فكرة :: سندريلا الهلال
اعداد ومتابعه ::
هلالي من ارض اليمن و الهنوووف
تصميم :: عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير
**][يوميات رمضانية 1429 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم .
. في سلسلة تحمل بين طياتها يوميات الأعضاء الرمضانية من كل عام ،،،
هذه السلسلة أنتم أهل بيتها ونحن ضيوفا في حضرتكم ،،،

أهلا وسهلا بكم أحبتنا ..
ودعونا نرحب سوية بالمضيف "الثامن عشر"
المتألق :: SKY
لك يحكي لنا احداث يومه مع شهر رمضان المبارك ..


السلام عليكم ورحمة الله وبركاته ..
من هذا المنبر أجدد التهنئة والدعوات الصادقة بأن يضاعف الله لكم الأجر في شهره الفضيل وأن يحرم عظامكم عن النار .. اللهم آمين

في البداية أشكر الصديق الغالي هلالي من أرض اليمن على دعوته لي للمشاركة في يوميات رمضانيه
ويشرفني أن أكون أحد الأعضاء المشاركين كما أشكر أيضاً كل من كان خلف الكواليس لإنجاح هذه الفكرة الرائعة طوال السنوات الماضية

خلوني أبدأ يومي من بعد صلاة الفجر في هالوقت بالعاده اكون مستنفذ كل طاقتي وعينك ماتشوف الا المخده
لكن اليوم حسيت اني نشيط شوي قلت أدخل للشبكه أقرأ بعض المواضيع وأرد على بعضها
الساعه 7 نمت إلى الظهر صليت ورجعت نمت إلى العصر صليت العصر
ثم أخذت شوط في البيت أشوف وش ناقصهم من أغراض قبل أدخل النت
لأني اذا جلست على الجهاز ما احب أحد يقاطعني
وكالعاده مايبون غير خبز بر لجدتي الله يمدها بالصحه والعافيه
طلعت للمخبز وأخذت الخبز قلت خلني أمر محل كمبيوتر على طريقي
ابي اشوف لي فلاش ميموري وأشوف أسعارها شلون صارت
لقيت أبو 4 قيقا بـ 60 ريال الله يالدنيا
أذكر زمان أول ماطلعت الفلاشات شريت فلاش حجمه 128 ميقا بس بـ 250 ريال الله لا يخسرنا

رجعت للبيت دخلت النت أتصفح الشبكه وبعض المواقع الصديقه وهالوقت دايم اكون على النت عشان ما احتك في المطبخ
تعرفون هالفتره بالذات أنواع الأحتفالات في المطبخ
قبل صلاه المغرب بنص ساعه وعلى غير العاده دخل علي ابوي وفي يده فواتير جوال
قال عطني جهازك ابي اسدد الفواتير
رديت ليه وشفيه جهازك ؟؟ قال جاني فيروس وأخاف يكون فيه ملف تجسس يلطش أرقام الحساب السريه < أحلى يابومحمد ياكافشهم
أخذت الفواتير وسددتها عنه وجلس عندي شوي يسولف < الظاهر انه منحاش من ريحه المطبخ

أذن المغرب وطلعنا سوا أفطرت وصليت المغرب ورجعت وكملت باقي الفطور وجلست شوي مع اهلي أتقهوى وأسولف وأطقطق على النت < عاد انا احب اجلس عند اخواني أو الوالد والوالده وانا اتصفح النت اطفش من القعده لحالي
جلست جنب الوالده أوريها صور زواج واحد من عيال العم وبعض الصور الطريفه
المهم وعلى هالجلسه مابين متابعه التلفزيون والنت لين أذن العشاء طلعت وصليت العشا وماتيسر من التراويح



رجعت البيت ودخلت شبكه الزعيم < أحس اني مسحور في هالشبكه اذا أبطيت عنها أحس ناقصني شي
جلست أتصفح وأقرى بعض المواضيع
وأرد على بعضها في قسم الجمهور والمجلس إلى الساعه 10 تقريبا
وكالعاده جات حزه الطلعه للشاليــه دقيت سلف
وتوكلت على الله وصلت للشباب وسوالف وضحك إلى الساعه 12 تقريبا
وينقز واحد من الشباب قال ابي واحد يتبرع
ويخاويني مشوار صغير بشرط يكون وجهه مغسول بمرق ومايستحي
< افا وش يبي هذا ..
نقزت انا وقلت انا اتبرع < طبعا ابي اعرف وش السالفه بس .
. قال نبي ناخذ جوله على الشاليهات ونوزع استبيانات ونجمع أكثر عدد أجوبه من الشباب
طبعا الرجال يدرس في كليه الطب وهالأستبيان مطلوب عليه
ويتكلم عن التدخين ماهي الأسباب وكيف وقعت في التدخين وكم لك سنه و و و .. الشاليهات طبعا كلها عزااب وتؤجر بالشهر في رمضاان للعزاب فقط
يعني مافيه عوائل نهائيا

المهم أعجبتني هالتجربه قلت توكلنا على الله ..
والله لا يوريكم شفنا من الناس أنواع وأشكاال شفنا الصاحي والمجنون واللي يحاول يستخف دمه
واللي يحاول يسوي فيها لبق
واللي يقول مافيه استبيان للمحششين واللي يحسبنا حكومه يقول أمنعوا الدخان من السعوديه واللي يقول أرفعوا سعره ..
قلت ماعليه نتحملهم >> ( لن يبلغ العلم مستحي أو متكبر ) < المشكله مالي دخل

المهم مرينا الشاليه الأول والثاني والثالث كلهم شباب والشاليه مثل ماقلت خاص للعزاب وممنوع دخول العوائل صرنا مانطق الباب ندخل على طوول نبي نخلص بسرعه .
. اللي معي قفلت أخلاقه من بعض الناس لأن من طبيعته مايطيق الورعنه واللي يستضرفون .. المهم قبل ندخل ذاك الشاليه ما أدري وش اللي خلاني أطق الباب حسيت اني بتصفق لو ادخل على طول
المهم طقينا وطلع لنا واحد وعطيناه الزبده ورحب فينا وقال ادخلوا على اساس تشرحون للشباب الموضوع
المهم الرجال سبقنا واحنا دخلنا بعده .. و أول مادخلنا ونلقى أربع شباب و بنت متغطيه طبعا وباين انها كبيره يعني فوق الـ 25 .. طبعا ماتدخلنا ولا تكلمنا قلنا يمكن محرم والعادات تختلف المهم عطيناهم الزبده ووزعنا الأوراق على الشباب .. نقزت البنت وقالت انا ادخن ابي اعبي ورقه .. المهم اللي معي كانت قافله أخلاقه قلب 180 درجه وأنواع اللباقه والأبتسامات والفلسفه عطاها ورقه وخلصنا بسرعه نبي الفكه

مرينا أكثر من شاليه بعدهم .. وقابلنا صاحب الشاليهات ورحب فينا وقدم لنا قهوه وعصير بالقوه .. وقال انا عندي شاليه في مكان ثاني وبرضو عزاب اذا حابين تروحون لهم راح اكلم لكم الأمن والموضفين هناك يتعاونون معكم
تعذرنا منه وقلنا أكتفينا بالأوراق اللي معنا ومشكور ماتقصر

خلصنا على الساعه 2 من هالحوسه واللفه الطويله والعريضه ورجعنا لشاليهنا ونسولف للشباب عن انواع الأفلام اللي سويناها بعضها مقدر أذكرها هنا وتسحرنا سوا ورجعت للبيت على الفجر .. صليت ونووووووومه عميقه

بكذا أنتهى يومي وأعتذر اذا غثيتكم بالقرائه وسامحوني على الأطاله

شكر خاص لمشرفي وأستشاري المجلس على جهودهم الجباره في سبيل الأرتقاء بالمجلس

في أمان الله

خارج الموضوع: ألف شكر لك اخوي هلالي على الدعوه ماقصرت يالغالي وأعتذر أشد العذر على تأخري في أرسال يومي لأني رأيت ان ايامي روتينيه وممله لكن حبيت أنتظر إلين جاني هاليوم وأرسلته ..


كل الشكر
للمتميز**][SKY ...♥][ **
وانتظرونا غداَ مع الاستشاري المتميز سيمو


أرق التحايا وأطيبها من
مشرفيي واستشاريي
المجلس العام

إقتباس الرسالة الأصلية كتبت بواسطة DR.KHALID هلا اخوي sky .. يومياتك رهيبة .. وخاصة البنت الي تدخن .. تدخن راحتها اما تقول انا ادخن فهذا شيء غريب .. والله يوفقك علمتني سعر الفلاش وانا من زمان ابي اشري ول شريت .. وعجزان اروح اشوف اسعاره .. اخبر اخر واحد شريته كان حجمه 1 قيقا بـ 80 ريال .. بس وين محل فلاشك هذا .؟ يوم رائع .. وفقك الله اخوي تحياتي

أهلين خالد شرفني مرورك العطر ولا تستغرب من جرأتها بالعكس الحين الشباب صاروا يستحون أكثر منهم
والحمد لله اني أعطيتك معلومه كنت تبحث عنها
أسعدني مرورك

إقتباس الرسالة الأصلية كتبت بواسطة SANDRA وش هالدااجـه .. بس ودي أسئلها عن احساسها.. وهي تدخن !! << ودها تجربـ هالأحساس ياويلي على اللباااقـة ..اللي ما تطلع إلا قدام البنات بس .. هههههههههههه والله أن يومك فللله .. وشاليهااات وحركات ودنيااا .. إلا أقووول الشاليهات هذي بالرياض .. علشان اللي عندنا ينبسطوون ,, SKY ,, يوم ممتع .. بالعكس لا هو ممل ولا شي ! كل الشكــر ..

فيه بعض العوائل يدخنون البنات قدام الأب والأخوااان مو شرط تكون داجه لكن عاداتهم كذا

وبالنسبه للباقه مطلوبه دائمــا ماتدرين يمكن يصير لها نظر ويتزوجون بعدين ..

اما الشاليه أكيد في الرياض وأماكنها معروفه

ألف شكر لك ساندرا على المرور العطر وماننحرم من تواصلك .. ورده

وعليكم السلام ورحمه الله وبركاته


هلا بك اخوي سكاي (اتعب احول اسمك باالانجلش )

بخصوص سعر الفلاش
اشياء ترخص واشيا تغلى حيل
اصلا لو تعود بالذاكره للجوال والكمبيوتر كانوا بـ 10 الاف
والحين صارو بالف وبـ 100
وش عقب هالرخص

وتجولك بالشاليهات احسك مغامرين شوي>>>خوافه
مدري ليه اخاف من هالاشياء
لو دخلتوا بشاليه شباب مش ولابد وخطفوكم >>>
مشكلتي ماتابع افلام كثيره بس مدري ليه اخاف
وهالبنت
ماقول الله يستر علينا وع بنات المسلمين
كان بلغت الهيئه

\
/
يعطيك العافيه اخوي احمد ع هاليوميات
وتشرفنا بك
سؤال
وش معنى يوزرك اذا مافيه خصوصيه ..؟؟



بانتظار سيمو بيك

إقتباس الرسالة الأصلية كتبت بواسطة ابو ياسرالهلالي وعليكم السلااام ورحمة الله وبركاته الله يوفقنا ويوفق جميع المسلمين والمسلمات ياارب الله يوفق خويك ان شاء الله وييسر امور بحثه ياارب حبيت اقتبس وارد عليك لكن اخوي انت لك من يوزرك نصيب فالسماء مليئة بالاثارة والغموض والمتعة كما يومياتك فمن خبز جدتك الى فلاشك الى الشاليه ربي يسعدك وييسر امورك ويكفيك شر حب الاستطلاع اتمنى اني اجبت على سؤال اختي الهنوووف فلو ركزت على الرد راح تستنتج اجابة سؤالها الف شكر للاستشاريين على هالمجهود وللمصممين ولصاحب الفكرة تحيااتي

هلا بالغالي ابو ياسر الله يجزاك خير على هالدعوات .. ورده
أكيد وضحت للهنوف معنى أسمي ردك كافي ووافي والله يبيض وجهك ماقصرت لكن انا حبيت أوضح لها المعنى والسبب في أختياري له

الله يعطيك العافيه على تواجدك العطر والله لا يحرمنا هالتواصل العذب .. دمت بخير

إقتباس الرسالة الأصلية كتبت بواسطة الهنوووف وعليكم السلام ورحمه الله وبركاته هلا بك اخوي سكاي (اتعب احول اسمك باالانجلش ) بخصوص سعر الفلاش اشياء ترخص واشيا تغلى حيل اصلا لو تعود بالذاكره للجوال والكمبيوتر كانوا بـ 10 الاف والحين صارو بالف وبـ 100 وش عقب هالرخص وتجولك بالشاليهات احسك مغامرين شوي>>>خوافه مدري ليه اخاف من هالاشياء لو دخلتوا بشاليه شباب مش ولابد وخطفوكم >>> مشكلتي ماتابع افلام كثيره بس مدري ليه اخاف وهالبنت ماقول الله يستر علينا وع بنات المسلمين كان بلغت الهيئه \ / يعطيك العافيه اخوي احمد ع هاليوميات وتشرفنا بك سؤال وش معنى يوزرك اذا مافيه خصوصيه ..؟؟ بانتظار سيمو بيك الهنوووف كانت هنا ورحلت

هلا بالهنوف صاحبه الحس التهديفي العالي .. بصراحه العنوان خطير حسستيني اني مجرم
وبالنسبه للشباب اللي مش ولا بد وش يبون فينا يخطفونا ( حصاه وقشعه لا وطفارى )
وبالنسبه للبنت مابغينا نظلمهم يمكن هالبنت اختهم الوحيده وكسرت خاطرهم جالسه لحالها في البيت < ياعمري ياصافي النيه
الشي الثاني أستغربت من جرأتهم وكيف دخلونا وعندهم بنت عشان كذا قلت يمكن انها محرم لهم مابي أسبب لهم مشاكل

SKY < معقول ماعرفتي وش معنى هاليوزر
معناه (السماء)
أخترت هذا اليوزر لأنه من صفاته السمو + الزرقه وهو اللون اللي أعشقه + خفيف ورسمي

ألف شكر لك الهنووف على مرورك الجميل والتنسيق الرائع ليومي

إقتباس الرسالة الأصلية كتبت بواسطة ابونوف الهلالى يموياتك حلوة بس انا ابي اعرف وش هالواسطه اللى طلعتك في يمويات رمضان تمنياتي لك بدوام التوفيق و النجاح ولا يقف موضوع او فكرة فى المجلس العام الا ولـــ هلالى من أرض اليمن والهنوف وقفه وبصمه وفعلا هما العضوان اللذان اضفي على المنتدي كثيرا من الرقي والتقدم

افا واسطه ؟؟ يعني انا ما أستحق في نظرك
عموما الله يسامحك وشكرا على المرور

اختيار موفق لعضو مميز وكنت مشتاق لرؤية يومياته

إقتباس قلت خلني أمر محل كمبيوتر على طريقي ابي اشوف لي فلاش ميموري وأشوف أسعارها شلون صارت لقيت أبو 4 قيقا بـ 60 ريال الله يالدنيا أذكر زمان أول ماطلعت الفلاشات شريت فلاش حجمه 128 ميقا بس بـ 250 ريال الله لا يخسرنا

ايه ايه ياازمن فلاش 60 ميجا شريته ب 120 ريال زمان والحين 4 قيقا ب 60 ريال

بس تصدق كل شيء ارتفع سعره الا اسعار قطع الكمبيوتر .. وللمعلوميه الجهاز المكتبي اللي كان ب 2200 حاليا ب 1100


دنيا

إقتباس رديت ليه وشفيه جهازك ؟؟ قال جاني فيروس وأخاف يكون فيه ملف تجسس يلطش أرقام الحساب السريه < أحلى يابومحمد ياكافشهم

ماشاء الله فاهم ابوي ليته يعرف يخش للرسائل اللي بجواله ..



يوميات رائعه جدا مع عضو عزيز وغالي علينا اكتفي بهذا القدر لاني مشغول للأخير ولكن لما رأيت اسمك قلت مايصير ما امر واقرا كان ودي اعلق على يومياتك بشكل مطول ولكن للظروف احكام






عذرا يا اخوان على الحجز والتأخر بالرد

إقتباس الرسالة الأصلية كتبت بواسطة algohmani اختيار موفق لعضو مميز وكنت مشتاق لرؤية يومياته ايه ايه ياازمن فلاش 60 ميجا شريته ب 120 ريال زمان والحين 4 قيقا ب 60 ريال بس تصدق كل شيء ارتفع سعره الا اسعار قطع الكمبيوتر .. وللمعلوميه الجهاز المكتبي اللي كان ب 2200 حاليا ب 1100 دنيا ماشاء الله فاهم ابوي ليته يعرف يخش للرسائل اللي بجواله .. يوميات رائعه جدا مع عضو عزيز وغالي علينا اكتفي بهذا القدر لاني مشغول للأخير ولكن لما رأيت اسمك قلت مايصير ما امر واقرا كان ودي اعلق على يومياتك بشكل مطول ولكن للظروف احكام عذرا يا اخوان على الحجز والتأخر بالرد

هلا بالغالي ابوعبدالله شرفني كثيرا مرورك العطر وكلامك الجميل عزيز وغالي والله
الله يكون في عيونكم يامشرفي الجمهور خصوصا هاليومين لأن عليكم ضغط في قسم الجمهوور
< هالقلب للي أحبهم