الـحـرمـــــــــــــــــــــان - صفحة رقم 25 - نادي الهلال السعودي - شبكة الزعيم

marsal · #1 24/08/2008, 09:32 PM

اتمنى تكون الحقله الاخير قبل رمضان

ومشكووووووووووووووووووووووور

abu_riman · #2 25/08/2008, 02:23 AM

إقتباس

الرسالة الأصلية كتبت بواسطة marsal


	اتمنى تكون الحقله الاخير قبل رمضان ومشكووووووووووووووووووووووور

بإذن الله .
ستكون قبل نهاية هذا الأسبوع .

abu_riman · #3 19/08/2008, 02:02 PM

وصلتني أكثر من رسالة يمكن وصفها بأنها ( غاضبة ) بخصوص ما يحدث ، و البعض يطالب بتقديم شكوى للإدارة .
و أقول لمن أرسلها ..

أولاً أحبكم و شكراً لكم .

ثانياً يمكنني تقديم شكوى و أكثر من ذلك فما زال في الشبكة من ينتصر للحق و الحمدلله أنني أستطيع ، لكن لم أعتد الشكوى و لست من أهلها خصوصاً عندما يتعلق الأمر بي ، و أصحاب القرار في الشبكة أتحدث لهم فقط في حالة واحدة ! عندما أريد تفعيل معرف بناءً على طلب بواسطة البريد أو الماسنجر .

ثالثاً هذا أمر بات بالنسبة لي طبيعياً ، أما آخر المفاجآت احتمالية استخدام ( الماسنجر ) من قبل شخص آخر ، وصلني من البعض أن ( الماسنجر ) يستخدم من قبل شخص آخر و يبدو أنه يريد الإساءة !! فإن كان هذا صحيحاً فحسبي الله و كفى و نعم و الوكيل .

أخيراً ، يكفيني أنكم تستمتعون بما أكتب فهذا كل مطلبي .

شكراً لكم ، و انتظروني في جزء آخر طويل بإذن الله .

abu_riman · #4 20/08/2008, 03:03 AM

@@ الجزء الثالث و العشرون @@

ولد ولد عمي كان يبي حنين و تقدم لخطبتها قبل زوجها الأول ، أمي كانت رافضة فكرة الزواج من الاٌقارب حتى حنين ما كانت تبي من الأقارب .

ما حصل نصيب و بعدها الولد أجل فكرة الزواج نهائياً و سافر يدرس و رجع قبل أيام ، جتني أخبار من بعيد إنه لما تقدم لحنين كان يحبها ، وقتها أعرضت عن الكلام هذا .
من كم يوم قابلته في مجلس عمي ، كان توه راجع من السفر ، و عرفت إن أهله يدورن له .

الولد أشوفه عادي ، لا فيه زود و لا يعيبه شيء !

قررت أعرض عليه فكرة الزواج من حنين ، كان أصعب قرار لكن توكلت على الله و شرعت في التنفيذ و الفضل بعد الله لابو سليمان .

قابلته في المجلس و بعد ما جلسنا شوي و تكلمت معاه عن دراسته و تعشينا قلت له ما ودك نطلع نتمشى شوي ؟!

وافق و طلعنا نتمشى ، تكلمنا عن السفر و عن الغربة و قصدت أجيب طاري حنين و كانت ردة الفعل مثل ما توقعت ، حكيت له عن سالفة زواجها و إن زوجها بالرغم إنه سافر معها ما دخل عليها و ما زالت حنين بنت .

ردة فعله بتفاصيلها كانت متوقعة ، و بالتالي أنا ماشي في الطريق الصحيح بإذن الله .

ختمت كلامنا لما قربنا من البيت بإنه شاب كل بنت تتمناه !!

نعم الشاب اللي ما فيه شيء يعيبه اليوم أشوفه مكسب .

بعد يومين بس ، كانت جدته مرة عمي تكلم أمي و تخطب حنين .

مكاملة الجدة تعني إن أم الولد ما هي راضيه تماماً لكن مو مشكلة و حنين قادرة إنها تقنع أي شخص فيها ، و أقنعت أمي بالشيء هذا و تكلمت معها بخصوص الموضوع ، و صارت الخطبة رسمية و كان ولد عمي عند حسن الظن و كانت حنين مبسوطة و تم كل شيء بشكل سريع و حرصت يتملكون بدري حتى يقربون من بعض و يعرفون بعض أكثر و يمكن هذا ناتج من تجربتي مع مياسم .

حنين الحمدلله مبسوطة و حددنا موعد الزواج بداية الصيف و صرت وقتها أشوف نفسي أسعد إنسان في الدنيا ، أنا مبسوط مع مياسم و حنين مبسوطة مع ولد عمي .

كانت حياتنا جميلة بكل تفاصيلها ، أمي عايشة حياتها مع خالتي و مشاويرها ، حنين مبسوطة و تجهز لزواجها ، نجلاء حامل و مبسوطة لكن عندها مشكلة بسيطة مع زوجها تقول بتسميه عبدالرحمن إذا ولد و حنين إذا بنت و هو رافض يبي اسم على أمه و أبوه .

أنا كنت عايش دنيا ثانية ، مع إنسانة غالية ، إنسانة رائعة بكل المقاييس ، إنسانة ( جنة الدنيا ) !!

رجعت للبيت حصلت أمي تكلم خالتي و حنين و تكلم ولد عمي و تضحك معاه على أمي ، انبسطت كثير و طلعت غرفتي و حكيت مع مياسم و حصلت البنت متحمسة !!

جالسة تشوف مواصفاتي بناءً على برجي !!

عبدالرحمن : " مياسم ، أنت تؤمنين بخرافات الأبراج ؟! "

مياسم : " لا ، بس كذا ودي أشوف "

عبدالرحمن : " طيب علميني كيف شفتيني ؟! كويس تشوفين هالوقت يمديك تهونين "

مياسم : " أكرمني بسكاتك لحظة !! هذا اللي أنا خايفة منه !! مواليد برجك ممكن في أي وقت يتركون البيت و يروحون و ممكن يتزوجون أكثر من مرة "

عبدالرحمن : " ما فيها شيء ، شرع الله "

مياسم : " يا شرع الله اللي ما تعرفونه إلا في التعدد !! "

حكت لي مياسم عن حنين و قالت إنها ما كانت متوقعة إن حنين تعني لي شيء كبير لكن مو لدرجة إنه ممكن يغير حياتي أو نفسيتي بدرجة كبيرة ، و تحمدنا الله على وضع حنين و أنهينا المكالمة .

معقولة بدأت مياسم تفكر بطريقة سلبية ؟!
مستحيل ! مياسم تحمل قلب ( طفل ) .

قبل أنوم أخذت القلم و كتبت لمياسم

" صار أقصى طموحي رضاك ..
و ( ضحكة ) تعتلي شفاياك ..
( أوف ) لو تدرين ( وش ) تسوي بي ضحكتك ؟!
يضحك ( قلبي ) من ( قلب ) !
تسنانس الدنيا و أشعر بالرضى ، و أظل أقول مقصر بالعطاء ..

أنت و ربي تستاهلين ، دام لك قلب ما هو عند و لا واحد من هالملايين !
أنت و ربي أميرة ، شيخة ، حلوة و جميلة و فوق كل هذا أخلاقك أخلاق السحاب ، بس الخير تجيبين ..
أنا إذا صرت معك ( أستسلم ) و بهدوء أجي جنبك و أجلس مثل طفل رجع لأمه بعد اللعب و التعب ، أدب ما وراه أدب !
أنا رسمت أحلام ، و الخيال عجز يجاريني كنت أبيك لحالك دنياي الأولى و هالدنيا كلها دنيا ثانية !!

أوعدك لو سمح وقتك و خلاني معك بعض وقت ..
أوعدك بس لو جت على كيفي كان تشوفين كيف حياتك تصير إذا جبتها على كيفي !!

باقدمك للورد أحلى هدية !
و باعلقك بين جفوني لوحة عبارة عن تحفة فنية ! أحلى رسمة رسمها بالريشة فنان !
و بازين ( بيتنا ) بصورتك ، آه ( حبيبتي ) يا حلوها صورتك ، في كل مكان و على كل جدار ..
في محفظتي الشخصية ما راح أحط لك صورة !
ما يحتاج في قلبي الصورة !

باخلي ( جبينك ) منصى شفاتي ، و أنت .. أنت لحالك يا ( مياسم ) قصة حياتي ..
آه لما تاخذني لك أفكاري يا ( جنة ) حياتي ..

آه لو سمح لي الوقت بس ..
مع شروق الشمس بابوس ( جبينك ) و ما تكفيني عن صباح الخير ..
و إذا غمضت عيونك ( اللي تذبحني ) بابوس جفونك و باهمس أنت والله كل الخير ..

باكتب في حياتك بكل إحساس ، بكل صدق ، بكل وفاء ، بكل عطاء ، و بكل إخلاص كلمة ( أحبك ) ..

باشوفك للوقت كل الهنا ، على قولة الشاعر ..

أنا ما أقول بسنينك تهنى @@ أنا أقول السنين أنت هناها
تباشر بك لياليها و تسعد @@ تحمد الله على خير عطاها

ما همني برج الحمل أو الميزان ، بالغي قوانين البشرية ، و بارسم دستور حبك أقوى قانون ، و باكتب بدمي روح القانون ، و بدمعي بانفذ ما فيه ، بالغي الأعراف و التقاليد ، و في زواجنا ما راح يحضر إلا أنا و أنت و بس !

جنة دنيتي ، أبي تصيرين ( لي ) و أصير ( لك ) ..

عبدالرحمن "

هلاليه كووول22 · #5 20/08/2008, 06:46 AM

هلا ابو ريمان ورده
روايه ممتعه وشيقه

قرأت 23 جزء مره وحده

<<ماحست بنتظار الاعضاء للاجزاء توقعهم للاحداث

الله يعطيك العافيه لا تتأخر علينا ..

دمت بود ورده

الهنوووف · #6 20/08/2008, 09:13 AM

عدنا

اولا
الحمد لله ع سلامتي

اخيرا خلصت
باخذ نفس

والاهم انه من هواء الرياض

اتفق مع اسيره
حلو قراءه الاجزاء متتاليه

الاحداث روووعه تمنيت اني عشتها جزء جزء >>

اطاله فتره الملكه امر اصبح ضروري
على ان يتخللها اتصالاات ولاباس بزياراات خفيفه

انزاح حمل ثقيل على عبدالرحمن الي هو وضع حنين بعد الزواج
ولكن مدامها بتتزوج فهالشي ريحه كثير

علاقه الاخ باخته طبيعي تتغير
فالزوجه مهما كانت مثاليه الا انها بتصيبها غيره

كلام والد مياسم لـ عبدالرحمن
واحساسه بالمسؤليه تجاه المحافظه على مياسم
ان شاء الله يكون نتائجه ايجابيه
فـ مثل ماذكرت الواحد
لاحس ان الشي الي بياخذه ثمين بيبذل كل ماعنده للمحافظه عليه

إقتباس


	أنا إذا صرت معك ( أستسلم ) و بهدوء أجي جنبك و أجلس مثل طفل رجع لأمه بعد اللعب و التعب ، أدب ما وراه أدب !

تشبيه بليغ

متميزة تلك الرساله

والله يعينك فاصحاب الاخلاق الرفيعه
سيستنكرون تلك الرساله وسيطالبون بحجب معرفك

وبينسون انها زوجته

\

/
اخوي ابوريمان
بسرعه زوجهم

قبل لايصير شي مدامهم صالحين

رزقك الله والجميع هنا سعاده دائمه

ماراح نمدح مراعاه لمشاعر بعض الناس

الهنوووف

كانت

هنا

ورحلت

المحبره · #7 20/08/2008, 09:32 AM

^
^
^

الحمد لله على سلامتك الهنوف

نورت الرياض

********

أبو ريمان .. اخر الاجزاء راائعه .. وتفتح النفس وتوسع الصدر

وتضيق صدر المشاغب

الله لو الدنيا حلوة كذا .. والامور تساهيل دائماً ..
عبدالرحمن .. أيامه عال العال .. ماشاء الله

مرتاح من جميع النواحي ..
بس ننتظر الزواج .. لهم كلهم .. واذا فيه مشاكل خلها بعد الزواج مو قبله

اهم شيء يعرسون

واصل .. وأنا في الانتظار

أبو ريمان ,,

,, أنــامُ ملءَ عيوني عنْ شوارِدهـا ***ويـسهرُ الخلقُ جرَاهـَا ويـختصمُ ,,
المتنبي

@واحد مهجول@ · #8 21/08/2008, 09:12 AM

أولاً: شكراً أباريمان على هذه الرواية الجميلة
فلقد عشت الحرمان لحظةً بلحظة , واعتذر عن متابعتي الصامتة ,
الحرمان اللي عشته هو حرمانك لنا من الروايه مره تنزل جزء كل يوم ومره كل ثلاث ايامورده
ثانياً: نبدأ بالتوقعات

اتوقع اذا حنين تزوجت من ولد عمه وهذا الواضح
بتواجه مشاكل مع ام الولد في البدايه لاكن مع مرور الوقت
بتتحسن العلاقة بينهم

إقتباس


	حكت لي مياسم عن حنين و قالت إنها ما كانت متوقعة إن حنين تعني لي شيء كبير لكن مو لدرجة إنه ممكن يغير حياتي أو نفسيتي بدرجة كبيرة

مياسم بدأت تغار من حنين من اللحظه هذي وأحس لما تتزوج مياسم بتزداد الغيرة اكثر

إقتباس

الرسالة الأصلية كتبت بواسطة الهنوووف


	كلام والد مياسم لـ عبدالرحمن واحساسه بالمسؤليه تجاه المحافظه على مياسم ان شاء الله يكون نتائجه ايجابيه فـ مثل ماذكرت الواحد لاحس ان الشي الي بياخذه ثمين بيبذل كل ماعنده للمحافظه عليه

الحمدالله على سلامتك يالهنوف

كلام ابو مياسام واحساس عبدالرحمن بالمسؤليه الكامله عن مياسام
يبين ان مياسام غاليه جدا على ابوها وبيحاول عبدالرحمن قدر
المستطاع انه يحافظ عليها لكن قد يتسبب هذا بالضغط على
عبدالرحمن ويكون حساس من كل شي ينقال عنها

abu_riman · #9 20/08/2008, 03:19 PM

الحمدلله على السلامة الهنوف .

على طاري المدح البارح في التمرين الرئيسي لمباراتنا القادمة ضد العالمية جبت هدف مقص ، لا تستعجلين بينزل ماجد موضوع عن الهدف

الشباب يقولون ما في لعب يوم الخميس بالرغم من الهدف الحلو لأنه يبون نوع من التوازن في المباراة

في نفس الوقت واحد من الشباب ( الغايرين ) مرسلي لي و مسميني نيفاوي ، الحسد و ما يسوي

@@@@@@@@@@@

هلا المحبرة

أولاً هذه فرصة مناسبة لأشكرك جزيل الشكر على كل شيء .

ثانياً من الصعب أن تكون الدنيا دائماً حلوة كذا !! بل مستحيل .
كل محاولاتنا تصب في أن نرضى بالقدر خيره و شر ، نشكره و نحمده ، خيراً و شراً ، نتذكر دوماً أمر المؤمن كله خير .

على كل حال من حق عبدالرحمن أن يفرح و أن يتزوج و أن يسعد فقد عانى بسبب مشكلة حنين الاولى ثم عانى خلال فترة قرار الاختيار و هذا وقته ليسعد فيه بزواجه من إنسانة اختارها بقناعة ، أحبها و تمسك بها و بات يرى الدنيا من خلالها .

شكراً لكم ..
أتمنى لكم قراءة ممتعة و نحن نقترب من النهاية .

كتب لي غيمة عطش ذات مرة في كلمة شعرت بها اكتمالاً " كن أسعد من أعرف "

و أقول لكم أحبتي ..
كونوا أسعد من أعرف ..

سينمائي الزعيم · #10 21/08/2008, 07:08 AM

إقتباس

الرسالة الأصلية كتبت بواسطة abu_riman


	الحمدلله على السلامة الهنوف . على طاري المدح البارح في التمرين الرئيسي لمباراتنا القادمة ضد العالمية جبت هدف مقص ، لا تستعجلين بينزل ماجد موضوع عن الهدف الشباب يقولون ما في لعب يوم الخميس بالرغم من الهدف الحلو لأنه يبون نوع من التوازن في المباراة في نفس الوقت واحد من الشباب ( الغايرين ) مرسلي لي و مسميني نيفاوي ، الحسد و ما يسوي ..

بصراحه انا اشهد انك مشروع لاعب وانا من اللي حضروا التدريب

تصدق لو ان مكانك بدل العنبر كان فاز الهلال على الفريق اليوناني و اليوم لازم نشوفك يابو ريمان بس الحارس بح يلعب مباراة طائرة
بس ماجد مقبل جالس عند العالمية يهايط

جميله هي القصص اول مرة اقرأ قصة في شبكة الأنترنت هكذا جميلة الأجزاء الأخيرة

دمت بمحبة وسلام

Financial 3ziz · #11 21/08/2008, 03:44 AM

كتبت ردّي ولم أعلم بأن الرواية ها هنا..

كما انتظرتك..

انتظر تعليقي..

abu_riman · #12 21/08/2008, 01:30 PM

هلا الترنيدو ،،،

أي مشروع لاعب ؟! مشروع لاعب في الثلاثين ألعب الموسم الجاي و أعتزل بعده

لكن عاد بذمتك وش رأيك في المقص -----> يا ليته ما لعب

@@@@@@@@@@@@@@@@@@@@@@@@@@

هلا واحد مهجول ،،،

الأجزاء القليلة الجاية أوعدك تكون طويلة تقدر تخليها أكثر من جزء .

@@@@@@@@@@@@@@@@@@@@@@@@@@

دبل ،،،

عبدالرحمن قد لا يكون إنساناً مثالياً ، ربما أحداث الرواية تناولت جزءاً من حياته لم يبين سلبياته .
مسألة أن حنين و نجلاء يحبونه و يشوفونه يستاهل أفضل بنت مسألة طبيعية تكاد تكون طريقة كل أخت مع أخيها

يقول المثل الذي لا أحبه " القرد في عين أمه غزال "

دبل متى بنشوف الموضوع الأول بعد الرجعة ؟!
اشتقنا لمواضيعك

دبــل كيــك · #13 21/08/2008, 02:43 PM

^
^
^
^

الـمـسـألـة وقـت بـس أبـوريـمـاان ...

الهنوووف · #14 21/08/2008, 05:26 PM

المحبره واحد مجهول ابوريمان
الله يسلمكم جميعا

بما اني عايشه اجواء الروايه مره قررت اتقمص شخصيه ابوريمان
واسافر كثير

ابوريمان
الله يهديك لما رجعت من السفر مانزلت ولاجزء
تستهبل

عناد قررت اسافر ثانيه
على هونك هالاسبوع بالاجزاء مابي يفوتني شي كثير

وان شاء الله احصل وقت بهالسفره واقدر الحق معاكم

برب

الهنووف

كانت

هنا
ورحلت

abu_riman · #15 22/08/2008, 02:55 AM

@@ الجزء الرابع و العشرون @@

مياسم : " عبدالرحمن أهلي يمكن يسافرون للشرقية بعد زواج حنين "

عبدالرحمن : " حلو ، تغيرون جو . بعدين في وقت قبل زواجنا "

مياسم : " بس بيسافرون بالسيارة ، و تعرفني أخاف من السيارة "

عبدالرحمن : " ما راح يصير إلا الخير إن شاء الله ، بعدين من هنا إلى وقت السفر فيها حلال "

مياسم : " إن شاء الله ، كيف حنين "

عبدالرحمن : " الله يعينها ، كل يوم في السوق "

مياسم : " الله يوفقها ، بعدين ترى انتشر عند البنات إن زوجها يحبها من زمان ، و هذا اللي تتمناه كل بنت اليوم "

عبدالرحمن : " بعض بناتنا تفكيرهم محدود الله يهديهم ، و إلا المهم رجال يحافظ عليها و يسعدها ، و يا ما رجال يحبون بنات تزوجوهم و عيشوهم في جحيم "

مياسم : " صح ، الأهم التفاهم و التضحية من الطرفين و بعدها كل شيء يصير "

زواج حنين أول خميس في الإجازة و كانت فرحتنا كبيرة و كنا مرتاحين ، يمكن كنا نعكس راحة حنين و شخصياً ما كان مزعجني إلا وضع أم ولد عمي شوي ، مع إني سمعت إن حنين بدأت تملأ عينها .

حنين كانت فاهمة إنه مو من مصلحتها تطبق سياستها المعتادة في رفعة الرأس و الكرامة الزايدة ، يعني اتفقت معها ما تدقق في البداية و إلا بتكون النتيجة التصادم ! حنين كانت عاقلة و تصرفت بشكل كويس و بدأت النتائج الإيجابية في زيارة أم الولد قبل الزواج بأيام جايبة هديتها .

حتى الولد جلست معاه مرة ثانية بخصوص وضع حنين أبيه يتأكد إن تحربتها السابقة ما راح يكون لها تأثير على علاقتهم .

مياسم جابت هدية لحنين و كانت معاها في كل لحظة و نجلاء معاهم و إن كان الحمل الأول متعب نجلاء .

في ليلة زواج حنين كان الكل مبسوط و كانت أمي تكرر شكرها لله و كنت أشكر الله في نفسي و في نفسي أقول عن أبو سليمان الله يجزاه عني خير ، و كنت أتمنى إنه حاضر معنا لكنه اعتذر لظروف السفر .

رجعت للبيت بعد الزواج و أنا مقتنع تماماً إن نظريات أهلنا بخصوص الراحة تجي بعد الزواج مجرد كلام فاضي ، حتى اللي ما كانوا مرتاحين في البداية و توفقوا في حياتهم في نظري إنهم غير منسجمين تماماً لكن يملكون قدرة أكبر على التكيف .

آخر الليل كلمتني مياسم و حكت لي عن الأحداث ، كنت أنعس و هي تحكي و الظاهر حست إني ماني يمها و تشرهت الدلوعة ، اضطريت أقوم أغسل وجهي و أقضي باقي الليل أراضيها .

بعد صلاة الفجر جلست مع أمي شوي و حكينا في الزواج ، و بعد الظهر جت حنين مع ولد عمي و طلعت بهم للمطار ، في المطار و كفي بين كفين حنين و كنت على أعصابي ! البنت هذي ممكن في أي لحظة تسوي مسلسل !!

سحبت كفي ببطء و طلعت بورقة صغيرة ، ما كنت أبي ولد عمي يدري عنها ، دخلتها في جيبي و ودعت ولد عمي و أمنته و قلت له حنين في ذمتك و كان كلامي فيه حدة زايدة و يمكن لو زودتها شوي صار تهديد ، ما أدري ليه أحس إن حنين لو صار لها شيء ما راح أسامح نفسي طول عمري ، انهيت الحديث بتبرير واهي غير مقنع قلت له : " لو صار شيء باكون أنا السبب لأني أنا اللي في طريقكم و هي أختي و أنت ولد عمي "
بصراحة حنين تبيع و تشتري كل عيال عمي !!

ركبت السيارة و أخذت الورقة و حصلت حنين كاتبه " أحبك ، الله لا يحرمني منك "

رديت عليها برسالة " و أنا أحبك ، الله يخليك لي "

في الطريق راجع من المطار كلمتني مياسم

مياسم : " راحت حنين ؟! "

عبدالرحمن : " إي نعم ، تسلم عليك "

مياسم : " تروح و ترجع بالسلامة ، الله يوفقها "

عبدالرحمن : " آمين ، و يوفقنا حبيبتي "

مياسم : " آمين ، الليلة عندنا زواج و لما أرجع باكلمك "

عبدالرحمن : " إن شاء الله ، انتبهي لنفسك "

قفلت و أحس في شيء مضايقني ، يمكن قلبي مع حنين .

آخر الليل تكلم مياسم ..

مياسم : " أهلي عزموا يمشون بعد بكره ، و أبوي ما أدري وش فيه ملزم على السيارة "

عبدالرحمن : " أنت لا تصيرين موسوسة ! تعوذي من إبليس و الطيارة بحقها من التعب ! و بعدين إذا أنت ملزمة كلمي عمي بجدية و أكيد راح يتجاوب "

مياسم : " مو قصدي التعب أنا جد أخاف يا عبدالرحمن ، بعدين كلمت بابا بس ما اقتنع يقول أنت موسوسة وتبي الصراحة عبدالرحمن ؟! بالذات السفرة هذي خايفة منها بزيادة "

عبدالرحمن : " مياسم لا تخليني أوسوس معك و شيلي الأفكار هذي من رأسك "

مياسم : " أنتم ليه مو راضين تفهموني ؟ ليه كلكم ضدي قلت لكم خايفة تعرفون معنى كلمة خايفة ؟ أنا خايفة يا ناس "

لهجة مياسم تتغير و بداية بكاء ..

عبدالرحمن : " طيب طيب خلاص حبيبتي إلا دموعك ! و لا يصير خاطرك إلا طيب لا تتضايقين و لا تعصبين القصد كله نتأكد إنها مخاوف ما لها أساس من الصحة بس ! الوقت تأخر الحين ، أنت نامي و باكر فيها حلال "

البنت هذي بتجنني معها ، أنا مو قادر أنام لازم أصبح عمي و أكلمه !