والمصيبه ان اغلب المشتركين في اكثر من قناه حسبت عليهم تكلفت الخدمه وماتوصلهم رسائل بشكل دوري فالاسبوع يمكن رساله :) او مايوصله شي
وهذي خدمه وحده بس لجمهور الهلال تطلع منها المبالغ هذي فما بالك بالخدمات الاخرى.
موبايلي سبب تفوقها على الاتصالات السعوديه مو فلوس ولا خدمات ولا جودة خدمه انا ما امدح موبايلي بقدر مااوضح لكم بعض النقاط
سبب نجاح موبايلي (الدعايه والتسويق) ماقال مسئول الاعلام في موبايلي كلمته هذي (العاطفه) من عبث هو يعرف ان بعض الشعب السعودي دائما ماينساق خلف الدعايه دون ان يتمعن في محتواها. لان التسويق علم غزير وهو من اهم الامور اللي تخفى علينا في الوقت الحالي في المملكه مجال التسويق لازم الجميع يدركه. لان لما تقول لواحد انا اعمل في مجال التسويق يقول يعني بياع :) مايدري ان المبيعات تخصص صغير من علم التسويق هذي الشطحه بس علشان ما احد يلومني يوم حبيت اوضح النقطه هذي. نعود لمحور حديثنا
لو كل شخص اذا اطلقت موبايلي دعايه يتمعن في هذي الدعايه يجد ان مصلحة موبايلي فيها اكبر من مصلحة العميل والعميل اقصد فيه جمهور الهلال :)
كيف بقول لكم كيف
موبايلي تقولون قدمت لكم كجمهور خدمات .طيب ناخذ وحده من الخدمات هذي اللي قام بأنزالها في منتدى الزعيم سنترال موبايلي
وكان عنوانها فقط لجمهور الهلال
العرض هذا مطروح في موبايلي قبل ماتوقع الشراكه مع الهلال وهو عرض (ياسلام)
ارقام مميزه برسوم شهريه على الرقم المميز ودقائق مجانيه طيب طالما انه فقط لجمهور الهلال ليه تم انزال فكرة هذا العرض سابقا
وش جابت موبايلي جديد لكم ياجمهور الزعيم اللي تحبكم موبايلي
مكالمات فيديو مجانا :)
انا اجزم ان صلاحية المكالمات تنتهي وما استهلكها العميل لان مكالمات الفيديو اقل استخدام من الصوتيه ليه ماحطت لكم مكالمات صوتيه طالما انها تحبكم وتبحث عن مصلحتكم!!! وموبايلي اطلقت هذي الخدمه لكم الدقايق المجانيه وهي ماقامت بتغطيه المملكه كامله بالجيل الثالث .
و20 هلله لدقيقه مطروح في باقات خطي بلس :)
ومثال اخر على مجال التسويق والدعايه (العربي) لموبايلي وحطوا تحت العربي خطين لان فالغرب ماراح يحصل مثل كذا. وهذا العرض ماكان خاص لكم كجمهور الزعيم هو كان لجميع عملاء موبايلي
ركزو معي كيف تم عمل الدعايه
كان العرض
أطلقت شركة موبايلي يوم أمس السبت 21 ربيع الأول 1429ه الموافق 29 مارس 2008م عرضاً خاصاً على الرسائل النصية ( Sms ) تمكن المشتركين من ارسال كمية غير محددة من الرسائل من بسعر ثابت دون النظر إلى عدد الرسائل المرسلة، ويشمل هذه العرض الباقات المفوترة والمسبقة الدفع و(موبايلي أعمال).
ويوضح الجدول التالي سعر وطريقة الاشتراك في هذا العرض:
السعر المدة طريقة الاشتراك الباقة
ريال 5 يوم أرسل س1 إلى1100 باقة الرسائل اللامحدودة 1
ريال 9 يومين أرسل س2 إلى1100 باقة الرسائل اللامحدودة 2
ريال 22 خمس أيام أرسل س5 إلى1100 باقة الرسائل اللامحدودة 5
وللاستفادة من هذا العرض يجب تفعيل باقات الرسائل المختارة بعد الساعة 12 صباحاً، ويستمر هذا العرض المميز حتى يوم السبت 12 أبريل 2008م.
والعرض وصل للعملاء عن طريق رسائل من موبايلي على موبايلات العملات اشترك رسائل بلا حدود وطريقة الباقات فقط والبروشورات في الجرايد والشوارع.
يالله وش ذا العرض
وربي عرض يهبل ويقوم الشعب ويفتح الجوال بعد تفعيل العرض
ويرسل للقائمه اللي عنده كامله فيها من ارقام موبايلي وفيها من الاتصالات ويوم تجي الفاتوره او ينخفض الرصيد عنده
الا محسوب عليه رسائل
يتصل على 1100 يقول له الموظف اخوي انت ماقريت البروشور زين يقول الا قاريه
يقول العرض هذا من موبايلي لموبايلي اقرى البروشور زين كيف طيب ليش ماوضحتوا قال الموظف ارجع للاعلان وتعرف يرجع المواطن
للاعلان يلقى مكتوب بالخط الصغير مرررره اللي ماتشوفه بالمجهر (داخل شبكة موبايلي) طيب وباقي الاعلان بالبنط العريض :) ياسبحان الله الحبر يخلص لو وضحوا النقطه هذي!!!!!!!
وعرض اخر لموبايلي يوضح لكم كيف موبايلي او اي شركه ربحيه تحط مصلحة العميل فوق مصلحتها
تقول للعميل موبايلي عندنا باقات من احد هذي الباقات نعطيك 500 دقيقه مجانيه فالشهر يالله يازينكم ياموبايلي وش ذا الخدمه بس رسوم العرض هذا شهريا 190 ريال ورسوم استخراج الشريحه 45 ريال طيب مو مشكله انتم طيبين بتعطوني 500 دقيقه يالله ابي العرض هذا طيب عزيزي العميل الدفع مقدم اوكي ياحلوكم انتم بتعطوني 500 دقيقه شهريا تستاهلون اكيد عزيزي العميل حنا تهمنا مصلحتك فوق مصلحتنا . العميل يرد الله يعطيكم العافيه ياخي موبايلي دائما تبحث عن مصلحة عملائها مثل مايقول بعض الجمهور لاحظوا كيف موبايلي قدمت مصلحتكم على مصلحتها في فكرة العرض هذا علشان تعرفون انتم كيف مستغفلين.
انت تدفع 190 ريال مقدم وانت مابعد شغلت الشريحه لنفرض انك شغلتها في 1\1\2008 تشغل وتتصل تحصل فعلا في حسابك 500 دقيقه مجانا تقول ياخي موبايلي هذي رهيبه تجي الفاتوره الشهريه اللي تصدر في 1\2\2008 يقولون فالفاتوره الشهريه مثلا عليك قيمة مكالماتك 700 ريال والخصومات 190 ريال لاحظوا هذي 190 اللي دفعتها مقدما خصموها لك وبعدين يقولون حنا متفقين ان رسوم الباقه هذي 190 وتحسب عليك 190 جديده هذي اول فاتوره تصدر لك وعندك 500 دقيقه لشهر 2 القادم وباقي المبلغ 510 ريال اجور مكالمات بعد الخصم يعني ياعزيزي العميل لازم تسدد 510 اجور مكالمات بالاضافه الى 190 الرسوم الشهريه يعني المطلوب عليك 700 ريال يازينهم والله معطيني خصم .
بالعامي السعودي صبه احقنه لبن
يعني بأختصار 190 ريال اللي تدفها رسوم شهريه هي قيمة 500 دقيقه مجانيه ماخذنيها ماخذينها بس شف كيف سوقوا لكم العرض يعني مافيه دقايق مجانيه ولا شي :)
تدري كيف بعمليه حسابيه رياضيه
هي تكلفة الدقيقه في هذي الباقه 34 هلله من موبايلي لموبايلي و39 هلله من موبايلي للجوال
لو فرضنا انهم حسبوا كل دقيقه مجانيه مانبي نظلمهم ناخذ متوسط التكلفتين ب 36هلله لدقيقه وهم اتوقع كذا حاسبينها
تطلع 0.36هلله*500 دقيقه=180 ريال :)
ولو فرضنا انهم حسبوا الدقيقه بأعلى تكلفه فالباقه
0.39هلله*500 دقيقه=195 ريال
وهذي الفرضيه مستحيل لان ماراح يخصمون كلها على مكالمات الجوال. من اتصالك لموبايلي بيخصمون ومن الجوال يعني الشغله متوسط حسابي.
عرفتوا هالحين وين مصلحتكم ياعملاء ويامشتركين فوق مصلحة الشركات الربحيه :)
واعلان اخر لموبايلي
انتشر
يوضح ان العاملين في موبايلي كلهم كوادر وطنيه
:)
طيب ياوطنيه انتم الناس تقرا اعلانكم وتشوف معارضكم بس ماتشوف مكاتبكم واللي فيها
قال وش قال وطنيه
وامثله كثيره لكن هذي اخترتها علشان اوضح للجمهور المنجرف انه يصحى ويفكر بعقل ومنطق
كل ماسبق من فلسفه وتحليل لشئ واحد
حنا ماهمنا موبايلي ولا الاتصالات
كثر الجدل والنقاش بين مؤيد ومعارض وناس تطالب وناس ترفض طيب انتم الان يا جمهور لازم يكون هدفكم واحد وهو الهلال
والهلال موكل الامر بعد الله لرجل والله العظيم انه كفو وانا من الناس اللي معجب بمنطقه وفكره واسلوبه انسان راقي في طرحه وتعامله وبحثه لمصلحة الزعيم
هذا الرجل لن يبدي مصالح شخصيه فوق مصلحة الزعيم
هذا الرجل هو الامير عبدالله بن مساعد والله يوفقه وكلنا معه باللي يختاره ويسويه
همنا الوحيد الهلال ولا يتم استخدامنا كجهمور على قولتهم بالعاطفه حنا نعشق الهلال ومع الهلال وين ماراح ومع مصلحة الزعيم ولا يظن الغبيني او من هم على شاكلته ان جمهور الهلال صيد سهل او من الناس اللي تنطوي عليهم حيلهم واسلوبهم اللي حنا نمشيه بمزاجنا كجمهور لكن طالما ان الامور وصلت لمصلحة الزعيم لازم ننطق ونوضح كل شي
ندفع كجمهور حنا ماندفع حب في موبايلي ولا الاتصالات ندفع للهلال امام موبايلي خيار واحد اما تقدموا العرض اللي يستحقه الزعيم وجهموره او تفكونا من بياناتكم وتصريحاتكم اللي مالها داعي لا تنسون انكم تتعاملون مع ارقى عقليه استثماريه في المملكه وهو الامير عبدالله بن مساعد رجل لن تخفى عليه هذي الاطروحات والخزعبلات اللي شككتوا في مصداقية نادي الهلال وسموه عندما صرحتوا ان العرض المقدم من الاتصالات وهمي!!!!!
ان غدا لناظره لقريب
واسف على الاطاله