلوس للعيال

- ما معي فلوس أعطيكم ، أنتم كاثرة مصاريفكم !! و باشوف لكم حل .
أول ما كنتم تصرفون بالشكل هذا !! و على فكرة ، أنا عندي سفرة عمل آخر الأسبوع .

- كيف عمل و آخر الأسبوع ؟!

- يا كثر أسئلتك ! هذا عمل خاص .

7
7
7

- هاه يالرفيق ، كل شيء جاهز ؟!

- أبشرك ، حتى الدولارات صرفناها لزوم ( التنقيط ) !!

- كفو والله ، عسانا بس نلقى شيء يجوز لنا .

- أفا عليك بس ، أعرف لك مرقص كل شيء فيه ! ما في شيء ممنوع .

- كيف ؟!

- يقولون إن اللي يملكه ( غطوان ) ، و ( غطوان ) غطاء على ( اميران ) .

- أوف ، والله اللي لاعبين على هالشعب المساكين ، ماكلين فلوسهم و سارقينها كأنهم بيعيشون ألف سنة .

- أكيد ، و الشعب المسكين لاعب على الشعب المسكين يدعي إن ما عنده فلوس و هو بيروح يعطيها ( اميران ) ، قصدي بنات المرقص .

- كأن كلامك عني ؟!

- كلامي أقصد به إننا حتى إنا نلعب على أنفسنا و على غيرنا و الدنيا كلها ماشية كذا .

- طيب لا تضيق صدري بهالحكي و خلنا نروح نفلها ، كأس مع بنت هوى تنسينا همنا .

- شفت كيف ؟! نبي همنا يروح بسهرة في مرقص ؟! مع إنا نعرف إنه مثل كل مرة بيزيد همنا .
و نقول للناس إنهم يلعبون و حنا أسوأ منهم ، و نقول كأنهم بيعمرون ألف سنة على هالفلوس و حنا كنا بنعمر ألفين سنة على معاصينا !!

- أقول بس خلنا غافلين متعامين أصرف .

... في غفلتهم يعمهون .

@@@@@@@@@@

بنت و صديقتها ، جيران و الجدار في الجدار ، أطفال في عمر الزهور .
كانوا يقضون كل الوقت مع بعض و يدرسون مع بعض إلى أن فرقت بينهم شهادة الثانوية .

بعد الجامعة كان بينهم لقاء .

منال ما شاء الله حفظت القرآن و مشروع ( بنت ) تقدر تقوم بمسئوليات بيت و عائلة .

العنود بعد تعلمت ما شاء الله عليها !!
سفروها أهلها و درست في الخارج و تخرجت و أيام الجامعة التحقت بصف ( موسيقى ) و ( صف ) رقص و كانت دائماً متميزة و رجعت و أرضت أمها و أبوها اللي كانوا سبب في اختيارها لهذا الطريق .

مسكينة العنود ، كانت خامة جيدة ما تفرق عن منال !
مسكينة العنود الكل يعتقد إنها سعيدة لكن تعيش فراغ روحي و تفتقد للسعادة الحقيقة !

.....فأبواه يهودانه أو يمجسانه .

@@@@@@@@@@

- تعرف رفيقنا في الجامعة ؟!

- إيه . وش فيه ؟!

- وش ما فيه !! الرجال روح ، فلوسه تغطي الشمس .

- معقول ؟! ما أذكر إنه كان متميز أو عنده رأس مال .
- صح . بس في شيء ثاني أنت نسيته !
ما عنده رأس مال لكن برضه ما عنده مشكلة يكذب و يشتغل في الحرام .

- لا تقول كذا يا رجال .

- كيف يعني ما أقول كذا ؟! الرجال رابط ودائع و يأخذ فوائد ، و عنده محلات حلاقة و أغاني و فيديو و كلها تستر ، و عنده مقهى ، و عنده و عنده غير إن عنده أكثر من 200 عامل مسرحهم و يأخذ من كل واحد 300 ريال شهرياً .

- طيب وظيفته ، تركها ؟!

- لا ، فصلوه في قضية رشوة .

- الله يستر علينا و يثبتنا و يهديه .

...... و هديناه النجدين .

@@@@@@@@@@@@@@@@@@@@@@@@@@@@@