((يوميات رمضانية "18" )) SKY يقتحم استراحه 4 شباب وفتاهـ...!!! - صفحة رقم 4 - نادي الهلال السعودي - شبكة الزعيم

المنتدى الاستشاري · #1 19/09/2008, 03:19 AM

فكرة :: سندريلا الهلال
اعداد ومتابعه ::
هلالي من ارض اليمن و الهنوووف
تصميم :: عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير
**][يوميات رمضانية 1429 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم .
. في سلسلة تحمل بين طياتها يوميات الأعضاء الرمضانية من كل عام ،،،
هذه السلسلة أنتم أهل بيتها ونحن ضيوفا في حضرتكم ،،،

أهلا وسهلا بكم أحبتنا ..
ودعونا نرحب سوية بالمضيف "الثامن عشر"
المتألق :: SKY
لك يحكي لنا احداث يومه مع شهر رمضان المبارك ..

السلام عليكم ورحمة الله وبركاته ..
من هذا المنبر أجدد التهنئة والدعوات الصادقة بأن يضاعف الله لكم الأجر في شهره الفضيل وأن يحرم عظامكم عن النار .. اللهم آمين

في البداية أشكر الصديق الغالي هلالي من أرض اليمن على دعوته لي للمشاركة في يوميات رمضانيه
ويشرفني أن أكون أحد الأعضاء المشاركين كما أشكر أيضاً كل من كان خلف الكواليس لإنجاح هذه الفكرة الرائعة طوال السنوات الماضية

خلوني أبدأ يومي من بعد صلاة الفجر في هالوقت بالعاده اكون مستنفذ كل طاقتي وعينك ماتشوف الا المخده
لكن اليوم حسيت اني نشيط شوي قلت أدخل للشبكه أقرأ بعض المواضيع وأرد على بعضها
الساعه 7 نمت إلى الظهر صليت ورجعت نمت إلى العصر صليت العصر
ثم أخذت شوط في البيت أشوف وش ناقصهم من أغراض قبل أدخل النت
لأني اذا جلست على الجهاز ما احب أحد يقاطعني
وكالعاده مايبون غير خبز بر لجدتي الله يمدها بالصحه والعافيه
طلعت للمخبز وأخذت الخبز قلت خلني أمر محل كمبيوتر على طريقي
ابي اشوف لي فلاش ميموري وأشوف أسعارها شلون صارت
لقيت أبو 4 قيقا بـ 60 ريال الله يالدنيا
أذكر زمان أول ماطلعت الفلاشات شريت فلاش حجمه 128 ميقا بس بـ 250 ريال الله لا يخسرنا

رجعت للبيت دخلت النت أتصفح الشبكه وبعض المواقع الصديقه وهالوقت دايم اكون على النت عشان ما احتك في المطبخ
تعرفون هالفتره بالذات أنواع الأحتفالات في المطبخ

قبل صلاه المغرب بنص ساعه وعلى غير العاده دخل علي ابوي وفي يده فواتير جوال
قال عطني جهازك ابي اسدد الفواتير
رديت ليه وشفيه جهازك ؟؟ قال جاني فيروس وأخاف يكون فيه ملف تجسس يلطش أرقام الحساب السريه < أحلى يابومحمد ياكافشهم

أخذت الفواتير وسددتها عنه وجلس عندي شوي يسولف < الظاهر انه منحاش من ريحه المطبخ

أذن المغرب وطلعنا سوا أفطرت وصليت المغرب ورجعت وكملت باقي الفطور وجلست شوي مع اهلي أتقهوى وأسولف وأطقطق على النت < عاد انا احب اجلس عند اخواني أو الوالد والوالده وانا اتصفح النت اطفش من القعده لحالي
جلست جنب الوالده أوريها صور زواج واحد من عيال العم وبعض الصور الطريفه
المهم وعلى هالجلسه مابين متابعه التلفزيون والنت لين أذن العشاء طلعت وصليت العشا وماتيسر من التراويح

رجعت البيت ودخلت شبكه الزعيم < أحس اني مسحور في هالشبكه اذا أبطيت عنها أحس ناقصني شي

جلست أتصفح وأقرى بعض المواضيع
وأرد على بعضها في قسم الجمهور والمجلس إلى الساعه 10 تقريبا
وكالعاده جات حزه الطلعه للشاليــه دقيت سلف
وتوكلت على الله وصلت للشباب وسوالف وضحك إلى الساعه 12 تقريبا
وينقز واحد من الشباب قال ابي واحد يتبرع
ويخاويني مشوار صغير بشرط يكون وجهه مغسول بمرق ومايستحي

< افا وش يبي هذا ..
نقزت انا وقلت انا اتبرع < طبعا ابي اعرف وش السالفه بس

.
. قال نبي ناخذ جوله على الشاليهات ونوزع استبيانات ونجمع أكثر عدد أجوبه من الشباب
طبعا الرجال يدرس في كليه الطب وهالأستبيان مطلوب عليه
ويتكلم عن التدخين ماهي الأسباب وكيف وقعت في التدخين وكم لك سنه و و و .. الشاليهات طبعا كلها عزااب وتؤجر بالشهر في رمضاان للعزاب فقط
يعني مافيه عوائل نهائيا

المهم أعجبتني هالتجربه قلت توكلنا على الله ..
والله لا يوريكم شفنا من الناس أنواع وأشكاال شفنا الصاحي والمجنون واللي يحاول يستخف دمه
واللي يحاول يسوي فيها لبق
واللي يقول مافيه استبيان للمحششين واللي يحسبنا حكومه يقول أمنعوا الدخان من السعوديه واللي يقول أرفعوا سعره ..
قلت ماعليه نتحملهم >> ( لن يبلغ العلم مستحي أو متكبر )

< المشكله مالي دخل

المهم مرينا الشاليه الأول والثاني والثالث كلهم شباب والشاليه مثل ماقلت خاص للعزاب وممنوع دخول العوائل صرنا مانطق الباب ندخل على طوول نبي نخلص بسرعه .
. اللي معي قفلت أخلاقه من بعض الناس لأن من طبيعته مايطيق الورعنه واللي يستضرفون .. المهم قبل ندخل ذاك الشاليه ما أدري وش اللي خلاني أطق الباب حسيت اني بتصفق لو ادخل على طول
المهم طقينا وطلع لنا واحد وعطيناه الزبده ورحب فينا وقال ادخلوا على اساس تشرحون للشباب الموضوع
المهم الرجال سبقنا واحنا دخلنا بعده .. و أول مادخلنا ونلقى أربع شباب و بنت متغطيه طبعا وباين انها كبيره يعني فوق الـ 25 .. طبعا ماتدخلنا ولا تكلمنا قلنا يمكن محرم والعادات تختلف المهم عطيناهم الزبده ووزعنا الأوراق على الشباب .. نقزت البنت وقالت انا ادخن ابي اعبي ورقه .. المهم اللي معي كانت قافله أخلاقه قلب 180 درجه وأنواع اللباقه والأبتسامات والفلسفه عطاها ورقه وخلصنا بسرعه نبي الفكه

مرينا أكثر من شاليه بعدهم .. وقابلنا صاحب الشاليهات ورحب فينا وقدم لنا قهوه وعصير بالقوه .. وقال انا عندي شاليه في مكان ثاني وبرضو عزاب اذا حابين تروحون لهم راح اكلم لكم الأمن والموضفين هناك يتعاونون معكم
تعذرنا منه وقلنا أكتفينا بالأوراق اللي معنا ومشكور ماتقصر

خلصنا على الساعه 2 من هالحوسه واللفه الطويله والعريضه ورجعنا لشاليهنا ونسولف للشباب عن انواع الأفلام اللي سويناها بعضها مقدر أذكرها هنا

وتسحرنا سوا ورجعت للبيت على الفجر .. صليت ونووووووومه عميقه

بكذا أنتهى يومي وأعتذر اذا غثيتكم بالقرائه وسامحوني على الأطاله

شكر خاص لمشرفي وأستشاري المجلس على جهودهم الجباره في سبيل الأرتقاء بالمجلس

في أمان الله

خارج الموضوع: ألف شكر لك اخوي هلالي على الدعوه ماقصرت يالغالي وأعتذر أشد العذر على تأخري في أرسال يومي لأني رأيت ان ايامي روتينيه وممله لكن حبيت أنتظر إلين جاني هاليوم وأرسلته ..

كل الشكر
للمتميز**][SKY ...♥][ **
وانتظرونا غداَ مع الاستشاري المتميز سيمو

أرق التحايا وأطيبها من
مشرفيي واستشاريي
المجلس العام